Da li isi nada e mulenđe?

1. Koja šukar vest isi e mulenđe?

Ked o Isus reslja ki Vitanija, jekh than uzo Jerusalim, oleso amal o Lazar već štar dive hine mulo. O Isus olese phenjencar, e Marijaja hem e Martaja, đelo ko oleso grobo. Palo odova, but manuša ćedisalje. Šaj li te zamisline kobor i Marta hem i Marija hine bahtale ked o Isus uskrsninđa e Lazare? Čitin Jovan 11:21-24, 38-44.

I Marta već đanđa i šukar vest ando mule. Oj đanđa so o Jehova ka uskrsnini e mulen palem te živinen ki phuv. Čitin Jov 14:14, 15.

2. So ovela e mulencar ked merena?

O manuša tane ćerde ando praho (Postanak 2:7; 3:19). Amen na hijam duhija hem ano amende nane duša koja palo meribe živini ko aver than. Ked meraja, amari godi više na ćerela hem sa amare mislija propadinena. Odolese, o Lazar na phenđa so diso doživinđa đi hine mulo, sose o mule ništa na đanena. Čitin Psalam 146:4 hem Propovednik 9:5, 6, 10.

Da li o Devel mučini e manušen palo meribe ki jag? Ki Biblija pisini so o mule ništa na đanena. Odolese, o sikavibe ando pakao tano hovavno hem klevetini e Devle. I pomisao te mučini e manušen ki jag tani odvratno e Devlese. Čitin Jeremija 7:31.

Dikh o kratko film U kakvom se stanju nalaze mrtvi?

3. Šaj li o mule te vaćeren amencar?

O mule našti niti te vaćeren niti te šunen (Psalam 115:17). Ama, disave anđelija kola tane lošna šaj te vaćeren e manušencar hem šaj te ćeren pe soj tane o mule manuša (2. Petrova 2:4). O Jehova zabranini amenđe te pokušina te vaćera e mulencar. Čitin Ponovljeni zakoni 18:10, 11.

4. Ko ka uskrsnini?

But manuša kola mule ka irinen pe ko đivdipe ki phuv. Čak disave kola na upoznajinđe e Devle hem ćerđe lošna buća ka oven uskrsnime. Čitin Luka 23:43 hem Dela apostolska 24:15.

O manuša kola ka uskrsninen ka ovel len prilika te sikljon ando Devel hem te mothoven i vera ko Isus ađahar so ka šunen le (Otkrivenje 20:11-13). Okola kola palo poklo uskrsenje ka ćeren šukar buća, ka ovel len prilika te živinen večno ki phuv. Čitin Jovan 5:28, 29.

5. So o uskrsenje mothovi amenđe ando Jehova?

Isi nada e mulenđe sose o Devel bićhalđa pe Ćhave te merel amenđe. Odolese šaj te phena so o uskrsenje mothovi amenđe e Jehovaso mangipe hem oleso nezasluženo šukaripe. Ked o mule ka irinen pe ko đivdipe, kas bi posebno mangeja te dikhe? Čitin Jovan 3:16 hem Rimljanima 6:23.