2. Timoteju

3 Akava te đane: ko poslednja dive ka ovel but pharo vreme. 2 Sose o manuša ka oven sebična, pohlepna aso pare, umišljena, ohola, ka vaćeren uvredljivo protiv o Devel hem o manuša, neposlušna e roditeljenđe, nezahvalna, neverna, 3 ka oven bezosećajna premalo avera, nespremna aso bilo savo dogovor, klevetnikija, bizi samokontrola, okrutna hem bizo mangipe premalo šukaripe, 4 izdajice, tvrdoglava, ponosna. Pobuter ka mangen pe želje, nego e Devle, 5 kola samo ka dićhon so mangena e Devle, ama na ka živinen ađahar. Ma te ovel tut ništa asavke manušencar. 12 U stvari, sare kola mangena te živinen verno e Devlese ko jekhipe e Hristeja e Isuseja, ka oven progonime. 13 A o lošna manuša hem o prevarantija ka oven sa pološna hem pološna. Ka hovaven averen, a ka hovaven hem kokri pes. 14 Ama, tu ićer tut ko odova so sikljiljan hem ko so uverinđan tut, sose tu đaneja ko sikavđa tut sa odova 15 hem sose pana kotar tiknipe penđareja o sveta spisija kola šaj te den tuće mudrost te bi dobineja o spasenje prekali vera ko Hrist Isus. 16 Celo Lil avela ando Devel hem korisno tano te sikavi e manušen, te mothovi soj tano pogrešno, te ispravini sa o buća hem te sikavi amen sar te živina pravedno ađahar sar so mangela o Devel, 17 te šaj e Devleso sluga te ovel potpuno sposobno hem opremimo asi svako šukar buti.