Pouke taro proroštvo so vakergja le o Jakov angleder te merel —dujto delo

1. So ka dikha ki akaja statija?

E JAKOVESKERE čhave khedingje pe uzi leste hem šukar šunena sine džikote lengoro phuro dad blagoslovinela sine sekole jekhe lendar. Ki angluni statija dikhlem kaj o Ruvim, o Simeon, o Levi hem o Juda but iznenadingje pe taro lafija ple dadeskere. Adaleske, ola sigurno pučena pe sine so ka vakerel o Jakov okole ofto čhavenge da. Te dikha so šaj te sikljova taro adava so o Jakov vakergja e Zavuloneske, e Isahareske, e Daneske, e Gadeske, e Asereske, e Neftalimeske, e Josifeske hem e Benjamineske.a

O ZAVULON

2. So vakergja o Jakov e Zavuloneske, hem sar ispolningje pe adala lafija? (1. Mojseeva 49:13; dikh hem i ramka.)

² Čitin 1. Mojseeva 49:13. O Jakov vakergja kaj o čhave e Zavuloneskere ka živinen uzo more, ko severno delo tari Vetimi phuv. Poviše taro 200 berša pokasno, o pleme Zavulon dobingja delo tari phuv kova so arakhljola sine maškar o Galilejsko hem o Sredozemno More. Iako lengoro delo na ikljola sine direktno ko more, sepak sine paše uzi leste. O Mojsej prorokujngja: „Radujn tut Zavulon ko tle patujba“ (5. Moj. 33:18). Akalea šaj mislinela pe sine ko adava kaj o pleme Zavulon lokhe šaj sine te resel ko solduj morija kote so šaj sine te kerel trgovija adaleske so adathe avena sine manuša taro razna thana. Bilo sar te ovel sine, e Zavuloneskere pleme sine le pričina te ovel srekjno.

3. So ka pomožinel amen te ova zadovolna?

³ So šaj te sikljova? Sekogaš isi amen pričina te ova radosna bizi razlika kaj živinaja ili save tane amare okolnostija. Te šaj te ačhova radosna mora te ova zadovolna adalea so isi amen (Ps. 16:6; 24:5). Ponekogaš amenge šaj polokho te koncentririna amen ko adava so nane amen namesto ko šukar bukja so isi amen. Adaleske, te trudina amen te dikha o pozitivna bukja ko amare okolnostija (Gal. 6:4).

O ISAHAR

4. So vakergja o Jakov e Isahareske, hem sar ispolningje pe adala lafija? (1. Mojseeva 49:14, 15; dikh hem i ramka.)

⁴ Čitin 1. Mojseeva 49:14, 15. O Jakov falingja e Isahare adaleske so sine bukjarno hem ki pozitivno smisla sporedingja le herea kole so isi le zorale kokala — životno kova so šaj te phiravel pharipe. O Jakov isto agjaar vakergja e Isahareske kaj ka ovel le šukar phuv. Sprema o lafija e Jakoveskere, o potomcija e Isahareskere dobingje plodno phuv uzi reka Jordan (Is. Nav. 19:22). Sigurno ola kergje but buti te šaj te obrabotinen pli phuv, ama ola isto agjaar but trudingje pe te pomožinen e javerenge (1. Car. 4:7, 17). Na primer, keda o sudija o Varak hem i proročica i Devora rodingje pomoš taro Izraelcija te šaj te borinen pe protiv o Sisara, o pleme Isahareskoro sine jekh taro plemija kola so nudingje pe te pomožinen. A sine spremna te borinen pe ko javera da prilike (Sud. 5:15).

5. Sar šaj te dža palo primer e Isahareskere potomcongoro, hem soske?

⁵ So šaj te sikljova? O Jehova ceninela o trudo so daja ki služba baši leste isto sar so ceningja o trudo e plemeskoro Isahar (Prop. 2:24). Na primer, razmislin bašo starešine kola so but trudinena pe te šaj te grižinen pe bašo sobranie (1. Tim. 3:1). Ola na učestvujnena ko doslovna borbe, ama mora naporno te keren buti te šaj te zaštitinen e Devleskere narodo taro duhovna opasnostija (1. Kor. 5:1, 5; Juda 17-23). Isto agjaar, ola but trudinena pe te šaj te spreminen hem te ikeren ohrabruvačka govorija te šaj te keren pozoralo o sobranie (1. Tim. 5:17).

O DAN

6. Savi zadača dobingja o pleme Dan? (1. Mojseeva 49:17, 18; dikh hem i ramka.)

⁶ Čitin 1. Mojseeva 49:17, 18. O Jakov bašo Dan vakerela kaj tano sar sap kova so napadinela pobare životnen, sar na primer graste kova so koristinela pe borbake. O Dan sine opasnost e Izraelcongere dušmanenge. Džikote o Izraelcija patujnena sine dži ki Vetimi phuv, o pleme taro Dan sine lenge „sar zaštitno straža“ (4. Moj. 10:25). Adaja sine važno zadača iako o javera Izraelcija našti sine te dikhen sa so kergja lenge o pleme Dan.

7. So valjani te ovel amen ki godi baši bilo koja zadača so keraja la ki služba bašo Jehova?

⁷ So šaj te sikljova? Dali nekogaš kergjan nesavi zadača baši koja so mislinea kaj nikoj na primetingja adava? Šaj pomožingjan ko čistibe hem održibe i dvorana, šaj sian sine dobrovolco ko nesavo kongres ili kergjan nesavi javer zadača. Ako tano agjaar, tu sian baši pofalba! Nikogaš ma bistre kaj o Jehova primetinela hem ceninela sa so kerea baši leske. Ov posebno ceninela keda služinea leske na adaleske so mangea o javera te falinen tut, nego adaleske so mangea te sikave leske iskreno mangipe (Mat. 6:1-4).

O GAD

8. Soske o pleme Gad šaj sine lokheste te ovel napadimo taro dušmanja? (1. Mojseeva 49:19; dikh hem i ramka.)

⁸ Čitin 1. Mojseeva 49:19. O Jakov prorokujngja kaj o Gad ka ovel napadimo taro čora. Poviše taro 200 berša pokasno, o pleme Gad nasledingja i phuv istočno tari reka Jordan koja so sine paše uzo narodija kola so sine lenge dušmanja. Adaleske, e pleme Gad but lokheste šaj sine te napadinen o dušmanja. Sepak, o pleme Gad manglja te živinel ki adaja phuv adaleske so adathe sine but šuže livade baši leskiri stoka (4. Moj. 32:1, 5). Jasno tano kaj o manuša taro pleme Gad sine hrabra manuša. Soj tano panda považno, len sine len doverba kaj o Jehova ka pomožinel len te arakhen i phuv so dengja la lenge taro bilo kova dušmani so ka napadinel len. Ola čak beršencar bičhalena sine ple vojnikon te pomožinen e javere plemenge te šaj dži ko krajo te osvojnen i Vetimi phuv, zapadno tari reka Jordan (4. Moj. 32:16-19). Len sine len doverba kaj o Jehova ka arakhel e džuvlen hem e čhaven džikote o murša tane ki borba. O Jehova blagoslovingja len baši lengiri hrabrost hem samopožrtvuvanost (Is. Nav. 22:1-4).

9. Sar amari doverba ko Jehova ka vlijajnel upro amare odluke?

⁹ So šaj te sikljova? Te šaj te služina e Jehovaske ko phare da situacie, mora ponadari da te ovel amen doverba ki leste (Ps. 37:3). But džene avdive sikavena kaj isi len doverba ko Jehova adalea so spremno kerena žrtve te šaj te učestvujnen ko gradibe teokratska objektija, te služinen adari kote so isi pobari potreba ili te šaj te pomožinen ki e Jehovaskiri organizacija ko javera načinija. Ola kerena adava soske tane uverime kaj o Jehova sekogaš ka grižinel pe baši lende (Ps. 23:1).

O ASER

10. Savi prilika našavgja o pleme Aser? (1. Mojseeva 49:20; dikh hem i ramka.)

¹⁰ Čitin 1. Mojseeva 49:20. O Jakov prorokujngja kaj o pleme Aser ka ovel barvalo hem adava čače ispolningja pe. Akava pleme nasledingja nesave taro najplodna delija ko celo Izrael (5. Moj. 33:24). Leskiri phuv sine odma uzo Sredozemno More hem adathe sine o Sidon kova so sine barvalo fenikisko trgovsko pristanište. Ama o pleme Aser na brkingja e Hanaancon tari adaja phuv (Sud. 1:31, 32). Izgleda kaj o pleme Aser našavgja pli revnost bašo čisto obožavibe adaleske so sine le barvalipe, ama hem so sine le lošno vlijanie taro Hanaancija. Na primer, keda o sudija o Varak rodingja pomoš taro Izraelcija te šaj te borinel pe protiv i Hanaansko vojska, o pleme Aser na nudingja pe te pomožinel. Adaleske, akava pleme našavgja i prilika te učestvujnel ki pobeda so o Jehova čudoja dengja e Izraelconge „ko panja ko Megido“ (Sud. 5:19-21). O pleme Aser verojatno ladžandilo keda šungja i pobedničko gili so giljavgje la o Varak hem i Devora, ki koja so sine o stiho: „O Aser bešela sine uzo more hem ništo na kerela sine“ (Sud. 5:17).

11. Soske valjani uramnoteženo te dikha ko materijalna bukja?

¹¹ So šaj te sikljova? Amen mangaja te da amaro najšukar e Jehovaske. Te šaj te kera adava, valjani te pazina te na ova sar o manuša taro akava sveto kola so mislinena kaj o pare hem adava so šaj te kinen e parencar tano najvažno nešto ko životo (Izr. 18:11). Amen trudinaja amen te dikha uramnoteženo ko pare (Prop. 7:12; Evr. 13:5). Na mangaja ništo te čhinavel amen te kera amari služba bašo Devel. Adaleske, na trošinaja amaro vreme hem amari sila te šaj te kheda materijalna bukja kola so ustvari na valjanena amenge čače. Namesto adava, trudinaja amen te da amaro najšukar e Jehovaske soske džanaja kaj ki idnina adžikerela amen čače sigurno hem udobno životo (Ps. 4:8).

O NEFTALIM

12. Sar šaj ispolningje pe o lafija e Jakoveskere so vakergja len bašo Neftalim? (1. Mojseeva 49:21; dikh hem i ramka.)

¹² Čitin 1. Mojseeva 49:21. O Jakov vakergja kaj o Neftalim ka vakerel „šuže lafija“. Akava šaj mislinela pe ko način sar o Isus kerela sine lafi džikote kergja pli služba ki phuv. O Isus, kova so sine pendžardo palo adava kaj šukar sikavela e javeren, selingja pe ko Kapernaum, podračje ko Neftalim (Mat. 4:13; 9:1; Jovan 7:46). Povrzimo e Isusea, o Isaija prorokujngja kaj o manuša taro pleme Zavulon hem Neftalim ka dikhen „bari svetlina“ (Isa. 9:1, 2). Bašo način sar sikavela sine, o Isus sine „čačutni svetlina, so svetinela upro sa o manuša“ (Jovan 1:9).

13. Sar šaj te radujna e Jehova amare lafencar?

¹³ So šaj te sikljova? E Jehovaske tano važno so vakeraja hem sar vakeraja adava. Ko savo način šaj te vakera „šuže lafija“ kolencar so ka radujna e Jehova? Jekh način tano agjaar so ka vakera o čačipe (Ps. 15:1, 2). Osven adava, šaj te ohrabrina e javeren amare lafencar agjaar so ka trudina amen te falina len namesto te kritikujna len hem te žalina amen (Ef. 4:29). Isto agjaar, šaj te čhiva amenge cel pošukar te počmina razgovorija kola so ka anen dži ko adava te svedočina.

O JOSIF

14. Sar ispolningja pe o proroštvo bašo Josif? (1. Mojseeva 49:22, 26; dikh hem i ramka.)

¹⁴ Čitin 1. Mojseeva 49:22, 26. O Jakov sigurno dičinela pe sine e Josifea. Ov sine „birimo maškar leskere phralja“ hem o Jehova koristingja le ko posebno način. O Jakov baši leste vakergja kaj tano „granka taro plodno kaš“. O kaš sine o Jakov, a o Josif sine leskiri granka. O Josif sine o prvobijamo čhavo e Jakoveskoro tari leskiri mangli romni i Rahela, a o Ruvim sine o prvobijamo čhavo e Jakoveskoro tari leskiri romni i Lija. Ama adaleske so o Ruvim našavgja o pravo sar prvobijamo, o Jakov prorokujngja kaj o Josif ka dobinel o duplo delo taro leskoro nasledstvo (1. Moj. 48:5, 6; 1. Let. 5:1, 2). Akava delo taro proroštvo ispolningja pe keda taro Efrem hem taro Manasija, o duj čhave e Josifeskere, ule duj plemija ko Izrael kola so nasledingje pli phuv (1. Moj. 49:25; Is. Nav. 14:4).

15. Sar reagiringja o Josif ko nepravde so sine le?

¹⁵ Isto agjaar, o Jakov bašo Josif vakergja: „Streladžie strelingje le hem mrzingje le“ (1. Moj. 49:23). Adala streladžie sine leskere ljubomorna phralja kola so sine kriva bašo but nepravde so doživingja len. Sepak, o Josif na mrzingja ple phralen hem na krivingja e Jehova bašo adava so slučingja pe. Baši leste o Jakov vakergja: „Leskiri strelka sine zorali, leskere vasta sine silna“ (1. Moj. 49:24). Džikote nakhela sine taro phare situacie, e Josife sine le doverba ko Jehova hem na samo so prostingja ple phralenge nego hem postapingja lencar ljubezno (1. Moj. 47:11, 12). O Josif dozvolingja o nevolje so sine le te čistinen le, javere lafencar te pomožinen le te ovel pošukar manuš (Ps. 105:17-19). Adaleske, o Jehova šaj sine te koristinel le ko jekh posebno način.

16. Sar šaj te dža palo primer e Josifeskoro keda isi amen nevolje?

¹⁶ So šaj te sikljova? Nikogaš te na mukha o nevolje te ciden amen taro Jehova hem taro amare phralja hem phenja. Ma bistre kaj keda amari vera tani ispitimi, o Jehova šaj te oblikujnel amen (Evr. 12:7). Ov šaj te pomožinel amen te razvina ili panda poviše te sikava o hristijanska osobine sar soj milost hem prostibe (Evr. 12:11). Šaj te ova sigurna kaj o Jehova ka nagradinel amen baši amari istrajnost isto sar so nagradingja e Josife.

O BENJAMIN

17. Sar ispolningja pe o proroštvo bašo Benjamin? (1. Mojseeva 49:27; dikh hem i ramka.)

¹⁷ Čitin 1. Mojseeva 49:27. O Jakov prorokujngja kaj o pleme Benjamin ka ovel le but bare voena veštine „sar ruv“ (Sud. 20:15, 16; 1. Let. 12:2). „Sabajle“, javere lafencar keda ko Izrael počmingje te vladinen carija, taro pleme Benjamin iklilo o prvo cari ko Izrael, o Saul. Ov bizi dar boringja pe e Filistejconcar (1. Sam. 9:15-17, 21). „Rakjate“, javere lafencar keda e Izraelcon na sine len više cari, i Estira hem o Mardohej, kola so sine taro pleme Benjamin, pomožingje te na oven uništime o Izraelcija ko Persisko Carstvo (Est. 2:5-7; 8:3; 10:3).

18. Sar šaj te ova verna isto sar o pleme Benjamin?

¹⁸ So šaj te sikljova? O manuša taro pleme Benjamin sigurno dičingje pe e Saulea keda ulo cari soske sine taro lengoro pleme. Ama, pokasno, o Jehova čhivgja sar cari e Davide, kova so sine taro pleme e Judaskoro. Sepak, o manuša taro pleme Benjamin ko krajo poddržingje adaja promena (2. Sam. 3:17-19). Beršencar pokasno, keda deš taro plemija buningje pe, o pleme Benjamin verno poddržingja o pleme Juda hem e care kole so o Jehova čhivgja le (1. Car. 11:31, 32; 12:19, 21). Amen da šaj te dža palo lengoro primer agjaar so verno ka poddržina okolen so o Jehova čhivela len te šaj te vodinel leskere narodo avdive (1. Sol. 5:12).

19. Sar koristinela amenge o proroštvo so vakergja le o Jakov angleder te merel?

¹⁹ O proroštvo so vakergja le o Jakov angleder te merel šaj but te koristinel amenge. Adava so dikhlem sar ispolningja pe leskoro proroštvo kerela pozorali amari vera kaj ka ispolninen pe javera da proroštvija taro e Jehovaskoro Lafi. A adava so dikhlem sar sine blagoslovime o čhave e Jakoveskere pomožinela amen pošukar te haljova sar šaj te radujna e Jehova.