Februar

Ked ki Biblija pomini pe o lafi „pravda“, tegani odova značini te ćerel pe odova so o Devel mislini soj tano ispravno hem te na ćerel pe razlika. Te dikha sar kotar odova so o Isus ćerđa dićhola so manglja i pravda. Ko vreme ked ov živinđa, o jevrejska vođe mrzinđe e manušen kola na hine Jevreja, mrzinđe e obično manušen hem na mothovđe poštovanje premalo romnja. Ama, o Isus uvek poštujinđa e manušen hem na ćerđa razlika maškaro olende. Ov mukhlja e manušen kola na hine Jevreja, a kola hine len vera, te oven olese učenikija (Mat. 8:5-10, 13). Ov propovedinđa sarinenđe bizi razlika da li hine barvale ja ćorore (Mat. 11:5; Luka 19:2, 9). O Isus niked na hine grubo premalo romnja. Ov hine ljubazno hem mothovđa poštovanje, čak premalo okola romnja kolen o manuša ko odova vreme mrzinđe (Luka 7:37-39, 44-50). Amen šaj te oponašina e Isuse ađahar so na ka ćera razlika maškaro manuša hem so ka propovedina sarinenđe kola mangena te šunen – bizo obzir da li tane ćorore, barvale ja ki savi vera tane. O murša kola oponašinena e Isuse mothovena poštovanje premalo đuvlja (w19.05 2 ¶1; 5 ¶15-17).

O starešine avdije šaj te primeninen odola lafija, ađahar so ka oven blaga hem saosećajna ked mangena te utešinen nekas ando e Devleso Lafi. Ama, o starešine nane jedina kola šaj te utešinen okolen kola tane zlostavime. Sare isi amen odgovornost te utešina jekh jekhe (1. Sol. 4:18). I duhovno zrelo phen šaj but te ohrabrini avera phenja kolaće valjani uteha. O Jehova hine le šukar razlog te phenel so ov utešini pe slugen sar so jekh daj utešini pe ćhaven (Is. 66:13). I Biblija vaćeri ando romnja kola utešinđe okolen kola hine len dukh (Jov 42:11). O Jehova tano but bahtalo ked dikhela sar jekh phen utešini avera phenja koja patini! Dijekhvar, o starešine šaj te zamolinen jekha zrelo phenja te pomožini avera phenjaće. Ked amen pokušinaja te pomožina e phralese ja e phenjaće, amen na valjani te puća ando buća kolendar tano olenđe pharo te vaćeren (1. Sol. 4:11; w19.05 16-17 ¶10-12).

Sose valjanena barem duj svedokija angleder so o starešine ka pokreninen o disciplinsko postupak? Odolese so premali Biblija odova tano pravedno. Ako i osoba na priznajini pi krivica, tegani valjanena duj svedokija te šaj i optužba te ovel la osnova hem te šaj o starešine te ovel len pravo te formirinen o disciplinsko odbor (Pon. zak. 19:15; 1. Tim. 5:19). Ako i osoba phenela so na ćerđa odova, tegani o starešine šunena e svedokonen. O disciplinsko odbor ka formirini pe ako isi barem duj svedokija – jekh svedoko kova prijavinđa o slučaj hem o dujto kova šaj te potvrdini so odija osoba zlostavinđa odole ćhavore ja avere ćhavore. Ako nane o dujto svedoko, odova na značini so i osoba koja prijavinđa o slučaj hovavi. Čak iako odija optužba našti te potvrdinen duj svedokija, o starešine tane svesna so i osoba koja tani optužimi možda ćerđa diso but lošno, sova but povredinđa averen. O starešine hem ponodri ka utešinen hem ka pomožinen okole kova tano povredimo hem ka zaštitinen e skupština ando diso lošno so šaj te desini pe (Dela 20:28; w19.05 11 ¶15-16).

But tano važno o ćhave te oven sikavde sar te proučinen. O ćhave valjani te sikljon sar te pripreminen pe e sastankonđe ja sar te istražinen dijekh problemi ja disavo pućibe kova pojavinđa pe ki škola (Jevr. 5:14). Ako ćhere ka ovel len odija navika te proučinen i Biblija, tegani ka ovel lenđe polokho te pratinen odova so vaćeri pe ko sastankija ja ko kongresija. Naravno, kobor vreme o roditeljija ka proučinen pekle ćhavencar ka zavisini odolestar save tane o ćhave hem kobor berš isi len. O manuša kasa proučinaja i Biblija isto valjani te sikljon sar kokri te proučinen. Ked počminena te proučinen, amen hijam bahtale so ked pripreminena pe e sastankose ja pekle kursese podvucinena o odgovorija. Ama, valjani te sikava len hem sar kokri te istražinen hem temeljno te proučinen. Odova ka pomožini len ked ka ikljol dijekh problemi, te đanen sar hem kuri te arakhen o savetija, a na odmah te pućen averen (w19.05 26 ¶2; 28 ¶10-11).

O Beng tano odlučno te menjini toklo način sar razmislineja. Ov koristini sa so akava sveto sikavi te uništini o uticaj kova e Devleso Lafi isi le upro amende. O Beng avdije pućela isto pućibe kova pućlja e Eva ko edensko vrt: „Da li o Devel ćaće vaćerđa so...?“ (Post. 3:1). Ko akava sveto kuri vladini o Beng, but putija šunaja pućiba kola šaj te ćhiven amen te sumnjina ko odova ko so verujinaja, sar soj tane: „Da li o Devel ćaće na mukhela duj đuvlja ja duj murša te oven ko brako? Da li o Devel ćaće na mangela te slavina o Božić ja o rođendanja? Da li o Devel ćaće rodela amendar te na la rat? Da li o Devel kova mangela e manušen ćaće rodela tutar te na družine tut nekasa andi ti familija ja ando te amala kola tane isključime?“ Amen valjani te ova uverime ko odova ko so verujinaja. Ako na arakhaja odgovorija ko važna pućiba kotar amare verovanja, tegani on šaj te ćeren bare sumnje ki amari godi. Akala sumnje šaj te ruminen amaro razmislibe hem šaj te uništinen amari vera (w19.06 12-13 ¶15-17).

O Jehova but mangela amen (Jov. 3:16). Amen mangaja te oponašina amare mangle Dade. Odolese amen daja sa amendar te ova „ko jekhipe ko mislija, saosećajna, pherde phralikane mangipaja, milostiva“ premalo sare, a posebno premalo amare phralja hem phenja (Gal. 6:10). Amen mangaja te pomožina amare phralen hem phenjen ked isi len pharipa hem stres. Sar šaj te utešina nekas ko našalđa pe rome ja pe romnja? Prvo važno buti koja valjani te ćera tani te vaćera oleja ja olaja, čak iako na osetinaja amen prijatno ja na đanaja so te phena. Amari phen i Paula, kaso rom iznenada mulo phenela: „Haljovava so ked neko merela o manuša na đanena so te phenen. On darana te na phenen diso pogrešno. Ama, pogore tano ked o manuša ništa na vaćerena.“ I osoba koja nekas našalđa verovatno na očekujini amendar te phena diso mudro. I Paula vaćeri: „Hijum le zahvalno ked me amala samo phenđe soj tano žao olenđe“ (w19.06 20 ¶1; 23 ¶14).

Ako ka oven zabranime amare aktivnostija, o starešine ka organizujinen o sastankija ađahar te na privucina bari pažnja. On šaj te phenen te ćeda amen ko tikne grupe hem šaj ka menjinen o vreme hem o than kuri ka ćeda amen. Ked vaćeri pe kotar propovedanje, o okolnostija razlikujinena pe kotar than ko than. Sebepi so mangaja e Jehova hem mangaja averenđe te vaćera ando e Devleso Kraljevstvo, amen ka arakha način sar te propovedina (Luka 8:1). I istoričarka, Emili Beran vaćeri ando e Jehovase svedokija ki Rusija: „Ked o vlastija zabraninđe e Jehovase svedokonenđe te propovedinen, tegani on vaćerđe pe komšijencar, pe kolegencar hem pe amalencar. Ked sebepi odova morandilje te đan ko logorija, uduri propovedinđe e manušenđe kola hine ko phanlipe.“ Iako hine zabrana, amare phralja odothe na ćhinavđe te propovedinen. Tu šaj te oponašine len! (w19.07 11 ¶12-13).

Sar šaj te pomožina e manušenđe kola nane religiozna te sikljon te mangen e Devle hem te oven e Hristese učenikija? Najangleder, valjani te haljova so e manušesi reakcija zavisini ando odova kuri ov barilo. Na primer, o manuša kotar Evropa na ka reagujinen ko isto način sar o manuša kotar Azija. Sose? Ki Evropa, but manuša đanena diso andi Biblija hem šunđe so o Devel sa stvorinđa. Ama, ki Azija, but manuša hari ja ništa na đanena andi Biblija hem na verujinena so isi Stvoritelj. Odolese ov pozitivno. Svako berš, o manuša kola na verujinđe ko Devel ovena e Jehovase svedokija. But đene ićerđe pe ko bare moralna merilija hem hine holjame upro e religijake vođe sose jekh vaćerena, a aver ćerena. A disave na ićerđe pe ko moralna merilija hem but olendar hine len lošna navike kola valjanđe te ćhinaven. Odolese so o Jehova pomožini amen, šaj te ova sigurna so ka arakha okolen kola ispravno dikhena ko večno đivdipe (Dela 13:48; 1. Tim. 2:3, 4; w19.07 20-21 ¶3-4).

Bilo te nadina amen so ka živina ko nebo ja ko raj ki phuv, amen valjani te da sa amendar te osvojina odija nagrada. So god valjani te nakha, na mangaja te mislina ko buća kola hine angleder, niti te mukha diso te ćhinavi amen te služina e Jehovase (Fil. 3:16). Šaj te dićhol so but ađićeraja ja na hijam odobor zorale, a ni terne. Šaj beršencar hijam ko problemija ja hijam progonime. Ama, so god te ovel, amen na mangaja te brinina amen nisose. Mangaja ki molitva sa te phena e Devlese hem ov ka del amen mir kova tano upreder i svako misao (Fil. 4:6, 7). Ked o cilj tano sa popaše, o trkači trudini pe sa pobuter. Isto ađahar, hem amen mangaja te da sa amendar te istrajina đi o krajo. Kobor god amare okolnostija dozvolinena amenđe, amen ka da sa amendar te dobina i nagrada (w19.08 7 ¶16-17).

Šaj na đaneja so te vaćere okolese kova našalđa nekas kas manglja. Disavo puti amare asva vaćerena pobuter kotar amare lafija. Ked e Isuseso amal o Lazar mulo, i Marija, i Marta hem avera hine len bari dukh sebepi so našalđe pe phrale hem pe amale. Štar dive palo odova, ked o Isus reslja, hem ov runđa iako đanđa so ka uskrsnini e Lazare (Jov. 11:17, 33-35). Odova so o Isus runđa mothovi sar o Jehova osetinđa pe odolese so o Lazar mulo. Odolestar dićhilo hem kobor o Isus manglja e Lazarese familija. Odova sigurno utešinđa e Marija hem e Marta. Isto ađahar, ked disavo phral ja phen osetini so mothovaja mangipe hem briga, tegani ov đanela so nane kokri nego oleja tane olese mangle amala. Podijekh puti valjani samo te šuna e phralen hem e phenjen. Mukh le te vaćeri sa so isi le ko vilo hem ma uvredin tut ako phenela diso so nane ko than (Jov 6:2, 3). Šaj isi le dodatno stres sebepi so olesi familija koja na služini e Jehovase ćhivela ole te ćerel diso so nane šukar. Molinen tumen zajedno. Roden okolestar „kova šunela o molitve“ te del le snaga hem mir (Ps. 65:2; w19.04 18-19 ¶18-19).

Bilo te služina ki punovremeno služba ko područje ja ko Betel, amaro mangipe premalo manuša ja čak premalo than kuri služinaja, šaj sigate te barjol. Odolese, amaro vilo šaj te ovel phago ked valjani te đa. Amenđe nedostajinena amare phralja hem phenja hem brininaja amen olenđe, posebno ako đeljam sebepi o progonstvo (Mat. 10:23; 2. Kor. 11:28, 29). Šaj te ovel but pharo te đa ko aver than, sebepi so mora te sikljova i nevi kultura. Isto ađahar, šaj te ovel pharo čak ked irinaja amen ćhere. Disave sebepi o promene šaj iznenada te ovel len finansijska problemija. Tegani, šaj te oven obeshrabrime ja šaj te osetinen pe so nane sigurna ja bezbedna. So šaj te pomožini len? Aćhov paše e Jehovaja (Jak. 4:8). Sar šaj te ćera odova? Ađahar so ka ovel amen poverenje upro „okova so šunela o molitve“ (Ps. 65:2). O Jehova šaj te ćerel „pobuter kotar sa so molinaja le ja zamislinaja“ (Ef. 3:20). O Jehova na samo so ka del amen odova so molinaja le ki molitva, već šaj te rešini amare problemija ko način kova niked na ađićerđam (w19.08 21 ¶5-6).

Disave manuša verujinena so o nuklearno maribe ja i prirodno katastrofa ka uništini o sveto. Ama, i Biblija na sikavi odova. Koro late pisini so pana hari ka ovel jekh maribe kova ka anel šukar buća. Akava maribe vićini pe Armagedon. Odova so i Biblija vaćeri ando akava maribe valjani te anel amenđe bahtalipe (Otkr. 1:3). Ko Armagedon o čovečanstvo na ka ovel uništimo, nego ka ovel spasimo. Sar ka ovel odova? Ađahar so o manušikane vladavine ka oven uništime. Odova maribe ka spasini e manušen ađahar so ka uništini e lošnonen hem ka arakhi e pravednonen. Isto ađahar, o manuša ka oven spasime, ađahar so amari planeta na ka ovel uništimi (Otkr. 11:18). O lafi „Armagedon“ pojavini pe samo jekh puti ki Biblija. Odova lafi avela kotar hebrejsko ćhib so značini „megidsko brego“ (Otkr. 16:16, fusn.). O Megido hine diz ko purano Izrael (Is. Nav. 17:11). Ama, o Armagedon nane nav kotar disavo doslovno than ki phuv. Odova odnosini pe ki situacija ked sa o kraljija ki phuv ka ćeden pe te borinen pe protiv o Jehova (Otkr. 16:14; w19.09 8 ¶1-3).

Jekha romnjaće valjanđa pomoć. Oj đelji ko but doktorija, sose mislinđa so ka pomožinen la. Patinđa 12 berš, ama niko naštinđa te pomožini la. Premalo Zakon, oj na hine čisto (Lev. 15:25). Palo odova, šunđa so o Isus saćari e nabormen hem đelji te rodel le. Ked arakhlja le, oj pipinđa o krajo ando leso fistani hem odmah saćilji. Ama, o Isus na saćarđa samo olako telo. Sebepi o način sar ponašinđa pe premalo late, oj osetinđa oleso mangipe hem poštovanje. Na primer, ked vaćerđa olaja, ov mothovđa so mangela la hem so poštujini la, ađahar so vićinđa la „mi ćhaj“. Akala lafija sigurno dinđe la nevi snaga hem zorjaćerđe la (Luka 8:44-48). Dikhaja so i romni đelji ko Isus hem trudinđa pe te arakhi le. Isto hem avdije, hem amen valjani te trudina amen te ava koro Isus. Đanđola pe, o Isus na ka ćerel čudo te saćari okolen kola avena koro leste. Ama, odova poziv pana važini: „Aven koro mande [...] hem me ka dav tumen nevi snaga“ (Mat. 11:28; w19.09 20 ¶2-3).

O prorok Zaharija pisinđa diso slično kotar i budućnost. Ov pisinđa: „Ko odova vreme deš manuša kotar sa o ćhibja kola vaćerena o narodija ka dolen jekhe Judejco kotar fistani hem ka vaćeren: ’Đaja tumencar, sose šunđam soj tano o Devel tumencar’“ (Zah. 8:23). E Jehovase svedokija haljona so valjani te propovedini pe ko but ćhibja te šaj te ćeden pe o manuša kotar sa o ćhibja. Avdije, više nego iked angleder, o publikacije prevodinena pe ko but ćhibja. Ćaće, o Jehova ćerela najbaro čudo avdije – ćedela e manušen ando sa o narodija. Odolese so i duhovno hrana isi ko but ćhibja, sare amen ko jekhipe služinaja e Jehovase, iako avaja kotar celo sveto. E Jehovaso narodo penđari pe palo mangipe hem palo odova so propovedini. Odova ćaće ćerela amari vera te ovel pozorali (Mat. 24:14; Jov. 13:35; w19.09 30-31 ¶16-17).

Ki bari nevolja, o manuša ka oven šokirime ked ka dikhen so počmini te propadini sa odova so mislinđe so ka trajini večno. On ka oven ko „pharipa“ hem ka daran pe đivdipase ko odova najlošno vreme kova ka ovel ki manušikani istorija (Sof. 1:14, 15). Ko odova vreme, o đivdipe verovatno ka ovel pana popharo čak hem e Jehovase slugenđe. Odolese so na hijam deo ando akava sveto, ka ovel amen disave pharipa. Šaj na ka ovel amen odova so ka valjani amenđe. O „verno hem o razborito robo“ ko nekobor načinija pripremini amen te aćhova verna ki bari nevolja (Mat. 24:45). Na primer, prekalo amare regionalna kongresija kola hine kotar 2016-2018. berš. Ko odola kongresija dikhljam sar šaj te zorjaćera o osobine kola valjanena amenđe sar tano e Jehovaso dive sa popaše (w19.10 14 ¶2; 16 ¶10; 17 ¶12).

Ked nakhavđam i hrana so haljam, amen našti te birina sar oj ka utičini ko amaro telo. I šukar hrana šaj te ćerel te ova posaste, ama i nezdravo hrana ka ćerel te ova naborme. O rezultatija na ka dićhon odmah, ama palo disavo vreme sigurno ka dićhon. Isto ađahar, ked birinaja amari zabava, amen šaj te kontrolišina so ka mukha te khuvel ki amari godi. Palo odova, i zabava koja birinđam ka utičini ko amaro način sar razmislinaja hem sar osetinaja amen. I šukar zabava šaj te ćerel te osetina amen pošukar, ama i zabava koja nane šukar, lošno ka utičini upro amende (Jak. 1:14, 15). Iako o posledice šaj na ka dikhen pe odmah, on sigurno ka oven. Odolese, i Biblija upozorini amen: „So o manuš ka sejini, odova hem ka ćedel. Ko sejini ko poklo telo, ando telo ka ćedel i propast“ (Gal. 6:7, 8). Odolese, važno tano te cida amen andi zabava ki koja isi buća kola o Jehova mrzini (Ps. 97:10; w19.10 30 ¶12-14).

O Jehova mothovđa so mangela amen ađahar so dinđa pekle Ćhave sar žrtva amenđe (Jov. 3:16). Sar šaj te mothova mangipe sar o Jehova? Amare phralen hem phenjen dikhaja sar but vredna hem radosno prihvatinaja okolen kola irinena pe e Jehovase (Ps. 119:176; Luka 15:7, 10). Amaro mangipe mothovaja ađahar so trošinaja amaro vreme hem snaga olenđe, posebno ked pomožinaja len ked tane ko pharipe (1. Jov. 3:17). O Isus zapovedinđa pe učenikonđe te mothoven samopožrtvovano mangipe (Jov. 13:34, 35). E Isusesi zapovest tani nevi odolese so rodela amendar te mothova mangipe ko način kova na hine mothovdo ko zakon kova o Devel dinđa e Izraelcenđe. Ov phenđa so mora te manga amare phralen hem phenjen, isto sar o Isus so manglja amen. Te šaj te ćera odova valjani te mothova samopožrtvovano mangipe. Valjani te manga amare phralen hem phenjen čak više nego so mangaja kokri amen. Mora te manga len odobor but so hijam spremna te da amaro đivdipe olenđe sar so o Isus ćerđa amenđe (w19.05 4 ¶11-13).

Te šaj o sveti duh te pomožini amen, valjani te ova uporna đi molinaja amen (Luka 11:13). E Isuseso poređenje ko Luka 11:5-9 pomožini amen te dikha sose o Jehova dela amen poklo sveti duh. O manuš ando e Isuseso poređenje manglja te ovel šukar domaćini. Ov đanđa so valjani te del habe pe gostose kova alo raćate, ama na hine le ništa so te del le. O Isus phenđa so oleso amal dinđa le maro sebepi so hine uporno. So o Isus manglja te sikavi amen? Ako jekh nesavršeno manuš tano spremno te pomožini pe amalese kova tano uporno, kobor pana pobuter amaro nebesko Dad ka mangel te pomožini okolenđe kola uporno ki molitva rodena oleso sveti duh. Odolese šaj te ova sigurna so o Jehova ka šunel amare molitve ked amen rodaja oleso sveti duh (Ps. 10:17; 66:19). Amen šaj te ova sigurna so šaj te istrajina, iako o Beng niked na ka ćhinavi te napadini amen (w19.11 13 ¶17-19).

O Isus đanđa so podijekh puti ov hem olese apostolija valjanđe te odmorinen pe. Ama, but manuša hem tegani hem avdije tane sar o manuš kotar e Isusesi priča. Odova manuš kokri pese phenđa: „Odmorin tut, ha, pi, uživin“ (Luka 12:19; 2. Tim. 3:4). Ov mislinđa so o najvažna buća ko đivdipe tane o odmor hem o zadovoljstvija. Ki aver strana, e Isusese hem olese apostolenđe o zadovoljstvija na hine ko prvo than. Avdije, amen šaj te ćera odova so ćerđa o Isus. Ked na hijam ki buti, amen na koristinaja amaro vreme samo te odmorina amen, nego hem te propovedina hem te đa ko sastankija. Akala duj buća tane odobor važna amenđe, so amen ka ćera so god valjani te šaj redovno te učestvujina ko akala aktivnostija (Jevr. 10:24, 25). Čak ked hijam ko odmor, amen mangaja te đa ko amare sastankija hem te koristina svako prilika te vaćera i šukar vest (2. Tim. 4:2; w19.12 7 ¶16-17).

O Jehova mukhela amen te odlučina sar ka živina. Ov sikavi amen sar te ana šukar odluke hem ako anaja odluke kola radujinena le, ov pomožini amenđe te ova uspešna (Ps. 119:173). So pobuter koristinaja o mudra savetija ando e Devleso Lafi, amen ka ana pošukar odluke (Jevr. 5:14). Čak hem ako anđam šukar odluka, šaj tano pharo te završina odova so počminđam. Hajde te dikha disave primerija: Jekh terno phral odlučinđa te čitini celo Biblija. Nekobor kurće đelo lese šukar, ama palo odova ćhinavđa. Jekh phen odlučinđa te ovel stalno pioniri, ama uvek pomerini o datum ked valjani te počmini. O starešinstvo ki jekh skupština odlučinđa so pobuter ka đan ko pastirska posete ko phralja hem ko phenja, ama nakhlje nekobor masekija, a on pana na đelje koro lende. Akala situacije tane različita, ama o problemi tano isto. O manuša anena o odluke, ama na ćerena odova so odlučinđe (w19.11 26 ¶1-2).

O Isus phenđa so o vreme ko kova amen živinaja tano slično sar „e Nojese dive“ hem ćaće amen živinaja „ko poslednja dive“ ked o vreme tano but pharo (Mat. 24:37; 2. Tim. 3:1). Odolese, disave parija odlučinđe hari pokasnije te ovel len ćhave, a akana te den sa pestar pobuter te služinen e Jehovase. Ked odlučinena da li ka ovel len ćhave hem kobor ćhave ka ovel len, o mudra parija najangleder „bešena te računinen“ kobor ka koštini len odova (Luka 14:28, 29). Sare kola isi len ćhave đanena so na valjani samo pare te šaj te barjaćeren pe o ćhave, nego valjani hem vreme hem snaga. Odolese, šukar tano jekh par te pućel pe: Te šaj te ovel amen sa so valjani amare porodicaće, da li valjani solduj đene te ćera buti? Da li složinaja amen kola buća ćaće valjanena amare porodicaće? Ako solduj đene valjani te ćeren buti, tegani ko ka arakhi e ćhaven? Ko ka sikavi len sar te razmislinen hem so te ćeren? O parija kola angleder vaćerena akalestar, mothovena so šunena o savet kova tano ko avdisutno citati (w19.12 23-24 ¶6-7).

But putija o apostol Pavle doživinđa bare pharipa (2. Kor. 11:23-28). Isto ađahar, ov hine le „karo ano telo“, kova šaj hine disavo nabormipe koleja borinđa pe (2. Kor. 12:7). Jekhvar hine but obeshrabrimo sebepi o Dimas. On duj jekh vreme zajedno služinđe, ama o Dimas aćhavđa le „sose manglja o buća soj tane ko sveto“ (2. Tim. 4:10). O Pavle hine jekh ando pomazana phralja hem hrabro služinđa e Devlese. Ov dinđa sa pestar te pomožini averenđe, ama podijekh puti hem ov hine obeshrabrimo (Rimlj. 9:1, 2). O Pavle hine utešimo hem zorjaćerdo. Sar? O Jehova koristinđa poklo sveti duh te zorjaćeri le (2. Kor. 4:7; Fil. 4:13). Isto ađahar, o Jehova zorjaćerđa le prekalo avera phralja hem phenja. Disave phralendar o Pavle phenđa so on pomožinđe le hem zorjaćerđe le (Kol. 4:11). Disave olendar hine o Aristarh, o Tihik hem o Marko. On pomožinđe e Pavlese te aćhol verno hem but putija zorjaćerđe le (w20.01 8 ¶2-3).

O Isus phenđa so nekase kova nane pomazimo tano pharo te objasnini pe so značini te ove „palem bijando“ ja te ove „bijando ando duho“ (Jov. 3:3-8). Sar odola hrišćanija počminena averćhane te razmislinen ked ovena pomazime? Angleder te oven pomazime, on radujinđe pe so šaj te živinen ki phuv. On hine bahtale sose đanđe so pana hari ka avel o vreme ked o Jehova ka uništini sa o lošnipe hem ka ćerel ki phuv te ovel raj. Šaj razmislinđe odolestar, sar ađićerena nekas andi olengi porodica ja ando amala te uštel ando grobo. Ama, ked hine pomazime, počminđe averćhane te razmislinen. Sose alo đi odova? O razlog na hine odova so na hine zadovoljna odoleja so ka živinen ki phuv. Olengi nada na menjinđa pe odolese so hine len stres ja bare problemija. Na počminđe te mislinen so o večno đivdipe ki phuv ka ovel dosadno. Umesto odova, o Jehova prekalo poklo sveti duh menjinđa o način sar razmislinena hem menjinđa olengi nada (w20.01 22 ¶9-11).

Premalo e Mojsijeso zakon, o naimenovana murša na rešinđe samo o buća kola hine povezime e duhovno bućencar, nego hem razna sukobija hem prestupija. Ama, o starešine kola akana ićerena pe ko e Hristeso zakon, rešinena samo o slučaja kola tane povezime e duhovno bućencar (Gal. 6:2). On priznajinena so o vlastija valjani te rešinen o građanska hem o krivična buća. Akava uključini hem o pravo te odredini pe kobor ka platinen pe o kazne ando phanlipe (Rimlj. 13:1-4). So valjani te ćeren o starešine ked neko ki skupština ćerđa ozbiljno greh? On koristinena i Biblija te razmotrinen i situacija hem te anen odluka. Ama, uvek isi len ki godi so e Hristeso zakon tano temeljimo ko mangipe. O mangipe podstaknini e starešinen te dikhen so valjani te ćeren te šaj te pomožinen e phralese ja e phenjaće premalo kaste hine ćerdo odova prestup. O mangipe ka podstaknini e starešinen, đi razmislinena ando okova so ćerđa greh, te pućen pe akala pućiba: Da li ov kajini pe? Da li šaj te pomožini pe olese te ovel le palem šukar odnos e Jehovaja? (w19.05 7 ¶23-24).

O Isus phenđa so ando oleso Dad avela o đivdipe hem so ov brinini pe ando olese potrebe, ked phenđa o lafija ando avdisutno citati. Ov hine le baro poverenje upro poklo Dad, a o Jehova brininđa pe ando olese fizička potrebe. Soj tano najvažno, o Jehova brininđa pe ando e Isusese duhovna potrebe (Mat. 4:4). Isto ađahar, o Jehova brinini pe ando amare duhovna potrebe, ađahar so dela amen odova so valjani amenđe te šaj te ova paše oleja. Prekalo poklo Lafi, ov mothovđa amenđe koj tano ov, so mangela te ćerel e manušencar hem e phuvjaja, sose ćerđa amen hem so anela amenđe i budućnost. Ked počminđam te proučina, ov mothovđa so brinini pe amendar ađahar so koristinđa amare roditeljen ja averen te pomožinen amen te penđara le. Isto ađahar, prekalo starešine hem prekalo amare zrela phralja hem phenja ov pomožini amen te aćhova paše oleja. Uzo odova, ov sikavi amen prekalo sastankija kuri zajedno sikljovaja amare phralencar hem phenjencar. Ko asavke hem avera načinija, o Jehova mothovi amenđe so brinini pe amendar sar jekh dad (Ps. 32:8; w20.02 3 ¶8; 5 ¶13).

Kuri isi zavist, našti te ovel mir. Amen valjani te ikala i zavist ando amaro vilo hem te na da nijekh razlog averenđe te oven zavidna. Sar ko konkretna načinija šaj te pomožina averenđe te na oven zavidna hem sar šaj te barjaćera o mir? Amaro stav hem amare delija šaj te ovel len baro uticaj upro avera. O sveto podsticini amen te „hvalina amen“ e bućencar kola isi amen (1. Jov. 2:16). Ama, asavko stav barjaćeri i zavist. Ako na mangaja avera te oven zavidna, na valjani te vaćera kotar o buća kola isi amen ja kola mangaja te ćina. Isto ađahar, odoleja so mothovaja skromnost kola god zaduženja isi amen ki skupština, pomožinaja averenđe te na oven zavidna. Ako često vaćeraja kotar amare zaduženja ki skupština, amen mukhaja i zavist te barjol ko olengo vilo. Ama, ked mothovaja so brininaja amen averendar hem so ceninaja olengi buti, tegani ka pomožina averenđe te osetinen pe zadovoljno hem odoleja ka barjaćera o jekhipe hem o mir ki skupština (w20.02 18 ¶15-16).

Tu šaj te sikljove pobuter ando Jehova prekalo odova so stvorinđa (Otkr. 4:11). Razmislin sar o biljke hem o životinje kola o Jehova stvorinđa mothovena kobor tano ov mudro. Sikljov hari odolestar sar tano ćerdo toklo telo (Ps. 139:14). Razmislin kobor bari energija isi le amaro kham, a o kham tano samo jekh kotar o milijarde zvezde kola o Jehova stvorinđa (Is. 40:26). So pobuter razmislineja ando sa so o Jehova stvorinđa, pobuter ka poštujine le. But tano važno te đane so o Jehova tano mudro hem moćno Devel. Ama, te šaj te barjaćere to mangipe premalo Jehova hem te ove paše amal oleja, valjani te đane pobuter olestar. Valjani te ove uverimo so o Jehova brinini pe lično tuće. Ma bistri so „ako rodeja le, ka mukhel tut te arakhe le“ (1. Let. 28:9). O Jehova privucinđa tut koro peste (Jer. 31:3). So pošukar haljoveja hem so pobuter cenineja sa so o Jehova ćerđa tuće, to mangipe premalo oleste ka ovel sa pobaro (w20.03 4 ¶6-7).

E Pavlese i služba hine ko prvo than hem ov aćhavđa but šukar primer amenđe. Ked hine ko Korint, đi trajinđa oleso dujto misionarsko putovanje, na hine le dovoljno sostar te živini, pa jekh vreme ov ćerđa buti ađahar so ćerđa šatorija. Ama, odija buti na hine olese najvažno. Ov ćerđa odija buti te šaj te ovel le odova so valjani olese hem te šaj te vaćeri o šukar haberi e Korintskonenđe „bizo te platinen diso“ (2. Kor. 11:7). Iako o Pavle valjanđa te ćerel buti, ov i dalje ćhivđa i služba ko prvo than hem odolese propovedinđa svako sabat. Palo odova ked olese okolnostija promeninđe pe, o Pavle šaj hine te del „sa pestar te propovedini o lafi, ađahar so svedočinđa e Judejcenđe so o Isus tano ćaće Hrist“ (Dela 18:3-5; 2. Kor. 11:9). Palo odova, ked ko Rim hine duj berš phanlo ko ćher, ov svedočinđa okolenđe kola alje te posetinen le hem pisinđa lila e skupštinenđe (Dela 28:16, 30, 31). Na mukhlja ništa te ovel lese považno kotar i služba (w19.04 4 ¶9).