STATIJA PROUČIBASKE 15
GILI 30 Mlo Dad, Amal hem Devel
Amenge tano šukar te ova sa popaše e Devlea
A mange tano šukar te ovav uzo Devel (PS. 73:28)
SO KA SIKLJOVA
Ka dikha sar šaj te ova panda popaše e Jehovaja hem sar ka koristinel amenge adava.
1-2. a) So valjani te šaj te ova paše amala nekasaja? b) So ka dikha ki akaja statija?
DALI isi tut paše amal? Sar ulen amala? Verojatno nakhljan vreme lea. Doznajngjan save iskustvija sine le ko životo, isto agjaar doznajngjan so mangela a so na mangela. Haliljan kaj isi le but šuže osobine kola so tu da bi mangea te oven tut. Agjaar tu zamangljan tle amale.
2 Te šaj te ove nekasaja paše amal valjani vreme hem trudo. O ista bukja valjanena te šaj nekoj te ovel paše amal e Jehovaja, e Devlea. Ki akaja statija ka dikha sar šaj te ova panda popaše e Devlea hem sar adava ka koristinel amenge. Prvo, te dikha soske tano šukar te ova paše amare najšukar amalea, e Jehovaja.
3. Soske valjani hor te razmislina sar ka koristinel amenge adava so ka ova popaše e Jehovaja? Vaker primer.
3 Sigurno, ka složine tut kaj tano šukar te ova sa popaše e Jehovaja. Ama adava so hor ka razmislina kobor tano šukar adava ka pottikninel amen ponadari da te ova lea sa popaše (Ps. 63:6-8). Na primer, džanaja kaj amare šukaripaske tano te ha zdravo hrana, fizičko te ova aktivna, dovolno te odmorina amen hem te pija dovolno pani. Sepak, but džene na razmislinena but bašo akala bukja hem na grižinena pe ple sastipaske. Ama, kobor poviše razmislinaja bašo adava sar akala šukar navike koristinena amenge doborom poverojatno tano kaj ka kera len ponadari da. Slično, amen šaj džanaja kaj amare šukaripaske tano te ova popaše e Jehovaja, ama ako hor razmislinaja sar ka koristinel amenge adava šaj te ova pottiknime ponadari da te ova popaše lea (Ps. 119:27-30).
4. So vakergja o psalmisti ko Psalm 73:28?
4 Čitin Psalm 73:28. O pisateli taro 73 Psalm sine leviti kova so služinela sine sar muzičari ko e Jehovaskoro hrami. Ov verojatno verno služinela sine e Jehovaske više nesavo vreme. Sepak, džanlja kaj tano važno te na bistrel kaj leskere šukaripaske tano te ovel paše uzo Devel, a manglja hem e javeren te setinkerel ko adava. Soske tano važno pošukar te zapoznajna e Jehova hem te kera pozoralo amaro amalipe lea?
AKO SIEM PAŠE E JEHOVAJA ADAVA KA ANEL AMENGE RADOST
5. a) Soske adava so ka ova popaše e Jehovaja ka anel amenge radost? b) Sprema Izreki 2:6-16, vaker konkretna primerija bašo adava sar e Jehovaskiri mudrost šaj te arakhel tut hem te pomožinel tuke.
5 Kobor popaše ovaja e Jehovaja, doborom posrekjna ka ova (Ps. 65:4). Isi amen but pričine te ova radosna. Na primer, koristinela amenge adava so primeninaja o mudra sovetija taro leskoro Lafi, i Biblija. Ola arakhena amen taro štetna vlijanija hem pomožinena amen te na kera seriozna greške. (Čitin Izreki 2:6-16.) Adaleske i Biblija vakerela: „Srekjno tano o manuš so ka arakhel mudrost, hem o manuš so ka ovel razborito“ (Izr. 3:13).
6. So angja dži ko adava o psalmisti te našavel pli radost?
6 Džangjola pe, čak okola soj amala e Jehovaja ponekogaš osetinena pe tažno. O pisateli taro 73 Psalm, našavgja pli radost adaleske so počmingja negativno te razmislinel. Ov počmingja te nervirinel pe hem te ovel ljubomorno e lošna manušenge kolen so na hala sine gajle bašo Devel ili bašo leskere merilija soske dikhjola sine leske kaj džala lenge sa šukar ko životo. Ov pogrešno halilo kaj okola soj nasilna hem gorda sekogaš tane pobarvale, posaste hem čak kaj nane len nisave sekiracie (Ps. 73:3-7, 12). E psalmiste doborom but mučinela le sine akaja misla so ko jekh momenti pučela pe sine dali čače vredinela adava so trudinela pe ki služba bašo Jehova. Ov sine but tažno hem vakergja: „Čače, džabe so trudingjum man mo vilo te ačhovel čisto hem so thovgjum me vasta te sikavav kaj na sium krivo“ (Ps. 73:13).
7. So šaj te kera keda siem tažna? (Dikh hem i slika .)
7 O psalmisti na mukhlja i tuga te kočinkerel le. Ov kergja nešto. Ov gelo ko „baro svetilište e Devleskoro“, kote so o Jehova pomožingja leske palem ispravno te razmislinel (Ps. 73:17-19). O Jehova amaro amal, primetinela keda siem tažna. Ako molinaja le bašo vodstvo hem ako prifatinaja i pomoš koja so dela amen preku plo Lafi hem preku o sobranie ka dobina sila koja so ka pomožinel amenge ponadari da te služina leske čak keda siem tažna. Čak keda isi amen but problemija hem na džanaja so te kera, o Jehova ka utešinel amen hem ka smirinel amen (Ps. 94:19).a
O leviti kova so pišingja o 73 Psalm tergjola ko „baro svetilište e Devleskoro“ (Dikh ko pasus 7)
AKO SIEM PAŠE E DEVLEA ADAVA KA DEL AMEN SMISLA KO ŽIVOTO HEM NADEŽ
8. Sar adava so ka ova paše e Devlea tano bašo amaro šukaripe ko javera duj važna načinija?
8 Adava so ka ova popaše e Devlea tano bašo amaro šukaripe hem ko javera da duj važna načinija. Prvo, dela amen čačutni smisla ko životo. Hem dujto, dela amen sigurno nadež baši idnina (Erem. 29:11). Te dikha akala duj bukja podetalno.
9. Sar adava so ovaja popaše e Jehovaja dela amen smisla ko životo?
9 Adava so ovaja popaše e Jehovaja dela amen smisla ko životo. But džene avdive, kola so mislinena kaj o Devel na postojnela, mislinena kaj e životo nane le smisla hem kaj jekh dive nane više te postojnen o manuša. Ama, adaleske so proučinaja i Biblija, uveringjem amen kaj o Devel „postojnela hem kaj nagradinela okolen so rodena le revno“ (Evr. 11:6). Panda avdive, amen isi amen šukar životo soske keraja adava bašo so siem stvorime — te služina amare Dadeske soj ko nebo, e Jehovaske (5. Moj. 10:12, 13).
10. So otkrinela amenge o Psalm 37:29 baši idnina okolengiri so nadinena pe ko Jehova?
10 Bute manušen avdive nane len čačutni nadež baši idnina. Lengiri nadež tani samo adava so šaj te dikhel pe avdive ko životo — kerena buti, ženinena pe, ovena len čhave hem khedena pare phuripaske. Ama ko lengoro životo nane vklučimo o Devel hem adaleske na džanena so vetingja baši idnina. Tari javer strana, e Jehovaskere slugen isi len nadež koja so dengja len o Devel (Ps. 25:3-5; 1. Tim. 6:17). Amen isi amen doverba ko Devel, kolea so ulem paše, hem isi amen doverba ko vetuvanja kola so dengja len amenge. Maškar o javera bukja, ki amari nadež isto agjaar tano vklučimo te služina leske zasekogaš ko raj. (Čitin Psalm 37:29.)
11. Sar adava so ovaja popaše e Devlea vlijajnela upri amende hem sar vlijajnela upri leste?
11 Adava so ovaja popaše e Devlea tano bašo amaro šukaripe ko but javera da načinija. Na primer, o Jehova vetingja kaj ka prostinel o grevija okolengere soj lea paše ako kainena pe (Isa. 1:18). Hem adaleske na valjani ponadari da te mučinel amen amari sovest bašo grevija so kergjem len angleder (Ps. 32:1-5). Isto agjaar, srekjna siem keda džanaja kaj radujnaja e Jehova (Izr. 23:15). Sigurno ka setine tut ko but javera da blagoslovija kola so isi amen adaleske so siem paše amala e Devlea. Ama sar šaj ponadari da te ove panda popaše e Devlea?
SAR PONADARI DA TE OVA PANDA POPAŠE E DEVLEA
12. So kergjan te šaj te ove popaše e Devlea?
12 Ako sian krstimo, sigurno više kergjan but bukja te šaj te ove paše e Jehovaja. Doznajngjan but čačipa bašo Jehova hem bašo Isus Hristos. Kaingjan tut bašo tle grevija so kergjan len angleder hem sikavgjan kaj isi tut zorali vera ko Devel hem trudingjan tut te postapine agjaar sar ov so mangela. Ama te šaj te ova panda popaše e Devlea, mora ponadari da te kera akala bukja (Kol. 2:6).
13. Kola trin bukja šaj te pomožinen amenge te ova popaše e Jehovaja?
13 So ka pomožinel amenge ponadari da te ova sa popaše e Jehovaja? 1) Valjani ponadari da te čitina hem te proučina i Biblija. Džikote keraja adava, amari cel na valjani te ovel samo te sikljova o osnovna bukja bašo Devel. Namesto adava, valjani te trudina amen te doznajna koja tani e Devleskiri volja baši amende hem te mukha o bibliska načelija te vodinen amen ko životo (Ef. 5:15-17). 2) Valjani te kera pozorali amari vera agjaar so ka razmislina bašo but dokazija bašo e Devleskoro mangipe sprema amende. 3) Mora ponadari da te mrzina o bukja kola so vredžinena e Jehova hem te na družina amen manušencar kola so kerena asavke bukja (Ps. 1:1; 101:3).
14. Sprema adava soj pišimo ko 1. Korinkjanja 10:31, kola tane nesave bukja so šaj te kera len sekova dive te šaj te kera e Jehovaskiri volja? (Dikh hem o slike.)
14 Čitin 1. Korinkjanja 10:31. But tano važno te kera adava so džanaja kaj ka radujnkerel e Jehova. Ko adava tano vklučimo poviše nego samo te dža ki služba ili ko sostanokija. Sa adava so keraja sekova dive ko amaro životo valjani te radujnkerel e Jehova. Na primer, keda siem česna ko sa hem keda delinaja e javerencar adava so isi amen adalea radujnaja e Jehova (2. Kor. 8:21; 9:7). Isto agjaar, ov mangela te sikava kaj but ceninaja o životo sar poklon. Amen ovaja popaše okolea so dela o životo agjaar so pazinaja kobor haja hem pijaja hem agjaar so keraja but javera bukja kola so pomožinena amen te ačhova saste. Sekoja buti so keraja la te šaj te kera e Jehovaskiri volja, čak ko bukja so dikhjona kaj tane tikne, ka keren amen popaše lea (Luka 16:10).
Radujnaja e Jehova adalea so pazinaja ki bezbednost keda vozinaja, grižinaja amen amenge agjaar so vežbinaja hem haja zdravo hrana hem adalea so siem gostoprimliva (Dikh ko pasus 14)
15. Sar očekujnela o Jehova te postapina e javerencar?
15 O Jehova sikavela šukaripe hem okolenge soj pravedna hem okolenge so nane pravedna (Mat. 5:45). Ov očekujnela amendar da te ova šukar sprema o javera. Na primer, ko Tit 3:2 pišimo tano akava sovet: „Te na keren lošno lafi nikastar, te na oven kavgadžie... hem sekogaš neka oven krotka sa e manušencar“. Sprema akava, amen na dikhaja e javeren sar potele amendar samo adaleske so na verujnena ko Jehova (2. Tim. 2:23-25). Ovaja popaše e Jehovaja agjaar so sekogaš postapinaja ljubezno hem obzirno sarinencar.
ŠAJ TE OVA POPAŠE E JEHOVAJA ČAK AKO GREŠINGJEM
16. Sar osetinela pe sine o pisateli taro 73 Psalm?
16 Ponekogaš šaj ka misline kaj na zaslužinea e Jehovaskoro mangipe. Sar so dikhlem agjaar osetingja pe hem o pisateli taro 73 Psalm. Ov vakergja: „A mle pre haričkaske ka ciden pe sine taro pravo drumo, haričkaske ka lizgav sine“ (Ps. 73:2). Ov korkori priznajngja e Jehovaske: „Ko mlo vilo sine kjerkipe... na sium sine razumno... anglo tle jakhja sium sine sar životno bizi godi“ (Ps. 73:21, 22). Dali mislingja kaj bašo ple slabostija ov na vredinela više ništoske hem kaj na zaslužinela sine e Jehovaskoro mangipe?
17. a) So najverojatno kergja o psalmisti čak keda sine leske najlošno? b) So šaj te sikljova taro leskoro iskustvo? (Dikh hem o slike.)
17 Ako o psalmisti osetinela pe sine otfrlimo taro Jehova, sigurno adala čuvstvija sine momentalna. Čak keda sine leske najlošno, ov halilo kaj valjani te ovel paše e Devlea, baš sar so dikhjola pe taro leskere lafija: „Ama me sium sekogaš tuja [Jehova], tu astargjan man taro mlo desno vas. Ka vodine man tle sovetea hem palo adava ka ane man dži ki slava“ (Ps. 73:23, 24). Keda osetinaja amen duhovno slaba ili obeshrabrime, amen da valjani te roda pomoš taro Jehova kova soj stabilno hem cvrsto sar karpa (Ps. 73:26; 94:18). Čak hem ako kergjem seriozna greške, šaj te irana amen ko Jehova hem te ova uverime kaj ov tano spremno te prostinel amenge (Ps. 86:5). Posebno keda amenge najlošno, valjani te ačhova popaše amare Devlea (Ps. 103:13, 14).
Ako dikhaja kaj siem slaba ko duhovno pogled, valjani panda poviše te ova paše e Jehovaja agjaar so panda poviše ka učestvujna ko teokratska aktivnostija (Dikh ko pasus 17)
OV SA POPAŠE E DEVLEA KI CELI VEČNOST
18. Soske na postojnela granica bašo adava kobor paše šaj te ova e Jehovaja?
18 Na postojnela granica bašo adava kobor šaj te ova paše e Jehovaja hem kobor šukar šaj te zapoznajna le. I Biblija vakerela kaj e Jehovaskere drumija, leskiri mudrost hem leskoro džandipe našti te haljoven pe (Rim. 11:33).
19. Ko so uverinena amen o Psalmija?
19 Ko Psalm 79:13 pišinela: „Amen, tlo narodo hem o stado tari tli livada, ka blagodarina tuke zasekogaš, tari generacija ki generacija ka vakera baši tli slava“. Sar so ovea popaše e Devlea, tu da šaj te ove sigurno kaj ka oven tut blagoslovija ki celi večnost hem uverimo te vakere: „O Devel tano i karpa mle vileskiri hem ov tano sa so isi man ki celi večnost“ (Ps. 73:26).
GILI 32 Ov tari e Jehovaskiri strana!
a Nesavenge so pobaro periodi osetinena pe voznemirime ili tažna, šaj ka valjani lenge pomoš taro doktori. Bašo poviše informacie dikh ki Stražarsko kula br. 1, 2023 berš.