Februar

Penđar te phralen hem te phenjen pošukar. Vaćer olencar angleder hem palo sastanko. Đa olencar ki služba hem ako šaj vićin len te aven koro tute ko ručko. Ked ka ćere odova šaj ka ove iznenadimo. Na primer, šaj ka dikhe so i phen kolatar mislinđan so na mangela te družini pe, u stvari tani lađutni. O phral kolestar mislinđan so mangela o materijalna buća, u stvari tano phravde vasteso. Ja i porodica koja but putija harini ko sastanak, u stvari isi la protivljenje ćhere (Jov 6:29). Naravno, amen na valjani „te mešina amen ko tuđa buća“ (1. Tim. 5:13). Ama, ipak tano šukar te đana diso ando amare phralja hem phenja hem ando odova so nakhlje ko po đivdipe. Šaj isi dijekh phral ja phen koja nervirini tut, ama ako deja sa tutar šukar te penđare len, verovatno ka ove podstaknimo te mothove saosećanje premalo lende. Valjani but te trudina amen te penđara amare phralen pošukar. Ked primenineja o savet andi Biblija te phrave to vilo, tegani oponašineja e Jehova kova mangela „sa e manušen“ (1. Tim. 2:3, 4; 2. Kor. 6:11-13; w20.04 16-17 ¶10-12).

I rat angleder te merel, o Isus podstakninđa pe učenikonen te mangen jekh jekhe. Ov đanđa so o samopožrtvovano mangipe ka pomožini lenđe te aćhon ko jekhipe hem te istrajinen iako o manuša ko sveto ka mrzinen len. Te dikha o primer ando phralja hem phenja ko Solun. Pana kotar o vreme ked i skupština ko Solun hine osnujimi, on hine progonime. Ama, sebepi so odola phralja hem phenja mothovđe vernost hem mangipe, on ulje amenđe baro primer (1. Sol. 1:3, 6, 7). O Pavle ohrabrinđa len hem ponodri te mothoven mangipe, čak „te ćeren odova pana pobuter“ (1. Sol. 4:9, 10). O mangipe bi podstaknini len te tešinen okolen soj tane obeshrabrime hem te pomožinen okolenđe kola tane slaba (1. Sol. 5:14). On ićerđe pe ko odova e Pavleso savet hem odolese ked o Pavle pisinđa po dujto lil, jekh berš palo odova, ov šajinđa te phenel olenđe: „O mangipe kova osetinena jekh premalo aver tano sa pobaro“ (2. Sol. 1:3-5). Olengo mangipe pomožinđa lenđe te istrajinen ko pharipa hem ko progonstvo (w21.03 22 ¶11).

Ako mangaja te dobina o večno đivdipe sar nagrada, amen mora te živina sar hrišćanja (Dela 20:24; 1. Petr. 2:21). Ama, o Beng hem okola kola oponašinena le mangena te cida amen kotar pravo drumo hem te prasta olencar (1. Petr. 4:4). Olenđe na sviđini pe o način sar amen živinaja hem odolese marena amenđe muj. On phenena so olengo drumo tano pošukar sose legari đi i sloboda. Ama, amen đanaja so on u stvari hovavena kokri pes (2. Petr. 2:19). But tano važno te birina o pravo drumo hem te aćhova ko odova drumo. O Beng bi najviše mangela ked više na bi prastaja ko tesno drumo kova vodini ko đivdipe. Ov bi ovela but bahtalo ked bi đaja buvle drumoja koleja but manuša đana. Ko odova drumo tano polokho te đal pe hem but manuša mangena te đan oleja. Ama, ov „legari ko uništenje“ (Mat. 7:13, 14). Ako na mangaja te ova prevarime ando manuša kola na šunena e Jehova hem ako mangaja te aćhova ko šukar drumo, mora te verujina e Jehovase hem te šuna le (w20.04 26 ¶1; 27 ¶5, 7).

Ko amaro vreme, i Rusija hem olake saveznikija isto khuvđe ki „Šuži phuv“ (Dan. 11:41). Sar? Ko 2017. berš, i Rusija zabraninđa amare aktivnostija hem phanlja disave amare phralen hem phenjen. Uzo odova, i Rusija zabraninđa amare publikacije, a jekh olendar tani i Biblija, o prevod Novi svet. Isto ađahar, i Rusija lelja pese amare objektija ki odija phuv, sar soj tane i podružnica, o dvorane hem o kongresna dvorane. Palo sa akala događaja, o Vodeće telo ko 2018. berš haljilo so i Rusija hem olake saveznikija tane o kralj ando sever. Čak iako disave vlastija progoninena e Jehovase narodo, amare phralja na pokušinena te borinen pe olencar ja te menjinen i vlast. Umesto odova, on šunena e biblijako savet te molinen pe aso sare „kola tane ki vlast“, pogotovo ked o vlastija anena o odluke kola šaj te utičinen upri amari versko sloboda (w20.05 14 ¶9).

Roditeljija, ako mangena tumare ćhave te oven uverime so odova so i Biblija sikavi tano ćaće, on valjani kokri te oven amala e Devleja hem te oven uverime so odova so i Biblija sikavi tano ćaće. Ako tumen sikavena tumare ćhaven kotar o ćaćipe ando Devel, tumen valjani te oven šukar primer tumare ćhavenđe, ađahar so kokri tumen ka proučinen i Biblija. Tumen mora te odvojinen vreme te bi hor razmislinena ando odova so sikljona. Tek tegani šaj te sikaven tumare ćhaven te ćeren isto odova. Sar so sikavena dijekhe studente, valjani te sikaven hem tumare ćhaven te koristinen o alatija aso istraživanje, sar soj tane o Vodič kroz publikacije hem i Onlajn biblioteka. Ked ka ćeren ađahar, ka pomožinen tumare ćhavenđe te ceninen e Jehova hem te verujinen so ov koristini e verno hem e razborito robe, te pomožini amenđe te haljova i Biblija (Mat. 24:45-47). Ma sikaven tumare ćhaven samo ando osnovna e biblijake ćaćipa. Pomožinen lenđe te razvijinen zorali vera ađahar so ka sikaven len ando „e Devlese hor buća“, ama đi ćerena odova len ko obzir olenge berša hem sposobnostija (1. Kor. 2:10; w20.07 11 ¶10, 12-13).

Avdije ko celo sveto isi nekobor milionja manuša kola tane e Jehovase amala. Asavko amalipe tano moguće odolese so on mothovena i vera ki e Isusesi otkupno žrtva. Sebepi odija otkupno žrtva, amen šaj te ova e Jehovase amala, te predajina amaro đivdipe olese hem te krstina amen. Ked ćeraja akala važna buća, amen ovaja deo ando odola milionija manuša kola predajinđe pe hem krstinđe pe, a kolenđe tano o Jehova, najbari Osoba ko svemir, najpaše amal. Sar šaj te mothova so amaro amalipe e Devleja tano but vredno amenđe? Sar o Avraham hem o Jov, kola verno služinđe e Devlese više ando šel berš, hem amen mora te aćhova verna bizo obzir kobor već služinaja e Jehovase ko akava sveto. Sar o Danilo, hem amen mora te cenina amaro amalipe e Devleja pobuter nego amaro đivdipe (Dan. 6:7, 10, 16, 22). Sebepi e Jehovasi pomoć, amen šaj te izdržina bilo kova pharipe hem ađahar te aćhova paše amala oleja (Fil. 4:13; w20.05 27 ¶5-6).

O kralj David dikhlja sar avere manušesi romni nanđola. Ov but šukar đanđa e Jehovaso zakon, kova phenela: „Ma mang te pašutnese romnja“ (Izl. 20:17). Ama, o David ipak nastavinđa te dikhel la. Oleso vilo hine podelimo. Ki jekh strana manglja te ovel odole romnjaja, e Vitsavejaja, a ki aver strana manglja te ćerel odova soj tano ugodno e Jehovase. Iako o David beršencar manglja hem poštujinđa e Jehova, ki akija situacija ov manglja te zadovoljini pi sebično želja. Ko krajo, o David ćerđa disave lošna buća. Odoleja so ćerđa, but lađaćerđa e Jehovaso anav. Isto ađahar, sebepi oleso, o manuša hem olesi porodica doživinđe but pharipa iako na hine kriva nisose (2. Sam. 11:1-5, 14-17; 12:7-12). O Jehova disciplinujinđa e Davide hem ov palem hine le šukar odnos e Jehovaja (2. Sam. 12:13; Ps. 51:2-4, 17). O David niked na bisterđa kobor hine lese pharo hem kobor dukhavđa le ked dozvolinđa oleso vilo te ovel podelimo. Da li o Jehova pomožinđa e Davidese te ovel le vilo kova nane podelimo? Ja, sose e Devleso Lafi vaćeri so o David hine „celo vileja odano e Jehovase“ (1. Kralj. 11:4; 15:3; w20.06 11 ¶12-13).

Ki Biblija koristini pe o šelo te bi opisujini pe e Jehovaso mangipe premalo oleso narodo. Sar tano e Devleso mangipe sar šelo? Hajde te dikha jekh primer. Zamislin so tasljoveja ko nemirno more hem neko fordela tuće o pojas aso spasavanje. Sigurno hijan zahvalno asi odija pomoć, sose odova pojas pomožini tuće te aćhove ki površina. Ama, odova pojas nane dovoljno te bi aćhoveja đivdo, sose o pani tano šudro hem jedino šaj te preživine ako aveja đi disavo čamco. Valjani neko te fordel tuće o šelo hem te privucini tut đi o čamco. Sar so phenela o avdisutno citati, o Jehova koristinđa o mangipe te bi privucini e Izraelcen koro peste. Hem avdije, o Devel ađahar postupini okolencar kola „tasljona“ ko pe problemija hem brige. O Jehova mangela odola manuša te đanen so ov mangela len hem so mangela te pomožini lenđe te irinen pe olese. O Devel šaj te koristini tut te bi mothovi lenđe mangipe. But tano važno te uverina okolen kola tane neaktivna so o Jehova hem amen mangaja len (w20.06 27 ¶12-13).

Ked o učenik Stefan hine mudardo, but hrišćanija našlje ando Jerusalim hem „đelje ki Judeja hem ki Samarija, hem čak đi o Kipar hem đi i Antiohija“ (Dela 7:58–8:1; 11:19). Šaj samo te zamislina kobor pharipa hine len odola učenikija. Ama bizo obzir ko odova, on revno propovedinđe i šukar vest kuri god đelje hem ko razna thana ulje neve skupštine (1. Petr. 1:1). Ama, palo odova hine len pana pobare problemija. Na primer, oko 50. berš ki nevi era, o rimsko imperator Klaudije naredinđa sa o Jevreja te đan ando Rim. Odolese o Jevreja kola ulje hrišćanija, morandilje te mukhen po ćher hem te đan ko aver than (Dela 18:1-3). Oko 61. berš ki nevi era, o apostol Pavle pisinđa ando odova so e hrišćanenđe marđe muj, so ćhivđe len ko phanlipe hem so lelje olendar odova so hine len (Jevr. 10:32-34). Hem sar avera manuša, hem o hrišćanija hine ćorore hem naborme (Rimlj. 15:26; Fil. 2:25-27; w21.02 26-27 ¶2-4).

Ako trudinaja amen te zorjaćera amari vera, o Beng hem okola soj tane ki olesi strana na ka šaj te sprečinen amen te živina premalo ćaćipe (2. Jov. 8, 9) Amen mora te očekujina so o sveto ka mrzini amen (1. Jov. 3:13). O Jovan podsetini amen so „celo sveto tano ko e Lošnonese vasta“ (1. Jov. 5:19). Sar o krajo ando akava lošno sveto tano sa popaše, e Bengesi holi tani sa pobari hem pobari. Ov na samo so lukavo napadini amen ađahar so koristini o nemoral hem o hovajba ando otpadnikija, već hem direktno napadini amen ađahar so koristini o progonstvo. O Beng đanela so aćhilo lese samo pana hari vreme te zaustavini amaro propovedanje hem te peravi amari vera. Odolese, na hijam iznenadime so ko disave phuvja sa ja disave amare aktivnostija tane zabranime. Ama, amare phralja hem phenja ko odola phuvja istrajinena čak hem ko asavke okolnostija. On dokažinena so amen šaj te aćhova zorale, bizo obzir so o Beng ćerela amenđe (w20.07 24 ¶12-13).

O Jehova manglja o manuša te živinen večno ki but šuži planeta koja ov stvorinđa. Ama, ked o Adam hem i Eva pobuninđe pe protiv olengo manglo Dad, o greh hem o meribe ućharđe i phuv (Rimlj. 5:12). So o Jehova ćerđa sebepi odova? Ov odmah mothovđa sar ka spasini e manušen (Post. 3:15). O Jehova dinđa pe Ćhave sar otkupno žrtva te bi e Adamese hem e Evake ćhave ovena oslobodime ando greh hem ando meribe. Odoleja dozvolinđa svakonese te birini te služini Olese hem sar nagrada te dobini večno životi (Jov. 3:16; 1. Kor. 15:21, 22). Ked o Jehova prekalo po Ćhavo ka uskrsnini bute manušen, logično tano so na ka irini sarinen ko životi ko isto vreme. Sose na? Sose ked bi sarine kotar jekhvar irinena pe ko životi, tegani bi ki phuv ovela haos. A o Jehova tano organizovano Devel hem ov đanela so o buća valjani te oven organizujime te bi o manuša živinena ko mir (1. Kor. 14:33; w20.08 14 ¶3; 15 ¶5).

O student valjani te haljol so o cilj ando kurs tano te pomožini lese te počmini te služini e Jehovase sar oleso Svedoko. Hari po hari, o studenti kova tano ozbiljno, ka ispunini po cilj te krstini pe. Najangleder, o studenti valjani te upoznajini hem te zamangel e Jehova hem te razvijini vera upro leste (Jov. 3:16; 17:3). Palo odova, ov ovela amal e Jehovaja hem e phralencar hem e phenjencar (Jevr. 10:24, 25; Jak. 4:8). Isto ađahar, o studenti ćhinavi pekle lošna navike hem pokajini pe aso pe grehija (Dela 3:19). Uzo odova, ov trudini pe te vaćeri o ćaćipe averenđe (2. Kor. 4:13). Ko krajo, ov predajini po đivdipe e Jehovase hem odova mothovi ađahar so krstini pe (1. Petr. 3:21; 4:2). Odova dive sare hijam bahtale! Đi o studenti hari po hari ispunini po cilj, vilestar pohvalin le hem podstaknin le hem ponodri te napredujini (w20.10 17-18 ¶12-13).

Ked uporedineja tut averencar ki skupština, tegani tu našti te dikhe kobor tu vredineja. Disave ki skupština šaj tane but sposobna te sikaven, đanena šukar te organizujinen o buća ja đanena šukar te tešinen hem te ohrabrinen averen. Šaj mislineja so tu na hijan sposobno sar on. Ako ađahar mislineja, odova mothovi so hijan ponizno hem skromno (Fil. 2:3). Ama, ov oprezno. Ako stalno uporedineja tut okolencar kola tane but sposobna, šaj te obeshrabrine tut. Čak šaj te misline, sar so o apostol Pavle phenđa, so nane tut to than ki skupština. Ko prvo veko, o Jehova disave hrišćanenđe dinđa čudesna darija ando sveti duh, ama na dobinđe sa o hrišćanija isto dar (1. Kor. 12:4-11). Ipak, svako hrišćanin hine lese važno. Avdije, nane amen odola čudesna darija ando sveti duh. Sar tegani hem avdije, iako šaj nane amen ista sposobnostija, sare hijam vredna e Jehovase (w20.08 23 ¶13-15).

Ked molineja tut asi hrabrost hem odvažnost, o Jehova ka odgovorini ko te molitve hem niked na ka aćhavi tut (Dela 4:29, 31). Ov uvek ka podržini tut. Razmislin sar pomožinđa tuće ked hine tut dijekh problemi hem sar dinđa tuće snaga te ćere promene ko to životi. Ov uverimo so Okova kova vodinđa pe narodo prekalo Crveno more, šaj te pomožini hem tuće te ove e Hristeso učeniko (Izl. 14:13). Tu šaj te ovel tut isto pouzdanje sar o psalmista kova phenđa o lafija ando avdisutno citati. O Jehova šaj te pomožini hem e neve objaviteljenđe te oven hrabra. Jekh olendar tani i phen Tomojo. Ked počminđa te propovedini kotar ćher ko ćher, i stanarka pištinđa upro late hem phenđa laće: „Na mangava te vaćerav e Jehovase svedokonencar!“ hem phanlja o udara. I phen Tomojo hrabro phenđa e phenjaće koja hine olaja ki služba: „Da li šunđan odova? Na phenđum nijekh lafi, a oj penđarđa so hijum e Jehovaso svedoko. But hijum bahtali sebepi odova!“ I phen Tomojo akana služini sar stalno pionir (w20.09 6 ¶13-14).

O Asa phenđa e manušenđe so o Jehova tano okova so „dinđa [len] mir ko sa olenge granice“ (2. Let. 14:6, 7). O Asa na mislinđa so odova period ando mir tano vreme te opustini pe. Umesto odova, ov koristinđa odova vreme te ćerel o dizja, o zidija, o kule upre ko zidija hem e dizjake udara. E manušenđe ki Juda, ov phenđa: „I phuv tani pana amari.“ Ko so o Asa mislinđa? Ov mislinđa ko odova so o manuša na hine len neprijateljija kola bi sprečinena len te đan kaj mangena hem te gradinen. Odolese podstakninđa len mudro te koristinen odova period ando mir. Isto ađahar, o period ando mir o Asa koristinđa te opremini pekle vojska (2. Let. 14:8). Da li odova značinđa so ov na hine le poverenje upro Jehova? Na. Sar kralj, o Asa đanđa so olesi dužnost hine te pripremini e manušen ko pharipa kola šaj ka ovel len. O Asa đanđa so o period ando mir kova hine ki Juda, verovatno na ka trajini zauvek. Ađahar hem hine (w20.09 15 ¶4-5).

Odolese so isi le šukar namera, jekh starešina šaj te mislini so isi le pravo te ćhivel disave pravilija te bi zaštitini e Devlese bakren. Ama, o autoritet kova o starešina ki skupština isi le tano but averćhane ando autoritet kova o poglavari ki porodica isi le. Na primer, o Jehova ćhivđa e starešinen ko disave situacije te oven sar sudije hem dinđa len odgovornost te ciden andi skupština okolen kola na kajinena pe (1. Kor. 5:11-13). Ki aver strana, o Jehova e poglavarenđe ki porodica dinđa disavo autoritet kova na dinđa e starešinenđe. Na primer, ov dinđa autoritet e poglavarese ki porodica te ćhivel pravilija pe porodicaće hem te pobrinini pe sare te ićeren pe ko odola pravilija (Rimlj. 7:2). Jekh poglavari isi le pravo te odlučini ked olese ćhave valjani te irinen pe ćhere. Isto ađahar, ov isi le autoritet te kaznini pe ćhaven, ako on na šunena le (Ef. 6:1). Naravno, o poglavari kova mangela pe porodica ka vaćeri pe romnjaja angleder so ćhivela disave pravilija ko ćher, sose ipak on duj tane „jekh telo“ (Mat. 19:6; w21.02 16-18 ¶10-13).

Jekh razlog sose o ćaćipe ando e Devleso Lafi tano vredno, tano sebepi so Jehova mothovi le samo e ponizno manušenđe kola isi len ispravno stav (Dela 13:48). Odola ponizna manuša prihvatinena so o verno hem razborito robo sikavi amen o ćaćipe andi Biblija (Mat. 11:25; 24:45). Amen našti kokri te haljova i Biblija hem ništa nane odobor vredno sar o ćaćipe (Posl. 3:13). Isto ađahar, o Jehova hem amenđe dinđa čast te sikava averen o ćaćipe olestar hem andi olesi namera (Mat. 24:14). I poruka koja vaćeraja tani but vredno sose pomožini e manušenđe te oven deo andi e Jehovasi porodica hem dela len prilika te ovel len večno đivdipe (1. Tim. 4:16). Bizo obzir da li učestvujinaja ki služba but ja hari, amen odoleja so ćeraja podržinaja o najvažno delo kova ćerela pe ko amaro vreme (1. Tim. 2:3, 4). Ćaće tani bari čast te ova e Devlese saradnikija (1. Kor. 3:9; w20.09 26-27 ¶4-5).

Đi putujinđa ko Rim, o apostol Pavle palem hem ko pravo vreme dobinđa pomoć ando Jehova prekalo phralja hem phenja. Na primer, e Pavlese duj verna amala, o Aristarh hem o Luka, odlučinđe te putujinen oleja ko Rim. On hine spremna te rizikujinen po životi te bi ovena e Pavleja, iako nigde na phenela pe so o Isus lično olenđe obećinđa so ka resen bezbedno ko Rim. Ked reslje ki luka Sidon, o Julije mukhlja e Pavle „te posetini pe amalen hem te obezbedinen sa so valjani lese.“ Kasnije ki diz Puteoli, o Pavle hem olese amala arakhlje „e phralen kola molinđe len te aćhon olencar efta dive“ (Dela 27:1-3). O phralja ko odola thana obezbedinđe sa so valjanđa e Pavlese hem olese amalenđe, hem sigurno but radujinđe pe đi šunđe o ohrabrujuća iskustvija kola o Pavle vaćerđa lenđe (Uporedin e stihonencar ando Dela 15:2, 3; w20.11 15-16 ¶15-17).

Roditeljija, mothoven tumare ćhavenđe hem tumare lafencar hem delijencar so but mangena e Jehova. Pomožinen tumare ćhavenđe te mangen e Jehova. Odova tano najbaro poklon so šaj te den tumare ćhavenđe. Najvažno so šaj te sikaven tumare ćhaven tano redovno te proučinen i Biblija, te molinen pe, te đan ko sastankija hem ki služba (1. Tim. 6:6). Ki aver strana, tumen mora te obezbedinen sa so valjani e ćhavenđe (1. Tim. 5:8). Ama, jekh buti ma te bistren. Da li tumare ćhave ka preživinen o krajo ando akava sveto hem da li ka khuven ko e Devleso nevo sveto, na ka zavisini ando materijalna buća kola isi len, već ando odova da li ka oven paše e Jehovaja (Jezek. 7:19). Kobor tano šukar ked dikhaja so but roditeljija anena odluke kola pomožinena olenge ćhavenđe te oven paše e Jehovaja. O ćhave kola barjona ko asavke porodice, but putija nastavinena te ćeren odola šukar buća hem sar bare on tane bahtale so olenge roditeljija barjaćerđe len ko asavko način (Posl. 10:22; w20.10 28-29 ¶10-11).

Ki jekh situacija, o apostol Petar phenđa ja ćerđa disave buća bizo te razmislini hem palo odova pokajinđa pe sebepi odova. Na primer, ked o Isus phenđa pe učenikonenđe so ka patini hem so ka merel, o Petar ukorinđa le ađahar so phenđa lese odova so čitinaja upre ko citati (Mat. 16:21-23). O Isus ispravinđa e Petare. Ked alji i rulja te phanel e Isuse, o Petar reagujinđa bizo te razmislini hem ćhinđa o kan ando e prvosveštenikoso robo (Jov. 18:10, 11). O Isus hem tegani ispravinđa le. Isto ađahar, o Petar hvalinđa pe odoleja so niked na ka aćhavi e Isuse, čak hem ako sa avera apostolija ka ćeren odova! (Mat. 26:33). Ama, o Petar na hine odobor zoralo kobor mislinđa. Hari palo odova, odija isto rat, ov but darandilo hem trin putija phenđa so na penđari e Isuse. O Petar but obeshrabrimo „ikljilo avrijal hem runđa sose hine but tužno“ (Mat. 26:69-75). Sigurno pućlja pe da li o Isus iked ka oprostini lese. Ama, o Petar na ulo odobor obeshrabrimo so ćhinavđa te služini e Jehovase. Palo odova so ćerđa odija greška, ov hem ponodri služinđa e Jehovase avere apostolencar (Jov. 21:1-3; Dela 1:15, 16; w20.12 20 ¶17-18).

O poglavari šaj te mothovi poniznost ko but načinija. Na primer, ov na očekujini andi pi romni hem ando pe ćhave te oven savršena. Ov spremno šunela hem razmislini ando olengo mišljenje iako podijekh puti olengo mišljenje na slažini pe odoleja so ov mislini. Uzo odova, o rom kova tano ponizno tano spremno te ćerel disave buća ko ćher iako o manuša šaj te phenen so odija tani e romnjaki buti. Odova šaj te ovel izazov. Sose? I phen, koja vićini pe Rejčel, phenela: „Uduri kaj bijandiljum, ako o rom pomožini pe romnjaće te thovel o ćare ja te čistini o ćher, o komšije hem o rođakija ka phenen soj tano papučari. On ka mislinen so oj tani gazda ko ćher.“ Ako o manuša ko than kaj živineja ađahar razmislinena, na valjani te bistre so o Isus thovđa pe učenikonenge pre iako odija buti ćerđe o robija. Jekh šukar poglavari na brinini pe odolestar so avera ka phenen olestar. Olese tano važno, olesi romni hem olese ćhave te osetinen pe šukar (w21.02 2 ¶3; 4 ¶11).

O šuže uspomene tane dar ando Jehova. Ama, bizo obzir kobor šukar živinđam angleder, amari budućnost ko nevo sveto ka ovel pana pošukar. Avera šaj te povredinen amen, ama ako odlučinaja te oprostina lenđe, ka uspina te usredsredina amen ko avera buća. But baro osećaj andi krivica šaj te sprečini amen radosno te služina e Jehovase. Ama, sar o apostol Pavle, hem amen valjani te verujina so o Jehova oprostinđa amenđe (1. Tim. 1:12-15). Amen isi amen mogućnost te živina večno. Tegani, na ka setina amen nisostar so bi ćerela amen tužna. I Biblija ando akava vreme phenela: „Okova so hine anglal na ka avel ki godi“ (Is. 65:17). Zamislin samo: Iako disave amendar phurilje đi služinđe e Jehovase, ko nevo sveto, palem ka ova terne (Jov 33:25). Odolese, hajde te ova odlučna te na živina ki prošlost. Umesto odova, hajde te usmerina amaro pogled ki budućnost ko nevo sveto hem akana te da sa amendar te ova uduri (w20.11 24 ¶4; 29 ¶18-19).

So pana hari ađićeri amen? Ki bari nevolja, o Jehova ka spasini amen ko duj načinija. Sar prvo, ov ka spasini pe verna slugen ko vreme ked ov ka ćhivel e kraljen andi phuv te uništinen o Baro Vavilon, i hovavni religija (Otkr. 17:16-18; 18:2, 4). Tegani, ov ka spasini pe narodo ked ko Armagedon ka uništini sa okolen kola aćhilje ando e Bengeso sveto (Otkr. 16:14, 16). Ked aćhovaja paše e Jehovaja, o Beng našti te ćerel amenđe nijekh buti koja ka anel amenđe trajno šteta (Rimlj. 16:20). Umesto odova, ov ka doživini odija trajno šteta ađahar so ka ovel uništimo. Odolese, urav i kompletno ratno oprema hem ma huljav la! Ma pokušin te borine tut kokri ki odija borba. Podržin te phralen hem te phenjen. Hem ićer tut ko e Jehovase smernice. Ako ćereja ađahar, šaj te ove uverimo so o Jehova, to nebesko Dad, kova but mangela tut, ka zorjaćeri tut hem ka zaštitini tut (Is. 41:10; w21.03 30 ¶16-17).

Sar šaj te mothova so uzdajinaja amen upro Jehova? Ađahar so ka primenina sa o smernice kola o Jehova dela. Ki Biblija isi but izveštaija kola mothovena kobor tano važno te arakha o mir hem te uzdajina amen upro Jehova. Đi ka proučine len, zapazin so pomožinđa e Devlese slugenđe te arakhen o mir iako hine len baro protivljenje. Na primer, ked o jevrejsko vrhovno sudo naredinđa e apostolenđe više te na propovedinen, on na darandilje. Umesto odova, on hrabro phenđe: „E Devle sar vladare mora te šuna, a na e manušen“ (Dela 5:29). Čak hem palo odova so šibinđe len, on na ćerđe panika. Sose? Odolese so đanđe so o Jehova tano ki olengi strana. Ov hine zadovoljno olencar. Sebepi odova, on nastavinđe te propovedinen i šukar vest (Dela 5:40-42). Isto ađahar, ked o učenik Stefan valjanđa te ovel mudardo, ov hine le odobor baro mir so oleso muj „hine sar e anđeleso muj“ (Dela 6:12-15). Sose? Odolese so hine uverimo so o Jehova tano zadovoljno oleja (w21.01 4 ¶10-11).

Odova značini so on isi len čisto savest hem so o Jehova dikhela upro lende sar pravedna (Is. 1:18). On tane predajime hem krstime hrišćanija, kola isi len zorali vera ki e Isusesi žrtva hem kola isi len šukar odnos e Jehovaja (Jov. 3:36; 1. Petr. 3:21). Sebepi odova on šaj te terđon anglo e Devleso presto hem „služinena lese dive hem rat“ akate ki phuv (Otkr. 7:15). On tane revna hem dena sa pestar te propovedinen ando Kraljevstvo hem te ćeren učenikonen sose e Devleso Kraljevstvo tano olenđe považno ando sa aver (Mat. 6:33; 24:14; 28:19, 20). O baro mnoštvo kova avela andi bari nevolja tano uverimo so o Devel hem ponodri ka brinini pe olendar sose isi len e Devleso obećanje kova phenela: „Okova kova bešela ko presto ka phravel po šatori upro olende.“ Konačno ka ispunini pe o obećanje kova o avera bakre but vreme ađićerena te ovel: „O Devel ka kosel svako asvi kotar olenge jaćha“ (Otkr. 21:3, 4; w21.01 16 ¶9-10).

Amen uživinaja so hijam deo andi e Jehovasi porodica hem svako amendar dela sa pestar te poštujini okolen kase o Jehova dinđa te oven poglavarija. I Biblija mothovi so o Jehova cenini hem e đuvlen hem e muršen. Na primer, setin tut so ko prvo veko o Jehova dinđa po sveti duh hem e đuvlenđe hem e muršenđe, sebepi kova šajinđe te ćeren čudija, sar soj tano te vaćeren razno ćhibjencar (Dela 2:1-4, 15-18). Isto ađahar, hem o đuvlja hem o murša tane naimenujime sveto duhoja hem ka vladinen e Hristeja (Gal. 3:26-29). Hem o đuvlja hem o murša ka živinen večno ki phuv (Otkr. 7:9, 10, 13-15). Hem o solduj grupe dobinđe zadatko te propovedinen hem te sikaven andi šukar vest (Mat. 28:19, 20). Na primer, ki knjiga Dela apostolska vaćeri pe andi romni koja vićinđa pe Priskila hem koja zajedno pe romeja, e Akilaja, pomožinđa e Apolose, kova hine pobuter školujimo olendar, pana pošukar te haljol o ćaćipe (Dela 18:24-26; w21.02 14 ¶1; 15 ¶4).

Tumen o starešine, isi tumen but bari odgovornost te pomožinen e objaviteljenđe pana pošukar te propovedinen hem te sikaven e manušen. Ako neko lađala anglo tumende te vodini o kurs, tegani tumen šaj te vodinen. O starešine šaj but te ohrabrinen okolen kola vodinena o kurs te istrajinen (1. Sol. 5:11). Čak iako trenutno nane amen nijekh e biblijako kurs, amen šaj te pomožina e studentenđe te napredujinen. Nane potrebno te vaćere but, ama odoleja so šukar ka pripremine tut, šaj te pomožine e učiteljese. Ov amal e studentencar ked on avena ko sastankija hem ov šukar primer olenđe. O starešine šaj te ohrabrinen e studenten ađahar so ka odvojinen lenđe vreme. Isto ađahar, on šaj te pomožinen e učiteljenđe, ađahar so ka sikaven len hem so ka pohvalinen len. Ćaće, nane pobari radost ando odova te ćere jekh tikni buti te pomožine nekase ko proučini te zamangel e Jehova hem te služini amare Dadese, e Jehovase (w21.03 13 ¶18-19).

O David mothovđa soj tano odgovorno. Ked hine terno, ov arakhlja pe dadese bakren. Odova hine but opasno zadatko. Ki jekh prilika, o David phenđa e Saulese: „Ked to sluga arakhlja pe dadese bakren, jekhvar alo o lav, a aver puti alo o medved hem legarđa e bakre ando stado. Me pođinđum palo leste, napadinđum le hem ikalđum e bakre ando oleso muj. A ked ov man napadinđa, me dolinđum le andi men, peravđum le hem mudarđum le“ (1. Sam. 17:34, 35). O David hine odgovorno hem šukar brininđa pe ando bakre. O terne phralja, šaj te oponašinen e Davide ked trudinena pe te ćeren o zadatko kova dobinđe. Sar terno, o David hine but paše amal e Jehovaja. Odova so hine paše e Jehovaja hine považno nego li odova so hine hrabro hem so šukar bašalđa i harfa. E Davidese, o Jehova na hine samo Devel, već hem oleso paše Amal. Hem tumen, terne phraljalen, jekh andi najvažno buti koja šaj te ćeren tani te oven paše e Jehovaja (w21.03 3 ¶4-5).