Pomožin e interesentenge te počminen te služinen e Jehovaske

1-2. a) Soske nesave interesentija mislinena pe dali te počminen te služinen e Jehovaske? b) So ka dikha ki akaja statija?

DALI nesave bukja kergje te misline tut dali te ove e Jehovaskoro svedoko? Šaj darandiljan kaj tle kolege, amala ili nekoj tari tli familija ka ovel protiv tute. Ili šaj mislingjan kaj nikogaš ka našti te živine agjaar sar so rodela o Devel. Ako tano agjaar, tegani šaj te haljove e interesenten kola so mislinena pe dali te počminen te služinen e Jehovaske.

² O Isus džanlja kaj ako nekoj darala bašo akala bukja adava šaj te čhinavel le duhovno te napredujnel (Mat. 13:20-22). Ama ov na otkažingja pe okolendar kola so na sine sigurna dali te oven leskere sledbenikija. Namesto adava, adalea so kergja ov, mukhlja amenge primer te šaj te pomožina asavke manušenge 1) te haljoven so čhinavela len te napredujnen, 2) te bajraren plo mangipe sprema o Jehova, 3) te čhiven peske ispravna prioritetija hem 4) te nakhaven o predizvikija. Sar šaj te primenina adava so o Isus vakergja ple učenikonge džikote koristinaja o lil Ov bahtalo zasekogaš te šaj te pomožina nesave interesentenge te počminen te služinen e Jehovaske?

POMOŽIN LESKE TE HALJOVEL SO ČHINAVELA LE DUHOVNO TE NAPREDUJNEL

3. So šaj čhinavela sine e Nikodime te ovel e Isuseskoro učeniko?

³ E Nikodime, kova so sine važno evrejsko poglavari, sine nešto so čhinavela le sine te ovel e Isuseskoro učeniko. Samo šov masek otkeda o Isus počmingja ple službaja, o Nikodim halilo kaj o Isus sine bičhaldo taro Devel (Jovan 3:1, 2). Ama, adaleske so darandilo taro Evreija, ov odlučingja tajno te avel ko Isus (Jovan 7:13; 12:42). Ov šaj darandilo kaj ka našavel but bukja ako ovela leskoro učeniko.a

4. Sar o Isus pomožingja e Nikodimeske te haljol so adžikerela lestar o Devel?

⁴ O Nikodim džanela sine o Zakoni, ama valjani leske sine pomoš te haljovel so adžikerela o Jehova lestar. Sar o Isus pomožingja le? O Isus sine spremno te odvojnel leske vreme, pa čak rakjate te kerel lafi e Nikodimea. Ov jasno vakergja e Nikodimeske so valjani te kerel te šaj te ovel leskoro učeniko: te kainel pe bašo ple grevija, te krstinel pe ko pani hem te sikavel vera ko e Devleskoro Čhavo (Jovan 3:5, 14-21).

5. Sar šaj te pomožina jekhe interesenteske te haljol so čhinavela le duhovno te napredujnel?

⁵ Čak ako jekh interesenti šukar džanela i Biblija, šaj ka valjani leske pomoš te haljol so čhinavela le te služinel e Jehovaske. I buti ili o protivibe tari familija šaj čhinavena le duhovno te napredujnel. Adaleske odvojn tuke vreme tle interesenteske. Šaj te vikine le te džan ki kafa ili te phiren. Ki asavki opušteno atmosfera šaj ka ovel pospremno otvoreno te kerel lafi bašo predizvikija kolencar so borinela pe. Pottiknin le te kerel o potrebna promene, na te šaj te ugodinel tuke, nego te sikavel plo mangipe e Jehovaske.

6. Sar šaj te pomožine e interesenteske te khedel hrabrost te primeninel adava so sikljola? (1. Korinkjanja 16:13).

⁶ Keda jekh interesenti tano uverimo kaj o Jehova ka pomožinel leske te živinel sprema o bibliska merilija, ov ka ovel pohrabro te primeninel adava so sikljola. (Čitin 1. Korinkjanja 16:13.) Keda nekasaja proučinea i Biblija, tu šaj te sporedine tut sar jekh nastavniko. Keda džaja sine ki škola, kola sine tle omilena nastavnikija? Verojatno okola so sine strpliva tuja hem pomožingje tuke te gradine doverba ko tle sposobnostija. Ko slično način, tu da ka ove šukar učiteli ako na sikavea e interesente samo bašo adava so rodela o Devel amendar nego isto agjaar te uverine le kaj o Jehova ka pomožinel le te kerel o potrebna promene ko životo. Sar šaj te kere adava?

POMOŽIN LE TE BAJRAREL PLO MANGIPE SPREMA O JEHOVA

7. Sar o Isus pomožingja okolenge so šunena le te mangen e Jehova panda poviše?

⁷ O Isus džanlja kaj o mangipe sprema o Jehova ka motivirinel leskere učenikon te primeninen adava so sikljona. Ov često sikavela len sine bašo bukja kola so pomožingje lenge panda poviše te mangen ple nebesno Dade. Na primer, sporedingja e Jehova jekhe manušea kova so dela ple čhavenge šukar bukja (Mat. 7:9-11). Nesave taro adala so šunena le sine šaj na sine len asavko dad kova so grižinela pe lenge. Zamislin sar osetinena pe sine keda o Isus raskažinela sine i paramis bašo milostivo dad kova so vilea dodžakergja ple čhave kova so kergja but lošna bukja. Ola šaj sine te haljoven kobor but o Jehova mangela e manušen (Luka 15:20-24).

8. Sar šaj te pomožine e interesenteske te bajrarel plo mangipe sprema o Jehova?

⁸ Tu da šaj te pomožine e interesenteske te bajrarel plo mangipe sprema o Jehova agjaar so ka istaknine e Devleskere osobine džikote proučinena. Sekogaš keda proučinena, pomožin le te povrzinel adava so sikljola e Jehovaskere mangipaja. Keda kerena lafi baši otkupnina, pomožin leske te haljol so značinela adava leske lično (Rim. 5:8; 1. Jov. 4:10). Jekh interesenti verojatno panda poviše ka mangel e Jehova ako haljola kobor but mangela o Jehova le (Gal. 2:20).

9. So pomožingja jekhe manušeske kova so vikinela pe Majkl te kerel promene ko plo životo?

⁹ Te dikha o primer e Majkleskoro tari Indonezija. Panda sar čhavo džanela sine o čačipe, ama na krstingja pe. Keda sine le 18 berš gelo ko stranstvo te kerel buti, vozinela sine kamioni. Pokasno ženingja pe, ama ponadari da kerela sine buti ko stranstvo dur tari pli familija. Palo nesavo vreme leskiri romni hem leskiri čhaj počmingje te proučinen i Biblija hem te napredujnen. Keda muli leskiri daj, o Majkl odlučingja te iranel pe khere te šaj te grižinel pe ple dadeske hem počmingja te proučinel i Biblija. Adava so siklilo taro delo „Doznajn poviše“ ki lekcija 27 taro lil Ov bahtalo zasekogaš, but pogodingja e Majkle. Džikote razmislinela sine bašo adava sar osetinela pe sine o Jehova džikote dikhela sar leskoro Čhavo cidela muke, leskere jakhja pherdile asva. Ov sine panda poblagodarno baši otkupnina hem adava pottikningja le te kerel promene ko plo životo hem te krstinel pe.

POMOŽIN LESKE TE ČHIVEL PESKE ISPRAVNA PRIORITETIJA

10. Sar o Isus pomožingja ple prva učenikonge te čhiven peske ispravna prioritetija? (Luka 5:5-11; dikh hem i slika.)

¹⁰ O prva učenikija sigate halile kaj o Isus tano o vetimo Mesija, ama valjangja lenge pomoš te čhiven i služba ko prvo than. O Petar hem o Andrej više sine e Isuseskere učenikija angleder o Isus te vikinel len te oven stalno lea (Mat. 4:18, 19). Zaedno e Jakovea hem e Jovanea ola sine ribarija hem šukar džala sine lenge i buti (Mar. 1:16-20). Keda mukhle adaja buti, o Petar hem o Andrej verojatno kergje planija sar te grižinen pe ple familienge džikote džana palo Isus. So pottikningja len te čhiven peske ispravna prioritetija? O izveštaj taro Luka vakerela amenge kaj o Isus kergja čudo kova so panda poviše uveringja len kaj o Jehova ka grižinel pe bašo lengere potrebe. (Čitin Luka 5:5-11.)

11. Sar šaj amare iskustvoncar te bajrara i vera jekhe interesenteskiri?

¹¹ Amen našti te kera čudija sar o Isus, ama šaj te vakera lenge iskustvija bašo adava sar o Jehova pomožinela okolenge kola so čhivena le ko prvo than ko plo životo. Na primer, setinea li tut sar o Jehova pomožingja tut keda počmingjan te dža ko sostanokija? Šaj valjangjan te kere lafi tle šefea hem te zamoline le te meninel tlo rabotno vreme ko dive keda isi tut sostanok. Objasnin tle interesenteske sar barili tli vera džikote dikhea sine sar o Jehova pomožinela tut adaleske so odlučingjan te čhive le ko prvo than.

12. a) Soske valjani te kanina različna objavitelen ko biblisko kursi? b) Sar šaj te koristine o videoklipija te šaj delotvorno te sikave tle interesente? Vaker primer.

¹² Tle interesente isto agjaar ka ovel le korist ako šunela sar javera phralja hem phenja čhivgje peske ispravna prioritetija. Adaleske, kanin različna phralen hem phenjen te oven prisutna tuja ko biblisko kursi. Zamolin len te objasninen sar zapoznajngje o čačipe hem so kergje te šaj te čhiven i služba e Jehovaske ko prvo than ko pumaro životo. Osven adava, odvojnen tumenge vreme zaedno te dikhen e interesentea o videoklipija taro delo „Doznajn poviše“ hem, keda odgovorinela ki situacija, o videoklipija taro delo „Istražin“ ko lil Ov bahtalo zasekogaš. Na primer, keda ka keren lafi baši lekcija 37, šaj te istaknine nesave načelija taro videoklipi O Jehova ka grižinel pe bašo amare potrebe.

POMOŽIN LE TE NAKHAVEL O PREDIZVIKIJA

13. Sar o Isus spremingja ple učenikon bašo protivibe?

¹³ O Isus but puti vakergja ple učenikonge kaj ka ovel len protivibe taro javera, pa čak taro lengere familie (Mat. 5:11; 10:22, 36). Ko krajo tari pli služba, o Isus predupredingja ple učenikon kaj šaj čak te oven mudarde (Mat. 24:9; Jovan 15:20; 16:2). Pottikningja len te pazinen pe džikote tane ki služba. Ov sovetingja len te na rasprajnen pe okolencar so protivinena pe lenge hem te pazinen te šaj ponadari da te propovedinen.

14. Sar šaj te pomožina e interesenteske te spreminel pe bašo protivibe? (2. Timotej 3:12).

¹⁴ Šaj te pomožina e interesenteske te spreminel pe bašo protivibe agjaar so ka kera lea lafi bašo adava so šaj te vakerel ple kolegenge, amalenge hem e familijake. (Čitin 2. Timotej 3:12.) Nesave kolege šaj ka asan leske adaleske so akana živinela sprema adava so vakerela i Biblija. Javera, čak paše familija, šaj te kritikujnen leskere veruvanja kola so temelinena pe ki Biblija. Kobor porano spreminaja e interesenten te ikljon ko krajo e protivibaja, doborom pospremna ka oven keda ka slučinel pe lenge adava.

15. So šaj te pomožinel jekhe interesenteske te ikljol ko krajo keda leskiri familija protivinena pe leske?

¹⁵ Keda tle interesente isi le protivibe tari familija, pottiknin le te razmislinel bašo adava soske leskiri familija šaj tani voznemirimi. Ola šaj mislinena kaj amen hovavaja le, ili šaj ednostavno isi len predrasude sprema e Jehovaskere svedokija. Čak nesave tari e Isuseskiri familija mislingje kaj ov delindilo (Mar. 3:21; Jovan 7:5). Sikav tle interesente te ovel strplivo hem taktično ple familijaja hem e javerencar.

16. Sar šaj te pomožina e interesenteske te kerel lafi bašo ple veruvanja ko taktično način?

¹⁶ Čak ako i familija sikavela interes, mudro ka ovel o interesenti ma te probinel te objasninel lenge sa taro jekh puti. Ako kerela agjaar, leskere pašutne ka osetinen pe kaj adava lenge previše hem javer puti nane te mangen te keren lea lafi bašo čačipe. Adaleske ohrabrin tle interesente te kerel lafi bašo ple veruvanja agjaar so ka mukhel prilika javer puti da te keren lafi (Kol. 4:6). Na primer, šaj te predložinel ple familijake te phraven i jw.org. Agjaar ka šaj korkori te doznajnen nešto poviše bašo e Jehovaskere svedokija.

17. Sar šaj te obučine e interesente te odgovorinel nekaske so šaj isi le pogrešno mislenje bašo e Jehovaskere svedokija? (Dikh hem i slika.)

¹⁷ Šaj te koristine i rubrika „Najčesta pučiba“ ki jw.org te šaj te pomožine tle interesenteske te spreminel ednostavna odgovorija bašo pučiba kola so i familija ili o kolege šaj te pučen le (2. Tim. 2:24, 25). Ko krajo tari sekoja lekcija dikhen o delo „Nesave šaj vakerena“ taro lil Ov bahtalo zasekogaš. Pottiknin e interesente te vežbinel te odgovorinel ple lafencar. Slobodno de le predlogija bašo adava sar pošukar te odgovorinel. Agjaar ka pomožine leske uvereno te braninel pli vera.

18. Sar šaj te ohrabrine e interesente te ovel nekrsteno objaviteli? (Matej 10:27).

¹⁸ O Isus pottikningja ple učenikon te propovedinen o šukar haberi e manušenge. (Čitin Matej 10:27.) Kobor posigate jekh interesenti ka počminel te kerel e javerencar lafi baši pli vera, doborom posigate ka ovel le doverba ko Jehova. Sar šaj te pomožine e interesenteske te čhivel peske asavki cel? Keda ko sobranie ka ovel izvestimo kaj isi akcija propovedibaske, ohrabrin tle interesente te razmislinel sar šaj te ispolninel o uslovija te ovel objaviteli. Objasnin leske soske bute dženenge sine polokho te propovedinen keda isi asavke akcie. Isto agjaar, šaj te ohrabrine le te ispolninel o uslovija te šaj te ovel le govor ili prikaz ko sostanok so ikerela pe ko rabotno dive. Adava ka pomožinel leske te sikljol pošukar te objasninel ple veruvanja.

SIKAV DOVERBA KO TLO INTERESENTI

19. Sar o Isus sikavgja kaj isi le doverba ko ple učenikija hem sar šaj amen da te kera adava?

¹⁹ Angleder te džal ko nebo, o Isus vakergja ple učenikonge kaj jekh dive palem ka oven zaedno lea. Ola na halile kaj o Isus vakerela lenge kaj ka džan ko nebo. Iako o učenikija na halile sa, o Isus sine sigurno kaj ola mangena te keren e Jehovaskiri volja (Jovan 14:1-5, 8). Džanlja kaj valjani lenge vreme te haljon nesave bukja, sar soj i nadež ko nebo (Jovan 16:12). Amen da šaj te sikava doverba ko interesenti kaj ov mangela te ugodinel e Jehovaske.

20. Sar jekh phen taro Malavi sikavgja doverba ki pli interesentka?

²⁰ Isi amen doverba kaj amare interesentija mangena te keren adava soj tano ispravno. Razmislin bašo primer e phenjakoro Čifundo, taro Malavi. Oj počmingja biblisko kursi e lilea Ov bahtalo zasekogaš jekhe terne džuvljaja koja so vikinela pe Alinafe hem sine katoliko. Keda završingje i lekcija 14, i Čifundo pučlja la so mislinela bašo koristibe ikone hem kipija keda obožavinela pe e Devle. I Alinafe voznemirimi vakergja: „Adaja tani lično odluka“. I Čifundo mislingja kaj i Alinafe nane više te mangel te proučinel, ama oj strplivo ponadari da proučingja laja agjaar so nadingja pe kaj sar so nakhela o vreme ka haljol kaj adava tano pogrešno. Palo nekobor masekija i Čifundo pučlja la o pučibe tari lekcija 34: „Sar adava so sikliljan baši Biblija hem bašo čačutno Devel o Jehova, pomožingja tuke dži akana?“ I Čifundo vakerela sar odgovoringja i Alinafe: „Oj vakergja but šukar misle ama jekh lendar sine kaj o Svedokija na kerena bukja so i Biblija osudinela“. Kratko palo adava i Alinafe čhinavgja te koristinel ikone hem kipija hem ispolningja o uslovija krstibaske.

21. Sar šaj te pomožina e interesenteske te anel odluka te služinel e Jehovaske?

²¹ Iako o Jehova tano adava so „kerela te bajrol“, amen da šaj te pomožina jekhe interesenteske te napredujnel (1. Kor. 3:7). Amen na sikavaja le samo adava so rodela o Devel lestar. Amen pomožinaja leske te bajrarel plo mangipe sprema o Jehova. Isto agjaar, pottikninaja le te sikavel plo mangipe agjaar so ka čhivel peske ispravna prioritetija hem sikavaja le te ovel le doverba ko Jehova keda isi le predizvikija. Adalea so sikavaja kaj isi amen doverba ki leste, bajraraja leskiri uverenost kaj ov da šaj te živinel sprema e Jehovaskere merilija hem pomožinaja leske te anel odluka te počminel te služinel leske.