Sikljov te razmisline sar o Jehova hem o Isus

1-2. Sar valjani te manga e Jehova hem sar o Isus kergja adava?

O ISUS objasningja koja tani i najvažno zapoved ko e Mojseeskoro zakoni keda vakergja: „Mang e Jehova, tle Devle, sa tle vilea, sa tle dušaja, sa tle silaja hem sa tle gogjaja“ (Luka 10:27). Znači, mangaja e Jehova sa adalea so isi amen hem celo amare vilea. A ko adava tane vklučime amare želbe, emocie hem sila. Isto agjaar vklučimi tani amari godi ili adava sar dikhaja ko bukja. Džangjola pe, amen nikogaš nane celosno te haljova sar razmislinela o Jehova. Ama šaj pošukar te haljova o način sar razmislinela o Devel agjaar so ka proučina e Hristoseskiri godi soske o Isus sovršeno sikavela sar razmislinela leskoro Dad (1. Kor. 2:16).

² O Isus manglja e Jehova sa ple gogjaja. Ov džanlja koja tani e Devleskiri volja lea hem sine odlučno te postapinel ko sklad adalea, iako adava značinela sine kaj ka valjani te cidel muke. Adaleske so sine leske najvažno te kerel ple Dadeskiri volja, o Isus na dozvolingja ništo te cidel leskoro vnimanie tari adaja cel.

3. So šaj sine o apostol Petar te sikljol taro Isus hem ko so pottikningja o Petar e hristijanen? (1. Petareskoro 4:1).

³ E Petare hem e javere apostolen sine len but šuži prilika te oven zaedno e Isusea hem te sikljoven sar ov razmislinela. Keda o Petar vodimo tari e Devleskiri sila pišingja plo prvo pismo, ov pottikningja e hristijanen lengoro oružje te ovel o isto stavi sar so sine e Hristose. (Čitin 1. Petareskoro 4:1.) O Petar koristingja voeno izraz keda vakergja „tumaro oružje“. Znači, ako o hristijanja trudinena pe te ovel len e Isuseskoro stavi ili te razmislinen sar o Isus, tegani ka ovel len mokjno oružje baši lengiri borba protiv o grešna želbe hem protiv akava sveto ko kova so vladinela o Satana (2. Kor. 10:3-5; Ef. 6:12).

4. Sar akaja statija ka pomožinel amen te primenina e Petareskoro sovet?

⁴ Ki akaja statija ka dikha nešto poviše bašo način sar razmislinela o Isus hem sar šaj te dža palo leskoro primer. Ka doznajna sar šaj 1) te sikljova te razmislina sar o Jehova, 2) te ova ponizna, hem 3) te ova razborita.

SIKLJOV TE RAZMISLINE SAR SO RAZMISLINELA O JEHOVA

5. Sar o Petar ki jekh prilika na razmislingja sar o Jehova?

⁵ Te dikha jekh prilika ki koja o Petar na razmislingja sar o Jehova. O Isus vakergja ple apostolenge kaj mora te džal ko Erusalim, te ovel predajmo e versko vodačenge, te trpinel muke hem ko krajo te ovel mudardo (Mat. 16:21). O Petar džanlja kaj o Isus tano o vetimo Mesija kova so ka spasinel e Devleskere narodo. Šaj adaleske sine leske pharo te verujnel kaj o Jehova ka dozvolinel o Isus te ovel mudardo (Mat. 16:16). Adaleske cidingja le ki strana hem vakergja leske: „Ov šukar sprema tute Gospodare, adava nikogaš nane te slučinel pe tuke“ (Mat. 16:22). O Petar hem o Isus različno razmislinena sine baši akaja buti soske o Petar na razmislinela sine sar o Jehova.

6. Sar o Isus sikavgja kaj razmislinela skroz isto sar o Jehova?

⁶ O Isus razmislinela sine skroz isto sar leskoro nebesno Dad. Ov vakergja e Petareske: „Naš mandar Satano! Tu sian mange bar sopkibaske, soske tle misle nane e Devleskere, nego manušikane“ (Mat. 16:23). O Isus džanlja kaj te šaj te kerel e Devleskiri volja mora te cidel muke hem te merel. Adaleske otfrlingja e Petareskoro sovet, iako e Petare sine le šukar namere. Ki adaja prilika o Petar siklilo jekh važno lekcija — valjani te razmislinel sar o Devel. Adaja pouka važinela amenge da!

7. Sar o Petar sikavgja kaj mangela te sikljol te razmislinel sar o Jehova? (Dikh i slika tari .)

⁷ Pokasno, o Petar sikavgja kaj mangela te sikljol te razmislinel sar o Jehova. Alo o vreme keda o Jehova odredingja o manuša taro javera narodija te oven delo taro leskoro narodo. O Petar dobingja zadača te propovedinel e Kornelijaske, kova so pokasno ulo jekh taro prva hristijanja kola so na sine Evreija. E Evreen na sine len skoro nisavo kontakt e manušencar kola so na sine Evreija. Adaleske, o Petar valjani sine te ispravinel plo razmislibe te šaj te kerel akaja zadača. Keda halilo sar dikhela o Devel ko adala so nane Evreija, ov meningja plo stavi. Adaleske, bizo te buninel pe ov gelo adari kote so sine bičhaldo (Apo. 10:28, 29). O Petar propovedingja e Kornelijaske hem leskere kherutnenge kola so palo adava krstingje pe (Apo. 10:21-23, 34, 35, 44-48).

8. Sar šaj te sikava kaj razmislinaja sar o Jehova? (1. Petareskoro 3:8).

⁸ Beršencar pokasno, o Petar pottikningja e Hristijanen te „oven jekh ko misle“. (Čitin 1. Petareskoro 3:8.) Sar e Jehovaskoro narodo adava šaj te kera ako razmislinaja ko način sar so razmislinela o Jehova, a adava sikljovaja taro leskoro lafi. Na primer, o Isus pottikningja ple sledbenikon o Carstvo te ovel lenge ko prvo than ko životo (Mat. 6:33). Akale mislaja ki godi, nekoj taro tlo sobranie šaj ka odlučinel te počminel polnovremeno službaja. Namesto te sovetina le te ovel šukar sprema peste, amen valjani te kera pozitivno lafi baši leskiri šukar cel hem te poddržina le.

OV PONIZNO

9-10. Sar o Isus sikavgja bari poniznost?

⁹ I rat angleder te ovel mudardo, o Isus sikavgja e Petare hem e javere apostolen jekh važno lekcija baši poniznost. Angleder, o Isus bičhalgja e Petare hem e Jovane te spreminen sa so valjani sine baši posledno večera so valjangja te ovel le lencar angleder te merel. Isto agjaar, izgleda valjangje te spreminen jekh legjeni panjea hem peškiri te šaj te oven thovde e gostongere pre angleder te han. Ama koj ka ovel doborom ponizno te šaj te kerel jekh asavki zadača?

¹⁰ Bizo te mislinel pe o Isus sikavgja bari poniznost. Kobor šaj sine iznenadime o apostolija keda dikhle kaj o Isus kergja nešto so obično kerena le o sluge. O Isus mukhlja ki strana pli upruni nametka hem phanlja pe ki polovina jekh peškiri, čhorgja pani ko legjeni hem počmingja te thovel lengere pre (Jovan 13:4, 5). Ov thovgja e sodešuduje apostolengere pre, a adaleske šaj valjani sine but vreme. O Isus čak thovgja e Judaskere pre, kova so valjani sine te predajnel le. Sepak ov adava kergja le ponizno. Palo adava o Isus strplivo objasningja: „Dali halilen soske thovgjum tumare pre? Tumen vikinena man ’Učitele‘ hem ’Gospodaru‘, hem točno vakerena, soske me sium adava. Adaleske, ako me o Gospodari hem o Učiteli thovgjum tumare pre, tumen da valjani te thoven jekh jekheskere pre“ (Jovan 13:12-14).

11. Sar o Petar sikavgja kaj siklilo te ovel ponizno? (1. Petareskoro 5:5; dikh hem i slika).

¹¹ O Petar siklilo pouka baši poniznost taro Isus. Otkeda o Isus gelo ko nebo, o Petar čudoja sasljargja jekhe manuše kova so bijandilo sakati (Apo. 1:8, 9; 3:2, 6-8). Normalno, o manuša so dikhle adava khedingje pe okolu o Petar (Apo. 3:11). Adaleske so o Petar živinela sine ko opštestvo ko kova sine but važno o ugled hem i položba, dali ka koristinel sine adava momenti te uživinel ki slava? Na, nego o Petar ponizno vakergja e manušenge kaj valjani te del pe slava okolenge kaske so valjani te del pe — e Jehovaske hem e Isuseske. Ov vakergja: „Preku e Isuseskoro anav hem adaleske so verujnaja ko leskoro anav, o pre akale manušeskere, kole so dikhena hem pendžarena, sastile“ (Apo. 3:12-16). Pokasno ko jekh taro ple pismija dži ko hristijanja, o Petar pišingja kobor tano važno te ova ponizna. O lafija so vakergja len šaj setinkerena amen ki prilika keda o Isus phanlja pe ki polovina peškiri hem thovgja ple apostolengere pre. (Čitin 1. Petareskoro 5:5.)

12. Sar šaj te ova sar o Petar hem ponadari da te sikljova te ova ponizna?

¹² Amen šaj te dža palo e Petareskoro primer hem ponadari da te sikljova te ova ponizna. Jekh ponizno manuš kerela but poviše nego samo te vakerel ispravna lafija. O izraz so koristinela o Petar akate bašo lafi poniznost, sikavela kaj ki poniznost tane vklučime amare najgaravde misle. Amen keraja šukar bukja e javerenge adaleske so mangaja e Jehova hem mangaja e manušen, a na adaleske so mangaja o manuša te falinen amen. Ako radosno služinaja e Jehovaske hem amare phralenge ko bilo kova način, bizi razlika dali nekoj dikhela amaro trudo ili na, amen sikavaja kaj siem ponizna (Mat. 6:1-4).

OV RAZBORITO

13. Objasnin soj vklučimo ko adava nekoj te ovel razborito.

¹³ Sar postapinela jekh hristijani kova soj tano razborito? (1. Pet. 4:7). Ov kerela sa te šaj te anel šukar odluke ko sklad e Jehovaskere razmislibaja. Asavko hristijani džanela kaj ko životo nane ništo považno taro leskoro amalipe e Jehovaja. Le nane le baro mislenje baši peste hem haljola kaj na džanela sa. Osven adava, sikavela kaj isi le doverba ko Devel agjaar so često rodela lestar vodstvo ki molitva.a

14. Sar o Petar ki jekh prilika na rodingja pomoš taro Jehova?

¹⁴ I rat angleder te merel, o Isus predupredingja ple učenikon: „Adava so ka slučinel pe mange erat ka kerel tumari vera te slabonel“. Tegani o Petar uverimo ki peste vakergja: „Čak ako sarinengiri vera slabonela bašo adava so ka slučinel pe tuke, mli vera nikogaš nane te slabonel!“ Adaja rat o Isus dengja akava sovet nesavenge taro ple učenikija: „Ačhoven džangavde hem ma čhinaven te molinen tumen“ (Mat. 26:31, 33, 41). Ako o Petar angleder šunela sine akava sovet, šaj ka ovel sine dovolno hrabro te priznajnel kaj tano e Isuseskoro učeniko. Ama, o Petar otkažingja pe ple Učitelestar, a adaleske ov pokasno but kaingja pe (Mat. 26:69-75).

15. Sar o Isus sikavgja razboritost i rat angleder te merel?

¹⁵ E Isuse sine le celosno doverba ko Jehova. Iako sine sovršeno, i rat angleder te merel, ov but puti molinela pe sine e Jehovaske. Adava dengja le hrabrost te postapinel ko sklad e Jehovaskere voljaja (Mat. 26:39, 42, 44; Jovan 18:4, 5). Adava so o Isus molingja pe but puti adaja rat sine nešto so o Petar izgleda nikogaš na bistergja le.

16. Sar o Petar sikavgja kaj ulo razborito? (1. Petareskoro 4:7).

¹⁶ Sar nakhela sine o vreme, o Petar siklilo te ovel le poviše doverba ko Jehova agjaar so molinela pe sine. Otkeda voskresningja o Isus, uveringja e Petare hem e javere apostolen kaj ka dobinen e Devleskiri sila te šaj te propovedinen o šukar haberi. Ama, o Isus vakergja te ačhoven ko Erusalim džikote adava na ovela (Luka 24:49; Apo. 1:4, 5). So kergja o Petar džikote adžikergja? Ov hem o javera phralja hem phenja „na čhinavgje te molinen pe“ (Apo. 1:13, 14). Pokasno ko plo prvo pismo, ov pottikningja e hristijanen te oven razborita hem te ovel len doverba ko Jehova agjaar so ka molinen pe. (Čitin 1. Petareskoro 4:7.) O Petar siklilo te ovel le doverba ko Jehova hem ulo stubo ko sobranie (Gal. 2:9).

17. Bizi razlika save sposobnostija isi amen, so valjani stalno te kera? (Dikh hem i slika.)

¹⁷ Te šaj te ova razborita, mora često te molina amen e Jehovaske. Haljovaja kaj valjani stalno te roda lestar vodstvo ki molitva bizi razlika save sposobnostija isi amen. Adaleske, posebno keda valjani te ana važna odluke, molinaja amen e Jehovaske te del amen vodstvo, hem uverime siem kaj ov džanela soj tano amenge najšukar.

18. So šaj te kera te šaj te razmislina sar o Jehova?

¹⁸ But siem blagodarna e Jehovaske so dengja amen sposobnost te sikava sar leskere osobine (1. Moj. 1:26). Džangjola pe, amen našti sovršeno te kera adava (Isa. 55:9). Ama, isto sar o Petar, amen šaj ponadari da te sikljova te razmislina sar o Jehova, te ova ponizna hem te ova razborita.