Sar ka avel krajo e vojnenge hem e konfliktenge

O DEVEL KA CIDEL E MANUŠIKANE VLADEN

O Devel ka čhivel krajo e manušikane vladenge preku i vojna kola so i Biblija vikinela la Armagedona (Otkrovenie 16:16). Ko adava vreme „o carija taro celo sveto“ ka oven khedime zaedno baši vojna so ka ovel ko baro dive e Semokjno Devleskoro (Otkrovenie 16:14). O Armagedon tani e Devleskiri vojna kolaja so ka čhivel krajo bašo sa o vojne.

O Devel ko than e manušikane vladengoro ka čhivel plo Carstvo, javere lafencar vlada koja so ka vladinel taro nebo hem nikogaš nane te ovel uništimi (Daniel 2:44). O Devel biringja ple Čhave, e Isus Hristose, te ovel Cari ko adava Carstvo (Isaija 9:6, 7; Matej 28:18). Akaja vlada tani o Carstvob baši koleske so o Isus vakergja ple sledbenikonge te molinen pe (Matej 6:9, 10). Sa o manuša ka oven ko jekhipe hem ka ovel jekh vlada kolaja so ka vladinel o Isus.

Različno taro manušikane vladetelija o Isus nane te koristinel plo avtoriteti bašo plo interes. Ov tano pravedno hem nane pristrasno hem adaleske upri nikaste nane te kerel pe nesavi nepravda baši leskiri rasa, nacionalnost ili poteklo (Isaija 11:3, 4). Hem o manuša nane te valjani te borinen pe bašo pumare pravija. Soske? Adaleske so o Isus ka grižinel pe bašo šukaripe sekole jekheskoro. „Ka spasinel e čorole so rovela baši pomoš, okole so cidela muke hem sekas so nane le koj te pomožinel le... Ka spasinel len taro maltretiribe hem nasilstvo“ (Psalm 72:12-14).

E Devleskoro Carstvo ka čistinel i phuv taro sa o oružje (Mihej 4:3). A ka cidel hem e lošna manušen kola so na čhinavena te borinen pe hem kola so anena šteta e javerenge (Psalm 37:9, 10). Sekova murš, džuvli hem čhavo ka osetinel pe bezbedno kote hem te ovel ki phuv (Ezekiel 34:28).

Keda ka vladinel e Devleskiri vlada, sa e manušen ka ovel len o najšukar životo. Oj ka cidel o problemija kola so mučinena e manušen, sar na primer o čorolipe, o bokhalipe hem adava so nane len šukar uslovija živibaske. Sekas ka ovel le dovolno zdravo hrana hem ka ovel le šužo kher (Psalm 72:16; Isaija 65:21-23).

Keda ka vladinel e Devleskoro Carstvo ka oven cidime sa o strašna posledice taro vojne. Adava značinela kaj nane te oven cidime samo o fizička belegija nego hem i psihičko hem i emocionalno dukh koja so o manuša osetinena bašo adava so doživingje strašna bukja ki vojna. Čak okola so mule ka oven voskresnime hem palem ka živinen ki phuv (Isaija 25:8; 26:19; 35:5, 6). O familie palem ka oven zaedno hem o manuša ni nane te setinen pe ko strašna bukja so slučingje pe angleder (Otkrovenie 21:4).

O DEVEL KA CIDEL O GREVO

Džikote ka vladinel e Devleskoro Carstvo ki phuv, sa o manuša ka obožavinen e jekhe čačutne Devle, e Jehovac, „o Devel e mangipaskoro kova so dela mir“ (2. Korinkjanja 13:11). O manuša ka sikljoven te živinen zaedno ko mir (Isaija 2:3, 4; 11:9). Sarine so primeninena adava so sikljona ka oven oslobodime taro posledice e grevoskere (Rimjanja 8:20, 21).

O DEVEL KA CIDEL E SATANA HEM LESKERE DEMONEN

E Devleskoro Carstvo ka uništinel okolen so vlijajnena upro manuša te keren vojne, e Satana hem leskere demonen (Otkrovenie 20:1-3, 10). Bizo lengoro lošno vlijanie, „ka ovel baro mir“ (Psalm 72:7).

Šaj te ove uverimo kaj e Devleskoro vetuvanje kaj ka čhivel krajo e vojnenge hem e nasilno konfliktenge ka ispolninel pe. Ov mangela ama hem šaj te cidel o vojne.

• E Devle isi le mudrost hem mokj te šaj te čhivel krajo bašo vojne hem o nasilstvo (Jov 9:4). Na postojnela nešto so našti te kerel (Jov 42:2).

• O Devel mrzinela keda o manuša cidena muke (Isaija 63:9). Isto agjaar, ov „mrzinela okolen so mangena o nasilstvo“ (Psalm 11:5).

• O Devel sekogaš ačhola ko plo lafi; ov našti te hovavel (Isaija 55:10, 11; Tit 1:2).