Oktobar

Ked ka penđara e Isuse, amen ka oponašina oleso način sar razmislini hem sar postupini. Hem so pošukar penđaraja le hem oponašinaja o način sar ov razmislini, amen ka ova popaše amala oleja. Sar šaj te oponašina e Isuse? Razmislin ando jekh primer. O Isus niked na dikhlja pi korist nego averengi (Mat. 20:28; Rimlj. 15:1-3). Sebepi so hine le asavko stav, ov hine samopožrtvovano hem spremno te oprostini. Na hine le navika te holjani sigate sebepi o buća kola o manuša vaćerđe olestar (Jov. 1:46, 47). Na ćhivđa e manušenđe etiketa sebepi o buća kola ćerđe angleder (1. Tim. 1:12-14). O Isus phenđa: „Sarine ka đanen so hijen me učenikija, ako isi tumen mangipe maškaro tumende“ (Jov. 13:35). Puć kokri tut: „Da li sar o Isus, dava sa mandar te ovav ko mir me phralencar?“ (w20.04 24 ¶11).

Iako but manuša ko sveto lađaćerena hem klevetinena e Jehovaso anav, tu isi tut prilika te odbranine oleso anav hem te phene odole manušenđe so o Jehova tano sveto, pravedno, šukar hem mangipe. Tu šaj te mothove so mangeja ov te ovel to Vladari. Isto ađahar, šaj te pomožine e manušenđe te haljon so jedino e Jehovaso način sar vladini tano potpuno pravedno hem so ka anel mir hem sreća ki celo phuv (Ps. 37:9, 37; 146:5, 6, 10). Ked sikavaja averen ando e biblijake ćaćipa, često vaćeraja ando odova so o Devel isi le pravo te vladini ko celo svemir. Sa odova tano ćaće ađahar. Ama, iako tano važno te sikava len ando e Devlese zakonija, amaro glavno cilj tano te pomožina olenđe te razvijinen mangipe premalo Jehova, amaro Dad, hem te oven verna olese. Amen valjani te vaćera ando e Jehovase šukar osobine kola mothovena savi tani i Osoba koja akhari odova anav (Is. 63:7). Ked sikavaja len ko asavko način, amen pomožinaja averenđe te mangen e Jehova hem te oven poslušna lese sebepi so mangena te oven verna olese (w20.06 6 ¶16; 7 ¶19).

Amari godi tani ćerdi ko jekh posebno način. Ked hijan le ko te dajako vođi, ti godi razvijinđa pe premalo plani kova angleder hine ćerdo hem svako minuti prekalo hiljada neve ćelije hine formirime. O istraživačija phenena so jekhe bare manušesi godi isi la prekalo 100 milijardi ćelija, kola vićinena pe neuronija. Amari godi, koja isi la oko jekh tekvaš kilo, tani ćerdi kotar akala ćelije. Jekh posebno buti koja šaj te ćera sebepi amari godi tani i sposobnost te vaćera. Svako puti ked vaćereja, prekalo 100 mišićija, kola arakhena pe ki ti ćhib, ko to muj, ki ti vilica, ko to korlo hem ko kolin, sarađujinena maškaro peste. Te šaj te haljon pe sa o lafija kola vaćereja, odola mišićija valjani te oven uskladime. Jekh istraživanje kova hine ćerdo 2019. berš, mothovi so o bebe kola tek bijandilje šaj te haljon hem te reagujinen ked šunena o lafija. Akava istraživanje potvrdinđa odova so but istraživačija verujinđe, so ano amende tani sposobnost te penđara hem te sikljova razna ćhibja. Šaj te ova uverime so amari sposobnost te vaćera tani poklon kotar o Devel (w20.05 22-23 ¶8-9).

O Avraham hine spremno te mukhel o udobno đivdipe kova hine le ki diz Ur. Sose? Odolese so ov ađićerđa „i diz koja isi la prava temeljija“ (Jevr. 11:8-10, 16). I diz koja o Avraham ađićerđa tani e Devleso Kraljevstvo. O Isus Hrist tano Kralj ando odova Kraljevstvo. Isto ađahar, o 144 000 pomazime hrišćanija ka vladinen oleja. O Pavle phenđa so o Kraljevstvo tano sar „diz ando đivdo Devel, a odova tano o nebesko Jerusalim“ (Jevr. 12:22; Otkr. 5:8-10; 14:1). O Isus sikavđa pe učenikonen te molinen pe odova isto Kraljevstvo te avel te šaj te ćerel pe e Devlesi volja ki phuv sar so ćerela pe ko nebo (Mat. 6:10). Da li o Avraham đanđa o detaljija ando odova sar e Devleso Kraljevstvo ka ovel organizujimo? Na. Vekonencar, odola detaljija hine „sveto tajna“ (Ef. 1:8-10; Kol. 1:26, 27). Ama, o Avraham đanđa so disave ando olese potomkija ka oven kraljija sebepi so o Jehova obećinđa lese odova (Post. 17:1, 2, 6; w20.08 2-3 ¶2-4).

Amen mora te odbacina o ideje ando otpadnikija. Kotar samo početko andi hrišćansko skupština, o Beng koristinđa but prevarantija te bi ćhivel i sumnja ko mislija ando e Devlese verna sluge. Odolese, valjani te đana te razlikujina o ćaćipe hem o hovajbe. Prekalo društvena mreže ja internet, amare neprijateljija mangena te ruminen amaro poverenje upro Jehova hem amaro mangipe premalo amare phralja hem phenja. Ma te bistre, koj tano palo sa odola hovajba hem odbacin len (1. Jov. 4:1, 6; Otkr. 12:9). Te šaj te izdržina e Bengese napadija, valjani te ovel amen pana pozorali vera ko Isus hem te haljova savi uloga ov isi le ki e Devlesi namera. Isto ađahar, valjani te ovel amen poverenje upro okola kolen o Jehova avdije koristini (Mat. 24:45-47). Amaro poverenje ovela pana pobaro ked redovno proučinaja e Devleso Lafi. Tegani amari vera ka ovel sar o kaš kase korenija tane hor ki phuv. Ked pisinđa o lafija ando avdisutno citati, o apostol Pavle mislinđa ko diso slično (w20.07 23-24 ¶11-12).

Sar nesavršena manuša, sare amen but sigate formirinaja amaro mišljenje averendar premalo odova sar izgledinena (Jov. 7:24). Ama, sa o buća kola dikhaja amare jaćhencar ki jekh osoba, na mothovena amenđe but buća olatar. Na primer, čak hem jekh but šukar doktori našti te đanel but kotar po pacijenti ako samo dikhela le. Ov valjani šukar te šunel e pacijente te šaj te đanel kola problemija e sastipaja hine le angleder, sar osetini pe akana hem kola simptomija isi le. O doktori šaj čak te phenel lese te đal ko rendgen te šaj te dikhel so desini pe ko leso telo. Ked na bi ćerela odova, ov šaj te del le pogrešno terapija. Isto ađahar, hem amen našti potpuno te haljova amare phralen hem e phenjen samo premalo odova sar izgledinena. Amen valjani te da sa amendar te penđara save tane on sar manuša. Đanđola pe, amen našti te đana soj tano ko lengo vilo. Ama, amen šaj te da sa amendar te oponašina e Jehova. Ov šunela pe slugen, haljola lenge okolnostija hem sa o buća kola utičinđe upro lende. Isto ađahar, ov mothovi saosećanje premalo lende (w20.04 14-15 ¶1-3).

Amen valjani te razvijina i poniznost, sose okola kola tane ponosna, pestar mislinena pobuter nego so valjani. O ponosna manuša tane svadljiva hem skreninena pažnja upro peste. Olenge stavija hem delija šaj te povredinen hem olen hem averen. Ako na menjinena olengo način sar razmislinena, o Beng ka korjaćeri hem ka rumini olengo um (2. Kor. 4:4; 11:3). Ki aver strana, i osoba koja tani ponizno mislini pestar kobor valjani. Oj isi la uravnoteženo hem realno mišljenje kokri pestar hem haljola so avera manuša tane ko but buća pošukar amendar (Fil. 2:3). Hem ov đanela so „o Devel suprotstavini pe okolenđe soj tane ohola, a po nezasluženo šukaripe mothovi premalo ponizna“ (1. Petr. 5:5). Okola kola tane razumna na mangena o Jehova te ovel olengo neprijatelji. Te bi aćhovaja ponizna amen mora te primenina o savet andi Biblija kova phenela: „Huljaven i purani ličnost hem olake delija, a uraven i nevi ličnost.“ Odova rodela baro trud. Amen valjani te razmislina ando e Isuseso primer hem te da sa amendar te oponašina le so pošukar šaj (Kol. 3:9, 10; 1. Petr. 2:21; w20.07 7 ¶16-17).

Ćaće tani bari čast te ova deo andi e Jehovasi skupština. Sar e Jehovase sluge, isi amen baro mir hem bahtalipe amare phralencar hem e phenjencar ki skupština. Kova tano to than ki skupština? O apostol Pavle uporedinđa e skupština e manušikane teloja. Isto ađahar, ando svako manuš kova tano ki skupština phenđa soj tano sar deo ando odova telo (Rimlj. 12:4-8; 1. Kor. 12:12-27; Ef. 4:16). Jekh buti koja šaj te sikljova kotar e Pavlesi ilustracija tani so svako amendar isi le važno than ki e Jehovasi porodica. O Pavle počminđa pi ilustacija e lafencar: „Sar so o telo isi le but delovija, a nane len sa isto uloga, ađahar hem amen, iako hijam but, hijam jekh telo ko jekhipe e Hristeja, a sar pojedincija hijam delovija ando telo kola zavisinena jekh jekhestar“ (Rimlj. 12:4, 5). O Pavle akaleja manglja te phenel so iako svako amendar isi le različito uloga ki skupština, ipak svako amendar tano važno (w20.08 20 ¶1-2; 21 ¶4).

Sar šaj tumen, o roditeljija, te oponašinen e Jehovasi poniznost? Ked odova šaj, pućen tumare ćhaven sar bi on ćerena disavo zadatko. Ako olengo predlog tano šukar, prihvatin le. Isto ađahar, e Jehovasi poniznost dikhela pe ko odova so ov tano strpljivo. O Jehova tano amenđe primer, odolese soj tano strpljivo ked okola kola služinena lese, anena ko pućibe olese odluke. Na primer, ov šunđa e Avrahame đi vaćerđa sose tano zabrinimo sebepi i odluka te oven uništime i Sodoma hem i Gomora (Post. 18:22-33). Hem setin tut sar o Jehova postupinđa e Avrahamese romnjaja, e Saraja. Ov na uvredinđa pe niti holjanđa sose oj asandilji ked šunđa so ka bijani ko phure berša (Post. 18:10-14). Umesto odova, ov na lelja e Sarako dostojanstvo. So tumen, o roditeljija hem o starešine, šaj te sikljon kotar o Jehova? Razmislinen sar reagujinena ked tumare ćhave ja o phralja hem o phenja ki skupština na slažinena pe tumare odlukencar. Da li odmah mangena te ispravinen len ja trudinena tumen te haljon sose ađahar razmislinena? Ked tumen kola isi tumen autoritet oponašinena e Jehova, odova but koristini hem tumare porodicenđe hem e skupštinenđe ko kola tumen služinena (w20.08 10 ¶7-9).

Ked prvo puti počminđam te družina amen e Jehovase svedokonencar, amen šaj hijam le spremna te prihvatina averengi pomoć sose haljiljam so hijam ćhave ko duhovno pogledi hem so isi amen pana but te sikljova (1. Kor. 3:1, 2). Ama, save hijam akana? Ako već but berša služinaja e Jehovase hem isi amen baro iskustvo, šaj na hijam više odobor spremna te prihvatina averengi pomoć, posebno ando okola kola nane odobor berša ko ćaćipe sar amen. Ama, but putija o Jehova koristini amare phralen hem phenjen te zorjaćeri amen (Rimlj. 1:11, 12). Amen mora te haljova odova ako mangaja o Jehova te del amen snaga. O uspeh na zavisini andi e manušesi snaga, ando e manušeso obrazovanje, barvalipe ja poreklo, već andi olesi poniznost hem ando oleso pouzdanje upro Jehova. Sare amen šaj te istrajina ađahar so (1) ka oslonina amen upro Jehova, (2) ka sikljova ando e biblijake primerija hem (3) ka prihvatina i pomoć ando amare phralja. Tegani, bizo obzir kobor amen mislinaja so hijam slaba, o Jehova ka del amen snaga (w20.07 14 ¶2; 19 ¶18-19).

Jekh područje kuri šaj te ovel amenđe pharo te ova strpljiva tano ked svedočinaja amare rođakonenđe. O načelo kova nalazini pe ko Propovednik 3:1, 7 šaj te pomožini amen ko odova. Odothe pisini: „Sa isi le poklo vreme. . . vreme ked trajini pe hem vreme ked vaćeri pe.“ Odoleja sar ponašinaja amen, šaj te svedočina olenđe bizo lafi. Ki aver strana, amen valjani uvek te ova spremna te vaćera lenđe ando Jehova (1. Petr. 3:1, 2). Iako valjani revno te propovedina hem te sikava averen, ipak valjani te ova strpljiva hem e manušencar hem amare rođakonencar. Amen šaj te sikljova te ova strpljiva ando verna manuša kolendar vaćeri i Biblija, ama hem ando phralja hem phenja ko amaro vreme. Na primer, o Avakum jedva ađićerđa te avel o krajo ando lošnipe. Ama, ov mothovđa soj tano strpljivo ked phenđa: „Ko mo stražarsko than ka terđovav“ (Avak. 2:1). Iako o apostol Pavle hine le želja te završini pi služba, ov ipak strpljivo hem ponodri temeljno svedočinđa andi šukar vest (Dela 20:24; w20.09 11-12 ¶12-14).

Iako samo o Jehova isi le pobari moć olestar, o Isus na mislini pestar pobuter nego so valjani. Ked oponašinena e Isuse, o ponizna e Jehovase sluge mothovena mangipe premalo kova penđari pe e Devlesi organizacija (Luka 9:48; Jov. 13:35). So valjani te ćere ako ki skupština pojavini pe dijekh problemi, a tu mislineja so o starešine na rešinena le sar valjani? Umesto te žaline tut, ov ponizno hem podržin okolen kola predvodinena (Jevr. 13:17). Te bi uspineja ko odova, puć tut: „Da li o problemija kola me dikhava tane odobor bare so valjani te rešinen pe? Da li tano pravo vreme aso odova? Da li tani odija mi buti te rešinav odola problemija? Iskreno, da li tano maje ćaće važno o mir ki skupština ja pokušinava te ćerav man sar neko koj tano but važno?“ O Jehova pobuter cenini i poniznost nego li i sposobnost, hem o jekhipe nego li i efikasnost. Odolese, de sa tutar ponizno te služine e Jehovase. Tegani, tu ka arakhe o mir ki skupština (Ef. 4:2, 3; w20.07 4-5 ¶9-11).

O Isus hine zahvalno e pobožno đuvljenđe kola koristinđe „pi imovina“ te bi pomožinena lese (Luka 8:1-3). Ov sikavđa len hem ando avera hor duhovna ćaćipa. Na primer, ov phenđa lenđe so ka merel hem so ka uskrsnini (Luka 24:5-8). Ov pripreminđa odole đuvlen, sar so pripreminđa hem e apostolen, aso kušnje kola ađićerena len (Mar. 9:30-32; 10:32-34). Iako disave učenikija našlje ked astarđe e Isuse, zanimljivo tano so disave đuvlja kola đelje palo leste, hine uzalo Isus đi na mulo ko mučeničko stubo (Mat. 26:56; Mar. 15:40, 41). O pobožna đuvlja hine prva svedokija ando oleso uskrsenje. Ov phenđa odole đuvlenđe te javinen e apostolenđe so ov uskrsninđa (Mat. 28:5, 9, 10). Izgleda so ki Pedesetnica, ko 33. berš ki nevi era hem o đuvlja hine odothe ked sare hine pomazime sveto duhoja. Ako tano odova tačno, odola phenja kola tegani hine pomazime dobinđe dar te vaćeren avere ćhibjencar hem te propovedinen averenđe ando „e Devlese moćna delija“ (Dela 1:14; 2:2-4, 11; w20.09 23 ¶11-12).

I šukar vest koja propovedinaja šaj te spasini e manušengo đivdipe. Sar đanaja odova? Ko Matej 28:19, 20, o Isus dinđa jekh zapovest: „Đan hem ćeren učenikonen. . . hem krstinen len.“ Kobor tano važno i osoba te krstini pe? Odova tano uslov aso okola kola mangena te oven spasime. O kandidati aso krštenje valjani te verujini so o spasenje tano moguće samo sebepi so o Isus dinđa po đivdipe hem uskrsninđa. Sebepi odova, o apostol Petar phenđa e hrišćanenđe: „O krštenje. . . akana hem tumen spasini prekalo uskrsenje ando Isus Hrist“ (1. Petr. 3:21). Odolese, ked jekh nevo učeniko krstini pe, ov šaj te ovel le nada so ka ovel spasimo. Te šaj te ćere učenikonen, valjani te ove „vešto đi sikaveja“ (2. Tim. 4:1, 2). Sose? Odolese so o Isus zapovedinđa: „Đan hem ćeren učenikonen. . . hem sikaven len.“ O apostol Pavle phenđa „istrajin“ ki odija buti, „sose ked ćereja odova ka spasine hem tut hem okolen so šunena tut“ (w20.10 14 ¶1-2).

O Petar sikljilo te mangel te propovedini. Uzi e Jehovasi pomoć, but šukar ćerđa odija buti (Dela 2:14, 41). O najvažno razlog sose propovedinaja tano odolese so mangaja e Jehova. Amaro mangipe premalo Jehova šaj te pomožini amen te vaćera averenđe olestar, iako mislinaja so na hijam dovoljno sposobna te bi ćeraja odova. Ked vićinđa e Petare te ovel ribari ando manuša, o Isus phenđa lese: „Ma dara!“ (Luka 5:8-11). O Petar na ukočinđa pe andi dar ked razmislinđa so ka desini pe ako bi ovela e Isuseso učeniko. Umesto odova, hine but iznenadimo ked dikhlja kobor maćhen astarđe, sebepi so o Isus pomožinđa lenđe. O Petar đanđa so o Isus ćerđa čudo hem odolese mislinđa so nane dovoljno sposobno te sarađujini oleja. Ki aver strana, šaj hem tu osetineja tut isto ađahar ked razmislineja so sa odova uključini, te ove e Hristeso učeniko. Ako tano ađahar, zorjaćer to mangipe premalo Jehova, o Isus hem premalo manuša. Tegani, odola razlogija ka podstakninen tut te prihvatine e Isuseso poziv te ove ribari ando manuša (Mat. 22:37, 39; Jov. 14:15; w20.09 3 ¶4-5).

Amen spremno koristinaja amaro vreme, amari snaga hem amare pare te bi arakhaja okolen kola isi len „ispravno stav premalo večno životi“ (Dela 13:48). Ked ćeraja odova, amen oponašinaja e Isuseso primer. Ov phenđa: „Mo habe tano te ćerav okova soj tano pali volja okolesi kova bićhalđa man hem te završinav i buti koja dinđa maje“ (Jov. 4:34; 17:4). Odija tani hem amari želja, te završina i buti koja tani amenđe dindi (Jov. 20:21). Isto ađahar, amen mangaja hem avera, hem okola kola tane neaktivna, te istrajinen amencar ki odija buti (Mat. 24:13). Nane uvek lokho te ćera odova so o Isus zapovedinđa amenđe. Ama, akija buti na ćeraja kokri. O Isus obećinđa so ka ovel amencar. Ked ćeraja učenikonen, amen hijam „e Devlese saradnikija“ hem ćeraja odova „ko jekhipe e Hristeja.“ Odova značini so o Jehova hem o Isus pomožinena amen ki odija buti (1. Kor. 3:9; 2. Kor. 2:17). Odolese, amen šaj te ćera odova. Ćaće tani bari čast hem baro zadovoljstvo so šaj te ćera odija buti hem te pomožina averenđe te ćeren odova! (Fil. 4:13; w20.11 7 ¶19-20).

But putija, o odluke kola o roditeljija anena šaj but vreme te utičinen upro olenge ćhave. Ako o roditeljija anena nemudra odluke, ađahar ćerena problemija hem pe ćhavenđe. Ama ako on anena mudra odluke, on dena pe ćhavenđe i prilika te ovel len najšukar đivdipe. Ki aver strana, hem o ćhave valjani te anen šukar odluke. I najšukar odluka koja svako amendar šaj te anel tani te služini amare nebesko Dadese, e Jehovase, kova but mangela amen (Ps. 73:28). O Josif hem i Marija hine odlučna te pomožinen pe ćhavenđe te služinen e Jehovase. O odluke kola on sar roditeljija anđe, mothovđe so odova hine lenđe najvažno ko đivdipe (Luka 2:40, 41, 52). Isto ađahar, hem o Isus anđa šukar odluke kola pomožinđe lese te ispunini pi uloga ki e Jehovasi namera (Mat. 4:1-10). O Isus barilo ko jekh šukar, verno hem hrabro manuš. Sa o roditeljija kola služinena e Jehovase bi ovena ponosna hem bahtale te ovel len ćhavo sar oleste (w20.10 26 ¶1-2).

Zamislin akala primerija. I phen koja tani ko berša setini pe ko šukar vreme andi olaki prošlost. Iako olako životi tano akana popharo, oj trudini pe te ćerel sa so šaj aso Jehova (1. Kor. 15:58). Svako dive oj zamislini sar ka živini pe porodicaja hem pe amalencar ko raj ano nevo sveto. A jekh aver phen kas neko andi skupština povredinđa, na mangela te ićeri i holi ano peste (Kol. 3:13). Jekh phral tano svesno so ćerđa greške ki prošlost, ama odlučno tano akana te aćhol verno e Jehovase (Ps. 51:10). Soj tano zajedničko ko akala trin primerija? Svako olendar pamtini so hine angleder, ama niko olendar na živini ki prošlost. Umesto odova, on „dikhena pravo anglal“ ki budućnost. Sose tano odobor važno te dikha „pravo anglal“ ki budućnost? Sar so našti te phira pravo anglal ako stalno irinaja amen te dikha palal, isto ađahar našti te da sa amendar ki služba e Jehovase ako stalno irinaja amen ki prošlost (Luka 9:62; w20.11 24 ¶1-3).

Anglo e Golijatese jaćha, o David dićhilo slabo, sose o Golijat hine zoralo ratniko. O Golijat hine pobaro, pošukar opremimo hem pošukar trenirimo aso maribe. Ki aver strana, o David hine jekh terno ćhavo kova na hine le iskustvo hem kova izgledinđa so nane šukar opremimo aso maribe. Ama, u stvari ov hine zoralo. Ov uzdajinđa pe upro Jehova hem ov dinđa le snaga te pobedini e Golijate (1. Sam. 17:41-45, 50). O David valjanđa te borini pe pana jekhe problemeja sebepi kova šajinđa te osetini pe soj tano slabo hem nemoćno. Ov verno služinđa e Saulese, kas o Jehova ćhivđa te ovel kralj ando Izrael. Ki početka, o Saul poštujinđa e Davide. Ama, sar đelo o vreme, sebepi so hine ponosno, o Saul ulo ljubomorno upro David. O Saul lošno ponašinđa pe premalo David hem čak pokušinđa te mudari le (1. Sam. 18:6-9, 29; 19:9-11). Iako o Saul nepravedno postupinđa premalo David, ov hem ponodri mothovđa poštovanje premalo e Jehovaso birimo kralj (1. Sam. 24:6). O David na krivinđa e Jehova sebepi o lošna buća kola o Saul ćerđa. Umesto odova, ov osloninđa pe upro Jehova te del le snaga koja valjani lese te izdržini odova pharipe (Ps. 18:1, uvod; w20.07 17 ¶11-13).

O proročanstvo ando kralj ando sever hem o kralj ando jug već ispuninđa pe. Odolese šaj te ova sigurna so hem aver deo ka ispunini pe. Te šaj te haljova o proročanstvo kova tano pisimo ko Danilo 11. poglavlje, valjani te ićera ki godi so odova proročanstvo odnosini pe samo ko vladarija hem vladavine kola hine len direktno uticaj upro e Devleso narodo. Ked uporedinaja kobor manuša isi ko celo sveto, šaj te dikha so e Devleso narodo nane odobor baro. Tegani, sose akala vladavine napadinena e Devlese narodo? Odolese so e Bengeso hem akale svetoso glavno cilj tano te uništinen okolen kola služinena e Jehovase hem e Isusese (Post. 3:15; Otkr. 11:7; 12:17). Uzo odova, o proročanstvo ando Danilo mora te složini pe odoleja sostar vaćerena avera proročanstvija ko e Devleso Lafi. Amen šaj ispravno te haljova o proročanstvo ando Danilo jedino ako uporedinaja le odoleja so phenena avera delovija kotar i Biblija (w20.05 2 ¶1-2).

But manuša avdije verujinena ko razna buća ando odova so ovela amencar palo meribe. Ama, so i Biblija sikavi odolestar? Ked neko merela, oleso telo ćirnjola. Ama, Okova kova nisostar ćerđa o svemir, šaj te uskrsnini e manuše hem te del le nevo telo (Post. 1:1; 2:7). O apostol Pavle koristinđa jekh primer te mothovi so nane potrebno o Devel te del len isto telo. Razmislin ando „seme.“ Ked o seme ćhivela pe ki phuv, ov počmini te barjol hem olestar ovela jekh biljka. I biljka tani potpuno averćhane kotar o tikno seme. O Pavle koristinđa akava primer te bi mothovi so amaro Stvoritelj odlučini savo telo ka del nekase. Isto ađahar, o Pavle phenđa so „o duhovna bića isi len telo hem o bića ki phuv isi len telo.“ So značinena olese lafija? Amen kola živinaja ki phuv, isi amen telo ando rat hem ando mas, ama o bića ko nebo, sar soj tane o anđelija, isi len duhovno telo (1. Kor. 15:36-41; w20.12 9-10 ¶7-9).

Sare amen mangaja te ovel amen mirno đivdipe. Niko amendar na mangela te ovel le brige. Ama, disavo puti, isi amen brige hem pućaja amen isto pućibe kova o kralj David pućlja e Jehova, a kova pisini ko avdisutno citati. Sebepi but buća šaj te brinina amen. Upro disave ando odola buća našti te utičina. Na primer, našti te utičina upro odova kobor svako berš ka koštini o habe hem o šeja ja kobor bari ka ovel i stanarina. Isto ađahar, našti te đana kobor putija amaro kolega ki buti ja amaro amal ki škola ka pokušini te ćhivel amen te ova nepoštena ja te ćera nemoral. Uzo odova, amen našti te ćhinava o kriminal odothe kaj bešaja. Akala problemija isi amen sebepi so živinaja ko sveto kuri but manuša na anena odluke premalo e biblijake načelija. O Beng, o devel ando akava sveto, đanela so disave manuša ka dozvolinen „o brige ando akava sveto“ te ćhinaven len te služinen e Jehovase (Mat. 13:22; 1. Jov. 5:19). Odolese, na hijam iznenadime so ko sveto isi odobor bare problemija sebepi kola o manuša but brininena pe! (w21.01 2 ¶1, 3).

O apostol Jovan podstakninđa amen tani te na mrzina amare phralen hem phenjen. Ako na ićeraja amen ko akava savet, o Beng bi šaj te utičini upro amende (1. Jov. 2:11). Disave hrišćanija ko prvo veko doživinđe odova. O Beng ko sa o načinija pokušinđa te ćhivel i mržnja maškaro e Devleso narodo hem te razdvojini le. Ked o Jovan pisinđa pi poslanica, ki skupština već khuvđe disave manuša kola pokušinđe te ćeren o buća kola o Beng manglja. Na primer, o Diotref ćerđa ozbiljna podele ki skupština (3. Jov. 9, 10). Ov na poštujinđa okolen kola predstavinđe o vodeće telo. Ov čak pokušinđa te uspudini andi skupština sarinen kola hine gostoljubiva premalo phralja kola olese na sviđinđe pe. Kobor samo hine ponosno! O Beng hem ponodri dela sa pestar te rumini o jekhipe kova isi maškaro e Devlese sluge. Niked na mangaja te dozvolina i mržnja te razdvojini amen ando amare phralja hem phenja! (w21.01 11 ¶14).

Ko Prvo svetsko rat, i nemačko hem i britansko vlada progoninđe e Devlese slugen, sebepi so na manglje te đan ko maribe. Isto ađahar, i američko vlada phanlja okolen kola predvodinđe ko propovedanje. Ađahar ispuninđa pe o proročanstvo ando Otkrivenje 11:7-10. Tegani, palo 1930. berš, a posebno ked hine Dujto svetsko rat, o kralj ando sever okrutno napadinđa e Devlese narodo. O Hitler hem olese sledbenikija zabraninđe amare aktivnostija. O protivnikija mudarđe oko 1 500 svedokija hem hiljade bićhalđe ko koncentraciona logorija. O kralj ando sever mothovđa „baro nepoštovanje premalo svetilište“ hem „ćhinavđa te den pe o žrtve kola valjani te den pe svako dive“, ađahar so zabraninđa e Jehovase slugenđe te đan te propovedinen (Dan. 11:30b, 31a). O Hitler čak dinđa sovel so ka mudari sa e Devlese slugen ki Nemačka (w20.05 6 ¶12-13).

Ked iskreno mangaja jekh jekhe, tegani na ka takmičina amen averencar ki skupština. Setin tut so o Jonatan na hine ljubomorno upro David hem so na pokušinđa te ovel kralj umesto oleste (1. Sam. 20:42). Sare amen šaj te oponašina e Jonataneso primer. Ma ov ljubomorno upro te phralja hem phenja sebepi olenge sposobnostija. Umesto odova, „ov ponizno hem dikh upro avera sar pobare tutar“ (Fil. 2:3). Ićer ki godi so svako amendar isi le po than ki skupština. Ako aćhovaja ponizna, odova ka pomožini amen te dikha o šukar buća ko amare phralja hem phenja hem te sikljova ando olengo šukar primer (1. Kor. 12:21-25). Ked jekh jekhese mothovaja mangipe, amen zorjaćeraja o jekhipe maškaro e Devleso narodo. Amen mothovaja so hijam e Isusese učenikija, a odova e iskreno manušen, pašaćeri e Jehovaja. Soj tano najvažno, odoleja slavinaja e Jehova kova tano „Dad ando milosrđe hem o Devel andi svako uteha“ (2. Kor. 1:3; w21.01 24 ¶14; 25 ¶16).

Avdije, disave manuša na poštujinena e Jehovase svedokonen hem marena amenđe muj, odolese so mislinena so na hijam inteligentna hem so hijam slaba. Sose? Odolese so nane amen ista stavija sar o manuša ko sveto. Amen trudinaja amen te ova ponizna, krotka hem poslušna. Ki aver strana, o manuša ko sveto vazdena okolen soj tane ponosna, arogantna hem buntovna. Uzo odova, na mešinaja amen ki politika hem na pridružinaja amen e vojskaće ni ki jekh država. Odolese so na uklopinaja amen ko kalup ando akava sveto, o manuša mislinena so amen hijam manje vredna (Rimlj. 12:2). Iako o manuša ko sveto mislinena so amen hijam slaba, o Jehova prekalo amende ćerela bare buća. Jekh olendar tani odova so avdije propovedini pe sar niked đi akana. Avdije, olese sluge proizvodinena o časopisija kola najviše prevodinena pe hem delinena pe ko celo sveto. Isto ađahar, on koristinena i Biblija te pomožinen milionija manušenđe te ovel len pošukar đivdipe. Sa akava šaj te ćerel pe sebepi so o Jehova koristini jekh grupa ando manuša (w20.07 15 ¶5-6).

O Isus nane podložno e Jehovase sebepi so nane gođalo ja sposobno. Jedino i osoba koja tani but gođali šaj te sikavi ko jednostavno hem ko jasno način sar so o Isus ćerđa (Jov. 7:45, 46). O Jehova đanđa so o Isus tano but sposobno hem dozvolinđa lese zajedno oleja te stvorini sa so isi ko nebo hem ki phuv (Posl. 8:30; Jevr. 1:2-4). Palo odova so o Isus uskrsninđa, o Jehova dinđa le „sa i vlast ko nebo hem ki phuv“ (Mat. 28:18). Iako tano o Isus but sposobno, ov ipak oslonini pe upro Jehova. Sose? Odolese so mangela pe Dade. O roma šaj te sikljon so o Jehova na ćhivđa e rome te ovel e romnjako poglavari odolese so mislini so o đuvlja tane manje važna ando murša. O Jehova odova mothovđa, ađahar so birinđa hem e muršen hem e đuvlen te vladinen zajedno e Isuseja (Gal. 3:26-29). O Jehova mothovđa so isi le poverenje upro po Ćhavo ađahar so dinđa le autoritet. Isto ađahar, o rom kova tano mudro ka del pe romnjaće disavo autoritet (w21.02 11 ¶13-14).

E Devleso Lafi tano sar ogledalo, sose pomožini amenđe te dikha ko so valjani te ćera hem sar te ćera ko odova (Jak. 1:23-25). Na primer, palo odova ked ka proučina, amen šaj te haljova so valjani te ćera ki amari samokontrola. Uzi e Jehovasi pomoć, amen šaj te sikljova sar te ova blaga e manušencar hem sar šaj te aćhova asavke ked isi amen problemija. Tegani ka ova razborita hem ka ana šukar odluke (Jak. 3:13). But tano važno šukar te penđara i Biblija. Podijekh puti haljovaja so valjani te ćera, tek palo odova so ćerđam greška. Pošukar način te dobina mudrost tano te sikljova ando šukar hem lošna buća kola avera ćerđe. Odolese, o Jakov podstaknini amen te sikljova ando Avraham, andi Rava, ando Jov hem ando Ilija (Jak. 2:21-26; 5:10, 11, 17, 18). Odola verna e Jehovase sluge, uspinđe te istrajinen ko kušnje sebepi kola šajinđe te našalen pi radost. Olengo primer mothovi amenđe so uzi e Jehovasi pomoć hem amen šaj te istrajina ko kušnje (w21.02 29-30 ¶12-13).

Ko kurs, o učitelj tano odgovorno aso odova te pomožini e studentese te haljol e Devleso Lafi. Ama, ako neko vićini tut ko e biblijako kurs, tegani tu hijan oleso partneri. Ti uloga tani te pomožine lese (Prop. 4:9, 10). Odolese, kola buća tu šaj te ćere te šaj te pomožine ko odova e biblijako kurs? Pripremin tut aso kurs. Šaj te puće e učitelje te phenel tuće diso ando odova studenti. Šaj te puće le: „Šaj li te phene maje diso ando odova studenti? Andi koja tema ka proučina? So mangeja te sikave le ko akava kurs? Da li isi diso so valjani ja so na valjani te phenav ko kurs? Sar šaj me te ohrabrinav e studente te napredujini?“ Naravno, o učitelj na ka vaćeri ando privatna buća ando oleso studenti. Ama, odova so ka phenel, šaj ka ovel korisno. I misionarka koja vićini pe Džoj vaćeri ando akala buća okolencar kasa đala ki služba. Oj phenela: „Odova so vaćerava me partnerese, pomožini lese te ovel le želja te pomožini e studentese hem te đanel so te phenel ko kurs“ (w21.03 9 ¶5-6).

Disavo puti, o manuša ko sveto mrzinena amen sebepi so amen živinaja premalo e Devlese zakonija. Odova so o Devel phenela soj tano šukar a soj tano lošno, but razlikujini pe ando odova so o manuša ko sveto phenena soj tano šukar a soj tano lošno. Na primer, đanaja so angleder, o Devel uništinđa e manušen ko Sodom hem i Gomora sebepi o nemoralna postupkija kola ćerđe (Jud. 7). Sebepi so amen ko asavke nemoralna postupkija dikhaja isto sar o Devel, o manuša asana amenđe hem phenena so hijam but stroga (1. Petr. 4:3, 4). So šaj te pomožini amen ked o manuša mrzinena amen hem ked vređinena amen? Amenđe valjani zorali vera ko odova so o Jehova ka pomožini amen. Sar o štit, amari vera šaj te „aćhavi sa e Lošnonese strele so thabljona“ (Ef. 6:16). Ama, uzi vera, amenđe valjani hem o mangipe. Odolese so o mangipe „na holjani sigate, sa podnosini hem sa trpini“ (1. Kor. 13:4-7, 13). O mangipe premalo Jehova, premalo amare phralja hem phenja hem čak premalo amare neprijateljija, ka pomožini amenđe te istrajina ked avera mrzinena amen (w21.03 20-21 ¶3-4).

Disavo puti, odoleja so na ćeraja disave buća, šaj te mothova so mangaja amare phralen hem phenjen. Na primer, na ka holjana sigate ako phenena diso so na sviđini pe amenđe. Dikhen so ulo hari angleder so o Isus mulo. O Isus phenđa pe učenikonenđe so mora te han oleso telo hem te pijen oleso rat te bi dobinena večno životi (Jov. 6:53-57). But učenikija hine šokirime ked šunđe odola lafija hem na sledinđe više e Isuse. Ama, olese ćaćutne amala aćhilje oleja. On aćhilje oleja iako hem on hine iznenadime ked šunđe odola lafija hem iako na haljilje len. Ipak, olese ćaćutne amala na mislinđe so odova so o Isus phenđa tano pogrešno hem na holjanđe sebepi odola lafija. Umesto odova, on hine len poverenje upro leste sose đanđe so vaćeri o ćaćipe (Jov. 6:60, 66-69). But tano važno te na holjana sigate ked šunaja diso so phenena amare amala! Umesto odova, valjani te da len prilika te objasninen so mislinena (Posl. 18:13; w21.01 11 ¶13).