Jun

O učiteljija valjani te mothoven so brininena pe ando pe studentija. Dikh upro lende sar upro te budućo duhovno phralja hem phenja. E studentenđe nane lokho te aćhaven pe amalen ando sveto hem te ćeren sa o promene kola valjani te šaj te služinen e Jehovase. Odolese, o šukar učiteljija ka upoznajinen pe studenten averencar ki skupština kola šukar ka utičinen upro lende. Tegani, o studentija šaj te uživinen ko odova te oven e Devlese narodoja, kova šaj te del len duhovno hem emocionalno podrška. Amen mangaja svako studenti te osetini so pripadini ki skupština hem soj tano deo andi amari duhovno porodica. Isto ađahar, mangaja hem ov te osetini kobor tano šukar ked ko celo sveto isi tut duhovno porodica koja mangela tut. Tegani, ka ovel lese polokho te aćhavi pe amalen ando sveto kola na pomožinena lese te mangel e Jehova (Posl. 13:20). A ki aver strana, ako on više na mangena te družinen pe oleja, tegani ov ka đanel so šaj te arakhi prava amala ki e Jehovasi organizacija (Mar. 10:29, 30; 1. Petr. 4:4; w20.10 17 ¶10-11).

Amen mora te ova e Isusese amala, te bi ovaja e Jehovaja šukar amala. Sose tano ađahar? Isi duj razlogija. Sar prvo, o Isus phenđa pe apostolenđe: „O Dad hem kokri mangela tumen, sose tumen zamangljen man“ (Jov. 16:27). Isto ađahar, phenđa: „Jedino prekalo mande šaj te avel pe ko Dad“ (Jov. 14:6). Ked bi pokušinaja te ova e Jehovase amala bizo te ova paše amala e Isuseja, odova bi ovela sar ked bi pokušinaja te khuva ko ćher bizo te koristina o udar. O Isus koristinđa slično ilustracija ked kokri pestar phenđa soj tano „udar ko kova khuvena o bakre“ (Jov. 10:7). O dujto razlog tano so o Isus savršeno oponašinđa pe Dadese osobine. Ov phenđa pe apostolenđe: „Ko dikhlja man, dikhlja hem e Dade“ (Jov. 14:9). Odolese, o najvažno način te penđara e Jehova tano te proučina e Isuseso životi. Ked ka sikljova ando Isus, amaro mangipe premalo leste ka barjol. So pobuter mangaja e Isuse, pobuter ka manga hem olese Dade (w20.04 21-22 ¶5-6).

Da li sebepi o nabormipe hijan ko kreveti ja ko invalidska kolica? Da li te pre hem te jaćha izdajinena tut? Ako osetineja tut ađahar, šaj pućeja tut da li šaj te prasta zajedno okolencar kola tane terne hem saste. Ov sigurno so šaj! But okola kola tane phure hem bizi snaga prastana ko akava drumo kova legari ko đivdipe. On našti odova te ćeren pe snagaja. Ama, on osloninena pe ki e Jehovasi snaga ađahar so šunena amare sastankija prekalo telefoni ja dikhena len prekalo strim. Uzo odova, on učestvujinena ki služba propovedanja ađahar so svedočinena e doktorenđe, e medicinsko sestrenđe hem pe familijaće. Ako našti te ćere sa so mangeja ki ti služba e Jehovase, ma obeshrabrin tut hem ma mislin so našti te prasta i trka đi o krajo. O Jehova mangela tut sebepi so isi tut vera upro leste hem ov na bistrela sa so beršencar ćerđan olese. Pobuter nego iked angleder, tuće valjani lesi pomoć. Odolese, ov sigurno so ov niked na ka mukhel tut (Ps. 9:10). Umesto odova, ov ka ovel pana popaše tuvaja (w20.04 29 ¶16-17).

Sostar šaj te vaćere nekasa ko verujini ko Devel? Šaj te vaćere kotar disave zajednička teme. Šaj hem ov obožavini samo jekhe Devle, šaj priznajini so o Isus tano amaro Spasitelj hem šaj verujini so živinaja ko vreme ked pana hari ka avel o krajo e lošnipase. Koristin o buća ko kola verujinena solduj te šaj te mothove lese e biblijaki poruka ko jekh zanimljivo način. Ma te bistre so o manuša šaj na verujinena ko sa so olengi religija sikavi. Odolese, iako haljiljan ki koja religija tani odija osoba, trudin tut te haljove ko so oj ćaće verujini. Jekh amaro phral kova služini sar misionar, zapazinđa so disave manuša, iako phenena so verujinena ko Trojstvo, ipak na verujinena so o Dad, o Ćhavo hem o sveti duh tane jekh Devel. Ov phenela: „Ked odova đaneja, tuće tano polokho te vaćere odole manušeja kotar zajednička buća.“ Odolese, de sa tutar te haljove ko so o manuša ćaće verujinena. Tegani, sar o apostol Pavle hem tu sa e manušenđe ka ove sa (1. Kor. 9:19-22; w20.04 10 ¶9-10).

Solduj đene, hem o Danilo hem o Jovan, vaćerđe so ki bari nevolja o Jehova hem o Isus ka zaštitinen pe slugen. Odolese, na valjani te dara kotar o događaja kola ka oven. O Danilo phenđa so okola kola ka preživinen ka oven o manuša kolenge anava tane „zapisime ki knjiga“. Ama, so valjani te ćera te bi amare anava ovena zapisime ki odija knjiga? Amen mora jasno te mothova so isi amen vera ko Isus, e Devleso Bakro (Jov. 1:29). Amen valjani te predajina amaro đivdipe e Devlese hem te krstina amen (1. Petr. 3:21). Isto ađahar, mora te mothova so podržinaja e Devleso Kraljevstvo, ađahar so ka pomožina averenđe te sikljon ando Jehova. Akana tano vreme te zorjaćera amari vera ko Jehova, ki olesi organizacija hem te podržina e Devleso Kraljevstvo. Ako ćeraja sa odova, ka ova zaštitime ked e Devleso Kraljevstvo ka uništini e kralje ando sever hem e kralje ando jug (w20.05 16 ¶18-19).

O Adam hem i Eva đanđe so e Devleso anav hine Jehova hem đanđe but važna buća olestar. On đanđe e Jehova sar e Stvoritelje, Okole kova dinđa lenđe đivdipe, but šužo than kaj te živinen hem savršeno bračno partnere (Post. 1:26-28; 2:18). Ama, da li on ka nastavinen te koristinen pi savršeno godi te bi hor razmislinena ando sa o buća kola o Jehova dinđa olenđe? Da li on hem ponodri ka barjaćeren po mangipe hem cenjenje aso Jehova? O odgovorija ko akala pućiba hine jasna ked e Devleso neprijatelj iskušinđa len. Ked o Beng vaćerđa prekalo sap, ov pućlja e Eva: „Da li o Devel ćaće phenđa so na isminena te han kotar svako kaš ko vrt?“ (Post. 2:16, 17; 3:1). Ko odova pućibe hine uključimo o podmuklo hovajba kova hine sar garavdo otrov. Sose phenaja odova? Odolese so o Devel phenđa olenđe so šaj te han kotar sa o kašta ko odova vrt, osim kotar jekh (Post. 2:9). O pućibe kova o Satana koristinđa podstakninđa len te razmislinen so o Jehova ipak nane velikodušno. Šaj i Eva zabrinuto pućlja pe: „Da li o Devel uskratini amenđe diso šukar?“ (w20.06 3-4 ¶8-9).

Disave e Jehovase sluge doživinđe ki skupština neko te povredini len. O apostol Pavle phenđa so disavo puti amare phralja ja phenja šaj te uvredinen amen. A šaj čak premalo amende neko te postupini nepravedno. Ako na pazinaja, šaj te ova ogorčena. I ogorčenost šaj te cidel e manuše kotar o Jehova. O Pablo, andi Južno Amerika hine nepravedno optužimo so ćerđa diso pogrešno. O Pablo na hine krivo. Ama, o starešine verujinđe soj tano ov krivo hem sebepi odova našalđa po zaduženje ki skupština. Sar ov reagujinđa? „But holjanđum“, phenela o Pablo „hem hari pohari duriljum andi skupština.“ Ako neko angleder ćerđa ozbiljno greh, ov šaj te ovel le osećaj krivice hem but vreme palo odova. Šaj te mislini so o Jehova više na mangela le. Čak, iako pokajinđa pe hem mothovđa pe lese milosrđe, ov šaj te mislini so nane dovoljno šukar manuš te šaj te ovel deo ando e Devleso narodo. Sar osetinaja amen sebepi so o phralja hem o phenja kola nalazinena pe ko asavke situacije, sar soj tane akala kolendar đi akana vaćerđam? (w20.06 19 ¶6-7).

Mora te sikljova te penđara ko kola situacije šaj te ova povredime hem palo odova te cida amen andi odija opasnost (Jevr. 5:14). Na primer, amen valjani mudro te birina i rekreacija hem i zabava. But putija, ki televizija ja ko filmija mothovi pe nemoralno ponašanje. Asavko ponašanje vređini e Devle hem ljegari đi o štetna posledice. Odolese, amen cidaja amen kotar i zabava koja hari po hari šaj te ljel amaro mangipe premalo Devel (Ef. 5:5, 6). Mora te đana sose tane opasna o hovajba kola širinena o otpadnikija kola isi len cilj te ćhiven amen te sumnjina ko amare phralja hem ki e Jehovasi organizacija (1. Tim. 4:1, 7; 2. Tim. 2:16). Asavke hovajba šaj te anen đi odova te slaboni amari vera. Amen mora te cida amen ando otpadnikija kola širinena asavke hovajba. Asavke hovajba avena ando „manuša kola isi len rumimi godi, kola više na haljona o ćaćipe.“ Olengo cilj tano te počminen te „svađinen pe hem te raspravinen pe“ (1. Tim. 6:4, 5). On mangena amen te verujina ko olenge klevete, a na te verujina amare phralenđe (w20.09 29 ¶13, 15).

O rom hem i romni valjani te mothoven mangipe hem poštovanje jekh jekhese (Ef. 5:33). I Biblija sikavi amen te usredsredina amen ko odova so šaj te da, a na so šaj te dobina (Dela 20:35). Koja osobina ka pomožini okolenđe kola tane ko brak te mothoven mangipe hem poštovanje? O odgovor tano poniznost. I poniznost pomožinđa butenđe te ovel len bahtalo brak. Na primer, o rom kova vićini pe Stiven, phenela: „Ako hijen tim, tumen ka ćeren zajedno sa o buća, pogotovo ked avena o problemija. Umesto te razmisline ’soj tano maje najšukar?‘, tu ka razmisline ’soj tano amenđe najšukar?‘“ Olesi romni, i Stefani, slično razmislini: „Niko na uživini ko odova te živini nekasa ko stalno svađini pe. Ked avela đi o nesporazum, amen pokušinaja te haljova sose alo đi o problemi. Palo odova molinaja amen, istražinaja hem vaćeraja odolestar. Umesto te napadina jekh jekhe, amen napadinaja o problemi.“ O roma hem o romnja ka oven bahtale, ako na mislinena soj tane považna ando poklo bračno partneri (w20.07 3-4 ¶5-6).

Đi služineja e Jehovase, ma oslonin tut upri ti snaga ja upro te sposobnostija. O apostol Pavle hine but školujimo manuš, odolese so ole sikavđa o Gamalilo, kova hine jekh ando najpoštujime manuša maškaro jevrejska vođe ko odova vreme (Dela 5:34; 22:3). Jekh vreme, o Pavle hine but uticajno manuš maškaro Jevreja (Dela 26:4). Ipak, o Pavle na osloninđa pe upro peste. E Pavlese hine drago te odreknini pe ando buća kola premalo e manušenge merilija ćerđe le te ovel važno manuš (Fil. 3:8). O Pavle nakhlja bare pharipa odolese so hine e Hristeso sledbenik. O manuša ando leso narodo mrzinđe le (Dela 23:12-14). O Rimljanija marđe le hem phanlje le, iako hine rimsko građanin (Dela 16:19-24, 37). Ov haljilo soj tano nesavršeno hem soj tano but pharo te ćerel odova soj tano ispravno (Rimlj. 7:21-25). Umesto te dozvolini olese neprijateljija ja olese mane te ćhinaven le te ovel e Hristeso učeniko, ov phenđa: „Uživinava ked hijum slabo.“ Sose phenđa odova? Odolese so ked hine slabo, ov dikhlja sar o Devel pomožini lese ko leso đivdipe (2. Kor. 4:7; 12:10; w20.07 16 ¶7-8).

Avdije, valjani te da sa amendar te ova usredsredime ko odova te propovedina. O Isus phenđa so olese učenikija ka propovedinen hem palo oleso meribe hem so odova ka ćeren pobuter nego so ov ćerđa đi hine đivdo. Palo odova so uskrsninđa, o Isus disave pe učenikonenđe prekalo jekh čudo pomožinđa te astaren bute maćhen. Ov koristinđa odija prilika te phenel lenđe so olengo zadatko, te oven ribarija ando manuša, tano považno andi bilo koja aver buti (Jov. 21:15-17). Angleder te đal ko nebo, o Isus phenđa pe učenikonenđe so o propovedibe kova ov počminđa, na ka ćerel pe samo ko Izrael nego hem ko avera phuvja (Dela 1:6-8). Beršencar palo odova, o apostol Jovan, ki vizija koja o Isus mothovđa lese, dikhlja so ka ovel ko „e Gospodeso dive.“ Jekh andi buti koja o Jovan dikhlja hine sar jekh anđeo propovedini „i večno šukar vest. . . aso svako pleme, asi svako ćhib hem aso svako narodo“ (Otkr. 1:10; 14:6). Kotar akava dikhaja so e Jehovasi volja avdije tani hem amen te učestvujina ko akava delo kova ćerela pe ko celo sveto, sa đi na završini pe (w20.09 9 ¶5).

Ki e Avrahamesi porodica hine bare problemija. Olesi mangli romni i Sara naštinđa te ovel la ćhave. Beršencar, on hine but razočarime sebepi odova. Ko krajo, i Sara dinđa e Avrahamese pe sluškinja, e Agara, te šaj te bijani ćhaven olaće hem olake romese. Ked i Agara aćhilji khamni e Ismaileja, počminđa te marel muj e Saraće. I situacija ulji odobor phari so i Sara uspudinđa e Agara ando ćher (Post. 16:1-6). Ko krajo, i Sara aćhilji khamni hem bijanđa e Avrahamese jekhe ćhave, kase ov ćhivđa anav Isak. O Avraham manglja hem e Ismaile hem e Isake. Sebepi so o Ismail lošno ponašinđa pe premalo Isak, o Jehova phenđa e Avrahamese, te uspudini e Ismaile hem e Agara ando ćher (Post. 21:9-14). Kasnije, o Jehova phenđa e Avrahamese te del e Isake sar žrtva (Post. 22:1, 2; Jevr. 11:17-19). Solduj putija, o Avraham morandilo te ovel le poverenje upro Jehova so ko krajo ka ispuninen pe o obećanja ando olese ćhave (w20.08 4 ¶9-10).

Zamislin kobor ka oven radosna okola kola ka uskrsninen ked ka menjinen pe te bi živinena premalo e Jehovase merilija. Okolenđe kola ka menjinen pe ka ovel dozvolimo te živinen ki phuv zauvek. Ki aver strana, okolenđe kola ka odbacinen e Devle na ka ovel dozvolimo te ruminen o mir ko raj (Is. 65:20; Jov. 5:28, 29). Đi o Kraljevstvo ka vladini, e Devleso narodo ka dikhel so o lafija ando Poslovice 10:22 tane tačna. Odothe pisini: „O blagoslov ando Jehova ćerela te ove barvalo hem na pratini le nisavi dukh.“ Uzi pomoć ando e Jehovaso sveti duh, e Devleso narodo ka ovel duhovno barvalo, odnosno sa poviše ka ličinen upro Hrist hem ka aven đi o savršenstvo (Jov. 13:15-17; Ef. 4:23). Svako dive on ka oven sa pozorale, pošukar manuša. Zamislin kobor bahtale ka ova (Jov 33:25; w20.08 17 ¶11-2).

Šukar tano te na bistra so disave olendar ćhivđe pese cilj te aćhon kokri. Avera bi mangena te ženinen pe, ama šaj pana na arakhlje e pravo osoba. A avera tane kokri sose olengo bračno drug mulo. Kova god razlog te ovel, da li o phralja hem o phenja ki skupština valjani te pućen okolen soj tane kokri sose pana na ženinđe pe ja on te roden lenđe nekas? Ako on na rodena pomoć, a amen nudinaja amen te arakha lenđe nekas, sar šaj te osetinen pe sebepi odova? (1. Tim. 5:13). Amare phralja hem phenja kola tane kokri ka oven zahvalna ako ceninaja len sebepi olenge šukar osobine, a na sebepi odova da li tane ko brako ja na. Umesto te žalina len, šukar tano te cenina olengi vernost. Odolese, amare phralja hem phenja niked na ka osetinen pe so amen samći phenaja lenđe: „Na valjanena maje“ (1. Kor. 12:21). Umesto odova, on ka osetinen so amen poštujinaja len hem so hijam bahtale sebepi so on tane deo andi skupština (w20.08 29 ¶10, 14).

Kasnije, o Isus pojavinđa pe hem e Pavlese (1. Kor. 15:8). O Pavle, tegani o Savle, hine ko drumo aso Damask ked šunđa o glaso ando Isus kova uskrsninđa hem ked dikhlja i vizija andi olesi nebesko slava (Dela 9:3-5). Odova so o Pavle doživinđa hine pana jekh dokaz so e Isuseso uskrsenje nane samo jekh izmislimi paramiz (Dela 26:12-15). Disavenđe hine but važno so o Pavle potvrdinđa so o Isus uskrsninđa sose ov angleder progoninđa e hrišćanen. Ked uverinđa pe so o Isus uskrsninđa, o Pavle dinđa sa pestar te uverini hem averen ko odova. Đi propovedinđa averenđe ando odova so o Isus mulo hem so palem tano đivdo, ov nekobor putija hine mardo, hine ko phanlipe hem doživinđa brodolom (1. Kor. 15:9-11; 2. Kor. 11:23-27). Ov hine odobor uverimo so o Isus uskrsninđa, so hine spremno te merel đi braninđa odova sikljovibe. Da li slažineja tut so odova tano pana jekh dokaz kova uverini amen so o Isus ćaće uskrsninđa hem so hem avera ka uskrsninen ki budućnost? (w20.12 3 ¶8-10).

Šaj te puća amen: „Da li hijum redovno ko amare sastankija?“ Ko sastankija, amen dobinaja snaga te šaj hem ponodri te služina e Jehovase hem dobinaja ohrabrenje ando amare phralja hem phenja (Mat. 11:28). Isto ađahar, šaj te puća amen: „Da li redovno čitinava i Biblija? Da li svako kurko isi man porodično proučibe? Ako živinava kokri, da li svako kurko isi man lično proučibe? Isto ađahar, da li dava sa mandar te propovedinav averenđe hem te sikavav len?“ Sose valjani odova te puća amen? I Biblija mothovi amenđe so o Jehova dikhela sostar razmislinaja hem soj tano ko amaro vilo. Odolese, amen valjani isto odova te ćera (1. Let. 28:9). Ako dikhaja so valjani te menjina amare ciljija, stavija, ja o način sar razmislinaja, tegani valjani te molina e Jehova te pomožini amen te ćera potrebna promene. Akana tano vreme te pripremina amen aso iskušenja kola ka ovel amen ki budućnost (w20.09 19 ¶19-20).

O Isus koristinđa jekh primer te bi objasnini so valjani jekh osoba te ćerel te bi ovela oleso učenik. Ov vaćerđa ando jekh manuš kova mangela te ćerel i kula hem ando jekh kralj kova mangela te đal ko maribe. O Isus phenđa so okova kova gradini i kula najangleder mora te „bešel te računini kobor ka koštini odova“, te bi šaj te završini i kula đi o krajo. Ov phenđa hem so o kralj najangleder mora te „bešel te pućel aso savet averen“, te dikhel da li olesi vojska šaj te pobedini (Luka 14:27-32). Isto ađahar, o Isus đanđa so o manuš kova mangela te ovel oleso učenik valjani šukar te razmislini odolestar so značini odova te sledini le. Odolese, valjani te podstaknina amare studenten te proučinen amencar svako kurko. Sar učitelj, tu valjani šukar te pripremine tut aso svako kurs. Đi razmislineja ando to student, hor razmislin sar šaj odola informacije te objasnine lese ko jekh jednostavno hem jasno način te šaj ov lokho te haljol len hem te primenini len (Nem. 8:8; Posl. 15:28a; w20.10 7 ¶5; 8 ¶7).

E Isusese zapovestija tane jasna. Amen mora te sikava e manušen ando odova so o Isus zapovedinđa. Ama, na valjani te bistra jekh važno detalji. O Isus na phenđa: „Sikaven len ando sa so zapovedinđum tumenđe.“ Umesto odova, ov phenđa: „Sikaven len te ićeren pe ko sa so zapovedinđum tumenđe.“ Te bi primeninaja akija jasno zapovest ked sikavaja e studenten, amen na valjani te sikava len samo so te ćeren nego hem sar te ćeren odova (Dela 8:31). Te „ićere“ jekh zapovest značini te šune la hem te primenine la. Ked proučinaja i Biblija averencar, amen sikavaja len ando odova so o Devel rodela olendar. Ama, odova nane dovoljno. Amen mora te sikava e studenten te primeninen odova so sikljona ko po životi (Jov. 14:15; 1. Jov. 2:3). Na primer, šaj te sikava len sar te primeninen e biblijake načelija ki škola, ki buti ja ki rekreacija. Đi molinaja amen olencar, šaj te molina e Jehova te vodini len pe sveto duhoja (Jov. 16:13; w20.11 2-3 ¶3-5).

E Isusese učenikija hine len hem avera izazovija. Na primer, na hine len but primerkija ando sveta spisija. Na hine len dodatna publikacije te bi proučinena sar amen avdije. Isto ađahar, o učenikija valjanđe te propovedinen e manušenđe kola vaćerđe različita ćhibja. Iako hine len sa odola izazovija, odola verna učenikija ćerđe odova so dićhilo sar nemoguće. Aso oko 30 berš on propovedinđe „ki celo phuv“ (Kol. 1:6, 23). O Jehova hem avdije vodini pe narodo hem dela le snaga. But putija ov vodini pe narodo prekalo po Lafi, kaso pisiba hine vodimo sveto duhoja. Ki Biblija šaj te čitina andi e Isusesi služba hem andi olesi zapovest koja dinđa pe sledbenikonenđe, te nastavinen te ćeren i buti koja ov počminđa (Mat. 28:19, 20). O Jehova nane pristrasno, so jasno dićhola ando odova ked phenđa so i šukar vest ka propovedini pe „ki svako nacija, ko svako pleme, ki svako ćhib hem ko svako narodo“ (Otkr. 14:6, 7). Ov mangela i poruka ando Kraljevstvo te resel đi sa o manuša (w20.10 21 ¶6-8).

O kralj David, hine manuš kova manglja „e Jehovaso zakon“ (Ps. 1:1-3). O David đanđa so o Jehova spasini okolen soj tane ponizna, a suprotstavini pe okolenđe soj tane ponosna. Odolese o David mukhlja e Devleso zakon te oblikujini oleso razmišljanje. Ov pisinđa: „Ka hvalinav e Jehova, kova savetujini man. Raćate opominena man mekle najhor mislija“ (Ps. 16:7). Ako hijam ponizna, amen ka mukha e Devleso Lafi te ispravini amaro pogrešno razmišljanje angleder te ćera diso pogrešno. E Devleso Lafi ka ovel sar glaso kova phenela amenđe: „Odova tano o drumo, đan odole drumoja.“ E Devleso Lafi ka upozorini amen ako počminaja te ćera diso soj tano pogrešno (Is. 30:21). Amare šukaripase tano te šuna e Jehova (Is. 48:17). Na primer, na ka osetina amen neprijatno sebepi so neko ispravini amen. Isto ađahar, amen ka ova popaše e Jehovaja odolese so haljovaja so ponašini pe premalo amende sar premalo pe ćhave (Jevr. 12:7; w20.11 20 ¶6-7).

Asavke stavija šaj utičinđe ko disave manuša ko Korint (1. Kor. 15:12). Isto ađahar, avera mislinđe so o uskrsenje valjani te haljol pe ko simbolično način, so i osoba hine „muli“ ano greho ama „oživinđa“ ked ulji hrišćanin. Kova god razlog te ovel, odova so phenđe so uskrsenje nane moguće, mothovđa so olengi vera hine uzaludno. Ako o Devel na uskrsninđa e Isuse, i otkupnina nane platimi hem o grehija našti te oven oprostime. Odolese, okola kola odbacinđe o uskrsenje na hine len pravo nada (1. Kor. 15:13-19; Jevr. 9:12, 14). O Pavle najšukar đanđa so o „Hrist uskrsninđa ando mule.“ Odova uskrsenje hine pošukar ando bilo kova uskrsenje kova hine angleder, sose sare kola uskrsninđe angleder, palem mulje. O Pavle vaćerđa so o Isus „prvo uskrsninđa ando okola kola mulje.“ Sar o Isus hine prvo? Ov hine prvo kova uskrsninđa sar duhovno osoba hem prvo kova đelo ko nebo (1. Kor. 15:20; Dela 26:23; 1. Petr. 3:18, 22; w20.12 5 ¶11-12).

Ko prvo veko, o phralja kola služinđe ko vodeće telo ko Jerusalim, sarađujinđe jekh jekheja te bi maškaro e Devleso narodo ovela redo hem mir (Dela 2:42). Na primer, ked oko 49. berš ki nevi era, pojavinđa pe o pućibe ando obrezanje, o vodeće telo uzi i pomoć ando sveto duh počminđa te razmotrini odija tema. Ked odova pućibe na bi ovela rešimo, ki skupština bi ovela i podela hem šaj sebepi odova bi aćhola o propovedibe. Iako hine Jevreja, o apostolija hem o starešine, na dozvolinđe i jevrejsko tradicija te utičini upro lende, ni okola kola zorale ićerđe pe ki odija tradicija. Umesto odova, on proučinđe e Devleso Lafi hem rodinđe ando Devel oleso sveti duh te bi pomožini len te anen ispravno odluka (Dela 15:1, 2, 5-20, 28). Savo hine o rezultati? O Jehova blagoslovinđa olengi odluka, ki skupština hine mir hem jekhipe hem o propovedibe nastavinđa pe (Dela 15:30, 31; 16:5). Avdije, e Jehovasi organizacija dela sa pestar maškaro e Jehovaso narodo te ovel redo hem mir (w20.10 22-23 ¶11-12).

Isi but razlogija sose našti te dobina disavo zaduženje kova mangljam ki e Jehovasi organizacija. Odova šaj te ovel sebepi so hijam but phure, naborme ja sebepi avera okolnostija. Ako hijam ki asavki situacija, but šaj te sikljova ando primer kotar o kralj David. Ov but manglja te gradini e Devleso hram. Ama, ked hine lese phendo so ov na hine birimo te ćerel odova, ov pomožinđa okolese kas o Jehova birinđa te ćerel odova zadatko. O David čak dinđa baro prilog te šaj te ćerel pe o hram. Ćaće tano o David but šukar primer amenđe! (2. Sam. 7:12, 13; 1. Let. 29:3-5). Sebepi o nabormipe, o Ig, jekh phral kotar i Francuska, ćhinavđa te služini sar starešina hem čak naštinđa više te ćerel disave jednostavna buća ko ćher. Ov pisinđa: „Ki početka, mislinđum so ništa na vredinava hem hijum le but obeshrabrimo. Ama, sar đelo o vreme, haljiljum so na valjani te ovav tužno sebepi o buća kola više našti te ćerav. Sebepi odova, šajinđum te ovav bahtalo sose isi pana buća kola šaj te ćerav ki služba e Jehovase. Odlučno hijum te na odustajinav. Sar o Gedeon hem olese 300 manuša, kola nastavinđe te borinen pe iako hine umorna, hem me ka nastavinav te borinav man“ (Sud. 8:4; w20.12 25 ¶14-15).

Ked pisinđa ando e Isuseso životi, o Jovan ko po jevanđelje koristinđa o lafija „mangipe“ hem „te mangen“ pobuter nego o piscija ando avera trin jevanđelja. Sa so ov pisinđa mothovi amenđe so o mangipe mora te ovel glavno motiv aso sa o buća kola ćerena o hrišćanija (1. Jov. 4:10, 11). Ama, e Jovanese valjanđa vreme te bi sikljola odova. Ked o Jovan hine terno, ov na mothovđa uvek mangipe. Ki jekh situacija, ov propovedinđa e Isuseja, hem avere apostolencar, đi putujinđe ko Jerusalim prekali Samarija. O manuša ando jekh gav ki Samarija na manglje te ugostinen len. Ov hem oleso phral manglje te vićinen i jag ando nebo te uništini odova celo gav! (Luka 9:52-56). Ki jekh aver situacija, o Jovan na mothovđa mangipe premalo avera apostolija. Ov hem oleso phral, rodinđe andi pi daj te pućel e Isuse te bešen uzalo leste ko Kraljevstvo. Ked avera apostolija šunđe so rodinđe o Jovan hem oleso phral, but holjanđe! (Mat. 20:20, 21, 24). Ama, iako o Jovan hine le pe mane, o Isus ipak manglja le (Jov. 21:7; w21.01 8-9 ¶3-4).

O Jehova anela odluke kola tane aso sarinengo šukaripe. Na primer, ov sa stvorinđa, na sebepi poklo, nego sose manglja amen te uživina ko đivdipe. Niko naštinđa te ćhivel le zorjeja te del pe Ćhave te šaj te oven oprostime amare grehija. Ov spremno ćerđa odija žrtva sebepi amaro šukaripe. Hem o Isus hine spremno te anel odluke kola hine aso averengo šukaripe. Na primer, ked hine umorno, umesto te odmorini pe, ov sikavđa e manušen (Mar. 6:31-34). O šukar poglavari đanela so jekh andi najphari buti koja ov mora te ćerel tani te anel mudra odluke pe porodicaće. Ov ozbiljno dikhela ki odija odgovornost. Ov trudini pe te na anel odluke kola sviđinena pe samo olese ja sar avela olese. Umesto odova, ov dozvolini e Jehovase te sikavi le sar te anel šukar odluke (Posl. 2:6, 7). Ko asavko način, ov ka mislini ko averengo šukaripe a na ko poklo (Fil. 2:4). Ako o rom dela sa pestar te oponašini e Jehovaso hem e Isuseso primer, ov ka ovel šukar poglavari pe porodicaće (w21.02 7 ¶19-21).

Sar terno, o Asa hine ponizno hem hrabro. Na primer, ked nasledinđa pe dade, e Avija, ov čistinđa i phuv ando idolija. Isto ađahar, „zapovedinđa e Judejcenđe te roden e Jehova, e Devle ando pe dada hem te ićeren pe ko Zakoni hem ko zapovestija“ (2. Let. 14:1-7). Ked o Zara, o Etiopljanin, hem jekh milioni vojnikija alje upri Juda, o Asa rodinđa pomoć ando Jehova. Ov phenđa: „Jehova, tu šaj te pomožine e narodose kova tano zoralo, ama hem e narodose kova nane zoralo. Pomožin amenđe, Jehova, Devla amaro, sose upro tute uzdajinaja amen.“ Akala šuže lafija mothovena kobor o Asa hine le poverenje upro Jehova, so ov šaj te spasini ole hem olese narodo. O Asa verujinđa pe nebesko Dadese hem o „Jehova pobedinđa e Etiopljaninen“ (2. Let. 14:8-12). Sigurno ka složine tut, so te borine tut e vojskaja koja isi la jekh milioni vojnikija tano but baro izazov. Ama, sebepi so o Asa osloninđa pe upro Jehova, ov hine uspešno (w21.03 5 ¶12-13).

I Biblija vaćeri amenđe ando nesavršena manuša kola hine paše amala. Zapazin o primer ando Jonatan hem o David. I Biblija phenela: „O Jonatan hem o David ulje paše amala hem o Jonatan zamanglja le sar kokri pes“ (1. Sam. 18:1). O Jehova birinđa e Davide te ovel kralj palo Saul. Odolese, o Saul ulo but ljubomorno hem pokušinđa te mudari le. Ama, e Sauleso ćhavo, o Jonatan, na podržinđa pe dade ked ov pokušinđa te mudari e Davide. O Jonatan hem o David obećinđe jekh jekhese so ka aćhon amala hem so uvek ka pomožinen jekh jekhese (1. Sam. 20:42). Zanimljivo tano so o Jonatan hem o David hine paše amala iako hine but buća kola šajinđe te ćhinaven len te oven amala. Na primer, o Jonatan hine oko 30 berš pophureder ando David. O Jonatan šajinđa te mislini so nane le ništa zajedničko oleja, sose o David hine poterno olestar hem na hine le nisavo iskustvo ko životi. Ama, o Jonatan na dikhlja ađahar upro David. Umesto odova, ov but poštujinđa le (w21.01 21-22 ¶6-7).

O Isus obećinđa pe sledbenikonenđe so ka oven bahtale. Isto ađahar, ov upozorinđa okolen kola mangena le so ka ovel len kušnje (Mat. 10:22, 23; Luka 6:20-23). Amen hijam but bahtale so šaj te ova e Hristese učenikija. Ama, sar osetinaja amen ked doživinaja progonstvo andi amari porodica ja andi vlast hem ked amare kolege ja amala ki škola, ćhivena amen te ćera diso soj tano neispravno? Naravno so but ka brinina amen ked ka razmislina ando odola buća. But manuša na mislinena soj tane o kušnje razlog te oven bahtale. Ama, i Biblija baš phenela amenđe odova, so valjani te ova radosna ked isi amen kušnje. Na primer, o Jakov pisinđa so na valjani te mislina so našti ništa te ćera ked isi amen kušnje. Umesto odova, valjani te ova bahtale (Jak. 1:2, 12). Hem o Isus phenđa so valjani te ova bahtale iako hijam progonime (Mat. 5:11). O Jehova vodinđa e Jakove te del disave praktična savetija odole hrišćanenđe, kola pomožinđe lenđe te aćhon bahtale, iako hine len kušnje (w21.02 26 ¶1-2; 27 ¶5).

Ko e Timotejeso vreme, disave hrišćanija na ceninđe i čast te oven e Devlese saradnikija. Disave olendar hine o Dimas, o Figel, o Ermogen, o Imenej, o Aleksandar hem o Filit (1. Tim.1:19, 20; 2. Tim. 1:15; 2:16-18; 4:10). Izgleda so sa akala manuša jekh vreme hine duhovno zorale, ama palo odova ko buća kola tane lenđe dinde više na dikhlje sar diso soj tano but vredno. Sar o Satana pokušini te ćhivel amen te mukha o vredna buća kola o Jehova dinđa amen? Zapazin disave ando e Satanase taktike. Ov koristini i zabava hem o medije te ćhivel amen te razmislina hem te postupina ko način, kova ka ćhivel amen postepeno te ćhinava te manga e Jehova ja te šuna olese zakonija. Ov pokušini te daravi amen ađahar so koristini o pritisak ando vrsnikija ja o progonstvo, te ćhinavi amen te propovedina. Isto ađahar, ov pokušini te ćhivel amen te šuna o hovavne sikljoviba, kola avena ando otpadnikija hem ađahar te mukha o ćaćipe. Ako na pazinaja, amen šaj hari po hari te mukha o ćaćipe (1. Tim. 6:21; w20.09 27 ¶6-8).

Da li našalđan to poverenje upro to amal ja upro nekas andi ti porodica? Ako ja, tegani but ka pomožini tuće o izveštaj ando kralj David ked oleso ćhavo, o Avesalom, izdajinđa le hem pokušinđa pes te ćhivel te ovel kralj (2. Sam. 15:5-14, 31; 18:6-14). Đi razmislineja ando akava izveštaj, vaćer e Jehovase sar osetineja tut sebepi so neko lošno ponašinđa pe premalo tute (Ps. 6:6-8). Akana, zamislin sar osetinđa pe o David palo sa akava so ulo lese. Ov manglja pe ćhave hem hine le poverenje upro po amal. Ama, on solduj izdajinđe le. On but povredinđe le hem čak pokušinđe te mudaren le. O David šajinđa te našali po poverenje upro pe avera amala, ađahar so bi ćhivela pese ki godi so hem on pridružinđe pe e Avesalomese. Ov šajinđa te mislini samo upro peste hem kokri te đal ki aver phuv. Ja šajinđa te vazdel pe vasta ando sa. Umesto odova, ov molinđa pe e Jehovase te pomožini lese. Isto ađahar, o David rodinđa pomoć ando pe amala. Ov sigate ćerđa odova so odlučinđa. Ov hem ponodri hine le poverenje upro Jehova hem upro pe amala (w21.03 15 ¶7-8; 17 ¶10-11).