STATIJA PROUČBASKE 26
GILI 123 Verno ikeraja amen ko teokratsko redo
Skromno prifatin kaj isi bukja so na džanea
E Semokjno našti te haljova le (JOV 37:23)
SO KA SIKLJOVA
Iako na džanaja so sa ka slučinel pe amenge ko životo, amen valjani skromno te prifatina kaj isi bukja so na džanaja agjaar so ka koncentririna amen ko adava so džanaja hem ka ovel amen doverba ko Jehova.
1. Save sposobnostija dengja amen o Jehova, hem soske?
O JEHOVA dengja amen sposobnost te razmislina, te sikljova neve bukja hem te primenina adava so siklilem. Soske o Jehova stvoringja amen ko asavko način? Ov mangela „[te pendžara] šukar e Devle“ hem te služina leske agjaar so ka koristina amari godi (Izr. 2:1-5; Rim. 12:1).
2. So valjani te priznajna, hem soske adava tano korisno amenge? (Jov 37:23, 24; dikh hem i slika.)
2 Iako o Jehova dengja amen sposobnost te sikljova, isi but bukja so na džanaja. (Čitin Jov 37:23, 24.) Razmislin bašo e Joveskoro primer. O Jehova pučlja le but pučiba kola so pomožingje le te haljol kaj isi but bukja so na džanela. Adava razgovor e Jehovaja pomožingja leske te haljol kaj valjani te ovel ponizno hem te meninel plo način sar razmislinela (Jov 42:3-6). Amenge da ka koristinel ako skromno priznajnaja kaj na džanaja sa. Asavki skromnost pottikninela amen te ovel amen doverba kaj o Jehova ka otkrinel amenge adava so čače valjani te džana te šaj te ana mudra odluke (Izr. 2:6).
Adava so ka priznajna kaj isi bukja kola so na džanaja len, ka koristinel amenge isto sar so koristingja e Joveske (Dikh ko pasus 2)
3. So ka dikha ki akaja statija?
3 Ki akaja statija ka dikha nesave bukja kola so amen na džanaja len hem save predizvikija šaj te oven amen bašo adava. Isto agjaar, ka dikha soske tano šukar adava so na džanaja nesave bukja. Adava so ka sikljova tari akaja statija ka bajrarel amari doverba kaj o Jehova, „okova so sovršeno džanela sa“, vakerela amenge adava so čače valjani te džana (Jov 37:16).
AMEN NA DŽANAJA KEDA KA AVEL O KRAJO
4. Sprema Matej 24:36, so na džanaja?
4 Čitin Matej 24:36. Amen na džanaja keda ka avel o krajo akale svetoske. Čak ni o Isus, džikote sine ki phuv, na džanlja bašo „adava dive hem adava saati“.a Ov pokasno vakergja e apostolenge kaj e Jehova „isi le vlast te odredinel o vreme keda ka oven o bukja“, javere lafencar kaj le isi le pravo te odredinel keda ka slučinen pe nesave nastanija (Apo. 1:6, 7). O Jehova odredingja o vreme keda ka avel o krajo, ama amen našti te džana keda točno ka ovel adava.
5. Sar šaj te vlijajnel upri amende adava so na džanaja keda ka avel o krajo?
5 Sprema adava so vakergja o Isus, amen na džanaja kobor vreme ka valjani te adžikera o krajo. Adaleske, šaj te ova nestrpliva ili te obeshrabrina amen, posebno ako but vreme adžikeraja e Jehovaskoro dive. Ili, šaj te ovel amenge pharo te izdržina adava so nekoj tari amari familija ili javera manuša asana amenge (2. Pet. 3:3, 4). Šaj ka mislina kaj ka ova postrpliva ili kaj polokho ka ikljova ko krajo adalea so o javera asana amenge ako džanaja keda ka avel o krajo.
6. Soske tano šukar adava so na džanaja keda ka avel o krajo?
6 Ustvari, adalea so na otkringja amenge o točno datum, o Jehova dela amen prilika te sikava kaj služinaja leske adaleske so mangaja le hem kaj isi amen doverba ki leste. Amen na služinaja e Jehovaske nesave rokoja ki godi, nego mangaja te služina leske ki celi večnost. Namesto celo vreme te mislina ko adava keda ka avel e Jehovaskoro dive, šukar tano te mislina so sa ka slučinel pe otkeda ka avel adava dive. Adava ka pomožinel amenge te ova popaše e Jehovaja, te ovel amen doverba ki leste hem te kera sa so šaj te radujna le (2. Pet. 3:11, 12).
7. So džanaja?
7 Važno tano te koncentririna amen ko adava so džanaja — kaj o posledna dive počmingje ko 1914 berš. Ko plo Lafi ki Biblija, o Jehova dengja amen proroštvija kola na samo so pomožinena amen točno te odredina adava berš, nego hem detalno objasninena save ka oven o uslovija taro adava berš pa sa dži akana. Adaleske, amen siem uverime ko adava kaj „paše tano o baro dive e Jehovaskoro“ (Sof. 1:14). Isto agjaar, džanaja so mangela o Jehova te kera — kobor so šaj poviše manušenge te vakera o „šukar haberi bašo Carstvo“ (Mat. 24:14). Akava haberi vakerela pe ko okolu 240 phuvja hem ko poviše taro 1000 čhibja. Na valjani te džana „o dive hem o saati“ te šaj revno te kera akaja važno zadača.
NA DŽANAJA SO KA KEREL O JEHOVA TE ŠAJ TE POMOŽINEL AMEN
8. Ko so mislinela pe e lafencar „o postapke e čačutne Devleskere“? (Propovednik 11:5).
8 Amen na džanaja sekogaš „o postapke e čačutne Devleskere“. (Čitin Propovednik 11:5.) Akale lafencar mislinela pe ko adava so o Jehova predizvikujnela ili mukhela te slučinel pe te šaj te kerel pe leskiri volja. Amen našti točno te džana soske o Jehova mukhela nešto te slučinel pe ili so točno ka kerel te šaj te pomožinel amen (Ps. 37:5). Našti te haljova adava isto sar so našti te haljova sar razvinela pe jekh čhavo ple dajake ko vogi, nešto so čak ni o naučnikija našti celosno te haljon.
9. Save predizvikija šaj te oven amen adaleske so na džanaja so ka kerel o Jehova te šaj te pomožinel amen?
9 Adaleske so na džanaja so ka kerel o Jehova te šaj te pomožinel amen, šaj te na ova odlučna. Šaj te počmina te mislina amen dali te kera nesave žrtve te šaj te kera poviše ki služba, sar na primer te poednostavina amaro životo ili te selina amen adari kote so isi pobari potreba taro objavitelija. Ili palem, šaj te sumnina amen dali o Devel tano zadovolno amendar ako na ispolningjem nesavi teokratsko cel, ako na dikhaja bare rezultatija taro trudo so daja ki služba ili ako isi amen pharipa ko nesavo gradežno proekti ki amari organizacija.
10. Kola važna osobine šaj te razvina len adaleske so na džanaja so ka kerel o Jehova te šaj te pomožinel amen?
10 Adava so na džanaja so ka kerel o Jehova te šaj te pomožinel amen, ustvari dela amen prilika te razvina nesave važna osobine sar soj i poniznost hem i skromnost. Osven adava, pomožinela amen te haljova kaj e Jehovaskere misle hem drumija tane pouče taro amare (Isa. 55:8, 9). Isto agjaar, sikljovaja te ovel amen celosno doverba kaj o Jehova ka grižinel bašo bukja ko jekh najšukar način. Keda ka oven amen nesave šukar rezultatija ki služba ili ko nesavo gradežno proekti, svesna siem kaj sa i slava valjani te da e Jehovaske (Ps. 127:1; 1. Kor. 3:7). Ako nešto na ikljola agjaar sar so očekujngjem, na valjani te bistra kaj o Jehova panda isi le celosno kontrola upro bukja (Isa. 26:12). Amen keraja amaro delo, a ko isto vreme isi amen doverba kaj o Jehova ka kerel plo delo. Uverime siem kaj ov ka del amen o vodstvo so valjani amenge iako šaj nane te kerel adava preku nesavo čudo sar so ponekogaš kergja angleder (Apo. 16:6-10).
11. Kola važna bukja džanaja?
11 Džanaja kaj o Jehova tano sekogaš pherdo mangipaja, tano pravedno hem mudro. Isto agjaar, džanaja kaj ov but ceninela sa adava so keraja baši leste hem bašo amare phralja hem phenja. A džanaja hem kaj o Jehova sekogaš nagradinela okolen soj leske verna (Evr. 11:6).
NA DŽANAJA SO KA OVEL TAJSA
12. Sprema Jakov 4:13, 14, so na džanaja?
12 Čitin Jakov 4:13, 14. Jekh osnovno čačipe tano adava kaj na džanaja savo ka ovel amaro životo tajsa. Ko akava sveto „o vreme hem o bukja so našti te predvidinen pe arakhena sekole manuše“ (Prop. 9:11). Adaleske, našti te džana dali amare planija ka uspejnen, pa čak ni dali ka ova dživde te šaj te ispolnina len.
13. Sar šaj te vlijajnel upri amende adava so na džanaja so šaj te slučinel pe amenge ko životo?
13 Adava so na džanaja so ka slučinel pe amenge ko životo šaj te kerel amenge baro pharipa. Ki savi smisla? Ako siem previše sekirime bašo adava so šaj ka slučinel pe, šaj te našava amari radost. Amaro životo šaj taro jekh puti te meninel pe ili šaj taro jekh puti te slučinen pe lošna bukja. Adava šaj te kerel te osetina bari dukh hem sekiracija. A ako o bukja na ikljona agjaar sar so očekujngjem, šaj te razočarina amen hem te obeshrabrina amen (Izr. 13:12).
14. Taro so zavisinela dali ka ova čače srekjna? (Dikh hem o slike.)
14 Keda istrajnaja ko phare situacie, dokažinaja kaj bizi razlika so ka slučinel pe, amen služinaja amare nebesno Dadeske taro mangipe, a na taro sebična motivija. O bibliska izveštaija sikavena kaj na valjani te očekujna o Jehova te zaštitinel amen taro sa o pharipa hem kaj ov na odlučingja angleder so sa ka slučinel pe amenge ko životo. Ov džanela kaj amari srekja ko životo na zavisinela taro adava dali džanaja so ka ovel ki idnina. Namesto adava, amari srekja zavisinela taro adava dali rodaja lestar vodstvo hem dali siem leske poslušna (Erem. 10:23). Adalea so isi amen doverba ki leste keda anaja odluke, amen ustvari vakeraja: „Ako o Jehova mangela, ka živina hem ka kera akava ili okova“ (Jak. 4:15).
Ako rodaja vodstvo taro Jehova hem ako siem leske poslušna, šaj te ova sigurna kaj ov ka pomožinel amen hem ka blagoslovinel amen (Dikh ko pasusija 14-15)b
15. So džanaja baši idnina?
15 Iako na džanaja so ka slučinel pe sekova nevo dive, džanaja kaj o Jehova vetingja amenge večno životo — bilo ko nebo, bilo ki phuv. Džanaja kaj ov našti te hovavel hem kaj ništo našti te čhinavel le te ispolninel sa ple vetuvanja (Tit 1:2). Samo ov šaj „taro početok [te vakerel] o krajo, odamna [te vakerel] adava so panda na ulo“. Agjaar sine angleder, a agjaar ka ovel hem ki idnina (Isa. 46:10). Sigurna siem ko adava kaj ništo našti te čhinavel e Jehova te mangel amen (Rim. 8:35-39). Ov ka del amen i mudrost, i uteha hem i sila so valjanena amenge te šaj te istrajna bizi razlika so ka slučinel pe. Šaj te ova sigurna kaj o Jehova ka pomožinel amen hem ka blagoslovinel amen (Erem. 17:7, 8).
NAŠTI CELOSNO TE HALJOVA KOBOR ŠUKAR PENDŽARELA AMEN O JEHOVA
16. So džanela o Jehova baši amenge, hem sar osetinea tut bašo adava? (Psalm 139:1-6).
16 Čitin Psalm 139:1-6. Amaro Stvoriteli džanela sar siem stvorime hem so vlijajnela upri amende ko fizičko hem emocionalno pogled. Ov celo vreme interesinela pe amenge. Ov džanela so vakeraja hem so mangaja te vakera adalea, so keraja hem soske keraja adava. Sprema adava so vakergja o cari o David, o Jehova tano sekogaš uzi amende hem spremno tano te pomožinel amen. Zarem na vooduševinela tut adava so o Najbaro Vladeteli, o Semokjno Stvoriteli e neboskoro hem e phuvjakoro doborom but interesinela pe amenge! Sar so vakergja o David: „Adava pendžaribe tano mange but čudesno, doborom učo so našti te haljovav le“ (Ps. 139:6).
17. Soske šaj te ovel amenge pharo te prifatina kaj o Jehova šukar pendžarela amen?
17 Bašo adava so slučingja pe amenge nešto ki familija, baši amari kultura ili bašo adava ko so verujnaja sine angleder, šaj te ovel amenge pharo te dikha e Jehova sar Dad kova soj pherdo mangipaja hem kova grižinela pe amenge. Ili šaj mislinaja kaj adaleske so angleder kergjem doborom seriozna greške, o Jehova nikogaš nane te mangel te džanel nešto baši amenge hem kaj ov tano dur amendar. Čak hem o David ponekogaš osetinela pe sine agjaar (Ps. 38:18, 21). Ili palem, nekoj so živinela nemoralno, ama iskreno mangela te živinel sprema e Devleskere pravedna merilija, šaj pučela pe: „Ako o Devel čače pendžarela man, tegani soske očekujnela mandar te meninav man namesto te prifatinel man savo so sium?“
18. Soske amenge korisno te prifatina adava kaj o Jehova pendžarela amen pošukar amendar? (Dikh hem o slike.)
18 Amen šaj te uspejna te prifatina adava kaj o Jehova pendžarela amen pošukar amendar hem kaj šaj te dikhel o šukar ki amende kova so amen našti te dikha. Iako dikhela amare greške hem haljola soske osetinaja amen ili postapinaja ko odredeno način, ov sepak mangela amen (Rim. 7:15). Keda ka haljova kaj o Jehova sekogaš dikhela savi ličnost šaj te ova, adava ka del amen i sila so valjani amenge te šaj te služina leske verno hem radosno.
O Jehova pomožinela amenge keda na džanaja so ka anel amenge o životo ko akava sveto agjaar so bajrarela amari doverba kaj ka živina ko jekh but šužo nevo sveto (Dikh ko pasusija 18-19)c
19. Ko kola bukja ni hari na sumninaja amen bašo Jehova?
19 Amen džanaja kaj o Jehova tano mangipe. Ni hari na sumninaja amen ko adava (1. Jov. 4:8). Džanaja kaj leskere pravedna merilija sikavena leskoro mangipe sprema amende hem kaj ov mangela te živina o najšukar životo so šaj. Isto agjaar, džanaja kaj o Jehova mangela te dobina večno životo. Te šaj adava te ovel, ov dengja i otkupnina. Akava but šužo poklon uverinela amen kaj šaj uspešno te služina e Jehovaske iako siem nesovršena (Rim. 7:24, 25). A džanaja hem kaj „o Devel tano pobaro [taro amaro vilo] hem ov džanela sa“ (1. Jov. 3:19, 20). O Jehova džanela sa baši amende hem kaj šaj uspešno te kera leskiri volja.
20. So ka pomožinel amenge te na ova previše sekirime?
20 O Jehova na kratingja amendar nijekh informacija koja so čače valjani te džana la. Ako skromno prifatinaja akava, nane te ova previše sekirime bašo bukja upri kolende so nane amen kontrola hem ka šaj te koncentririna amen ko adava soj čače važno. Ko asavko način, sikavaja kaj isi amen celosno doverba ko Jehova, „okova so sovršeno džanela sa“ (Jov 36:4). Iako akana adava so džanaja tano ograničimo, edvaj adžikeraja te avel o nevo sveto kote so ki celi večnost ka sikljova neve bukja bašo amaro but šukar Devel (Prop. 3:11).
GILI 104 O Devel dela amen sveti duh
a Adaleske so o Isus ka predvodinel ki vojna protiv o lošno sveto e Satanaskoro, logično tano te haljova kaj ov akana džanela keda ka počminel o Armagedon hem keda ka „završinel pli pobeda dži ko krajo“ (Otk. 6:2; 19:11-16).
b OBJASNIMI SLIKA: Jekh dad hem leskoro čhavo spreminena ranco bašo itno slučaj e familijake te šaj te ovel spremno.
c OBJASNIMI SLIKA: Jekh phral kole so isi le problemija razmislinela bašo but šužo životo so ka ovel le ko nevo sveto.