I osamenost tani sa pobaro problemi — So vakerela i Biblija?

Sprema jekh globalno izveštaja kova so kergja pe sigende, sekova štarto manuš osetinela pe osameno.

• „Sarine, bizi razlika kobor berš isi len ili kote živinena šaj te na ovel len kontakt javere manušencar“ (Čido Mpemba, ko-pretsedateli ki Komisija bašo socijalna vrske ki Svetsko zdravstveno organizacija).

Nesave mislinena kaj samo o pophure hem okola soj korkori osetinena pe osameno. Ama, šaj te osetinen pe osameno okola da soj terne, saste, uspešna hem soj ko brako. Keda nekoj nane ko kontakt javere manušencar hem osetinela pe osameno šaj but te vlijajnel upro fizičko hem emocionalno sastipe e manušengoro.

• „I osamenost tani but poviše taro adava te osetine tut lošno“, vakergja o d-r Vivek Murti, generalno hirurgo ko SAD. Ov ponadari vakerela: „I osamenost šaj te anel meribe isto kobor so šaj te anel o pušibe 15 cigare ko dive“.

So vakerela i Biblija

Amaro Stvoriteli na mangela te cida amen dur taro manuša. E Devleskiri namera sekogaš sine o manuša te uživinen keda tane zaedno.

• Načelo tari Biblija: „O Devel vakergja: ’Nane šukar o manuš te ovel korkori‘“ (1. Mojseeva 2:18).

O Devel mangela te ova amala lea. Ov vetinela kaj ka ovel paše amencar ako amen trudinaja amen te ova paše lea (Jakov 4:8).

• Načelo tari Biblija: „Srekjna tane okola soj svesna kaj valjani lenge o Devel, soske o nebesno Carstvo tano lengoro“ (Matej 5:3).

O Devel mangela te obožavina le zaedno e javerencar. Keda keraja adava, siem posrekjna.

• Načelo tari Biblija: „Te razmislina jekh jekheske te šaj te pottiknina amen te sikava mangipe hem te kera šukaripe, hem ma te mukha amare sostanokija... nego te ohrabrina amen jekh jekhea“ (Evreija 10:24, 25).

Nešto poviše bašo adava te borina amen protiv i osamenost, šaj te čitine ki statija „Usamljenost u svetu masovne komunikacije“.