Maj

Pana ked o Isus hine terno ćhavo, ov birinđa te šunel pe roditeljen. Ov niked na hine lenđe neposlušno sebepi so mislinđa so đanela pobuter olendar. O Isus hine najphureder ćhavo so značinđa so hine le disave odgovornostija. Ov dinđa sa pestar te ispunini len. Sigurno but trudinđa pe te sikljol ando Josif te ovel tesari te šaj te pomožini pe porodicaće te ovel len sa so valjani lenđe. E Isusese roditeljija verovatno vaćerđe lese so ov bijandilo ko jekh čudesno način hem odova so o anđelija phenđe olestar (Luka 2:8-19, 25-38). O Isus na hine zadovoljno samo odoleja so on vaćerđe lese, već hem ov kokri proučinđa o spisija. Sar đanaja so o Isus temeljno proučinđa e Devleso Lafi? Sose đi pana hine terno ćhavo, o učiteljija ko Jerusalim „hine oduševime odoleja sar odgovorini hem kobor buća haljola“ (Luka 2:46, 47). Ked hine le samo 12 berš, o Isus već hine uverimo so o Jehova tano oleso Dad (Luka 2:42, 43, 49; w20.10 29-30 ¶13-14).

I vera ko e Isuseso uskrsenje tani temelj asi amari nada. Ked pisinđa ando uskrsenje, o Pavle najangleder vaćerđa ando trin buća. Sar prvo, „o Hrist mulo aso amare grehija.“ Sar dujto, „ov hine parumo.“ Hem sar trito, „ov uskrsninđa ko trito dive, sar so pisini ko Lil“ (1. Kor. 15:3, 4). So e Isuseso meribe, parujbe hem uskrsenje značini amenđe? O prorok Isaija pisinđa so o Mesija ka ovel „silaja. . . ikaldo andi phuv e đivdengi“ hem so olese hine pripremimo „o grobo maškaro zločincija.“ Ama, ka desini pe pana diso. O Isaija pana phenđa so o Mesija ka akhari „o grehija ando but manuša.“ Odova o Isus ćerđa, ađahar so dinđa po životi sar otkupnina (Is. 53:8, 9, 12; Mat. 20:28; Rimlj. 5:8). Odolese, e Isuseso meribe, parujbe hem uskrsenje dena amenđe zoralo temelji asi amari nada so ka ova oslobodime ando greh hem meribe hem so palem ka dikha amare manglen kola mulje (w20.12 2-3 ¶4-6; 5 ¶11).

O apostol Pavle propovedinđa ko jevrejska sinagoge. Na primer, ko Solun, ki sinagoga „trin sabatija vaćerđa olencar hem mothovđa lenđe dokazija kotar Lila“ (Dela 17:1, 2). E Pavlese verovatno na hine pharo te propovedini ki sinagoga. Ov barilo sar Jevrejin (Dela 26:4, 5). Sebepi so haljilo sar o Jevreja razmislinena, ov šajinđa uverljivo te propovedini olenđe (Fil. 3:5). Sebepi o protivnikija, o Pavle morandilo te našel kotar o Solun, a palo odova hem andi Verija hem ađahar reslja ki Atina. Palem, ov ki sinagoga „vaćerđa e Judejconencar hem avere manušencar kola verujinena ko Devel“ (Dela 17:17). Ko trg, o Pavle hine le prilika te propovedini e manušenđe kola hine averćhane. Maškaro lende hine o filozofija hem o nejevreija kola mislinđe so o Pavle propovedini olenđe disavo „nevo sikljovibe.“ On phenđe lese: „Vaćereja amenđe buća kolendar niked na šunđam“ (Dela 17:18-20; w20.04 9 ¶5-6).

Ma mislin so na hijan vredno ako isi tut disavi slabost hem borineja tut olaja. Sebepi so sare grešinaja, sarinenđe amenđe valjani e Jehovaso nezaslužimo šukaripe, kova ov mothovi amenđe prekali otkupnina (Ef. 1:7; 1. Jov. 4:10). Amare phralja hem phenja andi skupština ka ohrabrinen amen. On šaj te šunen amen ked valjani amenđe hem šaj te ohrabrinen amen pe lafencar (Posl. 12:25; 1. Sol. 5:14). Jekh phen andi Nigerija, koja vićini pe Džoj hem kolaće hine but pharo sebepi so hine obeshrabrimi, phenela: „Kaj bi me ovava akana bizo me phralja hem me phenja? On tane maje dokaz so o Jehova odgovorini ko me molitve. On čak sikavđe man sar me te ohrabrinav averen kola tane obeshrabrime.“ Ama, na valjani te bistra so amare phralja hem phenja šaj na ka đanen uvek ked valjani amenđe ohrabrenje. Odolese, amen valjani te vaćera dijekhe iskusno phraleja ja phenjaja hem te phena lenđe so valjani amenđe pomoć (w20.12 23-24 ¶7-8).

Te bi ovaja nekasa amal, o prvo korako tano te družina amen oleja. Ked vaćeraja nekasa ando amare mislija hem osećanja, amen ovaja amala. Ama, podijekh puti nane lokho te ova e Isuseja paše amala sose isi amen disave prepreke. Amen na penđarđam lično e Isuse. But hrišćanija ando prvo veko hine len isto prepreka. Ipak, o apostol Petar phenđa: „Iako niked na dikhljen le, tumen mangena le. Iako hem akana na dikhena le, ipak verujinena upro leste“ (1. Petr. 1:8). Odova značini soj tano moguće te ova paše amala e Isuseja bizo te penđara le lično. Isto ađahar, amen našti te vaćera e Isuseja. Ked molinaja amen, amen direktno vaćeraja e Jehovaja. Iako molinaja amen ko e Isuseso anav, amen na vaćeraja direktno oleja. Ni o Isus na mangela te molina amen olese. Sose? Sose i molitva tani deo ando amaro obožavanje hem jedino e Jehova šaj te obožavina (Mat. 4:10). Ama, šaj te mothova so mangaja e Isuse (w20.04 20 ¶1-3).

O trkačija kola učestvujinđe ko igre ki Grčka morandilje te borinen pe razno problemencar sar soj tane o umor hem i dukh. Ama, on šajinđe te osloninen pe samo ko po trening hem ki pi snaga. Sar on, hem amen dobinaja i obuka sar te prasta ki amari trka. Uzo odova, amen isi amen diso so on na hine len. Amen šaj te oslonina amen ki e Jehovasi neograničeno snaga. Ako osloninaja amen upro leste, ov obećini amenđe so na samo so ka sikavi amen, već hem ka zorjaćeri amen. O apostol Pavle morandilo te borini pe bute problemencar. But putija, o manuša uvredinđe le hem progoninđe le. Uzo odova, hine le „karo ano telo“ hem podijekh puti na hine le snaga te borini pe (2. Kor. 12:7). Ama, ko odola problemija ov na dikhlja sar razlog te odustajini, već upro lende dikhlja sar prilika te oslonini pe upro Jehova (2. Kor. 12:9, 10). Odolese so o Pavle hine le asavko stav, o Jehova pomožinđa lese ko sa olese problemija (w20.04 29 ¶13-14).

Pana jekh baro poklon kova na dićhola tano odova so isi amen bari čast te sarađujina e Jehovaja, e Isuseja hem e anđelencar (2. Kor. 6:1). Svako puti ked hijam ki služba, amen sarađujinaja olencar. Ked o Pavle vaćerđa pestar hem ando avera hrišćanija, ov phenđa: „Amen hijam e Devlese saradnikija“ (1. Kor. 3:9). Ked propovedinaja, amen sarađujinaja hem e Isuseja. Setin tut so palo odova so zapovedinđa pe učenikonenđe te „ćeren učenikonen ando manuša kotar sa o narodija“, o Isus phenđa: „Me hijum tumencar“ (Mat. 28:19, 20). So šaj te phena ando anđelija? But hijam zahvalna so o anđelija usmerinena amen ked vaćeraja „i večno šukar vest. . . okolenđe so živinena ki phuv“ (Otkr. 14:6). So šaj sa te ćera sebepi so isi amen asavki podrška kotar nebo? Đi sejinaja i poruka ando Kraljevstvo, disavo seme perela ki šukar phuv hem barjola (Mat. 13:18, 23). Koj tano zaslužno te bi o seme barjola hem te bi anela o plod? O Isus objasninđa odova ko avdisutno citati (w20.05 30 ¶14-15).

Avdije, but porodice tane razdvojime sebepi o razvod. Čak, iako disave porodice živinena zajedno, nane paše jekh jekheja. „I daj, o dad hem o ćhave nane povezime jekh jekheja, ama tane povezime e kompjutereja, e tableteja, e telefoneja ja jekhe video igricaja“, phenela jekh porodično savetnik. „Iako živinena ko isto ćher, on jedva penđarena jekh jekhe.“ Niko amendar na mangela te ovel sar o manuša ko akava sveto kola na mothovena mangipe premalo avera. Umesto odova, amen valjani te sikljova sar šaj pana pobuter te manga amare porodica hem amare phralen hem phenjen ki skupština (Rimlj. 12:10). Savo tano odova mangipe? Odova mangipe podstaknini sarinen ki porodica te oven paše jekh jekheja. Sar so mangaja svakone andi amari porodica, ađahar valjani te manga svakone phrale ja phenja andi amari duhovno porodica. Ked ađahar mangaja averen, ka pomožina averenđe te oven bahtale đi služinena e Jehovase (Mih. 2:12; w21.01 20 ¶1-2).

Jekh sportsko tim kova isi le isto cilj, verovatno ka pobedini. Amaro vilo šaj te ovel sar o tim kova pobedini samo ako amare mislija, želje hem osećanja tane usmerime ko odova te služina e Jehovase. Ma te bistre, so o Beng mangela to vilo te ovel podelimo. Ov mangela ano tute uvek te ovel borba maškaro odova so o Jehova mangela hem maškaro te sebična želje. Ki aver strana, tuće valjani vilo kova nane podelimo te šaj te služine e Jehovase (Mat. 22:36-38). Odolese, niked ma dozvolin e Bengese te ćerel to vilo te ovel podelimo! Molin tut e Jehovase sar o David: „De man vilo kova nane podelimo, te šaj te darav ando to anav.“ Ćer sa so šaj te šaj te živine premali akija molitva. Svako dive, te odluke, bilo on te oven tikne ja bare, nek mothoven so isi tut strahopoštovanje premalo e Jehovaso sveto anav. Ked ka ćere ađahar, sar jekh ando e Jehovase svedokija, tu ka ane slava e Devlese anavese (Posl. 27:11). Hem sare amen, ka phena isto so phenđa o prorok Mihej: „Amen ka služina e Jehovase, amare Devlese, ki celo večnost“ (Mih. 4:5; w20.06 13 ¶17-18).

Ked o kralj ando sever hem avera vlastija ka napadinen e Devlese narodo, odoleja ka holjanćeren e Svemoćno Devle hem o Armagedon ka počmini (Otkr. 16:14, 16). Tegani, o kralj ando sever zajedno avere phuvjencar kola predstavinena o Gog ando Magog ka oven uništime. Tegani, „na ka ovel niko ko ka pomožini“ odole kraljese (Dan. 11:45). O izveštaj kotar Danilo dela amenđe pobuter informacije ando odova sar o kralj ando sever hem olese saveznikija ka oven uništime, a sar amen ka ova zaštitime (Dan. 12:1). So značini akava stih? Dujto anav aso amaro Kralj, o Isus Hrist, tano Mihailo. Ov „terđola hem pomožini“ e Devlese narodose kotar 1914. berš, ked oleso Kraljevstvo hine uspostavimo ko nebo. Uskoro, ov „ka uštel“, ađahar so ka uništini sa pe neprijateljen ko Armagedon. Odova maribe ka ovel o završno događaj kova o Danilo opisujinđa sar najpharo vreme ki manušikani istorija (Otkr. 6:2; 7:14; w20.05 15-16 ¶15-17).

Đi hine robo hem palo odova đi hine phanlo, o Josif naštinđa nisar te menjini pi situacija. So pomožinđa lese te aćhol pozitivno? Umesto te razmislini ando odova so više naštinđa te ćerel, ov trudinđa pe o zadatkija kola dobinđa, te ćerel najšukar so šaj. O Josif uvek dinđa sa pestar te ugodini e Jehovase. Sebepi odova, o Jehova blagoslovinđa sa so o Josif ćerđa (Post. 39:21-23). E Josifesi priča setinćeri amen so akava sveto tano okrutno hem so o manuša ka oven nepravedna premalo amende. Čak hem o phralja hem o phenja šaj te povredinen amen. Ama, ako tano o Jehova amari stena ja amaro utočište, amen na ka obeshrabrina amen hem na ka ćhinava te služina lese (Ps. 62:6, 7; 1. Petr. 5:10). Isto ađahar, setin tut so o Josif hine le oko 17 berš ked o Jehova dinđa le odola sune. Šaj te phena so o Jehova isi le poverenje upro pe sluge, čak iako tane on but terne. Avdije, but terne tane sar o Josif. Hem on isi len vera ko Jehova. Sebepi soj tane poslušna e Jehovase, disave olendar hine nepravedno osudime hem ćhivde ko phanlipe (Ps. 110:3; w20.12 16 ¶3; 17 ¶5, 7).

E apostolenđe, e Petarese hem e Jovanese, hine čast te oven progonime sebepi so sledinena e Isuse hem vaćerena ando olese sikljoviba (Dela 4:18-21; 5:27-29, 41, 42). O učenikija na hine len sose te lađan. Odola ponizna hrišćanija ćerđe pobaro šukaripe e manušenđe, nego bilo kova olengo protivniko. Na primer, e biblijake knjige kola pisinđe disave ando odola hrišćanija, pana pomožinena hem dena nada milionija manušenđe. Isto ađahar, o Kraljevstvo kolestar on vaćerđe akana vladini ko nebo hem pana hari ka vladini upro sa o manuša ki phuv (Mat. 24:14). Ama, i moćno vladavina ko purano Rim koja progoninđa e hrišćanen, već beršencar na postojini, a odola verna učenikija akana tane kraljija ko nebo. Olenge protivnikija davno mulje hem ako iked ka uskrsninen, upro lende ka vladini o Kraljevstvo kolestar vaćerđe o hrišćanija kolen on mrzinđe (Otkr. 5:10; w20.07 15 ¶4).

O Avraham hine le odobor zorali vera ko e Jehovase obećanja so samći šajinđa te dikhel e Pomazaniko, e Mesija, kova ka ovel kralj ko e Devleso Kraljevstvo. Sebepi odova, o Isus šajinđa te phenel e Jevrejenđe ko po vreme: „O Avraham tumaro dad but radujinđa pe ki nada so ka dikhel mo dive. Ov dikhlja le hem radujinđa pe“ (Jov. 8:56). Jasno tano, so o Avraham đanđa so disave ando olese potomkija ka oven deo ando Kraljevstvo kova o Jehova ka uspostavini hem hine spremno te ađićeri o Jehova te ispunini odova obećanje. Sar o Avraham mothovđa so ađićerđa i diz ja o Kraljevstvo, kaso graditelj tano o Devel? Najangleder, o Avraham na ulo podanik ando nijekh kraljevstvo ki phuv. Ov živinđa sar nomad, odnosno putujinđa kotar than ko than, nigde na aćhilo trajno te živini hem niked na podržinđa dijekhe kraljo ki phuv. Uzo odova, o Avraham na pokušinđa te uspostavini po kraljevstvo. Umesto odova, ov hem ponodri šunđa e Jehova hem ađićerđa Ov te ispunini po obećanje. Sebepi odova, o Avraham mothovđa so hine le zorali vera ko Jehova (w20.08 3 ¶4-5).

O Jehova obećinđa so ko raj niko na ka phenel: „Nabormo hijum“ (Is. 33:24). Okola kola ka uskrsninen ka oven palem stvorime hem ka oven saste manuša. Ama, on na ka oven odmah savršena. Ked bi ovena savršena, olengi porodica hem olenge amala na bi šaj te penđaren len. Izgleda so sa o manuša postepeno ka aven đi o savršenstvo đi trajini e Hristesi hiljadaberšengi vladavina. Ked ka završinen pe odola hiljada berša, o Isus ka irini o Kraljevstvo pe Dadese. Tegani, o Kraljevstvo potpuno ka ispunini sa pe zadatkija hem ka anel e manušen đi o savršenstvo (1. Kor. 15:24-28; Otkr. 20:1-3). Zamislin sar ka osetine tut ked palem ka dikhe te manglen kola mulje. Da li ka asa andi radost ja ka rove? Da li ka ove odobor bahtalo so ka đilabe e Jehovase? Jekh tano sigurno, tu ka osetine baro mangipe premalo to brižno Dad hem oleso nesebično Ćhavo, sebepi o uskrsenje (w20.08 16-17 ¶9-10).

O apostol Pavle podstakninđa e hrišćanen te razmislinen da li šaj te aćhon kokri hem ađahar te služinen e Jehovase (1. Kor. 7:8, 9). Sigurno so o Pavle na mislinđa so o hrišćanija kola nane ko brako tane manje vredna ando okola soj tane ko brako. U stvari, ov birinđa e terne Timoteje, kova hine kokri, te ćerel razna zaduženja (Fil. 2:19-22). Bi ovela pogrešno te mislina so jekh phral tano sposobno te ćerel disave buća samo odolese soj tano ko brako. A ki aver strana, bi ovela pogrešno te mislina so jekh phral nane sposobno te ćerel ista odola buća samo odolese so nane ko brako (1. Kor. 7:32-35, 38). Ni o Isus, a ni o Pavle na phenđe e hrišćanenđe so mora te ženinen pe ja so mora te aćhon kokri. Odolese, so šaj te phena ando brak hem ando samaštvo? Ki Stražarsko kula kotar 1. oktobar 2012. berš pisini: „Ćaće šaj te phena so o brako hem o samaštvo tane poklon ando Devel. . . O Jehova na mislini so okola kola nane ko brako valjani te lađan ja te oven tužna sebepi odova.“ Odolese, valjani te poštujina e phralen hem e phenjen kola nane ko brako (w20.08 28 ¶8-9).

Ko disave phuvja, but manuša mangena te sikljon pobuter andi šukar vest. Nesave jedva ađićerđe te šunen la. Ko avera phuvja, o manuša nane odobor zainteresovana te šunen ando Devel ja andi Biblija. Sar o manuša reagujinena odothe kuri tu živineja? Sar god te reagujinen o manuša, o Jehova ađićeri amendar hem ponodri te propovedina i šukar vest, sa đi ov na phenela so više na valjani te propovedina. O Jehova već odlučinđa ked o propovedibe ka završini pe. Palo odova „ka avel o kraj“ (Mat. 24:14). O Isus phenđa pe učenikonenđe save ka oven o manuša hem so ka ovel ko poslednja dive. Ov đanđa so odova šaj ka sprečini len te usredsredinen pe ko propovedibe. Odolese, ov phenđa lenđe: „Oven đangavde“ (Mat. 24:42). Ko e Nojese dive, hine but buća kola sprečinđe e manušen te obratinen pažnja ko olese upozorenja. Odola ista buća šaj te utičinen hem upro amende (Mat. 24:37-39; 2. Petr. 2:5). Odolese, amen mangaja te ova usredsredime ko zadatko kova o Jehova dinđa amen te ćera (w20.09 8 ¶1-2, 4).

O Beng tano „but holjamo“ hem amen našti te očekujina so na ka doživina o posledice andi olesi holi (Otkr. 12:12). Pana hari, amari vera ka ovel ispitimi. Uskoro ka ovel „bari nevolja savi na hine kotar početak ando sveto pa sa đi akana“ (Mat. 24:21). Ko odova vreme, neko kotar amari porodica šaj ka protivini pe amenđe ja amaro delo šaj ka ovel zabranimo (Mat. 10:35, 36). Tegani, da li svako amendar, sar o kralj Asa, ka verujini so o Jehova šaj te pomožini amen hem te zaštitini amen? (2. Let. 14:11). O Jehova akana pripremini amen te šaj te ovel amen zorali vera. Prekalo „verno hem razborito robo“ ov dela amen „hrana ko pravo vreme“ te šaj te ovel amen sa so valjani amenđe te aćhova duhovno zorale (Mat. 24:45). Ama, svako amendar valjani te del sa pestar te šaj te ovel amen zorali vera upro Jehova (Jevr. 10:38, 39; w20.09 18 ¶16-18).

Ked tano premali olesi volja, o Jehova prekalo po moćno sveti duh šaj te podstaknini e manušen kola tane ki vlast te ćeren odova so ov mangela. O manuša šaj te hanen o kanali hem o pani ka đal ko smer ko kova on mangena. Slično hem o Jehova prekalo po duh šaj te utičini upro manuša kola tane ki vlast te bi ćerena o buća kola tane premali olesi volja. Ked odova desini pe, o manuša kola tane ki vlast anena odluke kola šukar utičinena upro e Devleso narodo (Uporedin e stihonencar ando Jezdra 7:21, 25, 26). So šaj amen te ćera? Šaj te molina amen „aso kraljija hem aso sare kola tane ki vlast“ ked on valjani te anen odluke kola ka utičinen ki amari služba hem ko amare sastankija (1. Tim. 2:1, 2; Nem. 1:11). Sar so ćerđe o hrišćanija ko prvo veko hem amen valjani celone vileja te molina amen e Devlese aso amare phralja hem phenja kola tane ko phanlipe (Dela 12:5; Jevr. 13:3; w20.11 15 ¶13-14).

Ako tu nekasa proučinđan, sigurno hijan but bahtalo ked ov krstini pe! (1. Sol. 2:19, 20). Okola so krstinena pe tane šuže „lila andi preporuka“, na samo aso okola kola proučinđe olencar već hem asi celo skupština (2. Kor. 3:1-3). Šukar tano te zapazina so ko poslednja štar berš, ko celo sveto svako masek hine izvestime, oko deš milionija e biblijake kursija. Ko ista odola berša, oko 280 000 manuša krstinđe pe svako berš sar e Jehovase svedokija hem ulje učenikija ando Isus Hrist. Sar šaj te pomožina okolenđe kola pana proučinena te krstinen pe? Sa đi o Jehova strpljivo dela e manušenđe vreme hem prilika te oven e Hristese učenikija, hem amen mangaja te da sa amendar te pomožina len so posig te napredujinen đi o krštenje. Na aćhilo amenđe pana but vreme! (1. Kor. 7:29a; 1. Petr. 4:7; w20.10 6 ¶1-2).

O kralj Saul na hine poslušno e Jehovase. Ked o prorok Samuilo vaćerđa oleja ando odova, o Saul na priznajinđa pi greška. Umesto odova, ov phenđa so odova nane odobor ozbiljno buti hem so o manuša ćhivđe le te ćerel odova (1. Sam. 15:13-24). Angleder, o Saul već mothovđa slično stav (1. Sam. 13:10-14). Nažalost, ov dozvolinđa ko oleso vilo te razvijini pe o ponos. Ov na ispravinđa po razmišljanje hem odolese o Jehova ukorinđa le hem odbacinđa le. Amen na mangaja te ova sar o Saul hem odolese valjani te puća amen akala pućiba: „Ked čitinava disavo savet ando e Devleso Lafi, da li rodava izgovorija te na primeninav le? Da li mislinava so odova so ćerava nane odobor lošno? Da li averen krivinava aso odova so me ćerava?“ Ako amaro odgovor ko bilo kova ando akala pućiba tano ja, tegani mora te menjina amaro razmišljanje hem amare stavija. Ako na ćeraja odova, amaro vilo šaj te ovel odobor ponosno so o Jehova ka odbacini amen hem više na ka dikhel amen sar pe amalen (w20.11 20 ¶4-5).

Ternalen, odlučinen kase ka služinen. Kokri tu valjani te đane koj tano o Jehova, koja tani olesi namera hem sar odova odnosini pe ko to đivdipe (Rimlj. 12:2). Tek tegani tu šaj te ane i najvažno odluka ko to đivdipe, a odova tano te služine e Jehovase (Is. Nav. 24:15). Ako redovno čitineja i Biblija hem proučineja la, to mangipe premalo Jehova ka ovel sa pobaro hem ti vera upro leste ka ovel sa pozorali. Birin te ćhive e Jehovasi volja ko prvo than ko to đivdipe. E Satanaso sveto sikavi tut so ka ove bahtalo samo ako te sposobnostija koristineja aso to šukaripe. Ama, okola kola o materijalna buća ćhivena ko prvo than, „ćerđe pese but dukha“ (1. Tim. 6:9, 10). Ki aver strana, ako šuneja e Jehova hem ćhiveja olesi volja ko prvo than ko to đivdipe, ka ovel tut bahtalo đivdipe „hem ka postupine mudro“ (Is. Nav. 1:8; w20.10 30-31 ¶17-18).

Ko prvo veko, i poruka koja o Isus propovedinđa, dinđa nada sa e manušenđe. Ov zapovedinđa pe sledbenikonenđe te nastavinen te ćeren buti koja ov počminđa, te propovedinen „đi o najdur thana ki phuv“ (Dela 1:8). Naravno, on naštinđe odova te ćeren pe snagaja. Umesto odova, valjanđa lenđe o sveti duh, „o pomoćniko“, kas o Isus obećinđa lenđe (Jov. 14:26; Zah. 4:6). E Isusese sledbenikija dobinđe sveti duh ki Pedesetnica ko 33. berš ki nevi era. Sebepi i pomoć ando sveti duh, on odmah počminđe te propovedinen hem aso kratko vreme hiljade manuša prihvatinđe i šukar vest (Dela 2:41; 4:4). Ked počminđa o progonstvo, o učenikija na dozvolinđe i dar te ćhinavi len te propovedinen. Umesto odova, on rodinđe pomoć ando Devel. On molinđe pe: „Pomožin te slugenđe hem ponodri hrabro te objavinen to lafi.“ Tegani, on pherdilje sveto duhoja hem nastavinđe „hrabro te objavinen e Devleso lafi“ (Dela 4:18-20, 29, 31; w20.10 21 ¶4-5).

Sose šaj te ova sigurna so o Jehova ćaće irinđa e Isuse ko životi? Odolese so hine but svedokija kola dikhlje odova hem kola šajinđe te potvrdinen so o Isus ćaće uskrsninđa (1. Kor. 15:5-7). O prvo svedoko kas o Pavle pominđa hine o apostol Petar (Kifa). I grupa ando učenikija potvrdinđe so o Petar dikhlja e Isuse kova uskrsninđa (Luka 24:33, 34). Isto ađahar, e Isuse dikhlje hem avera apostolija palo odova so uskrsninđa. Palo odova, o Hrist „pojavinđa pe anglo pobuter ando 500 phralja ko isto vreme“, šaj ki Galileja ked reslje pe ko radosno događaj, sar so pisini ko Matej 28:16-20. O Isus pojavinđa pe hem e Jakovese, pe poluphralese, kova angleder na verujinđa soj tano o Isus, o Mesija (Jov. 7:5). Ama ked dikhlja e Isuse kova uskrsninđa, tegani verujinđa. Zanimljivo tano so oko 55. berš ki nevi era, ked o Pavle pisinđa odova lil, but manuša kola dikhlje odova uskrsenje hine đivde, so značinđa so svako kova hine le sumnja so o Isus uskrsninđa, šajinđa te vaćeri nekasa ando odola svedokija odolestar (w20.12 3 ¶5, 7-8).

Šaj te ovel amenđe but pharo te razmislina pozitivno, ako hijam već but vreme naborme. Odolese, valjani te molina e Jehova te pomožini amen. Iako o Jehova akana na saćari amen ko disavo čudesno način, ov utešini amen hem dela amen snaga koja valjani amenđe te šaj te istrajina (Ps. 94:19). Na primer, ov šaj te podstaknini amare phrale ja phenja te pomožini amen diso ko ćher ja te đal te ćinel odova so valjani amenđe. Isto ađahar, šaj te podstaknini len te molinen pe amencar. Ja šaj te pomožini amen te setina amen ko disave utešna mislija ando oleso Lafi, sar soj tani amari šuži nada so ka ovel amen savršeno đivdipe bizo nabormipe hem dukha ko nevo sveto kova avela (Rimlj. 15:4). Disave kola tane naborme ja phure šaj tane obeshrabrime sebepi so našti te đan ki služba odobor kobor bi mangena. Ki Amerika, amari phen koja vićini pe Lorel, hine phanli ko čelična pluća 37 berš. Uzo odova, oj hine la rak, nekobor operacije hem disave nabormipa ki koža. Ama, iako hine la odobor bare problemija sastipaja, odova na ćhinavđa la te propovedini. Oj svedočinđa e medicinsko sestrenđe hem averenđe kola avena hine koro late ćhere. Sebepi odova, oj šajinđa te pomožini najhari 17 manušenđe te penđaren o ćaćipe andi Biblija (w20.12 24 ¶9; 25 ¶12).

E Pavlese valjanđa pomoć. Oko 56. berš ki nevi era, ko Jerusalim astarđa le i rulja, legarđa le ando hram hem pokušinđa te mudari le. Tajsato dive, ked o Pavle hine anglo Sinedrion, olese neprijateljija manglje te ćeren le ko kotora (Dela 21:30-32; 22:30; 23:6-10). Tegani, o Pavle šaj pućlja pe: „Kobor pana šaj te izdržinav akava?“ Savi pomoć o Pavle dobinđa? I rat palo odova so o Pavle hine phanlo, „o Gospod“, o Isus, pojavinđa pe lese hem phenđa: „Ov hrabro! Sose sar so ko Jerusalim temeljno svedočinđan mandar, ađahar valjani te svedočine hem ko Rim“ (Dela 23:11). Odova ohrabrenje alo ko pravo vreme! O Isus pohvalinđa e Pavle aso svedočanstvo kova dinđa ko Jerusalim. Isto ađahar, obećinđa lese so bezbedno ka resel ko Rim, kuri ka del svedočanstvo. Palo odova so dobinđa odova obećanje, o Pavle sigurno osetinđa pe bezbedno sar o ćhavoro kole o dad ićeri ki angalja (w20.11 12 ¶1, 3; 13 ¶4).

Amari nada ko Kraljevstvo tani sar „sidro andi duša“, dela amen stabilnost iako isi amen phare okolnostija ja brige. Razmislin andi budućnost koja o Jehova obećini. Ko odova vreme, niko na ka ovel le sostar te brinini pe (Is. 65:17). Zamislin so hijan ko sveto kuri tano mir, kuri više na ka desinen pe o lošna buća (Mih. 4:4). Isto ađahar, ti nada šaj te zorjaćere ked averenđe vaćereja ando nevo sveto. De sa tutar te propovedine hem te ćere učenikonen. Ako ćereja odova, šaj te ove „potpuno sigurno so ti nada ka ispunini pe“ (Jevr. 6:11). Sebepi so o krajo ando akava sveto tano sa popaše, ka ovel amen sa pobuter problemija sebepi kola ka brinina amen. Ama, amen šaj te borina amen odole problemencar hem te arakha o mir, na amare snagaja nego ađahar so ka uzdajina amen upro Jehova. Odolese, hajde odoleja so ćeraja te mothova so isi amen vera ko e Jehovaso obećanje: „Arakhen o mir hem o pouzdanje, odova ka ovel tumari snaga“ (Is. 30:15; w21.01 7 ¶17-18).

Zapazin so ki Jakovljeva 5:11, odova so o Jehova tano samilosno, povezini pe odoleja soj tano milosrdno. Odija tani pana jekh osobina koja pašaćeri amen olese (Izl. 34:6). Jekh način sar o Jehova mothovi po milosrđe tano ađahar so oprostini amenđe ked ćeraja greške (Ps. 51:1). Ama ki Biblija, o milosrđe uključini diso pobuter odolestar. Odova tano jekh but zoralo osećanje kova jekh osoba isi la andral ked dikhela nekas ko isi le problemi hem kova podstaknini le te pomožini lese. O Jehova phenela so olesi želja te pomožini amenđe tani pozorali ando osećanja kola jekh daj isi la premalo po ćhavo (Is. 49:15). Ked hijam ko problemi, e Jehovaso milosrđe podstaknini le te pomožini amenđe (Ps. 37:39; 1. Kor. 10:13). Amen mothovaja milosrđe amare phralenđe hem e phenjenđe ked oprostinaja lenđe hem ked na ićeraja holi ked razočarinena amen (Ef. 4:32). Ama, najšukar način te mothova lenđe milosrđe tano te ova uzo lende ked isi len problemija. Ađahar, oponašinaja e Jehova kova tano najbaro primer ando mangipe (Ef. 5:1; w21.01 21 ¶5).

O poglavari valjani te ovel oprezno. Ov na valjani odobor te ćerel buti so nane le vreme te brinini pe aso pe porodicake duhovna hem emocionalna potrebe hem te sikavi len. O Jehova sikavi amen hem ispravini amen sebepi amaro šukaripe (Jevr. 12:7-9). Sar po Dad, hem o Isus mangipaja sikavi okolen upro kola ov isi le autoritet (Jov. 15:14, 15). Ked dela savet, ov tano ljubazno (Mat. 20:24-28). Ov haljola so hijam nesavršena hem so but putija šaj te ćera greške (Mat. 26:41). O poglavari kova oponašini e Jehova hem e Isuse, na bistrela so olesi romni hem olese ćhave tane nesavršena. Ov na holjani upri pi romni hem upro pe ćhave (Kol. 3:19). Umesto odova, ov ićeri pe ko načelo ando Galatima 6:1 hem blago tano đi ispravini len. Đi ćerela odova ov na bistrela so hem ov tano nesavršeno. Sar o Isus, ov haljola so najšukar način te sikavi len tano ađahar so ka del len primer (w21.02 6-7 ¶16-18).

Prekali otkupno žrtva, o Jehova ćinđa o životi ando svako manuš ki skupština (Mar. 10:45; Dela 20:28; 1. Kor. 15:21, 22). Odolese tano prikladno so ov ćhivđa e Isuse kova dinđa po đivdipe amenđe, te ovel poglavari andi skupština. Odolese, o Isus isi le autoritet te phenel so valjani te ćeren o manuša, o porodice hem i skupština hem ov isi le pravo te sprovodini odola pravilija (Gal. 6:2). Ama, o Isus na ćhivela amenđe samo pravilija. Ov šukar brinini pe amendar hem mangela amen (Ef. 5:29). O phenja mothovena so poštujinena e Hriste ađahar so trudinena pe te ićeren pe ko uputstvija kola tane dinde ando okola kola tane ćhivde te brininen pe olendar. O phralja mothovena so haljona o poglavarstvo ađahar so mothovena so poštujinena e phenjen. Ked sare ki skupština – o murša, o đuvlja, o poglavarija hem o starešine – haljona hem poštujinena o poglavarstvo kova o Jehova ćhivđa, ki skupština ka ovel mir. Hem soj tano najvažno, ađahar ka da čast amare mangle nebesko Dadese, e Jehovase (w21.02 18-19 ¶14-17).

Đi o David garavđa pe ando Saul, ki Filisteja, ov hem olese manuša aćhavđe pe porodicen ćhere hem đelje ko maribe. Tegani alje o neprijateljija hem lelje sa so on hine len hem olenge porodicen legarđe ko ropstvo. O David šajinđa te oslonini pe upro pe sposobnostija kola hine le sar ratniko hem kokri te ćerel plan sar ka izbavini len. Umesto odova, o David rodinđa pomoć ando Jehova. Ov pućlja e Jehova: „Da li te pođinav palo odola razbojnikija?“ O Jehova phenđa lese so valjani te ćerel odova hem uverinđa le so ka ovel uspešno (1. Sam. 30:7-10). So šaj te sikljova ando odova izveštaj? Rode savet angleder te ane disavi važno odluka. Šaj te vaćere te roditeljencar. Isto ađahar, šukar savet šaj te dobine ando iskusna starešine. O Jehova isi le poverenje upro lende hem odolese hem tu šaj te ovel tut. O Jehova upro lende dikhela sar „dar“ ki skupština (Ef. 4:8). Tu šaj te ane šukar odluke ako oponašineja olengi vera hem ako primenineja o mudra savetija kola on dinđe tut (w21.03 4-5 ¶10-11).

O Isus phenđa so ako na primeninaja odova so sikljovaja, amen hijam sar o manuš kova ćerela po ćher ki pošik. Iako ov dela sa pestar, oleso trud ka ovel uzaludno. Sose? Odolese so ked ka avel i oluja hem ked o bare panja ka bujinen ko oleso ćher, ov ka perel (Mat. 7:24-27). Isto ađahar, ako molinaja amen, ćeraja slika ki godi hem hor razmislinaja, ama na primeninaja odova so sikljovaja, amaro trud ka ovel uzaludno. Ked isi amen problemija ja doživinaja progonstvo, amari vera na ka ovel dovoljno zorali. Ki aver strana, ked proučinaja hem primeninaja odova so sikljovaja, amen ka ana pošukar odluke, ka ovel amen pobaro mir hem amari vera ka ovel pozorali (Is. 48:17, 18). Te šaj te aćhova verna e Jehovase ked hijam ko kušnje, amen valjani te oslonina amen upro leste ađahar so ka molina amen hem ađahar so redovno ka proučina oleso Lafi. Niked na valjani te bistra so jekh andi najvažno buti koja valjani te ćera tani te slavina e Jehova. Šaj te ova sigurna so o Jehova niked na ka mukhel amen hem so niko našti te ćhinavi le te mangel amen (Jevr. 13:5, 6; w21.03 15 ¶6; 18 ¶20).