Sar te prilagodine tut ko nevo sobranie?

E Nikola hem e Selina sine len javer predizvik. Ola prifatingje i zadača tari podružnica ki Francija te selinen pe ko javer sobranie. Ola vakerena: „Ko početok siem sine but radosna, ama palo adava počmingje te falinen amenge amare amala. Panda našti sine te ova paše e phralencar taro amaro nevo sobranie“.a Adaleske so o selibe šaj te ovel pharo, so šaj te kere te šaj te ove srekjno hem te funkcionirine ko tlo nevo sobranie? Sar šaj o javera te pomožinen? Hem ko save javera načinija šaj te ohrabrine e javeren, a hem tu da te ove ohrabrimo lendar.

ŠTAR NAČELIJA SO KA POMOŽINEN TUKE TE PRILAGODINE TUT

1. Neka ovel tut doverba ko Jehova (Ps. 37:5). I Kazumi tari Japonija mora sine te mukhel plo sobranie kote so sine 20 berš keda lakoro rom dobingja buti ko javer than. Sar oj frdingja plo pharipe e Jehovaske? I Kazumi vakerela: „But puti vakerava sine e Jehovaske kaj sium ki panika, kaj osetinava man sine korkori hem kaj sium sekirimi. Sekogaš keda kerava sine adava, ov dela man sine i sila so valjangja mange“.

Sar šaj panda poviše te bajrare tli doverba ko Jehova? Isto sar so jekhe rastenieske valjani pani hem hranliva materie tari phuv te šaj te bajrol, agjaar amen da mora te hranina amari vera te šaj oj te bajrol. O Nikola, kole so spomningjem le angleder, halilo kaj adava so razmislingja bašo e Avraameskoro, e Isuseskoro hem e Pavleskoro primer — manuša kola so kergje but žrtve te šaj te keren e Devleskiri volja — bajrargja leskiri doverba kaj o Jehova ka pomožinel le. Ako redovno proučinea i Biblija, adava ka pomožinel tuke te ikljove ko krajo bilo save promenaja so ka ovel tut ko životo hem ka sikljove bukja kolencar so ka šaj te ohrabrine e javeren ko nevo sobranie.

2. Ma ker sporedbe (Prop. 7:10). O Žuel mora sine te navikninel pe ki pojaver kultura keda selingja pe taro Benin ko SAD. Ov vakerela: „Sine man čuvstvo kaj sekasaja kasaja so ka zapoznajnav man valjani sine te vakerav leske sa baši mande“. Adaleske so akava sine pojaver taro adava so ov sine naviknimo, počmingja te cidel pe taro javera ko sobranie. Ama otkeda pošukar zapoznajngja e phralen hem e phenjen, ov meningja plo stavi. O Žuel vakerela: „Akana haljovava kaj bilo kote te ove ko sveto, o manuša tane ista. Ola samo kerena lafi hem postapinena ko pojaver način. But tano važno te prifatina e manušen asavke save soj tane“. Adaleske ma ker sporedbe tle purane sobraniea. Jekh phen so vikinela pe En-Liz, koja so služinela sar pioneri, vakergja: „Na selingjum man te šaj te arakhav adava so mukhljum. Selingjum man te šaj te otkrinav neve bukja“.

O starešine isto agjaar na valjani te keren sporedbe pumare purane sobraniea. Samo adaleske so nekoj kerela o bukja ko pojaver način, na značinela kaj tano pogrešno. Angleder te de predlogija, šukar ka ovel te dikhe save tane o okolnostija ko adava than (Prop. 3:1, 7b). Pošukar tano te sikave e phralen hem e phenjen tle šukar primerea, namesto te čhive len te razmislinen sar tute (2. Kor. 1:24).

3. Ov zafatimo ko tlo nevo sobranie (Fil. 1:27). O selibe rodela but vreme hem energija, ama but tano važno panda taro početok te dža ko sostanokija — ako šaj ki dvorana. Ustvari, ako okola taro tlo nevo sobranie na dikhena tut nikogaš ili but retko dikhena tut, tegani sar šaj te pomožinen tuke? I Lusinda koja so ple duje čhaencar selingja pe ki jekh bari diz ki Južno Afrika, vakerela: „Mle amala dengje man sovet te koncentririnav man ko adava te ovav paše e phralencar hem e phenjencar taro nevo sobranie, te džav lencar ki služba hem te komentirinav ko sostanokija. Isto agjaar, vakergjem e phralenge kaj šaj te ikeren pe sostanokija službake ko amaro kher“.

Adava so zaedno ka kere o teokratska aktivnostija e phralencar hem e phenjencar taro nevo sobranie, ka pomožinel tuke te bajrare tli vera hem e javerengiri. I En-Liz, koja so spomningjem la angleder, sine pottiknimi taro lakere starešine te trudinel pe te džal ki služba sarinencar taro sobranie. Savo sine o rezultati? Oj vakerela: „Sigate haliljum kaj adava tano jekh važno način sar šaj te osetinav man delo taro sobranie“. Isto agjaar, adalea so dobrovolno ka učestvujne ko nesave aktivnostija, sar na primer ko čistibe hem održibe i dvorana, ka sikave kaj ko nevo sobranie dikhea sar tlo sobranie. Kobor poviše ka učestvujne ko sobraniska aktivnostija, doborom posigate ka ove prifatimo hem ka osetine tut kaj sian delo tari tli nevi duhovno familija.

4. Ker tuke neve amala (2. Kor. 6:11-13). Najšukar način te ove amal nekasaja tano agjaar so ka sikave kaj interesinea tut leske. Adaleske, odvojn tuke vreme te ave hari porano angleder o sostanok hem te ačhove hari poviše palo adava te šaj te zapoznajne e javeren. Trudin tut te pamtine lengere anava. Ako pamtinea e javerengere anava hem ako sian ljubezno hem pristaplivo, o javera ka mangen te zapoznajnen tut hem verojatno ka oven šukar amala.

Namesto preterano te optovarine tut adalea dali o javera ka prifatinen tut, dozvolin tle neve phralenge hem phenjenge te zapoznajnen tut asavko savo so čače sian. Sikljov tari Lusinda koja so vakergja: „Akana siem paše amala e javerencar adaleske so amen kergjem o prvo čekori te kanina e javeren ko amaro kher“.

„PRIFATINEN TUMEN JEKH JEKHEA“

Nekaske šaj te ovel but stresno keda prvo puti valjani te džal ko sostanok kote so isi pherdo manuša kolen so na pendžarela. Adaleske, so šaj te kere te šaj te lokhjare okolenge so ale ko tlo sobranie? O apostol Pavle pottikningja amen: „Prifatinen tumen jekh jekhea, sar so o Hristos prifatingja amen“ (Rim. 15:7). Adalea so ka džan palo e Isuseskoro primer, o starešine šaj te pomožinen e nevenge te osetinen pe šukar. (Dikh i ramka „Sar šaj o selibe te ovel uspešno“.) Sepak, sarine taro sobranie, čak hem o čhave da, šaj te keren o neve ko sobranie te osetinen pe šukar.

Te šaj o javera te osetinen pe šukar šaj te kanina len ko amaro kher, ama isto agjaar šaj praktično da te pomožina lenge. Na primer, jekh phen odvojngja taro plo vreme te šaj te sikavel i diz jekhe phenjake koja so samo so ali ko adava than hem te šaj te sikavel lake sar te koristinel o javno prevoz. Adava vooduševingja e neve phenja hem pomožingja lake te prilagodinel pe.

PRILIKA TE NAPREDUJNE KO DUHOVNO POGLED

Sar bajrola jekh skakulco, ov nekobor puti frdela pli koža angleder te phravel ple paka hem te ovel sposobno te letinel. Slično, keda ka dža ko nevo sobranie valjani te otfrline bilo savi sekiracija so ka čhinavel tut, agjaar te vakera, te phrave te paka ki služba bašo Jehova. Akava potvrdinena o Nikola hem i Selin. Ola vakerena: „O selibe tano jekh but šukar obuka. Te šaj te prilagodina amen ko neve manuša hem ko različna thana, mora sine te razvina neve osobine“. O Žan-Šarl, kole so spomningjem le ko početok, vakerela sar o selibe koristingja leskere familijake: „I promena dengja prilika amare čhavenge te oven pozrela hem te oven popaše e Jehovaja. Bašo samo nekobor masekija amari čhaj počmingja te oven la zadače ko sostanok Amaro životo hem služba, a amaro čhavo ulo nekrsteno objaviteli“.

So šaj te kere ako tle okolnostija na dozvolinena tuke te seline tut adari kote so isi pobari potreba? Ko sobranie kote so sian akana šaj te dikhe sar nevo agjaar so ka primenine nesave taro predlogija so sine spomnime ki akaja statija. Neka ovel tut doverba ko Jehova hem ov celosno zafatimo e sobraniska aktivnostencar, agjaar so ka kere plani te dža ki služba e javerencar hem agjaar so ka kere tuke neve amala ili ka kere pozorale o amalipa so više isi tut. Šaj te kere o prvo čekori te šaj praktično te pomožine okolenge soj neve ili okolenge so isi len nesavi potreba. Adaleske so o mangipe tano znako palo kova so pendžargjovena o čačutne hristijanja, adava so ka pomožine e javerenge ka pomožinel tuke te napredujne ko duhovno pogled (Jovan 13:35). Šaj te ove sigurno kaj „asavke žrtve mangela o Devel“ (Evr. 13:16).

Iako isi predizvikija, but hristijanja so selingje pe uspejngje te oven srekjna hem te funkcionirinen ko nevo sobranie, a šaj tu da. I En-Liz vakerela: „Adava so služingjum ko poviše sobranija pomožingja mange te širinav mlo vilo“. I Kazumi akana tani uverimi kaj o selibe „šaj te del tut prilika te osetine e Jehovaskiri poddrška ko neve načinija“. A so mislinela o Žuel? Ov vakerela: „Adava so kergjum mange amala, pomožingja mange te osetinav man sar khere. Akana doborom šukar prilagodingjum man ko mlo nevo sobranie so ka ovel mange pharo te mukhav le“.