Novembar

Avdije, but kola tane penđarde sar mudra manuša, asana ked šunena e biblijake savetija andi akija tema. On phenena so ako mislineja so avera tane pobare tutar, tegani ka dićhove slabo hem avera ka iskoristinen tut. Ama, đi soste anela asavko stav kova dićhola ko e Bengeso sveto? Da li o sebična manuša tane bahtale? Da li olenge porodice tane bahtale? Da li isi len iskrena amala? Da li tane paše e Devleja? So bi tu pheneja ando odova so primetinđan – da li tano pošukar te ićere tut premali akale svetosi mudrost ja premali mudrost ando e Devleso Lafi? (1. Kor. 3:19). O manuša kola šunena o savetija okolendar kas akava sveto dikhela sar mudra manuša, tane sar jekh turista kova pućela kuri te đal nekas kova ni kokri na đanela kaj tano. Ando „mudra“ manuša ko oleso vreme, o Isus phenđa: „On tane korore vođe. A ked o kororo legari e korore, o solduj ka peren ki jama“ (Mat. 15:14). Akale svetosi mudrost anglo Devel tani dilinipe (w19.05 24-25 ¶14-16).

Nekobor berša, o broj ando okola so lena o simbolija barjola. Da li valjani te brinina amen sebepi odova? Na. „O Jehova đanela okolen soj tane olese“ (2. Tim. 2:19). O phralja kola brojinena okolen so lena o simbolija ki Spomen-svečanost, na đanena koj tano ćaće pomazimo. Odova samo o Jehova đanela. Maškaro okola so lena o simbolija isi disave kola mislinena soj tane pomazanikija, ama nane. Disave kola počminđe te len o simbolija kasnije ćhinavđe. Avera isi len mentalna ja emocionalna problemija hem odolese mislinena so on ka vladinen e Hristeja ko nebo. Jasno tano so amen na đanaja ćaće kobor pomazanikija aćhilje ki phuv. Ked o Isus ka avel te ćedel e pomazanikonen te đan ko nebo, on ka oven ko but thana ki phuv. I Biblija phenela so ko poslednja dive jekh tikno broj ando pomazanikija ka oven ki phuv (Otkr. 12:17). Ama, ki Biblija na pisini kobor olendar ka oven ki phuv ked ka počmini i bari nevolja (w20.01 29-30 ¶11-13).

O Isus mothovđa kobor o Jehova mangela pe ćhaven ked vaćerđa jekh priča ando našaldo ćhavo (Luka 15:11-32). O dad ki odija priča niked na našalđa pi nada so oleso ćhavo ka irini pe ćhere. Ked oleso ćhavo irinđa pe, ov vilestar prihvatinđa le. Ako cidisaljam ando Jehova, a kajinaja amen, tegani šaj te ova sigurna so amaro Dad, o Jehova, tano spremno te pomožini amenđe te irina amen koro leste. Amaro Dad ka popravini sa i šteta koja ćerđa o Adam. Palo odova so o Adam bunisalo protiv o Devel, o Jehova odlučinđa te birini 144 000 manušen kotar i phuv, kola ka služinen sar kraljija hem sveštenikija olese Ćhaveja, e Isuseja, ko nebo. Ko nevo sveto, o Isus hem okola so ka vladinen oleja ka pomožinen e poslušno manušenđe te oven savršena. Okolenđe kola ka nakhen i završno kušnja, o Devel ka del večno đivdipe. Tegani, amaro Dad ka ovel but bahtalo ked ka dikhel so i phuv tani pherdi savršeno manušencar. Kobor šukar ka ovel odova vreme (w20.02 6-7 ¶17-19).

Sare valjani te puća amen: „Da li o promene kola ćerava, te šaj te ovav e Jehovaso svedoko, tane samo površna ja ćaće ćerava promene hor ano mo vilo?“ Odova tano but važno. Ko Matej 12:43-45 o Isus mothovđa so valjani te ćera. Kotar akala stihija sikljovaja jekh but važno buti: Nane dovoljno samo te cida andi amari godi o pogrešno razmislibe, nego hem valjani odova than te phera odoleja so o Jehova mangela. Da li ćaće šaj te menina amaro ponašanje hem odova save hijam andral? E Devleso Lafi phenela: „Uraven i nevi ličnost koja tani ćerdi premali e Devlesi volja, koja temeljini pe ki pravednost hem ki vernost“ (Ef. 4:24). Ja, šaj te menina odova save hijam andral, ama nane lokho te ćera odova. Amen na valjani samo te borina amen protiv o pogrešna želje hem te ćhinava te ćera odova soj tano lošno, nego valjani te menina amaro način sar razmislinaja. Odova značini so valjani te menina amare želje, amaro ponašanje hem o razlog sose ćeraja diso. Odova rodela amendar uvek te trudina amen (w19.06 9-10 ¶6-7).

O Jehova mothovđa saosećajnost ađahar so bićhalđa e anđelen te spasinen e Lote hem olese porodica. Ama, o Lot na šunđa e anđelen odmah. O anđelija morandilje te dolen le kotar vas hem te pomožinen olese hem olese porodicaće te ikljol andi diz (Post. 19:15, 16). O anđelija palo odova phenđe olese te našel ko bregija. Ama, umesto te šunel e Jehova, o Lot pućlja le te đal ki diz koja hine paše odothe (Post. 19:17-20). O Jehova strpljivo šunđa le hem mukhlja le te đal ki odija diz. Palo odova, o Lot darandilo te živini ki odija diz hem đelo te živini ko bregija, ko than kuri o Jehova prvo phenđa lese te đal (Post. 19:30). Savo baro strpljenje o Jehova mothovđa olese! Isto sar o Lot, hem avdije disavo phral ja phen šaj te anel lošna odluke hem ađahar te ćeren pese bare problemija ko đivdipe. So valjani te ćera ako avela đi odova? Šaj ka manga te phena olenđe so akana ćedena odova so sejinđe, soj tano hem ćaće (Gal. 6:7). Ama, šaj te ćera diso pošukar. Amen šaj te pomožina len ađahar sar so o Jehova pomožinđa e Lote (w19.06 20-21 ¶3-5).

Amare dušmanja nadinena pe so sebepi i zabrana ka dara te služina e Jehovase. Uzo odova so zabraninena amare aktivnostija, šaj širinena hovajba amendar, khuvena amenđe ko ćhera, ikalena amen anglo sudo, a disaven ćhivena ko phanlipe. On nadinena pe so amen ka mera andi dar, odolese so on ćhivđe nekas amendar ko phanlipe. Ako amen daraja olendar hem odolestar so možda šaj te ćeren amenđe, tegani amen šaj te usporina ja čak te ćhinava te služina e Jehovase. Amen na mangaja te ova sar akala kolendar vaćeri pe ki Levitska 26:36, 37. Na ka dozvolina i dar te usporini amen, ja te ćhinavi amen te služina e Jehovase. Potpuno verujinaja e Jehovase hem na mukhaja i dar te kontrolišini amen (Is. 28:16). Molinaja amen e Jehovase te mothovi amenđe so te ćera. Odolese so amaro Devel pomožini amen, čak hem o najmoćna vlastija našti te ćhinaven amen verno te služina e Jehovase. O protivljenje ne mora te daravi amen, nego šaj te podstaknini amen pana poodlučno te služina e Jehovase (w19.07 9-10 ¶6-7).

Čak iako na arakhljan nekas ko mangela te ovel e Isuseso učenik, nastavin te rode le. Ma bistre so o Isus phenđa so okola kola ćerena e učenikonen tane sar jekh ribari. Olese valjani but vreme te astari jekhe maćhe. But putija ov ćerela kasno raćate ja rano sabale, a disavo puti mora but dur te đal (Luka 5:5). Isto ađahar, disave hrišćanija but vreme strpljivo propovedinena ko različita thana hem avena ko različito vreme. Sose? Te šaj te arakhen so pobuter manušen. Okola so but trudinena pe te arakhen e zainteresovano manušen, isi len bare blagoslovija. Šaj li te propovedine ko vreme ked o manuša tane ćhere ja ko thana kuri isi pobari mogućnost te arakhe len? Sose tano važno te ove strpljivo đi proučineja nekasa? Odolese so amen na valjani te pomožina len samo te đanen hem te mangen odova so i Biblija sikavi. Amen valjani te pomožina len te penđaren hem te mangen e Jehova (w19.07 18-19 ¶14-15).

Disavenđe hem avdije tano pharo odolese so angleder ćerđe diso lošno. Tegani, šukar bi ovela pohor te proučina o teme kola vaćerena kobor tani vredno e Hristesi otkupno žrtva. Ked proučinaja, hor razmislinaja hem molinaja amen, šaj te cida o pharipe kova i krivica ćerđa ano amende. O Jehova već oprostinđa amare grehija. Nane ni jekh razlog kokri amen te kaznina amen. So šaj pana te sikljova kotar o Pavle? Disave mukhlje pi buti koja šajinđa te ćerel len barvale, te šaj te ćeren pobuter ki služba e Jehovase. Tegani, sar šaj te bistra o buća kola tane palo amende hem te na manga o buća kola hine amen? (Br. 11:4-6; Prop. 7:10). O buća kola tane palo amende šaj te ovel sa so ćerđam angleder ki služba e Jehovase ja o kušnje kola anglal nakhljam. Ked razmislinaja sar o Jehova blagoslovinđa amen hem pomožinđa amen angleder, odova pašaćeri amen amare Dadese. Ama, na mangaja te ova zadovoljna kokri amencar, ađahar so ka mislina so već dovoljno ćerđam e Jehovase (1. Kor. 15:58; w19.08 3 ¶5-6).

Amen šaj te molina amen e Jehovase ked god mangaja hem kuri god te ova. Ov uvek isi le vreme te šunel amen. Uvek tano odothe amenđe hem pažljivo šunela amare molitve. Ked amen haljovaja so o Jehova šunela amare molitve, amen pobuter mangaja le. Jekh psalmista phenđa: „Mangava e Jehova, odolese so ov šunela mo glaso“ (Ps. 116:1). Amaro Dad na samo so šunela nego hem odgovorini ko amare molitve. O apostol Jovan uverini amen ko odova: „So god te molina, a soj tano premali olesi volja, ov šunela amen“ (1. Jov. 5:14, 15). O Jehova šaj na ka odgovorini ko amare molitve ko način ko kova amen očekujinaja. Ov đanela soj tano najšukar amenđe hem odolese disavo puti oleso odgovor ki amari molitva šaj te ovel na ja šaj mangela pana te ađićera (2. Kor. 12:7-9). O Jehova brinini pe te ovel amen sa so valjani amenđe. Ov ćerela odova so rodela ando svako dad (1. Tim. 5:8). Ov brinini pe ando pe ćhavenge materijalna potrebe. Ov na mangela te brinina amen odolestar so ka ha, so ka urava, ja kaj ka živina (Mat. 6:32, 33; 7:11). Sar jekh dad kova mangela pe ćhave, o Jehova dinđa sa pestar te ovel amen sa so valjani amenđe ki budućnost (w20.02 5 ¶10-12).

Nane sa o pomazanikija „o verno hem o razborito robo“ (Mat. 24:45-47). Sar hem ko prvo veko, o Jehova hem o Isus avdije prekali jekh tikni grupa ando phralja parvarena ja sikavena bute manušen. Ko prvo veko, samo nekobor hrišćanija kola hine pomazime pisinđe o Grčko deo andi Biblija. Avdije, samo nekobor pomazime hrišćanija isi len odgovornost te den i „hrana ko pravo vreme“ e Devlese narodose. O Jehova odlučinđa te del o večno đivdipe ki phuv bute manušenđe. Isto ađahar, ov odlučinđa te del o đivdipe ko nebo disavenđe kola ka vladinen e Isuseja. Sa e Jehovase sluge, hem o „Judejco“ hem o „deš manuša“, ka dobinen pikli nagrada. Ama, solduj grupe valjani te šunen ista zakonija, te oven verna hem te oven ponizna (Zah. 8:23). Isto ađahar, valjani te služinen lese hem te oven ko jekhipe. Sare valjani te trudinen pe te oven ko mir pekle phralencar hem e phenjencar ki skupština. Sar o krajo akale svetoso avela sa popaše, hem ponodri služin e Jehovase hem sledin e Hriste sar deo ando „jekh stado“ (w20.01 31 ¶15-16).

Amen našti zorjeja te ćhiva amare familija te prihvatinen o šukar haberi. Ama, šaj te podstaknina len te razmislinen odolestar so sikavi i Biblija (2. Tim. 3:14, 15). Mothov šukar primer. But putija, odova so amen ćeraja, pobuter utičini ki amari porodica, nego odova so phenaja. Ov istrajno đi pomožineja tekle porodicaće. O Jehova tano najbaro primer amenđe. But putija, palem dela e manušenđe i prilika te šunen o šukar haberi hem te dobinen o đivdipe (Jer. 44:4). Hem o apostol Pavle phenđa e Timotejese soj tano važno te ovel istrajno đi pomožini averenđe. Sose? Odolese so, ađahar ka spasini hem pes hem okolen so šunena le (1. Tim. 4:16). Sebepi so mangaja amare porodica, amen mangaja hem on te đanen o ćaćipe andi Biblija (w19.08 14 ¶2; 16-17 ¶8-9).

Na valjani te bistra so ako neko alo te del amen savet, tegani verovatno grešinđam pobuter nego so mislinaja. Ki asavki situacija, šaj amari prvo reakcija tani te na šuna o savet. Čak, šaj te kritikujina e osoba ja o način sar dinđa amen odova savet. Ama, ako hijam ponizna, amen ka trudina amen te mothova ispravno stav. O ponizno manuš tano zahvalno ked dobini savet. Te dikha jekh primer. Zamislin so aljan ko sastanak. Vaćerđan nekobor phralencar hem jekh olendar igari tut ki strana hem phenela tuće so isi tut diso ko danda. Sigurno ka ovel tuće lađavo. Ama, ka ove lese zahvalno sose phenđa tuće odova. Šaj ka puće tut sose neko na phenđa tuće odova poangleder. Isto ađahar, valjani te ova ponizna hem zahvalna ked jekh phral ja phen dela amen savet ked odova tano potrebno. Odole manuše valjani te dikha sar amare amale, a na sar amare dušmane (Posl. 27:6; Gal. 4:16; w19.09 5 ¶11-12).

O Jehova hem e dajaće dinđa jekh važno odgovornost ki porodica. Ov dinđa hem oj te ovel la autoritet upro olake ćhave. Odova so i daj ćerela hem phenela šaj te utičini upro olake ćhave sa đi tane đivde (Posl. 22:6). Te dikha so šaj jekh daj te sikljol andi e Isusesi daj, i Marija. I Marija but šukar đanđa e Devleso Lafi. Hor poštujinđa e Jehova hem hine la paše odnos oleja. Oj hine spremno te ćerel odova so o Jehova mangela, iako sebepi odova celo olako đivdipe meninđa pe (Luka 1:35-38, 46-55). Dajalen, tumen šaj te oponašinen e Marija ko but buća. Sar? Sar prvo, ked tumen proučinena i Biblija hem ked molinena tumen, šaj te oven paše e Jehovaja. Sar dujto, ked hijen spremna te ćeren promene ko tumaro đivdipe te radujinen e Jehova (w19.09 18 ¶17-19).

Ked o Jovan hine ki akija phari situacija, o Devel dinđa le jekh vizija andi budućnost. Ki odija vizija, e anđelenđe tano vaćerdo te ićeren o zorale bavlala andi bari nevolja, sa đi o robija ando amaro Devel nane završno obeležime pečateja (Otkr. 7:1-3). Ki akija grupa tane o 144 000 manuša kola ka vladinen e Isuseja ko nebo (Luka 12:32; Otkr. 7:4). Ki odija vizija, o Jovan dikhlja pana jekh grupa koja hine odobor bari so ov phenđa: „Palo odova dikhljum baro mnoštvo, kolen niko naštinđa te đenel, ando sa o narodija hem plemenija hem nacije hem ćhibja, sar terđona anglo presto hem anglo Bakro“ (Otkr. 7:9-14). O Jovan hine but bahtalo te đanel so ki budućnost ka oven manuša kola ka služinen e Devlese ko ispravno način. Šaj te ova sigurna so odija vizija ćerđa e Jovanesi vera te ovel pobari. Ama, odija vizija pana pobuter zorjaćeri amari vera, sose oj ispunini pe ko amaro vreme. Amen dikhaja sar ćedena pe but manuša kola isi len nada so ka preživinen i bari nevolja hem so ka živinen večno ki phuv (w19.09 26 ¶2-3).

Zamislin so o vođe ko sveto objavinđe „o mir hem i sigurnost“. On šaj hvalinena pe so ko sveto niked na hine odobor baro mir. On ka mangen amen te mislina so on tane sposobna te rešinen sa e manušenge problemija. Ama, on nisar našti te utičinen upro odova so valjani te ovel. O „Baro Vavilon“ ka ovel uništimo! (Otkr. 17:5, 15-18). „O Devel ko vilo ćhivđa lenđe te ćeren olesi zamisao“. Odija zamisao tani te uništinen sa o hovavne religije, kuri tane uključime o hrišćanska religije. O Devel ka ćhivel pi zamisao ko vilo ando „deš šinga“ kotar i „skerletno zver“. O deš šinga predstavinena sa o politička sile kola podržinena odija „skerletno zver“ – o Ujedinjena nacije (Otkr. 17:3, 11-13; 18:8). Ked akala politička sile ka napadinen i hovavni religija, odova ka ovel znak so i bari nevolja počminđa. Odova ka ovel jekh iznenadno hem strašno događaj kova ka utičini ko sa o manuša ki phuv (w19.10 14 ¶1, 3).

Ko prvo veko, o Diotref hine zavidno sebepi so disave phralja predvodinđe ki hrišćansko skupština. Ov manglja „te ovel prvo“ maškaro phralja hem odolese vaćerđa lošna buća ando apostol Jovan hem ando avera odgovorna phralja. O Diotref manglja o phralja hem o phenja te našalen po poštovanje premalo olende (3. Jov. 10). Iako amen niked na ka ćera odova so ćerđa o Diotref hem amenđe šaj te desini pe te ova zavidna. Na primer, đi odova šaj te avel ked neko dobini o zaduženje kova amen mangljam, posebno ako mislinaja so šaj te ćera pošukar olestar odija buti. I zavist tani sar otrovno korov. Ked jekh puti mukhela koreno ko amaro vilo, but tano pharo te ikala la. O negativna osećanja, sar soj tane i ljubomora, o ponos hem i sebičnost parvarena i zavist. Sar so o korov na dela e luluđaće te barjol, ađahar hem i zavist šaj te ćhinavi o šukar osobine, sar soj tane o mangipe, o saosećanje hem o šukaripe te barjon ko amaro vilo. Ked dikhaja so i zavist počminđa te barjol, mora te ikala la ando amaro vilo (w20.02 15 ¶6-7).

O apostol Pavle phenđa so isi le disavo problemi kova mučinđa le. Ov phenđa so akava problemi hine sar „e Bengeso anđeo“ kova stalno khuvđa le. Šaj o Beng hem olese demonja na ćerđe e Pavlese problemija, kola hine sar o karo ked posavi. Ama, ked on dikhlje e Pavleso problemi on šaj manglje te ćeren le te ovel pana pobaro. Odova hine sar ked neko gurini o karo pana pohor. So ćerđa o Pavle? O Pavle manglja o Jehova te cidel lestar odova „karo“. Ov phenđa: „Trin putija molinđum e Gospode [e Jehova] te cidel mandar odova.“ Ama, iako o Pavle molinđa pe, o Jehova na cidinđa odova karo. Da li odova značinđa so o Jehova na šunđa e Pavlese molitve? Na. Ov šunđa olese molitve. O Jehova na cidinđa oleso problemi, ama dinđa le snaga te šaj te istrajini. Ov phenđa lese: „Mikli sila potpuno mothovi pe ked tu hijan slabo“ (2. Kor. 12:8, 9). Sebepi so o Jehova pomožinđa e Pavlese, ov šajinđa hem ponodri te ovel bahtalo hem te ovel le mir (Fil. 4:4-7; w19.11 9 ¶4-5).

Amen valjani te služina samo e Jehovase odolese so ov ćerđa amen hem sose olestar avela o đivdipe (Otkr. 4:11). Ama, valjani te ova oprezna. Iako amen mangaja hem poštujinaja e Jehova, avera buća ko amaro đivdipe šaj te oven amenđe odobor važna so šaj te ćhinaven amen te manga e Jehova hem te služina samo olese. Sar so i Biblija mothovi, kobor amen mangaja e Jehova dićhola ko odova da li služinaja samo olese. Odolese, amen na ka mukha niko hem ništa te ovel amenđe ko prvo than (Izl. 34:14). Sose amen služinaja samo e Jehovase? Sebepi sa o buća kola sikljiljam olestar, amen isi amen šukar razlogija te manga samo e Jehova. Amen but mangaja o šukar osobine kola o Jehova isi le. Đanaja so ov mangela hem so na mangela hem trudinaja amen te dikha ko buća sar so ov dikhela. Haljovaja koja tani e Devlesi namera amencar hem daja sa amendar te ćera olesi volja. Amenđe tani but bari čast te ova olese amala (Ps. 25:14). Sa so sikljovaja olestar, ćerela amen te ova paše oleja (Jak. 4:8; w19.10 26 ¶1-3).

Avdije, amare phralja hem phenja isi len razna pharipa. Na primer, but olendar doživinđe zemljotresija, poplave ja mariba. Ked odova desini pe, disave amendar šaj te vićinen akale phralen hem phenjen te bešen amencar ko amaro ćher. Avera šaj te pomožinen len finansijski. Ama, sare amen šaj te molina amen e Jehovase te pomožini amare phralen hem phenjen. Šaj tane obeshrabrime hem tegani amen na đanaja so te vaćera ja so te ćera. Ama, sarine amendar šaj te pomožinen. Na primer, amare amalenđe šaj te da amaro vreme. Šaj te ova saosećajna đi šunaja len. Isto ađahar, šaj te vaćera lenđe kova stih amen utešini (Is. 50:4). Ma bistri, te amalenđe tano najvažno te ove olencar ked tano lenđe but pharo. Akana valjani te da sa amendar te zorjaćera amaro amalipe amare phralencar hem phenjencar. Amaro amalipe na ka trajini đi o krajo ando akava sveto nego ka trajini večno! (w19.11 7 ¶18-19).

Akija žrtva šajinđa te del svako manuš sose odoleja mothovđa so mangela e Jehova, pekle Devle. O manuš kova dinđa i žrtva, olesi porodica hem o sveštenikija šajinđe te han o mas kotar akija žrtva. Ama, disave delovija kotar i žrtva valjanđe te den pe samo e Jehovase. Kola delovija hine odola? E Jehovase, o najšukar deo andi životinja hine i khoni. Ov phenđa so pana disave delovija, sar soj tane o bubregija, tane važna olese (Lev. 3:6, 12, 14-16). O Jehova hine but bahtalo ked jekh Izraelco spremno dinđa e Jehovase akala delovija andi životinja hem i khoni. O Izraelco kova dinđa odova e Jehovase, mothovđa so isi le bari želja te del poklo najšukar e Devlese. Ko slično način, o Isus spremno dinđa e Jehovase poklo najšukar, ađahar so celone vileja služinđa olese (Jov. 14:31). Ov uživinđa te ćerel e Devlesi volja (Ps. 40:8). O Jehova hine but bahtalo đi dikhlja e Isuse sar spremno ćerela olesi volja (w19.11 22-23 ¶9-10).

E Devleso Lafi phenela so palo šovto „dive“, o Devel ćhinavđa te stvorini neve buća ki phuv (Post. 2:2). Ama, o Jehova mangela te ćerel buti hem ko but avera načinija ov pana ćerela (Jov. 5:17). Sar so o Jehova ćerđa buti šov „dive“ hem eftato „dive“ odmorinđa pe, ađahar hem e Izraelcenđe zapovedinđa te odmorinen pe svako eftato dive. O sabat mothovđa so o Izraelcija hine len posebno odnos e Jehovaja hem setinćerđa len so ov oslobodinđa len ando Egipat (Izl. 31:12-14). Niko na isminđa te ćerel buti, ni o ćhave, ni o robija, pa čak ni o životinje (Izl. 20:10). Odova dive, o manuša valjanđe te trudinen pe te oven pana popaše e Devleja. O jevrejska vođe ko e Isuseso vreme, ćhivđe but pravilija sar valjani te ićeri pe o sabat. On phenđe so ko sabat na isimineja te ćede o điv te has ja te saćare e manuše kova tano nabormo (Mar. 2:23-27; 3:2-5). Ama, odova so on sikavđe na mothovđa sar o Devel dikhela ko sabat hem odolese o Isus mothovđa e manušenđe kola šunđe le (w19.12 3-4 ¶8-9).

So pobuter sikljovaja ando e Jehovase osobine, pošukar ka oponašina le. Odolese so o David šukar đanđa pe Dade, ov šajinđa averencar te postupini sar o Jehova. Ov hine paše e Jehovaja hem o Izraelcija but manglje le. Ov hine odobor šukar manuš so o Jehova avere kraljen ko Izrael uporedinđa oleja (1. Kralj. 15:11; 2. Kralj. 14:1-3). So amen sikljovaja? Amen valjani te „oponašina e Devle“. Ked oponašinaja e Devlese osobine, amen mothovaja so hijam olese ćhave (Ef. 4:24). Amen niked na ka ćhinava te sikljova ando Jehova (Prop. 3:11). Nane važno kobor đanaja olestar, nego so ćeraja odoleja so đanaja. Ako amen primeninaja odova so sikljovaja hem trudinaja amen te oponašina amare Dade, ov hem ponodri ka ovel paše amencar (Jak. 4:8). Prekalo poklo Lafi, ov obećini amenđe so niked na ka aćhavi okolen kola trudinena pe šukar te penđaren le (w19.12 20 ¶20; 21 ¶21, 23).

O Jakov manglja sa pe ćhaven, ama o Josif kova hine le 17 berš, hine leso mezimco. Sar reagujinđe e Josifese phralja? On ulje zavidna hem odolese počminđe te mrzinen le. Odolese on bikinđe e Josife ko ropstvo hem hovavđe pe dade so olese mezimco mudarđa jekh opasno životinja. Odolese so hine zavidna, on ruminđe o mir ki porodica hem phaglje pekle dadeso vilo (Post. 37:3, 4, 27-34). I zavist tani uključimi ko „delija ando telo“ kola legarena ko meribe hem kola šaj te ćhinaven e manuše te nasledini e Devleso Kraljevstvo (Gal. 5:19-21). I zavist tani često koren ando problemija sar soj tane o neprijateljstvo, i svađa hem i bari holi. O primer ando e Josifese phralja mothovi sar i zavist šaj te rumini o odnosija hem o mir ki porodica. Iako amen niked na ka ćera odova so ćerđe e Josifese phralja, amen hijam nesavršena manuša hem isi amen vilo kova šaj te hovavi amen. Odolese, nane čudo so podijekh puti hem amen hijam zavidna (w20.02 14 ¶1-3).

Ki jekh situacija, o Jehova lelja kotar Mojsije jekh deo ando sveti duh hem dinđa le asi jekh grupa kotar o izraelska starešine kola hine paše uzo šator ando sastanko. Hari palo odova, o Mojsije šunđa so duj starešine kola hine ko logor isto dobinđe o sveti duh hem počminđe te ponašinen pe sar prorokija. Sar o Mojsije reagujinđa ked o Isus Navin rodinđa olestar te ćhinavi odole duje starešinen te prorokujinen? O Mojsije na hine zavidno sebepi so akala duj starešine dobinđe odija čast kotar o Jehova. Umesto odova, ov hine ponizno hem bahtalo so on šajinđe te prorokujinen (Br. 11:24-29). So sikljovaja kotar o Mojsije? Ako hijan starešina, da li iked hijan le zamolimo te de i obuka dijekhe phralese te ćerel o zadatko kova tu isi tut hem kova but mangeja? Ako hijan ponizno sar o Mojsije, na ka osetine tut manje važno ako valjani te sikave avere phrale jekh dive te preuzmini odova zadatko. Umesto odova, ka ove bahtalo so šaj te pomožine te phralese (w20.02 15 ¶9; 17 ¶10-11).

O nabormipe šaj odobor te utičini upro amare osećanja so šaj te ovel amenđe lađavo ked o manuša dikhena so hijam naborme ja so zavisinaja averendar. Iako šaj avera na đanena so hijam naborme, amenđe šaj te ovel lađavo odolese so više našti te ćera odova so angleder ćerđam. Sar šaj o Jehova te pomožini amen ked ađahar osetinaja amen? Ki Biblija, o Jehova pisinđa šukar lafija kola mothovena amenđe so amen hijam but važna hem vredna olese, čak iako hijam naborme (Ps. 31:19; 41:3). Prekalo odola lafija, o Jehova ka pomožini amen te borina amen e negativno osećanjencar kola isi amen sebepi so hijam naborme. Ov sigurno so o Jehova đanela sar osetineja tut. Molin e Jehova te pomožini tut ko ispravno način te dikhe odova so desini pe tuće. Palo odova, ki Biblija rode o stihija kola o Jehova pisinđa baš tuće. Razmislin ando stihija kola mothovena kobor tane vredna e Jehovase olese sluge. Tegani ka dikhe kobor o Jehova brinini pe pekle slugendar kola verno služinena olese (Ps. 84:11; w20.01 15-16 ¶9-10; 17 ¶12).

O Isak hine barvalo manuš hem sebepi odova o Filistejija ulje zavidna (Post. 26:12-14). Odobor hine zavidna so pherđe olese bunarija e phuvjaja hem odolese o Isak naštinđa te lel o pani aso po stado (Post. 26:15, 16, 27). Sar o Filistejija, hem avdije disave manuša tane zavidna sose avera tane pobarvale olendar. On na samo so mangena te len olenge buća pese, nego hem mangena on te našalen odola buća. Sebepi so o manuša but manglje e Isuse, o jevrejska religiozna vođe ulje zavidna (Mat. 7:28, 29). Iako o Isus hine bićhaldo ando Devel hem sikavđa o ćaćipe, akala religiozna vođe širinđe hovajba te bi ruminen e Isuseso šukar anav (Mar. 15:10; Jov. 11:47, 48; 12:12, 13, 19). So sikljovaja kotar akava primer? O phralja hem o phenja ki skupština šaj te mangen nekas sebepi so isi le šukar osobine. Umesto te ova zavidna, valjani te da sa amendar te oponašina o šukar osobine kola neko isi le (1. Kor. 11:1; w20.02 15 ¶4-5).

Zamislin so živineja angleder 2 500 berš, ki Persija hem mangeja te vaćere e kraljeja ando jekh problemi. Ama, angleder te đa te vaćere e kraljeja, valjani te ove vićimo koro leste. Ako na hijan vićimo šaj te ove mudardo! Amen hijam but bahtale so o Jehova nane sar odova kralj andi Persija. Amen šaj te vaćera oleja. Ov mangela te ova slobodna te vaćera oleja. Na primer, iako o Jehova isi le titule sar soj tane Stvoritelj, Svemoćno hem Svevišnji Gospod, ov mangela đi vaćeraja oleja te koristina jekh nežno lafi sar soj tano „Dade“ (Mat. 6:9). Bahtale hijam so o Jehova mangela te ova oleja odobor paše. Amen šaj te vićina e Jehova „Dade“ sose olestar avela o đivdipe (Ps. 36:9). Sebepi soj tano amaro Dad, amen isi amen odgovornost te šuna le. Ako ćeraja odova so ov rodela amendar, ka ovel amen bare blagoslovija (Jevr. 12:9). Jekh ando odola blagoslovija tano o večno đivdipe, bilo ki phuv ja ko nebo (w20.02 2 ¶1-3).

Amaro cilj tano te pomožina e manušese kasa proučinaja te napredujini (Ef. 4:13). Ked neko proučini i Biblija, šaj ko početko razmislini sar olese lično ka pomožini odova so sikljola. Ama, sar oleso mangipe premalo Jehova barjola, ov ka počmini te razmislini sar šaj ov te pomožini avere manušenđe, čak hem e phralenđe hem e phenjenđe ki skupština (Mat. 22:37-39). Ked ka ovel tut prilika, ma bezdin tut te vaćere lese so sare amen šaj te da prilog. Sikav e manuše kasa proučineja so te ćerel ked ka ovel le problemija. Na primer, zamislin so o manuš kasa proučineja, kova tano nekršteno objavitelj, phenela tuće so uvredinđa le neko andi skupština. Ma ov ki nikasi strana, nego objasnin lese so i Biblija phenela so ov šaj te ćerel. Ov šaj te oprostini e phralese hem te bistrel sa so hine. Ama, ako našti te ćerel odova, objasnin lese so ov valjani ljubazno hem šukaripnjaja te vaćeri okoleja so povredinđa le hem so tegani oleso cilj valjani te ovel te rešini o problemi kova isi le pe phraleja (Uporedin e stihoja ando Matej 18:15). Pomožin lese te razmislini so ka phenel hem sar ka vaćeri (w20.01 5-6 ¶14-15).

Sar šaj te mothova so ceninaja odova so o Jehova tano spremno te oprostini amenđe? Odova šaj te mothova ked molinaja amen lese aso oproštaj, ked prihvatinaja i disciplina hem ked daja sa amendar te na ponovina ista greške. Sa odova ka pomožini amen palem te ovel amen mir. Ćaće tano but utešno ked đanaja so o Jehova „tano paše okolencar kola tane phage vileja, hem spasini okolen kola tane obeshrabrime“ (Ps. 34:18). Odolese so o krajo akale svetoso tano but paše, amen ka ovel amen sa pobare hem pobare problemija. Ked tu isi tut brige hem hijan uznemirimo, odmah molin tut e Jehovase. Temeljno proučin i Biblija. Oponašin e Anako, e apostole Pavleso hem e kralje Davideso primer. Molin tut tekle nebesko Dadese te pomožini tuće te haljove sose hijan uznemirimo (Ps. 139:23). Mukh e Jehova te pomožini tuće ked isi tut problemija, pogotovo o problemija upro kola tu našti te utičine. Ako ka ćere odova, tegani hem tu sar o psalmista šaj te phene e Jehovase: „Ked ki mi godi isi but brige, tu utešineja man hem deja man mir“ (Ps. 94:19; w20.02 24 ¶17; 25 ¶20-21).

Prekalo sveti duh o Jehova ćhivđa ko e manušengi godi pekle mislija te šaj te pisinen i Biblija. Ked amen čitinaja i Biblija hem razmislinaja odolestar so čitinđam, tegani e Devlese lafija khuvena amenđe ki godi hem ko vilo. Odola lafija pomožinena amen te ćera promene ko amaro đivdipe kolencar ćeraja e Jehova te ovel bahtalo (Jevr. 4:12). Ama, te šaj o sveti duh te pomožini amen, valjani te odvojina vreme redovno te proučina i Biblija hem hor te razmislina odolestar so čitinaja. Tegani, e Devleso Lafi ka utičini ko sa odova so vaćeraja hem ćeraja. Isto ađahar, amen valjani te služina e Devlese zajedno amare phralencar (Ps. 22:22). Ked hijam ko amare sastankija amen hijam ko than kuri e Jehovaso sveti duh delujini (Otkr. 2:29). Ked resaja amen amare phralencar hem e phenjencar amen molinaja amen aso e Jehovaso sveti duh, đilabaja đilja kola avena ando e Devleso Lafi hem šunaja govorija kola ićerena amare phralja, kola tane naimenujime prekalo sveti duh. Te šaj o sveti duh te pomožini amen, valjani angleder te pripremina amen e sastankonenđe te šaj te da komentarija (w19.11 11 ¶13-14).