Duj neve členija ko Vodečko telo

KO GODIŠNO sostanok, kova so ikergja pe ko 5 oktomvri 2024 berš, sine jekh posebno izvestuvanje: O phral Džodi Džejdli hem o phral Džejkob Ramf sine imenujme te služinen sar členija ko Vodečko telo e Jehovaskere svedokongoro. O solduj više but berša verno služinena e Jehovaske.

O phral Džejdli tano bijamo ko Misuri (Amerika) hem barilo ko čačipe. Ple familijaja živinena sine paše ko podračje kova so sine retko obrabotimo. Agjaar zapoznajngja bute phralen hem phenjen taro različno poteklo kola so džana sine adari te šaj te propovedinen o šukar haberi. Lengoro mangipe hem jekhipe vlijajngja but upri leste. Krstingja pe ko 15 oktomvri 1983 berš. Uživinela sine ki služba hem adaleske keda završingja i sredno škola, ko septemvri 1989 berš, počmingja e opšto pionersko službaja.

Sar tikno, leskere roditelija but puti ingarena sine le hem leskere phenja te posetinen o Betel. Asavke posete pottikningja len panda taro tiknipe te čhiven peske cel te služinen ko Betel — cel koja so o solduj ispolningje la. O phral Džejdli, počmingja te služinel ko Betel ko Volkil septemvri 1990 berš. Prvo kerela sine buti ko Oddelenie čistibaske, a pokasno ko Oddelenie baši zdravstveno griža.

Ko adava vreme, adaleske so sine baro porast ko sobranija ki špansko čhib kola so sine paše sine bari potreba taro phralja. Adaleske, o phral Džejdli selingja pe ko jekh taro adala sobranija hem počmingja te sikljol i špansko čhib. Kratko palo adava, zapoznajngja e phenja Damaris, koja so služinela sine sar pioneri ki isto pokraina. Otkeda venčingje pe, oj da počmingja te služinel ko Betel lea.

Ko 2005 berš iklile taro Betel te šaj te grižinen pe ple roditelenge. Ko adava periodi, služinena sine sar opšta pionerija. O phral Džejdli sine instruktori ki Škola bašo pionerija hem služinela sine ko lokalno Odbor bašo kontakt maškar o doktorija hem o pacientija soj e Jehovaskere svedokija, a isto ko Regionalno odbor gradibaske.

Ko 2013 berš, o phral hem i phen Džejdli sine vikime palem ko Betel te pomožinen te gradinel pe o Vorvik. Palo adava, služingje hem ko Paterson hem ko Volkil. O phral Džejdli kergja buti ko Lokalno oddel bašo proektiribe hem gradibe hem ki Služba bašo medicinska informacie. Mart 2023 berš, sine imenujmo sar pomošniko ko Odbor službake. Povrzimo e zadačencar so sine le ko berša so nakhle, ov vakerela: „Ponekogaš keda ka dobina neve zadače, šaj te uklel amen dar. Ama baš tegani te na bistra kaj valjani te ovel amen doverba ko Jehova adaleske so ov tano okova so kerela te ovel“.

O phral Ramf tano bijamo ki Kalifornija (Amerika). Keda sine tikno, i daj leskiri sine neaktivno ama trudinela pe sine te sikavel le bašo bibliska čačipa. Isto agjaar, ov sekova berš džala sine ki pli baba koja so verno služinela sine e Jehovaske. Oj bajrargja leskoro interes bašo čačipe hem keda sine le 13 berš, rodingja te proučinel i Biblija. Ko 27 septemvri 1992 berš, krstingja pe. Leskiri daj palem uli aktivno hem sa leskere kherutne krstingje.

Keda sine terno, o phral Ramf dikhela sine kobor sine radosna o pionerija. Adaleske, otkeda završingja i sredno škola, ko septemvri 1995 berš, ulo pioneri. Ko 2000 berš, selingja pe ko Ekvador te šaj te služinel kote so sine pobari potreba. Adathe zapoznajngja e Inga, jekh pionerka tari Kanada, hem palo nesavo vreme lele pe. Otkeda ženingje pe, služingje ki jekh diz ko Ekvador, kote so sine jekh tikni grupa objavitelija. Avdive, adari isi sobranie kova so but šukar napredujnela.

Palo nesavo vreme, o phral hem i phen Ramf sine imenujme sar specijalna pionerija, a pokasno počmingje hem e pokrainsko službaja. Ko 2011 berš, sine vikime ko 132 klasi ko Gilead. Palo diplomiribe, služingje ko različna thana ko sveto hem učestvujngje ko različna vrste služba, sar soj ki betelsko, misionersko hem pokrainsko služba. O phral Ramf, služingja isto agjaar sar instruktori ki Škola bašo polnovremena objavitelija.

Adaleske so počmingja i pandemija KOVID-19, o phral hem i phen Ramf irangje pe ki Amerika. Sine vikime ko Betel ko Volkil, kote so o phral Ramf dobingja obuka te služinel ko Oddelenie baši služba. Palo nesavo vreme, palem sine bičhalde ki podružnica ko Ekvador. Adari o phral Ramf služingja ko Odbor e podružnicakoro. Ko 2023 berš, selingje pe ko Vorvik. Ko januari 2024 berš, o phral Ramf sine imenujmo te služinel sar pomošniko ko Odbor službake. Keda razmislinela ko save thana služingja, ov vakerela: „Adava so jekh zadača kerela te ovel posebno nane o than kote so služinea, nego o manuša kasaja so sorabotinea“.

But ceninaja hem poštujnaja asavke phralen bašo trudo so dena (Fil. 2:29).