Nikogaš na siem korkori

1-2. a) Soske šaj te ova uverime kaj nikogaš na siem korkori keda isi amen nevolje? b) So ka dikha ki akaja statija?

KEDA isi amen phare nevolje, šaj osetinaja amen sar ka phene siem skroz korkori ko jekh tikno čamco, ko more kole so isi le but branija. Ama, amen na siem bizi pomoš. Amaro nebesno Dad so grižinela pe amenge, na samo so primetinela amare nevolje nego hem vetinela kaj ka pomožinel amen te borina amen lencar. Ple verna slugenge o Jehova mangipaja dela akava vetuvanje: „Me... ka pomožinav tuke“ (Isa. 41:10).

² Ki akaja statija ka dikha sar o Jehova pomožinela amen ko štar načinija: 1) vodinela amen, 2) dela amen adava so valjani amenge, 3) arakhela amen hem 4) utešinela amen. O Jehova uverinela amen kaj bizi razlika save pharipa isi amen ko životo, ov nikogaš nane te bistrel amen. Nikogaš nane te mukhel amen. Adaleske, amen na siem nikogaš korkori.

O JEHOVA VODINELA AMEN

3-4. Sar o Jehova vodinela amen? (Psalm 48:14).

³ Čitin Psalm 48:14. O Jehova vodinela amen soske džanela kaj amen našti bizo leskoro vodstvo. Sar ov vodinela ple verna slugen avdive? Jekh način tano preku i Biblija (Ps. 119:105). Preku plo Lafi, o Jehova pomožinela amenge te ana odluke hem te oven amen osobine kola so ka keren amen posrekjna panda avdive hem kola so ka pomožinen amenge te živina večno ki idnina.a Na primer, ov sikavela amen te na ikera holi, te ova česna ko sa so keraja hem te manga e javeren celo vilea (Ps. 37:8; Evr. 13:18; 1. Pet. 1:22). Asavke šukar osobine pomožinena amenge te ova pošukar roditelija, bračna partnerija hem amala.

⁴ Osven adava, o Jehova mukhlja ki Biblija te oven pišime izveštaija bašo manuša kolen so sine len slična nevolje hem čuvstvija sar amare (1. Kor. 10:13; Jak. 5:17). Keda čitinaja adala izveštaija hem primeninaja o pouke lendar, adava koristinela amenge najhari ko duj načinija. Prvo, haljovaja kaj na siem korkori soske javera da sine ko slična situacie hem uspejngje te istrajnen (1. Pet. 5:9). Hem dujto, sikljovaja sar šaj uspešno te ikljova ko krajo amare nevoljencar (Rim. 15:4).

5. Kas koristinela o Jehova te šaj te vodinel amen?

⁵ Isto agjaar, o Jehova vodinela amen preku amare phralja hem phenja.b Na primer, o pokrainska nadglednikija redovno posetinena o sobranija te šaj te ohrabrinen amen. Lengere govorija bajrarena amari vera hem pomožinena amenge te arakha amaro skapoceno jekhipe (Apo. 15:40 — 16:5). O starešine da ko sobranie tane iskreno zainteresirime bašo šukaripe sekole objaviteleskoro (1. Pet. 5:2, 3). O roditelija sikavena pumare čhaven te mangen e Jehova, te sikljon te anen mudra odluke hem te oven len šukar navike (Izr. 22:6). A o zrela hristijanke pomožinena e poterne phenjenge agjaar so dena len šukar primer, dena len praktična sovetija hem ohrabrinena len (Tit 2:3-5).

6. So mora amen te kera te šaj te ovel amen korist taro e Jehovaskoro vodstvo?

⁶ O Jehova kergja plo delo agjaar so dengja amen o vodstvo so valjani amenge. Sar šaj amen te sikava kaj siem blagodarna bašo adava? Ko Izreki 3:5, 6 vakerela: „Neka ovel tut doverba ko Jehova celo vilea hem te na ovel tut doverba ko tlo haljojbe“. Ako keraja adava, „ov ka isprajnel [amare] drumija“, javere lafencar ka pomožinel amenge te izbegina but problemija hem te ovel amen posrekjno životo. Kobor siem blagodarna so o Jehova taro mangipe dela sovetija so valjani sekole jekheske amendar! (Ps. 32:8).

O JEHOVA DELA AMEN ADAVA SO VALJANI AMENGE

7. Sar o Jehova dela amen adava so valjani amenge? (Filipjanja 4:19).

⁷ Čitin Filipjanja 4:19. Osven so vodinela amen, o Jehova blagoslovinela amen keda trudinaja amen te ovel amen hajbaske, urajbaske hem than živibaske (Mat. 6:33; 2. Sol. 3:12). Iako tano normalno te sekirina amen bašo amare fizička potrebe, o Jehova pottikninela amen te na ova previše sekirime bašo adava (Mat. 6:25). Soske? Adaleske so amaro Dad nikogaš nane te mukhel amen, posebno keda valjani amenge nešto (Mat. 6:8; Evr. 13:5). Šaj te ovel amen celosno doverba kaj ov ka ačhol ko plo lafi keda vakerela kaj ka grižinel pe bašo amare potrebe.

8. So kergja o Jehova e Davideske?

⁸ Razmislin ko savo način o Jehova pomožingja e Davideske. Ko sa adala phare berša džikote o David mora sine te našel, leske hem leskere slugenge o Jehova dengja adava so valjangja lenge te šaj te preživinen. Keda razmislingja sar o Jehova grižingje pe leske ko sa adala berša, o David pišingja: „Sium sine terno hem phuriljum, ama nikogaš na dikhljum o pravedniko te ovel mukhlo, ni leskere čhave te mangen mareske“ (Ps. 37:25). Ko tlo životo dži akana, verojatno tu da dikhljan sar o Jehova mangipaja grižinela pe bašo ple verna sluge.

9. Sar o Jehova avdive grižinela pe bašo potrebe ple narodoskere keda isi nesavi katastrofa? (Dikh hem o slike.)

⁹ O Jehova isto agjaar grižinela pe bašo potrebe ple narodoskere keda slučinela pe nesavi katastrofa. Na primer, keda ko prvo veko sine bokhalipe, o hristijanja taro razna thana bičhalgje materijalno pomoš e phralenge hem e phenjenge so sine ki phari situacija (Apo. 11:27-30; Rim. 15:25, 26). E Devleskoro narodo avdive tano isto agjaar darežlivo. Keda isi nesavi katastrofa, o Jehova mangipaja pottikninela ple slugen te den o osnovna bukja, sar soj hajbe, pani, šeja hem iljačija e phralenge kote so slučingja pe i katastrofa. O timija baši izgradba popravinena o khera soj oštetime hem o dvorane. Osven adava, e Jehovaskere sluge trudinena pe odma te den uteha hem ohrabruvanje okolenge so našavgje pumare khera ili pumare manglen.c

10-11. So sikljovea taro e Boriseskoro iskustvo?

¹⁰ O Jehova isto agjaar spremno grižinela pe bašo potrebe okolengere kola so panda na služinena leske. Amen da rodaja prilike te sikava šukaripe okolenge so na verujnena ko ista bukja sar amende (Gal. 6:10). Adava but puti dela amen prilika te da šukar svedoštvo. Razmislin bašo Boris, direktori ki jekh škola kova so živinela ki Ukraina. Iako nane e Jehovaskoro svedoko, ov sekogaš ponašinela pe sine ljubezno e učenikoncar so sine Svedokija hem sikavela sine poštovanje bašo lengere veruvanja. Keda o Boris odlučingja te našel taro than kote so živinela sine adaleske so sine vojna hem te džal ko pobezbedno delo tari država, amare phralja pomožingje leske. Pokasno, o Boris gelo ki Spomen-svečenost bašo e Isuseskoro meribe. Bašo adava so o phralja but pomožingje le, o Boris vakerela: „O Svedokija sine but ljubezna hem grižingje pe mange. Blagodarno sium e Jehovaskere svedokonge“.

¹¹ Sarine amen šaj te dža palo primer amare milostivo nebesno Dadeskoro, agjaar so ka sikava mangipe sprema okola so isi len nesavi potreba, bizi razlika dali tane amare phralja ili na (Luka 6:31, 36). Nadinaja amen kaj o mangipe so sikavaja le e manušenge ka anel dži ko adava jekh dive te oven e Hristoseskere učenikija (1. Pet. 2:12). Ama bizi razlika dali ka slučinel pe adava ili na, amen ka osetina i radost so avela taro dejbe (Apo. 20:35).

O JEHOVA ARAKHELA AMEN

12. Savi zaštita vetinela o Jehova ple narodoske sar grupa? (Ps. 91:1, 2, 14).

¹² Čitin Psalm 91:1, 2, 14. Avdive, o Jehova vetinela kaj ka arakhel amen ko duhovno pogled. Ov nikogaš nane te mukhel o Satana te meljarel o čisto obožavibe (Jovan 17:15). A džikote ka trajnel i „bari nevolja“, šaj te ovel amen celosno doverba kaj o Jehova ka ispolninel adava so vetingja — ka arakhel ple narodo na samo ko duhovno nego hem ko fizičko pogled (Otk. 7:9, 14).

13. Ko save načinija o Jehova arakhela sekole jekhe lično?

¹³ Sar o Jehova arakhela sekole jekhe lično? Preku i Biblija o Jehova pomožinela amen te haljova soj ispravno, a soj pogrešno (Evr. 5:14). Keda živinaja sprema o načelija taro e Devleskoro Lafi, amen siem zaštitime taro bukja kola so šaj te anen amenge šteta ko duhovno ili ko fizičko pogled (Ps. 91:4). Isto agjaar, o Jehova arakhela amen preku o sobranie (Isa. 32:1, 2). Keda siem manušencar kola so mangena e Jehova hem kola so živinena sprema leskere načelija, amen siem ohrabrime hem isi amen sila te borina amen protiv o lošno vlijanie (Izr. 13:20).

14. a) Soske o Devel na arakhela amen taro sa o nevolje? b) Ko so uverinela amen o Psalm 9:10? (Dikh hem i fusnota.)

¹⁴ Ko purano vreme, o Jehova ponekogaš arakhela sine ple slugen ko fizičko pogled. Ama na kerela sine adava sekogaš. Tari Biblija doznajnaja kaj sekole jekheske amendar šaj te slučinen pe „bukja so našti te predvidinen pe“ (Prop. 9:11). Osven adava, o Jehova dozvolingja nesave taro leskere sluge te doživinen progonstvo pa čak hem meribe, te šaj te dokažinel pe kaj o Satana hovavela (Jov 2:4-6; Mat. 23:34). Isto tano avdive da. Šaj o Jehova nane te cidel amare nevolje, ama šaj te ova sigurna kaj ov nikogaš nane te mukhel okolen so mangena led (Ps. 9:10).

O JEHOVA UTEŠINELA AMEN

15. Sar dobinaja uteha preku i molitva, e Devleskoro Lafi hem o phralja? (2. Korinkjanja 1:3, 4).

¹⁵ Čitin 2. Korinkjanja 1:3, 4. Ponekogaš, osetinaja amen but tažna, sekirime ili voznemirime. Šaj ko momenti nakhea tari nesavi situacija koja so kerela te osetine tut skroz korkori. Dali nekoj haljola sar osetinea tut? Oja, o Jehova. Ov na samo so osetinela amari dukh nego hem „dela amen uteha ki sekoja amari nevolja“. Sar? Keda molinaja amen e Jehovaske taro vilo, ov dela amen „o mir taro Devel, kova soj upreder taro adava so šaj o manuš te haljol“ (Fil. 4:6, 7). Isto agjaar, uteha arakhaja keda ki Biblija čitinaja o lafija kola so o Jehova vakerela len amenge. Preku lende, o Jehova sikavela amenge kobor but mangela amen, sikavela amen sar te ova mudra hem dela amen nadež. Uteha dobinaja hem ko amare sostanokija kote so sikljovaja šukar bukja tari Biblija hem siem zaedno amare phralencar hem phenjencar kola so mangena amen.

16. So sikljovea taro Natan hem tari Prisila?

¹⁶ Te šaj te dikha sar o Jehova utešinela amen hem ohrabrinela amen preku plo Lafi, te dikha o iskustvo e Nataneskoro hem e Prisilakoro, kola so živinena ki Amerika. Angleder nekobor berša, ola odlučingje te selinen pe ko than kote so isi pobari potreba taro objavitelija. O Natan vakerela: „Sine amen doverba kaj o Jehova ka blagoslovinel amaro trudo“. Ama otkeda resle adathe, bizo te očekujnen sine len problemija sastipaja hem finansiska problemija. Palo nesavo vreme, ola mora sine te iranen pe khere, kote so ponadari da na sine šukar ko finansisko pogled. O Natan vakerela: „Pučava man sine soske o Devel na blagoslovingja amen agjaar sar so očekujngjem. Čak počmingjum te mislinav kaj kergjum nešto pogrešno“. Ama sar so nakhela sine o vreme, o Natan hem i Prisila halile kaj o Devel na mukhlja len. „Ko adava pharo periodi i Biblija uli amenge sar jekh mudro amal kova so dela amen sine ohrabruvanje hem vodstvo“, vakerela o Natan. „Adava so koncentriringjem amen ko način sar o Jehova pomožingja amenge te istrajna, a na ki nevolja, pomožingja amen te ova spremna veraja te izdržina o problemija so ka oven amen ki idnina.“

17. Sar jekh phen so vikinela pe Helga dobinela sine uteha? (Dikh hem i slika.)

¹⁷ O Jehova isto agjaar šaj te del amen uteha preku o phralja hem o phenja. Sar? Te dikha o primer e Helgakoro, koja so živinela ki Ungarija. Oj beršencar borinela pe sine razna predizvikoncar kola so kerena sine te osetinel pe voznemirimi hem kaj na vredinela. Ama keda setinela pe ko adava so nakhlja, oj šaj te dikhel sar o Jehova utešingja la preku o sobranie. I Helga vakerela: „O Jehova sekogaš pomožinela mange sine keda ka primetinel kaj na sine man više sile adaleske so kerava sine buti, grižinava man sine mle nasvale čhaveske hem sine man javera problemija. Ko akala 30 berš na sine dive te na ispolninel plo vetuvanje te utešinel man. Ov but puti dela man sine sila preku o ljubezna, birime hem ohrabruvačka lafija taro javera. But puti dobinava sine nesavi poraka, kartička ili pofalba baš tegani keda adava najviše valjani sine mange“.

18. Sar šaj te utešina e javeren?

¹⁸ Amen isi amen čest te dža palo primer amare Devleskoro agjaar so ka utešina e javeren. Sar šaj te kera adava? Šaj strplivo te šuna len, te vakera lenge utešna lafija hem te pomožina lenge ko praktična načinija (Izr. 3:27). Trudinaja amen te utešina sarinen so isi len muke, čak okolen so panda na služinena e Devleske. Keda amare pašutne tane but tažna, tane nasvale ili sekirime, amen posetinaja len, šunaja len hem keraja lencar lafi bašo ohrabruvačka stihija tari Biblija. Keda džaja palo e Jehovaskoro primer, „o Devel sekole utehakoro“, na samo so šaj te pomožina amare phralenge hem phenjenge te istrajnen ko nevolje nego hem šaj te kovljara o vilo e javere manušengoro te šaj te oven pospremna te šunen o haberi (Mat. 5:16).

O JEHOVA SEKOGAŠ KA POMOŽINEL AMEN

19. So kerela o Jehova amenge, hem sar šaj te dža palo leskoro primer?

¹⁹ O Jehova but grižinela pe sarinenge so mangena le. Ov na mukhela amen keda amenge pharo. O Jehova grižinela pe bašo ple verna sluge isto sar so jekh roditeli mangipaja grižinela pe ple čhaveske. Ov vodinela amen, dela amen adava so valjani amenge, arakhela amen hem utešinela amen. Amen džaja palo primer amare mangle nebesno Dadeskoro keda poddržinaja hem ohrabrinaja okolen so isi len nevolje. Iako šaj ka oven amen pharipa hem dukha, šaj te ova sigurna kaj o Jehova tano amencar. Te na bistra kaj ov vetingja amenge: „Ma dara, soske me sium tuja!“ (Isa. 41:10). Kobor šužo vetuvanje! Čače, nikogaš na siem korkori.