Septembar

E Devleso duho podstakninđa e Petare te koristini hari averćhane lafija đi citirinđa e Joileso proročanstvo (Dela 2:16, 17). Umesto te počmini e lafencar „palo odova“, o Petar phenđa: „Ko poslednja dive.“ Odola lafija odnosinđe pe ko period angleder o Jerusalim te ovel uništimo ko 70. berš, nevi era. O Devel ka bićhali po „duh upro sa o vrste ando manuša.“ Premalo odova haljovaja so nakhlja disavo vreme kotar o period ked hine pisimo o proročanstvo ando Joilo đi na ispuninđa pe. Palo odova so o Devel bićhalđa po sveti duh upro hrišćanja ko prvo veko, on počminđe te propovedinen i šukar vest ko celo sveto. Ked o apostol Pavle pisinđa akija poslanica e Koloskonenđe oko 61. berš, nevi era, ov phenđa so i šukar vest propovedinđa pe „sa e manušenđe talo nebo“ (Kol. 1:23). Ko odova vreme, ked o Pavle živinđa, o izraz „sa e manušenđe“ odnosinđa pe ko sveto kova tegani hine penđarutno. Sebepi e Devleso moćno sveto duho, ko amaro vreme propovedini pe pobuter nego li angleder – ko celo sveto (Dela 13:47; w20.04 6-7 ¶15-16)

O Jehova mangela svakone amendar, čak hem okolen kola durilje kotar oleso stado (Mat. 18:12-14). O Devel obećinđa so ka rodel pe bakren kola našaldilje hem ka pomožini lenđe palem te oven ko šukar odnos oleja. Isto ađahar, ov phenđa so sa ka ćerel te šaj te spasini len. Ov ka ćerel isto odova so ćerđa jekh izraelsko pastiri ked bi nedostajini lese jekh bakro (Jezek. 34:12-16). Najangleder, o pastiri bi rodela e bakren, a te šaj te ćerel odova, valjanđa lese but vreme hem trud. Palo odova, ked arakhi odole bakre kova našaldilo, o pastiri bi anela le palem ko stado. Ko krajo, ako o bakro povredinđa pe ja tano bokhalo, o pastiri bi pomožini odole bakrese ađahar so bi paćari olese rane, bi lela le ki angalja hem bi parvari le. O starešine, o pastirija ando e „Devleso stado“, valjani te ćeren ista buća te šaj te pomožinen okolenđe kola durilje kotar i skupština (1. Petr. 5:2, 3). O starešine rodena len, pomožinena lenđe te irinen pe ki skupština hem mothovena lenđe mangipe ađahar so pomožinena lenđe palem te oven e Jehovase amala (w20.06 20 ¶10).

Ked o Isus phenđa so o polja tane spremna asi žetva, da li odoleja mislinđa so but manuša ka oven olese sledbenikija? Na. Ko e Devleso Lafi pisini so samo hari manuša ka verujinen upro leste (Jov. 12:37, 38). Uzo odova, o Isus đanđa soj tano svakonese ko vilo (Mat. 9:4). Iako o Isus posvetinđa pe okolenđe kola hine len vera upro leste, ov ipak revno propovedinđa sarinenđe. Amen našti te đana soj tano nekase ko vilo hem odolese na valjani nikase te sudina. Umesto odova, dikh upro manuša sar upro okola kola šaj te oven e Isusese učenikija. Ma te bistre o lafija kola o Isus phenđa pe učenikonenđe. Ov phenđa so o polja tane spremna asi žetva. O manuša šaj te promeninen pe hem te oven e Hristese učenikija. Ko sa odola manuša, o Jehova dikhela sar „blago“ (Ag. 2:7). Ako hem amen upro manuša dikhaja sar o Jehova hem o Isus, pobuter ka sikljova olendar hem kotar odova so olen interesini. Tegani, na ka dikha len sar strancija, već sar manuša kola šaj te oven amare phralja hem phenja (w20.04 13 ¶18-19).

E Devleso Lafi jasno sikavi so mora te manga hem te barjaćera amaro mangipe premalo Isus ako mangaja te ugodina e Jehovase. Jekh buti koja šaj te ćera te bi ovaja e Isusese amala tani te penđara le. Đi čitinaja o štar Jevanđelja, amen šaj te penđara e Isuse. Ked hor razmislinaja ando odola biblijake izveštaja kola vaćerena kotar e Isuseso đivdipe hem ked dikhaja sar ov ponašinđa pe šukar premalo manuša, amen ka ova podstaknime te manga le hem te poštujina le. Na primer, iako hine olengo Gospodari, ov na dikhlja upro lende sar upro robovija. Umesto odova, ov podelinđa olencar pe mislija hem pe osećanja. Ked olenđe hine pharo hem olese hine pharo. Ked on runđe hem ov runđa olencar (Jov. 11:32-36). Čak hem olese protivnikija đanđe so o Isus hine amal okolencar kola šunđe hem prihvatinđe olesi poruka (Mat. 11:19). Ked ponašinaja amen premalo avera sar so o Isus ponašinđa pe premalo pe apostolija, ka ova ko šukar odnos olencar, ka ova zadovoljna, bahtale hem pana pobuter ka cenina e Hriste (w20.04 22 ¶9-10).

Đi o 1870. berš, i Britanija ulji najbaro carstvo ki phuv hem hine la najzorali vojska. Odova carstvo hine predstavimo sar tikno rog kova pobedinđa avera trin šinga – e Francuska, e Španija hem e Holandija (Dan. 7:7, 8). I Britanija hine kralj ando jug sa đi ko disavo određeno period ko Prvo svetsko rat. Ko odova isto vreme, i Amerika ulji najbarvali phuv ko sveto hem počminđa te sarađujini e Britanijaja. Đi trajinđa o Prvo svetsko rat, i Amerika hem i Britanija udružinđe pe hem ćerđe jekh moćno vojno savez. Odoleja, on duj ulje angloameričko svetsko sila. Sar so o Danilo prorekninđa, o kralj ando jug, ćedinđa „but bari hem moćno vojska“. Đi trajinena o poslednja dive, o kralj ando jug tani i angloameričko svetsko sila (w20.05 3 ¶7-8).

O pani postojini ko tečno stanje odolese so i Phuv nalazini pe ki najšukar razdaljina kotar o kham. Ked bi ovena samo hari popaše jekh averese, sa o pani bi isparini hem i temperatura ki Phuv bi ovela odobor bari so i Phuv bi ovela sar pustinja hem upro late na bi šaj te živini pe. Ki aver strana, ked bi i Phuv ovela hari podur ando kham, sa o pani bi ovela ledo, hem o iv hem o ledo bi ućharena celo Phuv. Ama, sebepi so o Jehova ćhivđa amari Phuv ko asavko najšukar than, o kružni tok ando pani kova isi ki Phuv šaj te podržini amaro đivdipe. O kham taćari o pani ko okeanija hem o pani kova tano ki površina kotar i Phuv. Palo odova, o pani isparini hem stvorinena pe o oblakija. Svako berš prekalo 500 000 kubnih kilometrija ando pani isparini. Odova pani aćhola ki atmosfera oko deš dive hem palo odova perela ki Phuv sar boršim ja sar iv. Ko krajo, o pani palem đala ko okeanija ja ko avera thana kuri isi pani hem o kružni tok ando pani palem ponovini pe. O Jehova ćerđa o kružni tok ando pani te šaj uvek te ovel pani ki amari Phuv. Akava mothovi so o Jehova tano mudro hem moćno (Jov 36:27, 28; w20.05 22 ¶6).

O Isus podstakninđa amen te molina amen aso sveti duh (Luka 11:9, 13). Prekalo sveti duh o Jehova dela amen „but bari snaga“ (2. Kor. 4:7). Sebepi so pomožini amen e Jehovaso sveti duh, amen šaj te izdržina bilo kova pharipe kova akana isi amen. O sveti duh isto ađahar šaj te pomožini amenđe te ćera šukar amare zaduženja hem odgovornostija ki Jehovasi organizacija, te koristina amare sposobnostija hem talentija. Amen đanaja so o uspeh kova isi amen ki služba nane sebepi amaro, nego sebepi so o sveti duh pomožini amenđe. Amen šaj te mothova so ceninaja e Devleso sveti duh ađahar so ka molina amen e Devlese te pomožini amen te dikha da li isi amen neispravna mislija ja želje ko amaro vilo (Ps. 139:23, 24). Ako molinaja amen odolese, o Jehova prekalo po sveti duh ka pomožini amen te penđara kola tane amare neispravna mislija hem želje. Tegani ked ka penđara len, valjani te molina amen e Devleso sveti duh te del amen snaga te borina amen protiv olende. Ađahar ka mothova so na mangaja te ćera ništa so ka sprečini e Jehova te del amen po sveti duh (Ef. 4:30; w20.05 28-29 ¶10-12).

Ked braninaja e Jehovaso anav, amen oponašinaja o primer ando Isus Hrist. O Isus ćerđa pe Dadeso anav te ovel penđardo, na samo ađahar so koristinđa odova anav, nego hem ađahar so sikavđa e manušen savo tano ćaće o Jehova. Na primer, odova so ov sikavđa e manušen hine averćhane ando odova so o fariseja sikavđe. On sikavđe so o Jehova tano grubo, zahtevno, dur amendar hem okrutno Devel. Ki aver strana, o Isus pomožinđa e manušenđe te dikhen olese Dade sar okole kova tano razumno, strpljivo, kova mangela hem oprostini. Isto ađahar, pomožinđa e manušenđe te penđaren e Jehova, ađahar so savršeno oponašinđa pe Dadese osobine ko po životi (Jov. 14:9). Sar o Isus, hem amen šaj te phena e manušenđe odova so đanaja ando Jehova, so ov tano brižno hem ljubazno Devel. Ked ćeraja odova, mothovaja so o hovajba hem o klevete olestar nane ćaće. Amen opravdinaja e Jehovaso anav, ked pomožinaja e manušenđe te haljon so oleso anav tano sveto. Amare lafencar hem delijencar mothovaja e manušenđe savo tano o Jehova ćaće hem odoleja pomožinaja te opravdini pe oleso anav. Amen braninaja oleso anav, ađahar so pomožinaja e manušenđe te đanen o ćaćipe ando Devel (w20.06 5 ¶17-18).

O društvena mreže tane ki jekh strana but šukar sose pomožinena tuće te aćhove ko kontakt te porodicaja hem te amalencar. Ama, da li zapazinđan so disave manuša ko društvena mreže ćhivena pe komentarija ja slike te bi avera hvalinena len? I poruka koja on mangena te bićhalen averenđe tani „dikhen man, dikhen kobor tano maje šukar.“ Disave čak pisinena uvredljiva komentarija ko pekle ja averenge slike kola ćhivđe ko društvena mreže. Ama, o hrišćanija nane asavke manuša. On tane podstaknime te oven ponizna hem saosećajna (1. Petr. 3:8). Ako koristineja o društvena mreže, puć tut: „Da li me komentarija, slike ja snimkija šaj te mothoven averenđe so hvalinava man? Da li avera šaj te oven ljubomorna sebepi odova? O hrišćanija nane len potreba te skreninen i pažnja upro peste. On postupinena premalo savet ando avdisutno citati. Ako hijam ponizna, na ka ova sar o manuša ko sveto kola tane ponosna hem kola mangena avera te mislinen soj tane on but važna (1. Jov. 2:16; w20.07 6 ¶14-15).

Angleder o apostol Pavle te ovel e Isuseso učenik, ov hine jekh ponosno, terno manuš kova progoninđa e Isusese učenikonen (Dela 7:58). O Isus zaustavinđa e Pavle, kova tegani vićinđa pe Savle, te na progonini i hrišćansko skupština. O Isus ando nebo vaćerđa e Pavleja hem korjaćerđa le. Te šaj palem te dikhel, o Pavle morandilo te rodel pomoć upravo ando manuša kolen angleder progoninđa. Ov ponizno prihvatinđa i pomoć ando učenik kaso anav hine Ananija, kova irinđa leso vid (Dela 9:3-9, 17, 18). Kasnije, o Pavle hine le bari uloga ki hrišćansko skupština, ama niked na bisterđa odova so o Isus sikavđa le ked hine ko drumo aso Damask. Ov aćhilo ponizno hem hine spremno te prihvatini i pomoć ando phralja hem phenja. Odolese ov phenđa so on but utešinđe le (Kol. 4:10, 11, fusn.; w20.07 18-19 ¶16-17).

Iako o Jehova tano svemoćno, disave odgovornostija dela hem averenđe. Na primer, ov ćhivđa e Isuse te ovel Kralj ko oleso Kraljevstvo, hem o 144 000 manuša kola ka vladinen e Isuseja, dobinđe olestar disavo autoritet. Naravno, o Jehova sikavđa e Isuse sar te ovel Kralj hem Prvosveštenik (Jevr. 5:8, 9). Isto ađahar, ov sikavi hem okolen kola ka vladinen e Isuseja, ama ked dela len disavo zadatko, ov na mangela te kontrolišini sar on ka ćeren odova zadatko. Umesto odova, ov isi le poverenje so ka ćeren olesi volja (Otkr. 5:10). Ako amaro nebesko Dad, kase na valjani nikasi pomoć, dela disavo autoritet averenđe, kobor amen pana pobuter odova valjani te ćera. Ako hijan poglavar ki porodica ja starešina ki skupština, oponašin e Jehova ađahar so disave zadatkija ka de averenđe hem so na ka kontrolišine sar on ćerena odova. Ked oponašineja e Jehova, na samo so i buti ka ovel ćerdi, već tu ka sikave averen hem ka pomožine lenđe te ovel len pobaro samopouzdanje (Is. 41:10; w20.08 9 ¶5-6).

Sar o Jehova mangela amen te dikha upro olese bakre kola našaldilje? Amen šaj but te sikljova ando e Isuseso primer. Ov đanđa so sa e Jehovase bakre tane vredna anglo e Devlese jaćha. Odolese, o Isus ćerđa sa so šaj te pomožini „e našalde bakrenđe ando izraelsko narodo“ te irinen pe e Jehovase (Mat. 15:24). Sar jekh šukar pastiri, o Isus dinđa sa pestar te na našali nijekhe e Jehovase bakre (Jov. 6:39). O apostol Pavle podstakninđa e starešinen ki skupština Efes te oponašinen e Isuseso primer. Ov phenđa: „Mora te pomožinen okolenđe kola tane slaba. Hem tumen mora te ovel tumen ki godi so o Gospod Isus, phenđa: ’Pobuter isi bahtalipe ked dela pe nego ked lela pe‘“ (Dela 20:17, 35). Odova stih mothovi so o starešine isi len jekh važno odgovornost, a odija tani te brininen pe ando e Jehovaso narodo. Jekh starešina andi Španija, kova vićini pe Salvador, phenela: „Ked razmislinava odolestar kobor o Jehova brinini pe ando pe bakre kola našaldilje, odova podstaknini man te dav sa mandar te pomožinav len. Uverimo hijum so o Jehova mangela te brininav man olendar“ (w20.06 23 ¶15-16).

O Jehova tano strpljivo hem na ađićeri amendar te ova savršena angleder te završinen pe hiljada berša. Đi tegani, o Jehova tano spremno te oprostini amare grehija. Odolese, amen isi amen razlog te roda šukar buća ko avera hem te ova strpljiva olencar. O Isus hem o anđelija hine bahtale ked i phuv hine stvorimi. Ama, zamislin kobor ka oven bahtale ked ka dikhen so i phuv tani pherdi savršeno manušencar kola mangena e Jehova hem služinena olese. Zamislin kobor ka oven bahtale e Isusese suvladarija ked ka dikhen kobor e manušenđe značini odova so on ćerena (Otkr. 4:4, 9-11; 5:9, 10). Hem zamislin o vreme ked amare jaćha ka pherđon asvencar sebepi i radost, a na sebepi i dukh, hem ked o nabormipe, i tuga hem o meribe zauvek ka našalđon. Đi tegani, ov odlučno te oponašine amare Dade kova mangela amen, kova tano mudro hem strpljivo. Ako ćereja ađahar, tu ka aćhove bahtalo, bizo obzir koja kušnja isi tut (Jak. 1:2-4). Kobor hijam bahtale so o Jehova dinđa amen i nada ando uskrsenje (Dela 24:15; w20.08 19 ¶18-19).

I Biblija tani poklon kova mothovi kobor amaro Devel mangela amen. Amaro nebesko Dad vodinđa e manušen te pisinen la, odolese so ov brinini pe aso pe ćhave ki phuv. Prekali Biblija, o Jehova odgovorini ko amare najvažna pućiba, sar soj tane: „Sar uljam? Sose živinaja? Savi budućnost ađićeri amen?“ O Jehova mangela sa olese ćhave te đanen o odgovorija ko akala pućiba. Odolese, angleder but berša ov podstakninđa e manušen te prevodinen i Biblija ko razna ćhibja. Avdije, celo Biblija ja disave olake delovija tane dostupna ko prekalo 3 000 ćhibja. I Biblija tani najprevodimi hem najštampimi knjiga ko celo sveto. Amen šaj te mothova so ceninaja i Biblija ked čitinaja la svako dive, ked hor razmislinaja ando odova sostar oj sikavi amen hem ked trudinaja amen te primenina odova so sikljovaja. Uzo odova, amen mothovaja i zahvalnost e Devlese ked daja sa amendar te vaćera so pobuter manušencar kotar odova so sikljiljam kotar i Biblija (Ps. 1:1-3; Mat. 28:19, 20; w20.05 24-25 ¶15-16).

O prorok Jeremija propovedinđa ko područje kova hine but pharo. Jekhvar, ov hine odobor obeshrabrimo so manglja te ćhinavi te propovedini. Ama, na ćerđa odova. Sose? „E Jehovaso lafi“ hine sar jag ano Jeremija hem ov naštinđa, a te na vaćeri! (Jer. 20:9). Amen šaj te ova sar oleste ako svako dive čitinaja i Biblija hem hor razmislinaja odolestar so čitinđam. Odova tano pana jekh razlog te čitina i Biblija svako dive hem te razmislina olatar. Odolese, amen ka ova pana pobuter radosna ki služba hem šaj pana pobuter manuša ka šunen amen (Jer. 15:16). Odolese ked ando bilo kova razlog hijan obeshrabrimo, molin tut e Jehovase te pomožini tut. Ov ka pomožini tut te ikljove krajo te manencar hem te greškencar. Isto ađahar, ka del tut snaga ked hijan nabormo. Ov ka pomožini tut hem ponodri te ovel tut ispravno stav premalo zaduženja ki e Jehovasi organizacija. Hem ka pomožini tut te ovel tut ispravno stav premali služba. Molin tut te nebesko Dadese hem phen lese sa so isi tut ko vilo. Uzi olesi pomoć, tu šaj te borine tut protiv o obeshrabrenje (w20.12 27 ¶20-21).

Aso disave phenja, o sastankija tane glavna prilika te oven e phralencar hem e phenjencar. Odolese, mangaja te koristina odola prilike vilestar te pozdravina len, te vaćera olencar hem te mothova lenđe kobor značinena amenđe. Sar o Isus, hem amen šaj te da sa amendar te odvojina vreme te družina amen amare phenjencar (Luka 10:38-42). Šaj te vićina len ko jekh jednostavno habe ja ki disavi rekreacija. Ked ćeraja odova, valjani te da sa amendar te vaćera odova so ka ohrabrini len (Rimlj. 1:11, 12). O starešine valjani te ovel len isto stav sar so hine le o Isus. Ov đanđa soj tano pharo ked tano neko kokri, ama ki aver strana, jasno mothovđa so o brako hem o ćhave nane garancija te bi neko ovela potpuno bahtalo (Luka 11:27, 28). Umesto odova, potpuno bahtalipe zavisini ando odova da li ka ćhiva e Jehova ko prvo than ko amaro životi (Mat. 19:12). Posebno o starešine valjani te ponašinen pe premalo đuvlja sar premalo pe phenja hem daja. O starešine valjani te odvojinen vreme te vaćeren e phenjencar angleder hem palo sastanko (w20.09 21-22 ¶7-9).

Ko Izrael, o zemljoradniko sejinđa o seme palo rano boršim ko jesen hem ćedinđa o plod palo kasno boršim ko proleće (Mar. 4:28). Amen ka ova mudra ako hijam strpljiva sar odova zemljoradnik. Ama, odova nane lokho. O nesavršena manuša mangena odmah te dikhen o rezultatija ando po trud. Ama, ako mangaja o plodija ki amari bašta te barjon, amen valjani celo vreme te brinina amen olendar. Odova značini so valjani te hana, te sejina, te ikala o korov hem te ćhiva pani. Isto ađahar, valjani te da sa amendar te šaj te ćera učenikonen. Valjani te nakhel vreme te šaj te pomožina amare studentenđe te sikljon te oven nepristrasna hem te brininen pe ando manuša. Ako hijam strpljiva, odova ka pomožini amen te na ova obeshrabrime ked o manuša na šunena amen. Ama, ked o manuša šunena hem mangena te sikljon, amen palem mora te ova strpljiva. Amen našti zorjeja te ćhiva e studente te ovel le pobari vera. Disavo puti, čak hem e Isusese učenikija na haljilje odmah so značini odova sostar sikavđa len (Jov. 14:9). Amen na valjani te bistra so amen sadinaja hem ćhivaja pani, ama o Devel dela te barjol (1. Kor. 3:6; w20.09 11 ¶10-11).

Sare amen mangaja amare studentija te napredujinen đi o krštenje. Jekh važno način sar šaj te pomožina len tano te podstaknina len te aven ko sastankija. But putija, o studentija kola odmah počminena te aven ko sastankija, najsigate napredujinena. Disave učiteljija objasninena pe studentenđe so but buća kola ka sikljon ko sastankija, na ka sikljon ko kurs. Zajedno te studenteja čitin Jevrejima 10:24, 25 hem mothov lese sose ka ovel šukar ako avela ko sastankija. Pherde vileja vaćer lese diso so sikljiljan ko sastanko kova hine akana sigende. Odova pobuter ka podstaknini le nego samo te vićine le te avel ko sastanak. Odova so to student ka doživini ked ka avel prvo puti ko sastanak, ka ovel but pošukar kotar sa so dikhlja ja šunđa ki bilo koja aver religija (1. Kor. 14:24, 25). Odothe ka upoznajini e phralen hem e phenjen kaso šukar primer šaj te oponašini hem kola ka pomožinen lese te napredujini đi o krštenje (w20.10 10-11 ¶14-15).

E Devleso duho ka pomožini tuće te primenine sa odova so čitinđan hem proučinđan ko e Devleso Lafi. Molin tut sar o psalmista: „Jehova sikav man ando to drumo. Ka živinav premalo to ćaćipe. De man vilo kova nane podelimo, te šaj te darav ando to anav“ (Ps. 86:11). Nastavin te koristine i duhovno hrana koja o Devel dela prekalo po Lafi hem prekali pi organizacija. Naravno, to cilj nane samo te đane so pobuter. Tu mangeja te ove uverimo so odova ko so verujineja tano ćaćipe hem te primenine odova ko to životi. E Jehovaso duho ka pomožini tut te ćere odova. Uzo odova, tu mangeja te ohrabrine te phralen hem te phenjen (Jevr. 10:24, 25). Sose? Odolese soj tane on ti duhovno porodica. Molin tut e Devleso duho te pomožini tuće te komentarišine te lafencar ko sastankija hem te de sa tutar ked isi tut disavo zadatko ko sastanko. Odoleja ka mothove e Jehovase hem olese Ćhavese so mangeja olenge mangle „bakren“ (Jov. 21:15-17). Odolese, šun te Veličanstveno Učitelje ađahar so ka koristine sa i duhovno hrana koja ov dela tuće (w20.10 24-25 ¶15-17).

So ćerđa o Isus ked dikhlja so o apostolija hine obeshrabrime? Hari palo odova so uskrsninđa, o Isus phenđa disavenđe ando pe učenikija: „Ma daran! Đan, javinen me phralenđe [so uskrsninđum]“ (Mat. 28:10a). O Isus na vazdinđa pe vasta ando pe apostolija. Iako on aćhavđe le, ov palem vićinđa len me phralja. Sar o Jehova, o Isus hine milosrdno hem spremno te oprostini (2. Kralj. 13:23). Isto ađahar, hem amen brininaja amen but ando amare phralja hem phenja kola tane neaktivna. On tane amare phralja hem phenja hem amen but mangaja len! Amen pana pamtinaja sa o buća kola ćerđe akala phralja hem phenja aso Jehova. Disave olendar kola tane akana neaktivna, beršencar ćerđe bari buti (Jevr. 6:10). Ćaće but nedostajinena amenđe! (Luka 15:4-7). Kobor samo hijam ohrabrime ked o neaktivna prihvatinena te aven ko sastankija. Hem ked neko ando neaktivna objaviteljija avela ki dvorana amen valjani te đa koro leste hem vilestar te dočekujina le (w20.11 6 ¶14-17)

O Jakov hem o Jovan zajedno pe dajaja, alje ko Isus hem pućlje le te del len than kova o Isus na hine le pravo te del len. O Isus odmah phenđa so jedino oleso nebesko Dad šaj te odlučini ko ka bešel ki olesi desno hem levo strana ko Kraljevstvo (Mat. 20:20-23). O Isus mothovđa so poštujinđa pe granice. Ov hine skromno. Ov niked na đelo prekalo odova so o Jehova zapovedinđa lese te ćerel (Jov. 12:49). Sar šaj te oponašina e Isuseso šukar primer? Amen oponašinaja e Isuse ked primeninaja e biblijako savet kova arakhaja ko avdisutno citati. Ked avera pućena amen aso savet, niked na valjani zorjeja te ćhiva averen te prihvatinen amaro mišljenje ja te vaćera angleder bizo te razmislina šukar. Umesto odova, amen valjani te dikha so odolestar pisini ki Bibija hem ko amare publikacije. Ko asavko način amen mothovaja so haljovaja so amen na đanaja sa. Ked ćeraja ađahar, amen mothovaja so hijam ponizna, sose haljovaja so e Jehovaso savet tano uvek pošukar nego li amaro (Otkr. 15:3, 4; w20.08 11-12 ¶14-15).

Sostar valjani te razmisline ako valjani te de savet te amalese? Angleder te vaćere te amaleja, puć tut: „Da li hijum ’but pravedno‘“? O manuš kova tano but pravedno prosudini averen, na premalo e Jehovase merilija, nego premalo pekle hem verovatno nane but milosrdno. Najangleder, razmislin sose mangeja te de savet te amalese. Ako palo odova hem ponodri mislineja so valjani te ćere odova, tegani vaćer lese soj tano o problemi hem koristin pućiba te pomožine lese te haljol kaj pogrešinđa. Odova so ka vaćere lese valjani te temeljini pe ko e Devleso Lafi. Uvek ićer ki godi so to amal tano odgovorno, na tuće, nego e Jehovase (Rimlj. 14:10). Koristin o mudra lafija ando e Devleso Lafi. Isto ađahar, ked nekase deja savet, ov saosećajno sar o Isus (Posl. 3:5; Mat. 12:20). Sose? Odolese so o Jehova ka postupini amencar ko isto način sar amen postupinaja averencar (Jak. 2:13; w20.11 21 ¶13).

Da li bi mangeja o manuša te formirinen po mišljenje tutar premali boja kože koja isi tut, premalo odova sar izgledineja ja premalo odova kobor hijan ućo, tikno, thulo ja slabo? Verovatno na. Kobor tano šukar te đana so o Jehova na formirini po mišljenje amendar premalo odova sar o manuša dikhena amen! Na primer, ked o Samuilo dikhlja e Jesejese ćhaven, ov na dikhlja odova so o Jehova dikhlja. O Jehova phenđa e Samuilese so jekh ando e Jesejese ćhave ka ovel kralj ko Izrael. Ama, kova olendar ka ovel? Ked o Samuilo dikhlja e Jesejese najphuredere ćhave, ov ano peste phenđa: „Sigurno tano ov e Jehovaso pomazaniko.“ O Elijav hine odobor šužo, so o Samuilo mislinđa so ov ka ovel kralj. „Ama o Jehova phenđa e Samuilese: ’Ma dikh ko odova sar izgledini hem kobor tano ućo, sose na birinđum ole.‘“ So sikljovaja akalestar? O Jehova phenela: „O manuš dikhela odova so šaj jaćhencar te dikhel pe, a o Jehova dikhela odova soj tano ko vilo“ (1. Sam. 16:1, 6, 7). Šukar tano te oponašina e Jehova ko odova sar postupinaja amare phralencar hem e phenjencar (w20.04 14 ¶1; 15 ¶3).

O Isus phirđa prekalo poljija. Akava puti verovatno phirđa prekalo polje kaj o ječam tek počminđa te barjol (Jov. 4:3-6). Pana štar masek valjanđe te nakhen, te šaj o ječam te ćedel pe, a o Isus phenđa: „Vazden tumare jaćha hem dikhen o njive, sar tane zrela asi žetva.“ E manušenđe na hine odmah jasno so o Isus mislinđa odoleja so phenđa (Jov. 4:35, 36). So značinđe odola e Isusese lafija? O Isus na mislinđa so o usevija valjani te ćeden pe, već ov vaćerđa kotar manuša. Te dikha so ulo hari angleder odova so o Isus phenđa. Iako o Jevreja na družinđe pe e Samarićanencar, o Isus propovedinđa jekha romnjaće andi Samarija hem oj šunđa le. U stvari, đi o Isus vaćerđa ando poljija kola tane „zrela asi žetva“, but Samarićanija kola šunđe e Isusestar kotar odija romni alje koro Isus te sikljon pobuter olestar (Jov. 4:9, 39-42). Jekh e biblijako priručniko ando akava izveštaj phenela: „Odova so o manuša odobor sig alje koro Isus hem so šunđe le, mothovđa so on hine sar điv kova tano spremno te ovel ćedimo“ (w20.04 8 ¶1-2).

Amare sastankija pomožinena amenđe pana pošukar te propovedina hem te sikava e manušen ki služba. Na primer, amen sikljovaja sar šaj šukar te koristina amare glavna publikacije e službaće. Odolese, pripremin tut šukar aso sastanko. Đi trajini o sastanko, šun pažljivo hem palo sastanko primenin odova so sikljiljan. Ked ka ćere odova, tu ka ove „šukar vojniko“ ando Hrist Isus (2. Tim. 2:3). Amen isi amen podrška hem ando but milionija moćna anđelija. Zamislin samo so šaj te ćerel jekh olendar! (Is. 37:36). Akana zamislin so šaj te ćerel jekh bari vojska ando anđelija. O Jehova tano svemoćno. Odolese, ked tano ov amencar, amen uvek ka ova pozorale ando amare neprijateljija bizo obzir kobor tane on (Sud. 6:16). Kobor tano odova ćaće! Ićer ki godi odola mislija ked hijan obeshrabrimo sebepi diso so ćerđa ja phenđa to kolega ki buti, to amal ki škola ja to rođako kova nane amaro phral. Ma bistri so tu na hijan kokri ki odija borba. Sebepi so ićereja tut ko olese smernice, tu isi tut olesi podrška (w21.03 29 ¶13-14).

O apostol Pavle šaj citirinđa o lafija ando Isaija 22:13, ko kola mothovi pe savo stav o Izraelcija hine len. Umesto te dikhen sar te oven paše e Devleja, on samo dikhlje sar te uživinen. On hine len stav „uživin avdije, sose tajsa na đaneja so ka ovel“, a ađahar hem but manuša avdije mislinena. Odova so đanaja so o Jehova šaj te irini e mulen ko đivdipe valjani te utičini ko odova kas birinaja te ovel amaro amal. O phralja ko Korint valjanđe te arakhen pe ando odova te družinen pe okolencar kola na verujinđe ko uskrsenje. So amen sikljovaja? Ako redovno družinaja amen okolencar kolen jedino zanimini sar akana te uživinen ko đivdipe, odova na ka anel amenđe ništa šukar. Odova šaj te rumini amare stavija hem amare šukar navike. Sebepi o lošno društvo, šaj te počmina te ćera o buća kola o Jehova mrzini. Odolese, o Pavle podstaknini amen: „Oven razumna, ćeren odova soj tano ispravno hem ma grešinen“ (1. Kor. 15:33, 34; w20.12 9 ¶3, 5-6).

Akava stiho opisujini o način ko kova o Jehova organizujinđa pe porodica ko nebo hem ki phuv. O poglavarstvo uključini duj najvažna buća – o autoritet hem i odgovornost. O Jehova tano poglavari ja najbaro autoritet, hem sa olese ćhave, hem o anđelija hem o manuša, tane odgovorna anglo leste aso odova sar koristinena po autoritet (Rimlj. 14:10; Ef. 3:14, 15). O Jehova dinđa e Isusese autoritet upri skupština hem o Isus tano odgovorno e Jehovase aso odova sar ponašini pe amencar (1. Kor. 15:27). Isto ađahar, o Jehova dinđa e romese autoritet upri pi romni hem upro pe ćhave. Sar šaj jekh rom te sikljol te ovel šukar poglavari? Sar prvo, jekh murš najangleder mora te haljol so o Jehova rodela olestar. Isto ađahar, ov valjani te đanel sose o Jehova disavenđe dinđa te oven poglavarija hem sar šaj ov te oponašini e Jehova hem e Isuse. Sose tano odova važno? Odolese so o poglavarija ando Jehova dobinđe disavo autoritet hem ov očekujini olendar te koristinen le ko šukar način (Luka 12:48b; w21.02 2 ¶1-3).

Amen oponašinaja e Jehova ađahar so bistraja disave buća. Iako o Jehova isi le savršeno pamćenje, ked kajinaja amen, ov tano spremno te oprostini amenđe hem te bistrel amare greške (Ps. 25:7; 130:3, 4). Ov mangela ađahar hem amen te postupina averencar ked olenđe tano žao sose povredinđe amen (Mat. 6:14; Luka 17:3, 4). Ked amari godi koristinaja te slavina Okole kova dinđa la amenđe, amen mothovaja so ceninaja odova poklon. Disave koristinena pi godi te šaj kokri pese te odlučinen soj tano ispravno, a soj tano neispravno. Ama, sebepi so o Jehova tano amaro Stvoritelj, logično tano so olese merilija tane pošukar nego li amare (Rimlj. 12:1, 2). Ked šunaja e Jehova, amen šaj te ovel amen mir ko vilo (Is. 48:18). Amen đanaja sose živinaja – te slavina amare Stvoritelje hem amare Dade hem te ćera le te ovel ponosno upro amende (Posl. 27:11; w20.05 23-24 ¶13-14).

Sar šaj avdije te manga amare phralen hem phenjen? Ked pana pošukar ka penđara amare phrale ja phenja, ka ovel amenđe polokho te haljova len hem te zamanga len. Amen šaj te ova amala olencar bizo obzir da li tane pophureder ja potikneder amendar ja bizo obzir andi koja kultura avena. Na valjani te bistra so iako o Jonatan hine 30 berš pophureder ando David, ov ipak ulo paše amal oleja. Da li bi hem tu šaj te ove amal nekasa andi ti skupština kova tano pophureder ja potikneder tutar? Ako ka ćere odova, ka mothove so mangeja „sa e phralen“ (1. Petr. 2:17). Da li te manga e phralen ki skupština značini so svakone olendar ka ova paše amala? Na, odova nane realno. Normalno tano so nekasa hijam popaše sose šaj interesujinena amen ista buća. E Isusese, sa o apostolija hine amala, ama ov posebno manglja e Jovane (Jov. 13:23; 15:15; 20:2). Ama, o Isus na ponašinđa pe premalo oleste pošukar nego li premalo avera apostolija (Mar. 10:35-40; w21.01 23 ¶12-13).

O apostol Pavle na propovedinđa ko isto način e nejevrejenđe ki Atina hem e Jevrejenđe ki sinagoga. Ov pažljivo posmatrinđa i okolina hem zapazinđa kola religiozna običaja o manuša ićerena (Dela 17:23). Palo odova, ked manglja te vaćeri olencar kotar o ćaćipe ando e Devleso Lafi, ov vaćerđa kotar buća kola tane olenđe zajednička hem kola on već penđarena. O Pavle hine spremno te prilagodini po način sar propovedini. E manušenđe ki Atina, ov phenđa so i poruka kotar koja ov vaćeri avela ando Devel kole na penđarena, a kole mangena te obožavinen. Iako e nejevrejenđe na hine penđarutno e Devleso Lafi, o Pavle na mislinđa so on niked na ka oven hrišćanja. Umesto odova, ov dikhlja so on tane sar o điv kova tano spremno asi žetva hem prilagodinđa po način sar propovedinđa lenđe i šukar vest. Sar o Pavle, pažljivo posmatrin i okolina. Dikh o buća kola ka pomožinen tuće te haljove ko so verujinena o manuša ko to područje. Da li o stanari isi le disave ukrasija ko ćher ja ko vorda? Da li oleso anav, urajbe, frizura ja lafija kola koristini mothovena ki koja religija tano? (w20.04 9-10 ¶7-8).