April

Da li doživineja disavo baro problemi? Šaj neko ki skupština povredinđa tut (Jak. 3:2). Ja šaj te kolege ki buti ja te amala ki škola marena tuće muj sebepi so služineja e Jehovase (1. Petr. 4:3, 4). Ja šaj neko andi ti porodica na mukhela tut te đa ko sastankija hem te vaćere averencar ando Jehova (Mat. 10:35, 36). Šaj o problemi tano odobor baro so avela tuće ki godi te ćhinave te služine e Jehovase. Ama, savo god te ovel o problemi, ov sigurno so o Jehova ka pomožini tuće mudro te postupine hem ka del tut snaga te istrajine. Ko po Lafi, o Jehova dinđa te pisinen pe disave primerija kola mothovena amenđe sar šaj o nesavršena manuša te istrajinen ked isi len problemija. Sose? Te šaj amen te sikljova olendar. O Jehova koristinđa e Pavle te pisini odola lafija. Ked čitinaja odola izveštaija, amen dobinaja uteha hem nada. Ama, nane dovoljno samo te čitina e Devleso Lafi. Amen valjani te dozvolina e Devleso Lafi te oblikujini amaro način sar razmislinaja hem odola lafija te takinen amen ko vilo (w21.03 14 ¶1-2).

Da li upro manuša kolenđe propovedineja i šukar vest dikheja soj tane sar o điv kova tano zrelo asi žetva? Trin buća ka mothoven da li isi tut asavko stav. Sar prvo, ked ka propovedine tu ka ovel tut osećaj so akija buti tani hitno. I žetva tani jekh ograničeno period, odolese ma našal to vreme. Sar dujto, ka ove bahtalo ked dikheja sar o manuša reagujinena ki šukar vest, sose ki Biblija pisini: „Radujinena pe o manuša ked tano vreme asi žetva“ (Is. 9:3). Sar trito, tu ka dikhe so svako manuš šaj te ovel e Isuseso učeniko. Odova ka dićhol ako hijan spremno te vaćere e manušencar kotar odova so olen interesini. Disave e Isusese sledbenikija šaj mislinđe so o Samarićanija niked na ka oven e Isusese učenikija. Ama, o Isus na mislinđa ađahar. Ov dikhlja so o Samarićanija šaj te oven olese učenikija. Isto ađahar, hem amen valjani te dikha so o manuša ko amaro područje šaj te oven e Hristese učenikija. O apostol Pavle aćhavđa amenđe but šukar primer. Ov sikljilo diso ando odova ko so verujinena o manuša kolenđe propovedinđa, haljilo so olen interesini hem dikhlja so on šaj te oven e Isusese učenikija (w20.04 8-9 ¶3-4).

Umesto te kritikujina odova so avera ćerena, valjani te da sa amendar te haljova olenge osećanja. Jedino osoba koja potpuno haljola amen tano o Jehova. Odolese, molin tut olese te pomožini tut averen te dikhe ađahar sar so ov dikhela len hem te haljove sar šaj te mothove lenđe saosećanje. Amen našti te birina premalo kaste ka ova saosećajna, a premalo kaste na. Ćaće tano ađahar so disave amare phralja hem phenja isi len slična problemija sar o Jona, o Ilija, i Agara hem o Lot, hem so šaj kokri pese ćerđe o problemija. Mora te priznajina so podijekh puti sare amen kokri hijam kriva aso amare problemija. Odolese tano normalno so o Jehova rodela amendar te ova saosećajna jekh premalo aver (1. Petr. 3:8). Ked šunaja e Jehova, amen zorjaćeraja o jekhipe ki amari porodica koja tani ko celo sveto. Odolese, ov odlučno pažljivo te šune te phralen hem te phenjen, šukar te penđare len hem te mothove saosećanje premalo lende (w20.04 18-19 ¶15-17).

O Isus aćhavđa amenđe savršeno primer ko odova sar te ova poslušna e Jehovase. Odolese, jekh važno način ko kova šaj te mothova so šunaja e Jehova tano ađahar so oponašinaja e Isuse so pobuter šaj (Jov. 8:29). Te šaj hem ponodri te živina premalo ćaćipe, amen mora te ova uverime so o Jehova tano Devel ando ćaćipe hem so sa so vaćeri prekalo po Lafi, i Biblija, tano ćaćipe. Isto ađahar, mora te ova uverime so o Isus tano obećimo Mesija. Avdije, but manuša sumnjinena so o Isus tano pomazimo sar Kralj ando e Devleso Kraljevstvo. O Jovan upozorinđa so ka oven „but prevarantija“, kola ka prevarinen okolen kola na hine len zorali vera upro Jehova hem upro Isus (2. Jov. 7-11). O Jovan pisinđa: „Koj tano o hovavno ako na okova so na priznajini so o Isus tano ćaće Hrist?“ (1. Jov. 2:22). Ako proučinaja e Devleso Lafi, amen na ka ova prevarime. Jedino ađahar ka penđara e Jehova hem e Isuse (Jov. 17:3). Tegani ka ova uverime so arakhljam o ćaćipe (w20.07 21 ¶4-5).

Jekh način sar šaj te spotaknina amare phralen hem phenjen kasa prastaja ki e đivdipasi trka, tano ked insistirinaja te ćeren pe o buća ko amaro način (Rimlj. 14:19-21; 1. Kor. 8:9, 13). Odova tani jekh bitno razlika maškaro amende hem o trkači kova prastala ki doslovno trka hem kova isi le cilj te osvojini i nagrada. On jedino razmislinena ando odova so ka pomožini len te pobedinen ki trka. Odolese, on čak khuvena averen kola prastana olencar te šaj on te oven prva. Ki aver strana, amen na takmičinaja amen jekh jekheja (Gal. 5:26; 6:4). Amaro cilj tano te pomožina so pobuter manušenđe te nakhen o cilj zajedno amencar hem sar nagrada te dobinen večno đivdipe. Odolese trudinaja amen te primenina o savet kova o Pavle dinđa: „Ma dikhen samo tumenđe te ovel šukar, nego isto ađahar hem averenđe te ovel“ (Fil. 2:4). Ki trka koja amen prastaja, o Jehova obećini amenđe so ako resaja đi o cilj ka dobina i nagrada, bilo odova te ovel o večno đivdipe ko raj ki phuv ja o besmrtno đivdipe ko nebo (w20.04 28 ¶10; 29 ¶12).

Milionija manuša kola ka preživinen i „bari nevolja“ ka khuven ko nevo sveto. Odola manuša kola preživinđe ka dikhen sar o meribe tano pobedimo ko pana jekh način, ked ka uskrsninen milionija manuša kola angleder mulje. Zamislin samo kobor ka ova bahtale tegani (Dela 24:15). Sare kola ka mothoven soj tane verna e Jehovase ko sa, ka pobedinen o meribe kova nasledinđam ando Adam. On ka živinen večno. Svako hrišćanin avdije valjani te ovel zahvalno aso ohrabrujuća lafija ando uskrsenje kola o Pavle pisinđa e hrišćanenđe ko Korint. Isi amen svako razlog te ćera sa so šaj ki amari služba e Devlese (1. Kor. 15:58). Ako daja sa amendar ki služba, šaj te nadina amen so ki budućnost ka ovel amen but bahtalo đivdipe. O đivdipe tegani ka ovel pošukar nego so šaj te zamislina. Tegani ka dikha so amaro trud na hine uzaludno (w20.12 13 ¶16-17).

Ako o proročanstvija kotar Jezekilj 38:10-23; Danilo 2:43-45; 11:44–12:1 hem Otkrivenje 16:13-16, 21 vaćerena ando isto period hem ista događaja, tegani mangaja te mothova tumenđe so mislinaja so ka ovel. Ko disavo trenutko palo so ka počmini i bari nevolja, o „kraljija ando celo sveto“ ka udružinen pe hem ka formirinen i koalicija naroda (Otkr. 16:13, 14). Ki Biblija, akija koalicija vićimi tani „Gog andi phuv Magog“ (Jezek. 38:2). Akija koalicija naroda ka napadini sa e Devlese narodo hem ka pokušini potpuno te uništini len. Ked vaćerđa kotar odova vreme, o apostol Jovan dikhlja bari kukudi koja alji upro e Devlese neprijateljija. Akija simbolično kukudi verovatno predstavini i zorali poruka osude koja ka propovedini e Jehovaso narodo. Možda baš sebepi odija poruka, o Gog ando Magog ka napadini e Devlese narodo hem ka del sa pestar te uništini le (Otkr. 16:21; w20.05 15 ¶13-14).

E Devleso sveti duh tano poklon aso kova valjani te ova zahvalna. Pana pobuter ka ova zahvalna aso sveti duh, ako razmislinaja so o sveti duh ćerela ko amaro vreme. Angleder te đal ko nebo, o Isus phenđa pe učenikonenđe: „Ka dobinen i snaga ked o sveti duh ka avel upro tumende hem ka oven me svedokija. . . sa đi o krajo e phuvjako“ (Dela 1:8). Prekalo sveti duh, pobuter ando ofto tekvaš milionja manuša ko celo sveto služinena e Jehovase. Isto ađahar, amen uživinaja ko duhovno raj, odolese so e Devleso duh pomožini amenđe te razvijina o osobine sar soj tane: mangipe, radost, mir, strpljivost, ljubaznost, šukaripe, vera, blagost hem samokontrola. Akala osobine tane „plod ando duho“ (Gal. 5:22, 23). Ćaće, o sveti duh tano jekh but vredno poklon! (w20.05 28 ¶10; 29 ¶13).

Isi but razlogija sose šaj te ova sigurna so okola kola ka ađićeren okolen kola ka uskrsninen ka uspinen te penđaren len. Na primer, sebepi o način sar o Jehova angleder uskrsninđa e manušen, šaj te očekujina so o Jehova palem ka stvorini e manušen te izgledinen, te vaćeren hem te razmislinen ko isto način sar angleder so mulje. Setin tut so o Isus uporedinđa o meribe e sojbaja, hem o uskrsenje odoleja ked nekas vazdeja ando sojbe (Mat. 9:18, 24; Jov. 11:11-13). Ked o manuša uštena ando sojbe, on izgledinena hem vaćerena ko isto način sar angleder so đelje te soven hem olengo pamćenje na našalđola. Hajde te dikha e Lazareso primer. Ov hine mulo štar dive hem oleso telo počminđa te raspadini pe. Ama, ked o Isus uskrsninđa le, olese phenja odmah penđarđe le, a upro Lazar dićhilo so na bisterđa len (Jov. 11:38-44; 12:1, 2; w20.08 14 ¶3; 16 ¶8).

I razlika maškaro pomazanikija hem o avera bakre nane ko odova da li tani e Jehovase jekh grupa povredno andi aver. O solduj grupe tane olese jednako vredna. Ko krajo, ov platinđa isto cena, dinđa pe mangle Ćhave, hem aso pomazanikija hem aso avera bakre. I razlika maškaro akala duj grupe tani so isi len različita nade. Ama, o solduj grupe mora te aćhon verna e Devlese hem e Hristese (Ps. 31:23). Ma bistri, e Devleso sveti duh podjednako delujini upro sarinende. Odova značini so o Jehova dela po sveti duh svakonese premalo olese potrebe. Svako e Devleso sluga dobinđa šuži nada asi budućnost ando Jehova (Jer. 29:11). Ki Spomen-svečanost svako amendar isi le bari prilika te slavini e Devle hem e Hriste sebepi odova so on ćerđe te šaj te ovel amen večno đivdipe. I Spomen-svečanost tani najvažno događaj ko kova o prava hrišćanija ćedena pe (w21.01 18 ¶16; 19 ¶19).

But baro broj ando okola kola prisustvujinena ki Spomen-svečanost isi len nada so ka živinen ki phuv. Ama, sose tegani prisustvujinena ki e Gospodesi večera? Ando isto razlog sebepi kova o manuša prisustvujinena ko pe amalengo venčanje. On mangena te mothoven so mangena hem so podržinena odova bračno par. Isto ađahar, o avera bakre prisustvujinena ki Spomen-svečanost sebepi so mangena hem podržinena e Hriste hem e pomazanikonen. Uzo odova, on prisustvujinena hem sose mangena te mothoven pi zahvalnost asi e Isusesi žrtva, sose sebepi odija žrtva on šaj večno te živinen ki phuv. Pana jekh važno razlog sose o avera bakre prisustvujinena ki Spomen-svečanost tano sose mangena te ićeren pe ki e Isusesi zapovest. Ked o Isus uspostavinđa i Spomen-svečanost pe verno učenikonencar, ov phenđa lenđe: „Ćeren akava te setinen tumen upro mande“ (1. Kor. 11:23-26). Odolese, o avera bakre ka oven prisutna ki Spomen-svečanost sa đi ki phuv ka oven pomazanikija (w21.01 17-18 ¶13-14).

O ćaćutno mangipe mora te mothovi pe delijencar (Uporedin e stihonencar andi Jakovljeva 2:17, 26). Na primer, o Jehova mangela amen (1. Jov. 4:19). Oleso mangipe dićhola ko šuže lafija kola tane pisime ki Biblija (Ps. 25:10; Rimlj. 8:38, 39). Ama, amen hijam uverime so o Devel mangela amen na samo sebepi odova so phenela, nego hem sebepi o buća kola ćerela. O Jehova dozvolinđa oleso Ćhavo te patini hem te merel sebepi amaro (Jov. 3:16). Ćaće, nane amen nijekh razlog te sumnjina so o Jehova mangela amen. Ked hijam poslušna e Jehovase hem e Isusese, amen mothovaja so mangaja len (Jov. 14:15; 1. Jov. 5:3). O Isus zapovedinđa amenđe te manga jekh jekhe (Jov. 13:34, 35). Amaro mangipe premalo amare phralja hem phenja na valjani te mothova samo lafencar već hem delijencar (1. Jov. 3:18; w21.01 9 ¶6; 10 ¶8).

Okola kola tane pomazime e sveto duhoja nadinena pe so zauvek ka vladinen e Isuseja, sar olese suvladarija ko e Devleso Kraljevstvo. On ka bešen e Hristeja – ka dikhen le, ka vaćeren oleja hem ka sarađujinen oleja (Jov. 14:2, 3). Hem okola kola isi len zemaljsko nada ka osetinen e Isuseso mangipe hem i briga. Iako on na ka dikhen e Isuse, on ka zorjaćeren po amalipe oleja đi ka uživinen ko životi kova o Jehova hem o Isus omogućinđe olenđe (Is. 9:6, 7). Ked prihvatinaja e Isuseso poziv te ova olese amala, amen dobinaja but blagoslovija. Na primer, već akana osetinaja oleso mangipe hem olesi podrška. Isi amen mogućnost večno te živina. Hem odova soj tano najvažno, amaro amalipe e Isuseja ka legari amen đi diso so najviše vredini – ko paše odnos e Isusese Dadeja, e Jehovaja. Ćaće tani bari čast te ova vićime e Isusese amala! (w20.04 25 ¶15-16).

O lil ando apostol Pavle hine pisimo e pomazano hrišćanenđe ko Korint kola ka uskrsninen ko životi ko nebo. On hine „posvetime ko jekhipe e Hristeja Isuseja, vićime te oven sveta.“ O Pavle vaćerđa hem ando okola „kola mulje ko Hrist“ (1. Kor. 1:2; 15:18; 2. Kor. 5:17). Ko jekh aver lil, o Pavle pisinđa so okola kola tane ko „jekhipe oleja ko meribe kova tano sar oleso“ ka oven ko „jekhipe oleja hem ko uskrsenje kova tano sar oleso“ (Rimlj. 6:3-5). O Isus uskrsninđa sar duhovno osoba hem đelo ko nebo. Ađahar ka ovel hem sarinencar kola tane „ko jekhipe e Hristeja“, okolencar kola tane pomazime. O Pavle pisinđa so o Hrist „prvo uskrsninđa ando okola kola mulje“ (1. Kor. 15:20). O Isus hine prvo kova uskrsninđa sar duhovno osoba hem dobinđa večno životi (w20.12 5-6 ¶15-16).

Avdije, ked o pomazanikija merena, on odmah uskrsninena ko đivdipe ko nebo. Odova potvrdinena hem e Pavlese lafija andi 1. Korinćanima 15:51, 52. Palo odova so ka uskrsninen, e Hristese phralja ka oven but bahtale. I Biblija mothovi amenđe so ka ćeren ko nebo o pomazanikija kola ka uskrsninen „posigate nego so i jakh treptini.“ O Isus phenđa lenđe: „A okolese ko pobedini hem ko sa đi o krajo ka ćerel sa so zapovedinava, ka dav i vlast upro narodija, sar so hem me dobinđum i vlast ando mo Dad, pa ka vladinen upro lende e palicaja ando sastron hem ka phagel len sar o ćare andi glina“ (Otkr. 2:26, 27; w20.12 12 ¶14-15).

Odoleja so vićinđa e Isuse „prvina“, o apostol Pavle mothovđa so palo Isus, hem avera ka uskrsninen ko životi ko nebo. Odola tane o apostolija hem avera kola tane „ko jekhipe e Hristeja“ (1. Kor. 15:18). Ko vreme kova tano odredimo, on ka uskrsninen ko nebo sar o Isus. Ked o Pavle pisinđa e hrišćanenđe ko Korint, o uskrsenje ando okola kola tane „ko jekhipe e Hristeja“ pana na počminđa. Umesto odova, o Pavle mothovđa so odova ka ovel ki budućnost ked phenđa: „Ama svako premalo redo: prvo o Hrist, a palo odova, đi trajini olesi prisutnost hem okola kola tane e Hristese“ (1. Kor. 15:23; 1. Sol. 4:15, 16). Avdije, amen živinaja ko vreme andi e Hristesi prisutnost. O apostolija hem avera pomazime hrišćanija kola mulje dobinđe pi nebesko nagrada hem hine „ko jekhipe e Isuseja hem ko uskrsenje kova tano sar oleso“ (Rimlj. 6:5; w20.12 5 ¶12; 6 ¶16-17).

O Pavle vaćerđa ando manuša kola tane uskrsnime ko đivdipe ko nebo hem kola isi len „duhovno telo“ (1. Kor. 15:43, 44). Ked o Isus hine ki phuv, ov hine le telo kotar rat hem mas, ama ked uskrsninđa, ov „ulo duh kova dela đivdipe“ hem irinđa pe ko nebo. Isto ađahar, ked ka uskrsninen hem o pomazanikija ka ovel len duhovno telo. O Pavle objasninđa: „Sar so hijam slična okolese kova tano ćerdo ando praho, ađahar ka ova slična okolese kova alo ando nebo“ (1. Kor. 15:45-49). Zapazin so ked o Isus uskrsninđa na hine le manušikano telo. Ked o Pavle reslja đi o krajo ando odova so vaćerđa ando uskrsenje, ov objasninđa sose, ked phenđa: „O telo hem o rat našti te nasledinen e Devleso Kraljevstvo“ ko nebo (1. Kor. 15:50). O apostolija hem avera pomazanikija na ka uskrsninen ko đivdipe ko nebo ko telo ando rat hem ando mas kova ćirnjola (w20.12 10-11 ¶10-12).

Ko prvo veko, o Devel pe sveto duhoja vodinđa disave e Isusese učenikonen te pisinen andi nebesko nada. O apostol Jovan phenđa: „Akana hijam e Devlese ćhave, ama pana nane amenđe mothovdo so ka ova. Ipak, đanaja so, ked ov ka mothovi pe, ka ova sar oleste“ (1. Jov. 3:2). Odova mothovi so ni o pomazime hrišćanija na đanena sar ka izgledini olengo đivdipe ko nebo. Ama, ked ka dobinen pi nagrada, on ka dikhen e Jehova. Ki Biblija pisini diso odolestar. O pomazanikija ka oven e Hristeja ked ov „ka uništini svako vladavina hem svako vlast hem sila.“ Odova odnosini pe hem ko „poslednjo dušmani, o meribe.“ Ko krajo, o Isus hem okola kola ka vladinen oleja, sa ka den e Jehovase ko vasta hem on kokri ka oven ko olese vasta (1. Kor. 15:24-28). Odova ka ovel ćaće jekh posebno vreme! (w20.12 8 ¶2).

Okola kola aćhilje verna, a kola na nadinena pe so ka živinen e Hristeja ko nebo, isto isi len nada so ka ovel uskrsenje. I Biblija phenela so o apostol Pavle hem avera kola đana ko nebo „prva ka uskrsninen“ (Fil. 3:11). Odova mothovi so ka ovel pana jekh uskrsenje kova tano povezimo odoleja so o Jov vaćerđa andi pi budućnost (Jov 14:15). „Okola kola tane e Hristese“ đi trajini olesi prisutnost ka oven e Isuseja ko nebo ked ov ka uništini svako vladavina, svako vlast hem sila. Tegani ka ovel uništimo hem „o poslednjo dušmani, o meribe.“ Sare kola uskrsninđe ko životi ko nebo niked na ka meren (1. Kor. 15:23-26). Okola kola nadinena pe so ka živinen ki phuv temeljinena pi nada ko e Pavlese lafija kola tane pisime ko avdisutno citati. Jasno tano so o nepravednikija našti te đan ko nebo. Odolese akala lafija odnosinena pe ko uskrsenje ki phuv kova ka ovel ki budućnost (w20.12 6-7 ¶18-19).

Amen šaj pućaja amen: „Sar šaj te ovav sigurno so o Jehova na vazdinđa pe vasta mandar?“ Šaj te phena so ko akava pućibe bešela hem o odgovor. Beršencar angleder, ki jekh Stražarsko kula pisinđa: „Šaj but putija ćeraja jekh isto greška hem šaj mislinaja so našti te pobedina ki odija borba. . . Ma mislin so ćerđan odobor baro greh so o Jehova našti te oprostini tuće. O Satana bi mangela baš ađahar te misline. Ked ćereja dijekh greh tu hijan tužno hem holjamo upro tute, ama sa odova mothovi so na hijan lošno osoba hem so o Jehova ka oprostini tuće. Aćhov ponizno hem ponodri molin tut o Devel te oprostini tuće hem te pomožini tuće palem te ovel tut čisto savest hem te na ponovine palem isto greška.“ Angleder so ulo hrišćanin, o apostol Pavle ćerđa but ozbiljna grehija. Ov na bisterđa so ćerđa (1. Tim. 1:12-15). Ama, ov upri otkupnina dikhlja sar upro dar kova tano lese lično dindo. Ov na pelo ki zamka te ovel le but baro osećaj andi krivica. Umesto odova, o Pavle dinđa sa pestar te služini e Jehovase najšukar so šaj (w20.11 27 ¶14; 29 ¶17).

O Beng koristini hem avera buća te iskušini amen. Sar tegani reagujinaja? Lokho tano te mislina so odola buća nane lošna. Na primer, šaj te mislina: „Akava nane odobor ozbiljno odolese so na ka ovav isključimo ako ka ćerav akava.“ Asavko razmišljanje tano but pogrešno. Pošukar tano te puća amen: „Da li o Satana koristini akava iskušenje te podelini mo vilo? Ako akana popustinava, da li ka lađaćerav e Jehovaso anav? Da li odova so ka ćerav ka pašaćeri man e Devlese ja ka cidel man olestar?“ Hor razmislin ando akala pućiba. Molin tut te ovel tut mudrost te šaj te odgovorine iskreno hem te na hovave kokri tut. Odova šaj te zaštitini tut. Odova ka pomožini tuće te cide tut kotar o iskušenje, sar so o Isus ćerđa ked phenđa: „Naš, Satana!“ (Mat. 4:10). Nane šukar ako amaro vilo tano podelimo (w20.06 12-13 ¶16-17).

Amen ponizno šunaja e Jehova, sose haljovaja so o Jehova uvek đanela soj tano najšukar amenđe (Ef. 4:22-24). Ked hijam ponizna, amen mislinaja so odova so o Jehova mangela tano považno ando odova so amen mangaja hem so avera tane pobare amendar. Ako ađahar razmislinaja, ka uživina ko šukar amalipe e Jehovaja hem amare phralencar ki skupština (Fil. 2:3). Ako na pazinaja, o manuša ko sveto šaj te utičinen upro amende hem amen te ova ponosna hem sebična. Verovatno, o hrišćanija ko prvo veko hine ki slično opasnost sose o apostol Pavle pisinđa e Rimljanenđe: „Phenava svakonese tumendar te na mislini pestar pobuter nego so valjani te mislini, nego neka ko po razmišljanje ovela razumno.“ O Pavle đanđa so đi jekh mera, valjani te ovel amen samopoštovanje. Ama, i poniznost ka pomožini amen hem ponodri te mislina amendar kobor valjani (w20.07 2 ¶1-2).

Ko vreme ked o kralj Asa živinđa, o mir na trajinđa zauvek. Jekh but bari vojska koja hine la pobuter ando milion vojnikija alji upro lende. O vojno zapovednik Zara hine sigurno so ov hem olesi vojska šaj te pobedinen e Juda. Ama, o kralj Asa hine le poverenje ko Jehova. O Asa ki molitva phenđa e Jehovase: „Pomožin amenđe, Jehova, Devla amaro, sose upro tute uzdajinaja amen hem ko to anav pođinđam protiv akija bari vojska“ (2. Let. 14:11). Iako i etiopsko vojska hine duj putija pobari kotar e Asasi vojska, o Asa đanđa so o Jehova tano moćno hem so šaj te pomožini pe narodose. Hem o Jehova na razočarinđa le. I etiopsko vojska doživinđa but baro poraz (2. Let. 14:8-13). Amen na đanaja tačno so ka ovel svakoneja amendar ki budućnost, ama đanaja so o mir kova e Devleso narodo akana isi le, na ka trajini zauvek. Setin tut so ked vaćerđa ando poslednja dive, o Isus phenđa so „o narodija ka mrzinen“ olese učenikonen (Mat. 24:9; w20.09 17-18 ¶14-16).

Niko amendar na mangela neko te vređini le. Ama, ako amare neprijateljija vređinena amen hem amen but uznemirinaja amen sebepi odova so phenena, tegani amen šaj te obeshrabrina amen (Posl. 24:10). Sar valjani te dikha ko odova ked amare neprijateljija vređinena amen? Sar o apostol Pavle, hem amen šaj te uživina ked vređinena amen. Sose? Odolese so, o uvrede hem o protivljenje tane dokaz so amen ćaće hijam e Isusese učenikija (1. Petr. 4:14). O Isus phenđa so olese sledbenikija ka oven progonime (Jov. 15:18-20). Baš odova desinđa pe e hrišćanenđe ko prvo veko. Ko odova vreme, okola upro kaste utičinđa i grčko kultura, mislinđe so o hrišćanija nane inteligentna hem soj tane slaba. Isto ađahar, hem o Jevreja smatrinđe so o hrišćanija „nane obrazovana hem soj tane obična manuša“, sar so hine o apostolija o Petar hem o Jovan (Dela 4:13). O hrišćanija šaj izgledinđe slaba, sebepi so na hine len političko uticaj ja vojno moć. Isto ađahar, o manuša na poštujinđe len. Da li o prva hrišćanija dozvolinđe te zaustavini len o negativno mišljenje ando olenge protivnikija? Na (w20.07 14-15 ¶3-4).

O apostol Jovan but manglja pe phralen hem manglja te ovel len zorali vera. Oleso mangipe hem i briga jasno dićhona ko savetija kola dinđa amenđe ko olese trin lila. Šukar tano te đana so o murša hem o đuvlja kola ka vladinen e Isuseja, ka postupinen amencar sar so o Jovan postupinđa averencar (1. Jov. 2:27). Odolese, celone vileja prihvatin o savet kova ov dinđa. Ov odlučno te živine premalo ćaćipe ađahar so ka šune e Jehova ko sa. Proučin oleso Lafi hem verujin ano leste. Izgradin zorali vera ko Isus. Ma prihvatin akale svetose sikljoviba hem o ideje ando otpadnikija. Pazin te na ove duje mujengo hem ma ćer odova soj tano neispravno. Živin premalo e Jehovase moralna merilija. Hem pomožin e phralenđe hem e phenjenđe te aćhon zorale ađahar so ka oprostine okolenđe kola povredinena tut hem so ka pomožine okolenđe kase valjani. Tegani, bizo obzir sova borinaja amen, hem ponodri ka živina premalo ćaćipe (w20.07 24-25 ¶15-17).

O Jehova mothovđa mangipe ked pe verno slugenđe dozvolinđa te oven deo andi skupština. Iako sare amen ćeraja različita buća ki skupština, sare amen hijam vredna hem potrebna hijam jekh jekhese. O apostol Pavle jasno mothovđa so nijekh e Jehovaso sluga našti te phenel averese: „Na valjaneja maje“ (1. Kor. 12:21). Ako mangaja te ovel mir ki skupština, mora te cenina jekh jekhe hem te sarađujina jekh jekheja (Ef. 4:16). Ked sarađujinaja jekh jekheja, ki skupština ka ovel jekhipe, sare ka osetinen o mangipe hem i skupština ka ovel zorali. Sa o starešine ki skupština tane naimenujime e Jehovase sveto duhoja. Ama, svako olendar isi le averćhane sposobnostija (1. Kor. 12:17). Disave akana sigende ulje starešine hem odolese nane len baro iskustvo sar avera starešine. Avera starešine sebepi pe berša ja po sastipe, možda našti te ćeren but buća ki skupština. Ama, nijekh starešina na valjani te mislini so aver starešina tano beskorisno. Odova bi ovela sar da samći phenela lese: „Na valjaneja maje.“ Umesto odova, svako starešina valjani te ićeri pe ko e Pavleso savet kova tano pisimo ko Rimljanima 12:10 (w20.08 26 ¶1-2; 27 ¶4).

O Jehova legari amen ko drumo ando životi prekali pi organizacija. Ked e Devlesi organizacija dela amen neve objašnjenja ando e biblijake sikljoviba ja smernice kola utičinena ko amaro ponašanje, amen prihvatinaja hem primeninaja len. Ama, sar reagujinaja ked e Devlesi organizacija anela disave odluke kola utičinena ko avera buća ko amaro đivdipe, sar soj tano te biknen pe amare dvorane? Amen ka aćhova bahtale ako na bistraja so sa so ćeraja, e Jehovase ćeraja hem so ov vodini pi organizacija (Kol. 3:23, 24). O kralj David mothovđa amenđe šukar primer ked dinđa prilog te ćerel pe o hram. Ov phenđa: „Sose ko hijum me hem soj tano mo narodo te bi šaj tuće dobrovoljno te da sa akava? Tutar sa avela, hem amen tuće daja odova so ando to vas dobinđam“ (1. Let. 29:14). Isto ađahar, ked amen daja prilog, hem amen daja e Jehovase odova so avela ando e Jehovaso vas. Ama, o Jehova cenini amaro vreme, amari snaga hem o materijalna buća kola daja te šaj te podupirina odova so olesi organizacija ćerela (2. Kor. 9:7; w20.11 22-23 ¶14-16).

Đi propovedinaja, amen hijam svesna so amaro uspeh na zavisini odolestar kobor manušen anđam ko ćaćipe (Luka 8:11-15). Anglo e Jehovase jaćha ka ova uspešna sa đi istrajinaja ko propovedibe andi šukar vest hem ko odova te sikava averen. Sose? Odolese so odoleja mothovaja so hijam poslušna Olese hem olese Ćhavese (Mar. 13:10; Dela 5:28, 29). Isi amen pana jekh razlog sose valjani te propovedina akana: O kraj ando akava sveto tano sa popaše. O vreme kova aćhilo amenđe te propovedina te bi spasinena pe o manuša tano ograničimo. Odolese, ma odugovlačin hem ma ađićer te ovel tut savršena okolnostija te bi ćereja odija važno buti. Akana tano vreme te zorjaćere ti želja, pana pošukar te penđare i Biblija, te ove hrabro hem te ove disciplinovano. Prekalo ofto milionija „ribarija ando manuša“ ađićerena tut te propovedine zajedno olencar i šukar vest hem ov uverimo so o Jehova ka del tut radost (Nem. 8:10; Luka 5:10). De sa tutar te propovedine kobor god šaj đi o Jehova na phenela soj tano kraj (w20.09 7 ¶18-20).

Na valjani te dozvolina te barjol amari želja aso materijalna buća. Sebepi o „zavodljivo barvalipe“ amen šaj te našala amaro mangipe premalo Jehova, amaro cenjenje aso e Devleso Lafi hem amari želja averenđe te vaćera o ćaćipe (Mat. 13:22). Ako mangaja te arakha o buća kola o Jehova dinđa amen, valjani sigate te reagujina ked dikhaja i opasnost. Valjani angleder te razmislina so ka ćera ako avaja ki opasno situacija. Na primer, valjani angleder te razmislina kova „izlaz“ ka koristina, odnosno so ka ćera ako ki televizija, ko film ja ko internet, iznenada ikljola disavi nemoralno scena, o scene kaj isi but nasilje ja o materijali ando otpadnikija. Ako angleder spreminaja amen aso odova so šaj te ovel, šaj sigate te reagujina te zaštitina amaro amalipe e Jehovaja hem te aćhova čista anglo e Jehovase jaćha (Ps. 101:3; 1. Tim. 4:12). Amen mora te arakha o vredna buća kola o Jehova dinđa amen, a odola tane o ćaćipe andi Biblija hem i čast te sikava averen ando ćaćipe. Ked odova ćeraja, amen ka ovel amen čisto savest, ka đana sose živinaja hem ka ova bahtale sose pomožinaja averenđe te penđaren e Jehova (w20.09 30 ¶16-19).

Da li hijan krstimo? Ako ja, tu javno mothovđan ti vera ko Jehova hem ti spremnost te služine olese organizacijaja. Avdije, ando način sar o Jehova vodini pi organizacija šaj te dikha savo tano ov sar osoba, koja tani olesi namera hem kola tane olese merilija. Zapazin trin olese osobine kola jasno dićhona ki olesi organizacija. Sar prvo, „o Devel nane pristrasno“ (Dela 10:34). O mangipe podstakninđa e Jehova te del pe Ćhave sar „otkupnina sarinenđe“ (1. Tim. 2:6; Jov. 3:16). O Jehova koristini pe narodo te propovedini i šukar vest sarinenđe kola mangena te šunen hem odoleja pomožini so pobuter manušenđe te ovel len korist andi otkupnina. Sar dujto, o Jehova tano Devel ando redo hem ando mir (1. Kor. 14:33, 40). Odolese, okola kola obožavinena le ćerena odova ko organizovano hem mirno način. Sar trito, o Jehova tano „Veličanstveno Učitelj“ (Is. 30:21). Odova jasno dićhola sose olesi organizacija sikavi averen andi Biblija, sar ki skupština ađahar hem ki služba (w20.10 20 ¶1-3).