Keda ka čhinavgjoven o konfliktija? — So vakerela i Biblija?

„Akana tano vreme keda i situacija valjani te ovel posmirimi hem te na ovel but opasno. Akana tano vreme te sikavel pe samokontrola“, vakergja o generalno sekretari taro Obedineta nacie o Antonio Gutereš, povrzimo e direktno napadea so kergja o Iran ko Izrael sabota, 13 april 2024 berš.

O vojne ko Bliski Istok tane jekh primer bašo adava so slučinela pe ko celo sveto.

„Avdive isi but poviše voena konfliktija tari Dujto svetsko vojna naakari hem adava vlijajnela upro duj milijarde manuša — upro sekova štarto manuš“ (Sovet baši bezbednost ko Obedineta nacie, 26 januari 2023 berš).

Thana kote so isi voena konfliktija tane ko Izrael, Gaza, Sirija, Azerbejdžan, Ukraina, Sudan, Etiopija, Niger, Mjanmar hem Haiti.a

Keda ka čhinavgjoven o konfliktija? Šaj li o svetska vodačija te anen mir? So vakerela i Biblija?

O sveto ki vojna

Adava so isi baro broj konfliktija ko celo sveto sikavela kaj panda hari sa e vojnenge ka avel krajo. Akala vojne tane bibliska proroštvija so ispolninena pe ko amaro vreme. I Biblija bašo akava vreme vakerela kaj tano „krajo akale svetoskoro“ (Matej 24:3).

• „Ka šunen bašo vojne ko razna thana... ka borinel pe narodo protiv narodo, hem carstvo protiv carstvo“ (Matej 24:6, 7).

Čitin i statija „Od kade znaeme deka živeeme vo ’poslednite denovi‘?“ te šaj te doznajne sar o avdisutne vojne ispolninena o bibliska proroštvija.

Vojna so ka čhivel krajo sa e vojnenge

I Biblija prorokujngja kaj ka avel krajo bašo manušikane konfliktija. Sar ka ovel adava? Adaja nane te ovel manušikani vojna, nego adava ka ovel preku Armagedon, „vojna so ka ovel ko baro dive e Semokjno Devleskoro“ (Otkrovenie 16:14, 16). Akaja vojna ka kerel o Devel te ispolninel plo vetuvanje te šaj o manuša te uživinen ko večno mir (Psalm 37:10, 11, 29).

Te šaj te doznajne poviše baši e Devleskiri vojna koja so ka čhivel krajo bašo sa o vojne, čitin i statija „Što e Armagedon?“