Mart

Na birinđam amen o manuša te mrzinen amen. Amen na uživinaja ked avera progoninena amen sebepi amari vera. Tegani, sose šaj te ova bahtale ked avera mrzinena amen? Te dikha trin razlogija. Sar prvo, ked istrajinaja, o Devel tano zadovoljno amencar (1. Petr. 4:13, 14). Sar dujto, amari vera tani ispitimi hem ovela pana pozorali (1. Petr. 1:7). Hem sar trito, amen ka dobina i dragoceno nagrada, o večno đivdipe ko raj ki phuv (Rimlj. 2:6, 7). Sigate palo odova so o Isus uskrsninđa, o apostolija doživinđe o bahtalipe kolestar o Isus vaćerđa. Palo odova so hine šibime hem palo odova so hine olenđe phendo te ćhinaven te propovedinen, on radujinđe pe „so hine dostojna te trpinen i lađ sebepi e Isuseso anav“ (Dela 5:40-42). Olengo mangipe premalo olengo učitelj, hine pobaro nego i dar ando olenge neprijateljija. On mothovđe mangipe ađahar so na ćhinavđe te vaćeren i šukar vest. But phralja hem phenja hem ponodri služinena e Jehovase iako isi len pharipa. On đanena so o Jehova na ka bistrel olengo trud hem o mangipe kova mothovđe premalo oleso anav (w21.03 25 ¶18-19).

Ked bijanđona, o pomazana hrišćanija nane len nada te đan ko nebo. Odija nada valjani o Devel te ćhivel lenđe ko vilo. On razmislinena andi pi nada, vaćerena e Jehovaja odolestar hem jedva ađićerena te dobinen pi nagrada ko nebo. On našti ni te zamislinen sar ka izgledini olengo duhovno telo (Fil. 3:20, 21; 1. Jov. 3:2). Ama, jedva ađićerena te oven ko nebesko Kraljevstvo. O avera bakre radujinena pe so ka živinen večno ki phuv. Odija želja isi len sa o manuša. Jedva ađićerena o dive ked ka pomožinen ko odova i phuv te ovel raj. But radujinena pe ked ka avel o dive te gradinen pe ćhera, te sadinen pe bašte, te barjaćeren pe ćhaven hem ked sare ka ovel len savršeno sastipe (Is. 65:21-23). Isto ađahar, jedva ađićerena te putujinen ko but thana ki phuv te dikhen o more, o planine, o šume, hem te istražujinen sa o buća kola o Jehova stvorinđa. Ama soj tano najvažno, on tane bahtale sose đanena so olengo amalipe e Jehovaja ka ovel pana pozoralo hem so pana popaše ka oven oleja (w21.01 18-19 ¶17-18).

Ked o Vaviloncija napadinđe hem uništinđe i phuv, o manuša šajinđe samo te phenen: „Akija tani phuv bizo pani ki koja na bešena ni o manuša a ni o životinje. Dindi tani e Haldejcenđe ko vasta“ (Jer. 32:43). Oko 200 berš palo e Joileso proročanstvo, o Jehova prekalo Jeremija prorekninđa pana diso kotar akava napad. Ov phenđa so o vojnikija pažljivo ka roden te bi phanen e Izraelcen kola ćerđe lošna buća. „’Ka bićhalav buten ribaren‘, phenela o Jehova, ’kola ka astaren len. Palo odova ka bićhalav buten lovcen hem on ka astaren len ko sa o gore, ko sa o bregija hem ka ikalen len kotar o pukotine ko stene. . . Ka kazninav len potpuno aso olengo prestup hem olengo greh.‘“ E Izraelcenđe kola na kajinena pe aso lošna buća kola ćerđe, na ka pomožinen ni o okeanija ni o šume te garaven pe kotar i vavilonsko vojska ja kotar e Jehovasi kazna (Jer. 16:16, 18; w20.04 5 ¶12-13).

Ko jekh but važno period ko oleso đivdipe, o Lot na šunđa odmah odova so o Jehova phenđa lese te ćerel. Amen šaj te mislina so o Lot na obratinđa pažnja ko odova so o Jehova phenđa lese te ćerel ja čak so hine neposlušno. Ama, o Jehova na vazdinđa pe vasta olestar. „Sebepi so o Jehova smilujinđa pe upro leste“, o anđelija lelje olese porodica kotar vas hem ikalđe len andi diz (Post. 19:15, 16). Isi nekobor razlogija sose o Jehova mothovđa samilost premalo Lot. Ov šaj na manglja odmah te mukhel po ćher sebepi so možda darandilo ando manuša kola hine avrijal kotar i diz. Ama, hine pana diso. O Lot verovatno đanđa so ki dolina koja hine paše, duj kraljija pelje ko jame ko kola hine bitumen (Post. 14:8-12). Sar rom hem dad, o Lot sigurno brininđa pekle porodicaće. Uzo odova, o Lot hine barvalo hem sigurno hine le šužo ćher ko Sodom (Post. 13:5, 6). Naravno, ni jekh kotar akala buća na hine razlog o Lot te na ćerel odova so o Jehova phenđe lese. Ama, o Jehova na dikhlja samo e Lotesi greška, nego dikhlja le sar jekh „pravedno manuš“ (2. Petr. 2:7, 8; w20.04 18 ¶13-14).

Terne phraljalen, šaj ka valjani te nakhel disavo vreme, okolenđe kola đanena tut sar ćhavoro te dikhen upro tute sar upro neko ko barilo. Ama, šaj te ove uverimo so o Jehova na dikhela samo ko odova sar izgledineja. Umesto odova, ov šukar penđari tut hem đanela so tu šaj te ćere a so na (1. Sam. 16:7). Odolese, zorjaćer to amalipe e Jehovaja. O David ćerđa odova ađahar so dikhlja so šaj te sikljol ando Jehova kotar o buća kola ov stvorinđa (Ps. 8:3, 4; 139:14; Rimlj. 1:20). Aver buti koja šaj te ćere tani te moline tut e Jehovase ako isi tut dijekh problemi. Šaj te amala ki škola marena tuće muj so hijan e Jehovaso svedoko. Ako tano ađahar, molin tut e Jehovase te del tut snaga. Uzo odova, primenin o savetija kola arakheja ki Biblija, ko amare publikacije hem ko video materijali. Svako puti ked ka dikhe so o Jehova pomožini tuće, to poverenje upro leste ka barjol. Isto ađahar, svako puti ked ka oslonine tut upro Jehova, avera ka ovel len pobaro poverenje upro tute (w21.03 4 ¶7).

O šukar amala mangena jekh jekhese te vaćeren sostar razmislinena hem sar osetinena pe. Da li tano asavko hem amaro amalipe e Jehovaja? Ja! O Jehova vaćeri amencar prekalo po Lafi, hem prekalo oleste, ov mothovi amenđe sar razmislini hem sar osetini pe. Amen vaćeraja oleja ked molinaja amen hem tegani vaćeraja lese amare najhor mislija hem osećanja. Sar jekh šukar amal, o Jehova na samo so šunela amare molitve, nego hem odgovorini koro lende. Disavo puti sigate odgovorini. Ama, disavo puti asi jekh buti valjani but putija te molina amen. Sar god te ovel, amen šaj te ova sigurna so o odgovor ka avel ko pravo vreme hem ko najšukar način. Naravno, e Devleso odgovor ki amari molitva šaj te ovel averćhane ando odova so amen očekujinđam. Na primer, umesto te cidel amendar o pharipa, ov šaj te del amen mudrost hem snaga „te šaj te izdržina“ len (1. Kor. 10:13). Sar šaj te mothova zahvalnost aso akava but vredno poklon? Jekh način tano ađahar so ka šuna o savet andi Biblija kova phenela: „Uvek molinen tumen“ (1. Sol. 5:17; w20.05 27-28 ¶7-8).

Sa o učesnikija ki trka đanena kobor tano važno te dikhen anglo peste te na bi spotakninena pe. Čak hem jekh trkači te perel, ov uštela hem nastavini te prastal. Ov nane usredsredimo ko odova so spotakninđa le, već ko cilj hem ki nagrada koja ka dobini. Ki amari trka but putija šaj te spotaknina amen ađahar so grešinaja ko lafija ja ko postupkija. Isto ađahar, okola so prastana amencar šaj te povredinen amen. Ked odova desini pe na valjani te ova iznenadime. Sare amen hijam nesavršena hem sare prastaja jekhe tesno drumoja kova legari amen ko večno đivdipe. Odolese šaj te desini pe podijekh puti te „khuva“ jekh jekhe. O Pavle phenđa so disavo puti šaj te uvredina jekh jekhe (Kol. 3:13). Ama, umesto te ova usredsredime ko odova so spotakninđa amen, pošukar tano te usredsredina amen ki nagrada hem te nastavina te prasta. Ako holjanaja hem na mangaja te irina amen ki trka, tegani na ka nakha o cilj hem na ka dobina i nagrada. Uzo odova, sebepi amaro, averenđe ka ovel pharo te prastan ko tesno drumo kova legari ko đivdipe (w20.04 26 ¶1; 28 ¶8-9).

O proročanstvo ando Danilo opisujini nekobor svetska sile kola hine len uticaj ko e Devleso narodo. On tane opisujime sar različita delovija ando jekh baro kip. O stopala, kola tane ćerde ando sastron hem andi glina, kotar akava baro kip predstavinena i poslednjo svetsko sila, i angloameričko svetsko sila. Akava proročanstvo mothovi so akija svetsko sila pana ka ovel ko po položaj ked e Devleso Kraljevstvo ka napadini hem ked ka uništini o manušikane vlastija. Hem o apostol Jovan vaćerđa ando svetska sile kola utičinđe ko e Devleso narodo. Sa odola sile, o Jovan opisujinđa sar jekh zver koja isi la efta šere. O eftato šero kotar akija zver predstavini i angloameričko svetsko sila. Odova tano but važno sose nane nijekh šero palo akava eftato. O eftato šero kotar akija zver pana ka vladini ked o Hrist hem olesi nebesko vojska ka aven te uništinen ola hem aver deo andi odija zver (Otkr. 13:1, 2; 17:13, 14; w20.05 14 ¶11-12).

Akija jednostavno izjava podsetini amen ki jekh važno buti: Ando Devel avela o đivdipe, ama Olestar avela hem o mangipe. O Jehova mangela amen! Sebepi oleso mangipe, amen osetinaja so hijam bezbedna, bahtale hem zadovoljna. O hrišćanija našti te birinen da li ka mothoven mangipe ja na. Odija tani zapovest (Mat. 22:37-40). Ked šukar ka penđara e Jehova, na ka ovel amenđe pharo te ićera amen ki prvo zapovest. Odova tano sose o Jehova tano savršeno. Ov brinini pe amendar hem šukar tano premalo amende. Ama, šaj te ovel amenđe pharo te ićera amen ki dujto zapovest. Sose? Sose amare phralja hem phenja, kola tane maškaro okola kola tane amenđe najpaše, tane nesavršena. Podijekh puti, šaj te phenen ili te ćeren diso so ka povredini amen. O Jehova đanđa so ka ovel amen asavko izazov. Odolese, ov pe duhoja vodinđa e manušen kola pisinđe i Biblija, te pisinen ando odova kobor tano važno te mothova mangipe jekh jekhese hem sar šaj te ćera odova. Jekh ando odola piscija hine o apostol Jovan (1. Jov. 3:11, 12; w21.01 8 ¶1-2).

Bizo obzir, da li skoro počminđam te služina e Jehovase ja već beršencar služinaja olese, valjani te puća amen: „Da li borinava man te na ovel man podelimo vilo iako o Beng pokušini odova ko but načinija? Na primer, sar reagujineja ked ki televizija ja ko internet ikljola disavi neprikladno slika koja šaj te ćhivel tut te ovel tut neprikladna želje? Lokho tano te misline so odija slika ja film nane baš pornografija. Ama, da li odova šaj te ovel o način ko kova o Beng mangela te podelini to vilo? Odija slika šaj te ovel sar jekh metalno klin kova o manuš koristini te pharavi jekh trupco. Sar ov khuvela o klin, olesi oštro hem sani ivica khuvela ko trupco. Sar o klin khuvela sa pobuter hem pobuter, o trupco odvojini pe. So mislineja, da li o neprikladna slike kola dikhljan šaj te oven sar odija sani hem oštro ivica ando klin? Ako dikheja o buća kola šaj na izgledinena soj tane štetna, sigate šaj te grešine e Jehovase. Odolese, ma dozvolin ništa soj tano neprikladno te khuvel ko to vilo! De sa tutar te ovel tut vilo kova nane podelimo hem kova darala ando e Jehovaso anav (w20.06 11-12 ¶14-15).

Ked arakhaja okolen kola tane neaktivna, valjani te nastavina te pomožina lenđe. Sar o našaldo ćhavo kotar e Isusesi priča, on osetinena bari dukh andral hem valjani lenđe but vreme te šaj te nakhel odija dukh (Luka 15:17-24). Verovatno tane duhovno slaba sebepi sa so doživinđe ko e Bengeso sveto. Amen valjani te pomožina olenđe te zorjaćeren pi vera ko Jehova. Ki priča ando bakro kova našaldilo, o Isus opisujini sar o pastiri lela e bakre ki pi angalja hem irini le ko stado. Odova pastiri već odvojinđa vreme hem snaga te bi arakhi odole bakre. Ama, svesno tano so mora te akhari le ki angalja, sose odova bakro nane le snaga kokri te irini pe ko stado (Luka 15:4, 5). Amen valjani te odvojina vreme hem snaga te pomožina okolenđe kola tane neaktivna, te pobedinen o slabostija kola sprečinena len palem te služinen e Jehovase. Ama, e Jehovaso duho, oleso Lafi hem o publikacije kola dobinaja prekali skupština šaj te koristina te bi pomožinaja lenđe palem te zorjaćeren pi duhovnost. Odolese, ako hijan zamolimo te proučine i Biblija olencar, ov spremno te prihvatine odova zadatko (w20.06 28 ¶14-15).

Sare amen valjani te mothova mangipe sose premalo mangipe penđarena pe o prava hrišćanija. Isto ađahar, amen valjani te penđara e Devlesi volja hem te ovel amen pana pobari razboritost (Fil. 1:9). Ki aver strana, upro amende šaj te utičinen o „razna hovavne sikljoviba ando manuša kola prevarinena averen“ hem o otpadnikija (Ef. 4:14). Ko prvo veko, but đene ćhinavđe te sledinen e Isuse. Ama, o apostol Petar hine uverimo so o Isus hine le „o lafija ando večno đivdipe“ (Jov. 6:67, 68). Iako ko odova vreme o Petar na haljilo sa o detaljija, ov aćhilo verno sose haljilo o ćaćipe ando Hrist. Isto ađahar, hem tu šaj pana pobuter te uverine tut ko odova so i Biblija sikavi amen. Ako ćereja ađahar, ti vera ka aćhol zorali so god te ovel hem ka pomožine averenđe te zorjaćeren pi vera (2. Jov. 1, 2; w20.07 8 ¶2; 13 ¶18).

Te šaj te pomožina amare phralenđe hem e phenjenđe te aćhon ko ćaćipe, amen mora te mothova saosećanje (1. Jov. 3:10, 11, 16, 17). Amen valjani te manga jekh jekhe na samo ked tano sa šukar, nego hem ked pojavinena pe o problemija. Na primer, da li đaneja nekas kase neko mulo hem sebepi odova valjani lese uteha ja disavi praktično pomoć? Ja da li šunđan so disave phralja doživinđe i prirodno katastrofa hem so sebepi odova palem valjani te ćerel pe olengi dvorana ja olengo ćher? Kobor tano baro amaro mangipe hem saosećanje premalo amare phralja hem phenja, ka mothovi pe na samo odoleja so phenaja, već soj tano pana považno, odoleja so ćeraja. Amen oponašinaja amare brižno nebesko Dade ked mothovaja mangipe jekh jekhese (1. Jov. 4:7, 8). Jekh važno način sar mothovaja amaro mangipe tano ađahar so ka oprostina jekh jekhese. Na primer, šaj neko povredinđa amen, ama palo odova izvininđa pe. Amen šaj te mothova mangipe ađahar so ka oprostina lese hem so ka bistra odova so ćerđa amenđe (Kol. 3:13; w20.07 24 ¶14-15).

Da li svako manuš kova ka uskrsnini ka ovel le po učitelj sar avdije? Da li ka oven dodelime ko skupštine kuri ka oven sikavde sar te sikaven okolen kola ka uskrsninen palo lende? Mora te ađićera te bi đanaja sar ka ovel sa odova. Ama, amen đanaja so đi o krajo andi e Hristesi hiljadaberšengi vladavina „i phuv ka ovel pherdi đandipaja ando Jehova“ (Is. 11:9). Odola hiljada berša amen ka ovel amen but buti te ćera, ama hem ka uživina! Đi trajini e Hristesi hiljadaberšengi vladavina, sare ando e Jehovaso narodo ka valjani te menjinen pe te bi ugodinena lese. Odolese, svako olendar ka ovel saosećajno đi pomožini okolenđe kola uskrsninđe te borinen pe protiv pe pogrešna želje hem mislija hem te bi živinena premalo e Jehovase merilija (1. Petr. 3:8). Okola kola ka uskrsninen ka dikhen so e Jehovaso narodo tano ponizno hem so pana mangena te menjinen pe te bi ugodinena e Jehovase. Sebepi odova, on ka mangen te obožavinen e Jehova olencar (Fil. 2:12; w20.08 16 ¶6-7).

Ako primeninaja o savet ando apostol Pavle hem razmislinaja ando amare postupkija, ka dikha so isi amen sposobnostija kola avera nane len. Na primer, jekh starešina šaj na ićeri but šukar govorija, ama tano but šukar ki služba. Ja šaj nane organizujimo sar avera starešine ki skupština, ama tano but brižno pastiri hem o objaviteljija osetinena pe slobodno te aven koro leste te roden savet. Ja šaj tano penđardo sar but gostoljubivo manuš (Jevr. 13:2, 16). Ked amen đanaja kola tane amare sposobnostija, tegani ka ova zadovoljna odoleja so šaj te ćera diso ki skupština. Isto ađahar, tegani verovatno na ka ova zavidna amare phralenđe kola isi len averćhane sposobnostija amendar. So god te ćera ki skupština, sare amen valjani te ovel amen želja te ova pošukar ki služba hem te razvijina amare sposobnostija (w20.08 24 ¶16-18).

O phral Raterford ko 1935. berš ko kongres, ko Vašington, ki Amerika ićerđa jekh but važno govor kova vićinđa pe „Veliko mnoštvo.“ Ko po govor, o phral Raterford objasninđa koj tano o „baro mnoštvo“ kova spomini pe ko Otkrivenje 7:9. Đi tegani, o Istraživačija andi Biblija mislinđe so o baro mnoštvo tani jekh grupa ando manuša kola ka đan ko nebo, ama kola na hine odobor verna sar o pomazanikija. O phral Raterford koristinđa e Devleso Lafi te objasnini so o manuša kotar baro mnoštvo nane birime te đan ko nebo, već soj tane e Hristese avera bakre kola ka preživinen i „bari nevolja“ hem so ka živinen večno ki phuv (Otkr. 7:14). O Isus obećinđa: „Isi man hem avera bakre, kola nane kotar akava tor. Valjani hem olen te anav hem on ka šunen mo glaso, hem on ka oven jekh stado jekhe pastireja“ (Jov. 10:16). Akala „avera bakre“ tane e Jehovase verna svedokija kola isi len nada so ka živinen večno ko raj ki phuv (Mat. 25:31-33, 46; w21.01 14 ¶1-2).

Valjani te ova disciplinovana te šaj te istrajina hem te ispunina amaro zadatko (Mat. 28:19, 20). Amen na bijandiljam sar disciplinovana manuša. Umesto odova, obično ćeraja odova soj tano amenđe polokho. Te bi ovaja disciplinovana, valjani amenđe samokontrola. Odolese, mora te sikljova te ćera o buća kola tane amenđe phare. Ama, na hijam kokri sose o Jehova ka pomožini amen prekalo po sveti duh (Gal. 5:22, 23). O apostol Pavle hine disciplinovano. Ipak, ov priznajinđa so mora te „kontrolišini“ po telo te bi ćerela o buća kola tane ispravna (1. Kor. 9:25-27). Ov podstakninđa averen te oven disciplinovana hem sa o buća kola ćerena te oven „pristojna hem ađahar sar soj tano o redo“ (1. Kor. 14:40). Amen mora te ova disciplinovana te bi ovela amen šukar duhovna navike, a jekh olendar tani te đa te propovedina hem te sikava averen andi šukar vest (Dela 2:46; w20.09 6-7 ¶15-17).

Ko but phuvja avdije, amen šaj slobodno te propovedina. Da li živineja ki asavki phuv? Ako ja, puć tut: „Sar koristinava odija sloboda?“ Ko akala poslednja dive, e Jehovasi organizacija sar niked đi akana dela sa pestar te propovedini hem te sikavi e manušen. Akava važno zadatko amen ćeraja ko razna načinija. Sar šaj mudro te koristine o period ando mir? (2. Tim. 4:2). Sose na razmislineja ando te okolnostija? Možda ka dikhe so tu ja neko kotar ti porodica šaj pana pobuter te učestvujini ki služba, čak hem te služini sar pionir. Akana nane vreme te ćeda o barvalipe hem o materijalna buća, sose ki bari nevolja odola buća na ka spasinen amen (Posl. 11:4; Mat. 6:31-33; 1. Jov. 2:15-17). But objaviteljija sikljilje aver ćhib te šaj te pomožinen e manušenđe te penđaren e Jehova. Olesi organizacija obezbedinđa amari literatura koja tani dostupno avdije ko prekalo 1 000 ćhibja (w20.09 16 ¶9-11).

O šukar vojniko tano verno. Ov ka del sa pestar te borini pe te zaštitini nekas kas ov mangela ja diso soj tano olese vredno. O Pavle ohrabrinđa e Timoteje te barjaćeri pi odanost premalo Devel, odnosno te ovel paše Oleja (1. Tim. 4:7). So pobuter barjola amaro mangipe hem amari odanost premalo Devel, ka ova pana poodlučna te na mukha o ćaćipe (1. Tim. 4:8-10; 6:6). Jekh vojniko mora te ovel disciplinovano ako mangela uvek te ovel spremno aso maribe. O Timotej aćhilo duhovno zoralo, odolese so šunđa e Pavleso savet te našel ando neispravna želje, te razvijini o šukar osobine hem te odvojini vreme te ovel pe phraljencar hem pe phenjencar (2. Tim. 2:22). Te šaj te ćerel odova, valjanđa te ovel disciplinovano. Isto ađahar, hem amen valjani te ova disciplinovana te šaj te pobedina ko maribe, ko kova borinaja amen protiv amare pogrešna želje (Rimlj. 7:21-25). Uzo odova, amen valjani te ova disciplinovana te šaj hem ponodri te huljava i purani ličnost hem te urava i nevi ličnost (Ef. 4:22, 24). Isto ađahar, ked hijam umorna sebepi so celo dive ćerđam bari buti, šaj ka valjani te terina kokri amen te đa ko sastanak (Jevr. 10:24, 25; w20.09 28 ¶9-11).

Amen valjani te ova strpljiva đi pomožinaja e studentese te avel đi o predanje hem o krštenje. Ama, ko jekh trenutko, amen valjani te dikha da li ov isi le želja te služini e Jehovase. Da li o studenti mothovi so trudini pe te šunel e Isusese zapovestija ja samo mangela te đanel disave buća andi Biblija? Redovno puć tut da li o studenti napredujini. Na primer, puć tut: „Da li vaćeri ando pe osećanja premalo Jehova? Da li molini pe e Jehovase?“ (Ps. 116:1, 2). „Da li ov uživini te čitini i Biblija?“ (Ps. 119:97). „Da li redovno avela ko sastankija?“ (Ps. 22:22). „Da li ćerđa bilo koja promena ko po đivdipe? Da li počminđa te vaćeri pe familijaće hem pe amalenđe ando odova so sikljola?“ (Ps. 9:1). Soj tano najvažno, da li mangela te ovel e Jehovaso svedoko? (Ps. 40:8). Ako o studenti na napredujini ko nijekh ando akala buća, taktično pokušin te dikhe kaj tano o problemi hem palo odova vaćer oleja odolestar ljubazno, ama ov phravdo (w20.10 18 ¶14-15).

E Isuseso nebesko Dad uvek anela šukar odluke. Isto ađahar, hem e Isusese roditeljija ki phuv anđe mudra odluke. Ama, đi barilo, ov morandilo kokri te anel o odluke (Gal. 6:5). Sar svako amendar, hem ov hine le slobodno volja. Ov šajinđa te odlučini te ovel sebično hem te na ćerel e Devlesi volja. Umesto odova, ov odlučinđa te ovel paše e Jehovaja (Jov. 6:38). Ked o Isus haljilo koja tani olesi uloga ki e Jehovasi namera, ov birinđa te prihvatini la. Ov đanđa so but manuša ka mrzinen le. Iako na hine lese sajekh, ov ipak birinđa te šunel e Jehova. Ked o Isus krstinđa pe ko 29. berš, ki nevi era, najvažno buti hine lese te ćerel odova so o Jehova manglja (Jevr. 10:5-7). Čak hem đi merela hine ko mučeničko stubo, o Isus hem ponodri hine odlučno te ćerel pekle Dadesi volja (Jov. 19:30; w20.10 29 ¶12; 30 ¶15).

Da li đaneja e phralen hem e phenjen kola patinena sebepi soj tane naborme ja isi len razna problemija? Ja šaj mulo lendar neko kas manglje. Ako đanaja so nekase valjani pomoć, šaj te molina e Jehova te pomožini amen te phena ja te ćera diso šukar. Šaj baš odova so ka phena ja so ka ćera, ka ovel odova soj tano potrebno amare phralese ja amare phenjaće (1. Petr. 4:10). Amen đanaja so šaj te ova hrabra sebepi odova so o Jehova tano amencar. Ov pomožini amen prekalo Isus hem prekalo anđelija. Isto ađahar, ako tano premali olesi volja, o Jehova šaj te pomožini amen prekalo manuša kola tane ki vlast. Sar so but amendar lično doživinđam, o Jehova prekalo po sveti duh šaj te podstaknini pe slugen te pomožinen jekh jekhese. Odolese, sar o apostol Pavle, hem amen šaj hrabro te phena: „O Jehova tano mo pomoćniko, na ka darav. So šaj te ćerel maje o manuš?“ (Jevr. 13:6; w20.11 17 ¶19-20).

O apostolija hine len jasno dokaz so o Jehova tano olencar. Ov dinđa len moć te ćeren čudija (Dela 5:12-16; 6:8). Ama, avdije, amenđe na dinđa odova. Umesto odova, prekalo po Lafi, ov mangipaja uverini amen so ked amen patinaja sebepi i pravednost, amen šaj te ova radosna sose tano ov zadovoljno amencar hem dela amen po sveti duh (1. Petr. 3:14; 4:14). Sebepi odova, na valjani te brinina amen so ka ćera ako ki budućnost ka ova progonime. Umesto odova, valjani te da sa amendar te zorjaćera amaro pouzdanje upro Jehova kova šaj te podržini amen hem te spasini amen. Amen mora te verujina ko e Isuseso obećanje: „Me ka dav tumen mudrost hem me ka pomožinav tumen te đanen so te vaćeren hem tumare dušmanja na ka đanen so te odgovorinen tumenđe.“ Isto ađahar, o Isus obećinđa: „Ako ka istrajinen đi o krajo, tumen ka arakhen tumaro đivdipe“ (Luka 21:12-19). Hem niked ma bistri so o Jehova ićeri ki godi o najtikne detaljija ando pe sluge kola hine lese verna đi o meribe. Odoleja so đanela olendar, ov ka uskrsnini len (w21.01 4 ¶12).

O apostol Pavle na hine prvo kova vaćerđa ando uskrsenje. Hem o patrijarh Jov vaćerđa ando odova. Ov hine sigurno so o Devel ka setini pe upro leste hem so ka irini le palem ko životi (Jov 14:7-10, 12-15). „O uskrsenje kotar o mule“ tano deo ando „temelj“ ja „o osnovno sikljovibe“ ando odova ko so verujinena o hrišćanija (Jevr. 6:1, 2). O Pavle vaćerđa ando uskrsenje ko 15. poglavlje andi 1. Korinćanima. Odova so pisinđa, sigurno ohrabrinđa e hrišćanen ko prvo veko. Isto ađahar, odova poglavlje šaj hem amen te ohrabrini hem te zorjaćeri amari nada, bizo obzir kobor dugo verujinaja ko uskrsenje. O uskrsenje ando Isus Hrist, uverini amen so amare mangle kola mulje sigurno ka uskrsninen. O uskrsenje ando Isus Hrist hine deo andi „šukar vest“ kolatar o Pavle vaćerđa e hrišćanenđe ko Korint (1. Kor. 15:1, 2). U stvari, ov phenđa so ako jekh hrišćanin sumnjini ko e Hristeso uskrsenje, tegani olesi vera tani uzaludno (1. Kor. 15:17; w20.12 2 ¶2-4).

So pomožinđa e Petarese palem te osetini pe pošukar? Jekh andi buti hine so o Isus angleder molinđa pe e Petaresi vera te na slaboni. O Jehova odgovorinđa ki odija usrdno molitva. Palo odova, o Isus lično pojavinđa pe e Petarese, verovatno te ohrabrini le (Luka 22:32; 24:33, 34; 1. Kor. 15:5). Isto ađahar, o Isus pojavinđa pe sa e apostolenđe ked on hine celo rat ko more, ama na astarđe nijekh maćho. Tegani o Isus dinđa šansa e Petarese te phenel lese kobor but mangela le. O Isus oprostinđa pe mangle amalese hem dinđa le pana odgovornostija (Jov. 21:15-17). O način sar o Isus ponašinđa pe premalo Petar, mothovi amenđe kobor o Isus hine milosrdno, a o Isus, savršeno oponašinđa pe Dade. Odolese ked amen grešinaja, na valjani te mislina so o Jehova niked na ka oprostini amenđe. Ma bistri so o Beng tano okova kova mangela te mislina ađahar. Umesto odova, amen valjani hor te razmislina odolestar kobor o Jehova mangela amen, kobor haljola odova so amen šaj, a so našti te ćera hem soj tano spremno te oprostini amenđe. Isto ađahar, hem amen valjani te oponašina le ked avera povredinena amen (Ps. 103:13, 14; w20.12 20-21 ¶17-19).

Amen šaj te sikljova hem ando okola kola na uspinđe te arakhen o mir hem o pouzdanje upro Jehova. Ked proučinaja odola lošna primerija odova ka pomožini amen te na ćera ista greške kola on ćerđe. Ko početko andi pi vladavina, o kralj Asa osloninđa pe upro Jehova ked hine le problemija. Ama kasnije, ov na osloninđa pe upro po Devel. Umesto odova, ov kokri pokušinđa te rešini pe problemija (2. Let. 16:1-3, 12). Ko početko, e Asaso plan te pućel e manušen andi Sirija te pomožinen lese, šaj dićhilo šukar. Ama, odova mir na trajinđa but. O Jehova prekalo jekh prorok phenđa lese: „Sose uzdajinđan tut upro sirijsko kralj, a na uzdajinđan tut upro Jehova, to Devel, i vojska ando sirijsko kralj našlji tutar ando vas“ (2. Let. 16:7). Amen mora te pazina ko odova te na mislina so amen kokri šaj te rešina amare problemija, bizo te roda pomoć ando Jehova prekalo oleso Lafi. Čak hem ked ki sig valjani te ana disavi odluka, amen valjani te oslonina amen upro Jehova hem ov ka pomožini amenđe te ana ispravno odluka (w21.01 6 ¶13-15).

Trenutno, disave ando e Jehovase svedokija tane bokhale sebepi so i ekonomsko situacija tani phari ja sebepi o građanska nemirija ja o maribe. Avera tane phanle sebepi pi vera. Ama, on tane but bahtale sose đanena so palo odova so ka ovel uništimo akava lošno sveto, on ka ovel len pherdo habe ko fizičko hem duhovno pogledi. Đi o Jehova ka uništini e Bengeso sveto, o baro mnoštvo ka ovel zaštitimo ando oleso gnev kova e manušenđe ka ovel sar „baro tatipe.“ Palo odova so ka završini pe i bari nevolja, o Isus ka legari okolen kola preživinđe ko „thana kotar avela o [večno] đivdipaso pani“ (Otkr. 7:17). Razmislin samo akalestar: O baro mnoštvo isi le jekh posebno nada. Kotar sa o milijarde manuša kola živinđe đi akana, samo on šaj niked na ka meren (Jov. 11:26). O avera bakre isi len but šuži nada sebepi koja tane but zahvalna e Jehovase hem e Isusese! (w21.01 16-17 ¶11-12).

Ki poslednjo rat ando oleso životi ki phuv, o Isus razmislinđa ando problemija kola olese učenikija ka ovel len. Sebepi so manglja pe amalen, o Isus rodinđa ando Jehova „te zaštitini len ando Lošno“ (Jov. 17:14, 15). O Isus đanđa so ked ka irini pe ko nebo, o Beng hem ponodri ka progonini okolen kola ka mangen te služinen e Jehovase. Ćaće, e Devlese narodose ka valjani zaštita. Avdije amenđe valjani e Jehovasi zaštita sar niked angleder. O Beng tano fordimo ando nebo hem „but holjamo“ tano (Otkr. 12:12). Ov ćhivđa disave manušen te mislinen so ked progoninena amen on „ađahar služinena e Devlese“ (Jov. 16:2). Avera kola na verujinena ko Devel progoninena amen sebepi so hijam averćhane ando manuša ko sveto. Bizo obzir sose o manuša progoninena amen, amen na valjani te dara. Sose? O odgovor tano ko avdisutno diveso citati (w21.03 26 ¶1, 3).

Sa so o Jehova ćerela, ćerela ando mangipe. Ov mothovi so mangela amen ađahar so brinini pe aso sa amare potrebe. Sebepi so mangela amen, o Jehova obezbedinđa amenđe i otkupno žrtva. A o Isus odobor manglja amen so hine spremno te del po đivdipe amenđe (Jov. 3:16; 15:13). Ništa našti te ćhinavi e Jehova hem e Isuse te mangen okolen kola tane verna olenđe (Jov. 13:1; Rimlj. 8:35). Isto ađahar, sa so o poglavari ćerela, valjani te ćerel ando mangipe. Sose tano odova odobor važno? O apostol Jovan phenela: „Ako neko na mangela pe phrale, [ja pe porodica] kas dikhela, našti te mangel e Devle, kas na dikhela“ (1. Jov. 4:11, 20). O manuš kova mangela pe porodica hem kova mangela te oponašini e Jehova hem e Isuse, ka brinini pe aso pe porodicake duhovna, emocionalna hem fizička potrebe (1. Tim. 5:8). Ov ka sikavi hem ka ispravini pe ćhaven. Isto ađahar, ov hem ponodri ka trudini pe te anel odluke kolencar ka mothovi so poštujini e Jehova hem sebepi kola olese porodicaće ka ovel šukar (w21.02 5 ¶12-13).

Amaro nebesko Dad đanela so sebepi o lošna buća kola desinđe pe amenđe angleder amen šaj lošno te mislina amendar. Ama, ov dikhela odova soj tano šukar ko amaro vilo, čak iako amen mislinaja so nane amen nijekh šukar osobina (1. Jov. 3:19, 20). Neko šaj dela sa pestar te ćhinavi te ćerel diso lošno. Ama, ov šaj palem ćerđa isto greška hem sebepi odova tano obeshrabrimo. Naravno, normalno tano te osetina amen lošno ked grešinaja (2. Kor. 7:10). Ama, na valjani te osetina amen odobor lošno hem te phena kokri amenđe: „Me na hijum nisose. O Jehova niked na ka oprostini maje.“ Odova nane tačno hem odova šaj te ćhivel amen te ćhinava te služina e Jehovase. Valjani te „raščistina o buća“ e Jehovaja ađahar so ka molina le te oprostini amenđe (Is. 1:18). Ked o Jehova ka dikhel so tu iskreno kajineja tut, ov ka oprostini tuće. Uzo odova, vaćer e starešinencar. On strpljivo ka pomožinen tut te oporavine tut ko duhovno pogledi (Jak. 5:14, 15; w20.12 23 ¶5-6).

O Isus poštujinđa e đuvlen. Ov na manglja te ovel sar o fariseija kola mislinđe so o murša tane považna ando đuvlja. On na vaćerđe olencar anglo avera hem niked na vaćerđe olencar ando e Devleso Lafi. Ama, o Isus vaćerđa hem e đuvlencar ando važna ćaćipa (Luka 10:38, 39, 42). Isto ađahar, o Isus dozvolinđa e đuvlenđe te đan oleja ko razna thana đi propovedinđa i šukar vest (Luka 8:1-3). Uzo odova, o Isus dinđa čast e đuvlenđe te vaćeren e apostolenđe so ov uskrsninđa (Jov. 20:16-18). O apostol Pavle podstakninđa e Timoteje te poštujini e đuvlen. Iako o Pavle but pomožinđa e Timotejese te ovel le zorali vera, ov priznajinđa so e Timotejesi daj hem i baba hine prva kola sikavđe le ando ćaćipe (2. Tim. 1:5; 3:14, 15). Ked pisinđa po lil e Rimljanenđe, o Pavle pozdravinđa e phenjen ađahar so spominđa olenge anava. O Pavle na samo so zapazinđa so odola phenja ćerđe, već hem hine zahvalno aso sa so on ćerđe (Rimlj. 16:1-4, 6, 12; Fil. 4:3; w21.02 15 ¶5-6).