STATIJA PROUČIBASKE 42
GILI 44 I molitva okoleskiri soj ki bari dukh
Sar šaj te kere tle molitve te oven panda pošukar
Vikinava celo vilea. Šun man, Jehova! (PS. 119:145)
SO KA SIKLJOVA
Adava so ka razmislina bašo molitve kola soj pišime ki Biblija, šaj te pomožinel amenge te kera amare molitve te oven pošukar.
1-2. a) So šaj te čhinavel amen te vakera amare najhor čuvstvija e Jehovaske? b) Kotar džanaja kaj o Jehova šukar šunela amare molitve?
DALI ponekogaš mislinea kaj tle molitve tane mehanička, kaj na molinea tut taro vilo ili kaj povtorinea ista lafija? Akava šaj te slučinel pe sekaske amendar. Adaleske so siem but zafatime, amare molitve šaj te oven ki sig hem kratka. Ili šaj amenge pharo te vakera amare najhor čuvstvija e Jehovaske soske mislinaja kaj na siem dostojna te kera lea lafi ki molitva.
2 I Biblija uverinela amen kaj e Jehovaske nane najvažno kobor šuže lafija koristinaja džikote molinaja amen, nego leske tano važno te molina amen iskreno hem ponizno. Ov šunela „o molitve okolengere soj krotka“ (Ps. 10:17). O Jehova šunela sekova amaro lafi soske čače interesinela pe amenge (Ps. 139:1-3).
3. Kola pučiba ka dikha ki akaja statija?
3 Ki akaja statija ka dikha akala pučiba: Soske na valjani te dara te vakera amare najhor čuvstvija e Jehovaske? So šaj te pomožinel amenge amare molitve te oven pohor? Sar adava so ko razmislina bašo molitve vakerde taro vilo soj tane pišime ki Biblija šaj te pomožinel amenge amare molitve te oven pošukar? Hem so šaj te kera ako siem doborom but voznemirime ili pherde sekiraciencar so čak našti te objasnina sar osetinaja amen lafencar? Te dikha o odgovorija ko akala pučiba.
MA DARA TE VAKERE TLE ČUVSTVIJA E JEHOVASKE
4. So šaj te pomožinel amen te na dara te vakera amare čuvstvija e Jehovaske? (Psalm 119:145).
4 Keda ka haljova kaj o Jehova amenge verno amal kova so mislinela amenge o najšukar, ka osetina amen slobodna te molina amen leske hem te vakera so mislinaja hem sar osetinaja amen. O pisateli taro 119 Psalm trudingja pe agjaar te dikhel ko Jehova keda molinela pe sine leske. Leskoro životo na sine bizo problemija. Nesave manuša vakergje hovajba baši leste (Ps. 119:23, 69, 78). Osven adava, ponekogaš sine obeshrabrimo taro ple greške (Ps. 119:5). Sepak, ov na darandilo te vakerel e Jehovaske sar čače osetinela pe. (Čitin Psalm 119:145.)
5. Soske na valjani te mukha o pogrešno mislenje baši amenge te čhinavel amen te molina amen? Vaker primer.
5 O Jehova pottikninela čak okolen so kergje phare grevija te molinen pe leske (Isa. 55:6, 7). Adaleske, na valjani te mukha o pogrešno mislenje so isi amen baši amenge te čhinavel amen te molina amen leske. Te vakera jekh primer: Zamislin kaj jekh manuš našavdilo ki šuma hem tegani dikhela nekas so šaj te spasinel le. Dali tari ladž kaj našavdilo nane te rodel pomoš? Normalno kaj na! Slično, čak ako ponekogaš osetinaja amen sar te phene našavdilem ili kergjem nesavo grevo, šaj slobodno te molina amen e Jehovaske (Ps. 119:25, 176).
SAR ŠAJ AMARE MOLITVE TE OVEN POHOR
6-7. Sar adava so razmislinaja bašo e Jehovaskere osobine pomožinela amen te vakera amare najhor misle hem čuvstvija? Vaker primer. (Dikh hem i fusnota.)
6 Keda keraja otvoreno lafi e Jehovaja agjaar so vakeraja amare najhor misle hem čuvstvija, amare molitve ovena pohor. Tegani, so šaj te pomožinel amen te molina amen agjaar?
7 Razmislin bašo e Jehovaskere osobine.a Kobor poviše razmislinaja bašo e Jehovaskere osobine, doborom polokho ka ovel amenge te vakera leske amare najhor misle hem čuvstvija (Ps. 145:8, 9, 18). Te dikha o primer jekhe phenjakoro so vikinela pe Kristin kolakoro so dad sine nasilno. Oj vakerela: „Sine mange pharo te verujnav kaj o Jehova tano grižlivo Dad hem te kerav lea lafi“. Oj mislinela sine kaj nane dovolno šukar hem kaj o Jehova ka čhinavel te mangel la bašo lakere greške. Koja osobina e Jehovaskiri pomožingja la? Oj vakerela: „E Jehovaskoro verno mangipe pomožingja mange te osetinav man sigurno. Džanava kaj ov sekogaš ka ovel uzi mande. Čak hem te grešinav, ov panda ka mangel man hem ka pomožinel man. Akava kerela te ovel mange polokho te vakerav mle najhor čuvstvija keda sium radosno ili tažno“.
8-9. Sar ka koristinel tuke adava so angleder ka razmisline so ka vakere ki molitva? Vaker primer.
8 Razmislin so ka vakere. Angleder te moline tut, šaj te puče tut nekobor pučiba. Na primer: „Save konkretna problemencar borinava man ko momenti? Dali valjani nekaske te prostinav? Dali valjani mange pomoš taro Jehova baši nesavi promena ko životo so slučingja pe mange sigende?“ (2. Car. 19:15-19). Isto agjaar, šaj te setina amen ko adava sar o Isus sikavgja amen te molina amen agjaar so ka razmislina so bi šaj te vakera e Jehovaske povrzimo leskere anavea, leskere Carstvoja hem leskere voljaja (Mat. 6:9, 10).
9 Keda jekh phen so vikinela pe Aliska doznajngja kaj lakere rome isi le rako ki godi hem kaj panda hari ka merel, sine lake pharo te molinel pe. Oj vakerela: „Sium sine doborom voznemirimi so keda ka počminav sine te molinav man, našti sine te setinav man so mangava te vakerav“. So pomožingja lake? Oj objasninela: „Angleder te molinav man odvojnava mange hari vreme te šaj te organizirinav mle misle hem adava pomožinela man te na molinav man samo baši mange hem bašo nasvalipe mle romeskoro. Keda kerava adava, osetinava pobaro mir hem polokho mange te molinav man bašo javera bukja“.
10. Soske valjani te trudina amen te odvojna amenge vreme te šaj amare molitve te oven pobare? (Dikh hem o slike.)
10 Odvojn tuke dovolno vreme baši molitva. Iako o kratka da molitve šaj te oven hor molitve, sepak ako odvojnaja amenge vreme te šaj amare molitve te oven pobare, poverojatno tano kaj ka vakera e Jehovaske amare najhor misle hem čuvstvija.b O Ilajdža, o rom e Aliskakoro, vakerela: „Trudinava man te molinav man poviše puti ko dive, ama osetinava man popaše e Jehovaja keda odvojnava mange vreme te vakerav hem pobare molitve. Džanava kaj ne mora te sigjarav džikote molinava man soske o Jehova tano strplivo, na adžikerela edvaj te završinav e molitvaja“. Probin te arakhe vreme hem than kola so ka pomožinen tut tle molitve te oven pobare. Šaj čak te moline tut ko glaso, bizo nešto te lel tlo vnimanie, a palo adava trudin tut redovno te moline tut ko asavko način.
Arakh vreme hem than kola so ka pomožinen tuke tle molitve te oven pobare bizo nešto te lel tlo vnimanie (Dikh ko pasus 10)
RAZMISLIN BAŠO MOLITVE TARO VILO SOJ PIŠIME KI BIBLIJA
11. Sar ka pomožinel tuke adava so ka razmisline bašo molitve taro vilo soj pišime ki Biblija? (Dikh hem i ramka „Dali osetinea tut isto sar lende?“)
11 Šaj ka pomožinel tut adava so ka razmisline bašo molitve taro vilo hem gilja baši falba, javere lafencar bašo psalmija, kola soj pišime ki Biblija. Džikote čitinea sar e Devleskere sluge vakergje pumare najhor misle hem čuvstvija, šaj ka ove ohrabrimo tu da te moline tut ko asavko način. Isto agjaar, šaj ka sikljove lendar neve lafija kolencar so ola falingje e Jehova, a kola so šaj te koristine len ko tle molitve. Hem šaj ka arakhe molitve taro e Devleskere sluge kola so sine ki slično situacija sar tli.
12. Kola pučiba šaj te puča amen džikote razmislinaja baši nesavi molitva?
12 Džikote čitinea nesavi molitva soj pišimi ki Biblija, puč tut: „Koj vakergja akala lafija hem ko save okolnostija? Dali me da osetinava man agjaar? So šaj te sikljovav tari akaja molitva?“ Ama šaj ka valjani poviše te istražine te šaj te odgovorine ko akala pučiba, ama ka vredinel adava so ka trudine tut. Te dikha nekobor primerija.
13. So šaj te sikljova tari Ana baši molitva? (1. Samoilova 1:10, 11; dikh hem i slika).
13 Čitin 1. Samoilova 1:10, 11. Keda i Ana vakergja akaja molitva, sine la duj bare problemija — našti sine te oven la čhave hem i dujto romni lakere romeskiri kerela sine te ovel lake pharo ko životo (1. Sam. 1:4-7). Ako isi tut problemi kova so but vreme mučinela tut, so šaj te sikljove tari e Anakiri molitva? Oj odvojngja vreme te vakerel e Jehovaske sa so mučinela la hem palo adava oj osetingja pe but pošukar, sar te phene pelo latar baro pharipe taro pikje (1. Sam. 1:12, 18). Amen da šaj te osetina amen pošukar ako frdaja amaro pharipe e Jehovaske agjaar so ka vakera so mučinela amen hem sar osetinaja amen bašo adava (Ps. 55:22).
E Ana mučinela la sine adava so našti sine te oven la čhave hem adava so i dujto romni lakere romeskiri celo vreme lela la sine ki hajgara, ama lokhilo lake keda phravgja plo vilo e Jehovaske hem vakergja leske sar osetinela pe (Dikh ko pasus 13)
14. a) So javer sikljovaja tari Ana? b) Sar adava so ka razmislina bašo adava so čitinaja tari Biblija šaj te kerel amare molitve te oven pošukar? (Dikh i fusnota.)
14 Palo nekobor berš otkeda bijangja ple čhave e Samoile, i Ana ingargja le ko prvosvešteniko ko Ilij (1. Sam. 1:24-28). Ki jekh molitva so vakergja la taro vilo, oj vakergja kaj tani uverimi kaj o Jehova zaštitinela ple verna slugen hem grižinela pe baši lendec (1. Sam. 2:1, 8, 9). La ponadari da sine la problemija khere, ama i Ana koncentriringja pe ko blagoslovija so dengja la o Jehova. So šaj te sikljova? Ka šaj pošukar te nakhava o phare situacie ko životo ako koncentririnaja amen ko adava sar o Jehova pomožingja amen dži avdive.
15. So šaj te sikljova tari e Eremijaskiri molitva? (Eremija 12:1).
15 Čitin Eremija 12:1. O proroko o Eremija osetingja pe obeshrabrimo adaleske so dikhlja kaj o lošna manuša tane uspešna ko životo. Isto agjaar, sine but razočarimo adaleske so o javera Izraelcija asana sine leske (Erem. 20:7, 8). Amen haljovaja sar osetingja pe adaleske so amenge da nekoj asandilo hem dikhlem sar nesave manuša kerena lošna bukja, a sepak dikhjola kaj šukar džala lenge ko životo. Iako vakergja e Jehovaske kobor tano voznemirimo bašo sa adava, o Eremija nikogaš na krivingja e Devle kaj tano nepravedno. Leskiri doverba ki e Jehovaskiri pravda sigurno barili keda dikhlja sar o Devel kazningja ple buntovno narodo (Erem. 32:19). Amen da šaj otvoreno te vakera e Jehovaske kobor but dukhana amen o nepravde so doživinaja len hem te ovel amen doverba kaj ko vreme so odredingja le ov ka popravinel adava.
16. So šaj te sikljova tari jekhe leviteskiri molitva? (Psalm 42:1-4; dikh hem o slike).
16 Čitin Psalm 42:1-4. Akaja gili pišingja jekh leviti kova so našti sine te obožavinel e Devle ko hrami zaedno e javere Izraelconcar. Taro psalm so pišingja le dikhjola sar osetingja pe. Šaj te osetina amen sar leste ako siem ko zatvor baši amari vera ili ako našti te ikljova taro amaro kher adaleske so siem nasvale. Ponekogaš šaj ka osetina amen šukar, a nekogaš šaj ka ova but tažna. Ama bizi razlika sar ka osetina amen, šukar tano te vakera adava e Jehovaske ki molitva. Adava šaj te pomožinel amen pošukar te haljova amare čuvstvija hem ispravno te dikha ki amari situacija. Na primer, o leviti halilo kaj ka oven le javera prilike te falinel e Jehova (Ps. 42:5). Isto agjaar, ov razmislingja sar o Jehova grižingja pe baši leste (Ps. 42:8). Adava so ka molina amen taro vilo e Devleske, šaj te pomožinel amen pošukar te haljova soske isi amen asavke čuvstvija, palem te ovel amen mir hem te kheda sile te šaj te istrajna.
O leviti kova so pišingja o 42 Psalm phravgja plo vilo e Devleske. Keda ki molitva vakeraja e Jehovaske sar osetinaja amen, adava pomožinela amen ispravno te dikha ki amari situacija (Dikh ko pasus 16)
17. a) So šaj te sikljova tari e Jonaskiri molitva? (Jona 2:1, 2). b) Sar šaj nesave lafija taro Psalmija te pomožinen amenge keda amenge pharo? (Dikh i fusnota).
17 Čitin Jona 2:1, 2. O proroko o Jona vakergja akaja molitva džikote sine andre ko jekh baro mačho. Iako na sine poslušno e Jehovaske, o Jona sine uverimo kaj o Devel ka šunel leskiri molitva. Džikote molingja pe, o Jona koristingja but lafija taro Psalmija.d Ov sigurno but šukar džanela sine adala stihija. Adava so razmislingja baši lende, uveringja le kaj o Jehova ka pomožinel le. Slično, ako trudinaja amen te pamtina nesave bibliska stihija, ka šaj te setina amen ki lende hem te dobina uteha keda molinaja amen e Jehovaske ko phare situacie.
PREKU I MOLITVA PONADARI DA OV POPAŠE E JEHOVAJA
18-19. Ako ponekogaš amenge pharo ki molitva te vakera amare čuvstvija lafencar, sar šaj te utešinen amen o lafija taro Rimjanja 8:26, 27? Vaker primer.
18 Čitin Rimjanja 8:26, 27. Ponekogaš šaj osetinaja amen doborom sekirime so našti lafencar te vakera sar osetinaja amen. Ama, na siem bizi pomoš. Ko asavke momentija, „e Devleskiri sila [kerela] adava amenge ko than“. Sar? Preku pli sila o Jehova grižingja pe ko leskoro Lafi te oven pišime but molitve. Keda našti jasno te vakera amare misle, o Jehova šaj te dikhel ko lafija taro molitve soj pišime ki Biblija sar ka phene tane amare lafija hem šaj te odgovorinel ki lende.
19 Akaja misla pomožingja jekhe phenjake tari Rusija so vikinela pe Jelena. Oj sine phanli adaleske so molinela pe sine hem čitinela sine i Biblija. E Jelena sine la but baro stres hem adaleske sine lake pharo te molinel pe. Oj vakerela: „Tegani setingjum man kaj keda mange pharo hem na džanava bašo so te molinav man, o Jehova ka prifatinel o molitve e verna slugengere taro purano vreme sar te phene tane mle... Adava dengja man bari uteha posebno ko adava but pharo periodi“.
20. Sar šaj te spremina amare misle baši molitva keda isi amen stres?
20 Keda isi amen stres šaj te ovel amenge pharo te koncentririna amen džikote molinaja amen. Te šaj te spremina amare misle, šaj te čitina ko glaso nesave stihija taro Psalmija. Isto agjaar šaj te pišina sar osetinaja amen, sar so kergja o cari o David. (Dikh ko Psalmija 18, 34 hem 142, isto hem lengere natpisija.) Džangjola pe, nane pravilija bašo adava sar valjani te spremina amen baši molitva (Ps. 141:2). Ker agjaar sar soj najšukar tuke.
21. Soske šaj te molina amen celo amare vilea?
21 But utešinela amen adava so džanaja kaj o Jehova haljola sar osetinaja amen panda angleder te vakera leske adava (Ps. 139:4). Sepak, ov radujnela pe keda vakeraja leske sar osetinaja amen hem kobor bari doverba isi amen ki leste. Adaleske, ma mislin tut dali te moline tut tle nebesno Dadeske. Sikljov taro molitve soj pišime ko leskoro Lafi. Molin tut celo tle vilea. Vaker leske keda sian radosno, a keda sian tažno. Sar tlo čačutno amal, o Jehova sekogaš ka ovel uzi tute!
GILI 45 O misle mle vileskere
a Ko lil Bibliska stihija so pomožinena amen ko životo ki tema „Jehova“ dikh ko delo „Nesave taro e Jehovaskere glavna osobine“.
b O javna molitve kola soj vakerde ko sobranija obično tane kratka.
c Ki pli molitva, i Ana koristingja lafija kola soj slična e lafencar kola so pišingja len o Mojsej. Dikhjola kaj oj odvojngja vreme te šaj te razmislinel bašo adava so pišinela ko e Devleskoro Lafi (5. Moj. 4:35; 8:18; 32:4, 39; 1. Sam. 2:2, 6, 7). Vekoncar pokasno i Marija, e Isuseskiri daj, koristingja slična lafija sar e Anakere te šaj te falinel e Jehova (Luka 1:46-55).
d Na primer, sporedin o stihija taro Jona 2:3-9 e stihoncar taro Psalm 69:1; 16:10; 30:3; 142:2, 3; 143:4, 5; 18:6 hem 3:8, sprema o redosled so koristingja le o Jona.