2 LEKCIJA
So značinela te ovel amen čačutni vera ko Devel?
Sar o love, i vera da valjani te ovel čačutni te šaj te ovel la vrednost
TE OVEL amen čačutni vera ko Devel na značinela samo te verunja kaj isi Devel. Isi but manuša so verunjena ko Devel ama namerno kerena lošna bukja. Asavki „vera“ tani sar hovavne love, kola so dikhjona sar čačutne ama na vredinena ništo. Tegani, so značinela te ovel amen čačutni vera ko Devel?
I čačutni vera ko Devel avela keda točno pendžaraja e Devleskoro Lafi. Taro leskoro Lafi šaj te džana o čačipe baši leste hem savo tano Ov. Adathe šaj te dikha so sikavela amen o Devel bašo leskere zakonija hem namere. Nesave bukja so sikavela amen o Devel tane:
O Devel tano jekh. Nijekh našti te ovel sar leste.
O Isa (Isus) nane Semokjno Devel. Ov tano e Devleskoro pekamberi (proroko).
O Devel osudinela sekova idolopoklonstvo.
E manušen adžikerela len o kijameti (sudno dive).
But manuša so mule palem ka ušten hem ka šaj te dživdinen ko dženeti.
I čačutni vera ko Devel čhivela amen te kera šukar bukja. Asavke bukjencar slavinaja e Devle hem ola tane bašo amaro hem e javerengoro šukaripe. Nesave taro adala šukar bukja tane:
Te služina e Devleske.
Te sikava šukar osobine, a najviše o mangipe.
Te cida amendar o lošna misle hem o želbe.
Te ovel amen vera ko Devel keda isi amen problemija.
Te sikava e javeren bašo Devel.
I čačutni vera ko Devel čhivela amen te kera šukar bukja
Sar šaj te ovel amen čačutni vera ko Devel?
Keda sikavaja vera, oj bajrola sar jekh muskuli
Te roda taro Devel te pomožinel amen. O pekamberi o Musa (Mojsej) molingja pe e Devleske: „Vaker mange, molinava tu, bašo to drumo, te šaj te pendžarav tut hem te arakhav milost anglo te jakhja“.a O Devel šungja le hem odgovoringja ki leskiri molitva. O Musa tano jekh but šukar primer baši vera. O Devel ka pomožinel amenge da te sikava čačutni vera ki leste.
Te sikljova taro e Devleskoro Lafi. O lila dende taro Devel, sar so i tane o Tevrati (o pandž lila e Mojseeskere), o Zeburi (Psalmija) hem o Indžili (Evangelija), arakhljona ko e Devleskoro Lafi, i Biblija. Oj tani o najprevedimo hem najproširimo lil ko sumnal. Isi tumen li adava lil so i dendo taro Devel?
Te kera adava so sikljovaja taro e Devleskoro Lafi ko amaro dživdipe. I vera tani sar muskuli. Sar so o muskuli bajrola keda vežbinaja, agjaar i vera da bajrola keda sikavaja la sekova dive. Tegani, korkori ka dikha kaj adava so vakerela e Devleskoro Lafi tano bašo amaro šukaripe. Čače, o sovetija so arakhljona adathe kergje bute dženengoro dživdipe te ovel pošukar. Ponadari ka dikha nesave primerija.