Sar o Jehova pomožinela amen te istrajna

1. Soske valjani amenge sila te šaj te istrajna, hem koj šaj te pomožinel amenge? (1. Pet. 5:10).

KO AKALA posledna phare dive, e Jehovaskere slugenge valjani sila te šaj te istrajnen. Nesave džene borinena pe nesave nasvalipaja kova so trajnela poviše vreme. Javerendar mulo nekoj soj lenge paše. A nesavenge šaj protivinela pe i familija ili o vlastija (Mat. 10:18, 36, 37). Ov sigurno kaj so hem te slučinel pe, o Jehova šaj te pomožinel tuke te istrajne. (Čitin 1. Petareskoro 5:10.)

2. Kotar dobinaja sila te šaj te istrajna?

² Te istrajna značinela te ačhova verna e Jehovaske hem te na našava amari nadež čak keda isi amen pharipa, siem progonime ili siem ko iskušenie te kera grevo. Ama, adava našti te kera samo amare silaja. Te šaj te istrajna, valjani amenge pomoš taro Jehova kova so dela amen „sila koja so nakhavela i normalno“ (2. Kor. 4:7). Ki akaja statija ka dikha ko kola štar načinija pomožinela amen o Jehova te istrajna, a ka dikha hem so valjani te kera amen te šaj te dobina adaja pomoš.

I MOLITVA

3. Soske šaj te vakera kaj i molitva tani skapoceno poklon?

³ O Jehova dengja amen jekh skapoceno poklon kova so pomožinela amen te istrajna. Iako siem grešna, ov dozvolinela amenge te komunicirina lea (Evr. 4:16). Te razmislina bašo akava: šaj te molina amen e Jehovaske bašo sa hem ko sekova vreme. Ov šaj te šunel amen ki sekoja čhib, bilo kaj te ova čak ako siem izolirime ili ko zatvor (Jona 2:1, 2; Apo. 16:25, 26). Ako amenge doborom pharo so čak našti te vakera e Jehovaske so mislinaja, ov ka haljol amen hem ka džanel so mangaja te vakera leske (Rim. 8:26, 27). Oja, i molitva tani čače jekh skapoceno poklon!

4. Soske šaj te vakera kaj adava so ka molina e Jehova te pomožinel amenge te istrajna tano sprema leskiri volja?

⁴ Ko plo Lafi, o Jehova uverinela amen kaj „bilo so te roda, ako tano sprema leskiri volja, ov šunela amen“ (1. Jov. 5:14). Tegani, dali šaj te molina e Jehova te pomožinel amenge te istrajna? Oja! Adava tano sprema leskiri volja. Soske vakeraja akava? Keda istrajnaja iako isi amen ispitija, tegani o Jehova ka šaj te sikavel e Jehovaske kaj nane ko pravo keda vakerela kaj leskere sluge ka služinen leske samo keda lenge sa šukar (Izr. 27:11). Osven adava, i Biblija vakerela kaj o Jehova mangela „te sikavel pli sila ki korist okolenge so služinena leske celo vilea“ (2. Let. 16:9). Adaleske, šaj te ova sigurna kaj e Jehova isi le hem mokj hem želba te pomožinel amenge te istrajna (Isa. 30:18; 41:10; Luka 11:13).

5. Sar i molitva pomožinela amen te ovel amen andruno mir? (Isaija 26:3).

⁵ I Biblija vakerela kaj keda ki molitva vakeraja sa e Jehovaske so mučinela amen, „o mir taro Devel, kova soj upreder taro adava so šaj o manuš te haljol, ka arakhel [amare] vile hem [amare] misle“ (Fil. 4:7). Te razmislina so značinela akava. O manuša so na služinena e Jehovaske isi len problemija hem ola šaj probinena različna metode te šaj te arakhen andruno mir. Ama bizi razlika so hem te probinen o manuša te šaj te ovel len mir, adava mir našti te sporedinel pe e mirea so dela le o Jehova. Keda molinaja amen e Jehovaske, sikavaja kaj isi amen celosno doverba upri leste hem ov dela amen „trajno mir“. (Čitin Isaija 26:3.) Jekh način sar o Jehova kerela adava tano agjaar so pomožinela amenge te setina amen ko ohrabruvačka stihija taro leskoro Lafi. Asavke stihija kerena te osetina amen smirime soske uverinena amen kobor but o Jehova grižinela pe amenge hem kobor mangela te pomožinel amen (Ps. 62:1, 2).

6. Bašo so javer šaj te moline tut? (Dikh hem i slika.)

⁶ So šaj te kere tu. Keda tli vera tani ispitimi, „frde tlo pharipe e Jehovaske“ hem molin le te del tut plo mir (Ps. 55:22). Molin le te del tut mudrost te šaj te džane so šaj te kere ki tli situacija (Izr. 2:10, 11). Ama, osven so ka moline le te pomožinel tuke te istrajne, ma bistre te blagodarine tut leske ki molitva (Fil. 4:6). Primetin ko kola načinija pomožinela tuke te istrajne sekova dive hem blagodarin tut leske bašo sa adava so kerela tuke. Ma mukh o pharipa te čhinaven tut te dikhe o šuže bukja so o Jehova više kerela len tuke (Ps. 16:5, 6).

E DEVLESKORO LAFI

7. Sar adava so proučinaja i Biblija pomožinela amenge te istrajna?

⁷ O Jehova dengja amen plo Lafi te šaj te pomožinel amenge te istrajna. Ki Biblija isi but stihija kola so uverinena amen kaj o Jehova tano uzi amende. Te dikha samo jekh asavko stiho. Ko Matej 6:8 pišinela: „Tumaro Dad džanela so valjani tumenge angleder te roden lestar adava“. Akala lafija vakergja len o Isus, a ov pendžarela e Jehova pošukar taro bilo koj javer. Adaleske, šaj te ova celosno sigurna kaj keda cidaja muke o Jehova džanela so valjani amenge hem pomožinela amen. Ki Biblija isi panda but javera slična misle kola so šaj te keren te ova panda poodlučna te istrajna (Ps. 94:19).

8. a) Vaker nesavo biblisko načelo kova so šaj te pomožinel amenge te istrajna. b) So ka pomožinel amen te setina amen ko bibliska načelija keda valjanena amenge?

⁸ O bibliska načelija šaj te pomožinen amenge te istrajna. Ki lende isi mudrost koja so šaj te pomožinel amenge te ana šukar odluke (Izr. 2:6, 7). Na primer, i Biblija ohrabrinela amen te čhinava te sekirina amen bašo adava so šaj te slučinel pe ki idnina, namesto adava te ovel amen doverba ko Jehova sekova dive (Mat. 6:34). Ako isi amen navika te čitina i Biblija sekova dive hem hor te razmislina bašo adava, ka ovel amenge polokho te setina amen ko bibliska sovetija keda ka valjani te ana nesavi odluka ili keda valjani te istrajna ko nesavo problemi.

9. Sar o primer e Jehovaskere verna slugengoro taro purano vreme panda poviše bajrarela amari doverba kaj ov ka pomožinel amen?

⁹ Ki Biblija isto agjaar čitinaja bašo manuša kola so čače postojngje, manuša sar amende kolen so sine len doverba ko Jehova hem kolenge so ov pomožingja (Evr. 11:32-34; Jak. 5:17). Keda razmislinaja baši lenge, panda poviše uverinaja amen kaj o Jehova „tano amaro than garajbaske hem amari sila, pomoš so lokhe arakhela pe ko pharo vreme“ (Ps. 46:1). O primer e Jehovaskere verna slugengoro taro purano vreme pottikninela amen te ovel amen sar lengiri vera hem istrajnost (Jak. 5:10, 11).

10. So šaj te kere te šaj te ovel tut celosno korist taro e Devleskoro Lafi?

¹⁰ So šaj te kere tu. Čitin i Biblija sekova dive hem ker tuke spisako stihoncar kola so tuke lično but pomožinena. But džene halile kaj najšukar način te počminen o dive hem te arakhen ohrabruvačka misle tari Biblija, tano agjaar so ka čitinen e diveskoro stiho. Jekh phen so vikinela pe Meria vakerela kaj e diveskoro stiho but pomožingja lake keda solduj lakere roditelija nasvalile taro rako. So pomožingja lake te istrajnel džikote grižinela pe lenge sine ko posledna masekija taro lengoro životo? Oj vakerela: „Sekova sabajle čitinava sine e Diveskoro stiho hem razmislinava sine bašo adava so čitinava. Adaja navika pomožingja mange te pherav mi godi bibliska mislencar, a adava palem, pomožingja mange te koncentririnav man ko považna bukja, a na ki mande hem ki phari situacija kolate so sium sine“ (Ps. 61:2).

O PHRALJA HEM O PHENJA

11. Soske utešinela amen adava so džanaja kaj na siem samo amen adala kola so cidena muke?

¹¹ Javer način sar o Jehova pomožinela amenge te istrajna, tano preku amare phralja hem o phenja. Utešinela amen adava so džanaja kaj „o ista muke trpinena hem [amare] phralja“, so sikavela kaj na siem samo amen adala kola so cidena muke (1. Pet. 5:9). Akava značinela kaj isi phralja hem phenja kola so sine len slična problemija sar amare, ama sepak ačhile verna e Jehovaske. Adava sikavela kaj amen da šaj te istrajna (Apo. 14:22).

12. Sar šaj te pomožinen amenge o phralja hem o phenja, hem sar šaj amen da te pomožina lenge? (2. Korinkjanja 1:3, 4).

¹² Amare phralja hem phenja šaj te ohrabrinen amen hem te pomožinen amenge te istrajna bizi razlika taro so nakhaja. O apostol Pavle da osetingja adava ki pli koža. Ko ple pismija but puti spomningja ko anav adalen so pomožingje leske džikote sine phanlo ko jekh kher hem blagodaringja pe lenge. Ola utešingje le, ohrabringje le hem pomožingje leske ko praktična načinija (Fil. 2:25, 29, 30; Kol. 4:10, 11). Amen da avdive šaj te doživina nešto slično. Keda valjani amenge pomoš te istrajna, amare phralja hem phenja tane spremna te pomožinen. A keda lenge valjani amari poddrška, amen siem lenge akate. (Čitin 2. Korinkjanja 1:3, 4.)

13. So pomožingja e Majake te istrajnel?

¹³ O phralja hem o phenja but pomožingje e Majake, jekh phen tari Rusija. Ko 2020 berš, ko lakoro kher iznenadeno khuvgja policija te kerel pretres, a pokasno ingargje la anglo sudo adaleske so vakerela sine baši pli vera e javerenge. I Maja vakerela: „Ko periodi keda emocionalno našti sine više te izdržinav, o phralja hem o phenja javinena pe sine, pišinena mange sine hem vakerena mange sine kobor mangena man. Sekogaš džanava sine kaj isi man bari familija so mangela man, ama ko 2020 berš panda poviše uveringjum man ko adava“.

14. So šaj te kera te šaj te dobina pomoš taro phralja hem taro phenja? (Dikh hem i slika.)

¹⁴ So šaj te kere tu. Ačhov paše tle phralencar hem phenjencar. Ma ladža te rode pomoš taro starešine. Ola tane amenge „sar than garajbaske tari bavlal, sar zaštita tari bura“ (Isa. 32:2). Hem ma bistre kaj o phralja da o phenja da borinena pe pumare problemencar. Adava so ka kere šukaripe nekaske keda valjani leske pomoš, ka pomožinel tuke te ovel tut uramnoteženo stavi bašo tle problemija hem te ačhove pozitivno (Apo. 20:35).

AMARI NADEŽ

15. Sar i nadež pomožingja e Isuseske, hem sar pomožinela amenge? (Evreija 12:2).

¹⁵ O Jehova dengja amen sigurno nadež koja so pomožinela amenge te istrajna (Rim. 15:13). Setin tut sar i nadež pomožingja e Isuseske te izdržinel ko najpharo dive taro leskoro životo ki phuv. (Čitin Evreija 12:2.) O Isus džanlja kaj adalea so ka ačhol verno ka pomožinel te braninel pe e Jehovaskoro anav. Isto agjaar, i nadež pomožingja leske spremno te adžikerel o vreme keda palem ka iranel pe ko nebo kote so ka ovel ple Dadea hem kote so zaedno ple phralencar ka vladinel ko nebesno Carstvo. Amenge da i nadež kaj ka živina večno ko e Devleskoro nevo sveto, pomožinela amenge te istrajna iako šaj ka doživina but pharipa ko akava sveto e Satanaskoro.

16. Sar i nadež pomožingja jekhe phenjake te istrajnel, hem so sikljovea taro adava so vakergja?

¹⁶ Sar i nadež bašo večno životo ko nevo sveto pomožingja jekhe phenjake tari Rusija so vikinela pe Ala, kolakere rome astargje le hem čhivgje le ko zatvor džikote adžikerela sine te sudinen le? Keda slučingja pe sa akava, i Ala vakerela: „Keda molinava man hem razmislinava baši nadež so isi amen baši idnina, adava pomožinela mange te na razočarinav man previše. Džanava kaj akava nane krajo bašo sa. O Jehova ka pobedinel hem ka nagradinel amen“.

17. Sar ka sikava kaj siem blagodarna baši nadež so dela amen o Jehova? (Dikh hem i slika.)

¹⁷ So šaj te kere tu. Odvojn tuke vreme te razmisline baši but šuži idnina so vetinela amenge o Jehova. Zamislin tut ko e Devleskoro nevo sveto hem sar doživinea sa o blagoslovija so ka oven amen. Hem agjaar, bizi razlika savi nevolja ka ovel amen, ka džana kaj oj „tani momentalno hem lokhi“ (2. Kor. 4:17). Isto agjaar, ker sa so šaj te vakere e javerenge ko so verujnea. Lenge tano popharo te borinen pe e problemencar ko akava sveto adaleske so na džanena o čačipe hem na džanena e Devleskere vetuvanja baši idnina. Čak ako vakerea lenge samo nekobor bukja, šaj te ohrabrine len te mangen te džanen nešto poviše bašo e Jehovaskoro Carstvo hem leskere vetuvanja.

18. Soske šaj te ovel amen doverba ko e Jehovaskere vetuvanja?

¹⁸ O Jov verno istrajngja ko but phare ispitija hem adaleske šaj sine te vakerel e Jehovaske: „Akana džanava kaj tu sa šaj te kere hem kaj na postojnela buti koja so našti te kere la“ (Jov 42:2). O Jov halilo kaj našti ništo te čhinavel e Jehova te ispolninel pli namera. Akava šaj amenge da avdive te del sila te istrajna. Te vakera jekh primer. Jekh džuvli tani nasvali hem razočarimi adaleske so sine ko but doktorija hem nijekh lendar na uspejngja te sasljarel la. Ama keda jekh šukar hem iskusno doktori otkrinela soj o problemi hem objasninela lake sar ka sasljarel la, oj lokhjola, iako ka valjani te nakhel vreme te šaj te sasljol. Adava so džanela kaj adžikerena la pošukar dive, i nadež kaj ka sasljol, pomožinela lake te istrajnel. Slično tano amencar da, i nadež kaj ka živina ko raj pomožinela amenge te istrajna.

19. So valjani amenge te šaj te istrajna?

¹⁹ Sar so dikhlem, o Jehova pomožinela amenge te istrajna ko amare nevolje preku i molitva, preku plo Lafi, preku o phralja hem o phenja hem preku amari nadež. Ako prifatinaja akaja pomoš, o Jehova ka ovel amencar bizi razlika so ka doživina, sa džikote sa o muke ko akava sveto e Satanaskoro nane više te postojnen (Fil. 4:13).