Oktobar

Avdije dikhaja but dokazija so o Jehova arakhi poklo narodo. Razmislin akalestar: Amen propovedinaja hem sikavaja o ćaćipe ki celo Phuv (Mat. 28:19, 20). Ađahar mothovaja e Bengese lošna buća. Te šaj, o Beng bi ćhinavi amen, ama našti te ćerel odova. Odolese, na valjani te dara ando lošna duhovna sile. Ako amen hijam verna e Jehovase, tegani o demonja našti trajno te ćeren amenđe lošnipe. Ama, sare valjani te borina amen protiv o lošna duhovna sile hem te ovel amen poverenje ko Jehova. Odolese ka ovel amen but blagoslovija hem o Beng na ka hovavi amen. Isto ađahar, na ka mukha i dar ando demonja te ćhinavi amen te služina e Jehovase. Uzo odova, ka zorjaćera amaro amalipe e Jehovaja. O apostol Jakov pisinđa: „Protivinen tumen e Bengese, hem ov ka našel tumendar. Oven paše e Devleja, hem ov ka ovel paše tumencar“ (Jak. 4:7, 8; w19.04 24 ¶15; 25 ¶18).

Tumare ćhave tane poklon tumenđe ando Devel, „nasledstvo ando Jehova“. Tumari odgovornost tani te brininen tumen olendar. Sar šaj te zaštitinen tumare ćhaven ando seksualno zlostavljanje? Sar prvo, sikljoven pobuter ando akava problemi. Sikljoven sar šaj te penđaren okolen kola seksualno zlostavinena e ćhavoren hem kola metode isi len te hovaven e ćhavoren. Obratinen pažnja upro manuša ja situacije kola šaj te oven opasna (Posl. 22:3; 24:3). Ma bistren so ko but slučaja o zlostavljači tano điko kas o ćhavoro penđari hem upro kaste isi le poverenje. Sar dujto, otvoreno vaćeren tumare ćhavencar (Pon. zak. 6:6, 7; Jak. 1:19). Ićeren ki godi so o ćhave darana te vaćeren so hine seksualno zlostavime. Šaj darana so niko na ka verujini lenđe ja šaj o zlostavljači pretinđa lenđe so na isminena nikase te vaćeren. Ako sumnjineja so diso lošno desini pe te ćhavorese, tegani ljubazno puć le so ulo hem pažljivo šun le so god ka phenel. Sar trito, sikaven tumare ćhaven. Sikaven len so te phenen hem so te ćeren ako neko pipini len ko način sar so na valjani (w19.05 13 ¶19-22).

Sose o Jehova na mangela e ponosno manušen? Jekh razlog tano odova so odola kola vazdena pe ovena ponosna sar o Beng. Zamislin, o Beng mislinđa so o Isus – okova prekalo kaste o Devel sa stvorinđa – valjani te perel anglo oleste hem te poklonini pe olese! (Mat. 4:8, 9; Kol. 1:15, 16). Ađahar sar ponašinena pe okola so pes dikhena sar but važna, mothovi so akale svetosi mudrost tani dilinipe anglo Devel. I Biblija pomožini amen te ovel amen uravnoteženo stav amendar. Oj na phenela soj tano pogrešno te manga kokri amen. O Isus phenđa te manga amare pašutnen sar kokri amen, so mothovi so ki razumno mera valjani te ova posvetime odolese so valjani amenđe (Mat. 19:19). Ama, i Biblija na sikavi amen so valjani te mislina so amen hijam pošukar averendar. Oj dela amen savet: „Ma ćeren ništa andi holi ja andi sebičnost, nego ponizno dikhen averen sar pobare tumendar“ (Fil. 2:3; Rimlj. 12:3; w19.05 24 ¶13-14).

Razmislin kola promene valjanđan te ćere ked počminđan te sikljove ando e Devleso Lafi hem ked odlučinđan te služine olese. Te šaj te služina e Jehovase, but amendar morandiljam te menina odova soj tano lošno koro amende (1. Kor. 6:9-11). Amen hijam but zahvalna e Jehovase so pomožinđa amen te na ćera više asavke lošna buća! Amen niked na valjani te mislina so više na valjani te menina amen. Šaj ćhinavđam te ćera ozbiljna grehija kola ćerđam angleder te ova e Jehovase svedokija. Ama, pana valjani te da sa amendar te cida amen ando sa so šaj te irini amen ko odova so ćerđam angleder. Valjani te ćera duj buća. Sar prvo, na valjani te mukha te oblikujini amen akava sveto. Sar dujto, valjani te menina amaro način sar razmislinaja. I promena nane samo te menina odova save hijam avrijal. Valjani te menina amen hem andral ko vilo. Amen valjani te menina sa so isi hor ano amende, amare stavija hem amare želje (w19.06 9 ¶4-6).

Ked isi amen problemija, o sastankija šaj te ćeren palem te ovel amen snaga. Ked hijam ko sastankija, amen mukhaja e Jehova te utešini amen hem te pomožini amen. Odothe ov zorjaćeri amen prekalo poklo sveti duh, prekalo poklo Lafi hem prekalo poklo narodo. O sastankija dena amen prilika „zajedno te ohrabrina amen“ (Rimlj. 1:11, 12). Jekh phen koja vićini pe Sofija phenela: „O Jehova hem amare phralja hem phenja, pomožinena man te istrajinav. O sastankija hine maje najvažna. Haljiljum so ked pobuter đava ki služba hem ked više ćerava ki skupština, tegani pošukar šaj te borinav man mekle problemencar.“ Ked hijam obeshrabrime, ma te bistra so o Jehova dela amen po lafi so ka cidel amare brige zauvek. Ama, đi na avela odova dive ov akana pomožini amen te ikljova ko krajo amare problemencar. Ov dela amen želja hem zoralipe uspešno te borina amen e osećanjencar kola ćerena amen te ova obeshrabrime hem bizi nada (Fil. 2:13; w19.06 19 ¶17-18).

O Isus sigurno hine le but važna uputstvija te del pe učenikonenđe sose akava sastanak hine i prvo buti koja ov organizujinđa palo odova so uštinđa ando meribe! Ko sastanko kova o Isus organizujinđa, ov vaćerđa pe učenikonenđe andi jekh važno buti koja on ka ćeren ko odova vreme, a odija buti hem amen avdije ćeraja. O Isus phenđa: „Odolese, đan hem ćeren učenikonen ando manuša kotar sa o narodija... sikaven len te ićeren pe ko sa so vaćerđum tumenđe“ (Mat. 28:19, 20). O Isus mangela sa olese učenikija te propovedinen. Ov na phenđa samo akale 11 apostolenđe te ćeren odova. Sar šaj te ova sigurna ko odova? Ked o Isus dinđa i zapovest te ćeren pe o učenikija uduri ki gora, ki Galileja na hine samo olese 11 apostolija. Sar đanaja odova? Setin tut so o anđeo phenđa e đuvlenđe: „Tumen ka dikhen le [ki Galileja]“ (Mat. 28:7). Verovatno hem odola verna đuvlja hine ko odova sastanko (w20.01 2-3 ¶1-4).

O Isus objasninđa sose valjani te ađićera o protivljenje. Ov phenđa so o sveto ka mrzini amen, odolese so na hijam deo akale svetoso. O progonstvo na mothovi so o Jehova nane zadovoljno amencar, već mothovi soj tano ispravno odova so ćeraja. O manuša našti potpuno te ćhinaven amen te služina e najzorale Devlese, e Jehovase. But đene odova pokušinđe, ama na uspinđe. Te dikha jekh primer so ulo ko Dujto svetsko maribe. Ko odova vreme, o vlastija ko but phuvja progoninđe e Devlese narodo. O aktivnostija ando e Jehovase svedokija hine zabranime na samo ki nacističko Nemačka, nego hem ki Australija, ki Kanada hem ko avera phuvja. Ama, so ulo palo odova? Ked ko 1939. berš, počminđa o maribe, ko celo sveto hine 72 475 e Jehovase svedokija. O izveštaja mothovđe so ko 1945. berš, ked o maribe završinđa pe, hine 156 299 objaviteljija odolese so hine len e Jehovaso blagoslov. O broj ando e Jehovase svedokija ulo duj putija pobaro! (w19.07 9 ¶4-5).

Šaj tu nane tut biblijako kurs. Ama, ipak šaj te pomožine te ćeren pe učenikija. Na primer, ked neko nevo avela ki dvorana šaj te pozdravine le hem te pomožine le. Ađahar ka uverine le so o ćaćutne hrišćanija penđarena pe palo mangipe. Ked ko sastankija deja kratka komentarija tu šaj te pomožine okolese koj tano nevo hem ov te sikljol te del komentarija hem ađahar te mothovi pi vera. Isto ađahar, šaj te đa e neve objaviteljeja ki služba hem te pomožine le te koristini i Biblija đi vaćeri e manušencar. Ked ađahar ćereja, ka sikave le te oponašini e Hriste (Luka 10:25-28). But amare phralja hem phenja nane len but vreme, odolese so brininena pe kotar razna buća. Ama, on arakhena vreme te vodinen e biblijake kursija hem odova ćerela len bahtale (w19.07 17 ¶11, 13).

O apostol Pavle na dozvolinđa ni o šukar ni o lošna buća kola ćerđa te ciden le ando Jehova. Ov phenđa so morandilo te bistrel odova so hine hem trudinđa pe te dobini odova soj tano anglo leste, te šaj te istrajini ki pikli trka. So hine o buća kola šajinđe te ciden e Pavle ando Jehova? Sar prvo, angleder so ulo hrišćanin o Pavle hine but uspešno. Ama, olese odola buća na hine vredna (Fil. 3:3-8). Sar dujto, angleder ov progoninđa e hrišćanen hem sebepi odova i krivica šaj hine te hal ole, ama ov na mukhlja odola osećanja te ćhinaven le te služini e Jehovase. Sar trito, na mislinđa so odova so već ćerđa ki pi služba tano dovoljno. O Pavle but ćerđa ki služba, iako hine phanlo hem mardo. Jekh puti manglje barencar te mudaren le, doživinđa o brodolom, a disavo puti na hine le so te hal ni so te uravi (2. Kor. 11:23-27). Ama, so god ulo lese, kobor god buća ćerđa ja kobor god hine lese pharo, o Pavle đanđa so ov hem ponodri ka služini e Jehovase. Amen valjani te ćera isto sar ov (w19.08 3 ¶5).

But phralja hem phenja živinena ko thana kuri našti javno te đan kotar ćher ko ćher, ama on arakhlje avera načinija sar te propovedinen (Mat. 10:17-20). Ki jekh asavki phuv, jekh pokrajinski nadglednik predložinđa svako objavitelj te ćerel poklo „tereni“. On valjanđe te propovedinen pe familijaće, pe komšijenđe, pe amalenđe ki škola, ki buti hem okolenđe kas penđarena. Palo duj berš, ki odija pokrajina ulje but skupštine. Amen šaj na živinaja ki phuv kuri našti te propovedina, ama jekh buti šaj te sikljova kotar akala phralja: Ako daja sa amendar te propovedina averenđe, o Jehova sigurno ka del amen snaga te nastavina te propovedina, čak ked tano pharo (Fil. 2:13). Akana pobuter nego li angleder, valjani te prosudina soj tane o najvažna buća, te ova bizi mana, te na spotaknina averen hem te ana plod andi pravednost. Samo tegani ka ovel amen pobaro mangipe hem ka ana čast amare mangle Dadese, e Jehovase (w19.08 13 ¶17-18).

Niko amendar na mangela te ovel nekasa ko uvek mangela avera te ćeren odova so ov mangela hem na prihvatini nikase ideje. Ama, uživinaja te ova amare phralencar hem phenjencar, ked on tane „saosećajna, pherde phralikane mangipaja, milostiva, ponizna“ (1. Petr. 3:8). Ako amen uživinaja asavke manušencar, hem on ka uživinen amencar sa đi hijam ponizna. E ponizno manušenđe tano polokho te istrajinen ko problemija. Sare amen, disavo puti ka dikha ja ka doživina o buća kola ka dićhon amenđe nepravedna. Disavo puti, o manuša kola tane but sposobna, na dobinena uvek disavo priznanje. A disavo puti, avera but hvalinena okolen kola nane odobor sposobna. Odolese, o Solomon haljilo so valjani te prihvatina o đivdipe asavko savo tano hem te na brinina amen but odolestar so ovela (Prop. 6:9). Ako hijam ponizna, ka ovel polokho te prihvatina o buća ko đivdipe kola na sviđinena pe amenđe (w19.09 4-5 ¶9-10).

Okola so isi len autoritet, sar soj tane o dada, šaj te pomožinen averenđe. O Jehova dinđa e dadese te ovel poglavari ki porodica hem olestar rodela te sikavi hem te vaspitini pekle ćhaven (1. Kor. 11:3). Ama, odova na značini so o dad šaj te koristini po autoritet sar ov mangela. O Jehova ćerđa e porodica, odolese o dad tano odgovorno olese sar ponašini pe pekle porodicaja (Ef. 3:14, 15). Ked jekh dad koristini po autoritet ađahar sar so o Devel mangela, ov mothovi soj tano podložno e Jehovase. O autoritet kova o Jehova dinđa tut ma koristin ko lošno način. Priznajin tekle greške hem prihvatin o savet andi Biblija kova avera dena tut. Ako ađahar ćereja, ti porodica ka poštujini tut sose hijan ponizno. Ked molineja tut tekle porodicaja, vaćer e Jehovase sa so isi tut ko vilo te šaj ti porodica te šunel so olestar rodeja te pomožini tut hem te vodini tut. Soj tano najvažno, ko prvo than nek ovel tuće te služine e Jehovase (Pon. zak. 6:6-9). Najšukar poklon kova šaj te de tekle porodicaće tano toklo šukar primer (w19.09 15 ¶8; 17 ¶14; 18 ¶16).

O Marko hine bahtalo so služinđa averenđe. But putija ov služinđa e Pavleja hem e Petareja. O Marko šaj brininđa pe odolestar so ka han hem kaj ka soven, đi akala duj apostolija hine len avera zaduženja (Dela 13:2-5; 1. Petr. 5:13). O Pavle phenđa so o Marko tano jekh ando olese „saradnikija aso e Devleso Kraljevstvo“ kola „pomožinđe le hem zorjaćerđe le“ (Kol. 4:11). O Marko ulo jekh ando e Pavlese najšukar amala. Na primer, ked o Pavle poslednjo puti hine phanlo ko Rim, koro 65. berš, ki nevi era, ov pisinđa po dujto lil e Timotejese. Ko odova lil, o Pavle pisinđa e Timotejese te avel ko Rim hem te lel peja e Marko (2. Tim. 4:11). O Pavle but ceninđa sa so o Marko angleder ćerđa aso Jehova. Odolese, ked hine lese najpharo, ov manglja o Marko te ovel oleja. O Marko pomožinđa e Pavlese ađahar so brininđa pe te ovel le diso hajbase hem te ovel le pribor aso pisibe, sar soj tane o mastilo hem o pergamentija. O ohrabrenje hem i pomoć koja o Pavle dobinđa pomožinđa lese te istrajini ko poslednja dive angleder te ovel mudardo (w20.01 11 ¶12-13).

Amen birinđam o đivdipe kova nane lokho hem kuri valjani but te trudina amen. O Isus phenđa so ka ova progonime. Ama, amen šaj te očekujina so o Jehova ka del amen snaga te izdržina bilo kova pharipe. So pobuter izdržinaja, pobuter ka ova zorale (Jak. 1:2-4). Isto ađahar, amen šaj te očekujina so o Jehova ka del amen sa so valjani amenđe, so o Isus ka brinini pe amendar hem so amare phralja hem phenja ka ohrabrinen amen (Mat. 6:31-33; Jov. 10:14; 1. Sol. 5:11). I romni kola o Isus saćarđa „ando krvarenje“ hine la nevi snaga odova isto dive ked saćilji (Luka 8:43-48). Ama, oj šajinđa zauvek te dobini nevi snaga samo ako ulji e Isuseso verno učenik. So mislineja, so oj ćerđa? Ako odlučinđa te akhari e Isuseso jaram, zamislin savi nagrada dobinđa – te služini e Isuseja ko nebo. Sa so žrtvujinđa, te šaj te ovel e Isuseso učenik, nane ništa ked uporedini pe odoleja so dobinđa. Bilo te ovel amen nada te đa upre ja te živina ki phuv, amen šaj te ova zahvalna so prihvatinđam e Isuseso poziv: „Aven koro mande!“ (w19.09 25 ¶21-22).

Ked e Davidese manušenđe valjanđa pomoć on pućlje e barvale Izraelco kova vićinđa pe Naval te del len diso te han. On osetinđe pe slobodno te pućen le, odolese so arakhlje olese stoka ki pustinja. Ama, o sebično Naval na manglja te del len ništa. Odolese, o David hine but holjamo hem manglja te mudari e Navale hem svakone murše ko oleso ćher (1. Sam. 25:3-13, 22). Ama, e Navalesi šuži romni, i Avigeja, hine but razborito. Oj mothovđa bari hrabrost, pelji anglo e Davidese pre hem molinđa le te na mudari e Navale hem olese manušen, te na ovel krivo e ratese. Oj šukaripnjaja savetujinđa le te mukhel odova problemi ko e Jehovase vasta. E Avigejake ponizna lafija hem o razborita postupkija khuvđe e Davidese hor ko vilo. Ov haljilo so o Jehova bićhalđa la (1. Sam. 25:23-28, 32-34). I Avigeja barjaćerđa o osobine kola ćerđe la te ovel korisno e Jehovase. Isto ađahar, o Jehova šaj te koristini e phenjen, kola trudinena pe te oven taktična hem razborita, te zorjaćeren pekle porodicen hem averen ki skupština (Titu 2:3-5; w19.10 23 ¶10).

Sa o prava hrišćanija valjani te oven sigurna so nisar nane povezime e hovavne religijaja. Angleder so jekh manuš počminđa te proučini i Biblija, šaj hine deo andi hovavni religija. Šaj đelo ko olenge religiozna službe ja učestvujinđa ko olenge aktivnostija. Disave podupirinđe i hovavni religija ađahar so dinđe materijalna prilogija. Odolese, angleder so jekh manuš kova proučini i Biblija ovela nekršteno objavitelj, ov valjani te ovel sigurno so više nane deo andi hovavni religija. O student valjani te pisini jekh lil ki crkva ja ki organizacija ki koja hine hem te phenel so ov više na mangela te ovel olengo član. O prava hrišćanija valjani te oven sigurna so i buti koja ćerena nane nisar povezimi e hovavne religijaja (2. Kor. 6:14-17). Sose isi amen asavko stav? Odolese so na mangaja te podupirina o hovavne sikljoviba niti olenge lošna delija kola tane melale ko e Devlese jaćha (Is. 52:11; w19.10 12 ¶16-17).

O Jehova dinđa e Jeremijase te pisini i knjiga koja akhari oleso nav hem verovatno ov pisinđa o knjige 1. hem 2. Kraljevima. Odova zadatko pomožinđa lese te dikhel kobor tano baro e Jehovaso milosrđe premalo nesavršena manuša. Na primer, o Jeremija đanđa so ked o kralj Ahav pokajinđa pe sebepi o lošna buća kola ćerđa, o Jehova phenđa so ov na ka dikhel i nevolja koja ka avel upro leso ćher (1. Kralj. 21:27-29). Isto ađahar, o Jeremija đanđa so o Manasija grešinđa e Jehovase pobuter ando Ahav. Ama, o Jehova oprostinđa e Manasijase sose pokajinđa pe (2. Kralj. 21:16, 17; 2. Let. 33:10-13). Akala primerija sigurno pomožinđe e Jeremijase hem ov te ovel strpljivo sar o Jehova hem te mothovi milosrđe. Hajde te dikha sar o Jeremija pomožinđa e Varuhese ked jekh vreme avera buća hine lese považna ando oleso zadatko. O Jeremija na vazdinđa sigate pe vasta ando Varuh, niti mislinđa so ov našti te menjini pe. Ov pomožinđa le ađahar so vaćerđa lese e Devleso ljubazno, ama direktno savet (Jer. 45:1-5; w19.11 6 ¶14-15).

I knjiga Levitska sikavi amen so ked jekh Izraelco dinđa i žrtva zajedništva, ov ađahar mothovđa „pikli zahvalnost“ (Lev. 7:11-13, 16-18). Ov na dinđa akija žrtva sebepi so morandilo, nego sose manglja te ćerel odova. Amari služba e Jehovase tani sar odola žrtve zajedništva, sose ađahar mothovaja lese kobor mangaja le. Amen daja e Jehovase amaro najšukar sose mangaja le celone vileja. O Jehova tano but bahtalo ked dikhela so but manuša tane spremna te služinen olese sose mangena ole hem olese zakonja. Amen šaj but te utešini odova so o Jehova dikhela hem cenini na samo odova so ćeraja već hem sose ćeraja. Na primer, ako hijan phuro hem više našti te ćere odova so angleder šajinđan te ćere, šaj te ove sigurno so o Jehova haljola tut. Šaj mislineja so našti te ćere odobor but e Jehovase, ama o Jehova hor ano tute dikhela o mangipe kova ćhivela tut te ćere odova so šaj te ćere. Ov uvek ka prihvatini toklo najšukar so šaj te ćere olese (w19.11 22 ¶9; 23 ¶11-12).

But tano važno te ovel amen ispravno stav premali buti. O Devel phenđa e Solomonese te pisini akala lafija: „Sa isi le poklo vreme, sa so ćerela pe talo nebo isi le poklo vreme.“ Ov vaćerđa so isi vreme ked valjani te sadina, te gradina, te rova, te asa hem te ćhela (Prop. 3:1-8). Akava mothovi amenđe so bizi buti našti te živina, ama ni bizo odmor. O Isus hine le ispravno stav premali buti hem premalo odmor. Jekhvar, o apostolija irisalje andi jekh propovedničko akcija. On odobor propovedinđe so „na hine len vreme ni maro te han.“ Ked irinđe pe o Isus phenđa lenđe odova so pisini ko avdisutno citati (Mar. 6:30-34). Iako o Isus hem olese apostolija naštinđe te odmorinen pe svako puti ked odova valjanđa lenđe, o Isus đanđa so sarinenđe olenđe valjanđa odmor. Disavo puti, sarinenđe amenđe valjani hari te odmorina amen ja hari te menjina o aktivnostija kola ćeraja svako dive. O Devel đanđa so odova valjani amenđe hem odolese ko purano vreme ov phenđa pekle narodose svako kurko te ićeren o sabat. Iako amen avdije na ićeraja amen ko e Mojsijeso zakon, amen šaj but te sikljova ando zakon kotar o sabat (w19.12 3 ¶6-7).

O Jehova dinđa po lafi so ka brinini pe pekle verno slugendar, hem ov osetini soj tano dužno te ispunini po obećanje (Ps. 31:1-3). Uzo odova, o Jehova đanela so amen ka ova obeshrabrime ako ov na brinini pe okolendar kola tane deo andi olesi porodica. Ov dinđa po lafi so ka del amen odova so valjani amenđe te živina hem odova so valjani te šaj verno te služina olese. Ništa na ka ćhinavi le te ćerel odova! (Mat. 6:30-33; 24:45). Ked ićeraja ki godi sose o Jehova ićeri pe ko poklo lafi, tegani amen šaj te ova sigurna so ov ka pomožini amen ked tano amenđe pharo te zaradina đivdipase. Te dikha o primer ando prva hrišćanija. Ked i skupština ko Jerusalim hine la baro progonstvo, sare našlje osim o apostolija (Dela 8:1). Odova značinđa so on verovatno našalđe pi buti hem po ćher hem odolese na hine len sostar te živinen. Ama, niti o Jehova mukhlja len, niti on našalđe poklo bahtalipe (Dela 8:4; Jevr. 13:5, 6; Jak. 1:2, 3). Sar so o Jehova pomožinđa odole verno hrišćanenđe, ađahar ka pomožini hem tuće (Ps. 37:18, 19; w20.01 17-18 ¶14-15).

Ked o David arakhlja pe dadese bakren ando lav hem ando medvedi, ov haljilo so o Jehova pomožinđa le te mudari akale životinjen. Ked pobedinđa e dive, e Golijate, o David jasno dikhlja so o Jehova vodini le (1. Sam. 17:37). Isto ađahar, ked našlja ando ljubomorno kralj Saul, ov haljilo so o Jehova spasinđa le (Ps. 18, uvod). O ponosno manuš šaj te mislini so sa o buća kokri ćerđa. Ama, o David hine ponizno hem odolese šajinđa te dikhel so o Jehova pomožini le ko sa. So amen sikljovaja ando David? Amen na valjani samo te molina e Jehova te pomožini amen, nego valjani te ćera pana diso. Valjani te haljova ked hem sar ov pomožini amen. Ako hijam ponizna, ka haljova so našti sa te ćera kokri. O Jehova pomožini amen te ćera odova so našti te ćera. Isto ađahar, svako puti ked dikhaja sar o Jehova pomožini amen, amaro amalipe oleja ovela pozoralo (w19.12 20 ¶18-19).

Isi amen but razlogija te verujina so hijam but vredna e Jehovase. Ov privucinđa amen koro peste hem dikhlja sar amen reagujinđam ki šukar vest (Jov. 6:44). Ked amen počminđam te ova oleja paše hem ov počminđa te ovel popaše amencar (Jak. 4:8). Isto ađahar, ov mothovi amenđe so olese hijam vredna, ađahar so sikavi amen ko but načinija. Ov đanela svakone amendar, đanela save hijam akana hem save šaj te ova. Odolese so mangela amen, ov hem ispravini amen. Odova mothovi so ćaće hijam vredna e Jehovase! Anglo e manušenge jaćha, o David na hine vredno. Ama, ov đanđa so o Jehova mangela le hem so pomožini lese. Odova pomožinđa le te istrajini ko pharipa hem te ovel le ispravno stav premalo pekle problemija (2. Sam. 16:5-7). Savo god problemi te ovel amen, o Jehova šaj te pomožini amen ko buća te dikha averćhane hem te ikljova ko krajo bilo kova problemeja (Ps. 18:27-29). Ked tano o Jehova amencar, tegani ništa našti te ćhinavi amen te služina olese radosno (Rimlj. 8:31; w20.01 15 ¶7-8).

Ked vodineja e biblijako kurs, počmin e biblijako kurs e molitvaja. Ked redovno proučineja nekasa, najšukar tano so posig te počmine te moline tut ko e biblijako kurs. Amen valjani te pomožina e manušese kasa proučinaja te haljol so bizo e Devleso sveti duh našti te haljova e Devleso Lafi. Disave amare phralja hem phenja objasninena e manušese kasa proučinena sose molinaja amen, ađahar so čitinena o Jakov 1:5, kuri pisini: „Ako nekase tumendar valjani mudrost, nek rodel ando Devel.“ Palo odova, pućena e manuše: „Sar šaj te roda mudrost ando Devel?“ Tegani o manuš šaj ka phenel so valjani te molina amen e Devlese. Sikav e manuše kasa proučineja sar te molini pe. Pomožin le te haljol so o Jehova mangela te šunel olese iskrena molitve. Objasnin lese so ked amen kokri molinaja amen, tegani šaj te phrava amaro vilo e Jehovase hem te phena lese odova so nikase našti te phena. Na valjani te bistra, so o Jehova najšukar đanela so isi amen ko vilo (Ps. 139:2-4; w20.01 2 ¶3; 5 ¶11-12).

O Jehova odlučini ked ka birini e pomazanikonen (Rimlj. 8:28-30). Palo odova so o Isus hine uskrsnimo, o Jehova počminđa te birini e pomazanikonen. Izgleda so ko prvo veko, sa o hrišćanija hine pomazanikija. Sar nakhlje o berša, but okolendar so phenđe soj tane hrišćanija na živinđe ađahar sar so o Isus sikavđa. Ama, čak hem tegani, o Jehova disaven pomazinđa pe sveto duhoja sose on hine prava hrišćanija. Sar so o Isus vaćerđa, on hine sar o điv maškaro kukolj (Mat. 13:24-30). O Jehova hem ko poslednja dive nastavinđa te birini e manušen kola ka oven deo ando 144 000. Odolese, ako o Devel odlučini te birini nekas hari angleder te avel o krajo, nane amaro te puća amen da li tani ispravno odija odluka (Rimlj. 9:11). Valjani te pazina te na reagujina sar o radnikija andi e Isusesi priča. On žalinđe pe sose olengo gospodari dinđa isto plata hem olenđe hem okolenđe kola alje ko krajo te ćeren buti (Mat. 20:8-15; w20.01 30 ¶14).

O Jehova mangela amen te ova bahtale. Isi but razlogija sose već akana šaj te ova bahtale, iako isi amen problemija. Na primer, uverime hijam so amaro Dad but mangela amen. Đanaja o ćaćipe kova tano ko oleso Lafi, i Biblija (Jer. 15:16). Amen hijam deo andi jekh porodica ki koja sare mangena e Jehova, olese zakonija hem načelija hem kuri sare mangena jekh jekhe (Ps. 106:4, 5). Amen šaj te ova bahtale sose đanaja so ki budućnost amaro đivdipe ka ovel pana pošukar. Đanaja so pana hari o Devel ka cidel sa e lošno manušen hem so prekalo poklo Kraljevstvo ka ćerel raj ki celo phuv. Isto ađahar, isi amen nada so amare mangle kola mulje ka oven uskrsnime hem so palem ka oven amencar (Jov. 5:28, 29). Tegani ćaće ka ova but bahtale! Pana hari sa soj tano ko nebo hem ki phuv ka hvalini amare Dade hem ka služinen samo olese (w20.02 13 ¶15-16).

Ako ćerđan ozbiljno greh, ma pokušin te garave odova, nego molin tut e Jehovase hem phen lese sa so ćerđan. Odova ka pomožini tuće te osetine tut hari pošukar hem ti savest više na ka mučini tut odobor. Ama, ako mangeja palem te ove e Jehovaso amal, nane dovoljno samo te moline tut. Valjani te ćere pana diso. Tu valjani te prihvatine i disciplina. O Jehova bićhalđa e proroko, e Natane, te vaćeri e kraljeja, e Davideja ando oleso greh e Vitsavejaja. Ama, o David na rodinđa izgovorija hem na phenđa so oleso greh nane odobor baro. Ov odmah priznajinđa so grešinđa na samo premalo e Vitsavejako rom nego hem premalo Jehova. O David prihvatinđa i disciplina ando Jehova hem ov oprostinđa lese (2. Sam. 12:10-14). Ako amen ćerđam ozbiljno greh, valjani te vaćera okolencar kas o Jehova birinđa te brininen pe amendar (Jak. 5:14, 15). Sar o David, ni amen na valjani te roda izgovorija sebepi odova so ćerđam. So posig prihvatinaja i disciplina hem primeninaja o savet kova dobinđam, posig ka ovel amen palem mir hem ka ova bahtale (w20.02 24-25 ¶17-18).

O „deš manuša“ predstavinena okolen kola isi len nada so ka živinen večno ki phuv. On đanena so o Jehova birinđa e pomazanikonen kola predstavinena e „Judejcon“ hem on tane bahtale so šaj te služinen e Jehovase zajedno olencar. Iako avdije našti te đana o nav ando svako pomazaniko ki phuv, okola kola isi len nada te živinen večno ki phuv šaj te „đan“ okolencar soj tane pomazime. Sar odova? I Biblija akate vaćeri ando jekh Judejco. Ama, o lafi „tumencar“ na odnosini pe ko jekh manuš nego ko but đene. Odova mothovi so akava Judejco na predstavini samo jekhe manuše nego predstavini i grupa ando pomazime hrišćanija. Okola kola nane pomazime sveto duhoja služenena e Jehovase zajedno okolencar kola tane pomazime. O baro mnoštvo na dikhela upro pomazanikija sar upro vođe, sose on haljona so jedino o Isus tano olengo Vođa (Mat. 23:10; w20.01 26 ¶1-2).

O Isus phenđa so sare jasno ka dikhen koj tane olese učenikija ako on mangena e manušen ko način ko kova ov manglja len. Ađahar hine ko prvo veko, ama ađahar tano hem avdije. Odolese tano but važno te manga jekh jekhe, čak hem ked odova tano pharo. Puć kokri tut: „So šaj te sikljovav kotar phralja hem phenja kola hem ponodri mothovđe so mangena jekh jekhe, iako odova na hine lokho?“ Sebepi so hijam nesavršena, nane uvek lokho te manga jekh jekhe celone vileja. Ipak, mora te trudina amen te oponašina e Hriste. O Isus sikavđa amen kobor tano važno te pomirina amen nekasa ko isi le diso protiv amende (Mat. 5:23, 24). Ov phenđa so ako mangaja te ugodina e Devlese, valjani te ova ko šukar odnos averencar. O Jehova tano bahtalo ked amen daja sa amendar te pomirina amen amare phralencar. Ako hem ponodri ićeraja holi ano amende hem na mangaja te pomirina amen e phraleja, tegani o Jehova na ka prihvatini amari služba koja ćeraja olese (1. Jov. 4:20; w20.03 24 ¶1-4).

O Beng, kase i Biblija phenela soj tano „dad ando hovajbe“, hovavi e manušen pana kotar vreme ked živinđe o Adam hem i Eva (Jov. 8:44). Disave kotar olese hovajba tane o hovavno sikljovibe ando meribe hem ando đivdipe palo meribe. Kotar akala sikljoviba ulje but običaja. Sose but manuša verujinena ko odova? O Beng đanela sar amen osetinaja amen sebepi o meribe, hem odova so đanela amendar ov koristini te hovavi amen. Odolese so hijam stvorime te živina večno, amen na mangaja te mera (Prop. 3:11). O meribe tano amaro najbaro dušmani (1. Kor. 15:26). Ama iako o Beng manglja te garavi o ćaćipe ando meribe, ov na uspinđa ko odova. Isi but manuša kola đanena hem vaćerena odolestar so i Biblija phenela so ovela e manušencar ked merena hem andi nada e mulenđe (Prop. 9:5, 10; Dela 24:15). Odova ćaćipe dela amen uteha hem oslobodini amen andi dar odolestar so ovela e manušencar ked merena (w19.04 14 ¶1; 15 ¶5-6).

O Jehova o Devel mangela pe slugen. Ov uvek manglja hem uvek ka mangel olen. Ov isto ađahar mangela i pravda (Ps. 33:5). Odolese, šaj te ova sigurna ko duj buća: (1) E Jehova dukhala ked olese slugencar na postupini pe pravedno. (2) Ov obećini so olese slugencar na ka nastavini pe te postupini pe nepravedno hem so ka oven kaznime okola so na postupinena pravedno. O zakon kova o Devel dinđa e Izraelcenđe prekalo o Mojsije hine temeljimo ko mangipe. Odova zakon mothovđa pravda – pravda sarinenđe, posebno okolenđe kola našti hine te zaštinen kokri pes (Pon. zak. 10:18). Kotar akava zakon dikhaja kobor o Jehova brinini pe pekle slugenđe. Ko 33. berš ki amari era ulji i hrišćansko skupština hem tegani više na važinđa e Mojsijeso zakon. Da li odova značinđa so o hrišćanja više na ka ovel len zakon kova temeljini pe ko mangipe hem kova mothovi pravda? Naravno so na. O hrišćanja dobinđe nevo zakon – e „Hristeso zakon“. O Isus pe učenikonđe na dinđa disavo spisko ando zakonja, nego dinđa savetija, zapovestija hem načelija te pomožinen len ko đivdipe. Ko „e Hristeso zakon“ tano uključimo sa odova so o Isus sikavđa (w19.05 2 ¶1-3).

Svakone manušese valjani uteha hem sare isi amen bari sposobnost te utešina averen. Na primer, ked jekh ćhavoro perela hem kušela pi koć, šaj rovindoj ka đal ki pi mama hem ko po tata. O roditeljija našti te saćaren odija rana, ama šaj te utešinen pe ćhavore. Sigurno ka pućen le so ulo, ka kosen olese asva, ka vaćeren lese diso utešno, ka dolen le ki janglja hem ka paćaren olesi rana. Sigate palo odova, na ka rovel više hem ka nastavini te ćhelel pese. Ama, te saćol i rana ka valjani vreme. Nažalost, o ćhavore disavo puti tane povredime ko but pološna načinja. Disave hine seksualno zlostavime. Odova šaj ulo jekh puti ja beršencar desinđa pe više putija. O zlostavljanje utičini upro lende ko but načinja hem aćhavi bari dukh hor ko vilo koja na nakhela. Disave manuša kola zlostavinđe e ćhavoren tane astarde hem kaznime, a disave niked na hine astarde. Ama, čak ked odola manuša kola zlostavinđe e ćhavoren tane kaznime, o ćhavoro beršencar palo odova ka patini, čak hem ked ka barjol (w19.05 14 ¶1-2).