Sar pošukar te proučine i Biblija hem poviše te uživine ko adava

O Isus Navin čitinela o Zakoni; o zidija taro Erihon perena, a e Raavakoro kher ačhovela; o Isus Navin molinela pe vazdime vastencar

O ISUS NAVIN valjani sine te vodinel e Izraelcon ki Vetimi phuv. Adaja sine but phari zadača. Ama, o Jehova ohrabringja le e lafencar: „Ov hrabro hem but zoralo“. Isto agjaar vakergja leske kaj ako čitinela hem šunela o Zakoni, tegani ka anel mudra odluke hem ka ovel uspešno ki pli zadača (Is. Nav. 1:7, 8).

Amen živinaja ko „but pharo vreme“ hem amaro da životo šaj te ovel but pharo (2. Tim. 3:1). Ako mangaja te ova uspešna sar o Isus Navin, amen da valjani te šuna o sovet so dengja leske o Jehova. Valjani redovno te čitina i Biblija hem te primenina adava so sikljovaja te šaj te ana mudra odluke.

Ama, nesave amendar šaj na džanena sar te proučinen, ili na uživinena ko adava. Ama, te proučinel pe i Biblija tano but važno. Ki ramka „Probin akala predlogija“ ka arakhe praktična idee so ka pomožinen tuke te ovel tut pobari korist taro proučibe hem te uživine ko adava.

O psalmisti pišingja: „Vodin man ko drumo tle zapovedengoro, soske uživinava ki leste“ (Ps. 119:35). Tu da šaj te uživine džikote proučinea e Devleskoro Lafi. Ka arakhe but skapoceno duhovno barvalipe džikote proučinea i Biblija.

Iako na valjani te vodine celo narodo sar so kergja o Isus Navin, ama tute da isi tut tlo pharipa. Adaleske, isto sar o Isus Navin, proučin e Devleskoro Lafi hem primenin adava so sikljovea le. Ako kerea adava, ka ane mudra odluke hem ka ove uspešno ko životo.

PROBIN AKALA PREDLOGIJA

Molin tut angleder te proučine. Ki Biblija tane pišime e Jehovaskere misle hem ola tane pišime bašo tlo šukaripe. Adaleske, keda čitinea i Biblija, molin e Jehova te haljove, te pamtine hem te koristine adava te šaj te ane mudra odluke ko tlo životo (Ezra 7:10).
Puč tut pučiba. Džikote čitinea i Biblija ili o bibliska publikacie, puč tut: „So sikljovava taro akava bašo Jehova? Sar tano akava povrzimo e glavno temaja tari Biblija? Sar šaj te koristinav akala misle te šaj te pomožinav e javerenge?“
Razmislin bašo adava so proučinea. Ačhov hari hem razmislin bašo adava so čitingjan. Puč tut: „Sar kerela te osetinav man akava so čitingjum? Soske osetinava man agjaar? Sar šaj sine te primeninav akala informacie ko nesave situacie angleder, hem sar šaj te primeninav len akana hem ki idnina? Sar šaj te primeninav akala bibliska načelija ili akava sovet ko mlo životo?“ (Jov 23:5; Ps. 49:3). Trudin tut te haljove soske o Jehova predupredingja ple slugen te na keren nesave bukja. Ili, razmislin so ka ovel sine ako i ličnost kolake so čitinea postapinela sine pojaver ki adaja situacija (5. Moj. 32:28, 29).
Zamislin tuke o bukja džikote čitinea. Na primer, šaj li te zamisline tuke i situacija keda e Josifeskere phralja bikingje le e Ismaelconge? (1. Moj. 37:18-28). So dikhea, so šunea hem savo miris osetinea? Čhiv tut ko than e manušengoro bašo kola so čitinea. So razmislinena sine hem sar osetinena pe sine? Keda zamislinea tuke o bukja, ka ovel tut pobari korist taro proučibe.
Koristin o alatke proučibaske kola so dela amen amari organizacija te šaj poviše te uživina ko proučibe. Sikljov sar te koristine akala alatke so isi ki tli čhib ili ki čhib so haljovea la, hem ko elektronsko hem ko pečatimo oblik. Ma ladža te puče e javeren te pomožinen tuke te sikljove sar pošukar te koristine len. Na primer, o Priračnikot za istražuvanje na publikaciite na Jehovinite svedoci ka pomožinel tuke te arakhe but informacie baši razna teme hem objasninela but bibliska stihija. Koristin i brošurka Da ja istražuvame Božjata Reč. Late isi geografska karte, hronološko redosled sar slučingje pe o bukja, edinice merkake hem korisna informacie bašo javera teme.
Povtorin o glavna misle. Akava ka pomožinel tuke te pamtine adava so proučingjan. Isto agjaar, but ka pomožinel tuke adava so ka kere lafi nekasaja bašo adava so sikliljan. Dali šaj te koristine nešto taro adava ki služba? Ako kerea sa akava, ka pamtine o glavna misle, ama e javeren da ka ovel len korist taro tlo proučibe.