Amenge tano šukar te ova popaše e javerencar

1-2. Koja tani jekh taro bukja koja so e Jehovaske tani but važno, hem so mangela ov te kera?

JEKH taro bukja kola soj but važna e Jehovaske tano o način sar ponašinaja amen e javerencar. O Isus sikavgja kaj valjani te manga amare pašutnen sar korkori amen (Mat. 22:37-39). Ko adava tano vklučimo čak te ponašina amen šukar okolencar so na verujnena ko ista bukja sar amende. Ako sikavaja asavki ljubeznost, ka dža palo primer e Jehovaskoro o Devel kova so „dela leskoro kham te svetinel upro lošna hem upro šukar hem dela te perel bršim upro pravedna hem upro nepravedna“ (Mat. 5:45).

² Iako mangela sa e manušen, o Jehova tano posebno povrzimo okolencar soj tane leske poslušna (Jovan 14:21). Ov mangela te dža palo leskoro primer. Adaleske pottikninela amen te sikava baro mangipe taro vilo sprema amare phralja hem phenja (1. Pet. 4:8; Rim. 12:10). Keda razmislinaja so značinela asavko mangipe hem te ovel pe povrzimo nekasaja, šaj avela amenge ki godi o paše odnos so isi amen nekasaja tari familija kole so but mangaja le ili nesave mangle amalea.

3. So valjani te ovel amen ki godi bašo mangipe?

³ Te šaj jekh luludi so arakhaja la khere te bajrol, valjani te grižina amen lake. Isto agjaar, te šaj amaro mangipe ponadari da te ovel baro sprema o javera mora te kera buti ki leste. O apostol Pavle dengja akava sovet e hristijanenge: „Ponadari da mangen tumen jekh jekhea sar phralja“ (Evr. 13:1). O Jehova mangela celo vreme te trudina amen te šaj amaro mangipe sprema o javera te bajrol. Ki akaja statija ka kera lafi bašo adava soske valjani te ova paše amare phralencar hem phenjencar hem sar šaj te ova lencar panda popaše.

SOSKE VALJANI TE OVA POPAŠE JEKH JEKHEA

4. Sprema Psalm 133:1, so ka pomožinel amen ponadari da te cenina amaro phralipe kova soj ko jekhipe? (Dikh hem o slike.)

⁴ Čitin Psalm 133:1. Složinaja amen adalea so pišingja o psalmisti kaj „tano šukar hem prijatno“ te ova amala okolencar so mangena e Jehova. Ama isto sar so nekoj šaj više te na primetinel jekh šužo kaš adaleske so dikhela le sekova dive, amen da šaj ako na pazinaja te počmina te na cenina doborom but o šužipe so isi ko amaro hristijansko jekhipe. Amen dikhaja amare phralen hem phenjen često, šaj nekobor puti ko kurko. Sar šaj ponadari da te cenina len? Amaro mangipe sprema o phralja hem o phenja ka bajrol ako odvojnaja amenge vreme te razmislina bašo adava kobor sekova jekh lendar tano skapoceno e sobranieske hem amenge.

5. Sar šaj te vlijajnel upro javera o mangipe so isi ko amaro phralipe?

⁵ Nesave so prvo puti avena ko amare sostanokija tane vooduševime taro mangipe so sikavaja jekh jekheske. Adaleske šaj ka haljoven kaj arakhle o čačipe. O Isus vakergja: „Agjaar sarine ka džanen kaj sien mle učenikija, ako isi tumen mangipe maškar tumende“ (Jovan 13:35). Razmislin bašo iskustvo jekhe čhajakoro so vikinela pe Četra, koja so proučinela sine e Jehovaskere svedokoncar. Oj prifatingja i pokana te džal ko jekh regionalno kongres. Ko krajo taro prvo dive i Četra vakergja e phenjake koja so proučinela sine laja: „Mle roditelija nikogaš na gušingje man, ama ko tumaro kongres sium sine gušimi 52 puti samo jekhe diveske. Osetingjum e Jehovaskoro mangipe preku akaja duhovno familija. Me da mangava te ovav delo tari akaja familija“. I Četra ponadari da napredujngja hem krstingja pe ko 2024 berš. Čače keda dikhena amare šukar postapke, maškar kolende soj hem o mangipe so isi amen jekh jekheske, o neve but puti tane pottiknime te služinen e Jehovaske (Mat. 5:16).

6. Sar adava so ka ova popaše amare phralencar hem phenjencar šaj te zaštitinel amen?

⁶ Adava so ka ova panda popaše amare phralencar hem phenjencar šaj te zaštitinel amen. O Pavle e phralenge hem e phenjenge vakergja: „Ohrabrinen tumen jekh jekhea sekova dive... te šaj nijekheskoro vilo te na ovel zoralo taro grevo kole so isi le mokj te hovavel“ (Evr 3:13). Ako doborom but obeshrabrinaja amen so počminaja te cida amen taro drumo so ingarela ki pravednost, o Jehova šaj te pottikninel nesave phrale ili phenja kola so ka primetinen adava, te den amen i pomoš so valjani amenge (Ps. 73:2, 17, 23). Asavko ohrabruvanje ustvari tano amenge šukar.

7. Sar tane povrzime o mangipe hem o jekhipe? (Kološanja 3:13, 14).

⁷ Amen siem delo tari jekh grupa manuša kola so but trudinena pe te sikaven mangipe jekh jekheske hem adaleske isi amen but blagoslovija (1. Jov 4:11). Na primer, o mangipe pottikninela amen te trpina amen jekh jekhea, a adava kerela te ova ko jekhipe amare phralencar hem phenjencar. (Čitin Kološanja 3:13, 14; Ef. 4:2-6.) Adaleske ko amare sostanokija šaj te dikhel pe jekhipe savo so nane maškar ki nijekh javer grupa manuša ki phuv.

TE SIKAVA POŠTOVANJE JEKH JEKHESKE

8. Sar o Jehova pomožinela amen te ova ko jekhipe amare phralencar hem phenjencar?

⁸ O jekhipe so isi maškar e Jehovaskere sluge ko celo sveto tano baro čudo. O Jehova pomožinela amen te ova ko jekhipe iako siem nesovršena (1. Kor. 12:25). Ki Biblija pišinela kaj siem sikavde taro Devel te manga amen jekh jekhea (1. Sol. 4:9). Javere lafencar, ko plo lafi o Jehova vakerela amenge so točno valjani te kera te šaj te ova popaše jekh jekhea. Šaj te mukha te ova sikavde taro Devel agjaar so šukar ka proučina leskere sikljojba hem ka primenina len (Evr. 4:12; Jak. 1:25). E Jehovaskere svedokija trudinena pe te keren baš adava!

9. So sikljovaja taro Rimjanja 12:9-13, bašo adava te sikavel pe poštovanje e javerenge?

⁹ Sar e Devleskoro Lafi sikavela amen te ova popaše jekh jekhea? Te dikha so vakergja o Pavle bašo akava ko Rimjanja 12:9-13. (Čitin.) Te pazina posebno ko lafija „oven prva ko adava te sikaven kaj poštujnena jekh jekhe“. So značinela akava? Valjani te roda prilike te sikava kaj taro vilo mangaja e javeren ko različna načinija, sar na primer, te prostina, te ova gostoprimliva hem darežliva (Ef. 4:32). Na valjani te adžikere tlo phral ili tli phen te keren nešto te šaj te oven tuja popaše, namesto adava tu šaj te kere o prvo čekori. Tegani ka osetine kobor tane čače o lafija e Isuseskere: „Poviše radost isi keda dela pe, nego keda lela pe“ (Apo. 20:35).

10. Sar šaj te ova bukjarne keda kerela pe lafi bašo adava te sikava poštovanje jekh jekheske? (Dikh hem i slika.)

¹⁰ Interesno tano so odma otkeda vakergja te ova prva ko adava te sikava poštovanje jekh jekheske, o Pavle sovetingja amen te na ova mrzale, nego te ova bukjarne. Okova soj bukjarno tano revno hem but trudinela pe. Keda ka dobinel nesavi zadača ov dela pestar sa te šaj šukar te kerel la. O Izreki 3:27, 28 pottikninela amen: „Ma čhinav te kere šukaripe okolenge so valjani, ako šaj te kere adava“. Sprema akala lafija keda ka primetina kaj nekaske valjani nešto, keraja sa so šaj te pomožina le. Amen na odložinaja, a ni palem na mislinaja kaj nekoj javer ka pomožinel le (1. Jov 3:17, 18).

11. So šaj te pomožinel amen te ova popaše jekh jekhea?

¹¹ Javer način sar šaj te sikava poštovanje e javerenge tano agjaar so sigate ka prostina lenge keda ka povredinen amen. Ko Efešanja 4:26 pišinela: „Ma mukhen te nakhel o dive, a tumen panda te oven holjame“. Soske te na ikera holi? Ako ikeraja holi, sprema o 27 stiho ka mukha than e Bengeske te vlijajnel. Ko plo lafi o Jehova celo vreme vakerela amenge te prostina amenge maškar amende. Ko Kološanja 3:13 siem pottiknime spremno te prostina jekh jekheske. O prostibe e javerengere greške tano jekh taro najšukar načinija te ova popaše lencar. Keda keraja adava pomožinaja te ikera o jekhipe kova so dobinaja le preku e Devleskiri sila, a kerela te ova ko mir e javerencar (Ef. 4:3). Znači, o prostibe tani glavno buti koja so kerela maškar e Jehovaskoro narodo te ovel jekhipe hem mir.

12. Sar o Jehova pomožinela amen te prostina?

¹² Normalno, šaj te ovel amenge pharo te prostina okolenge so povredingje amen. Ama šaj adava te kera le adaleske so pomožinela amen e Devleskiri sila. Otkeda o Pavle pottikningja amen te manga amen taro vilo jekh jekhea hem te na ova mrzale, ov vakergja akava da: „E Devleskiri sila neka pottikninel tumen te oven revna“. Adava značinela kaj e Devleskiri sila šaj te pomožinel amen te ova revna hem te manga te kera sa adava so o Jehova rodela amendar. A o Jehova rodela amendar te manga amen taro vilo jekh jekhea hem spremno te prostina amenge. Adaleske, vilestar molinaja e Jehova te pomožinel amen ko adava (Luka 11:13).

„MAŠKAR TUMENDE TE NA OVEN PODELBE“

13. So šaj te kerel podelbe maškar amende?

¹³ Ko sobranie isi različna manuša kolen so isi len različno poteklo (1. Tim. 2:3, 4). Ako na pazinaja, o razlike šaj te keren podelbe maškar amende keda kerela pe lafi bašo bukja kolenge so valjani korkori te odlučina, sar na primer sar ka urava amen, sar ka doterina amen, sar ka grižina amen bašo amaro sastipe ili savi zabava ka birina (Rim. 14:4; 1. Kor. 1:10). Adaleske so o Devel sikavgja amen te manga amen taro vilo jekh jekhea, mora te pazina te na čhiva e javeren te dikhen ko asavke bukja isto sar amende, soske mislinaja kaj amaro mislenje tano pošukar (Fil. 2:3).

14. So valjani sekogaš te trudina amen te kera, hem soske?

¹⁴ Isto agjaar, šaj te čhinava te avel dži ko podelbe ko sobranie agjaar so ka trudina amen sekogaš te utešina hem te izgradina e javeren (1. Sol. 5:11). Ko posledno vreme, but baro broj taro adala so na sine aktivna ili so sine cidime taro sobranie, irangje pe. A amen mangipaja dodžakeraja len! (2. Kor. 2:8). Primetin so slučingja pe jekhe phenjake koja so ali ko sostanok ki dvorana otkeda deš berš na sine aktivno. Oj vakergja: „Sarine asandile mancar hem pozdravingje pe“ (Apo. 3:19). Sar vlijajngja upri late adava so o phralja sine ljubezna? Oj vakerela: „Osetingjum kaj o Jehova pomožinela man palem te ovav srekjno“. Keda trudinaja amen te ohrabrina sarinen o Hristos šaj te koristinel amen te šaj te del nevi sila okolenge soj umorna hem so isi len pharipe (Mat. 11:28, 29).

15. Ko savo javer način šaj te kera jekhipe? (Dikh hem i slika.)

¹⁵ Javer način sar šaj te kera jekhipe tano amare lafencar. Ko Jov 12:11 pišinela: „Zarem o kan na ispitinela o lafija sar so i čhib probinela o hajbe?“ Angleder te čhivel hajbaske jekh šukar gotvači sekogaš probinela te šaj te ovel sigurno kaj tano vkusno. Slično, amen da valjani šukar te razmislina angleder te vakera nešto (Ps. 141:3). Amari cel valjani sekogaš te ovel te uverina amen kaj adava so mangaja te vakera le ka izgradinel, ka ohrabrinel hem kaj ka ovel korisno okolenge so šunena amen (Ef. 4:29).

16. Koj posebno valjani te trudinel pe ple lafencar te ohrabrinel e javeren?

¹⁶ Posebno o roma hem o roditelija valjani te trudinen pe ple lafencar te izgradinen e javeren (Kol. 3:19, 21; Tit 2:4). O starešine da valjani te ohrabrinen hem te utešinen e javeren džikote sar pastirija grižinena pe bašo e Jehovaskoro stado (Isa. 32:1, 2; Gal. 6:1). Jekh biblisko izreka vakerela: „O lafi vakerdo ko pravo vreme — kobor tano šukar!“ (Izr. 15:23).

TE MANGA AMEN „POSTAPKENCAR HEM ČAČIPAJA“

17. Sar šaj te ova sigurna kaj amaro mangipe sprema o phralja hem o phenja avela taro vilo?

¹⁷ O apostol Jovan vakergja „te na manga amen samo lafencar ili samo čhibjaja, nego postapkencar hem čačipaja“ (1. Jov. 3:18). Mangaja amaro mangipe sprema o phralja hem o phenja te avel taro amaro vilo. Sar šaj te kera adava? Kobor poviše nakhavaja vreme amare phralencar hem phenjencar doborom popaše ka ova lencar hem panda poviše ka manga amen jekh jekhea. Adaleske rode prilike te ove e javerencar ko sostanokija hem ki služba. Odvojn tuke vreme te dža ko tle phralja hem ko tle phenja. Ako keraja akala bukja tegani ka dikhjol kaj siem sikavde taro Devel te manga amen jekh jekhea (1. Sol. 4:9). Agjaar ponadari da ki amari koža ka osetina „kobor tano šukar hem prijatno keda o phralja živinena zaedno ko jekhipe!“ (Ps. 133:1).