Jul

Te bi o Devel odgovorini ko amare molitve, amen mora te ova e Isusese amala. Odova tano diso pobuter nego li ko krajo ando amare molitve samo te phena o lafija „ko e Isuseso anav.“ Mora te haljova sar o Jehova koristini e Isuse đi odgovorini ko amare molitve. O Isus phenđa pe apostolenđe: „So god rodena ko mo anav, ka ćerav odova“ (Jov. 14:13). Iako samo o Jehova šunela hem odgovorini ko amare molitve, ov koristini e Isuse te bi izvršini olese odluke. Angleder te oprostini amenđe, ov dikhela da li primeninđam e Isuseso savet te oprostina averenđe. Na primer, o Isus phenđa: „Ako tumen oprostinena e manušenđe olenge greške, hem tumaro nebesko Dad ka oprostini tumenđe. Ama ako tumen na oprostinena e manušenđe olenge greške, tegani ni tumaro Dad na ka oprostini tumare grehija“ (Mat. 6:14, 15). Sar so o Jehova hem o Isus ponašinena pe šukar premalo amende, isto ađahar tano važno hem amen te ponašina amen premalo avera (w20.04 22 ¶6).

O apostol Pavle haljilo so interesujini e manušen hem sebepi odova ov prilagodinđa po način sar propovedinđa. Na primer, o manuša kolencar vaćerđa ki Listra đanđe hari kotar e Devleso Lafi, a disave na đanđe ništa. Odolese, o Pavle vaćerđa kotar buća kola on šaj te haljon. Ov vaćerđa kotar i žetva hem kotar odova so hijam ćerde te uživina ko đivdipe. O Pavle koristinđa lafija hem primerija kola o manuša šajinđe lokho te haljon. Ov razborito te šaj te haljove so interesini e manušen ko to područje hem prilagodin to uvod. Đi aveja đi o udara, sar šaj te đane so interesini odole manuše? Pažljivo posmatrin i okolina. Šaj o manuš tano ki bašta, čitini dijekh knjiga, popravini o vorda ja ćerela diso aver. Šaj te počmine te vaćere oleja kotar odova so ćerela (Jov. 4:7). Čak o način sar o manuš uravi pe šaj te mothovi amenđe kotar kova narodo avela, so ćerela ja kova tano oleso omiljeno sportsko tim (w20.04 11 ¶11-12).

Odolese so but vreme osetinena i uznemirenost, disave phralja hem phenja patinena kotar o panična napadija. Odolese, olenđe tano but pharo ked tane ko društvo avere manušencar. Ama, iako olenđe tano pharo te oven odothe kaj isi but manuša, on ipak đana ko sastankija hem ko kongresija. Olenđe tano posebno pharo te vaćeren e manušencar kolen na penđarena, ama on ipak propovedinena. Ako hem tu osetineja tut ađahar, ov sigurno so na hijan kokri sose hem avera manuša osetinena pe sar tu. But manuša borinena pe isto problemeja. Niked ma te bistre so o Jehova tano zadovoljno odoleja so ćereja olese celone dušaja. Odova so na odustajinđan mothovi so isi tut oleso blagoslov hem so ov dela tuće i potrebno snaga (Fil. 4:6, 7). Ako služineja e Jehovase, iako sebepi to sastipe ja sebepi te emocije našti te ćere sa so mangeja, ov sigurno so o Jehova tano zadovoljno tuvaja. But amendar isi amen problemija e sastipaja, ama amen ipak istrajinaja (2. Kor. 4:16). Uzi e Jehovasi pomoć, sare amen sigurno ka resa đi o cilj! (w20.04 31 ¶20-21).

E Devlesi mudrost jasno dićhola ko način sar ov ćerđa amari planeta, i Phuv (Jevr. 3:4). Amari planeta tani posebno sose jedino oj isi la sa o uslovija kola valjani, te šaj o manuša te živinen upro late. Zamislin jekh brodo ko okeani pherdo manušencar. Amari phuv tani sar odova brodo. Ama, o brodo kova ćerđa jekh manuš hem amari phuv but razlikujinena pe. Na primer, so bi ovela ked bi valjani kokri o manuša ko odova brodo te proizvodinen o kiseonik, i hrana ja o pani? Ja so bi ovela ako nane len kaj te forden o đubre? So mislineja, kobor dugo bi aćhona đivde? Verovatno, o manuša ko brodo bi merena sigate. Ki aver strana, ki Phuv živinena milijarde manuša hem o životinje. I Phuv dela amenđe kiseonik, hrana hem pani hem niked na aćhiljam bizo odola važna buća. Iako sa o otpatkija aćhona ki Phuv, amari Phuv hem ponodri tani šuži hem upro late šaj te živini pe. Sar tano odova moguće? Odolese so o Jehova ćerđa i Phuv ađahar te šaj o otpatkija te preradinen pe ko diso šukar hem palem te koristinen pe (w20.05 20 ¶3-4).

O Satana phenđa e Evaće so o Jehova tano hovavno. Ked ćerđa odova, o Satana ulo klevetnik. Ko odova trenutko, i Eva hine potpuno zavedimi. Oj poverujinđa e Bengese (1. Tim. 2:14). I Eva pobuter verujinđa e Bengese nego e Jehovase. Sebepi odova, na hine laće pharo te anel i najgoro mogućo odluka. Oj odlučinđa te na šunel e Jehova. Odova potvrdinđa ked lelja hem halja o plod so o Jehova zabraninđa lenđe. Kasnije, oj dinđa hem e Adamese te hal ando plod (Post. 3:6). Zamislin akana so i Eva šajinđa te phenel e Bengese. Zamislin so phenđa: „Me tut na penđarava, ama penđarava me Dade, e Jehova, hem me mangava le hem verujinava lese. Ov dinđa e Adamese hem maje sa so isi amen. Kotar tuće pravo te phene bilo so lošno olestar? Naš!“ Kobor bi o Jehova ovela radosno ked bi dikhela sar olesi mangli ćhaj lafencar mothovi soj tani verno olese (Posl. 27:11). Nažalost, ni Eva, a ni o Adam na hine len verno mangipe premalo Jehova. Sebepi so na hine len asavko mangipe, o Adam hem i Eva propustinđe i prilika te odbraninen e Devleso anav ando odova klevetnik (w20.06 4 ¶10-11).

Amare phenja zaslužinena i pohvala aso sa so ćerena aso Jehova. Na primer, on gradinena hem održinena o objektija, podupirinena o grupe ko strana ćhibja hem služinena ko Betel. On tane odothe hem ked organizujini pe humanitarno pomoć, ćerena sar prevodiocija hem služinena sar pionirija hem sar misionarija. Isto ađahar, o phenja kola tane ko brako pomožinena pe romenđe te bi on šaj te ćeren pe zadatkija ko skupštine, odnosno ki e Jehovasi organizacija. Ked odola phralja na bi ovela len i podrška ando pe romnja, on na bi uspinena te ispuninen pi uloga koja isi len sar „manuša ko dar“ (Ef. 4:8). O mudra starešine haljona so amare bućarne phenja tane „bari vojska“ hem so često tane but šukar propovednikija andi šukar vest. Isto ađahar, o starešine haljona so odola verna hem zrela phenja šaj te pomožinen e terne phenjenđe te borinen pe pekle problemencar (Titu 2:3-5). Ćaće, amare phenja zaslužinena te mothova lenđe zahvalnost aso sa so ćerena! (w20.09 23-24 ¶13-14).

O Jehova na bistrela okolen kola služinđe olese, ama kola privremeno ćhinavđe te oven olese narodoja. Ov na bistrela sa odova so ćerđe olese (Jevr. 6:10). O prorok Isaija pisinđa jekh but šuži ilustracija, te šaj te mothovi sar o Jehova brinini pe ando poklo narodo. Ov pisinđa: „Sar o pastiri ov ka brinini pe ando po stado. Pe vasteja ka ćedel e tikne bakren, ki angalja ka akhari len“ (Is. 40:11). Sar o Jehova, o baro Pastiri, osetini pe ked jekh ando olese bakre mukhela o stado? O Isus mothovđa sar o Jehova osetini pe ked pućlja pe učenikonen: „So mislinena? Ako jekh pastiri isi le 100 bakre hem jekh olendar našalđola, zar na ka mukhel odole 99 bakre ki gora hem ka đal te rodel okole kova našaldilo? Hem ako arakhi le, ćaće phenava tumenđe, pobuter ka radujini pe sebepi odova bakro nego sebepi okola 99 bakre kola na našaldilje“ (Mat. 18:12, 13; w20.06 19-20 ¶8-9).

Amenđe tani čast so šaj te služina e Jehovase ko bilo kova način (Ps. 27:4; 84:10). Ked tano jekh phral spremno te ćhivel pe ko raspolaganje te ćerel pobuter ki e Jehovasi organizacija, odova tano asi svako pohvala. Ama, ked dobini jekh zaduženje, ov na valjani te mislini soj tano považno ando avera (Luka 17:7-10). Umesto odova, oleso cilj valjani te ovel te služini ponizno averenđe (2. Kor. 12:15). I Biblija vaćeri ando disave manuša kola mislinđe pestar pobuter nego so valjani. O Diotref na hine skromno. Ov pokušinđa „te ovel prvo“ ki skupština (3. Jov. 9). Sebepi o ponos, o Ozija pokušinđa te ćerel nešto so o Jehova na dinđa lese te ćerel (2. Let. 26:16-21). O Avesalom ko lukavo način pokušinđa te ćhivel e narodo te zamangen le, sebepi so manglja te ovel kraljo (2. Sam. 15:2-6). Sa akala e biblijake izveštaja jasno mothovena so o Jehova na mangela ked neko rodela te ovel le posebno čast (Posl. 25:27). Sar đala o vreme, o ponos hem i ambicija legarena đi i propast (Posl. 16:8; w20.07 4 ¶7-8).

Disave porodice preselinđe pe ki aver phuv sose hine lenđe but pharo ki olengi phuv ja naštinđe te arakhen buti. Sebepi odova, olenge ćhave đana ki škola ki ćhib koja vaćeri pe ki odija phuv. Isto ađahar, hem o roditeljija šaj valjani te sikljon odija ćhib te bi šaj te arakhen buti. Ama, so ako odothe isi skupština ja grupa ki olengi ćhib? Ki koja skupština on valjani te đan? Da li ki skupština ki koja vaćeri pe olengi ćhib ja ki skupština kuri vaćeri pe i ćhib kotar odija phuv? O poglavari isi le odgovornost te odlučini ki koja skupština on ka đan sar porodica. Ov mora kokri te odlučini soj tano najšukar olese porodicaće. Odolese so odija tani lično odluka, amen valjani te poštujina la. Koja god odluka ov te anel, amen valjani te prihvatina la hem te mothova odole porodicaće so mangaja len hem so hijam bahtale soj tane deo andi amari skupština (Rimlj. 15:7; w20.08 30 ¶17-18).

Amen na isminaja te mislina so i snaga, o obrazovanje, amaro poreklo ja o materijalna buća mothovena kobor hijam vredna anglo e Jehovase jaćha. U stvari, but ando e Jehovaso narodo nane „mudra premalo e manušenge merilija, ni but zorale, ni but ando okola kola avena ando ugledna porodice.“ Umesto odova, o Jehova odlučinđa te koristini okolen kastar o manuša mislinena soj tane slaba (1. Kor. 1:26). Odolese, iako nane tut o buća kola tane spomenime ko početko, tu šaj hem ponodri te služine e Jehovase. Odola buća šaj te oven prilika te dikhe sar o Jehova pomožini tut hem podržini tut. Na primer, ako daraja ando manuša kola napadinena te verovanja, tegani molin tut e Jehovase te del tut hrabrost te odbranine odova ko so verujineja (Ef. 6:19, 20). Ako borineja tut disave ozbiljno nabormipaja, molin e Jehova te del tut snaga te služine lese kobor god šaj. Svako puti ked dikheja sar o Jehova pomožini tuće, ti vera barjola hem tu oveja pana pozoralo (w20.07 16 ¶9).

Ako amen mangaja te ćhiva o Kraljevstvo ko prvo than ko amaro đivdipe, mora te ova sar o Avraham kova spremno ćerđa žrtve te šaj te ugodini e Devlese (Mar. 10:28-30; Jevr. 11:8-10). Ma mislin so na ka ovel tut problemija. Čak hem okola so celo po đivdipe služinena e Jehovase ka ovel len problemija (Jak. 1:2; 1. Petr. 5:9). Avdije, isi amen pobuter razlogija nego angleder te usredsredina amen ki budućnost. O buća kola ovena ko sveto jasno mothovena so amen živinaja ko završno deo ando poslednja dive. Maškaro but blagoslovija ko kola ka uživina ked ka vladini e Devleso Kraljevstvo, ka ovel hem odova so amare mangle ka uskrsninen. Ko odova vreme, o Jehova ka nagradini e Avrahame asi olesi vera hem aso strpljenje, ađahar so ka uskrsnini ole hem olese porodica ki phuv. Da li ka ove odothe te ađićere len? Tu šaj te ove odothe ako, sar o Avraham hijan spremno te ćere žrtve aso e Devleso Kraljevstvo, arakheja ti vera iako isi tut problemija hem ako sikljoveja strpljivo te ađićere upro Jehova (Mih. 7:7; w20.08 5-6 ¶13-14; 7 ¶17).

Amen đanaja so ako amaro neprijatelji mudari amen, o Jehova ka irini amen ko životi. Amen hijam uverime so ništa so on šaj te ćeren amenđe, našti te odvojini amen ando Jehova (Rimlj. 8:35-39). Kobor o Jehova hine mudro ked dinđa amen i nada ando uskrsenje! Odoleja, o Jehova samći lelja e Bengestar oleso najmoćno oružje, a ki aver strana amenđe dinđa hrabrost sar oružje. Ako okola kola mrzinena e Jehova phenena so ka mudaren tut, da li ka verujine so o Jehova ka uskrsnini tut? Sar šaj te ove sigurno ko odova? Jekh način tano te puće kokri tut: „Da li o tikne odluke kola anava svako dive mothovena so verujinava upro Jehova?“ (Luka 16:10). Ili šaj te puće tut: „Da li o način sar koristinava mo vreme hem me pare mothovi so verujinava ko e Jehovaso obećanje so ka brinini pe aso me materijalna potrebe ako ćhivava oleso Kraljevstvo ko prvo than?“ (Mat. 6:31-33). Ako to odgovor ko akala pućiba tano ja, tegani tu mothoveja so hijan spremno asi svako kušnja koja ka avel ki budućnost (Posl. 3:5, 6; w20.08 17-18 ¶15-16).

Valjani te đana sar šukar te koristina e Devleso Lafi. Ko sastankija sikljovaja sar šaj pošukar te koristina i Biblija. Ama, ako mangaja nekas te uverina so o ćaćipe andi Biblija tano ćaće vredno, valjani redovno te proučina la. Isto ađahar, te šaj amari vera te ovel zorali, valjani te koristina e Devleso Lafi. Odova značini so nane dovoljno samo te čitina le. Valjani hor te razmislina ando odova so čitinđam ja te istražujina ko amare publikacije te šaj ispravno te haljova hem te primenina e Devleso Lafi (1. Tim. 4:13-15). Tegani ka ova sposobna te koristina e Devleso Lafi te sikava averen. Ama, nane dovoljno samo te čitina e manušenđe dijekh stih andi Biblija. Amen mangaja te pomožina e manušenđe te haljon o stih hem te đanen sar te primeninen le. Ked redovno proučinaja i Biblija, tegani šukar ka koristina la te šaj te sikava averen (2. Tim. 3:16, 17; w20.09 28 ¶12).

Amen šaj te ova usredsredime ko amaro zadatko te propovedina, ako razmislinaja ando sa so o Jehova ćerela te pomožini amen te ćera odova zadatko. Na primer, ov dela amen pherdo duhovno hrana prekalo štampime hem elektronska publikacije, audio hem video izdanja kola tane ćhivde ko amaro sajt jw.org. Razmislin akalestar: Sa so isi ko amaro sajt, tano dostupno ko prekalo 1 000 ćhibja (Mat. 24:45-47). Aver način sar šaj te ova usredsredime ko propovedibe tano ađahar so ka oponašina e Isuseso primer. O Isus na dozvolinđa nikase hem nisose te sprečini le te propovedini i šukar vest (Jov. 18:37). Ked o Satana ponudinđa Iese „sa o kraljevstvija ando akava sveto hem olengi slava“, o Isus na dozvolinđa odova te utičini upro leste niti privucinđa le odova so avera manglje te ćhiven le te ovel kralj (Mat. 4:8, 9; Jov. 6:15). Isto ađahar, ov na dozvolinđa upro leste te utičini i želja aso materijalna buća niti i dar ando protivljenje (Luka 9:58; Jov. 8:59). Ked tani amari vera ispitimi, amen šaj te ova usredsredime ko propovedibe ako na bistraja o savet kova dinđa amen o apostol Pavle ko avdisutno citati (w20.09 9-10 ¶6-7).

But hijam bahtale so isi amen odobor bućarne phenja ko amare skupštine. Na primer, on učestvujinena ko sastankija hem ki služba propovedanja. Disave olendar ćerena ko održavanje ko amare dvorane hem iskreno brininena pe ando phralja hem phenja. Naravno, hem on isi len pe problemija. Disave phenja brininena pe ando pe roditeljija kola tane ko berša. Avera phenja doživinena protivljenje andi pi porodica. A disave phenja tane daja kola kokri barjaćerena pe ćhaven hem naporno ćerena te bi obezbedinena sa so valjani lenđe. Sose valjani te podržina e phenjen? Sose o sveto na mothovi poštovanje premalo đuvlja kova on zaslužinena. Ki aver strana, i Biblija podstaknini amen te podržina len. Na primer, o apostol Pavle phenđa e skupštinaće ko Rim vilestar te priminen e Fiva hem te pomožinen laće „ko sa so ka valjani laće“ (Rimlj. 16:1, 2). Sar farisej, upro Pavle but utičinđa i kultura ki koja o manuša ko đuvlja dikhlje so samći na vredinena but. Ama ked ulo hrišćanin, ov oponašinđa e Isuse hem mothovđa poštovanje hem ljubaznost premalo đuvlja (w20.09 20 ¶1-2).

Te bi pomožinaja e studentenđe te barjaćeren pi želja te ćeren učenikonen, amen šaj te puća len akala pućiba: „Sar odova so prihvatinđan i šukar vest pomožinđa tuće te ovel tut pana pošukar životi? So mislineja, da li hem avera valjani te šunen la? Sar šaj te pomožine lenđe?“ (Posl. 3:27; Mat. 9:37, 38). Ićer ki godi so o Isus phenđa amenđe te sikava averen „te ićeren pe ko sa“ so ov zapovedinđa. Odova uključini o duj najbare zapovestija – te manga e Devle hem amare pašutnen. Odola duj zapovestija tane povezime odoleja te propovedina hem te ćera učenikonen (Mat. 22:37-39). U stvari, o mangipe tano glavno razlog sose propovedinaja. Naravno, disave studentija ked šunena so valjani te propovedinen šaj te daran. Ama, amen šaj te uverina asavke studenten so uzi e Jehovasi pomoć hari pohari on šaj te pobedinen i dar ando manuš (Ps. 18:1-3; Posl. 29:25; w20.11 3 ¶6-8).

Ked pripremineja tut aso e biblijako kurs, molin tut e Jehovase aso to studenti hem te haljove olese potrebe. Rode ando Jehova te pomožini tut te sikave andi Biblija ko način kova ka resel đi oleso vilo. Ma te bistre so to cilj tano te pomožine lese te napredujini đi o krštenje. Isto ađahar, o studenti valjani te šunel e Jehova hem te vaćeri oleja. Ov šaj te šunel e Devle, ađahar so svako dive ka čitini i Biblija (Is. Nav. 1:8; Ps. 1:1-3). Ov šaj te vaćeri e Jehovaja ađahar so svako dive ka molini pe olese. Odolese, ko početko hem ko krajo ando svako kurs, molin tut ando vilo hem spomenin te studente ki molitva. Đi šunela sar molineja tut, ov ka sikljol sar kotar vilo te molini pe hem pe molitve e Jehovase te uputini ko anav ando Isus Hrist (Mat. 6:9; Jov. 15:16). Zamislin samo kobor ka pomožini lese odova so svako dive čitini i Biblija (šunela e Jehova) hem so molini pe (vaćeri e Jehovaja), te ovel popaše e Devleja (Jak. 4:8; w20.10 8 ¶8; 9 ¶10-11).

Sar so ki prvo hrišćansko skupština hine važno o red hem o mir, isto ađahar tano hem avdije ki e Jehovasi organizacija (Dela 16:4, 5). Na primer, ako bi valjani te prisustvujine ko sastanko Proučibe andi Stražarsko kula ki aver skupština ja ki aver phuv, tu bi đaneja sar o proučibe izgledini hem kova članko ka ćerel pe. Ko odova trenutko, ka osetine tut so samći ćhere hijan! Samo e Devleso duho šaj te ćerel asavko jekhipe (Sof. 3:9, fusn). So tu šaj te ćere? Puć tut: „Da li me dava sa mandar ki skupština te ovel jekhipe hem mir? Da li šunava okolen kola predvodinena? Da li avera šaj te osloninen pe upro mande, posebno ako isi man disave odgovornostija ki skupština? Da li hijum tačno, spremno te pomožinav hem te služinav averenđe?“ (Jak. 3:17). Ako dikheja so ko diso šaj te ove pana pošukar, molin tut aso sveti duh. Ako mukheja o sveti duh te utičini upro tute hem upro odova so ćereja, te phralja hem te phenja ki skupština pobuter ka mangen tut hem ka ceninen tut (w20.10 23 ¶12-13).

E Devleso Lafi šaj te ovel amenđe sar jekh ogledalo (Jak. 1:23-25). Svako sabale, angleder te ikljova ando ćher dikhaja amen ko ogledalo. Tegani šaj te dikha da li valjani te popravina diso angleder so avera ka dikhen amen. Isto ađahar, ked svako dive čitinaja i Biblija, amen ka dikha kuri valjani te menjina amaro razmišljanje hem amare stavija. Butenđe pomožini so svako sabale angleder te ikljon ando ćher, razmotrinena o citati aso odova dive. On dozvolinena odova so čitinena te utičini ko olengo razmišljanje. Palo odova, on razmislinena sar šaj odova dive te primeninen o savet ando e Devleso Lafi. Uzo odova, amen valjani redovno te proučina, so uključini te čitina hem te razmislina ando e Devleso Lafi svako dive. Akava šaj te izgledini lokho, ama odija tani jekh andi najvažno buti koja šaj te ćera, a koja šaj te pomožini amen te aćhova ko tesno drumo kova legari ko životi. I Biblija tani sar rendgen sose pomožini amen te dikha o buća kola tane ano amende. Ama, amen mora te ova ponizna te šaj te primenina o savet kova dobinaja andi Biblija hem ando okola kola predvodinena (w20.11 18 ¶3; 20 ¶8).

Iako o hrišćanija ko prvo veko često hine progonime, isto ađahar on hine len hem periodija ked hine mir. Sar on koristinđe odova vreme? Odola verna murša hem đuvlja niked na ćhinavđe te propovedinen i šukar vest. Ko Dela apostolska pisini so on „služinđe e Jehovase ki dar.“ Sebepi so propovedinđe i šukar vest, „o broj ando učenikija stalno barjola hine.“ Akava mothovđa so o Jehova but blagoslovinđa odova so on revno propovedinđe đi trajinđa o period ando mir (Dela 9:26-31). O hrišćanija ko prvo veko koristinđe svako prilika te propovedinen i šukar vest. Na primer, o apostol Pavle dikhlja so isi le šukar prilika te svedočini bute manušenđe ko Efes. Ov iskoristinđa odija prilika te propovedini hem te ćerel e učenikonen ki odija diz (1. Kor. 16:8, 9). O učenikija dinđe sa pestar te propovedinen „i šukar vest ando e Jehovaso lafi“ (Dela 15:30-35). So ulo sebepi odova? Baš odova so phenela amenđe o avdisutnno citati (w20.09 16 ¶6-8).

Ked grešinđa, o Adam kokri pes hem pe potomkonen osudinđa ko meribe. Hem avdije amen osetinaja o lošna posledice sebepi so o Adam na hine poslušno e Devlese. Ama, sebepi odova so o Devel uskrsninđa pe Ćhave, ađićeri amen but šuži budućnost. „O uskrsenje ando mule avela prekalo manuš“, prekalo Isus. O Pavle ko krajo phenđa: „Sar so sare merena sebepi o Adam, ađahar sebepi o Hrist sare ka uskrsninen“ (1. Kor. 15:22). So o Pavle mislinđa ked phenđa so „sare merena sebepi o Adam?“ Verovatno vaćerđa ando e Adamese potomkija kola merena sose nasledinđe o greh hem i nesavršenost ando Adam (Rimlj. 5:12). O Adam nane maškaro okola kola „ka uskrsninen.“ E Isusesi otkupno žrtva na ućhari e Adameso greh, sose ov hine savršeno manuš kova svesno na hine poslušno e Devlese. E Adame ađićeri isto odova so ađićeri hem okolen kas o „manušikano Ćhavo“ ka prosudini sar „jarcija“, a odova ka ovel „večno meribe“ (Mat. 25:31-33, 46; Jevr. 5:9; w20.12 5 ¶13-14).

Ked na dobinaja disavo zaduženje, šukar primer tane amenđe o verna anđelija. Đi vladinđa o kralj Ahav, o Jehova vićinđa e anđelen te phenen sar te prevarini pe odova lošno kralj. Disave anđelija phenđe po mišljenje. Ama, o Devel birinđa jekhe anđele hem phenđa lese so oleso predlog ka uspini (1. Kralj. 22:19-22). Da li avera verna anđelija obeshrabrinđe pe hem da li mislinđe: „Sose našalđum mo vreme te dav disavo predlog?“ Naravno so na. O anđelija tane ćaće ponizna hem mangena sa i čast te den e Jehovase (Sud. 13:16-18; Otkr. 19:10). Ićer ki godi so i najbari čast tani te akhare e Devleso anav hem te vaćere ando oleso Kraljevstvo. O zaduženja šaj te dobina ja te našala, ama on na ćerena amen te ova vredna e Devlese. Ako hijam skromna hem ponizna, amen ka ova vredna e Jehovase hem amare phralenđe hem e phenjenđe. Odolese, molin tut e Jehovase te pomožini tut te aćhove skromno hem ponizno. Razmislin ando šukar primerija kola pominena pe ki Biblija, kola mothovđe skromnost hem poniznost. Spremno služin te phralenđe ko kova god način šaj (1. Petr. 5:5; w20.12 26 ¶16-17).

I kaciga ando spasenje tani i nada koja o Jehova dela amen – i nada so ov ka spasini amen ando meribe hem so ka nagradini okolen kola ćerena olesi volja (1. Sol. 5:8; 1. Tim. 4:10; Titu 1:1, 2). I nada ando spasenje štitini amare mislija. Odija nada pomožini amen te ićera ki godi e Devlese obećanja hem te dikha upro problemija ko ispravno način. Amen akharaja odija kaciga ked razmislinaja sar so o Devel razmislini. Na primer, amen na uzdajinaja amen ko barvalipe kova sigate našalđola, nego upro Devel (Ps. 26:2; 104:34; 1. Tim. 6:17). O mač ando duh tano e Devleso Lafi, i Biblija. Odova mač isi le moć te mothovi o hovajba, te oslobodini amen ando hovavne sikljoviba hem ando štetna navike (2. Kor. 10:4, 5; 2. Tim. 3:16, 17; Jevr. 4:12). Amen sikljovaja ispravno te koristina odova mač đi lično proučinaja hem đi dobinaja i obuka andi e Devlesi organizacija (2. Tim. 2:15; w21.03 27 ¶4; 29 ¶10-11).

Čak đi hine ko phanlipe sebepi so propovedinđa ando Isus, o Jovan mislinđa upro avera. Na primer, ov pisinđa o otkrivenje kova dobinđa hem bićhalđa le e skupštinenđe te bi đanena „so pana hari ka desini pe“ (Otkr. 1:1). Tegani, palo odova so hine oslobodimo ando Patmos, o Jovan pisinđa po jevanđelje ando Isuseso životi hem andi olesi služba. Ov pisinđa hem trin lila kola ohrabrinđe hem zorjaćerđe e phralen hem e phenjen. Tu šaj te ove samopožrtvovano sar o Jovan hem te mothove so mangeja e manušen ked birineja so ka ćere ko to životi. E Satanaso sveto mangela te ćhivel tut te trošine sa to vreme hem sa ti snaga upro tute ađahar so ka trudine tut te zaradine so pobuter pare hem te ove penđardo. Ki aver strana, o samopožrtvovana objaviteljija, ko prvo than ćhivena o propovedibe andi šukar vest hem odova te pomožinen averenđe te oven pana popaše e Jehovaja (w21.01 10 ¶9-10).

O Jonatan šajinđa te ovel ljubomorno upro David. Sar ćhavo ando kralj Saul, ov šajinđa te borini pe te nasledini e Saule, ko so hem hine le pravo (1. Sam. 20:31). Ama, o Jonatan hine ponizno hem odano e Jehovase. Odolese, ov potpuno podržinđa e Davide, kas o Jehova birinđa te nasledini e Saule. O Jonatan hine odano hem e Davidese, iako odova but holjanćerđa olese dade, e Saule (1. Sam. 20:32-34). Sebepi so manglja e Davide, o Jonatan na hine ljubomorno upro leste. O Jonatan hine but šukar strelco hem hrabro ratniko. Ov hem oleso dad, o Saul, hine penđarde sar „posigutne ando orlija“, hem „pozorale ando lavija“ (2. Sam. 1:22, 23). Odolese, o Jonatan šajinđa te hvalini pe odoleja so hine uspešno ko mariba. Ama, ov na takmičinđa pe e Davideja hem na hine ljubomorno upro leste sebepi o šukar buća kola o David ćerđa. Umesto odova, ov hine oduševimo sebepi e Davidesi hrabrost hem oleso pouzdanje ko Jehova. Na primer, ked o David mudarđa e Golijate, o Jonatan pana pobuter zamanglja le (w21.01 21 ¶6; 22 ¶8-9).

O Isus Hrist isi le autoritet upro sa o hrišćanija. Ov tano savršeno poglavari. Ama, ked jekh romni lela pese rome, olako poglavari ovela jekh nesavršeno manuš. Odova šaj te ovel laće izazov. Odolese ked razmislini ando po budućo rom, šukar tano te pućel pe: „So mothovi maje so odova phral ka ovel šukar poglavari? Da li tano olese ko prvo than ko životi te služini e Jehovase? Ako nane, sose mislinava so ov hem palo venčanje ka ovel neko ko ka pomožini amenđe te aćhova paše e Jehovaja?“ Ki aver strana, i phen valjani hem te pućel pe: „Kola osobine me isi man kola ka ćeren odova brako te ovel bahtalo? Da li hijum strpljivo hem velikodušno? Da li hijum paše amal e Jehovaja?“ (Prop. 4:9, 12). Kobor i romni ka ovel bahtali ko brako, but ka zavisini odolestar kola odluke anela angleder so khuvela ko brako. But phenja mothovena šukar primer ađahar soj tane podložna pe romese. On ćaće zaslužinena bari pohvala! (w21.02 8 ¶1-2)

Avdije, but objaviteljija ćhivđe pese cilj te sikljon nevi ćhib te šaj te proširinen pi služba te bi služinena odothe kaj tani pobari potreba. Odija tani olengi lično odluka koja anđe te šaj pana pobuter te služinen e Jehovase. Iako šaj valjani olenđe but berša te šaj šukar te vaćeren odija nevi ćhib, on pomožinena e skupštinaće ko but načinija. Olenge šukar osobine hem olengo iskustvo zorjaćeri e phralen hem e phenjen ki odija skupština. But ceninaja odole samopožrtvovano phralen hem e phenjen! Odova so jekh phral pana na vaćeri šukar i nevi ćhib, na značini so o starešinstvo našti te preporučini odole phrale te služini sar starešina ja sar sluga pomoćnik. Da li neko šaj te služini sar starešina ja sar sluga pomoćnik, o starešine ka proceninen premalo e biblijake uslovija, a na premalo odova kobor šukar vaćeri odija nevi ćhib (1. Tim. 3:1-10, 12, 13; Titu 1:5-9; w20.08 30 ¶15-16).

O manuša šaj te mislinen so šaj te oven bahtale samo ako isi len šukar sastipe, but pare hem ako tani olengi porodica bahtali. I radost andi koja o Jakov pisinđa, šaj te ovel amen sebepi o sveti duh kova isi amen hem odija radost na zavisini ando amare okolnostija (Gal. 5:22). Amen šaj te ova radosna ja bahtale ako đanaja so o Jehova tano zadovoljno amencar hem ako oponašinaja e Isuseso primer (Luka 6:22, 23; Kol. 1:10, 11). Asavki radost tani sar i jag koja tani zaštitimi ki jekh svetiljka. Oj na našalđola čak iako hijam naborme ja aćhovaja bizo pare. Amen šaj te ova radosna čak hem ked o manuša marena amenđe muj hem ked amari porodica ja avera protivinena pe amenđe. Amari radost šaj te ovel pana pobari svako puti ked o manuša pokušinena te len amendar amari radost. O kušnje kola doživinaja sebepi amari vera, mothovena so hijam e Hristese učenikija (Mat. 10:22; 24:9; Jov. 15:20). Odolese, o Jakov pisinđa odova so čitinaja ko avdisutno citati (w21.02 28 ¶6).

Ked ki Biblija arakheja stihija kola mothovena kobor tano važno te arakha o mir hem o pouzdanje upro Jehova, trudin tut te sikljove len napamet. Šaj ka pomožini tuće ako čitineja len ko glaso ja pisineja len ko jekh lil hem palo odova pana nekobor putija čitineja len. E Isusese Navinese hine zapovedimo redovno hem pažljivo te čitini i knjiga ando Zakon, te šaj te postupini mudro. Odova so čitinđa i knjiga ando Zakon pomožinđa lese te na daral nego te ovel hrabro te šaj te legari e Devlese narodo (Is. Nav. 1:8, 9). But stihija ando e Devleso Lafi šaj te pomožinen tuće te ovel tut mir ko situacije ko kola bi obično brinineja tut ja bi daraja (Ps. 27:1-3; Posl. 3:25, 26). Ko amare sastankija, šaj but te pomožini amen odova so sikljovaja ando govorija, ando komentarija hem ando ohrabrujuća razgovorija amare phralencar hem phenjencar (Jevr. 10:24, 25). Isto ađahar, amen šaj te ova but ohrabrime ked amare brige vaćeraja amare šukar amalenđe ki skupština (w21.01 6 ¶15-16).

Ked krstinđan tut, tu mothovđan bari vera hem pouzdanje upro Jehova. Hem o Jehova hine bahtalo so uljan deo andi olesi porodica. Važno tano hem ponodri te oslonine tut upro Jehova. Šaj te dićhol soj tano lokho te oslonine tut upro Jehova ked aneja važna odluke. Ama, so ka ćere ked valjani te ane avera odluke, sar soj tane, savi zabava ka birine, savi buti ka ćere hem kola ciljija ka ovel tut? Ma oslonin tut upri ti mudrost. Umesto odova, rode o načelija andi Biblija kola ka pomožinen tut te ane o odluke hem palo odova ićer tut ko odova so odlučinđan (Posl. 3:5, 6). Ako ka ćere odova, o Jehova ka ovel bahtalo hem avera ki skupština ka poštujinen tut. Naravno, sar sare amen, hem tu hijan nesavršeno, hem podijekh puti ka ćere greške. Ama, odova na valjani te ćhinavi tut te ćere sa so šaj aso Jehova (w21.03 6 ¶14-15).

Da li neko ki ti porodica protivini pe tuće sebepi so služineja e Jehovase? Ja da li živineja ki phuv kuri tane amare aktivnostija ograničime ja čak zabranime? Ako ja, tegani šaj te ohrabrinen tut o lafija andi 2. Timoteju 1:12-16 hem 4:6-11, 17-22. O apostol Pavle akala stihija pisinđa đi hine ko phanlipe. Angleder te čitine akala stihija, vaćer e Jehovase ando to problemi hem phen lese sar osetineja tut sebepi odova. Ov konkretno. Đi čitineja ando odova kola kušnje o Pavle hine le, rode ando Jehova te pomožini tuće te arakhe o načelija kola ka pomožinen tut te đane so valjani te ćere. O Jehova upozorinđa e Pavle so ka ovel progonimo sebepi soj tano hrišćanin (Dela 21:11-13). Sar o Jehova pomožinđa e Pavlese? Ov odgovorinđa ko olese molitve hem ko pravo vreme zorjaćerđa le. O Jehova uverinđa e Pavle so ov ka dobini i nagrada asi koja but trudinđa pe. Isto ađahar, o Jehova podstakninđa e Pavlese amalen te pomožinen le ko razna načinija (w21.03 17-18 ¶14-15, 19).