Ko celo sveto tano but potato taro normalno — So vakerela i Biblija?

Ko juli 2022 berš, ko celo sveto bašo bare temperature sine izvestimo akava:

• „Dujto puti akava masek, ki Kina sine predupredime o manuša kaj ko 70 dizja ka ovel preterano tato o vreme“ (CNN Wire Service, 25 juli 2022).

• „Adaleske so ki celo Evropa tano but tato, ko but phuvja thabljona but šume“ (The Guardian, 17 juli 2022).

• „Nedela ko but dizja ko SAD, sine but bare temperature sar nikogaš angleder. O tato vreme astargja o istočno brego hem nesave delija taro jug hem o sredno zapad“ (The New York Times, 24 juli 2022).

So značinela sa akava? Dali više ka šaj te živinel pe ki phuv? So vakerela i Biblija?

Dali o tato vreme tano prorokujmo ki Biblija?

Oja. O but baro tatipe soglasinela pe adalea so prorokujnela i Biblija bašo amaro vreme. O Isus prorokujngja kaj „adava so ka dikhen o manuša ka daravel len hem ka oven bare znakija taro nebo“ (Luka 21:11). Adaleske so ko celo sveto but bajrona o temperature, but manuša darana kaj adava so kerela pe ki Phuv, šaj te anel dži adava te našti te živinel pe ki late.

Dali i Phuv ka ovel than kote so ka našti te živinel pe?

Na. O Devel kergja i phuv te šaj o manuša te živinen ki late zasekogaš (Psalm 115:16; Propovednik 1:4). Ov nane te dozvolinel o manuša te uništinen i phuv. Namesto adava, ov vetinela kaj ka „uništinel okolen so uništinena i phuv“ (Otkrovenie 11:18).

Dikh akala duj proroštvija kola so sikavena amenge so panda vetinela o Devel:

• „Ka radujnen pe i pustina hem i phuv bizo pani, ka radujnel pe i phuv soj pusto hem ka cvetonel sar šafrani“ (Isaija 35:1). O Devel nane te dozvolinel i Phuv te ovel pustina, namesto adava ov ka popravinel sa i šteta soj lake kerdi.

• „Tu grižinea tut e phuvjake hem kergjan oj te del but plodija hem te ovel barvali“ (Psalm 65:9). O Devel ka kerel i phuv te ovel raj.

Te šaj te doznajne soske šaj te ova sigurna kaj i Phuv nane te ovel uništimi hem sar o Devel ka obnovinel la, čitin i statija „Dali čovekot kje ja uništi Zemjata?“