Šaj li panda te sikljove taro osnovna bibliska sikljojba?

1. Sar vlijajngje upri tute o bibliska sikljojba keda doznajngjan o čačipe?

O OSNOVNA bibliska sikljojba meningje amaro životo. Na primer, keda doznajngjem kaj o Devel vikinela pe Jehova, kergjem o prvo čekori te šaj te ova lea amala (Isa. 42:8). Otkeda doznajngjem so ovela nekasaja keda merela, čhinavgjem te puča amen dali amare mangle kola so mule cidena muke (Prop. 9:10). A keda doznajngjem e Devleskoro vetuvanje bašo raj ki phuv, više na siem sine sekirime baši amari idnina. Uveringjem amen kaj šaj te živina, na samo kratko — 70 ili 80 berš — nego zasekogaš (Ps. 37:29; 90:10).

2. Sar o lafija taro 2. Petareskoro 1:12, 13, sikavena kaj čak e zrela hristijanen šaj te ovel len korist taro osnovna bibliska sikljojba?

² Nikogaš na smejnaja ko osnovna bibliska sikljojba te dikha sar nešto so nane doborom važno. Ko plo dujto pismo, o apostol Petar pišingja e hristijanenge kola so sine „cvrsto uverime ko čačipe“. (Čitin 2. Petareskoro 1:12, 13.) Ama ko adava vreme ko sobranie sine duhovna opasnostija, maškar kolende so sine o hovavne učitelija hem o manuša so na verujnena sine ko Devel (2. Pet. 2:1-3). O Petar manglja te zojrakerel ple phralen hem phenjen te šaj te borinen pe protiv adala opasnostija. Adaleske, setinkergja len ko nesave taro sikljojba kola so više džanena len sine. Adala sikljojba ka pomožinen lenge sine te ačhoven verna e Jehovaske dži ko krajo.

3. Soske valjani sa o hristijanja ponadari da hor te razmislinen bašo osnovna bibliska sikljojba? Vaker primer.

³ Džikote napredujnaja ki hristijansko zrelost, šaj te dikha neve pouke tano osnovna bibliska sikljojba. Te vakera jekh sporedba: Jekh iskusno hem jekh nevo gotvači šaj koristinena o ista osnovna sostojke keda spreminena nesavo hajbe. Ama sar nakhena o berša, o iskusno gotvači siklilo sar najšukar te koristinel adala sostojke hem koristinela len te šaj te spreminel len ko neve hem interesna načinija. Slično, e Jehovaskere sluge kola so beršencar služinena leske hem o interesentija, šaj ko osnovna bibliska čačipa dikhena taro različna aspektija. Amare okolnostija hem zadače ki služba bašo Jehova verojatno nane ista sar keda krstingjem amen. Ako o sikljojba so doznajngjem len angleder but berša primeninaja len ki amari momentalno situacija, šaj te otkrina neve hem praktična pouke. Te dikha so šaj te sikljoven o zrela hristijanja taro trin osnovna bibliska sikljojba.

O JEHOVA TANO STVORITELI

4. Sar vlijajngja upri amende adava so doznajngjem kaj o Jehova tano Stvoriteli?

⁴ „Okova so kergja sa tano o Devel“ (Evr. 3:4). Džanaja kaj amari planeta hem o životo ki late sine stvorime taro jekh najmudro hem semokjno Stvoriteli. Adaleske so stvoringja amen, ov but šukar pendžarela amen. Osven adava, ov grižinela pe amenge. Ov džanela soj tano najšukar amenge. Akava ednostavno čačipe, kaj o Jehova tano Stvoriteli, but vlijajngja upro amari životo hem kergja te ovel amen čačutno smisla.

5. Kova čačipe pomožinela amenge te razvina poniznost? (Isaija 45:9-12).

⁵ Taro čačipe kaj o Jehova tano Stvoriteli šaj te sikljova nešto baši poniznost. Otkeda o Jov previše koncentriringja pe ki peste hem ko javera manuša, o Jehova setinkergja le kaj ov tano o semokjno Stvoriteli (Jov 38:1-4). Akava pomožingja e Joveske te haljovel kaj o način sar o Devel postapinela tano but pošukar taro način sar o manuša postapinena. Povrzimo akalea, o proroko o Isaija pokasno pišingja: „Zarem i glina ka vakerel e Grnčareske: ’So kerea?‘“ (Čitin Isaija 45:9-12.)

6. Keda tano posebno važno te razmislina kobor mudro hem baro tano amaro Stvoriteli? (Dikh hem o slike.)

⁶ Sar so ovela poiskusno, jekh hristijani šaj te počminel te ovel le pobari doverba ko plo mislenje namesto te rodel vodstvo taro Jehova hem taro leskoro Lafi (Jov 37:23, 24). Ama so ako nekoj hor razmislinela bašo adava kobor tano mudro hem baro leskoro Stvoriteli? (Isa. 40:22; 55:8, 9). Akava osnovno čačipe ka pomožinel leske te ačhovel ponizno hem te ovel le ispravno stavi ko adava sar ov dikhela ko bukja.

7. So kergja i Rahela te šaj te prifatinel jekh promena ki organizacija?

⁷ I Rahela koja so živinela ki Slovenija, razmislingja bašo plo Stvoriteli hem adava pomožingja lake te prifatinel jekh promena ki organizacija. Oj priznajnela: „Sine situacie keda na sine mange lokho te prifatinav o odluke taro okola so predvodinena. Na primer, iako dikhljum o Izveštaj br. 8 taro Vodečko telo bašo 2023 berš, sepak sium sine šokirimi keda prvo dikhljum phrale bradaja sar ikerela govor. Adaleske molingjum man e Jehovaske te pomožinel man te prifatinav akaja promena“. I Rahela halili kaj o Jehova kova so kergja o nebo hem i phuv ko sovršeno način vodinela pli organizacija ko ispravno drumo. Ako tuke pharo te prilagodine tut ko nesavo nevo haljojbe ili te prifatine nesavo nevo upatstvo, odvojn tuke vreme hor te razmisline bašo adava kobor mudro hem mokjno tano amaro Stvoriteli (Rim. 11:33-36).

SOSKE O DEVEL MUKHELA TE OVEN MUKE

8. Sar koristinela amenge adava so doznajngjem soske o Devel mukhela te oven muke?

⁸ Soske o Devel mukhela te oven muke? Nesave kola so na džanena o odgovor ko akava pučibe holjanena e Devleske ili mislinena kaj ov ni na postojnela (Izr. 19:3). Različno lendar, tu doznajngjan kaj adaleske so nasledingjem o grevo hem siem nesovršena, cidaja muke, a na kaj o Jehova tano krivo bašo adava. A isto agjaar, doznajngjan kaj adaleske so o Jehova tano strplivo e manušencar, milionja šaj te zapoznajnen le hem korkori te uverinen pe kaj ov ka čhivel krajo bašo muke (2. Pet. 3:9, 15). Akala čačipa utešingje tut hem kergje te ove paše lea.

9. Ko kola situacie posebno valjani te razmislina bašo pričine soske o Jehova mukhela te oven muke?

⁹ Svesna siem kaj valjani te ova strpliva džikote adžikeraja o Jehova te čhivel krajo bašo muke. Sepak keda amen, ili amare pašutne doživinaja nevolja, nepravda ili našavaja nešto, šaj pučaja amen soske o Jehova na kerela nešto odma (Avak. 1:2, 3). Ko asavke momentija ka ovel mudro te razmislina bašo pričine soske o Jehova mukhela o pravedna te ciden mukea (Ps. 34:19). Isto agjaar, šaj te razmislina baši leskiri namera te čhivel krajo bašo muke jekh puti zasekogaš.

10. So pomožingja jekhe phenjake te arakhel uteha otkeda muli lakiri daj?

¹⁰ O čačipe bašo muke šaj te pomožinel amenge te istrajna. I En koja so živinela ko ostrov Majote, ko Indisko okeani, vakerela: „Keda muli mi daj angleder nekobor berša adava but razočaringja man. Ama, celo vreme razmislinava bašo adava kaj o Jehova nane krivo bašo amare muke. Ov edvaj adžikerela te cidel sa o pričine bašo muke hem te voskresninel amare pašutnen so mule. Keda razmislinava bašo akala čačipa osetinava andruno mir, nešto so but puti čudinela man“.

11. Sar adava so džanaja soske o Jehova mukhela te oven muke, šaj te pomožinel amenge ponadari da te propovedina?

¹¹ O čačipe bašo adava soske o Devel mukhela te oven muke, šaj te pottikninel amen ponadari da te propovedina. Otkeda objasningja kaj e Jehovaskiri strplivost značinela spasenie okolenge so kainena pe, o Petar pišingja: „Tumare postapke neka oven sveta hem neka sikaven kaj tumen sien verna e Devleske ko sa“ (2. Pet. 3:11). Jekh taro postapke kolendar so dikhjola pe kaj obožavinaja samo e Devle tano o propovedibe. Isto sar amaro Dad, amen da mangaja e manušen. Mangaja ola te živinen ko e Devleskoro pravedno nevo sveto. O Jehova tano strplivo hem e manušencar taro tlo podračje hem dela len prilika te počminen te obožavinen le. Kobor bari čest tani te ove e Devleskoro sorabotniko hem te pomožine bute manušenge te sikljoven baši leste angleder te avel o krajo (1. Kor. 3:9).

ŽIVINAJA „KO POSLEDNA DIVE“

12. Sar koristinela amenge adava so doznajngjem kaj živinaja ko posledna dive?

¹² I Biblija točno objasninela save ka oven o manuša „ko posledna dive“ (2. Tim. 3:1-5). Dovolno tano samo te dikha okolu amende te šaj te haljova sar akava proroštvo ispolninela pe. Džikote dikhaja sar o stavija e manušengere ovena sa pološna, pouverime siem taro bilo keda angleder kaj adava so pišinela ko e Devleskoro Lafi tano točno (2. Tim. 3:13-15).

13. Keda razmislinaja baši e Isuseskiri sporedba taro Luka 12:15-21, so šaj te puča amen?

¹³ Adava so džanaja kaj živinaja ko posledna dive pomožinela amenge te koncentririna amen ko adava soj čače važno. Te dikha so šaj te sikljova tari sporedba e Isuseskiri soj pišimi ko Luka 12:15-21. (Čitin.) Soske bašo barvalo manuš vakergja pe kaj tano „glupavo“? Na adaleske so sine barvalo, nego adaleske so na čhivgja o považna bukja ko prvo than. Ov khedingja barvalipe peske a na sine barvalo anglo e Devleskere jakhja. Soske adava na sine mudro? O Devel vakergja adale manušeske: „Akaja rat ka mere“. Avdive sar so avela popaše o krajo akale svetoskoro šaj te puča amen: „Dali mle celija sikavena kaj koncentririnava man ko adava soj najvažno? Save celija pomožinava te čhiven peske mle čhave? Dali koristinava mle finansiska sredstvija, sila hem vreme te šaj najangle te khedav barvalipe mange ili te khedav barvalipe ko nebo?“

14. Sar o iskustvo e phenjakoro, sikavela soske tano mudro te razmislina bašo bibliska dokazija kaj živinaja ko posledna dive?

¹⁴ Keda razmislinaja bašo dokazija kaj živinaja ko posledna dive adava šaj celosno te meninel amaro stavi sar dikhaja ko životo. Adava slučingja pe jekhe phenjake so vikinela pe Miki. Oj raskažinela: „Keda završingjum sredno škola, but mangava sine te istražinav bašo životne hem mangljum adava te ovel mli profesija. Isto agjaar, sine man cel te ovav opšto pioneri hem te služinav kote so isi pobari potreba. Nesave zrela amala pottikningje man šukar te razmislinav dali taro realno te kerav mange svetovno kariera hem ko isto vreme te ispolninav mle duhovna celija. Ola setinkergje man kaj panda hari ka avel krajo akale svetoske. Tari javer strana, ko nevo sveto ka ovel man celi večnost te šaj te istražinav e životnen. Adaleske, odlučingjum te džav ko kratko praktično kursi. Adava pomožingja mange te arakhav buti kolaja so šaj sine te ovav opšto pioneri, a pokasno hem te selinav man ko Ekvador kote so isi pobari potreba“. I Miki hem lakoro rom akana služinena ki pokrainsko služba ki adaja phuv.

15. Sar e Jakoveskoro primer sikavela soske na valjani te otkažina amen taro manuša kola so panda na sikavgje interes bašo šukar haberi? (Dikh hem o slike.)

¹⁵ Na valjani te obeshrabrina amen keda o manuša na prifatinena o šukar haberi. Ola šaj te meninen pe. Razmislin bašo e Jakoveskoro primer, e Isuseskoro phral. Ov dikhlja sar o Isus bajrola, ovela o Mesija hem sikavela sar nijekh manuš angleder. Sepak, beršencar o Jakov na ulo e Isuseskoro učeniko. Čak otkeda o Isus voskresningja o Jakov ulo učeniko — hem adava revno učeniko!b (Jovan 7:5; Gal. 2:9). Adaleske, but tano važno te na otkažina amen tari familija koja so panda na sikavela interes hem palem te propovedina okolenge so na mangle te šunen. Ma bistre kaj živinaja ko posledna dive hem kaj amaro propovedibe tano itno. Adava so ka vakere lenge avdive, šaj te vlijajnel upri lende pokasno, šaj čak otkeda ka počminel i bari nevolja.c

OV BLAGODARNO BAŠO VAŽNA POUKE SO DOBINEA LEN TARO JEHOVA

16. Sar koristinena tuke o pouke taro Jehova? (Dikh hem i ramka „Koristin o bibliska čačipa te šaj te pomožine e javerenge“.)

¹⁶ Delo tari duhovno hrana so dobinaja la tani spremimi e manušenge kola so nikogaš na šungje bašo osnovna bibliska čačipa. Na primer, o javna govorija so ikerena pe sekova kurko, nesave statie hem videoklipija ki jw.org hem amare spisanija baši javnost glavno tane bašo manuša kola so nane Svedokija. Sepak, amen da isi amen korist taro akala pouke. Ola pomožinena amenge te bajrara amaro mangipe sprema o Jehova, te zojrakera amari vera ko leskoro Lafi hem te sikljova sar šaj pošukar te sikava e javeren bašo osnovna čačipa (Ps. 19:7).

17. Ko kola situacie šaj te razmisline bašo osnovna bibliska sikljojba?

¹⁷ Sar Jehovaskere svedokija, radosna siem keda dobinaja pojasno haljojbe bašo nesavo biblisko čačipe. Sepak, amen isto agjaar siem but blagodarna bašo osnovna bibliska sikljojba kola so ko početok privlečingje amen ko čačipe. Ako nekogaš arakhljovaja ko iskušenie uporno te ačhova ko amaro mislenje namesto te prifatina o vodstvo tari e Jehovaskiri organizacija, šaj ponizno te setina amen koj vodinela adaja organizacija — o semokjno hem o najmudro Stvoriteli. Keda amen ili nekoj taro amare pašutne isi amen nesavi nevolja, šaj te ova strpliva hem te razmislina bašo adava soske o Jehova mukhela te oven muke. A keda odlučinaja sar te koristina o materijalna bukja so isi amen hem amaro vreme šaj te setina amen kaj živinaja ko posledna dive. E Jehovaskere pouke ponadari da neka zojrakeren amen, pottikninen amen hem neka den amen mudrost.