Poštujn e javeren

1. Soske amenge šukar keda o javera poštujnena amen? (Izreki 22:1).

DALI osetinea tut šukar keda o javera poštujnena tut? Sigurno kaj oja. Sekole manuše isi le potreba te ovel poštujmo. Keda o javera poštujnena amen adava kerela amen srekjna. Baš adaleske i Biblija vakerela kaj „te ove poštujmo tano pošukar taro srebro hem taro zlato“. (Čitin Izreki 22:1.)

2-3. Soske nane sekogaš lokho te poštujna e javeren, hem kas valjani te poštujna?

² Nane amenge sekogaš lokho te poštujna e javeren. Jekh buti soske tano adava agjaar adaleske so dikhaja lengere slabostija. Isto agjaar, živinaja ko vreme keda tano normalno o manuša te na sikaven poštovanje. Ama amen mora te razlikujna amen. Soske? Adaleske so o Jehova vakerela: „Poštujnen sarinen“ (1. Pet. 2:17).

³ Ki akaja statija ka dikha so značinela te poštujna e javeren hem sar šaj te sikava poštovanje 1) amare familijake, 2) amare phralenge hem phenjenge hem 3) adalenge so nane e Jehovaskere svedokija. Posebno ka koncentririna amen ko adava sar šaj te sikava poštovanje čak keda adava nane lokho.

SO ZNAČINELA TE POŠTUJNA E JAVEREN?

4. So značinela te poštujna e javeren?

⁴ Sar bi objasninea so značinela o lafi poštovanje? Ko nesave čhibja, maškar kolende soj hem amari, o lafija „poštovanje“ hem „čest“ tane povrzime. Akale lafencar mislinela pe ko adava sar dikhaja nekaste hem sar postapinaja lea. Keda ka primetina kaj nekas isi šuže osobine, kaj kergja nešto važno hem kaj isi le nesavo avtoriteti upri amende, asavke manuše poštujnaja le hem keraja sa te šaj te osetinel pe kaj vredinela hem ceninaja le. Normalno, važno tano te poštujna e javeren iskreno, javere lafencar taro vilo (Mat. 15:8).

5. So šaj te pottikninel amen te poštujna e javeren?

⁵ O Jehova mangela te poštujna e javeren. Na primer, ov vakerela amenge: „Sekova manuš neka ovel podložno e vlastenge so isi len avtoriteti“ (Rim. 13:1, 7). Ama, nesave šaj mislinena: „Ka poštujnav e javeren samo ako ola zaslužinena adava“. Dali asavko razmislibe tano ispravno? Na. Sar sluge e Jehovaskere haljovaja kaj o poštovanje so isi amen sprema o manuša na valjani te zavisinel samo taro lengere postapke. Adava valjani te temelinel pe ko amaro mangipe sprema o Jehova hem amari želba te radujna le (1. Pet. 3:15).

6. Dali šaj te poštujne nekas so na poštujnela tut? Objasnin. (Dikh hem i slika.)

⁶ Nesave šaj pučena pe: „Dali čače šaj te poštujne nekas so na poštujnela tut?“ Šaj. Te dikha nekobor primerija. O cari o Saul ponižingja ple čhave e Jonatane anglo javera (1. Sam. 20:30-34). Sepak, o Jonatan sikavgja kaj poštujnela ple dade kova so sine cari hem ponadari da borinela pe sine zaedno lea ko vojne sa džikote sine dživde (2. Moj. 20:12; 2. Sam. 1:23). O prvosvešteniko o Ilij krivingja e Ana kaj tani mati (1. Sam. 1:12-14). Sepak, i Ana poštujngja le džikote kergja lea lafi, iako sarine ko Izrael džanena sine kaj na ukoringja ple lošna čhaven so bi valjani sine te kerel sar dad hem sar prvosvešteniko (1. Sam. 1:15-18; 2:22-24). Nesave filozofija ki Atina vredžingje e apostol Pavle agjaar so vakergje leske kaj but „brborinela“ (Apo. 17:18). Ama sepak o Pavle poštujngja len džikote kergja lencar lafi (Apo. 17:22). Akala primerija sikavena kaj o baro mangipe sprema o Jehova hem i želba te na razočarina le šaj te pottikninen amen te poštujna e javeren na samo keda adava tano lokho, nego hem keda tano pharo. Te dikha kas valjani te poštujna, hem soske?

SIKAV POŠTOVANJE TLE FAMILIJAKE

7. Soske nane amenge sekogaš lokho te poštujna amare familija?

⁷ Soske tano pharo? Amen nakhavaja but vreme zaedno amare familijaja adaleske šukar džanaja kola tane lengere šukar osobine, a kola tane lengere slaba strane. Nesaven šaj isi len nasvalipe kova so kerela amenge pharo te grižina amen lenge ili šaj isi len preterano stres hem tane but sekirime. Javera palem, šaj dukhavena amen ple lafencar ili adalea so kerena. Amen valjani te osetina amen šukar keda siem amare familijaja. Ama, ako nesave lendar na sikavena poštovanje tegani nane te ovel mir ki familija hem sloga. I familija šaj te sporedinel pe jekhe teloja. Nesavo nasvalipe šaj te kerel o telo te na funkcionirinel šukar. Slično, ako ki familija na poštujnena pe jekh jekhea adava šaj te kerel te na nakhen šukar. Ama, isto sar so but taro nasvalipa šaj te sasljon, sekova jekh tari familija šaj te sikljol te ovel le hem te sikavel poštovanje jekh jekheske.

8. Soske tano važno te poštujna sekole jekhe ki familija? (1. Timotej 5:4, 8).

⁸ Soske te sikava poštovanje? (Čitin 1. Timotej 5:4, 8.) Ko plo prvo pismo dži ko Timotej o Pavle kergja lafi bašo adava sar sekova jekh tari familija valjani te grižinel pe jekh jekheske. Ov objasningja kaj valjani te poštujna sekole jekhe tari familija na adaleske so mora nego adaleske so služinaja „e Devleske celo vilea“. Akava značinela kaj adava keraja taro mangipe sprema o Jehova hem adaleske so ko adava dikhaja sar delo taro amaro obožavibe e Devle. O Jehova kergja i familija (Ef. 3:14, 15). Adaleske, keda poštujnaja amen jekh jekhea ki familija, ustvari poštujnaja e Jehova, kova so kergja i familija (1. Tim. 5:4). Akaja tani bari pričina soske te sikava poštovanje ki familija!

9. Sar šaj jekh rom hem jekh romni te sikaven peske poštovanje? (Dikh hem o slike.)

⁹ Sar te sikava poštovanje. Jekh rom kova so poštujnela ple romnja sikavela kaj tani leske skapoceno hem keda tane korkori hem anglo javera (Izr. 31:28; 1. Pet. 3:7). Ov nikogaš na khuvela la, na ponižinela la, a ni palem na kerela oj te osetinel pe kaj na vredinela. O Ariel,a jekh phral so živinela ki Argentina, vakerela: „Adaleske soj tani nasvali, mi romni ponekogaš vakerela bukja kolencar so dukhavela man. Keda slučinela pe adava trudinava man te na bistrav kaj na mislinela čače adava so vakerela. A keda više našti te izdržinav setinava man ko lafija taro 1. Korinkjanja 13:5 hem adava pomožinela man keda kerava laja lafi te sikavav poštovanje namesto holi“ (Izr. 19:11). Jekh romni sikavela kaj poštujnela ple rome agjaar so kerela šukar lafi baši leste anglo javera (Ef. 5:33). Oj nane lea sarkastično, na lela le ki hajgara hem na vikinela le gruba anavencar, soske tani svesno kaj asavko ponašibe tano sar ’rgja so uništinela o brako (Izr. 14:1). Jekh phen tari Italija, kolakere rome isi le anksioznost, vakerela: „Ponekogaš mislinava kaj mo rom preterano grižinela pe. Angleder taro mle lafija hem face ko muj dikhjola pe sine kaj na poštujnava le. Ama haliljum kaj kobor poviše vreme nakhavava manušencar kola so poštujnena e javeren džikote kerena lafi doborom poviše sium pottiknimi te sikavav poštovanje me romeske“.

10. Sar šaj o terne te sikaven kaj poštujnena ple roditelen?

¹⁰ Ternalen, oven poslušna bašo pravilija so čhivena len tumare roditelija (Ef. 6:1-3). Adalea sar kerena lencar lafi sikaven kaj poštujnena len (2. Moj. 21:17). Sar so phujrona, tle roditelenge šaj ka valjanel poviše tli pomoš. Grižin tut lenge najšukar so šaj. Te dikha o primer e Marijakoro, kolakoro dad nane e Jehovaskoro svedoko. Keda nasvalilo ov kergja te ovel popharo e Marijake te grižinel pe leske adaleske so dukhavela la sine but gruba lafencar. Oj vakerela: „Molingjum man na samo te poštujnav me dade nego hem te sikavav adava. Razmislingjum bašo adava kaj ako o Jehova rodela mandar te poštujnav mle roditelen tegani tano logično kaj ov šaj te del man hem sila te kerav adava. Sar so nakhela sine o vreme haliljum kaj mo dad na valjani te meninel o način sar ponašinela pe mancar te šaj te poštujnav le“. Ako poštujnaja sekole jekhe tari amari familija iako isi le slabostija, sikavaja kaj poštujnaja e Jehova kova so kergja i familija.

SIKAV POŠTOVANJE TLE PHRALENGE HEM TLE PHENJENGE

11. Soske šaj te ovel amenge pharo te poštujna nesave phrale ili phenja?

¹¹ Soske tano pharo? Amare phralja hem phenja živinena sprema o bibliska merilija, ama ponekogaš šaj nesave lendar nane te oven amencar ljubezna, ka ovel len pogrešno mislenje baši amende ili ka nervirinen amen. Ako isi amen pričina te žalina amen nesave phralestar ili phenjatar, šaj ka ovel amenge pharo ponadari te poštujna len (Kol. 3:13). Ama, so šaj te pomožinel amen te na čhinava te poštujna len?

12. Soske tano važno te poštujna amare phralen hem phenjen? (2. Petareskoro 2:9-12).

¹² Soske te sikava poštovanje? (Čitin 2. Petareskoro 2:9-12.) Ko plo dujto pismo, o Petar spomningja kaj nesave hristijanja taro sobranie ko prvo veko na sikavgje poštovanje ple lafencar okolenge „so isi len avtoriteti“, javere lafencar e starešinenge. Sar reagiringje ko adava o verna angelija kola so dikhena sine so slučinela pe? Zamislin, taro poštovanje sprema o Jehova ola na vakergje nijekh lošno lafi adale manušenge! O angelija, kola soj sovršena, na vredžingje lafencar adale arogantna manušen. Namesto adava, ola mukhle o Jehova te sudinel len hem te ukorinel len (Rim. 14:10-12; sporedin Juda 9). Šaj te sikljova taro angelija. Ola na ponašingje pe lošno čak e protivnikoncar. Adaleske, kobor poviše amen valjani te poštujna amare phralen hem phenjen kola so mangena e Jehova. Ustvari, i Biblija pottikninela amen: „Oven prva ko adava te sikaven kaj poštujnena jekh jekhe“ (Rim. 12:10). Agjaar ka sikava kaj poštujnaja e Jehova.

13-14. Sar šaj te sikava poštovanje amare phralenge hem phenjenge? Vaker primerija. (Dikh hem o slike.)

¹³ Sar te sikava poštovanje. Sar starešine, keda sikavena e javeren sekogaš keren adava mangipaja (Filem. 8, 9). Ako valjani te den nekaske sovet keren le adava ko ljubezno način, a na keda sien nervozna. Phenjalen, tumen šaj but te pomožinen e javerenge ko sobranie te poštujnen pe jekh jekhea, agjaar so nane te keren negativno lafi e javerendar ni palem nane te klevetinen (Tit 2:3-5). Sarine amen šaj te sikava kaj poštujnaja e starešinen ko sobranie agjaar so ka sorabotina lencar, ka sikava lenge blagodarnost bašo trudo so dena te šaj te ikeren o sostanokija, te predvodinen ki služba hem te pomožinen okolenge so gele ko lošno drumo (Gal. 6:1; 1. Tim. 5:17).

¹⁴ Jekhe phenjake so vikinela pe Rosio, sine pharo te poštujnel jekhe starešina kova so dengja la sovet. Oj vakerela: „Sium sine voznemirimi soske mislingjum kaj na kergja mancar ljubezno lafi. Khere kerava sine lestar negativno lafi. Iako probinava sine te na sikavav adava, hor ki mande osetinava sine kaj na dengja man o sovet taro ispravno motivi hem adaleske na šungjum le“. So pomožingja akale phenjake? Oj objasninela: „Džikote čitinava sine i Biblija, čitingjum o stihija taro 1. Solunjanja 5:12, 13. Keda haliljum kaj na sikavava poštovanje adale phraleske mli sovest počmingja te mučinel man. Molingjum man e Jehovaske hem istražingjum ko amare publikacie te šaj te arakhav konkretna informacie kola so ka pomožinen mange te promeninav mlo stavi. Akava pomožingja man te haljovav kaj o problemi na sine ko phral nego ki mli gordost. Akana haliljum kaj ako na sium ponizno ka ovel mange pharo te poštujnav e javeren. Panda trudinava man te sikavav poviše poštovanje e javerenge hem džanava kaj o Jehova radujnela pe bašo adava“.

SIKAV POŠTOVANJE OKOLENGE SO NANE E JEHOVASKERE SVEDOKIJA

15. Soske šaj te ovel amenge pharo te poštujna okolen so nane e Jehovaskere svedokija?

¹⁵ Soske tano pharo? Džikote propovedinaja but puti arakhaja manušen kola so na mangena o biblisko čačipe (Ef. 4:18). Nesave odbinena te šunen amaro haberi soske taro tiknipe tane sikavde te verujnen ko nešto javer. Nesave kolege ili součenikija šaj ponašinena pe grubo amencar, šaj amaro šefi ili nastavniko nikogaš nane zadovolno taro adava so keraja. Sar so nakhela o vreme, šaj te na poštujna asavke manušen hem te čhinava te postapina lencar agjaar sar so bi mangaja o javera te postapinen amencar.

16. Soske tano važno te sikava poštovanje okolenge so panda na služinena e Jehovaske? (1. Petareskoro 2:12; 3:15).

¹⁶ Soske te sikava poštovanje? Ma bistre kaj o Jehova dikhela sar postapinaja okolencar so panda na služinena leske. O apostol Petar setinkergja e hristijanen kaj adalea so ka ponašinen pe šukar šaj te pottikninen nesaven „te slavinen e Devle“. Adaleske, ov vakergja lenge te objasninen ple veruvanja ko krotko način hem te sikaven hor poštovanje. (Čitin 1. Petareskoro 2:12; 3:15.) Bizi razlika dali valjani te objasninen pumare veruvanja anglo nesavo sudija ili anglo nekoj javer, o hristijanja valjani sekogaš te poštujnen e javeren, isto sar so bi kerena adava ako o Devel tano uzi lende. Ko krajo, o Jehova dikhela hem šunela so vakeraja hem sar vakeraja adava. Akava sikavela amenge kobor valjani te poštujna adalen so nane e Jehovaskere svedokija!

17. Sar šaj te poštujna okolen so nane e Jehovaskere svedokija?

¹⁷ Sar te sikava poštovanje. Džikote propovedinaja, nikogaš na mangaja o javera te mislinen kaj peravaja adalen so na džanena but baši Biblija. Namesto adava, na bistraja kaj ola tane skapocena e Devleske hem kaj tane pobare amendar (Agej 2:7; Fil. 2:3). Ako nekoj vredžinela tut bašo tle veruvanja, ma iran ko isto način agjaar so ki šala ka frde leske lafija (1. Pet. 2:23). Ama, ako vakerea nešto bašo kova so pokasno ka pere pišmani, odma izvinin tut leske. Sar šaj te poštujna e manušen ki buti? Ov bukjarno rabotniko hem trudin tut te primetine o šukar bukja ko kolege hem ko šefija (Tit 2:9, 10). Keda sian pošteno hem bukjarno rabotniko šaj nane sekogaš te ugodine e manušenge, ama sigurno ka ugodine e Devleske (Kol. 3:22, 23).

18. Soske tano važno te poštujna e javeren?

¹⁸ Isi amen but pričine te sikava poštovanje e javerenge. Dikhlem kaj, keda poštujnaja sekole jekhe tari familija ustvari poštujnaja e Jehova, o Poglavari ki amari familija. Slično, keda poštujnaja amare duhovno phralen hem phenen, poštujnaja amare Dade soj ko nebo. A keda poštujnaja okolen so nane e Jehovaskere svedokija, keraja te ovel lenge polokho jekh dive ola da te počminen te slavinen le, javere lafencar te den čest amare bare Devleske. Čak ako nesave manuša nikogaš na poštujnena amen, važno tano sekogaš amen te poštujna len. Soske? Adaleske so o Jehova ka blagoslovinel amen. Ov vetinela amenge: „Me sikavava čest adalenge so sikavena mange čest“ (1. Sam. 2:30).