Januar

E Timotejesi vera temeljinđa pe ko činjenice kola pomožinđe lese te ovel popaše e Jehovaja. Isto ađahar, hem tu mora te proučine i Biblija hem te arakhe o dokazija so odova so i Biblija sikavi amen ando Jehova tano ćaćipe. Najangleder, valjani te đane sose hijan uverimo barem ko trin osnovna e biblijake sikljoviba. Sar prvo, valjani te ove uverimo so o Jehova Devel tano Stvoritelj kotar sa (Izl. 3:14, 15; Jevr. 3:4; Otkr. 4:11). Sar dujto, valjani te đane sose hijan uverimo so i Biblija tani e Devlesi nadahnuto poruka e manušenđe (2. Tim. 3:16, 17). Sar trito, valjani te ove uverimo so o Jehova isi le jekh organizovano narodo kova obožavini le, kaso vođa tano Hrist hem so e Jehovase svedokija tane odova narodo (Is. 43:10-12; Jov. 14:6; Dela 15:14). Nane potrebno te đane sa kotar i Biblija. Tu valjani te ovel tut cilj te koristine ti godi te bi pana pobuter oveja uverimo so arakhljan o ćaćipe (Rimlj. 12:1; w20.07 10 ¶8-9).

O proročanstvo ando Otkrivenje vaćeri kotar o skakavcija kola isi len manušikane muja, a upro šere „diso sar zlatna krune“ (Otkr. 9:7). On mučinena „e manušen [e Devlese neprijateljen] kola nane len e Devleso pečati ko ćekati.“ Odova period trajini 5 masek, otprilike odobor kobor hem živini jekh skakavco (Otkr. 9:4). Akate verovatno vaćeri pe ando e Devlese pomazana sluge. On hrabro objavinena e Devlese osude protiv akava lošno sveto hem odola osude lošno utičinena upro okola kola tane deo ando odova sveto. Da li odova značini so o skakavcija andi knjiga Joilo na predstavinena isto odova so predstavinena o skakavcija andi knjiga Otkrivenje? Ja. Ki Biblija, jekh isto lafi šaj te predstavini duj različita buća. Na primer, ko Otkrivenje 5:5, e Isusese phenela pe soj tano „Lav ando e Judaso pleme“, a isto odova lafi lav, koristini pe hem ko stih kotar 1. Petrova 5:8 kuri e Bengese phenela pe soj tano „ričućo lav“ (w20.04 3 ¶8; 5 ¶10).

Ked ulji e Avrahamesi romni, i Agara, e Saraki sluškinja, počminđa te ponašini pe lošno. I Sara na hine la ćhave. Ked i Agara aćhilji khamni, počminđa te ponašini pe bizo poštovanje premali Sara. I situacija hine odobor phari, so i Sara fordinđa e Agara ando ćher (Post. 16:4-6). Odolese so hijam nesavršena, šaj te mislina so i Agara hine ponosno romni koja zaslužinđa te ovel fordimi ando ćher. Ama, o Jehova na mislinđa ađahar olatar. Ov bićhalđa pe anđele koro late. Ked arakhlja la ov pomožinđa laće te menjini po stav hem blagoslovinđa la. I Agara haljilji so o Jehova dikhlja hem đanđa celo olaki situacija. Odolese hine podstaknimi te phenel: „Tu hijan Devel kova sa dikhela“ hem „kova dikhela man“ (Post. 16:7-13). So o Jehova dikhlja ki Agara? Ov đanđa ki koja situacija hine i Agara hem so sa nakhlja. O Jehova đanđa so i Agara na ponašinđa pe šukar premali Sara. Ama, isto ađahar haljilo sar i Agara osetinđa pe hem so sa nakhlja hem hine ljubazno premalo late (w20.04 16 ¶8-9).

O apostol Pavle o đivdipe ando prava hrišćanija uporedinđa jekha trkaja (Jevr. 12:1). Ako mangaja te dobina i nagrada koja o Jehova dela amenđe, sare amen bilo te ova terne ja phure, ja bilo te ovel amen snaga ja na, mora te istrajina đi o krajo (Mat. 24:13). O Pavle šajinđa slobodno te vaćeri akalestar, sose ov uspešno „i trka prastandilo đi o krajo“ (2. Tim. 4:7, 8). Ama, soj tani odija trka andi koja o Pavle vaćerđa? O Pavle podijekh puti sar primer koristinđa o igre kola ićerđe pe ki purani Grčka (1. Kor. 9:25-27; 2. Tim. 2:5). But putija, o đivdipe ando jekh hrišćanin ov uporedinđa jekha trkaja (1. Kor. 9:24; Gal. 2:2; Fil. 2:16). Jekh manuš počmini te učestvujini ki odija „trka“ ked predajini pe e Jehovase hem ked krstini pe (1. Petr. 3:21). I trka tani završimi ked o Jehova dela lese i nagrada ando večno đivdipe (Mat. 25:31-34, 46; 2. Tim. 4:8; w20.04 26 ¶1-3).

„Ama o Gospod tano verno hem ov ka zorjaćeri tumen hem ka štitini tumen ando Lošno“ (2. Sol. 3:3). Sar o Jehova štitini amen? O Jehova dinđa amen i ratno oprema te šaj te zaštitini amen ando e Satanase napadija (Ef. 6:13-17). Odija duhovno oprema tani zorali hem korisno. Ama, amen valjani te koristina svako deo andi odija oprema te šaj te ova zaštitime. Na primer, o pojas ando ćaćipe predstavini sa o ćaćipa kola tane ko e Devleso Lafi, i Biblija. Sose mora te akhara odova pojas? Odolese so o Beng tano „o dad ando hovajbe“ (Jov. 8:44). Ov već hiljade berša vaćeri hovajba hem prevarinđa „celo sveto“ (Otkr. 12:9). Ama, o ćaćipa kola tane ki Biblija zaštitinena amen ando odova te na ova prevarime. Sar ćhivaja odova simbolično pojas? Ađahar so sikljovaja o ćaćipe ando Jehova, služinaja olese „e duhoja hem e ćaćipaja“ hem ked trudinaja amen te ova poštena ko sa (Jov. 4:24; Ef. 4:25; Jevr. 13:18; w21.03 26-27 ¶3-5).

Odija phuv hine posebno than, sose odothe o manuša obožavinđe e Jehova. Pali Pedesetnica 33. berš andi nevi era, odija „Šuži phuv“ na hine više disavo doslovno than ki phuv. Odova tano logično sose e Jehovaso narodo bešela ki celo phuv. Avdije, i „Šuži phuv“ predstavini o duhovno raj kuri sa o manuša obožavinena e Jehova, ađahar so đana ko sastankija hem ki služba. Ko poslednja dive, o kralj ando sever but putija khuvđa ki „Šuži phuv.“ Sar odova? Na primer, ked i nacističko Nemačka hine kralj ando sever, posebno đi trajinđa o Dujto svetsko rat, odova kralj khuvđa ki „Šuži phuv“ ađahar so progoninđa hem mudarđa disave ando e Devleso narodo. Palo Dujto svetsko rat, o Sovjetsko Savez ulo kralj ando sever. Odova kralj khuvđa ki „Šuži phuv“ ađahar so progoninđa e Devlese narodo hem so uspudinđa len dur kotar olenge ćhera (w20.05 13 ¶7-8).

Akana ka vaćera ando nekobor manuša kola živinđe ko purano vreme, a kola hine e Devlese amala. O Avraham hine manuš kova mothovđa so hine le bari vera. Hem 1 000 berš palo oleso meribe, o Jehova vićinđa le „mo amal o Avraham“ (Is. 41:8). Odova značini so čak hem ked o manuš merela, o Jehova pana dikhela le sar pe šukar amale. O Avraham tano đivdo ki e Jehovasi godi (Luka 20:37, 38). Aver primer tano o Jov. Ked sa o anđelija ćedinđe pe ko nebo, o Jehova vaćerđa šukar buća ando Jov. Ov phenđa so ov tano „pravedno manuš, bizi mana, kova darala ando Devel hem cidela pe ando lošnipe“ (Jov 1:6-8). So o Jehova mislinđa ando Danilo kova verno služinđa lese oko 80 berš ki phuv kuri o manuša na služinđe e Devlese? Trin putija o anđelija uverinđe le soj tano ov „but manglo e Devlese“ (Dan. 9:23; 10:11, 19). Amen šaj te ova sigurna so o Jehova jedva ađićeri o dive ked ka vazdel pe mangle amalen kola mule (Jov 14:15; w20.05 26-27 ¶3-4).

Ked nekasa proučinaja i Biblija, amen mangaja te pomožina lese te sikljol kova tano e Devleso anav hem te koristini le. Ama, da li odova značini so ka šunel e Jehova sebepi so mangela le? Setin tut, so i Eva đanđa e Devleso zakon, ama ni oj, a ni o Adam na manglje Okole kova dinđa odova zakon (Post. 3:1-6). Odolese, na valjani te sikava e manušen samo kotar e Devlese zakonija. E Jehovase zakonija uvek tane amare šukaripase (Ps. 119:97, 111, 112). Ama, amare studentija šaj na ka mislinen ađahar ako na haljona so o Jehova dinđa odola zakonija sebepi so mangela amen. Odolese, šukar tano te puća len: „So mislineja, sose o Devel rodela ando pe sluge te ćeren diso ja sose na mangela diso te ćeren? So akava vaćeri tuće olestar, savo tano ov sar Osoba?“ Ako pomožinaja amare studentenđe te razmislinen kotar o Jehova hem te razvijinen o mangipe premalo oleso veličanstveno anav, verovatno ka resa đi olengo vilo. Tegani, amare studentija na ka mangen samo o zakonija, već hem Okole kova dela len. Odova ka pomožini lenđe te ovel len pozorali vera hem te istrajinen ko razna pharipa kola ka ovel len (1. Kor. 3:12-15; w20.06 10 ¶10-11).

Mora te ova strpljiva sose tano potrebno vreme te bi jekh osoba irini pe e Jehovase. But olendar kola angleder hine neaktivna phenđe so irinđe pe e Jehovase tek palo odova so nekobor putija o starešine hem avera ki skupština posetinđe len. Amari phen i Nensi, kotar i Azija, phenela: „Jekh mi šukar amalin ki skupština but pomožinđa maje. Ponašinđa pe premalo mande sar phureder phen. Oj podsetinđa man ko sa o šukar buća kola angleder ćerđam zajedno. Đi vaćerđum laće sar osetinava man, oj strpljivo šunđa man hem na ustručinđa pe te del maje savet. Ćaće hine maje pravo amal kova hine spremno te pomožini maje ked god hine potrebno.“ O saosećanje tano sar o melem kova ćhivela pe ki rana hem kova pomožini te saćaren pe o povređena osećanja. Disave neaktivna objaviteljija beršencar hine ogorčena sebepi so neko kotar i skupština povredinđa len. Odola osećanja ugušinđe i želja te irinen pe e Jehovase. Disave šaj mislinena so doživinđe nepravda. Odolese, valjani lenđe neko ko ka šunel len hem ka haljol sar osetinena pe (w20.06 26 ¶10-11).

Svako puti ked aćhoveja verno, tuće ka ovel sa polokho te ćere odova soj tano ispravno. Isto ađahar, ma te bistre, so akale svetoso gledište ando seks avela ando Beng. Odolese, ked deja sa tutar te na razmisline sar o manuša ko sveto, tu „pobedinđan e Lošnone.“ Amen priznajinaja so jedino o Jehova isi le pravo te phenel soj tano pogrešno hem trudinaja amen te na ćera disavo greh. Ama, ako pogrešinaja, odova šaj te priznajina e Jehovase ki molitva (1. Jov. 1:9). Isto ađahar, ako ćerđam dijekh ozbiljno greh, amen ka roda pomoć ando starešine, kolen o Jehova postavinđa te brininen pe amendar (Jak. 5:14-16). Ama, na valjani te dozvolina o osećaj andi krivica te mučini amen sebepi o greh kova angleder ćerđam. Sose? Odolese so amaro brižno Dad dinđa pekle Ćhave sar otkupno žrtva te šaj amare grehija te oven oprostime. Ked o Jehova phenela so ka oprostini okolenđe so kajinena pe, ov odova ćaće mislini. Odolese, nane ništa so šaj te sprečini amen te služina e Jehovase hem te ovel amen čisto savest (1. Jov. 2:1, 2, 12; 3:19, 20; w20.07 22-23 ¶9-10).

Jekh vreme o Jehova hine kokri. Ama, ov na hine usamljeno sose oleso bahtalipe na zavisini nikastar. Ki aver strana, o Devel manglja hem avera te živinen hem te oven bahtale. O mangipe podstakninđa le te počmini te stvorini (1. Jov. 4:19). Sar prvo, o Jehova stvorinđa pe Ćhave, e Isuse. Zajedno pe Ćhaveja, o Jehova stvorinđa „sa avera buća“, sar soj tane o anđelija (Kol. 1:16). O Isus hine but bahtalo so šajinđa te ćerel buti pe Dadeja (Posl. 8:30). Hem o anđelija hine len razlog te oven bahtale. On samći „bešlje ko prva redija“ hem dikhlje ked o Jehova hem oleso Vešto Graditelj, o Isus, ćerđe o nebo hem i phuv. Sar o anđelija reagujinđe? Ked i phuv hine stvorimi, on hvalinđe e Devle. Isto ađahar, ked dikhlje sa avera buća kola ov stvorinđa, posebno e manušen, on hem ponodri hvalinđe le (Jov 38:7; Posl. 8:31, fusn.). Ko sa so o Jehova stvorinđa dićhilo oleso mangipe hem olesi mudrost (Ps. 104:24; Rimlj. 1:20; w20.08 14 ¶1-2).

O Jehova stvorinđa amen te manga averen, hem avera te mangen amen. Odolese, ked neko mrzini amen, odova šaj but te dukhal amen hem šaj te ćhivel amen te dara. Jekh phral pisini: „Ked o vojnikija khuvđe man, vređinđe man hem pretinđe maje sebepi so hijum e Jehovaso svedoko, but darandiljum hem osetinđum man poniženo.“ Ked o manuša mrzinena amen, odova dukhala. Ama, amen na hijam iznenadime sose o Isus phenđa so o manuša ka mrzinen amen. O sveto mrzini e Isusese učenikonen, sose sar o Isus, hem amen „na hijam deo ando akava sveto“ (Jov. 15:17-19). Iako poštujinaja o vlastija, amen na mešinaja amen ki politika, na pozdravinaja i zastava hem na đilabaja i himna. Amen služinaja samo e Jehovase. Amen podržinaja e Jehovaso pravo te vladini iako o Beng hem oleso „potomstvo“ phenena so o Jehova nane le pravo te vladini (Post. 3:1-5, 15). Amen propovedinaja so jedino e Devleso Kraljevstvo ka rešini sa e manušenge problemija hem so pana hari odova Kraljevstvo ka cidel sa okolen kola protivinena pe olese (Dan. 2:44; Otkr. 19:19-21). Odija vest tani šukar e krotko manušenđe ama nane šukar e lošnonenđe (w21.03 20 ¶1-2).

O Jehova mothovi poštovanje e phenjenđe ađahar so dela len te ćeren jekh važno zadatko ki skupština. On tane šukar primerija sebepi soj tane mudra, verna, revna, hrabra, velikodušna hem so ćerena šukar delija (Luka 8:2, 3; Dela 16:14, 15; Rimlj. 16:3, 6; Fil. 4:3; Jevr. 11:11, 31, 35). Isto ađahar, amen but ceninaja amare phure phralen hem phenjen ki skupština. But olendar isi len problemija sastipaja sebepi pe berša. Ama, amare phure ćerena odobor kobor šaj ki služba hem koristinena pi snaga te ohrabrinen hem te sikaven averen. Amen šaj but te sikljova ando olenge iskustvija. On ćaće but značinena e Jehovase hem amenđe (Posl. 16:31). Isto ađahar, razmislin hem ando amare terne. On isi len but problemija odolese so barjona ko sveto kova kontrolišini o Beng hem upro kova utičinena olese lošna ideje. Ama, amen hijam but ohrabrime ked dikhaja sar dena komentarija ko sastankija, sar đana ki služba hem sar hrabro braninena pe verovanja. Tumen, ternalen, isi tumen važno than ki e Jehovasi skupština (Ps. 8:2; w20.08 21-22 ¶9-11).

Ked počminaja te propovedina hem ked phenaja so hijam e Jehovase svedokija, amen šaj te doživina „oluje.“ Na primer, šaj amari porodica protivini pe amenđe, amare amala marena amenđe muj, ja disave manuša na mangena te šunen amari poruka. So šaj te ćere te bi oveja hrabro? Sar prvo, ov uverimo so o Isus ando nebo hem ponodri vodini o propovedibe (Jov. 16:33; Otkr. 14:14-16). Sar dujto, zorjaćer ti vera ko e Jehovaso obećanje so ka brinini pe tutar (Mat. 6:32-34). So pobari vera ka ovel tut, tu ka ove pohrabro. Tu mothovđan bari vera ked phenđan te amalenđe hem te porodicaće so počminđan te proučine i Biblija e Jehovase svedokonencar hem so đaja ko olenge sastankija. Sigurno but buća menjinđan ko to životi hem ko to ponašanje te bi živineja premalo e Jehovase pravedna merilija. Aso sa odova valjanđa tuće vera hem hrabrost. Đi deja sa tutar te ove hrabro, tu šaj te ove uverimo so „kuri god te đa tuvaja tano o Jehova, to Devel“ (Is. Nav. 1:7-9; w20.09 5 ¶11-12).

O kralj Asa tano but šukar primer sose hine mudro manuš kova potpuno osloninđa pe upro Jehova. Ov služinđa e Jehovase na samo ko pharo vreme nego hem ko vreme ando mir. Kotar početko, „e Asaso vilo hine potpuno verno e Jehovase celo oleso đivdipe“ (1. Kralj. 15:14). O Asa mothovđa so služinđa e Jehovase celone vileja, ađahar so ćhinavđa o hovavno obožavanje ki Juda. I Biblija mothovi so ov „uništinđa o oltarija ando avera devela hem o sveta thana, phaglja o stubija aso obožavanje hem ćhinđa o sveta kašta“ (2. Let. 14:3, 5). Ov hem pe baba, e Maha, koja hine kraljica, cidinđa kotar olako položaj. Sose? Odolese so oj podstakninđa e manušen te obožavinen e idolen (1. Kralj. 15:11-13). O Asa na samo so uništinđa e idolen, već pomožinđa e manušenđe ki Juda palem te obožavinen e Jehova. O Jehova blagoslovinđa e Asa hem e manušen ki Juda ađahar so jekh period hine len mir. Đi vladinđa o kralj Asa, deš berš „hine mir ki phuv“ (2. Let. 14:1, 4, 6; w20.09 14 ¶2-3).

But putija amen daja averenđe te arakhen amare vredna buća. Na primer, šaj te ćhiva amare pare ki banka. Ked ćeraja odova, amen očekujinaja amare pare te oven ko sigurno than hem te na našalđon ja te oven ćorde. O apostol Pavle podsetinđa e Timoteje so dobinđa diso but vredno, a odova tano o tačno spoznanje andi e Devlesi namera e manušencar. Isto ađahar, o Timotej hine le čast te propovedini e Devleso lafi (2. Tim. 4:2, 5). O Pavle podstakninđa e Timoteje te arakhi odova soj tano lese dindo. Sar e Timotejese, hem amenđe tane dinde vredna buća. O Jehova mothovđa amenđe čast, ađahar so dinđa amen te đana o ćaćipe, kova nalazini pe ko oleso Lafi, ki Biblija. Odova ćaćipe tano vredno, odolese so sikavi amen sar šaj te ova e Jehovase amala hem sar šaj te ova bahtale. Ked prihvatinaja o ćaćipe hem ićeraja amen ko odova so sikljovaja, amen ovaja oslobodime ando hovavne sikljoviba hem na živinaja nemoralno (1. Kor. 6:9-11; w20.09 26 ¶1-3).

O studenti valjani te dikhel so hijan oduševimo hem uverimo ko odova so i Biblija sikavi. Palo odova, verovatno hem ov ka ovel oduševimo odoleja so sikljola. Možda šaj te vaćere lese sar o načelija andi Biblija pomožinđe tuće. Ađahar, ov ka haljol so o savetija andi Biblija šaj hem olese te pomožinen. Ko kurs, vaćer e studentese ando avera phralja hem phenja kola hine len slična problemija sar ov hem sar borinđe pe olencar. Šaj te vićine nekas andi skupština ko kurs kaso primer šaj te pomožini e studentese. Pomožin e studentese te haljol kobor tano mudro te primenini e biblijake načelija ko po životi. Ako tano o studenti ko brako, da li hem oleso bračno drug proučini? Ako na, tegani vićin le te ovel tumencar ko kurs. Podstaknin te studente te vaćeri pe familijaće hem pe amalenđe ando odova so sikljola (Jov. 1:40-45; w20.10 16 ¶7-9).

O Josif hem i Marija šajinđe te pomožinen e Isusese hem sar baro te ovel paše e Devleja, sose on šunđe o savetija kola o Jehova dinđa e roditeljenđe (Pon. zak. 6:6, 7). O Josif hem i Marija but manglje e Jehova hem olenđe hine najvažno te pomožinen pe ćhavenđe hem on but te mangen e Jehova. O Josif hem i Marija odlučinđe sar porodica te ovel len šukar duhovna navike. Svako kurko on đelje ko sastankija ki sinagoga ko Nazaret, a svako berš đelje ko Jerusalim te slavinen i Pasha (Luka 2:41; 4:16). Đi putujinđe ko Jerusalim, on šaj sikavđe e Isuse hem olese phralen hem phenjen ando odova so ulo e Jehovase narodoja angleder. Đi putujinđe šaj posetinđe o thana kola spominena pe ko spisija. Sar olengi porodica ulji sa pobari, e Josifese hem e Marijaće sigurno na hine lokho hem ponodri te ovel len šukar duhovna navike. Ama, on hine len but blagoslovija. Odolese so e Jehova ćhivđe ko prvo than ko po đivdipe, olengi porodica aćhilji paše e Jehovaja (w20.10 28 ¶8-9).

Ked hijan vićimo ko e biblijako kurs šukar bi ovela te pripremine o materijali kova ka proučinen. O Dorin, kova služini sar specijalno pioniri, phenela: „But ceninava ked mo partneri pripremini pe aso kurs. Tegani, ov šaj te phenel diso šukar.“ Uzo odova, odoleja so hem tu hem to partneri pripreminena tumen aso e biblijako kurs, ka den but šukar primer e manušese kova proučini. Čak hem ako našti detaljno te pripremine tut, šukar tano te odvojine barem hari vreme, te dikhe kola tane o glavna mislija ki odija lekcija. I molitva tani važno deo ko e biblijako kurs. Odolese, razmislin so ka phene ki molitva. Odova ka pomožini tuće te ove konkretno đi molineja tut (Ps. 141:2). I Hana, koja živini ko Japan setini pe ki jekha phenjaki molitva. Oj phenela: „Osetinđum kobor olako amalipe e Jehovaja tano zoralo hem mangljum te ovav sar oj. Isto ađahar, ked spominđa mo anav ki molitva osetinđum so mangela man“ (w21.03 9-10 ¶7-8).

O Isus uverinđa e apostole Pavle so ka resel ko Rim. Ama, disave Judejcija ko Jerusalim manglje te ađićeren e Pavle ko drumo, te astaren le hem te mudaren le. Ked o rimsko vojno zapovedniko, o Klaudije Lisija, šunđa odolese, ov pomožinđa e Pavlese. O Klaudije odmah bićhalđa bute vojnikonen te zaštitinen e Pavle ki Cezareja. Odothe, o namesnik Feliks zapovedinđa „te arakhen le ki e Irodesi palata.“ O Pavle hine dur ando okola kola manglje te mudaren le (Dela 23:12-35). Ama, akana o Fest ulo nevo namesniko umesto o Feliks hem ov manglja „te ugodini e Judejcenđe.“ Ov pućlja e Pavle: „Mangeja li te đa ko Jerusalim hem uduri anglo mande te sudini pe tuće?“ O Pavle verovatno đanđa so ka ovel mudardo ko Jerusalim. Ov phenđa: „Mangava te ikljovav anglo cari!“ O Fest phenđa e Pavlese: „Mangljan te ikljove anglo cari, anglo cari ka ikljove.“ Pana hari o Pavle ka ovel ko Rim, dur ando Judejcija kola manglje te mudaren le (Dela 25:6-12; w20.11 13 ¶4; 14 ¶8-10).

Sare amen podijekh puti mučini o osećaj andi krivica. Na primer, disave manuša osetinena pe ađahar sebepi o buća kola ćerđe angleder so penđarđe o ćaćipe. A avera osetinena pe ađahar sebepi o greške kola ćerđe palo krštenje (Rimlj. 3:23). Naravno, amen mangaja te ćera odova soj tano ispravno. Ama „sare često grešinaja“ (Jak. 3:2; Rimlj. 7:21-23). Iako na uživinaja ked mučini amen o osećaj andi krivica, podijekh puti odova tano šukar. Sose? Sose asavko osećaj šaj te podstaknini amen te menjina amen hem te na ponovina amare greške (Jevr. 12:12, 13). Ki aver strana, šaj te ovel amen but baro osećaj andi krivica ili te osetina so hijam kriva, iako pokajinđam amen hem iako o Jehova mothovđa so oprostinđa amenđe. Asavko osećaj nane šukar (Ps. 31:10; 38:3, 4). Ama, but tano važno te arakha amen andi odija zamka te ovel amen but baro osećaj andi krivica. Zamislin kobor bi o Beng ovela bahtalo ked bi amen vazdaja amare vasta amendar, iako o Jehova na vazdinđa pe vasta amendar! (Uporedin e stihonencar andi 2. Korinćanima 2:5-7, 11; w20.11 27 ¶12-13).

O Leviti ando akava Psalam, počminđa te ovel zavidno e lošno hem e ponosno manušenđe, na sebepi so ov manglja te ćerel lošna buća, nego sebepi so on hine len pošukar đivdipe olestar (Ps. 73:2-9, 11-14). Dićhilo samći so on hine len sa – barvalipe, šukar đivdipe hem so nisose na brininena pe. O Leviti morandilo te dikhel ko buća ađahar sar so o Jehova dikhela. Ked odova ćerđa, ov na hine više uznemirimo, već hine bahtalo. Ov phenđa: „Ked tut isi man, ništa aver na valjani maje ki phuv“ (Ps. 73:25). Isto ađahar, amen niked na valjani te ova zavidna e lošno manušenđe kola šaj samo dićhona so isi len pošukar đivdipe. Olengo bahtalipe ka našalđol (Prop. 8:12, 13). Ako hijam zavidna, amen ka obeshrabrina amen hem čak šaj te našala amaro amalipe e Jehovaja. Odolese ako iked ka osetine tut sar o Leviti, ćer odova so ov ćerđa. Šun e Devleso savet hem ov okolencar kola ćerena e Jehovasi volja. Ked mangeja e Jehova pobuter ando bilo so aver, tu ka ove bahtalo hem ka aćhove ko drumo kova legari ko „ćaćutno đivdipe“ (1. Tim. 6:19; w20.12 19 ¶14-16).

Ked ki molitva vaćereja e Jehovase te brige, vaćer lese hem kobor hijan lese zahvalno. Šukar tano te razmislina ando sa o šukar buća kola isi amen, čak hem tegani ked isi amen bare problemija. Ako disavo puti na đaneja sar te phene lese sar osetineja tut, tegani ma bistri so o Jehova ka odgovorini ki ti molitva hem ako samo pheneja lese: „Molinava tut, pomožin maje!“ (2. Let. 18:31). Oslonin tut upri e Jehovasi mudrost, a na upri tikli. Ko oftoto veko angleder i nevi era, o manuša andi Juda darandilje so ka napadinen len o Asircija. Odolese rodinđe pomoć ando Egipat (Is. 30:1, 2). O Jehova upozorinđa len so na ka nakhen šukar ako ćerena odova (Is. 30:7, 12, 13). Prekalo prorok Isaija, o Jehova phenđa lenđe so šaj te zaštitini len. Ov phenđa: „Arakhen o mir hem o pouzdanje [upro Jehova], odova ka ovel tumari snaga“ (Is. 30:15b; w21.01 3-4 ¶8-9).

Sar nagrada sose hine verna, e Hristese pomazana phralja ka oven kraljija hem sveštenikija oleja ko nebo (Otkr. 20:6). Sa okola kola tane deo andi e Devlesi nebesko porodica jedva ađićerena te dikhen sar o 144 000 pomazanikija dobinena pi nebesko nagrada. Palo odova so vaćerđa ando 144 000 kraljija hem sveštenikija, o apostol Jovan dikhela diso but uzbudljivo, o „baro mnoštvo“ kova preživinđa o Armagedon. I prvo hem i dujto grupa razlikujinena pe, odolese so i dujto grupa tani but pobari hem ki odija grupa nane odredimo kobor manuša ka oven (Otkr. 7:9, 10). On tane „uravde ko parne fistanja“ so mothovi so arakhlje pe ando „melalipe“ kotar e Bengeso sveto hem aćhilje verna e Devlese hem e Hristese (Jak. 1:27). On ko sa o glaso vaćerena so on tane spasime sebepi odova so ćerđe o Jehova hem o Isus, e Devleso Bakro. Celo vreme ko vasta ićerena e palmake grane, so mothovi so radosno prihvatinena e Isuse sar e Kralje, kas o Jehova pomazinđa (Uporedin e stihonencar ando Jovan 12:12, 13; w21.01 15-16 ¶6-7).

O rom šaj te sikljol te ovel šukar poglavari ađahar so ka oponašini e Jehova hem e Isuse ko odova sar on mothovena po poglavarstvo. Na primer, hajde te dikha kobor tani i poniznost šuži osobina. O Jehova tano najmudro osoba ko celo svemir, ama ov tano spremno te šunel so olese sluge mislinena (Post. 18:23, 24, 32). Iako o Jehova tano savršeno, ov na očekujini amendar akana te ova savršena. Umesto odova, ov pomožini e nesavršeno manušenđe te oven uspešna đi služinena lese (Ps. 113:6, 7). U stvari, i Biblija čak phenela so o Jehova tano amaro „pomoćniko“ (Ps. 27:9; Jevr. 13:6). O kralj David đanđa so šajinđa te završini bari buti koja hine lese dindi samo sebepi e Jehovasi poniznost. Hajde te dikha e Isuseso primer. Iako hine Gospod hem Učitelj, ov thovđa pe učenikonenge pre. Kokri o Isus phenđa: „Dinđum tumenđe primer hem tumen te ćeren ađahar sar so me ćerđum tumenđe“ (Jov. 13:12-17). Iako hine le baro autoritet, o Isus na očekujinđa avera te služinen lese. Umesto odova, ov služinđa averenđe (Mat. 20:28; w21.02 3-4 ¶8-10).

Ako hijan terno phral, sebepi i snaga koja isi tut, tu šaj te ćere but buća ki skupština. Tu ćaće hijan blagoslov te skupštinaće. Šaj jedva ađićereja te služine sar sluga pomoćnik. Ama, šaj mislineja so avera dikhena upro tute sar upro neko ko nane zrelo hem ko nane le iskustvo te bi ćerela disavo važno zadatko. Iako hijan terno, isi diso so šaj te ćere te bi zaslužineja e phralengo hem e phenjengo poverenje hem poštovanje. Da li hem tu sar terno phral isi tut disave veštine sebepi kola šaj te pomožine averenđe ki skupština? Sigurno so isi tut. Na primer, sigurno đaneja šukar te koristine o elektronska uređaija. Odolese, šaj te pomožine e phurenđe ki skupština te šaj hem on te sikljon te koristinen odola uređaija ked isi len lično proučibe hem ked učestvujinena ko sastankija. Ked ćereja sa odova, to nebesko Dade ka ovel ponosno upro tute (w21.03 2 ¶1, 3; 7 ¶18).

Naravno, čak iako i romni isi la pobari škola ando po rom, ov tano odgovorno olesi porodica te ovel la porodično proučibe hem te učestvujini ko avera duhovna aktivnostija (Ef. 6:4). I romni mora te ovel podložno pe romese, ama tani hem ponodri odgovorno asi pi duhovnost. Te šaj te ćerel odova, oj mora te arakhi vreme te proučini hem hor te razmislini odolestar. Odova ka pomožini laće hem ponodri te mangel hem te poštujini e Jehova hem te na ovel laće pharo te ovel podložno pe romese. O romnja kola aćhona podložna pe romese, sebepi so mangena e Jehova, tane poradosna hem pozadovoljna ando okola kola na poštujinena o poglavarstvo kova o Jehova ćhivđa olenđe. Isto ađahar, on mothovena šukar primer e terne romnjenđe. Sebepi olengo, ki porodica hem ki skupština ka ovel mir hem mangipe (Titu 2:3-5). Avdije, najbaro deo ando e Jehovase verna sluge tane o romnja (Ps. 68:11; w21.02 13 ¶21-23).

O apostol Pavle aćhavđa amenđe šukar primer andi hrabrost hem istrajnost. Podijekh puti, hem ov hine slabo. Ama, uspinđa te istrajini sose hine uverimo so o Jehova ka del lese snaga koja ka valjani lese (2. Kor. 12:8-10; Fil. 4:13). Hem amen šaj te ovel amen asavki snaga hem hrabrost ako ponizno priznajinaja so valjani amenđe e Jehovasi pomoć (Jak. 4:10). Amen šaj te ova uverime so o kušnje nane kazna ando Jehova. O učenik Jakov uverini amen: „Ked tano neko ki kušnja, ma te phenel: „O Devel iskušini man. Sose niko našti te iskušini e Devle e lošno bućencar, a ni ov nikas na iskušini e lošnipaja“ (Jak. 1:13). Ked ka ova uverime ko odova, amen ka ova pana popaše amare nebesko Dadese, kova mangela amen. O Jehova „na menjini pe“ (Jak. 1:17). Ov podržinđa e hrišćanen ko prvo veko ked hine len kušnje hem isto ađahar hem amen ka podržini avdije. Iskreno rode ando Jehova te del tut mudrost, vera hem hrabrost. Ov ka odgovorini ko te molitve (w21.02 31 ¶19-21).

Šaj te ohrabrine e studente kova avela ko sastankija ađahar so ka mothove so hijan zainteresovano olese (Fil. 2:4). Šaj te phene lese so hijan bahtalo sebepi so dikheja so ćerela promene. Isto ađahar, šaj te puće le sar đala oleso proučavanje, sar tani olesi porodica, sar tano lese ki buti. Ked ađahar vaćereja oleja, tegani ka ove popaše oleja. Ked hijan amal oleja, odova ka pomožini lese te napredujini đi o krštenje. Đi o student nastavini te napredujini hem te ćerel promene, pomožin lese te osetini pe soj tano deo andi skupština. Odova šaj te ćere ađahar so ka vićine le koro tute (Jevr. 13:2). Isto ađahar, ked o student ispunini o uslovija te ovel nekršteno objavitelj, šaj te vićine le te đal tuvaja ki služba. O Dijego ando Brazil, phenela: „But phralja vićinđe man te đav olencar ki služba. Odova hine najšukar način te upoznajinav len pošukar. Đi upoznajinđum len pošukar, uljum pana popaše e Jehovaja hem e Isuseja“ (w21.03 12 ¶15-16).

O Isus phenđa pe učenikonenđe te mangen pe neprijateljen (Mat. 5:44, 45). Odova nane lokho te ćera, ama sebepi so e Devleso sveti duh pomožini amen, amen šaj odova te ćera. Ko plod ando sveti duh tane o osobine sar soj tane, o mangipe, o strpljenje, i ljubaznost, i blagost hem i samokontrola (Gal. 5:22, 23). Odola osobine pomožinena amenđe te istrajina ked avera mrzinena amen. But manuša kola angleder protivinđe pe, menjinđe po stav ked dikhlje sar olengi romni, sar olengo rom, ćhavo, ćhaj ja komšije, mothovena akala šukar osobine. But olendar ulje amare phralja hem phenja. Ako tano tuće pharo te mange okolen kola mrzinena tut sebepi so služineja e Jehovase, tegani molin tut aso sveti duh (Luka 11:13). Hem ov uverimo so jekh andi najšukar buti so šaj te ćere tani uvek te šune e Devle (Posl. 3:5-7). Ked o manuša mrzinena amen, sebepi odova amen šaj te osetina amen lošno hem odova šaj te dukhal amen. Ama, o mangipe tano but pozoralo. O mangipe osvojini averengo vilo hem anela radost e Jehovase. Ama, čak iako amare protivnikija hem ponodri mrzinena amen, amen šaj te aćhova bahtale (w21.03 23 ¶13; 24 ¶15, 17).

O prorok Joilo vaćeri kotar o vojno napad (Joilo 2:1, 8, 11). O Jehova phenđa so ka upotrebini pi „bari vojska“ (e vavilonsko vojnikonen) te kaznini e neposlušno Izraelcen (Joilo 2:25). Odolese tano normalno so asi akija vojska phenela pe so avela „ando sever“, sose o Vaviloncija napadinđe o Izrael kotar sever (Joilo 2:20). Akija vojska tani organizujimi sar o skakavcija. O Joilo olendar pisinđa: „Svako [vojniko] đala pravo anglal. . . khuvena ki diz. . . Ukljena ko ćhera, khuvena ando prozorija sar o lopovi“ (Joilo 2:8, 9). Da li šaj te zamisline odija scena? Kuri god te pođine othe tane o vojnikija. Niko našti te garavi pe, ni te našel andi akija vavilonsko vojska. Sar o skakavcija, o Vaviloncija (o Haldejcija) napadinđe o Jerusalim ko 607. berš, angleder i nevi era. I Biblija phenela: „O haldejsko kraljo. . . na mothovđa samilost ni premalo ćhave, ni premalo ćhaja, ni premalo phure, ni premalo slaba“ (2. Let. 36:17; w20.04 5 ¶11-12).