O TERNE PUČENA
Soske te džav ko sostanokija ki dvorana e Jehovaskere svedokongiri?
Duj puti ko kurko, e Jehovaskere svedokija ikerena sostanokija ko lengere dvorane. Sar izgledinena akala sostanokija, hem sar ka koristinel tuke adava so ka prisustvujne ki lende?
So slučinela pe ko e Jehovaskere svedokongere sostanokija?
Ko amare dvorane proučinaja i Biblija hem sikljovaja sar te primenina lakere praktična sovetija. O sostanokija so ikerena pe adari šaj te pomožinen tuke:
te doznajne o čačipe bašo Devel
te haljove soske slučinena pe nesave nastanija ko sveto
te ove pošukar manuš
te arakhe čačutne amala
Dali džanljan? Jekh taro teme baši koja so najčesto kerela pe lafi ki dvorana tani e Devleskoro Carstvo (Matej 6:9, 10; 24:14; Luka 4:43).
Soske te ove prisutno
Adava so ka šune adari ka pomožinel tuke. O bibliska načelija bašo kola so kerela pe lafi ko sostanokija ka pomožinen tuke te ove mudro (Izreki 4:5). Adava značinela kaj i Biblija šaj te pomožinel tuke te ane šukar odluke ko tlo životo. Isto agjaar, oj šaj te pomožinel tuke te dobine odgovor ko najvažna pučiba bašo životo. Nesave lendar tane:
Ake nekobor naslovija taro bibliska govorija so ikerena pe ko sostanokija ko vikend:
Soske te vodinel amen i Biblija?
Koj šaj te pomožinel tuke keda sian ki nevolja?
So kerela e Devleskoro Carstvo amenge panda avdive?
„Jekh mlo součeniko alo ko jekh taro amare sostanokija. Bešlja zaedno mle familijaja, hem dikhela sine taro amare lila. Palo sostanok vakergja mange kaj sine but vooduševimo taro komentarija so dena sine o phralja ko sostanok. Isto agjaar vakergja kaj ki leskiri crkva nane lila proučibaske sar so isi amende“ (Brenda).
Dali džanljan? Na valjani te platine te šaj te khuve ko amare sostanokija, hem nikastar na očekujnela pe te del prilog ako na mangela.
Adathe ka zapoznajne manušen so ka ohrabrinen tut. Ki Biblija pišinela kaj jekh taro pričine soske o hristijanja valjani te kheden pe zaedno tani te šaj te ohrabrinen pe jekh jekhea (Evreite 10:24, 25). Avdive, poviše manuša dikhena samo peske. Ama, ko sobranie ka arakhe manuša kolenge soj považna o Devel hem o javera. O družibe lencar čače ka ohrabrinel tut.
„Ko krajo taro dive, ponekogaš osetinava man tažno hem but umorno. Ama, keda sium e manušencar ki dvorana, sekogaš osetinava man pošukar. Keda džava mange khere palo sostanokija, sium bahtali hem spremno bašo panda jekh nevo dive“ (Eliza).
Dali džanljan? Ko celo sveto isi poviše taro 120 000 sobranija e Jehovaskere svedokongere. Ola khedena pe ko poviše taro 60 000 thana. Adaleske so o broj but bajrola, sekova berš gradinena pe ko prosek okolu 1. 500 dvorane bašo sostanokijaa
a Te šaj te doznajne kote isi dvorana bašo sostanokija, dža ko delo „E Jehovaskere sostanokija svedokongere“ hem birin ko „Arakh kote najpaše ikerena pe“.