O TERNE PUČENA
Sar šaj te pomožinel mange i Biblija? — prvo delo: Istražin i Biblija
„Probingjum te čitinav i Biblija nekobor puti, ama sekogaš keda dikhava sine kobor tani bari otkažinava man sine“ (Briana, 15).
Dali tuke da slučingja pe akava? Akaja statija šaj te pomožinel tuke!
Soske te čitinav i Biblija?
Šaj nane tuke interesno te čitine i Biblija. Ako oja, dži negde adava tano normalno. Šaj dikhea la samo sar jekh lil so isi le poviše taro milja stranice, pišimo sitna bukvencar bizi nijekh slika. Sigurno mislinea tuke kaj o čitibe i Biblija nikogaš našti te sporedine le dikhibaja televizija.
Ama, razmislin bašo akava: Ako slučajno arakhea jekh but purano sanduko barvalipaja, nane li te mange te dikhe so sa isi andre?
I Biblija tani baš sar jekh asavko sanduko. Oj tani pherdi mudra biserija so ka pomožinen tuke
te ane šukar odluke
te nakhe šukar tle roditelencar
te arakhe čačutne amala
te ikljove ko krajo keda sian ko stres
Sar šaj jekh doborom purano lil te ovel praktično amenge avdive? Adaleske so lakoro pišibe vodingja le o Devel preku o sveti duh (2. Timotej 3:16). Adava značinela kaj o sovetija ki Biblija avena taro Devel, a ov šaj te del amen o najšukar sovetija.
I Biblija tani sanduko barvalipaja kote so isi skapocena mudra biserija
Sar te čitinav i Biblija?
Jekh način tano agjaar so ka čitine la taro početok dži ko krajo. Agjaar ka džane kova tano lakoro haberi. Isi javera da načinija sar te čitine i Biblija. Ake duj predlogija:
Šaj te čitine celo Biblija redoja tari 1. Mojseeva dži ko Otkrovenie.
Šaj te čitine i Biblija hronološki — sprema adava sar slučingje pe o nastanija.
Predlog: Ko prevod Nov svet, ko Dodatok 19 isi spisako e glavna nastanencar taro e Isuseskoro životo ki Phuv ko hronološko redo.
Javer način sar šaj te čitine i Biblija tano agjaar so ka birine nesavo izveštaj kova so kerela lafi baši adava so mučinela tut ko momenti. Na primer:
Dali mangea te arakhe tuke čačutne amala? Čitin o izveštaj bašo Jonatan hem o David (1. Samoilova, poglavja 18- 20). Arakh o osobine so sine e Davide kola so verojatno privlekujngje e Jonatane.
Dali mangea te sikljove sar te na pere ko iskušenija? Čitin o izveštaj bašo adava sar o Josif na pelo ko iskušenija (1. Mojseeva, poglavje 39). Arakh kotar o Josif dobingja sila te na perel ko iskušenija.
Dali mangea te džane sar šaj te pomožinel tuke i molitva? Čitin e Neemijaskoro iskustvo (Neemija, poglavje 1 hem 2). Arakh dokazija bašo adava kobor mokjna sine e Neemijaskere molitve.
Predlog: Keda čitinea i Biblija arakh nesavo mirno than kote so ka šaj te koncentririne tut.
Panda jekh način sar šaj te čitine i Biblija tano te birine nesavo izveštaj ili psalm, te čitine le, a palo adava te razmisline sar šaj te primenine o pouke. Otkeda ka čitine, šaj te puče tut:
Soske o Jehova mukhlja te ovel pišimo akava ki Biblija?
So sikavela mange akava bašo Jehova hem bašo adava sar ov kerela o bukja?
Sar šaj te primeninav akava ko mlo životo?
Predlog: Čhiv tuke cel! Pišin tuke o datum keda mangea te počmine e čitibaja i Biblija.