I vojna tani strašno
I vojna tani jekh taro najstrašna bukja so šaj nekoj te doživinel. But vojnikija hem obična manuša so doživingje vojna, ple jakhencar dikhle kobor strašno tani i vojna.
VOJNIKIJA
„Kotar hem te irane tut dikhea mudarde manušen ili ranimen. Ko nijekh momenti na osetinea tut sigurno“ (Geri, Britanija).
„Sium sine pogodimo taro kuršumija ko dumo hem ko muj hem dikhljum sar but džene tane mudarde, maškar kolende so sine čhave hem pophure. I vojna kerela tut te ove bizo čuvstvija“ (Vilmar, Kolumbija).
„Keda nekoj tano pukajmo anglo tle jakhja, našti te ikale adaja slika tari tli godi. Celo vreme vrtinela pe tuke o pištiba hem o ofkiba. Nikogaš našti te bistre adava so dikhljan“ (Zafira, Amerika).
OBIČNA MANUŠA
„Mislinava sine kaj nikogaš palem nane te ovav srekjno. Darava sine bašo mlo životo, ama panda poviše darava sine mle familijake hem mle amalenge“ (Aleksandra, Ukraina).
„Strašno tano te adžikere redo hajbaske taro 2 sabajle dži ko 11 rakjate, ki dar kaj šaj te pogodinel tut nesavo kuršumi“ (Daler, Tadžikistan).
„Mle roditelija sine mudarde ki vojna. Ačhiljum korkori hem na sine koj te utešinel man hem te grižinel pe mange“ (Meri, Ruanda).
Iako sine len strašna posledice, o manuša soj citirime poupre arakhle mir. A isto agjaar tane uverime kaj panda hari ka avel krajo bašo sa o vojne hem o nasilna konfliktija. Ko akava broj tari Stražarsko kula soj temelimi ki Biblija, ka ovel objasnimo sar ka ovel adava.