Sose valjani hem ponodri te sikljove ando Jehova?

1. Kola blagoslovija ka ovel tut ako hem ponodri sikljoveja andi Biblija?

Sigurno akala osnovna e biblijake sikljoviba zorjaćerđe to mangipe premalo Jehova. Ama, valjani hem ponodri te barjaćere odova mangipe (1. Petrova 2:2). Ti nada te živine večno ka zavisini odolestar da li hem ponodri ka ove popaše e Devleja ađahar so ka proučine oleso Lafi. Čitin Jovan 17:3 hem Judina 21.

So pobuter ka đane ando Devel, ti vera ka ovel pozorali. I vera ka pomožini tuće te ćere odova so o Devel mangela (Jevrejima 11:1, 6). Isto ađahar, oj ka podstaknini tut te pokajine tut hem te ćere bare promene ko to đivdipe. Čitin Dela apostolska 3:19.

2. Sar odova so sikljiljan ando Devel šaj te pomožini averenđe?

Sare amen mangaja te vaćera averenđe ando odova so sikljiljam, sose sare uživinaja te vaćera šukar vestija. Đi hem ponodri proučineja i Biblija, ka sikljove sar šaj te koristine la te šaj te objasnine averenđe sose verujineja ko Jehova hem ki šukar vest. Čitin Rimljanima 10:13-15.

But manuša najangleder vaćerena i šukar vest pe amalenđe ja pe familijaće. Ov taktično. Umesto te phene lenđe so odova ko so on verujinena tano pogrešno, vaćer lenđe ando e Devlese obećanja. Isto ađahar, ma bistri so ko manuša pobuter utičini to šukar ponašanje, a na odova sostar vaćereja. Čitin 2. Timoteju 2:24, 25.

3. Kobor paše šaj te ove e Devleja?

Đi sikljoveja ando e Devleso Lafi, šaj te sikljove te primenine e biblijake načelija. Sar nakhela o vreme, tu šaj te ove but paše e Jehovaja. Soj tano pana pošukar, tu šaj te ove deo andi olesi porodica. Čitin 2. Korinćanima 6:18.

4. Sar šaj hem ponodri te napredujine?

Ako hem ponodri sikljoveja ando e Devleso Lafi šaj duhovno te napredujine (Jevrejima 5:13, 14). Šaj te puće nekas ando e Jehovase svedokija te proučini tuvaja i Biblija prekali knjiga So sikavi amen i Biblija? So pobuter ka sikljove ando e Devleso Lafi, to đivdipe ka ovel pobahtalo. Čitin Psalam 1:1-3; 73:27, 28.

I šukar vest avela ando Jehova, kova tano bahtalo Devel. Tu šaj te ove popaše e Jehovaja, ađahar so ka ove popaše olese narodoja (Jevrejima 10:24, 25). Trudin tut te živine premali e Jehovasi volja te šaj te osvojine o pravo đivdipe, odnosno o večno đivdipe. I najšukar buti so šaj te ćere ko to đivdipe tani te ove sa popaše e Devleja. Čitin 1. Timoteju 1:11; 6:19.