Koj ka zaštitinel e obična manušen? So vakerela i Biblija?

Sprema o izveštaj taro Obedineta Nacie:

• Taro 7 dži ko 23 oktomvri 2023 berš, ko konflikt so isi maškar o izraelcija hem o palestincija ki Gaza sine mudarde poviše taro 6.400 manuša, a poviše taro 15.200 tane povredime, kolendar so poviše džene tane obična manuša. Osven adava, but milje manuša mora sine te našen taro pumare khera.

• Dži ko 24 septemvri 2023 berš, ki vojna maškar i Rusija hem Ukraina, ki Ukraina tane mudarde 9.701 manuša hem 17.748 tane povredime.

Savi nadež dela i Biblija okolenge so trpinena o posledice taro vojne?

Pričina baši nadež

I Biblija prorokujnela kaj o Devel ka „čhinavel o vojne ki celi phuv“ (Psalm 46:9). Ov ka meninel sa o manušikane vlade jekhe nebesno vladaja, ili carstvoja (Daniel 2:44). E Devleskoro Carstvo ka spasinel e manušen.

So ka kerel o Isus Hristos, o Cari ko e Devleskoro Carstvo? I Biblija vakerela akava:

• „Soske ka spasinel e čorole so rovela baši pomoš, okole so cidela muke hem sekas so nane le koj te pomožinel le. Ka perel leske žal e bedno manušeske hem e čoroleske, hem ka arakhel o životo e čorolengoro. Ka spasinel len taro maltretiribe hem nasilstvo“ (Psalm 72:12-14).

Preku plo Carstvo, o Devel jekh puti zasekogaš ka čhivel krajo bašo nevolje hem o muke so avena taro vojne hem nasilstvo.

• „Ov ka kosel sekoja asvin taro lengere jakhja, hem meribe nane te ovel više, ni žalibe, ni rojbe, ni dukha. Sa so sine angle, nakhlja“ (Otkrovenie 21:4).

Panda hari e Devleskoro Carstvo ka anel bare promene ki phuv. Ki Biblija tane prorokujme o vojne so dikhaja len avdive (Matej 24:6). Akala hem javera nastanija tane dokaz kaj živinaja ko „posledna dive“ taro manušikano vladibe (2. Timotej 3:1).