O dejbe kerela amen poradosna

1-2. Sar koristinela amenge adava so isi amen sposobnost te ova poradosna keda daja nego keda laja?

KEDA o Jehova stvoringja e manušen dengja len sposobnost te osetinen pobari radost keda dena nego keda lena (Apo. 20:35). Dali akava značinela kaj ni hari na siem radosna keda dobinaja nešto? Na! Sarine amen džanaja kaj osetinaja amen šukar keda dobinaja nesavo poklon. Ama panda poradosna siem keda amen pokloninaja nekaske nešto. But koristinela amenge adava so o Jehova stvoringja amen ko asavko način. Soske?

² Adaleske so siem stvorime ko asavko način, o Jehova dozvolinela amenge korkori te vlijajna upro adava kobor ka ova srekjna. Šaj te ova panda poradosna agjaar so ka roda prilike te da e javerenge. Kobor tano šukar so siem stvorime ko asavko način (Ps. 139:14).

3. Soske bašo Jehova vakerela pe kaj tano „radosno Devel“?

³ I Biblija uverinela amen kaj o dejbe kerela amen srekjna hem adaleske na siem iznenadime so ki late pišinela kaj o Jehova tano „radosno Devel“ (1. Tim. 1:11). Ov tano o prvo so dengja hem kova so najviše dela. Sar so vakergja o apostol Pavle „preku leste isi amen životo, dvižinaja amen hem postojnaja“ (Apo. 17:28). Čače, „sekova šukar hem sovršeno poklon“ avela taro Jehova (Jak. 1:17).

4. Sar šaj te ova poradosna?

⁴ Verojatno sekova jekh amendar mangela te osetinel panda pobari radost koja so avela taro dejbe. Šaj te uspejna ko adava ako džaja palo primer e Jehovaskoro kova soj darežlivo (Ef. 5:1). Osven so ka dikha e Jehovaskoro primer, ka dikha hem so šaj te kera ako mislinaja kaj adava so daja na ceninela pe. Adava ka pomožinel amenge te ikera pa čak hem te bajrara amari radost so osetinaja la keda daja.

OV DAREŽLIVO SAR O JEHOVA

5. Save materijalna bukja dela amen o Jehova?

⁵ Sar o Jehova sikavela kaj tano darežlivo? Te dikha nekobor primerija. O Jehova dela amen materijalna bukja. Šaj nane amen but udobno životo, ama adaleske so o Jehova grižinela pe amenge, poviše dženen amendar isi amen adava so valjani amenge. Na primer, ov grižinela pe te ovel amen „hajbaske, urajbaske hem than živibaske“ (Ps. 4:8; Mat. 6:31-33; 1. Tim. 6:6-8). Dali o Jehova zadovolinela amare telesna potrebe soske tano dužno? Ni najhari! Tegani, soske o Jehova kerela adava?

6. So sikljovaja taro Matej 6:25, 26?

⁶ O Jehova grižinela pe bašo amare telesna potrebe adaleske so mangela amen. Razmislin bašo lafija e Isuseskere soj pišime ko Matej 6:25, 26. (Čitin.) Ki adaja prilika, o Isus lelja sar primer o stvorime bukja. Keda kergja lafi bašo čiriklja, ov vakergja: „Ola ni sejnena, ni žnejnena, ni ko ambarija khedena“. Ama, primetin so vakergja palo adava: „Tumaro Dad soj ko nebo dela len hajbaske“. A palo adava o Isus vakergja: „Zarem tumen na vredinena poviše lendar?“ So šaj te sikljova taro akava? O manuša so služinena e Jehovaske vredinena but poviše taro životne. Ako o Jehova grižinela pe bašo potrebe e životnengere, šaj te ova sigurna kaj ka grižinel pe amenge da! Sar sekova šukar roditeli, o Jehova grižinela pe ple familijake taro mangipe (Ps. 145:16; Mat. 6:32).

7. Kova tano jekh način te ova darežliva sar o Jehova? (Dikh hem i slika.)

⁷ Isto sar o Jehova, amen da taro mangipe šaj te da materijalna bukja. Na primer, dali pendžarea nesave phrale ili phenja kolenge so valjani hajbe ili šeja? O Jehova šaj te koristinel tut te šaj te del len adava so valjani lenge. E Jehovaskere sluge spremno pomožinena e javerenge, posebno keda slučinela pe nesavi katastrofa. Na primer, džikote sine i pandemija KOVID-19, nesave phralja hem phenja dena sine hajbe, šeja hem javera bukja okolenge so sine len potreba taro adava. Osven adava, but džene dena sine bare prilogija bašo aktivnostija so kerena pe ko celo sveto. Adaleske, šaj sine te pomožinel pe keda isi katastrofe ko celo sveto. Adala darežliva phralja hem phenja primeningje o lafija taro Evreija 13:16: „Ma bistren te keren šukaripe hem delinen adava so isi tumen e javerencar, soske asavke žrtve mangela o Devel“.

8. Ko save načinija koristinela amenge adava so dela amen o Jehova sila? (Isaija 40:29).

⁸ O Jehova dela sila. O Jehova radosno dela delo tari pli sila kola so nane la granice ple verna slugenge. (Čitin Isaija 40:29.) Dali nekogaš molingjan tut te dobine sila te šaj te na pere ko nesavo iskušenie ili te izdržine nesavi phari nevolja? Ili, ednostavno šaj molingjan tut te ovel tut dovolno sila te šaj te izdržine panda jekh dive. Keda dikhljan kaj odgovoringja pe ki tli molitva, šaj osetingjan tut sar o apostol Pavle kova so pišingja: „Sa šaj te kerav soske pomožinela mange okova so dela man sila“ (Fil. 4:13).

9. Sar šaj darežlivo te koristina amari sila isto sar o Jehova? (Dikh hem i slika.)

⁹ Iako siem nesovršena, šaj te dža palo primer e Jehovaskoro kova so darežlivo dela tari pli sila. Amen našti doslovno te da sila e javerenge. Ama šaj te koristina amari sila te šaj te pomožina len. Na primer, nesave pophure ili nasvale phraleske ili phenjake šaj te pomožina ko kherutne bukja ili te pazarina lenge. Ako dozvolinena amenge amare okolnostija, šaj te pomožina ko čistibe hem održibe i dvorana. Adava so ka koristina amari sila ko asavke načinija, but ka koristinel okolenge so obožavinena e Jehova.

10. Sar šaj te koristina i mokj e lafengiri te šaj te pomožina e javerenge?

¹⁰ Ma bistre kaj hem e lafen isi len mokj. Dali isi nekoj kaske so ka značinel but jekh iskreno pofalba? Dali pendžarea nekas kaske so valjani uteha? Ako oja, soske na kerea nešto te šaj te sikave adale manušeske kaj grižinea tut leske? Šaj te dža ki leste, te javinen tut leske ili te bičhale leske kartička ili poraka. Te šaj te ohrabrine nekas na valjani te džane te kere but šukar lafi. Nekobor ednostavna lafija taro vilo šaj te oven baš adava so valjani tle phraleske ili phenjake te šaj te ačhol verno panda jekh dive ili hari te raspoložinel pe (Izr. 12:25; Ef. 4:29).

11. Sar o Jehova koristinela pli mudrost?

¹¹ O Jehova dela mudrost. O učeniko o Jakov pišingja: „Ako nekaske tumendar falinela mudrost, neka rodel taro Devel hem ov ka del le. Soske ov dela darežlivo sarinenge hem bizo te rodel o greške“ (Jak. 1:5). Akala lafija sikavena kaj o Jehova na garavela pli mudrost samo peske. Ov ki bari mera delinela la e javerencar. Primetin kaj keda o Jehova dela mudrost, ov kerela adava „bizo te rodel o greške“. Ov na mangela te osetina amen lošno bašo adava so valjani amenge leskoro vodstvo. Ustvari, ov pottikninela amen te roda lestar vodstvo (Izr. 2:1-6).

12. Save prilike isi amen te delina amari mudrost e javerencar?

¹² A sar tano amencar? Šaj li amen da te delina amari mudrost sar o Jehova? (Ps. 32:8). E Jehovaskere slugen isi len but prilike te delinen e javerencar adava so siklile. Na primer, but puti obučinaja e neven ki služba. O starešine strplivo pomožinena e sluga-pomošnikonge hem e javere krstime phralenge te sikljon sar te keren pumare zadače ko sobranie. A okolen so isi len iskustvo ki gradba hem održibe, pomožinena te oven obučime okola so nane len but iskustvo te šaj te keren različna bukja soj povrzime e teokratska objektencar.

13. Sar šaj te obučina e javeren isto sar o Jehova?

¹³ Trudin tut te dža palo primer e Jehovaskoro keda obučinea e javeren. Ma bistre kaj o Jehova ki bari mera dela mudrost. Slično, amen da ki bari mera delinaja amaro iskustvo hem adava so džanaja okolencar so obučinaja len. Amen na garavaja ništo taro adava so džanaja okolestar so obučinaja le tari dar kaj jekh dive ka lel amaro than. A ni palem na vakeraja: „Man koj sikavgja man? Neka sikljol korkori!“ Maškar e Devleskoro narodo nane than bašo asavko stavi. Amen spremno daja sa amendar te šaj te delina adava so džanaja e javerencar (1. Sol. 2:8). Nadinaja amen kaj sar so nakhela o vreme, ola da „ka oven sposobna te sikaven e javeren“ (2. Tim. 2:1, 2). Agjaar, šaj ki bari mera te delina amari mudrost hem zaedno lencar te ova pomudra hem posrekjna.

AKO MISLINAJA KAJ AMARO DEJBE NA CENINELA PE

14. Sar reagirinena poviše džene ki amari darežlivost?

¹⁴ Keda siem darežliva, posebno sprema amare phralja hem phenja, ola but puti sikavena kaj ceninena adava. Šaj ka den amen kartička ili ka sikaven pumari blagodarnost ko javer način (Kol. 3:15). Keda sikavena kaj tane blagodarna kerena amen panda posrekjna.

15. So na valjani te bistra keda nekoj na sikavela cenenje?

¹⁵ Ama realno tano kaj nekogaš o javera nane te sikaven cenenje. Šaj dengjem nekaske but vreme, sila ili nešto materijalno, ama palo adava pučlem amen: „Dali voopšto ceninela adava so kergjum baši leste?“ Ako slučinela pe asavko nešto, so šaj te pomožinel amen te na našava amari radost hem te na holjana? Ma bistre o glavno stiho akale statijakoro, Apostolija 20:35. I radost so osetinaja taro dejbe na zavisinela taro adava sar o javera ka reagirinen. Šaj svesno te birina radosno te da čak ako mislinaja kaj o javera na ceninena adava. So šaj te pomožinel amen? Te dikha nekobor bukja.

16. So na valjani te bistra keda daja?

¹⁶ Ma bistre kaj džaja palo e Jehovaskoro primer. Ov dela šukar bukja e manušenge bizi razlika dali ceninena adava ili na (Mat. 5:43-48). O Jehova vetingja amenge kaj keda amen da daja, bizo te nadina amen kaj ka iranel pe amenge nešto, amari „nagrada ka ovel bari“ (Luka 6:35). Te na nadina amen ko ništo šaj hem te značinel te na očekujna te sikavel pe amenge blagodarnost. Te na bistra kaj o Jehova sekogaš ka nagradinel amen bašo adava so keraja te šaj te pomožina e javerenge hem bašo adava so daja radosno vilea (Izr. 19:17; 2. Kor. 9:7).

17. So javer šaj te pomožinel amen te ova sar o Jehova keda daja? (Luka 14:12-14).

¹⁷ Javer nešto so šaj te pomožinel amenge te ova sar o Jehova keda daja, tano o načelo soj pišimo ko Luka 14:12-14. (Čitin.) Normalno, nane pogrešno te ova gostoprimliva ili darežliva sprema okola so šaj te iranen amenge ko slično način. Ama so ako primetinaja kaj but puti daja nešto e javerenge adaleske so nadinaja amen kaj ka iranen amenge bašo adava? Tegani šaj te probina te primenina adava so vakergja o Isus. Šaj te sikava gostoprimstvo sprema nekaste so džanaja kaj našti te iranel amenge ko isto način. Tegani ka ova srekjna adaleske so džaja palo primer e Jehovaskoro. Isto agjaar, adava ka pomožinel amen te na našava amari radost čak keda o javera na sikavena amenge blagodarnost.

18. So na valjani te kera, hem soske?

¹⁸ Ma mislin odma kaj o javera nane blagodarna (1. Kor. 13:7). Ako nekoj na sikavela blagodarnost, šaj te puča amen: „Dali čače na ceninela ili samo bistergja te sikavel blagodarnost?“ Šaj isi javera da pričine soske nekoj na postapingja agjaar sar so očekujngjem. Nesave šaj tane but blagodarna, ama pharo lenge te sikaven adava. Šaj ladžana so valjanela lenge pomoš taro javera, posebno ako angleder ola pomožinena sine e javerenge. Bilo sar, ako mangaja e phralen hem e phenjen, nane te mislina lošno baši lende hem ponadari da radosno ka da (Ef. 4:2).

19-20. Soske tano važno te ova strpliva keda daja e javerenge? (Dikh hem i slika.)

¹⁹ Ov strplivo. O mudro cari o Solomon pišingja: „Frde tlo maro ko pani hem palo but dive palem ka arakhe le“ (Prop. 11:1). Akala lafija sikavena kaj nesave šaj te sikaven blagodarnost „palo but dive“, javere lafencar palo but vreme otkeda kergjem nešto baši lende. Te dikha jekh iskustvo kova so istakninela akava čačipe.

²⁰ Angleder but berša, i romni jekhe pokrainsko nadglednikoskiri, bičhalgja kartička jekhe phenjake koja so krstingja pe. Adale kartičkaja manglja te pottikninel la te ačhol verno. Okolu ofto berš pokasno, i phen odgovoringja lake jekhe pismoja koleste so pišingja: „Mora te vakerav tuke kobor tu pomožingjan man sa akala berša bizo te ove svesno bašo adava. Tle lafija sine but ohrabruvačka, ama posebno pogodingja man ko vilo o stiho so pišingjan mange. Nikogaš na bistergjum le“.a Otkeda objasningja lake save problemija sine la, i phen pišingja akava da: „Sine momentija keda mangljum te mukhav o čačipe, te našav taro obvrske hem taro sa. Ama tegani setinava man sine ko stiho so pišingjan mange hem adava dela man sine sila te na otkažinav man“. Isto agjaar, oj pišingja: „Ko akala ofto berš ništo javer na vlijajngja doborom but upri mande“. Šaj te zamislina amenge kobor sine radosno i romni e pokrainsko nadglednikoskiri keda dobingja adava pismo „palo but dive“! Šaj amenge da nekoj ka sikavel blagodarnost palo but vreme otkeda kergjem nešto šukar baši leste.

21. Soske sian odlučno ponadari da te ove darežlivo sar o Jehova?

²¹ Sar so spomningjem ko početok, keda o Jehova stvoringja amen ov dengja amen jekh posebno sposobnost. Iako radujnaja amen keda dobinaja nešto, panda poradosna siem keda amen daja. Osetinaja amen šukar keda šaj te pomožina amare phralenge hem phenjenge. Hem radujnaja amen keda ola sikavena amenge pumari blagodarnost. Sepak, bizi razlika dali nekoj ka sikavel amenge blagodarnost ili na, šaj te osetina amen zadovolna soske džanaja kaj kergjem adava soj ispravno. Nikogaš ma bistre kaj so hem te de, „o Jehova šaj te del tut but poviše taro adava“ (2. Let. 25:9). Amen nikogaš našti te da e javerenge poviše taro adava so o Jehova šaj te del amenge! Hem i najbari nagrada so šaj te dobina tani i nagrada taro Jehova. Adaleske, te ova odlučna ponadari da te dža palo primer amare darežlivo nebesno Dadeskoro.