Avgust

Samo okola kola tane paše amala e Isuseja ka oven len korist kotar olesi otkupno žrtva. Sar đanaja odova? O Isus phenđa so ka del „po đivdipe pe amalenđe“ (Jov. 15:13). O verna manuša kola živinđe angleder o Isus te avel ki phuv, isto ka ovel len zadatko te sikljon ando Isus hem te mangen le. Iako odola verna manuša ka uskrsninen, o večno životi ka dobinen samo okola kola ka oven e Isusese amala (Jov. 17:3; Dela 24:15; Jevr. 11:8-12, 24-26, 31). Bahtale hijam đi sarađujinaja e Isuseja ki služba hem đi sikavaja averen kotar i šukar vest ando Kraljevstvo. Ked o Isus hine ki phuv, ov hine učitelj. Ked irinđa pe ko nebo, o Isus nastavinđa te predvodini ko propovedibe hem sikavibe sar o poglavari andi hrišćansko skupština. Ov dikhela hem cenini to trud đi pomožineja averenđe te penđaren ole hem olese Dade. U stvari, amari buti niked na bi uspini bizi e Jehovasi hem e Isusesi pomoć (Jov. 15:4; w20.04 22 ¶7-8).

I titula „kralj ando sever“ odnosinđa pe upro vladari kova vladinđa ko područje severno ando purano Izrael. I titula „kralj ando jug“ odnosinđa pe upro vladari kova vladinđa južno ando purano Izrael (Dan. 10:14). Đi ki Pedesetnica 33. berš andi nevi era, e Devleso narodo hine i doslovno nacija Izrael. Kotar tegani, o Jehova jasno mothovđa so oleso narodo tane e Isusese verna učenikija. Odolese, pobaro deo ando proročanstvo kova tano pisimo ko Danilo 11. poglavlje vaćeri ando e Isusese učenikija, a na andi nacija Izrael (Dela 2:1-4; Rimlj. 9:6-8; Gal. 6:15, 16). Različita vladarija ulje kralj ando sever hem kralj ando jug ko različito vreme. Ama, sa akala vladarija isi len diso zajedničko. Sar prvo, akala kraljija ja vladinđe upri disavi phuv ki koja živinđe but manuša ando e Devleso narodo ja progoninđe le. Sar dujto, o način sar ponašinđe pe premalo e Devleso narodo mothovđa so mrzinđe e ćaćutne Devle, e Jehova. Sar trito, o duj kraljija borinđe pe jekh jekheja ko ka ovel le pobari vlast (w20.05 3 ¶3-4).

O Jehova ćerela sa o buća te oven, ađahar so ov ovela so god valjani te šaj te ispunini pi namera. Isto ađahar, o Jehova osposobini pe nesavršena slugen te ćeren sa so valjani te šaj te služinen lese hem te šaj te ispuninen olesi namera (Is. 64:8). Ko akala načinija, o Jehova pobrinini pe te ovel ćerdi olesi volja. Ništa našti te sprečini le te ispunini pi namera (Is. 46:10, 11). Amen šaj pana pobuter te cenina amare nebesko Dade ako hor razmislinaja odolestar so ćerđa hem aso so osposobinđa amen. Na primer, ked razmislinaja kotar sa o buća kola stvorinđa, amaro strahopoštovanje premalo Jehova barjola (Ps. 8:3, 4). Ked hor razmislinaja odolestar sar o Jehova osposobinđa amen te šaj te ćera odova so ov mangela, amaro poštovanje premalo leste ovela pana pobaro. E Devleso anav, Jehova, podstaknini amen te ovel amen strahopoštovanje premalo leste. Oleso anav predstavini sa soj tano amaro Dad, sa so ov ćerđa hem sa so ka ćerel (Ps. 89:7, 8; w20.06 9-10 ¶6-7).

O kiseonik tano gas kova valjani e manušenđe hem e životinjenđe te šaj te aćhon đivde. Svako berš, o manuša hem o životinje koristinena stotine milijarda tona ando kiseonik. Isto ađahar, on mukhena o otrovno gas kova vićini pe ugljen-dioksid. Ama, amari atmosfera niked na aćhola bizo kiseonik hem niked nane pherdi ando ugljen-dioksid. Sar tano odova moguće? Odolese so o Jehova ćerđa razna organizmija, kotar bare kašta đi o but tikne alge, kola lena o ugljen-dioksid, a amenđe dena o kiseonik. Ko asavko način, o kružni tok ando kiseonik potvrdini o lafija kola pisinena ko avdisutno citati. So šaj te pomožini amenđe pana pobuter te cenina amari planeta hem sa o šukar buća upro late? (Ps. 115:16). Jekh način tano ađahar so hor ka razmislina kotar sa so o Jehova stvorinđa. Odova ka podstaknini amen svako dive te zahvalina e Jehovase aso sa o šukar buća kola ov dela amenđe. Ked daja sa amendar o than kuri živinaja te ovel čisto, amen mothovaja so ceninaja amari planeta (w20.05 22 ¶5, 7).

O Jehova postupinđa mudro, strpljivo hem pravedno. Isto ađahar, ov mothovđa so isi le neograničeno moć ko but načinija. Soj tano najvažno, oleso mangipe dićhola ko sa so ćerela (1. Jov. 4:8). O Jehova uvek ćerela ko odova te opravdini po anav. O Beng hem avdije klevetini e Devleso anav. Na primer, ov sejini sumnje e manušenđe ko vilo so o Devel tano moćno, pravedno, mudro hem soj tano mangipe. Isto ađahar, ov trudini pe te uverini e manušen so o Jehova nane Stvoritelj. Čak, iako o manuša verujinena so o Devel postojini, o Beng pokušini te ubedini e manušen so o Devel hem olese zakonija tane gruba hem nepravedna. O Beng sikavi e manušen so o Jehova tano okrutno Devel kova tharela e manušen ko pakao. Ked on počminena te verujinen ko odola grozna hovajba, olengo vilo tano spremno te odbacini e Jehova sar okole kova isi le pravo te vladini. Sa đi o Beng na doživini potpuno poraz, ov ka pokušini te irini tut protiv oleste. Da li ka dozvoline lese odova? (w20.06 5 ¶13-15).

Ko but skupštine ka oven phralja hem phenja kola trudinena pe te sikljon nevi ćhib. Šaj olenđe tano pharo te den komentari hem te phenen sa so bi mangena. Ako na obratinaja pažnja ko način ko kova vaćerena, amen ka dikha kobor on mangena e Jehova hem kobor mangena te služinen olese. Ako dikhaja olenge šukar osobine, pana pobuter ka cenina hem ka poštujina akale phralen hem phenjen. Amen na ka phena lenđe: „Na valjanena maje“, samo sebepi odova so na vaćerena amari ćhib šukar (1. Kor. 12:21). O Jehova svakonese amendar dinđa čast te služina ki skupština. Bilo te ova murša ja đuvlja, kokri ja ko brako, terne ja phure, ja bilo te vaćera disavi ćhib šukar ja na, amen hijam vredna e Jehovase hem jekh jekhese (Rimlj. 12:4, 5; Kol. 3:10). Uvek mangaja te roda ko kola načinija šaj te mothova so ceninaja amaro hem averengo than ki skupština (w20.08 31 ¶20-22).

O apostol Pavle na vazdinđa pe vasta ando Atinjanija iako on ki pi diz hine len but idolija, hine nemoralna manuša hem ićerđe i pagansko filozofija. Ov na ćhinavđa te propovedini lenđe iako on but putija uvredinđe le. Kokri o Pavle ulo hrišćanin iako angleder „but lošno vaćerđa protiv o Devel, progoninđa olese narodo hem hine but ponosno“ (1. Tim. 1:13). Sar so o Isus verujinđa so o Pavle šaj te ovel oleso učenik, isto ađahar hem o Pavle verujinđa so o Atinjanija šaj te oven e Isusese učenikija. Ov hine le svako razlog upro lende te dikhel ko asavko način (Dela 9:13-15). Ko prvo veko, sa o manuša bizo obzir kotar avena, so ćerena ja ko so verujinena, ulje e Isusese učenikija. Ked o Pavle pisinđa e hrišćanenđe kola živinđe ki grčko diz Korint, ov phenđa so disave phralja hem phenja angleder hine kriminalcija hem nemoralno živinđe. Palo odova, ov phenđa: „A disave tumendar hine asavke, ama thovde hijen“ (1. Kor. 6:9-11). Da li bi hem tu mislineja so odola manuša šaj te promeninen pe hem te oven e Isusese učenikija? (w20.04 12 ¶15-16).

O starešine na valjani sigate te osudinen okolen kola pućena pe koja tani korist ando odova te služini pe e Jehovase. Umesto te osudinen len, on ka den sa pestar te haljon sose ađahar vaćerena ja ćerena. Samo tegani o starešine šaj te koristinen i Biblija te šaj te ohrabrinen len. O prorok Ilija našlja kotar i kraljica Jezavelja (1. Kralj. 19:1-3). Ov mislinđa so odova so ov ćerela nane više vredno hem manglja te merel (1. Kralj. 19:10). Ama, o Jehova na osudinđa e Ilija. Ov uverinđa le ko odova so nane kokri, so šaj te oslonini pe ki e Devlesi moć hem so isi pana buti koja ov valjani te ćerel. O Jehova pažljivo šunđa sa so mučini e Ilija hem dinđa le neve zadatkija (1. Kralj. 19:11-16, 18). So sikljovaja? Sare amen, a posebno o starešine, valjani premalo e Jehovase sluge te postupina ljubazno. Bilo o manuš te mothovi soj tano ogorčeno ja te mislini so na zaslužini e Jehovaso milosrđe, o starešine ka šunen le đi phravela lenđe po vilo. Palo odova, on ka den sa pestar te uverinen le so o Jehova mangela le (w20.06 22 ¶13-14).

O Jehova mangela te uživine te familijaja hem te amalencar (Ps. 133:1). O Isus hine le šukar amala (Jov. 15:15). I Biblija vaćeri odolestar kobor tano šukar ked isi amen prava amala (Posl. 18:24). Isto ađahar, phenela amenđe so nane šukar te ova kokri (Posl. 18:1). But manuša mislinena so o društvena mreže tane o način sar šaj te ovel len but amala hem te na osetinen pe usamljeno. Ama, valjani te ova oprezna ked koristinaja o društvena mreže. O istraživanja mothovđe so o manuša kola trošinena but vreme te dikhen o buća kola avera ćhivđe ko društvena mreže, tane ki opasnost te oven usamljena hem depresivna. Sose phenaja odova? Jekh razlog tano so o manuša ko društvena mreže ćhivena o slike kotar najšukar trenutkija ko olengo đivdipe. Ko odola slike, on izgledinena najšukar, olenge amala hem thana kuri hine dićhona but šukar. Ked neko dikhela asavke šukar birime slike, šaj te mislini so oleso životi tano dosadno (w20.07 5-6 ¶12-13).

Zapazin so pisini ki Stražarsko kula ando 1. februar 1989. berš: „O starešine valjani te oven svesna, so o Isus prekalo sveti duh, šaj te pomožini svakone starešinase te razmislini ando e biblijake načelija, kola ka pomožinen e starešinenđe te đanen so te ćeren ki bilo koja situacija ja te anen disave važna odluke (Dela 15:7-15). O sveti duh pomožini sa e starešinenđe ki skupština, a na samo jekhese.“ O starešina kova poštujini avere starešinen na ka mangel uvek prvo te vaćeri. Ov nane glavno ko razgovor hem na mislini so samo oleso mišljenje tano ispravno. Umesto odova, ov vaćeri po mišljenje ko jekh ponizno hem skromno način. Ov pažljivo šunela ked avera vaćerena po mišljenje. Soj tano pana považno, ov koristini e biblijake načelija hem šunela o smernice ando „verno hem razborito robo“ (Mat. 24:45-47). Ked o starešine mothovena mangipe hem poštovanje jekh jekhese đi vaćerena, tegani e Devleso sveti duh ka ovel odothe hem ka pomožini lenđe te anen ispravna odluke (Jak. 3:17, 18; w20.08 27 ¶5-6).

E Pavlese neprijateljija hine but pozorale olestar. But putija, on marđe le hem phanlje le. Sar e Davidese, hem e Pavlese protivinđe pe o manuša kola valjanđe te oven olese amala. Isto ađahar, disave hrišćanija ki skupština protivinđe pe olese (2. Kor. 12:11; Fil. 3:18). Ama, o Pavle ikljilo sar pobednik maškaro sarinende kola borinđe pe protiv oleste. Sar ćerđa odova? Iako hine le protivljenje, ov hem ponodri propovedinđa. Aćhilo verno pe phralenđe hem pe phenjenđe, čak iako on razočarinđe le. Soj tano najvažno, ov aćhilo verno e Devlese sa đi o krajo ando po đivdipe (2. Tim. 4:8). Ov šajinđa te ćerel sa akala buća, na sose ov hine zoralo, nego sebepi so osloninđa pe upro Jehova. Da li te amala ki škola, kolege ki buti ja neko andi ti porodica vređinena tut ja protivinena pe tuće? Amen pobedinaja o lošnipe ađahar so daja sa amendar te sikava e manušen ando Jehova hem andi Biblija. Odova šaj te ćere ko nekobor načinija: koristin i Biblija te odgovorine ko olenge pućiba, mothov poštovanje hem ov ljubazno premalo okola kola lošno ponašinena pe premalo tute hem ćer šukar buća, čak hem te neprijateljenđe (Mat. 5:44; 1. Petr. 3:15-17; w20.07 17-18 ¶14-15).

Da li ćaće šaj te phena so o Jehova tano ponizno? Ja, šaj te phena sar so phenđa o David upre ko stih (Ps. 18:35). Ked o David pisinđa akala lafija, šaj mislinđa ko vreme ked o prorok Samuilo alo ko lese dadeso ćher te pomazini okole kova ka ovel aver kralj ko Izrael. Iako o David hine najtikneder ando ofto ćhave, ipak o Jehova ole birinđa te avel ko e Sauleso than (1. Sam. 16:1, 10-13). Sigurno o David bi složini pe e lafencar kola o psalmista phenđa ando Jehova: „Ov teljari pe te dikhel odova soj tano ko nebo hem ki phuv, andi prašina e jadno manuše vazdela, ando praho e ćorore manuše vazdela. Hem dela le te bešel bare manušencar“ (Ps. 113:6-8). E Jehovasi poniznost dićhola ko odova sar postupini pe slugencar, iako tane nesavršena. Ov na samo so prihvatini amaro obožavanje, već dikhela amen sar pe amala (Ps. 25:14). Te šaj te ova amala oleja, o Jehova dinđa pe Ćhave sar otkupno žrtva aso amare grehija. Odova mothovi so o Jehova tano ćaće but milosrdno hem saosećajno (w20.08 8 ¶1-3).

O Jehova već odredinđa o dive ked ka uništini akava lošno sveto (Mat. 24:36). Ov na ka našali po strpljenje hem na ka ćerel odova angleder odova dive. Ov jedva ađićeri te uskrsnini okolen kola mulje, ama strpljivo tano (Jov 14:14, 15). Ov ađićeri pravo vreme te uskrsnini len (Jov. 5:28). Amen isi amen šukar razlogija te ova zahvalna aso e Jehovaso strpljenje. Razmislin samo: Sebepi so o Jehova tano strpljivo, sa o manuša isi len vreme te „pokajinen pe.“ O Jehova mangela so poviše manuša te dobinen večno životi. Odolese, sar šaj te mothova so hijam zahvalna aso oleso strpljenje? Valjani te da sa amendar te roda okolen kola ispravno dikhena ko večno životi hem te pomožina lenđe te mangen e Jehova hem te služinen lese (Dela 13:48). Tegani on ka ovel len korist ando e Jehovaso strpljenje sar so amen isi amen (w20.08 18 ¶17).

Odova so o student sikljola ko e biblijako kurs, na valjani te utičini samo ki olesi godi već hem ko oleso vilo. Sose? Odolese so amaro vilo kova uključini amare želje, emocije hem osećanja, podstaknini amen ko delija. Đi sikavđa e manušen, o Isus koristinđa i logika te bi utičini ki olengi godi. Ama, o manuša sledinđe le odolese so ov takinđa hem olengo vilo (Luka 24:15, 27, 32). To student valjani te doživini e Jehova sar jekh stvarno Osoba, sar nekas kasa šaj te ovel paše hem te dikhel le sar pe Dade, sar pe Devle hem sar pe Amale (Ps. 25:5). Đi proučinena, pomožin lese te dikhel e Devlese šuže osobine (Izl. 34:5, 6; 1. Petr. 5:6, 7). Kotar koja god tema te vaćeren, usmerin i pažnja ko odova savi Osoba tano o Jehova. Pomožin te studentese te cenini e Jehovase šuže osobine – oleso mangipe, šukaripe hem saosećanje. O Isus phenđa so i „najbari hem prvo zapovest“ tani: „Mang e Jehova, te Devle“ (Mat. 22:37, 38). De sa tutar te pomožine te studentese te mangel e Devle (w20.10 10 ¶12).

O Isus uvek mothovđa poštovanje premalo đuvlja (Jov. 4:27). Ov posebno ceninđa e đuvlen kola živinđe premali e Devlesi volja. Ked vaćerđa ando odova ko sa pripadini ki olesi duhovno porodica, ov uključinđa hem e muršen hem e đuvljen (Mat. 12:50). O Isus odvojinđa vreme pe duhovno phenjenđe hem hine lenđe pravo amal. Odova najšukar dićhola ando e Isuseso amalipe e Marijaja hem e Martaja, kola solduj hine kokri (Luka 10:38-42). Sebepi olese lafija hem delija, on duj osetinđe pe šukar ked hine e Isuseja. I Marija osetinđa pe slobodno te bešel uzalo e Isusese pre, sar so bi ćerela jekh učeniko. Ki aver strana, ked i Marta holjanđa so i Marija na pomožini laće te pripremini habe, i Marta osetinđa pe slobodno te vaćeri e Isusese po mišljenje odolestar. Ki odija situacija, o Isus sikavđa hem e Marija hem e Marta jekh važno buti. Isto ađahar, o Isus mothovđa so brinini pe olendar hem ando olengo phral, o Lazar, ađahar so posetinđa len pana nekobor putija (Jov. 12:1-3). Sebepi odova, ked o Lazar ozbiljno naborsajlo, i Marija hem i Marta osetinđe pe slobodno te vićinen e Isuse te bi pomožini len (Jov. 11:3; w20.09 20 ¶3; 21 ¶6).

E Isusese učenikija nadinđe pe so o Kraljevstvo „odmah ka ovel uspostavimo“ hem so ka oslobodini len andi rimsko vlast. Amen jedva ađićeraja ked e Devleso Kraljevstvo ka cidel o lošnipa hem ked ka ćerel o nevo sveto kuri ka oven o pravedna manuša (2. Petr. 3:13). Ama, valjani te ova strpljiva hem te ađićera o vreme kova o Jehova odredinđa. Ov dinđa dovoljno vreme e Nojese te ćerel i arka hem te služini sar „propovednik andi pravednost“ (2. Petr. 2:5; 1. Petr. 3:20). Ked o Avraham nekobor putija pućlja e Jehova isto pućibe, andi olesi odluka te uništini e lošno manušen ko dizja Sodom hem i Gomora, o Jehova strpljivo šunđa le (Post. 18:20-33). Avdije, amen dikhaja o dokaz andi e Jehovasi strpljivost sebepi so dela dovoljno vreme sa e manušenđe kolen ov privucinđa koro peste „te pokajinen pe“ (2. Petr. 3:9; Jov. 6:44; 1. Tim. 2:3, 4). E Jehovaso primer podstaknini amen te ova strpljiva đi propovedinaja i šukar vest hem sikavaja e manušen (w20.09 10 ¶8-9).

Ked o Jehova ka uskrsnini e manušen, ov ka irini lenđe olengo pamćenje hem olengo karakter kova hine len angleder so mulje. Razmislin samo so značini odova. O Jehova mangela tut odobor so pamtini sar tu razmislineja, sar osetineja tut, sar vaćereja hem so ćereja. Ako ka ovel potrebno tut te uskrsnini, olese ka ovel lokho te irini to pamćenje, te stavija hem to karakter. O kralj David đanđa so o Jehova đanela svakone amendar but šukar (Ps. 139:1-4). Sar upro amende utičini ked haljovaja kobor šukar o Jehova penđari amen? Ked hor razmislinaja ando odova kobor šukar o Jehova penđari amen, na valjani te brinina amen. Sose? Na valjani te bistra so o Jehova but brinini pe amendar. Svako amendar tano olese posebno. Ov na bistrela sa so doživinđam ko amaro životi, a so utičinđa upro amende. Kobor tano odova utešno! Niked na valjani te mislina so hijam kokri. Svako dive hem svako trenutko, o Jehova tano uzo amende hem rodela prilike te pomožini amen (2. Let. 16:9; w20.08 17 ¶13-14).

O Jehova uživini te sikavi pe narodo. Ov mangela amen te penđara le, te manga le hem te živina večno sar olese mangle ćhave. Ked na bi sikavi amen, odova na bi ovela moguće (Jov. 17:3). Ko prvo veko, o Jehova sikavđa pe narodo prekali hrišćansko skupština (Kol. 1:9, 10). Najvažno uloga ko odova hine le „o pomoćniko“, o sveti duh, kas o Isus obećinđa (Jov. 14:16). Odolese o učenikija šajinđe pošukar te haljon e Devleso Lafi hem te setinen pe ko but buća kola o Isus vaćerđa hem ćerđa, a kola kasnije hine pisime ko Jevanđelja. Odova so sikljilje pomožinđa e hrišćanenđe ko prvo veko te zorjaćeren pi vera hem pana pobuter te mangen e Devle, olese Ćhave hem jekh jekhe. O Jehova prorekninđa so „ko poslednja dive“ o manuša ando sa o narodija ka ćeden pe ki simbolično gora te bi o Jehova sikavi len (Is. 2:2, 3). Odova proročanstvo ispunini pe ko amaro vreme (w20.10 24 ¶14-15).

Sose neko na prihvatini o šukar savet ando po amal? Sebepi o ponos. O ponosna manuša mangena te šunen samo odova so olenđe pasujini. On „na mangena te šunen o ćaćipe“ (2. Tim. 4:3, 4). On mislinena so olenđe na valjani savet odolese so mislinena soj tane pomudra hem považna ando avera. Ama, o apostol Pavle pisinđa: „Ako neko mislini soj tano diso, a u stvari nane ništa, hovavi kokri pes“ (Gal. 6:3). O kralj Solomon šukar objasninđa so značini akava. Ov pisinđa: „Pošukar tano o ćororo, ama mudro terno ćhavo, nego o phuro, ama bezumno kralj, kova više na đanela te prihvatini o savet“ (Prop. 4:13). Zapazin o primer kova mothovđa o apostol Petar ked o Pavle ispravinđa le anglo avera (Gal. 2:11-14). O Petar šajinđa te na prihvatini e Pavleso savet sebepi o način ko kova o Pavle dinđa le hem sebepi so odova ćerđa anglo avera. Ama, o Petar hine mudro. Ov prihvatinđa o savet hem na holjanđa upro Pavle. Umesto odova, ov kasnije vićinđa le „manglo phral“ (2. Petr. 3:15; w20.11 21 ¶9, 11-12).

So šaj te pomožini e studentenđe te napredujinen ko duhovno pogledi? Odova so avena ko sastankija. I pouka koja dobinaja ko amare sastankija ka pomožini lenđe te sikljon pana pobuter buća, ka zorjaćeri olengi vera hem ka pomožini lenđe pana pobuter te zamangen e Devle (Dela 15:30-32). Isto ađahar, o objavitelj šaj te vaćeri e studentese sar o mangipe premalo Jehova podstakninđa le te ićeri pe ko olese zapovestija (2. Kor. 7:1; Fil. 4:13). Hem ked o studentija penđarena različito objaviteljen, on šaj te sikljon so značini te ićeren pe ki e Hristesi zapovest te mangen e Devle hem pe pašutnen (Jov. 13:35; 1. Tim. 4:12). On šaj te dikhen so hem o objaviteljija hine len ista problemija sar on hem te sikljon so hem on šaj te menjinen pe hem te oven e Hristese učenikija (Pon. zak. 30:11). Svako pojedinco ki skupština šaj ko razna načinija te pomožini e studentenđe te napredujinen ko duhovno pogledi (Mat. 5:16; w20.11 5 ¶10-12).

O apostol Pavle šaj mislinđa ko odova so ćaće borinđa pe e divljo životinjencar ki arena, ko Efes (2. Kor. 1:8; 4:10; 11:23). Ja šaj mislinđa ko progonstvo, kova doživinđa ando Judejcija hem ando avera kola hine sar „zverija“ (Dela 19:26-34; 1. Kor. 16:9). So god hine odova, but putija o Pavle hine le bare problemija, ama ov na našalđa pi nada so ađićeri le diso pošukar (1. Kor. 15:30, 31; 2. Kor. 4:16-18). Živinaja ko but pharo vreme. Disave amare phralja hem phenja tane žrtve ando kriminal. Avera bešena ko phuvja kaj tano maribe hem sebepi odova on nane bezbedna. A avera služinena e Jehovase iako šaj te oven mudarde ja phanle ko phuvja kuri amare aktivnostija tane ograničime ja čak zabranime. Sa odola phralja hem phenja kola istrajno služinena e Jehovase tane but šukar primer amenđe. On na darana sebepi so đanena so ako akana hem našalena po đivdipe, ki budućnost o Jehova ka del len diso but pošukar (w20.12 9 ¶3-4).

Da li disavo puti obeshrabrinđan tut sebepi so ko to područje e manušen na zanimini i šukar vest ja sebepi so retko ked arakheja len ćhere? Ki asavki situacija, sar šaj te aćhove radosno ja te ovel tut pana pobari radost? Važno tano te ovel amen ispravno stav premali služba. So odova značini? Ićer ki godi so to cilj tano te vaćere ando e Devleso anav hem ando oleso Kraljevstvo. O Isus jasno phenđa so samo hari manuša ka đan ko drumo kova legari ko đivdipe (Mat. 7:13, 14). Ked hijam ki služba, amen isi amen čast te sarađujina e Jehovaja, e Isuseja hem e anđelencar (Mat. 28:19, 20; Otkr. 14:6, 7). O Jehova privucini okolen kola tane dostojna (Jov. 6:44). Odolese, ako i osoba na mangela te šunel i šukar vest akana, šaj ka šunel aver puti. „O obeshrabrenje šaj te ovel sar jekh moćno oružje kova o Beng koristini“, phenela i Debora. Ama, o Jehova, tano pozoralo ando Beng hem ando oleso oružje (w20.12 26 ¶18-19; 27 ¶21).

But amare phralja hem phenja mora celo dive te ćeren buti te šaj on hem olengi porodica te ovel len sa so valjani lenđe. Ama, on dena sa pestar te bi podržinena e Devlesi organizacija. Na primer, disave olendar pomožinena ked ovela dijekh prirodno katastrofa, avera ćerena buti ki gradnja, a sare dena dobrovoljna prilogija hem podupirinena o propovedibe ko celo sveto. Sa odova, on ćerena sebepi so mangena e Devle hem pe pašutnen. Ked svako kurko đaja ko amare sastankija hem učestvujinaja ko program, amen mothovaja so mangaja amare phralen. Redovno đaja ko sastankija iako hijam umorna. Komentarišinaja iako isi amen trema. Hem iako svako amendar isi le problemija, hrabrinaja jekh jekhe angleder hem palo sastanko (Jevr. 10:24, 25). But hijam zahvalna aso sa so ćerena amare phralja hem phenja! (w21.01 10 ¶11).

E ponosno manušenđe tano pharo te pohvalinen averen, sose on mangena avera olen te hvalinen. Verovatno on uporedinena pe averencar hem mangena te oven pošukar averendar. Umesto te sikaven averen hem te den len disave odgovornostija, on šaj phenena: „Ako mangeja diso te ćerel pe šukar“, odnosno sar so tu mangeja, „tegani odova mora kokri te ćere.“ O ponosno manuš često mangela te ovel považno averendar hem ljubomorno tano ked avera ćerena diso pošukar olestar. Ako dikhaja so uljam ponosna, valjani ando vilo te molina amen e Jehovase te pomožini amen te menjina amaro način sar razmislinaja, te na bi o ponos mukhela pe korenija hor ano amende (Rimlj. 12:2). But hijam zahvalna aso e Jehovaso primer (Ps. 18:35). Olesi poniznost dikhela pe ko odova sar postupini pe slugencar hem amen mangaja te oponašina le. Uzo odova, amen mangaja te oponašina e skromno manušen kolendar vaćeri i Biblija, a kola hine len prednost te služinen e Jehovase. Odolese, mangaja te da sa amendar i čast hem i slava uvek te da e Jehovase, sose jedino ov odova zaslužini (Otkr. 4:11; w20.08 13 ¶19-20).

O brako tano savršeno dar ando Devel, ama o manuša tane nesavršena (1. Jov. 1:8). Odolese, e Devleso Lafi upozorini e romen hem e romnjen kola tane ko brako so ka ovel len izazovija kola tane opisujime sar „neve problemija ko životi.“ O Jehova ađićeri ando roma te brininen pe ando pe porodicake duhovna, emocionalna hem fizička potrebe (1. Tim. 5:8). Ama, o phenja kola tane ko brako mora svako dive te odvojinen vreme te čitinen e Devleso Lafi, hor te razmislinen odolestar hem celone vileja te molinen pe e Jehovase. Odova šaj te ovel pharo. Sebepi so o romnja isi len but buti, but tano važno te odvojinen vreme aso odova. Sose? Odolese so o Jehova mangela svako amendar te ovel hem te aćhol amal oleja (Dela 17:27). Haljola pe so i romni valjani but te trudini pe te ovel podložno pe romese kova tano nesavršeno. Ama, olaće ka ovel polokho te ispunini i uloga koja o Jehova dinđa la, ako haljola hem prihvatini e biblijake razlogija sebepi kola valjani te ovel podložno pe romese (w21.02 9 ¶3, 6-7).

Pana jekh buti sovaja šaj te uporedinen pe amare kušnje tani sar i jag koja koristini pe te bi oblikujini pe o mač ando metal. Ked o mač taćari pe ki jag hem hladini pe ko pani, o metal ovela pozoralo. Isto ađahar, ked istrajinaja ko kušnje, amari vera ovela pozorali. Odolese, o Jakov phenđa: „Ama dozvolinen i istrajnost te ćerel pi buti, te oven savršena hem potpuna, bizi mana“ (Jak. 1:4). Ked dikhaja so amari vera tani pozorali sebepi o kušnje, amen šaj te istrajina hem te aćhova radosna. Isto ađahar, ko po lil, o Jakov vaćerđa ando buća sebepi kola šaj te našala amari radost. Jekh ando izazov tano ked na đanaja so te ćera. Ked isi amen kušnje, amen mangaja te molina e Jehova te pomožini amen te ana šukar odluke, te pomožina e phralenđe hem e phenjenđe hem te aćhova verna olese (Jer. 10:23). Amenđe valjani mudrost te šaj te đana so te ćera hem so te phena okolenđe kola protivinena pe amenđe. Ako na đanaja so te ćera, šaj te obeshrabrina amen hem sebepi odova šaj sigate te našala amari radost (w21.02 28 ¶7-9).

O Jehova aćhavđa amenđe but šukar primer. Ov but mangela amen. Ako hijam verna olese, ništa našti te ćhinavi le te mangel amen (Rimlj. 8:38, 39). O grčko lafi kova tano prevedimo sar „hor“, prenosini i misao ando odova neko te del sa pestar te mothovi o mangipe. Podijekh puti, nane lokho te mothova mangipe premalo amare phralja hem phenja. Ked avera holjanćerena amen, amen valjani hem ponodri „te podnosina jekh jekhe mangipaja“, hem te „da sa amendar te ićera o jekhipe, kova isi amen sebepi o sveti duh, ađahar so arakhaja o mir kova povezini amen“ (Ef. 4:1-3). Tegani, na ka usredsredina amen ko greške ando amare phralja hem ka da sa amendar te dikha upro amare phralja sar so o Jehova dikhela (1. Sam. 16:7; Ps. 130:3). Nane uvek lokho te manga amare phralen hem phenjen, pogotovo ked đanaja olenge mane. Izgleda so asavko izazov hine len hem o hrišćanija ko prvo veko, sar soj tane i Evodija hem i Sintihija. O apostol Pavle podstakninđa len „te služinen složno e Gospodese“ (Fil. 4:2, 3; w21.01 22-23 ¶10-11).

O phure ki skupština ceninena e terne phralen kola služinena e Jehovase zajedno olencar piko pikeja (Sof. 3:9). On but ceninena so tumen revno ćerena svako zadatko kova tano tumenđe dindo. Tumen terne phraljalen hijen but dragocena ko olenge jaćha. Terne phraljalen, niked ma bistren so o Jehova mangela tumen hem so isi le poverenje upro tumende. Ov prorekninđa so ko poslednja dive ov ka ovel le vojska ando terne phralja kola spremno ka služinen lese (Ps. 110:1-3). Ov đanela so tumen mangena le hem so dena tumaro najšukar đi služinena olese. Ov strpljivo averencar, ama ov strpljivo hem kokri tuvaja. Ked ćereja greške, prihvatin o savet hem i disciplina koja tani tuće dindi. Hem ma bistri so sa odova avela ando Jehova (Jevr. 12:6). De sa tutar te ćere svako zadatko. Ked ćereja sa odova, to nebesko Dad ka ovel ponosno upro tute! (Posl. 27:11; w21.03 7 ¶17-18).

But buća šaj te obeshrabrinen amen – disavo puti šaj kokri amen te ova kriva, a disavo puti šaj na zavisini amendar. Disave ando odola buća tane amare mane, o greške kola ćeraja ja amaro sastipe. Ja šaj te ova obeshrabrime odolese so na dobinđam disavo zaduženje ki organizacija ja odolese so propovedinaja ko područje kuri but manuša na šunena i šukar vest. Šaj but lokho te ovel amen pogrešno stav premalo amare greške hem mane. Odolese šaj te mislina so sebepi so ćeraja greške, o Jehova na ka mukhel amen te živina ko raj. Asavko stav šaj te ovel but opasno. I Biblija mothovi so, osim o Isus Hrist, sa avera manuša „grešinđe“ (Rimlj. 3:23). Ama, o Jehova na rodela amare greške niti očekujini amendar te ova savršena. Umesto odova, ov tano brižno Dad kova mangela te pomožini amen. Isto ađahar, ov tano strpljivo. Ov dikhela soj tano amenđe pharo te ćera odova soj tano ispravno hem te na mislina so na vredinaja but, hem odolese mangela te pomožini amen (Rimlj. 7:18, 19; w20.12 22 ¶1-3).

Sare amen hijam ko jekh putovanje. Amaro cilj tano te živina ko nevo sveto kuri o Jehova ka ovel vladari. Svako dive, amen daja sa amendar te aćhova ko drumo kova legari ko životi. Ama sar so o Isus phenđa, odova drumo tano tesno hem disavo puti tano pharo te aćhova ko odova drumo (Mat. 7:13, 14).Sebepi so hijam nesavršena, šaj te ovel lokho te cida amen ando odova drumo (Gal. 6:1). Ako mangaja te aćhova ko tesno drumo kova legari ko životi, amen mora te ova spremna te menjina amaro razmišljanje, amare stavija hem postupkija. O apostol Pavle ohrabrinđa amen te nastavina „te ispravina amen.“ Ked mangaja te ispitina amare mislija hem osećanja, valjani te pazina. Sose? Odolese so amaro vilo tano hovavno hem sebepi odova šaj te ovel amenđe pharo te haljova kuri šaj te legari amen (Jer. 17:9). But tano lokho te hovava kokri amen (Jak. 1:22). Odolese amen mora te koristina e Devleso Lafi te šaj te dikha save hijam. E Devleso Lafi mothovi amenđe save hijam andral, amare najhor „mislija hem o namere“ ando amaro vilo (Jevr. 4:12, 13; w20.11 18 ¶1-3).

Ked hijam ponizna hem skromna, verovatno ka ova pobahtale. Sose tano ađahar? Odolese so ked prihvatinaja so disave buća amen našti te ćera, amen hijam zahvalna asi bilo koja pomoć koja dobinaja averendar. Na primer, razmislin so ulo ked o Isus saćarđa dešen manušen kola hine len guba. Samo jekh olendar irinđa pe te zahvalini pe e Isusese, sose saćarđa le ando oleso baro nabormipe. Odova ponizno manuš đanđa so ov naštinđa kokri pes te saćari. Odolese, hine but zahvalno asi pomoć koja dobinđa ando Isus hem slavinđa e Devle sebepi odova (Luka 17:11-19). Sebepi so o ponizna hem o skromna manuša trudinena pe šukar te slažinen pe averencar, verovatno ka ovel len šukar amala. Sose? On spremno priznajinena so avera manuša isi len šukar osobine hem isi len poverenje ano lende. Isto ađahar, o ponizna hem o skromna manuša tane bahtale ked avera šukar ćerena pe zadatkija hem spremna tane te pohvalinen len hem te mothoven lenđe poštovanje (w20.08 12 ¶17-18).