Decembar

Ako na kontrolišinaja amaro vaćeriba, amare lafija šaj te ćeren but problemija. Na primer, ako resaja nekas ko živini ki phuv kuri tano amaro delo zabranimo, da li hijam ko iskušenje te puća le te vaćeri amenđe ando odova sar ćerela pe amaro delo ki odija phuv? Sigurno isi tut šukar namera ked odova pućeja. Amen mangaja amare phralen hem brininaja amen olendar. Isto ađahar, mangaja te molina amen e Jehovase aso konkretna buća kola valjanena lenđe. Ama, odova tano vreme ked na vaćeraja but. Ako terinaja nekas te phenel amenđe odova soj tano poverljivo, na mothovaja mangipe – ni premali odija osoba ni premalo phralja hem phenja kola uzdajinena pe upro leste so ov na ka phenel odova. Šaj te phena, so niko amendar na mangela te ćhivel e phralen hem e phenjen, kola živinena ko phuvja kuri tano amaro delo zabranimo, ki pana pophari situacija. Isto ađahar, o phralja kola služinena ko odola phuvja na ka vaćeren ando detaljija sar amare phralja uduri đana ki služba hem sar ićerena o sastankija hem o kongresija (w20.03 21 ¶11-12).

E Devlesi namera na hine o manuša te meren. Ama te šaj te živinen večno, o Adam hem i Eva valjanđe te šunen e Jehova kova dinđa len jekh lokhi zapovest: „Ando kaš penđaribase o šukar hem o lošno ma te has olestar, sose odova dive ked ka has olestar, sigurno ka mere“ (Post. 2:16, 17). Tegani o Beng počminđa te ćerel problemija. Ov prekalo sap vaćerđa e Evaće okova so pisini ko avdisutno citati. Nažalost, i Eva verujinđa ko odova hovajbe. Lelja odova plod, a palo odova hem o Adam lelja (Post. 3:6). Ađahar o greh hem o meribe počminđe te oven deo kotar amaro đivdipe (Rimlj. 5:12). Sar so phenđa o Devel, o Adam hem i Eva mulje tane. Ama o Beng na aćhilo ko odova. Sar đelo o vreme ov smislinđa hem avera hovajba kotar meribe. Jekh olendar tano so ked e manušeso telo merela, jekh deo kotar odova manuš nastavini te živini, šaj sar duh. Đi avdisutno dive ov hovavi e manušen ađahar so koristini razna hovajba (1. Tim. 4:1; w19.04 14-15 ¶3-4).

O ćhavore na đanena te razmislinen hem šukar te haljon o buća sar o bare manuša. On na haljona ked tane ki opasnost hem ked valjani te našen andi opasnost. Odolese, e lošno manušenđe tano but lokho te iskoristinen len. Okova so zlostavini e ćhavore, vaćeri lese razna hovajba. Na primer, soj tano ov kokri krivo sebepi odova so ulo hem so odova niko na valjani te đanel. Isto ađahar, so niko na ka verujini lese hem so niko na ka pomožini le. Ov šaj te phenel lese so o seksualna radnje maškaro baro manuš hem o ćhavoro tano normalno način te mothovi pe o iskreno mangipe. E ćhavorese ka valjani but berša palo odova te haljol so sa odova hine hovajba. Ka barjol mislindoj so oleja diso nane šukar hem so na zaslužini o mangipe hem uteha. Akava pomožini amen te haljova sose odova ćhavoro kova hine zlostavimo šaj te patini beršencar palo odova. Živinaja ko poslednja dive ked o manuša tane „bizo vilo“ hem ked „o lošna hem o hovavne manuša ka oven ando lošna pološna“ (2. Tim. 3:1-5, 13; w19.05 15 ¶7-8).

Sar o Isus sikavđa? Sar prvo, ov sikavđa e manušen lafencar. Olese lafija hine len moć sose mothovđe o ćaćipe kotar Devel, objasninđe sose hijam stvorime, hem mothovđe so e Devleso Kraljevstvo ka rešini sa e manušenge problemija (Luka 24:19). Isto ađahar, o Isus sikavđa pekle primereja. Odoleja sar živinđa, ov mothovđa pe učenikonđe sar on valjani te živinen (Jov. 13:15). Ked o Isus sikavđa? Đi hine ki Phuv (Mat. 4:23). Isto ađahar, ov sikavđa pe učenikon sigate palo poklo uskrsenje. Na primer, ov pojavinđa pe angli jekh bari grupa kuri hine prekalo 500 učenikija hem zapovedinđa lenđe te ćeren učenikon (Mat. 28:19, 20; 1. Kor. 15:6). Sar poglavari ki skupština, o Isus nastavinđa te sikavi pe učenikon palo odova so irinđa pe ko nebo. Na primer, koro 96. berš ki a. e, o Isus prekalo apostol Jovan ohrabrinđa hem savetujinđa e pomazanikon (Kol. 1:18; Otkr. 1:1; w19.05 3 ¶4-5).

Avdije nane lokho te zaradini pe đivdipase. Amare phralja valjani te ćeren but buti te šaj te ovel len so te han, so te uraven hem kaj te bešen. A averenđe svako dive đala po nekobor satija te đan đi i buti hem te irinen pe. But olendar ćerena phari buti. Ko krajo e diveso, odola bućarne phralja hem phenja tane ćaće but umorna. Odolese, nane len snaga te proučinen. Ama, i buti tani so amen mora te arakha vreme te proučina, hem odova šukar te proučina e Devleso Lafi hem amare publikacije. Amaro amalipe e Jehovaja hem o večno đivdipe zavisini odolestar! (1. Tim. 4:15, 16). Disave svako sabaj uštena rano hem proučinena, sose tegani ko ćher nane galama hem nane umorna. Avera ko krajo e diveso odvojinena nekobor minutija te šaj te čitinen diso ki mira hem te razmislinen odolestar (w19.05 26 ¶1-2).

Akala promene na avena kotar jekhvar ja bizo te trudina amen. Amen valjani te trudina amen beršencar (2. Petr. 1:5). Valjani te da sa amendar te menjina odova save hijam andral. I prvo važno buti tani i molitva. Amen valjani te molina amen sar so molinđa pe o psalmista: „Ćer ano mande, Devla, čisto vilo, hem ćhiv ano mande nevo duho, zoralo duho“ (Ps. 51:10). Amen valjani te priznajina so valjani te menjina amaro način sar razmislinaja hem valjani te molina amen e Jehovase te pomožini amen. I dujto važno buti tani hor te razmislina. Đi čitinaja e Devleso Lafi svako dive, amen valjani te odvojina vreme hor te razmislina odolestar so čitinaja, te šaj te dikha so valjani te menjina koro amende (Ps. 119:59; Jevr. 4:12; Jak. 1:25). Amen valjani te penđara da li akale svetosi mudrost utičinđa ko amare mislija hem osećanja. Isto ađahar, valjani te priznajina amenđe kola tane amare mane hem palo odova te da sa amendar te menjina amen (w19.06 8 ¶1; 10 ¶10; 12 ¶11-12).

Ked aneja disavi odluka, tu valjani te birine o vreme ked ka ćere odova so odlučinđan hem ma menjin le. Ma ađićer o okolnostija te oven savršena pa te počmine te ćere odova so phenđan, sose sigurno niked na ka ovel tut savršena okolnostija (Prop. 11:4). Pazin o buća kola nane važna te na len to vreme hem ti snaga koja valjani tuće te ćere o považna buća (Fil. 1:10). Ako šaj, birin o vreme ked avera na ka ćhinaven tut ko odova so ćereja. Vaćer averenđe so valjani tuće vreme te ove kokri. Isključin to telefoni hem proverin te poruke pokasno. Odova šaj te uporedina sar ked pođinđan ko drumo hem mangeja te rese ko jekh than. Ako ćaće mangeja te rese ko odova than, tegani o phanlo drumo na ka ćhinavi tut. Tu ka arakhe aver drumo. Ako razmislineja kola šukar buća ka ovel tut sebepi i odluka koja anđan, tegani na ka odustajine odobor lokho ked ka ovel tut pharipa (Gal. 6:9; w19.11 30 ¶17-18).

So valjani te ovel o najvažno razlog sebepi kova valjani te krstine tut? Đi temeljno proučinđan i Biblija, sikljiljan but buća ando Jehova – savo tano ov hem sar postupini. Odova so sikljiljan olestar utičinđa ko to vilo hem podstakninđa tut te mange le but. Odolese, o najvažno razlog sose valjani te krstine tut tano sose mangeja e Jehova. Ti odluka te krstine tut tani isto ađahar temeljimi hem ko e biblijake sikljoviba ko kola tu verujineja. Dikh so phenđa o Isus ked dinđa amenđe i zapovest te ćera učenikonen (Mat. 28:19, 20). Premalo e Isusese lafija, o krštenje valjani te ćerel pe „ko e Dadeso, e Ćhaveso hem e sveto duhoso anav.“ So značini odova? Valjani celone vileja te verujine ko e biblijake sikljoviba ando Jehova, ando Isus hem ando sveti duh. Akala sikljoviba tane but važna hem šaj hor te utičinen ko to vilo (w20.03 9 ¶8-9).

O Jehova na bićhalđa e anđelen samo te upozorinen e Lote, nego hem te pomožinen le te na desini pe olese o pharipa kola ulje ko Sodom (Post. 19:12-14, 17). Isto ađahar, amen šaj ka valjani te upozorina amare phrale ako dikhaja so ćerela diso so šaj te anel lese problemi. Čak, ako na prihvatini odmah o savet andi Biblija kova dobinđa, amen valjani te ova strpljiva. Ov sar odola duj anđelija. Ma vazde te vasta kotar to phral, nego pomožin le, na samo lafencar nego hem ćer diso (1. Jov. 3:18). Amen šaj ka valjani, samći te dola le kotar vas, hem te pomožina le te šunel o šukar savet kova dobinđa. O Jehova šaj hine te dikhel samo e Lotese mane. Ama, ov prekalo Petar dinđa te pisini pe ki Biblija so o Lot hine pravedno manuš (Ps. 130:3). Šaj li te dikha ko avera odova so o Jehova dikhlja ko Lot? Ako amen dikhaja o šukar osobine kola isi len amare phralja hem phenja, ka mothova pobaro strpljenje premalo olende. Tegani hem olenđe šaj ka ovel polokho te prihvatinen amari pomoć (w19.06 21 ¶6-7).

Ako o vlastija ki phuv kaj živineja zabraninena amare aktivnostija, šaj razmislineja ando odova te seline tut ki aver phuv kuri šaj slobodno te služine e Jehovase. Svako amendar valjani kokri pese te odlučini. Disave mislinena so ki odija odluka šaj te pomožini len ako razmislinena so ćerđe o hrišćanija ko prvo veko ked hine progonime. O učenikija ando Jerusalim selinđe pe ki Judeja hem ki Samarija. A disave đelje čak ki Fenikija, ko Kipar, hem ki Antiohija (Mat. 10:23; Dela 8:1; 11:19). Ama, ked aver puti alo pana jekh progonstvo, o Pavle odlučinđa te aćhol odothe kaj o manuša protivinđe pe, sebepi o šukar haberi, iako hine but opasno (Dela 14:19-23). So sikljovaja ando akala izveštaja? Svako poglavari tano odgovorno pe porodicaće hem valjani te odlučini da li ka selinen pe ja na. Angleder so ka anel i odluka, valjani te molini pe, šukar te razmislini ko save okolnostija tani olesi porodica hem kola šukar ja lošna buća šaj te oven ako selinena pe. Na ismina te osudina averen, sebepi i odluka koja anđe (w19.07 10 ¶8-9).

O Isus phenđa amenđe „đan hem ćeren e učenikonen ando manuša kotar sa o narodija“ (Mat. 28:19). Uzo odova so okole kasa proučinaja sikavaja so o Isus rodela kotar pekle učenikija, amen valjani te pomožina le hem te đanel sar te živini sar pravo hrišćanin. Valjani strpljivo te pomožina le đi borini pe te primenini e biblijake načelija ko po đivdipe. Disave šaj te meninen po način sar razmislinena hem pe navike palo nekobor masekija, a averenđe valjani pobuter vreme. O iskustvo kova hine le jekh misionari ko Peru, pomožini amen te haljova kobor tano važno te ova strpljiva. Ov phenela: „Proučinđum duj knjige e manušeja kova vićini pe Raul. Ama, ov pana hine le bare problemija ko poklo đivdipe. Hine le bare problemija ko brak, but akošlja hem olese ćhave na poštujinđe le sebepi oleso ponašibe. Ama, ov redovno alo ko sastankija hem odolese nastavinđum te posetinav le te šaj te pomožinav olese hem olese porodicaće. Palo trin berš, ov ispuninđa o uslovija te krstini pe“ (w19.07 15 ¶3; 19 ¶15-17).

Razmislin, so o apostol Pavle sa ćerđa ked pisinđa e hrišćanenđe ko Filipi. Ov hine ko Rim, phanlo ko jekh ćher. Naštinđa te đal avri te propovedini. Ama, propovedinđa okolenđe so alje te posetinen le hem pisinđa o lila e skupštinenđe, kola hine dur. Sar o Hrist, hem o Pavle đanđa so valjani but te trudini pe. Odolese, ov uporedinđa o đivdipe ando jekh hrišćanin jekhe trkaja (1. Kor. 9:24-27). Jekh trkači tano usredsredimo ko cilj hem na mukhela nisose te cidel olesi pažnja. Na primer, i trka šaj te ovel ko drumo kuri isi but prodavnice hem avera buća kola šaj te ciden i pažnja kotar trkačija. Da li mislineja so jekh trkači ka terđol uzi prodavnica te dikhel so isi andre? Na, ako mangela te pobedini! Ki trka e đivdipase, hem amen na isminaja te mukha bilo so te cidel amari pažnja. Ako amaro cilj tano anglo amende hem ako daja sa amendar sar o Pavle, tegani i nagrada ka ovel amari! (w19.08 3 ¶4; 4 ¶7).

Ked odlučinđam te šuna e Devle, amen meninđam amaro đivdipe hem odova ko so verujinaja. Odolese, amare porodicaće šaj te ovel but pharo te prihvatinen odola promene. Odova so prvo dikhena tano so amen više na slavinaja o praznikija olencar hem so na mešinaja amen ki politika. Sebepi odova, ko početko šaj te holjanen upro amende (Mat. 10:35, 36). Ama, na valjani te mislina so on niked na ka meninen pe. Ako amen na trudinaja amen te pomožina len te haljon odova ko so amen verujinaja, tegani šaj te dićhol so amen anđam i odluka so o večno đivdipe nane olenđe. O Jehova e Isusese dinđa te ovel sudija, a na amenđe (Jov. 5:22). Ako hijam strpljiva, neko kotar amari familija šaj ka šunel i šukar vest. Amen valjani te ova ljubazna, ama na mangaja te mukha nikase te menini amari odluka, čak ked hijam ko pharipa (1. Kor. 4:12b).Valjani vreme te šaj amari porodica te haljol kobor tano amenđe važno te služina e Jehovase (w19.08 17 ¶10, 13; 18 ¶14).

„Ked razmislinava so sa nakhljum, đanava so me snagaja niked na bi šaj odova te ćerav.“ Da li dijekhvar phenđan akava? But amendar phenđe. Šaj akava phenđan palo odova so borinđan tut disave bare nabormipaja, ja mulo tutar neko kas but mangljan. Ked razmislineja ando akala problemija, haljoveja so tu šajinđan te ikljove ko krajo olencar samo sebepi so e Jehovaso sveti duh dinđa tut „but bari snaga“ (2. Kor. 4:7-9). Isto ađahar, amenđe valjani o sveti duh te pomožini amen te borina amen protiv akale svetoso lošno uticaj (1. Jov. 5:19). Uzo odova, amenđe valjani snaga te borina amen protiv „o lošna duhovna sile“ (Ef. 6:12). E Jehovaso sveti duh pomožini amen ađahar so dela amen snaga ja zoralipe te ispunina amare odgovornostija, iako isi amen pharipa. Iako hine le problemija, o apostol Pavle haljilo so ov šaj hem ponodri te služini e Jehovase, sebepi so osloninđa pe ki „e Hristesi sila“ (2. Kor. 12:9; w19.11 8 ¶1-3).

I Biblija tani jedino tačno knjiga koja objasnini so o Isus ćerđa tuće. Barjaćer to mangipe premalo Isus, hem to mangipe premalo Jehova ka ovel pobaro. Sose? Odolese so o Isus savršeno oponašinđa pe Dadese osobine. So pobuter sikljoveja kotar o Isus, pana pošukar ka haljove e Jehova hem pana pobuter ka cenine le. Razmislin kobor o Isus hine saosećajno premalo manuša kolen avera mrzinđe sebepi so hine ćorore, naborme hem bespomoćna. Isto ađahar, razmislin kotar o praktična savetija kola ov dela tuće hem sar to đivdipe ovela pošukar keda šuneja le (Mat. 5:1-11; 7:24-27). To mangipe premalo Isus verovatno ka ovel pana pobaro đi razmislineja kotar i otkupno žrtva koja o Isus dinđa te šaj te oven oprostime amare grehija (Mat. 20:28). Ked haljoveja so o Isus hine spremno te merel tuće, odova ka podstaknini tut te pokajine tut hem te rode oproštaj kotar o Jehova (Dela 3:19, 20; 1. Jov. 1:9). So pobuter mangeja e Isuse hem e Jehova, sa pobuter ka mange te ove e manušencar kola isto ađahar mangena len (w20.03 5-6 ¶10-12).

Jekh hrišćanin šaj te počmini te razmislini so jedino ov šaj te ćerel disavo zaduženje ki skupština. Ja jekh phen šaj te mislini so olako rom šaj te ćerel nesavo zaduženje but pošukar nego aver phral. Ama, ako hijam ćaće ponizna, na ka ovel amen asavko ponosno stav. But šaj te sikljova ando odova sar o Mojsije reagujinđa ked avera dobinđe disave zaduženja. Ov but ceninđa i odgovornost koja hine le, te igari e Izraelcen. Ama, sar reagujinđa o Mojsije ked o Jehova averenđe dinđa te služinen zajedno oleja? Ov na hine ljubomorno (Br. 11:24-29). Ov hine ponizno hem dozvolinđa averenđe te pomožinen le te sudini e manušenđe (Izl. 18:13-24). Sebepi odova, o Izraelcija hine len pobuter manuša kola služinđe ko asavko način hem odolese na ađićerđe but te oven rešime olenge problemija. Ađahar, o Mojsije mothovđa so pobuter brininđa pe e manušenđe nego te ovel le but zaduženja. Ov tano but baro primer amenđe. Ma te bistra so ako mangaja te ova korisna ki služba e Jehovase, považno tano te ova ponizna, nego te ova but sposobna (w19.09 5-6 ¶13-14).

Amen na đanaja so o vladarija ka phenen, sose napadinena o Baro Vavilon. On šaj te phenen so sebepi o religije nane mir ko sveto hem so uvek mešinena pe ki politika. Ja šaj te phenen so odola religiozna organizacije ćedinđe baro barvalipe hem materijalna buća (Otkr. 18:3, 7). Ked o vladarija ka napadinen i hovavni religija on verovatno na ka uništinen sa e manušen kola tane ko odola religije. Izgleda so olengo cilj ka ovel te uništinen o religiozna organizacije. Ked odola organizacije ka oven uništime, tegani o manuša ka haljon so olenge vođe našti te ćeren odova so on obećinđe lenđe. Odolese o manuša kola hine ko odola organizacije ka phenen so on nane len ništa odole religijencar. O uništenje ando Baro Vavilon na ka trajini odobor but (Otkr. 18:10, 21). O Jehova obećinđa so ka „skratini odola dive“ andi odija nevolja, te šaj olese pomazanikija te preživinen hem i ćaćutni religija te aćhol ki phuv (Mar. 13:19, 20; w19.10 15 ¶4-5).

Dajalen, šaj neko tumendar barili e roditeljencar kola but putija hine holjame hem kola grubo vaćerđe pekle ćhavencar. Odolese, šaj mislini so ađahar valjani te ponašini pe premalo pekle ćhave. Iako sikljilji sar o Jehova mangela te ponašini pe premalo pekle ćhave, šaj tano laće pharo te ovel mirno hem strpljivo pekle ćhavencar, posebno ked tani umorno, a on na šunena la (Ef. 4:31). Tegani, but tano važno te oslonini pe ko Jehova hem te molini pe olese (Ps. 37:5). Disave dajenđe tano pharo te mothoven so mangena pe ćhaven. On šaj barilje ki porodica kuri o roditeljija na hine but paše pe ćhavencar. Ako hem tu ađahar bariljan, na valjani te ćere isto greška koja tekle roditeljija ćerđe. I daj koja tani podložno e Jehovase ka mangel te sikljol sar te mothovi o mangipe pe ćhavenđe. Šaj ka ovel tuće pharo te ćere promene. Ama, tu šaj te menine tut hem sebepi odova tu hem ti porodica ka oven bahtale pana pobuter (w19.09 18-19 ¶19-20).

Da li šaj neko te služini e Jehovase hem ko isto vreme te del sa pestar te ovel barvalo? Okova kova isi le duj gospodarija, našti te služini samo e Jehovase. Ko krajo ando prvo veko, disave hrišćanija ki Laodikija hvalinđe pe odoleja soj tane barvale, so ćedinđe pese baro barvalipe hem so ništa više na valjani lenđe. Ama, anglo Jehova hem o Isus on hine jadna, ćorore, korore hem nange. O Isus savetujinđa len na sebepi so hine barvale, već odolese so olengo mangipe premalo materijalna buća durjaćerđa len ando Jehova (Otkr. 3:14-17). Ako dikhaja so počminđam te manga o materijalna buća, tegani sig posig valjani te promenina o način sar razmislinaja (1. Tim. 6:7, 8). Ako na promeninaja diso amen ka počmina te manga avera buća hem o Jehova na ka ovel zadovoljno odoleja sar služinaja olese. Ov „rodela te služine samo olese“ (Pon. zak. 4:24; w19.10 27 ¶5-6).

O grčko lafi kova tano prevodimo e lafeja „legardo“ doslovno značini „te ove akhardo; te mukhe diso te legari tut“. Slično grčko lafi koristinđa hem o pisac Luka, kova pisinđa i knjiga Dela apostolska. Odole lafencar ov manglja te opisujini o brodo kova mukhlja i bavlal te legari le (Dela 27:15). Jekh manuš kova istražujini i Biblija phenđa so ked o Petar pisinđa so o sveti duh „legarđa“ e manušen kola pisinđe i Biblija, ov koristinđa o lafija kola e manušen setinćerđe ki plovidba. Odole lafencar o Petar manglja te phenel sar so i bavlal legari o brodo đi o than kuri valjani te resel, ađahar hem o sveti duh legarđa e manušen kola pisinđe i Biblija te ćeren poklo zadatko. Isto ađahar, odova istraživači phenđa so e biblijake piscija hine sar brodija kola valjanđe „te phraven pekle jedrija.“ On hine spremna te ćeren i buti sar so o sveti duh usmerinđa len. O Jehova ćerđa poklo deo. Ov dinđa len „i bavlal“, ja o sveti duh. E biblijake piscija isto ćerđe poklo deo. On mukhlje o sveti duh te legari len. Avdije amen šaj o sveti duh te uporedina sar ked i bavlal phudela ko more. Te šaj o brodo te resel đi i luka, čak ked ko more isi oluja, o brodo valjani te astari šukar bavlal. Isto ađahar, o sveti duh šaj te pomožini amen hem ponodri te služina e Jehovase, čak ked isi amen pharipa, sa đi na resaja ko nevo sveto (w19.11 9 ¶7-9).

Amen haljovaja so našti te phana amare jaćha anglo problemija. Ama, na valjani samo te mislina ando problemija. Ako razmislinaja samo ando problemija, šaj te bistra sa o šukar buća kola o Jehova obećinđa amenđe (Otkr. 21:3, 4). Šaj te ova odobor obeshrabrime so šaj te našala amari snaga hem te ćhinava te služina e Jehovase. Jekh amari phen andi Amerika, brinini pe ando poklo nabormo rom. Oj pisinđa sar olaki vera aćhilji zorali: „But putija hine amen stresna situacije hem hijam le obeshrabrime, ama amari nada hine zorali. But hijum zahvalno sa e bućenđe kola o Jehova dela amen te šaj te zorjaćera amari vera hem te ohrabrina amen. O savetija hem ohrabrenje ćaće valjanena amenđe. On pomožinena amen te na pera hem te istrajina.“ So sikljovaja kotar akija phen? Sikljovaja so amen šaj te pobedina o obeshrabrenje. Sar? Ma te bistre so o Beng iskušini amen prekalo amare pharipa. Nek ovel tut poverenje ko Jehova so ov ka utešini tut. Isto ađahar, cenin sa so o Jehova dela tut te šaj te zorjaćere tikli vera (w19.11 16 ¶9-10).

But tano važno o starešine te primeninen akava biblijako načelo. Jekh starešina haljola so mora te arakhi o poverljiva informacije ando phralja hem phenja. Ako ne bi ćerela odova, ov bi našali olengo poverenje hem avera ne bi poštujinena le više. O naimenujime phralja ki skupština na valjani te oven „dujemujengo“ (1. Tim. 3:8). Odova značini so o poverljiva informacije na ka phenen nikase. Odolese, jekh starešina kova mangela pe romnja, na ka vaćeri olaja ando poverljiva informacije kola oj na valjani te đanel. I romni mangela avera ki skupština te poštujinen olake rome. Odolese na ka terini le te vaćeri olaće o poverljiva informacije. Ked i romni na ćerela odova, oj na samo so ka ovel podrška pe romese nego hem ka poštujini okolen kola hine len poverenje te vaćeren oleja. Soj tano najvažno, o Jehova ka ovel bahtalo ked ka dikhel so i romni dela sa pestar ki skupština te ovel mir hem jekhipe (Rimlj. 14:19; w20.03 22 ¶13-14).

Ko 1512. berš angleder amari era ked hine ćerdo o sveti šator ki gora Sinaj o Mojsije ićerđa i svečanost kuri o Aron hem olese ćhave hine postavime te oven sveštenikija (Izl. 40:17; Lev. 9:1-5). Sar o Jehova mothovđa so akava sveštenstvo isi le oleso blagoslov? Đi o Aron hem o Mojsije blagoslovinđe e narodo, o Jehova bićhalđa i jag ando nebo te tharel i žrtva koja hine ko oltari (Lev. 9:23, 24). Sose o Jehova bićhalđa i jag? O Jehova bićhalđa i jag te mothovi so ov mangela o Aron hem olese ćhave te oven sveštenikija hem so podržini len. Ked o Izraelcija dikhlje so o Jehova mangela te podržini akale sveštenikonen, tegani haljilje so hem on valjani te podržinen len. Sose odova so o Jehova podržinđa o sveštenstvo ko Izrael tano važno avdije amenđe? Odolese so odova sveštenstvo predstavini jekh pošukar hem pobaro sveštenstvo – 144 000 tane o sveštenikija hem kraljija kola ka služinen e Isuseja ko nebo (Jevr. 4:14; 8:3-5; 10:1). Šaj te ova sigurna so avdije o Jehova vodini hem but blagoslovini pikli organizacija (w19.11 23 ¶13; 24 ¶14, 16).

Ked hine ko Korint, o apostol Pavle aćhilo ko Akila hem ki Priskila hem „ćerđa buti olencar. Olengo zanati hine te ćeren šatorija.“ Odova so phenela pe so o Pavle ćerđa buti „dive hem rat“, na značini so ov samo ćerđa buti. Ko sabat, na ćerđa šatorija već đelo te propovedini e Jevrejenđe kola isto ađahar, odova dive na ćerđe buti (Dela 13:14-16, 42-44; 16:13; 18:1-4). O apostol Pavle iako morandilo te ćerel buti, ov redovno propovedinđa e Devlesi šukar vest (Rimlj. 15:16; 2. Kor. 11:23). Isto ađahar, ov hem averen podstakninđa redovno te propovedinen. O Akila hem i Priskila hine olese „saradnikija ano Hrist Isus“ (Rimlj. 12:11; 16:3). O Pavle phenđa e phralenđe ko Korint: „Uvek ćeren buti e Jehovase“ (1. Kor. 15:58; 2. Kor. 9:8). O Jehova čak phenđa e Pavlese te pisini: „Ako neko na mangela te ćerel buti, tegani na valjani ni te hal“ (2. Sol. 3:10; w19.12 5 ¶12-13).

O Jehova ano prvo bračno par ćhivđa i želja te ovel len ćhave. Ama, ko valjani te odlučini da li o bračno par ka ovel le ćhave hem ked? Ko disave narodija, ando okola so tek lelje pe očekujini pe so posig te ovel len ćhave. I familija ja avera manuša šaj te ćhiven lenđe baro pritisak. Šaj but putija ka phenen lenđe so pana hari valjani te ovel len ćhave. Jekh amaro phral andi Azija, kova vićini pe Džetro, phenela: „Ki skupština, disave phralja hem phenja kola isi len ćhave, but putija phenena okolenđe kola nane len ćhave so valjani te ovel len ćhave.“ Jekh aver phral andi Azija, kaso nav tano Džefri, phenela: „Disave phenena okolenđe kola nane len ćhave so na ka ovel len ko te arakhi len ko phure berša.“ Ama, svako bračno par, valjani kokri pese te odlučini da li ka ovel len ćhave. Odova tano samo olengi odluka, olengi odgovornost (Gal. 6:5). Đanđola pe, i familija hem o amala, samo mangena o terno bračno par te ovel bahtalo. Ama, valjani te haljova so jedino o bračno par valjani te odlučini da li ka ovel len ćhave ja na (1. Sol. 4:11; w19.12 22 ¶1-3).

Da li tano tuće pharo te dikhe e Devle sar te Dade? Disave mislinena soj tane but tikne hem nevažna ked uporedinena pe e Jehovaja. On nane sigurna ko odova da li o Svemoćno Devel brinini pe svakonestar olendar. Ama, amaro manglo Dad na mangela te osetina amen ađahar. Ov dinđa amen o đivdipe hem mangela te ova paše oleja. O apostol Pavle akalestar vaćerđa e manušenđe ki Atina hem palo odova phenđa so o Jehova „nane dur nijekhestar amendar“ (Dela 17:24-29). O Devel mangela svako amendar te vaćeri oleja sar so jekh ćhavo vaćeri pe Dadeja kova but mangela le hem brinini pe olestar. Averenđe tano pharo te dikhen e Jehova sar pe Dade, odolese so olengo dad na mothovđa lenđe dovoljno mangipe hem na hine šukar premalo olende. Jekh amari phen phenela: „Mo dad hine but nasilno. Ked počminđum te proučinav i Biblija hine maje but pharo te ovav paše mekle nebesko Dadeja.“ Da li hem tu osetineja tut ađahar? Ako ja, tegani ma obeshrabrin tut. Ov sigurno so hari po hari hem tu ka osetine so o Jehova tano najšukar Dad (w20.02 3 ¶4-5).

O buća kola šaj te ćera šaj amenđe tane nevažna odolese so hijam phure, ama o Isus sikavđa amen so o Jehova cenini so god ćeraja olese (Ps. 92:12-15; Luka 21:2-4). Odolese, razmislin odolestar so šaj te ćere. Na primer, šaj te vaćere averenđe ando Jehova, te moline tut tekle phralenđe hem e phenjenđe ja šaj te ohrabrine averen te aćhoven verna. E Jehovase, tu hijan oleso saradniko, na sebepi odova so tu šaj te ćere, nego odolese so hijan spremno te šune le (1. Kor. 3:5-9). But hijam zahvalna so šaj te služina e Jehovase kova but cenini okolen so služinena olese. Ov stvorinđa amen ađahar te šaj te ćera olesi volja hem odova anela amenđe bahtalipe (Otkr. 4:11). Iako o manuša ko sveto šaj te mislinen so na hijam vredna, o Jehova na lađala amendar (Jevr. 11:16, 38). Ked hijam obeshrabrime sebepi o nabormipe, o ćororipe ja o phuripe, tegani valjani te setina amen so ništa našti te odvojini amen ando amare Dadeso mangipe (Rimlj. 8:38, 39; w20.01 18 ¶16; 19 ¶18-19).

Ked trudinaja amen te ova pana pobuter ponizna hem zadovoljna, amen šaj te borina amen te na ova zavidna. Ked akala šuže osobine pherena amaro vilo, tegani na ka ovel than te barjol i zavist. I poniznost ka pomožini amen te na mislina pobuter amendar. Jekh ponizno osoba na mislini so zaslužini poviše averendar (Gal. 6:3, 4). O manuš kova tano zadovoljno na rodela pobuter odolestar so isi le hem na uporedini pe averencar (1. Tim. 6:7, 8). Ked i osoba koja tani ponizno hem zadovoljno odoleja so isi la, dikhela so neko aver dobinđa diso šukar, oj radujini pe oleja. Jedino e Devleso sveti duh šaj te pomožini amen te na ova zavidna, već te ova pana pobuter ponizna hem zadovoljna (Gal. 5:16; Fil. 2:3, 4). E Devleso sveti duh šaj te pomožini amen te ispitina amare najhor mislija hem motivija. Uzi e Devlesi pomoć, amen šaj te sikljova te mislina pozitivno hem te cida amendar o negativna mislija hem o osećanja (Ps. 26:2; w20.02 15 ¶8-9).

O predanje tano jekh zavet so o Jehova ađićeri tutar te ispunine. Odolese aćhov paše e skupštinaja. O phralja hem o phenja ki skupština akana tane sar ti porodica. Ako redovno đaja ko sastankija, ka zorjaćere to amalipe olencar. Svako dive čitin e Devleso Lafi hem hor razmislin odolestar so čitinđan (Ps. 1:1, 2). Odvojin hari vreme te razmisline odolestar so čitinđan ki Biblija. Tegani odova so sikljoveja olatar ka resel đi to vilo. Redovno molin tut (Mat. 26:41). Sebepi so iskreno molineja tut e Jehovase, ka ove popaše oleja. Trudin tut hem ponodri o Kraljevstvo te ovel tuće ko prvo than (Mat. 6:33). Odova šaj te ćere ađahar so o propovedanje ka ovel tuće najvažno buti ko đivdipe. Ked redovno đaja ki služba, ti vera ka ovel pozorali. Svako pharipe kova šaj ka ovel tut ko akava sveto tano „trenutno hem lokho“ (2. Kor. 4:17). Ama, sebepi so ka predajine tut hem ka krstine tut već akana šaj te ovel tut pobahtalo đivdipe, a ki budućnost „o ćaćutno đivdipe“. Ama, da li isplatini pe? Naravno! (1. Tim. 6:19; w20.03 13 ¶19-21).

Ako o manuš kasa proučineja na ćerela promene ko poklo đivdipe, ko jekh trenutko ka valjani te puće tut: „Da li valjani te ćhinavav o kurs?“ Angleder so ka ane i odluka, puć tut: „Ked razmislinava andi olesi situacija, da li šaj te phenav so dela sa pestar te napredujini? Da li počminđa te primenini o buća kola sikljilo?“ (Mat. 28:20). Nažalost, disave kolencar proučinaja tane sar o Izraelcija ando e Jezekiljeso vreme. Dikh so o Jehova phenđa e Jezekiljese olendar: „Tu hijan olenđe sar manuš kova isi le šužo glaso hem kova bašali šukar, sar manuš kova đilabi i đili ando mangipe. On šunena tekle lafija, ama niko olendar na ićeri len“ (Jezek. 33:32). Šaj ka ovel amenđe pharo te phena e manušese so više na ka proučina oleja. Ama, „hari vreme aćhilo“. Odolese tano pošukar te ćhinave te proučine e manušeja kova na ćerela promene ko poklo đivdipe. Amen valjani te trudina amen te arakha nekas kova mothovi so „ispravno [dikhela] ko večno đivdipe“ (Dela 13:48; w20.01 6 ¶17; 7 ¶20).

I Biblija sikavi so o poslušna manuša zauvek ka živinen ki phuv. Ama, o hrišćanska crkve na sikavena e manušen odolestar (2. Kor. 4:3, 4). O hrišćanska crkve phenena so sa o šukar manuša palo meribe ka đan ko nebo. Ama, jekh tikni grupa, o Istraživačija andi Biblija, kola počminđe ando 1879. berš te izdajinen i Stražarsko kula, hine averćhane. On haljilje so o Devel palem ka ćerel o raj ki phuv hem so milionija poslušna manuša ka živinen akate ki phuv, a na ko nebo. Ama, valjanđa lenđe vreme te haljon koj tane odola poslušna manuša. O Istraživačija andi Biblija haljilje ando e Devleso Lafi so jekh grupa ando manuša ka oven „ćinde kotar i phuv“ te vladinen e Isuseja ko nebo (Otkr. 14:3). Ki odija grupa tane o 144 000 hrišćanja kola dinđe po đivdipe e Devlese hem služinđe lese verno sa đi hine ki phuv (w19.09 27 ¶4-5).