Soj tano e Devleskoro Carstvo?

E Biblijakiri glavno tema tani e Devleskoro Carstvo. O Jehova ka koristinel akava Carstvo te šaj te kerel i Phuv raj. Soj tano adava Carstvo? Kotar džanaja kaj više počmingja te vladinel? Kola bukja kergja dži akana hem kola bukja ka kerel ki idnina? Akaja hem o sledna duj lekcie ka odgovorinen ko akala pučiba.

1. Soj tano e Devleskoro Carstvo hem koj tano leskoro Cari?

O Carstvo tano jekh vlada koja soj tani postavimi taro Jehova o Devel. O Cari taro akava Carstvo tano o Isus Hristos hem ov vladinela taro nebo (Matej 4:17; Jovan 18:36). I Biblija bašo Isus vakerela: „Ov večno ka vladinel sar Cari“ (Luka 1:32, 33). Sar Cari ko e Devleskoro Carstvo, o Isus ka vladinel upro sarine so živinena ki Phuv.

2. Koj vladinela zaedno e Isusea?

O Isus na vladinela korkori. Manuša „taro sekova pleme, čhib, narodo hem nacija... ka vladinen sar carija upri celi phuv“ (Otkrovenie 5:9, 10). Kobor džene ka vladinen zaedno e Isusea? Otkeda o Isus alo ki Phuv nakhlja but vreme hem but milionja manuša ule hristijanja hem leskere sledbenikija. Ama, samo 144.000 lendar ka džan ko nebo te vladinen zaedno e Isusea. (Čitin Otkrovenie 14:1-4.) Sa o javera hristijanja ka živinen ki Phuv hem ka oven gragjanija taro e Devleskoro Carstvo (Psalm 37:29).

3. Soske e Devleskoro Carstvo tano pošukar taro manušikane vlade?

Čak keda o manuša so isi len vlast trudinena pe te keren nešto šukar e narodoske, but puti olen nane len dovolno mokj te keren sa adava so mangena. Osven adava, palo nesavo vreme lenge ko than šaj te aven manuša kola soj tane sebična hem kola so na mangena te pomožinen e manušenge. Ama, ko e Devleskoro Carstvo nikoj javer nane te avel ko than e Isuseske sar Cari. O Devel „ka vazdel carstvo kova so nikogaš nane te ovel uništimo“ (Daniel 2:44). O Isus ka vladinel upri celi Phuv hem nane te ovel pristrasno ili te kerel razlika maškar o manuša. Ov tano pherdo mangipaja, ljubezno hem pravedno hem ka sikavel e manušen ola da te oven asavke sprema o javera. (Čitin Isaija 11:9.)

4. Jekh mokjno vlada ka vladinel celo svetoja

O Isus Hristos tano but pomokjno taro bilo kova vladeteli ki istorija. Čitin Matej 28:18, a palo adava keren lafi bašo akava pučibe:

• Ko so razlikujnela pe i vlast so isi e Isuse tari vlast so isi e manušen?

O manušikane vlade but puti meninena pe hem sekoja lendar vladinela samo upro jekh delo ki Phuv. Ama, sar tano e Devleskere Carstvoja? Čitin Daniel 7:14, a palo adava keren lafi bašo akala pučiba:

• So mislinea, soske tano šukar so e Devleskoro Carstvo „nikogaš nane te ovel uništimo“?

• So mislinea, soske tano šukar so ov ka vladinel upri celi Phuv?

5. O manušikane vlade mora te oven zamenime

Soske e Devleskoro Carstvo mora te zameninel e manušikane vladen? Dikh o VIDEOKLIPI, a palo adava keren lafi bašo akava pučibe:

VIDEOKLIPI: Soj e Devleskoro Carstvo? — izvadok (1:41)

• Save tane o rezultatija taro manušikano vladibe?

Čitin Propovednik 8:9, a palo adava keren lafi bašo akava pučibe:

• Dali mislinea kaj e Devleskoro Carstvo valjani te zameninel e manušikane vladen hem soske?

6. O vladetelija ko e Devleskoro Carstvo haljovena amen

Adaleske so amaro Cari, o Isus, živingja sar manuš, ov šaj „te haljovel amare slabostija“ (Evreite 4:15). Zaedno lea ka vladinen 144.000 verna murša hem džuvlja kolen so o Devel biringja „taro sekova pleme, čhib, narodo hem nacija“ (Otkrovenie 5:9).

• Dali ohrabrinela tut adava so džanea kaj o Isus hem adala so ka vladinen zaedno lea džanena sar tano te živine sar manuš hem soske?

7. E Devleskere Carstvo isi le o najšukar zakonija

O vlade kerena zakonija kola so mislinena kaj ka oven korisna e gragjanenge hem kaj ka zaštitinen len. Isto agjaar, e Devleskere Carstvo isi le ple zakonija hem okola so mangena ov te vladinel upri lende valjani te ikeren pe ko adala zakonija. Čitin 1. Korinkjanite 6:9-11, a palo adava keren lafi bašo akala pučiba:

• So mislinea, savo ka ovel o sveto ako sarine ikerena pe ko e Devleskere zakonija?a

• So mislinea, dali e Jehova isi le pravo te očekujnel okolendar so mangena leskoro Carstvo te vladinel upri lende te ikeren pe ko leskere zakonija? Soske mislinea agjaar?

• Kotar džanaja kaj o manuša so nane poslušna ko akala zakonija šaj te meninen pe? (Dikh o stiho 11.)

SO SIKLILEM

E Devleskoro Carstvo tano jekh čačutni vlada ko nebo koja so ka vladinel upri celi Phuv.

Sar ka odgovorine?

• Koj tane o vladetelija ko e Devleskoro Carstvo?

• Soske e Devleskoro Carstvo tano but pošukar tari bilo koja manušikani vlada?

• So očekujnela o Jehova taro okola so mangena leskoro Carstvo te vladinel upri lende?

ISTRAŽIN

Čitin so vakergja o Isus bašo adava kote tano e Devleskoro Carstvo.

„Dali Božjeto Carstvo se naogja vo tvoeto srce?” (internet statija)

Dikh so vakerela i Biblija bašo 144.000 soj birime taro Jehova te vladinen zaedno e Isusea.

„Koj odi na neboto?” (internet statija)

So uveringja jekhe džuvlja koja so sine phanli ko zatvor kaj samo o Devel šaj te anel pravda ko sveto?

„Kade go najdov rešenieto za nepravdite” (Razbudete se! taro noemvri 2011)