Previše tato vreme ko celo sveto ko nilaj ko 2023 berš — So vakerela i Biblija?

O manuša ko celo sveto trpinena o tato vreme poviše nego bilo keda angleder hem doživinena javera katastrofe so kerela len o previše tato vreme. Dikh o sledna izveštaija:

• „Akava sine o najtato juni dži akana otkeda o manuša počmingje te merinen o temperature ko celo sveto, angleder 174 berš“ (National Oceanic and Atmospheric Administration, U.S. Department of Commerce, 13 juli 2023).

• „I Italija, i Španija, i Germanija hem i Polska soočinena pe bare tatipaja, a ko ostrovija Sicilija hem Sardinija, očekujnela pe o temperature te uklen dži ko 48 stepenija. Akaja temperatura šaj te ovel i najbari koja so sine merimi ki Evropa“ (European Space Agency, 13 juli 2023).

• „Sar i phuv ovela potati, očekujnela pe te ovel počesto hem but bare bršima, kola so ka anen dži ko bare poplave“ (izjava taro Stefan Uhlenbruk, direktori ki Svetsko meteorološko organizacija, 17 juli 2023).

Dali sian sekirimo taro akala izveštaija bašo asavko vreme? Dikh so vakerela i Biblija baši akaja važno tema.

Dali asavko vreme tano prorokujmo ki Biblija?

Oja. O baro tatipe ko celo sveto hem javera klimatska promene tane ko sklad adalea so vakerela i Biblija bašo amaro vreme. Na primer, o Isus prorokujngja kaj „adava so ka dikhen o manuša ka daravel len hem ka oven bare znakija taro nebo“ (Luka 21:11). Adava so o temperature but bajrona, kerela but manuša te daran kaj ka našti te živinel pe ki phuv.

Dali i phuv ka ovel than kote so ka našti te živinel pe?

Na. O Devel kergja i phuv te šaj o manuša te živinen ki late zasekogaš, ov nane te dozvolinel o manuša te uništinen i phuv (Psalm 115:16; Propovednik 1:4). Namesto adava, ov vetinela kaj ka „uništinel okolen so uništinena i phuv“ (Otkrovenie 11:18).

I Biblija sikavela kaj o Devel šaj hem ka zaštitinel i phuv taro katastrofe.

• „[O Devel] čhinavela i bura hem smirinela o morska branija“ (Psalm 107:29). E Devle isi le mokj te kontrolirinel o prirodna sile. Ov šaj te popravinel o problemija so avena taro katastrofe kola so predizvikujnena o manuša te ciden muke adaleske so isi but bare klimatska promene.

• „Tu grižinea tut e phuvjake hem kergjan oj te del but plodija hem te ovel barvali“ (Psalm 65:9). O Devel ka kerel i phuv te ovel raj.

Te šaj te doznajne poviše bašo bibliska vetuvanja kaj ka ovel šukar promene ki phuv, dikh i statija „Dali čovekot kje ja uništi Zemjata?“