2022: Berš pherdo nevoljencar hem mukencar — So vakerela i Biblija?

Ko 2022 berš, o vojne, o ekonomska problemija hem o ekološka katastrofe sine glavna teme ko vestija. Ama, samo i Biblija vakerela amenge soske slučinena pe asavke bukja.

I čačutni pričina bašo nastanija ko 2022 berš

O nastanija so slučingje pe ko 2022 berš panda poviše potvrdinena kaj živinaja ko periodi koleske so i Biblija vakerela kaj tano o „posledna dive“ (2. Timotej 3:1). Akava periodi počmingja ko 1914 berš. Dikh sar o nastanija so slučingje pe odgovorinena adalea so prorokujngja i Biblija bašo amaro vreme:

„Vojne“ (Matej 24:6)

• „2022 — berš kote so ki Evropa irangje pe o strašna posledice tari vojna.“a

„Bokhalipe“ (Matej 24:7)

• „2022: Berš kote so sine baro bokhalipe.“b

„Zarazna nasvalipa“ (Luka 21:11)

• „Palem pojavingja pe detsko paraliza, a isto agjaar širingje pe o majmunska sipanice hem o KOVID-19 ponadari da kerela bare štete. Akava jasno sikavela kobor tane opasna o zarazna nasvalipa hem kobor o manuša tane slaba ko adava.“c

„Adava so ka dikhen o manuša ka daravel len“ (Luka 21:11)

• „Baro tatipe, suše, bare požarija hem poplave. Sigurno o nilaj 2022 berš, ka pamtinel pe taro adava so sine bare klimatska promene kola so kergje bari šteta, mule but manuša hem uništindile milionja khera.“d

„Nemirija“ (Luka 21:9)

• „Adaleske so isi ekonomska problemija, a posebno so barile but o cene, o manuša tane but poholjame hem adava angja ko 2022 berš te bajrol o broj taro protestija protiv o vlade.“e

So ka slučinel pe ko sledno berš?

Nikoj amendar našti te vakerel točno so ka slučinel pe ko 2023 berš. Ama jekh džanaja, kaj panda hari e Devleskoro Carstvo, ili e Devleskiri nebesno vlada, ka anel bare promene ki phuv (Daniel 2:44). Adaja vlada ka cidel sa o bukja kola so kerena o manuša te ciden muke hem ka kerel te izvršinel pe e Devleskiri volja ki celi phuv (Matej 6:9, 10).

Ohrabrinaja tut te šune e Isuseskoro sovet: „Ačhoven džangavde!“, agjaar so vnimatelno ka pazine sar o nastanija so slučinena pe ko sveto ispolninena o bibliska proroštvija (Marko 13:37). Šaj te kontaktirine amencar te šaj te doznajne poviše bašo adava sar šaj i Biblija panda avdive te pomožinel tuke hem sar šaj tu hem tli familija te nadinen tumen baši pošukar idnina.