Ma bistre te moline tut e javerenge

1. Kotar džanaja kaj amare molitve tane važna e Jehovaske?

I MOLITVA tani jekh but šužo poklon. Razmislin bašo akava: O Jehova dengja nesave zadače e angelenge (Ps. 91:11). Isto agjaar, ple Čhaveske dengja but važna odgovornostija (Mat. 28:18). Ama, dali nekaske dengja zadača te šunel amare molitve? Na, adava tano nešto so o Jehova odlučingja korkori te kerel. O Jehova lično šunela o molitve sekole jekheskere amendar (Ps. 65:2).

2. Savo primer mukhlja amenge o apostol Pavle adalea so molinela pe sine e javerenge?

² Amen valjani otvoreno te vakera e Jehovaske ki molitva so sekirinela amen, ama valjani te molina amen e javerenge da. O apostol Pavle kerela sine adava. Na primer, e hristijanenge taro sobranie ko Efes pišingja: „Me stalno spomninava tumen ko mle molitve“ (Ef. 1:16). Osven so o Pavle molinela pe sine opšto e javerenge, ov isto agjaar molinela pe sine konkretno da baši nekaste. Na primer, e Timoteeske vakergja: „Blagodarno sium e Devleske... hem nikogaš na bistrava te spomninav tut džikote molinava man e Devleske taro vilo dive hem rat“ (2. Tim. 1:3). E Pavle da sine le ple sekiracie kolenge so valjani sine te molinel pe (2. Kor. 11:23; 12:7, 8). Sepak, odvojnela peske sine vreme te molinel pe e javerenge.

3. Soske šaj te slučinel pe te bistra te molina amen e javerenge?

³ Ponekogaš šaj bistraja te molina amen e javerenge. Soske? Jekh phen koja so vikinela pe Sabrinaa vakerela soske šaj te slučinel pe adava. Oj vakerela: „O tempo akale životoskoro tano but brzo. Šaj doborom but te koncentririna amen ko amare problemija so ka molina amen samo bašo amare potrebe“. Dali ponekogaš tuke da slučinela pe akava? Ako oja, tegani akaja statija šaj te pomožinel tuke. Ki late 1) ka dikha soske tano važno te molina amen e javerenge hem 2) ka dikha predlogija sar šaj te kera adava.

SOSKE TE MOLINA AMEN E JAVERENGE?

4-5. Sar amari molitva e javerenge šaj te ovel la „bari sila“? (Jakov 5:16).

⁴ I molitva e javerenge „isi la bari sila“. (Čitin Jakov 5:16.) Dali adava so ka molina amen e javerenge šaj čače te meninel lengiri situacija? Oja, šaj. Adaleske so o Isus džanlja kaj o Petar panda hari ka vakerel kaj na pendžarela le, ov vakergja leske: „Me taro vilo molingjum man tuke, te na našave tli vera“ (Luka 22:32). O Pavle da džanlja kaj o molitve šaj te pomožinen te meninel pe nekaskiri situacija. Keda sine nepravedno phanlo ko Rim, ov pišingja e Filemoneske: „Nadinava man kaj sebepi tumare molitve ka ovav oslobodimo hem palem ka avav ki tumende“ (Filim. 22). Hem baš adava ulo. Palo nesavo vreme, o Pavle sine oslobodimo taro zatvor hem šaj sine palem te propovedinel.

⁵ Džangjola pe, adava na značinela kaj o Jehova mora sekogaš te kerel adava bašo so molingjem le. Ov primetinela kobor but amenge važno nesavi buti hem ponekogaš odlučinela te postapinel sprema adava so rodingjem. Adava so džanaja akava šaj te pomožinel amenge taro vilo te molina amen e Jehovaske baši nesavi situacija hem palo adava te ovel amen doverba ko Jehova hem te mukha o bukja ko leskere vasta (Ps. 37:5; dikh 2. Korinkjanja 1:11).

6. Sar adava so ka molina amen e javerenge šaj te vlijajnel upro adava so osetinaja baši lende? (1. Petareskoro 3:8).

⁶ Keda molinaja amen e javerenge adava šaj te pomožinel amenge te ova „sočuvstvitelna“. (Čitin 1. Petareskoro 3:8.) Okova soj sočuvstvitelno primetinela keda nekoj javer cidela muke hem mangela te kerel nešto te šaj te pomožinel leske (Mar. 1:40, 41). Jekh starešina kova so vikinela pe Majkl vakerela: „Adava so molinava man bašo e javerengere potrebe pomožinela mange pošukar te haljovav solea borinena pe hem agjaar te bajrarav mlo mangipe sprema lende. Osetinava man popaše lencar iako šaj ola nane svesna bašo adava“. Jekh javer starešina, kova so vikinela pe Ričard, objasninela panda jekh način sar koristinela amenge i molitva. Ov vakerela: „Keda molinaja amen nekaske, tegani isi amen panda pobari želba te pomožina leske“. O Ričard vakerela akava da: „Keda praktično pomožinaja okoleske kaske so molingjem amen, amen ki nesavi smisla pomožinaja te odgovorinel pe ki amari molitva baši leste“.

7. Sar adava so ka molina amen e javerenge šaj te pomožinel amenge uramnoteženo te dikha ko amare problemija? (Filipjanja 2:3, 4; dikh hem o slike).

⁷ Adava so molinaja amen e javerenge pomožinela amen ispravno te dikha ko amare problemija. (Čitin Filipjanja 2:3, 4.) Sekoj jekh amendar isi le nesavo pharipe adaleske so živinaja ko sveto kote so vladinela o Beng (1. Jov. 5:19; Otk. 12:12). Keda isi amen navika te molina amen e javerenge adava setinkerela amen „kaj o ista muke trpinena len [amare] phralja da ko celo sveto“ (1. Pet. 5:9). Jekh pionerka so vikinela pe Ketrin vakerela: „Adava so molinava man e javerenge setinkerela man kaj e javerenge da nane lokho. Akava pomožinela mange te na razmislinav but bašo mle problemija“.

AMARE MOLITVE VALJANENA E JAVERENGE

8. Vaker primerija kaske šaj te molina amen.

⁸ Kaske šaj te molina amen? Različna manušenge — na primer, okolenge so isi len problemija sastipaja, e ternenge so asana ki škola hem kolen so isi len pritisok taro vrsnikija, ili okolenge so borinena pe problemencar kova so anela len o phuripe. But amare phralja hem phenja isi len protivibe ili tari familija ili taro vlastija (Mat. 10:18, 36; Apo. 12:5). Nesave amare phralja mora sine te mukhen pumare khera adaleske so sine politička nemirija. Javera doživingje prirodna katastrofe. Šaj na pendžaraja akale phralen hem phenjen lično, ama keda molinaja amen lenge amen sikavaja kaj siem poslušna ki e Isuseskiri zapoved: „Mangen tumen jekh jekhea“ (Jovan 13:34).

9. Soske valjani te molina amen okolenge so predvodinena ki e Jehovaskiri organizacija, hem isto lengere romnjenge da?

⁹ Šaj isto te molina amen okolenge da so predvodinena ki e Jehovaskiri organizacija, sar soj o Vodečko telo hem leskere pomošnikija, o členija ko odborija e podružnicengere, o nadglednikija ko oddelenija ko Betel, o pokrainska nadglednikija, o starešine ko sobranija hem o sluga-pomošnikija. Iako but taro akala phralja isi len pumare lična problemija, ola dena pestar sa te pomožinen amen (2. Kor. 12:15). Na primer, jekh pokrainsko nadgledniko kova so vikinel pe Mark, vakerela: „But mange pharo so sium dur taro mle roditelija. O solduj tane nasvale. Mi phen hem mo džamutro grižinena pe te ovel len sa so valjani lenge, ama pharo mange so na sium adari te šaj te kerav nešto poviše lenge“. Iako šaj na siem svesna so sa sekirinela akale bukjarne phralen, šukar tano te na bistra te molina amen lenge (1. Sol. 5:12, 13). Isto agjaar, šaj te molina amen lengere romnjenge da adaleske so verno poddržinena len hem pomožinena pumare romenge te prodolžinen te keren pumare zadače.

10-11. Dali o Jehova radujnela pe keda molinaja amen opšto bašo amare phralja hem phenja? Objasnin.

¹⁰ Sar so dikhlem, but puti molinaja amen bašo amare phralja hem phenja. Na primer, bizo te ovel amen nekoj konkretno ki godi, šaj te molina e Jehova te pomožinel okolenge kola soj ko zatvor ili te utešinel okolen kastar so mulo nekoj paše. Jekh starešina so vikinela pe Donald, vakerela: „Isi doborom but phralja hem phenja so nakhena taro pharipa so ponekogaš vakeraja jekh opšto molitva te šaj te vklučina sa okolen so cidena muke“.

¹¹ Dali asavke molitve radujnena e Jehova? Džangjola pe kaj oja! Amen na džanaja so točno valjanela sekole phraleske ili phenjake. Adaleske, šaj te vakera opšta molitve bašo amare phralja hem phenja (Jovan 17:20; Ef. 6:18). Akala molitve sikavena kaj mangaja „sa e phralen“ (1. Pet. 2:17).

KEDA MOLINAJA AMEN NEKASKE KONKRETNO

12. Sar adava so šukar ka primetina ka pomožinel amenge te ova pokonkretna ko amare molitve?

¹² Primetin šukar. Osven so ka molina amen opšto bašo amare phralja hem phenja, valjani te molina amen hem konkretno nekaske kole so ka spomnina le ko anav. Dali nekas taro tlo sobranie isi le seriozno nasvalipe? Dali nekoj taro terne tano obeshrabrimo adaleske so isi le pritisok ki škola? Dali nesavo roditeli kova so korkori bajrarela ple čhave but trudinela pe te vospitinel le šukar hem te pomožinel leske te sikljol te razmislinel sar o Jehova? (Ef 6:4). Adava so šukar ka primetine, ka pomožinel tuke te bajrare tlo mangipe hem sočuvstvo sprema o javera, a adava ka pottikninel tut te moline tut lengeb (Rim. 12:15).

13. Sar šaj te molina amen okolenge so na džanaja len lično?

¹³ Molin tut e javerenge hem spomnin len ko anav. Adava šaj te kera le čak okolenge so nikogaš na dikhlem len. Na primer, razmislin bašo amare phralja hem phenja kola soj ko zatvor ko phuvja sar soj Krim, Eritreja, Rusija hem Singapur. Ki jw.org, šaj te arakhe o anava okolengere soj ko zatvor.c Jekh pokrainsko nadgledniko, kova so vikinela pe Brajan, vakerela: „Haliljum kaj keda ka pišinav o anav nesave phraleskoro kova soj ko zatvor hem palo adava ka vakerav le, adava pomožinela mange te na bistrav te spomninav le ko mle lična molitve“.

14-15. So ka pomožinel amenge te ova konkretna ko amare molitve?

¹⁴ Molin tut konkretno. O Majkl, kole so spomningjem le angleder, dela akava predlog: „Džikote ki jw.org čitinava izveštaija bašo phralja hem phenja soj tane ko zatvor, trudinava man te zamislinav mange sar bi osetinava man me te ovav ko lengoro than. Džanava kaj ka sekirinav man me romnjake hem kaj ka mangav te ovav sigurno kaj la isi la adava so valjani lake. Adava pomožinela mange te džanav so konkretno te spomninav keda molinava man e phralenge soj ko zatvor hem tane ko brako“ (Evr. 13:3, fus.).

¹⁵ Ako trudinaja amen te zamislina amenge savo tano o životo amare phralengoro soj ko zatvor, adava šaj te pomožinel amenge te setina amen bašo kola javera konkretna bukja šaj te molina amen. Na primer, šaj te molina amen o čuvarija ko zatvor te oven ljubezna amare phralencar, a okola soj ki vlast te dozvolinen amare phralenge te obožavinen e Jehova (1. Tim. 2:1, 2). Šaj te molina amen o javera taro sobranie adale phraleskoro soj ko zatvor te oven ohrabrime tari leskiri vera, ili palem okola so na služinena e Jehovaske te primetinen leskoro šukar ponašibe hem te oven pospremna te šunen o šukar haberi (1. Pet. 2:12). O isto šaj te kera hem keda molinaja amen amare phralenge hem phenjenge kola so isi len javera nevolje. Adalea so šukar ka primetina, ka spomnina e javeren ko anav ko amare molitve hem ka molina amen bašo konkretna bukja, šaj te sikava kaj but mangaja amare phralen hem phenjen (1. Sol. 3:12).

URAMNOTEŽENO STAVI BAŠO AMARE MOLITVE

16. Sar šaj te ovel amen uramnoteženo stavi bašo amare molitve? (Matej 6:8).

¹⁶ Sar so dikhlem, keda molinaja amen e javerenge adava šaj te kerel te meninel pe lengiri situacija. Ama, valjani te ovel amen uramnoteženo stavi. Keda molinaja amen, amen na informirinaja e Jehova bašo nešto so ov na džanela, a ni palem na sovetinaja le sar te rešinel nesavi situacija. O Jehova džanela so valjani leskere slugenge panda angleder ola, ili amen, te ova svesna bašo adava. (Čitin Matej 6:8.) Tegani soske valjani te molina amen e javerenge? Osven o pričine so više spomningjem len ki akaja statija, ako molinaja amen e javerenge šaj te sikava kaj grižinaja amen lenge. O mangipe pottikninela amen te molina amen jekh jekheske. O Jehova radujnela pe keda dikhela kaj leskere sluge sikavena mangipe sar leskoro.

17-18. Solea šaj te sporedina amare molitve bašo amare phralja hem phenja?

¹⁷ Čak ako amenge dikhjola kaj amare molitve na vlijajnena upri nekaskiri situacija, lendar šaj te dikhel pe kaj mangaja amare phralen hem phenjen, a o Jehova primetinela adava. Akava šaj te sporedina le jekhe primerea: Zamislin tuke jekh familija duje tikne čhavencar — jekh murš hem jekh čhaj. O čhavo pašljola nasvalo ko kreveti. I čhaj molinela ple dade: „Molimte ker nešto me phraleske. But tano nasvalo!“ O dad više kergja nešto te šaj te pomožinel ple čhaveske. Ov mangela ple čhave hem šukar grižinela pe leske. Sepak, ov sigurno but radujnela pe keda dikhela kaj leskiri tikni čhaj doborom but grižinela pe ple phraleske so molinela le te pomožinel leske.

¹⁸ Baš ko adava pottikninela amen o Jehova — te grižina amen hem te molina amen jekh jekheske. Keda keraja adava sikavaja kaj na grižinaja amen samo amenge hem kaj čače mangaja amare phralen hem phenjen, a o Jehova primetinela adava (2. Sol. 1:3; Evr. 6:10). Isto agjaar, sar so dikhlem, ko nesave slučaija amare molitve šaj te keren te meninel pe nekaskiri situacija. Adaleske, te razmislina bašo sa akala bukja hem te na bistra te molina amen jekh jekheske.