Sar o vojne hem o nasilna konfliktija vlijajnena upri sarinende amende

O vojne hem o nasilna konfliktija šaj taro jekh puti te počminen ko thana kote so momentalno isi mir. Čak o manuša so na živinena ko than kote so isi vojna, tane pogodime taro adava adaleske so ko internet šunena hem dikhena so slučinela pe. A i šteta so sine kerdi šaj te trajnel panda but čak otkeda ka završinel i vojna. Ake nesave primerija:

• 

  I vojna kerela te na ovel dovolno hajbaske. Sprema i Svetsko programa baši hrana, „o konfliktija tane panda i najbari pričina bašo bokhalipe hem 70 posto taro sa o manuša ko sveto kolen so nane len so te han živinena ko thana kote so isi vojne hem nasilstvo“.

• 

  I vojna anela fizička hem psihička problemija. I opasnost tari vojna hem i dar šaj te kerel o manuša te osetinen baro stres hem anksioznost. Okola so živinena ko thana kote so isi vojna nane ki opasnost samo te oven fizički povredime nego hem šaj te oven len psihička problemija. Ama žalno tano so but puti našti te dobinen i medicinsko pomoš so valjani lenge.

• 

  I vojna kerela o manuša te našen taro pumare khera. Sprema o Baro komesari bašo izbeglice ko Obedineta nacie, dži ko septemvri 2023 berš, poviše taro 114 milionja manuša ko celo sveto mora sine te mukhen pumare khera. I glavno pričina bašo akava tane o vojne hem o nasilna konfliktija.

• 

  I vojna kerela te oven ekonomska problemija. O vojne but puti kerena te oven ekonomska problemija, sar na primer sa te skuponel. O manuša mučinena pe adaleske so baro delo taro pare, kola so obično bi trošinena pe bašo sastipe hem obrazovanie, o vlade trošinena len te šaj te finansirinen o vojne. A valjani hem but pare te šaj palem te gradinel pe adava so sine uništimo ki vojna.

• 

  I vojna uništinela i phuv. O manuša mučinena pe keda i phuv kote so živinena tani namerno uništimi. O zagadimo pani, o vozduh hem i phuv šaj te keren te oven amen problemija sastipaja kola so ka trajnen beršencar, a i opasnost taro garavde mine ki phuv ačhola panda but vreme palo vojne.