Soske ponadari da isi vojne hem nasilna konfliktija
I Biblija sikavela kola tane o glavna pričine bašo vojne hem o nasilna konfliktija hem soske ponadari da slučinena pe.
O GREVO
O Devel stvoringja amare prva roditelen, e Adame hem e Eva, sprema plo liko (1. Mojseeva 1:27). Adava značinela kaj lenge ka ovel sine normalno te sikaven e Devleskere osobine, sar soj o mir hem o mangipe (1. Korinkjanja 14:33; 1. Jovaneskoro 4:8). Ama o Adam hem i Eva na šungje e Devle hem grešingje. Adaleske sarine nasledingjem o grevo hem o meribe (Rimjanja 5:12). A adava kerela but puti te oven amen lošna misle hem adaleske but manuša kerena lošna bukja (1. Mojseeva 6:5; Marko 7:21, 22).
O MANUŠIKANE VLADE
O Devel na stvoringja amen te šaj te vladina upro javera. Ki Biblija pišinela: „O manuš kova so phirela našti te upravinel ple čekorija“ (Eremija 10:23). Adaleske, o manušikane vlade našti celosno te ciden o vojne hem o nasilstvo.
O SATANA HEM LESKERE DEMONIJA
I Biblija sikavela kaj „celo sveto tano ko vasta e lošnoskere“ (1. Jovaneskoro 5:19). O lošno tano o Satana, o Beng, hem ov nane milostivo hem mudarela (Jovan 8:44). Ov hem o demonija vlijajnena upro manuša te šaj te počminen vojne hem te oven nasilna (Otkrovenie 12:9, 12).
Amen našti te cida o glavna pričine bašo vojne hem o nasilstvo ama o Devel šaj.