Te živina sprema i vera

1. Soske o apostol Pavle šaj sine te ovel zadovolno ple životoja?

O APOSTOL Pavle džanlja kaj panda hari ka ovel mudardo, ama šaj sine te ovel zadovolno e životoja so živingja le. Adaleske vakergja: „Prastandiljum i trka dži ko krajo, mli vera arakhljum“ (2. Tim. 4:6-8). O Pavle angja mudra odluke ki služba bašo Jehova hem sine uverimo kaj ov tano zadovolno lestar. Amen da mangaja te ana šukar odluke te šaj o Devel te ovel amendar zadovolno. So ka pomožinel amen ko adava?

2. So značinela te živina sprema i vera?

² Baši peste ama hem bašo javera verna hristijanja, o Pavle vakergja: „Živinaja sprema i vera, a na sprema adava so dikhaja“ (2. Kor. 5:7). So manglja te vakerel o Pavle akalea? Keda nekoj živinela samo sprema adava so dikhjola, ov anela odluke so temelinena pe samo ko adava so dikhela, so šunela hem so osetinela. Tari javer strana, okova so živinela sprema i vera anela odluke kola so temelinena pe ki leskiri doverba ko Jehova, o Devel. Taro leskere postapke dikhjola kaj ov tano uverimo kaj o Devel ka nagradinel le ki idnina, ama hem kaj panda akana tano bašo leskoro šukaripe adava so ikerela pe ko e Jehovaskere sovetija tari Biblija (Ps. 119:66; Evr. 11:6).

3. Sar koristinela amenge adava so živinaja sprema i vera? (2. Korinkjanja 4:18).

³ Džangjola pe, sarine amen ponekogaš anaja odluke sprema adava so dikhaja, šunaja ili osetinaja. Ama, šaj te oven amen problemija ako, keda anaja važna odluke laja ko predvid samo adava so dikhaja ili šunaja. Soske? Ponekogaš, adava so dikhaja hem šunaja šaj te hovavel amen. Ama, čak hem te na hovavel amen, ako anaja odluke samo sprema adava so dikhaja, šaj te počmina te kera nešto so o Jehova na mangela (Prop. 11:9; Mat. 24:37-39). Ama, keda živinaja sprema i vera, poverojatno tano kaj ka ana odluke kola soj sprema adava soj prifatlivo e Gospodareske (Ef. 5:10). Ako siem poslušna ko sovetija e Devleskere, ka ovel amen andruno mir hem ka ova čače srekjna (Ps. 16:8, 9; Isa. 48:17, 18). A ako ponadari da živinaja sprema i vera, adžikerela amen večno idnina. (Čitin 2. Korinkjanja 4:18.)

4. Sar ka džana dali živinaja sprema i vera ili sprema adava so dikhaja?

⁴ Sar ka džana dali živinaja sprema i vera ili sprema adava so dikhaja? Šaj te puča amen: „Kola bukja vodinena man keda anava odluke? Dali anava odluke samo sprema adava so dikhava? Ili isi man doverba ko sovetija e Jehovaskere?“ Te dikha so ka pomožinel amen te živina sprema i vera ko trin važna podračja: keda birinaja buti, keda birinaja bračno partneri hem keda dobinaja upatstvija tari organizacija. Bašo sekova taro akala podračja ka dikha kola bukja valjani te la ko predvid te šaj te ana šukar odluka.

KEDA BIRINAJA BUTI

5. So valjani te la ko predvid keda birinaja buti?

⁵ Sekoj amendar mangela te arakhel buti kolaja so ka grižinel pe bašo ple potrebe hem o potrebe ple familijakere (Prop. 7:12; 1. Tim. 5:8). Isi bukja kola soj tane šukar platime hem kolencar so šaj te učhara amare trošakija, pa čak hem nešto te čhiva ki strana. Javera bukja nane doborom šukar platime, hem o rabotnikija šaj te dozvolinen peske samo o osnovna bukja. Keda valjani te odlučina dali ka prifatina nesavi buti, normalno tano te la ko predvid kobor ka ovel i plata. Ama, ako nekaske samo i plata tani i najvažno buti keda odlučinela, adava sikavela kaj živinela samo sprema adava so dikhela.

6. Sar šaj te sikava kaj živinaja sprema i vera keda birinaja buti? (Evreija 13:5).

⁶ Ako živinaja sprema i vera, ka la ko predvid isto agjaar sar adaja buti šaj ka vlijajnel upro amaro amalipe e Jehovaja. Šukar tano te puča amen: „Dali adaja buti ka rodel mandar te kerav nešto so o Jehova mrzinela?“ (Izr. 6:16-19). „Dali i buti ka vlijajnel ko mle duhovna aktivnostija hem dali baši buti ka valjani pobaro periodi te ovav odvojmo tari mli familija?“ (Fil. 1:10). Ako o odgovor ko akala pučiba tano oja, ka ovel mudro te na prifatina adaja buti, čak ako nane lokho te arakhel pe buti. Adaleske so živinaja sprema i vera, anaja odluke kolendar so dikhjola kaj siem uverime kaj o Jehova ko nesavo način ka grižinel pe te ovel amen adava so valjani amenge (Mat. 6:33; čitin Evreija 13:5).

7-8. Sar jekh phral tari Južno Amerika sikavgja kaj živinela sprema i vera? (Dikh hem i slika.)

⁷ O Havier,a jekh phral tari Južno Amerika, džanlja kobor tano važno te živinel sprema i vera. Ov vakerela: „Apliciringjum ki jekh buti kote so ka lav sine duplo pobari plata taro angleder hem ka kerav sine nešto koleste so ka uživinav“. Ama, o Havier but mangela sine te ovel pioneri. Ov isto vakerela: „Sine man zakažimo intervju e direktorea tari firma. Angleder o intervju, molingjum e Jehova te pomožinel man hem sium sine uverimo kaj ov džanlja so sine mange najšukar. Mangljum te napredujnav ki buti hem te lav pobari plata, ama na sium sine spremno te prifatinav adaja buti ako čhinavela man te ispolninav mle duhovna celija“.

⁸ O Havier isto vakerela: „Džikote trajnela sine o intervju, o direktori vakergja mange kaj redovno ka valjani te kerav buti prekuvremeno. Me ljubezno vakergjum leske kaj baši mli služba adava našti te prifatinav“. Oja, o Havier odbingja adaja buti. Palo duj kurke počmingja e pionersko službaja. A pokasno o isto berš arakhlja buti pohari saatencar. Ov vakerela: „O Jehova šungja mle molitve hem pomožingja man te arakhav buti kolaja so šaj te ovav pioneri. But sium srekjno so isi man buti koja so dozvolinela mange te odvojnav poviše vreme te šaj te služinav e Jehovaske hem mle phralenge“.

9. So sikljovea taro iskustvo e Trezoreskoro?

⁹ So ako haljovaja kaj i buti so akana isi amen kerela amenge popharo te živina sprema i vera? Te dikha so slučingja pe e Trezorea taro Kongo. Ov vakerela: „Adaja sine buti taro sune. Zarabotinava sine trin puti poviše taro adava so zarabotinava sine angleder hem sium sine but poštujmo“. Ama, o Trezor na džala sine redovno ko sostanokija adaleske so kerela sine buti prekuvremeno. Isto agjaar, ponekogaš sine le baro pritisok te hovavel e manušen te šaj te garavel nešto so nane česno. O Trezor manglja te del otkaz ama darala sine kaj nane te arakhel javer buti. So pomožingja le? Ov vakerela: „O Avakum 3:17-19 pomožingja man te haljovav kaj, čak hem te ačhovav bizi buti, o Jehova ka arakhel način te grižinel pe mange. Hem agjaar dengjum otkaz“. Ov ko krajo vakerela: „But gazdija mislinena kaj baši jekh šukar platimi buti o manuš ka žrtvujnel sa, čak ple familija hem o duhovna bukja. But sium radosno so ačhiljum paše e Jehovaja hem mle familijaja. Jekh berš palo adava, o Jehova pomožingja man te arakhav stabilno buti kolaja so ka šaj skromno te živinav hem te ovel man poviše vreme bašo duhovna aktivnostija. Keda čhivaja e Jehova ko prvo than šaj nesavo vreme ka mučina amen te šaj te ikljova ko krajo. Ama, o Jehova ka grižinel pe amenge“. Oja, ako isi amen doverba ko e Jehovaskere sovetija hem ko leskere vetuvanja, ponadari da ka živina sprema i vera, a ov ka blagoslovinel amen.

KEDA BIRINEA BRAČNO PARTNERI

10. Keda birinaja bračno partneri, so ka sikavel kaj šaj živinaja sprema adava so dikhjola?

¹⁰ O brako tano poklon taro Jehova hem normalno tano te manga te ženina amen. Keda jekh phen razmislinela dali jekh phral ka odgovorinel lake sar bračno partneri, šaj ka primetinel leskoro karakter, sar izgledinela, savo anav isi le anglo javera, sar tano ko materijalno pogled, dali grižinela pe ple familijake hem dali osetinela pe lea šukar.b Akala tane važna bukja. Ama, ako lela ko predvid samo akala bukja, ka sikavel kaj šaj živinela sprema adava so dikhjola.

11. Sar ka sikava kaj živinaja sprema i vera keda birinaja bračno partneri? (1. Korinkjanja 7:39).

¹¹ O Jehova but dičinela pe amare phralencar hem phenjencar kola so ikerena pe ko leskere sovetija keda birinena bračno partneri. Na primer, ola but seriozno haljona o sovet te adžikeren te šaj „te oven zrela ko telo hem ki godi“ angleder te počminen vrska (1. Kor. 7:36). Keda razmislinena dali nekoj ka odgovorinel lenge sar bračno partneri, ola najviše koncentririnena pe ko osobine kola so o Jehova vakerela kaj valjani te ovel jekhe šukar rome ili jekhe šukar romnja (Izr. 31:10-13, 26-28; Ef. 5:33; 1. Tim. 5:8). A ako nekoj so nane Svedoko sikavela lenge interes, ola tane poslušna ko sovet te ženinen pe nekasaja samo soj „tano sledbeniko e Gospodareskoro“. (Čitin 1. Korinkjanja 7:39.) Ola živinena sprema i vera, uverime kaj o Jehova ka grižinel pe bašo lengere emocionalna potrebe pošukar taro bilo koj javer (Ps. 55:22).

12. So sikljovea taro primer e Rosakoro?

¹² Te dikha o iskustvo e Rosakoro, jekh phen tari Kolumbija koja so služinela sar pioneri. Oj kerela sine buti jekhe manušea kova so na sine e Jehovaskoro svedoko hem kova so počmingja te interesinel pe lake. Ov svidžinela pe sine e Rosake. Oj vakerela: „Izgledinela sine kaj tano but šukar manuš hem pomožinela sine e javerenge ko than kote so živinela sine. But šukar ponašinela pe sine mancar. Le sine le sa adava so bi mangava sine te ovel mle rome, samo so na sine e Jehovaskoro svedoko“. I Rosa ponadari vakerela: „Na sine mange lokho te odbinav le, soske mlo vilo vakerela sine pojaver. Ko adava vreme osetinava man sine korkori hem mangava sine te ženinav man, ama našti sine te arakhav phral kolea so šaj te ženinav man“. Sepak, i Rosa na koncentriringja pe samo ko adava so dikhjola. Razmislinela sine sar adaja odluka ka vlijajnel upro lakoro amalipe e Jehovaja. Adaleske, čhinavgja sa o kontaktija adale manušea hem trudingja pe te ovel zafatimi e duhovna bukjencar. Kratko palo adava sine kanimi ki Škola bašo polnovremena objavitelija hem akana služinela sar specijalno pioneri. I Rosa vakerela: „O Jehova but blagoslovingja man hem kergja man but srekjno!“ Šaj nane lokho te živina sprema i vera, posebno keda nešto but mangaja, ama adava sekogaš tano amare šukaripaske.

KEDA DOBINAJA UPATSTVIJA TARI ORGANIZACIJA

13. Soske šaj te počmina te živina sprema adava so dikhjola keda dobinaja upatstvija tari organizacija?

¹³ Amen but puti dobinaja upatstvija tari organizacija kola so pomožinena amenge ko amaro obožavibe, sar na primer taro amare lokalna starešine, taro pokrainsko nadgledniko, tari podružnica ili taro Vodečko telo. Ama, so ako nekogaš na haljovaja soske dobinaja asavke upatstvija? Šaj samo ka koncentririna amen ko adava kobor tano pharo te primeninen pe adala upatstvija. Šaj čak te počmina te koncentririna amen ko slabostija e phralengere kola so dengje adala upatstvija.

14. So ka pomožinel amen te živina sprema i vera keda dobinaja upatstvija tari organizacija? (Evreija 13:17).

¹⁴ Keda živinaja sprema i vera, isi amen doverba kaj e Jehova isi le kontrola upro sa hem kaj šukar džanela amari situacija. Adaleske odma prifatinaja o neve upatstvija hem šunaja adala upatstvija soske isi amen pozitivno stavi. (Čitin Evreija 13:17.) Svesna siem kaj keda siem poslušna pomožinaja te ovel jekhipe ko sobranie (Ef. 4:2, 3). Isi amen doverba ko Jehova hem džanaja kaj iako o phralja kola so predvodinena tane nesovršena, ako siem poslušna, ov ka blagoslovinel amen (1. Sam. 15:22). A tari javer strana, čak ako nešto čače valjani te popravinel pe, ko plo vreme o Jehova ka popravinel le (Mih. 7:7).

15-16. So pomožingja jekhe phraleske te živinel sprema i vera, iako na sine baš sigurno ko upatstvija so dobingja len? (Dikh hem i slika.)

¹⁵ Te dikha jekh primer kova so sikavela savi korist isi amen keda živinaja sprema i vera. Iako ko Peru skoro sarine kerena lafi španski, but manuša kerena lafi ko nesave lokalna čhibja. Jekh lendar tani i čhib kečua. But berša, o phralja hem o phenja so kerena lafi ki čhib kečua, ko plo podračje rodena e manušen kola so kerena lafi ki adaja čhib. Ama, adaleske so ale nesave promene ko zakoni, sine kerde promene ko upatstvija bašo adava sar te roda e manušen (Rim. 13:1). Adaleske, nesave mislinena sine kaj adava lošno ka vlijajnel upri lengiri služba. Sepak, adaleske so o phralja prifatingje o neve upatstvija, o Jehova blagoslovingja lengoro trudo adalea so uspejngje te arakhen bute manušen kola so kerena sine lafi ki čhib kečua.

¹⁶ Maškar okola so sine sekirime sine hem o Kevin, kova so služinela sar starešina ko jekh sobranie ki čhib kečua. Ov objasninela: „Mislingjum mange: ’Sar akana ka arakha e manušen so kerena lafi ki čhib kečua?‘“ So kergja o Kevin? „Setingjum man ko lafija taro Izreki 3:5, a razmislingjum hem bašo Mojsej. Ov valjani sine te ikalel e Izraelcon taro Egipet hem palo adava te vodinel len ko than kova so izgledinela sine sar te phene nane lestar izlez, kote so o Egipkjanja šaj sine but lokhe te astaren len. Sepak, ov šungja hem o Jehova blagoslovingja leskiri poslušnost adalea so spasingja e Izraelcon jekhe bare čudoja“ (2. Moj. 14:1, 2, 9-11, 21, 22). O Kevin sine odlučno te prilagodinel pe ki pli služba. Savo sine o rezultati? Ov vakerela: „Našti sine te verujnav sar o Jehova blagoslovingja man. Angleder, keda džaja sine ki služba but phiraja sine hem ponekogaš arakhaja sine samo jekhe ili duje dženen so kerena lafi ki čhib kečua. Akana koncentririnaja amen ko adava te obrabotina podračja kolende so živinena poviše manuša so kerena lafi ki čhib kečua. Adaleske, isi amen poviše prilike te kera lafi e manušencar, isi amen poviše posete hem poviše bibliska kursija. A hem ko sostanokija akana isi amen poviše prisutna“. Oja, keda živinaja sprema i vera, o Jehova sekogaš nagradinela amen.

17. So sikliljan tari akaja statija?

¹⁷ Dikhlem so ka pomožinel amen ponadari da te živina sprema i vera ko trin važna podračja. Ama, mora te živina sprema i vera ko sekova podračje taro amaro životo, na primer, keda birinaja zabava ili rekreacija hem keda anaja odluke baši škola ili vospitibe e čhaven. Keda valjani te ana nesavi odluka, na valjani te ana la samo sprema adava so dikhaja. Mora te la ko predvid hem amaro amalipe e Jehovaja, leskere sovetija hem leskoro vetuvanje kaj ov ka grižinel pe amenge. Agjaar, ka šaj te „dža ko anav e Jehovaskoro, amaro Devel, ko sa o vreme, ki celo večnost“ (Mih. 4:5).