Decembar

Sar đala o vreme, šaj te ovel amenđe pharo te haljova diso andi Biblija. Ili o Jehova šaj na odgovorinđa ki amari molitva ađahar sar so amen mangljam. Sebepi odova, šaj te ovel amen sumnje. Ako na rešinaja len, on šaj te oslabinen amari vera hem te ruminen amaro amalipe e Jehovaja (Jak. 1:7, 8). Čak sebepi o sumnje, šaj te našala i nada asi budućnost. O Pavle vaćerđa so amari nada asi budućnost tani sar o sidro (Jevr. 6:19). Sebepi o sidro, o brod šaj te aćhol stabilno ki oluja hem o sidro ka sprečini e brodo te khuvel ko bara. Ama o sidro tano korisno samo ako oleso lanco kova povezujini le e brodoja nane ćhindo. Sar so i rđa šaj te hal e lanco ando sidro, isto ađahar hem o sumnje kola na rešinđam šaj te oslabinen amari vera. Ked doživini progonstvo, i osoba koja isi la sumnje šaj te našali pi vera so o Jehova ka ispunini pe obećanja. Ako našalaja amari vera, našalaja hem amari nada. I osoba koja ađahar osetini pe, verovatno niked na ka ovel radosno (w21.02 30 ¶14-15).

O Avraham hine le verovatno prekalo 70 berš ked ov hem olesi romni mukhlje i diz Ur (Post. 11:31 – 12:4). Oko 100 berš živinđa ko šatorija, hem putujinđa prekali phuv Hanan. O Avraham mulo ked hine le 175 berš (Post. 25:7). Ama, ov na dikhlja sar o Jehova ispunini po obećanje, te del olese ćhavenđe i phuv ki koja ov phirđa. Isto ađahar, ov na živinđa dovoljno dugo te dikhel i diz, odnosno sar uspostavini pe e Devleso Kraljevstvo. Ama, ki Biblija pisini so o Avraham mulo „phuro hem zadovoljno e đivdipaja“ (Post. 25:8). Iako o Avraham morandilo te istrajini ko but pharipa, olesi vera aćhilji zorali hem hine spremno te ađićeri upro Jehova. Sose šajinđa te istrajini? Odolese so ko celo oleso đivdipe, o Jehova zaštitinđa le hem ponašinđa pe premalo leste sar premalo po amal (Post. 15:1; Is. 41:8; Jak. 2:22). Sar o Avraham, amen ađićeraja i diz koja isi la prava temeljija (Jevr. 11:10). Ama, amen na ađićeraja oj te ovel gradimi, sose e Devleso Kraljevstvo tano uspostavimo ko 1914. berš hem već vladini ko nebo (Otkr. 12:7-10). Ama, amen ađićeraja odova Kraljevstvo te vladini upri celo phuv (w20.08 4-5 ¶11-12).

Te šaj pažljivo te šuna averen, valjani te ova ponizna hem strpljiva. Isi barem trin razlogija sose tano šukar te ćera odova. Sar prvo, verovatno na ka formirina negativno mišljenje averendar sigate. Sar dujto, ka haljova sar amaro phral osetini pe hem sose ćerela disave buća. Odova ka pomožini amen te ova pana pobuter saosećajna premalo leste. Sar trito, ked mukhaja amare phrale te vaćeri, ov ka haljol so mučini le. Disavo puti, o manuš našti potpuno te haljol pe osećanja sa đi na vaćeri olendar. Disave amare phralenđe hem phenjenđe tano pharo te vaćeren ando pe osećanja, sebepi o buća kola desinđe pe olenđe angleder, sebepi olengi kultura ja sebepi olenge osobine. Šaj ka nakhel but vreme angleder so ka ovel len dovoljno poverenje upro amende te vaćeren amenđe sar osetinena pe. Ako hijam strpljiva sar o Jehova, on ka oven spremna te vaćeren amenđe sar osetinena pe. Tegani valjani pažljivo te šuna len (w20.04 15-16 ¶6-7).

O maćhe tane obično ko pani kova olenđe odgovorini hem kuri isi len dovoljno habe. Da li tano važno ked o ribari đala te astari maćhen? Te šaj te haljova kobor tano važno ked astarena pe o maćhe, dikhen so phenđa jekh phral ando Pacifička ostrvija ked vićinđa jekhe misionare te đan zajedno te astaren maćhen. O misionari phenđa e phralese: „Ka dikha amen koro tute tajsa sabale, ko enja o sati.“ O phral phenđa: „Tu na haljoveja. Amen đaja ked isi šansa te astara maćhen, a na ked amenđe odgovorini.“ Isto ađahar, e Isusese učenikija đelje te propovedinen uduri kaj hine o manuša hem ko vreme ked šajinđe te arakhen len. Na primer, on propovedinđe ko hram, ko sinagoge, kotar ćher ko ćher hem ko pazari (Dela 5:42; 17:17; 18:4). Hem amenđe valjani te oven penđarde o navike ando manuša ko amaro područje. Amen valjani te ova prilagodljiva hem te propovedina uduri kaj tane o manuša hem ko vreme kova olenđe odgovorini (1. Kor. 9:19-23; w20.09 4 ¶8-9).

Jekh način sar ovaja amala e Isuseja tano te podržina o odluke kola anena pe ki skupština. Ked sarađujinaja okolencar kola brininena pe amendar, amen zorjaćeraja amaro amalipe e Isuseja (Ef. 4:16). Na primer, akana daja sa amendar te koristina sa o dvorane ko šukar način. Odolese, šaj te desini pe jekh skupština te spojini pe avere skupštinaja. Sebepi odova, i organizacija uštedinđa but pare kola dobini ando dobrovoljna prilogija. Ki aver strana, sebepi akala promene disave objaviteljija valjanđe te ćeren bare promene. Odola verna objaviteljija šaj služinđe ki jekh skupština but berša hem ulje povezime e phralencar andi odija skupština. Ama, on tane akana zamolime te nakhen ki aver skupština. O Isus tano but bahtalo ked dikhela so odola objaviteljija tane spremna te prihvatinen odija promena (w20.04 24 ¶14).

O kralj ando sever hem o kralj ando jug nastavinena te takmičinen pe jekh jekheja ko ka ovel najmoćno sila ki phuv. Na primer, palo Dujto svetsko rat, o Sovjetsko Savez počminđa te vladini ko pobaro deo andi Evropa. Odolese, o kralj ando jug dogovorinđa pe avere phuvjencar te udružinen olenge vojske protiv o kralj ando sever. Akija organizacija tani penđardi sar NATO. Isto ađahar, o kralj ando sever hem o kralj ando jug trošinena but pare te bi ćerena so pozorali vojska hem pozoralo naoružanje. On borinena pe jekh jekheja ađahar so podržinena jekh averese neprijateljen ko mariba ki Afrika, Azija hem ki Latinsko Amerika. Ko amaro vreme, i Rusija hem olake saveznikija ulje but moćna ko celo sveto. Isto ađahar, on napadinena e kralje ando jug prekalo sajber napadija. Akala kraljija jekh jekhe optužinena so koristinena o štetna programija te bi lošno utičinena upro olengo političko sistemi hem sebepi kola našalena but pare. Hem sar so o Danilo prorekninđa, o kralj ando sever nastavini te napadini e Devlese narodo (Dan. 11:41; w20.05 13 ¶5-6).

„Šaj li i daj te bistrel pe ćhavore kole dojini?“ Akava pućibe o Jehova pućlja ko vreme ked o proroko Isaija služinđa. O Devel phenđa pe narodose: „Čak hem ked bi oj bistrela le, me tut niked na ka bistrav“ (Is. 49:15). Ov na uporedinđa pes but putija jekha romnjaja, ama ki akija situacija ov ćerđa odova. O Jehova uporedinđa pe osećanja kola isi le premalo pe sluge e mangipaja kova i daj isi la premalo lako ćhavo. Ov manglja olese sluge te đanen so ov but mangela len. But daja šaj osetinena pe slično sar i phen koja vićini pe Jasmin, koja phenela: „Ked tu dojineja te ćhave, tu oleja ćereja jekh posebno veza koja trajini celo đivdipe.“ O Jehova zapazini čak hem ked jekh ando olese ćhave na đala više ki služba ja ko sastankija. But ando amare phralja hem phenja kola hine neaktivna, irinđe pe ki skupština hem but hijam bahtale sebepi odova. O Jehova mangela on te irinen pe, a hem amen mangaja (1. Petr. 2:25; w20.06 18 ¶1-3).

Na dićhona sa o buća kola tane vredna. U stvari, odova soj tano najvredno našti te dikhel pe. Ki Propoved ki gora, o Isus phenđa so o barvalipe ko nebo tano povredno ando materijalna buća. Palo odova, ov phenđa jekh važno buti: „Kuri tano to barvalipe, odothe ka ovel hem to vilo“ (Mat. 6:19-21). Odova so amen smatrinaja soj tano but vredno, odova hem amaro vilo ka podstaknini amen te ćera. Amen ćedaja „o barvalipe ko nebo“ ked daja sa amendar te ovel amen šukar anav anglo Jehova. O Isus phenđa so odova barvalipe niko našti te lel amendar niti te propadini. O apostol Pavle podstaknini amen te dikha „ko odova so na dićhola“ (2. Kor. 4:17, 18). „Odova so na dićhola“ tane sa o blagoslovija kola ka ovel amen ko e Devleso nevo sveto. Da li mothovaja so hijam zahvalna e Jehovase aso odola poklonija kola na dićhona? (w20.05 26 ¶1-2).

Sar so o boršim pomožini e biljkenđe te barjon, ađahar hem odova sostar o Mojsije sikavđa e Izraelcen, zorjaćerđa olengi vera hem ohrabrinđa len. Sar šaj amen te ova sigurna so o način ko kova sikavaja e manušen upro lende utičini ko asavko način? Ked hijam ki služba, kotar i Biblija šaj te mothova e manušenđe e Devleso lično anav, Jehova. Šaj te da olenđe amare publikacije, te mothova lenđe but šuže hem poučna kratka filmija ja diso kotar amaro sajt sovaja slavinaja e Jehovaso anav. Ki buti, ki škola ja đi putujinaja, šaj ka ovel amen prilike te vaćera kotar amaro Devel hem odolestar savo tano ov. Tegani, šaj te vaćera olencar kotar odova savi namera o Devel isi le amencar hem e phuvjaja. Ked ka šunen pobuter odolestar, šaj prvo puti ka haljon kobor o Jehova mangela amen. Ked averenđe vaćeraja o ćaćipe kotar amaro brižno Dad, amen učestvujinaja ko odova te posvetini pe e Jehovaso anav. Amen pomožinaja e manušenđe te haljon so avera sikavđe len but hovajba olestar. Odova so amen sikavaja e manušen kotar i Biblija šaj but te ohrabrini len (Is. 65:13, 14; w20.06 10 ¶8-9).

Kola osobine mora te ovel amen te bi pomožinaja okolenđe kola mangena te irinen pe e Jehovase? Hajde te dikha so šaj te sikljova kotar e Isusesi priča ando našaldo ćhavo (Luka 15:17-24). O ćhavo ko krajo haljilo so hine but sebično hem odlučinđa te irini pe ćhere. O dad prastandilo anglo leste, gušinđa le hem odoleja uverinđa pe ćhave so mangela le. E ćhave mučinđa i savest hem mislinđa so na zaslužini o dad te vićini le mo ćhavo. Oleso dad mothovđa saosećanje ked o ćhavo phenđa lese sar osetini pe. O dad ćerđa disave konkretna buća hem ađahar mothovđa soj lese drago so leso ćhavo irinđa pe ćhere. Te bi mothovi odova, o dad organizujinđa i zabava hem dinđa o najšuže šeja pe ćhavese. O Jehova tano sar odova dad kotar akija priča. Ov mangela amare phralen hem e phenjen kola tane neaktivna hem mangela te irinen pe olese. Hem amen šaj te pomožina lenđe te irinen pe, ako oponašinaja e Jehova. Te šaj te ćera odova, mora te ovel amen strpljenje, saosećanje hem mangipe (w20.06 25-26 ¶8-9).

O Isus phenđa so disave „radosno“ ka prihvatinen o ćaćipe, ama ked ka ovel len problemija, olengi vera ka slaboni (Mat. 13:3-6, 20, 21). On šaj na haljilje so te ove e Isuseso učenik uključini hem o problemija hem o razna pharipa (Mat. 16:24). Ja šaj mislinđe so te ove hrišćanin značini so ka ovel tut đivdipe bizo problemija, so ka ovel tut samo blagoslovija, a na disave pharipa. Ama, ko avdisutno sveto sare isi amen problemija. Amare okolnostija menjinena pe hem sebepi odova jekh vreme šaj te našala amaro bahtalipe (Ps. 6:6; Prop. 9:11). But amare phralja hem phenja dokažinena soj tane uverime so odova ko so verujinena tano ćaćipe. Sar? On na spotakninena pe, čak ni ked olengo suvernik povredini len ja ked ćerela diso neispravno (Ps. 119:165). Pali svako kušnja olengi vera tani pozorali, a na poslabo (Jak. 1:2-4). Amen mora te ovel amen asavki zorali vera (w20.07 8 ¶1; 9 ¶4-5).

Angleder te počmine te čitine e Devleso Lafi, molin tut e Jehovase te pomožini tut te dikhe sar šaj te koristini tuće odova so čitineja. Na primer, molin tut e Jehovase te pomožini tut ko oleso Lafi te arakhe o načelija kola ka pomožinen tut te đane so te ćere (Fil. 4:6, 7). O Jehova dinđa amen sposobnost te zamislina o buća. Te šaj odova izveštaj andi Biblija te ovel tuće sar diso so ćaće ulo, pokušin te zamisline so desini pe ko odova izveštaj hem so tu hijan odova manuš kastar čitineja. Ćhiv tut ko oleso than hem dikh odova so ov dikhela hem osetin odova so ov osetini. Palo odova, hor razmislin. Šaj hor te razmisline ando odova so čitineja hem ando odova sar šaj odola informacije te primenine ko to životi. Ađahar ka povezine o mislija hem pošukar ka haljove odova so čitineja. Ako čitineja i Biblija, a na razmislineja hor odolestar, odova tano sar ked dikheja i slagalica koja nane sastavimi. Ked hor razmislineja, odova pomožini tut te ovel tut celo slika (w21.03 15 ¶3-5).

O apostol Pavle šajinđa te mislini ki prošlost hem te mislini so ked bi anela averćhane odluke ko po životi, ov akana na bi ovela ko phanlipe. Ov šajinđa te holjani upro phralja andi Azija kola mukhlje le hem šajinđa te ovel negativno premalo pe avera amala. Ama, o Pavle na ćerđa nijekh ando akala buća. Čak hem ked đanđa so pana hari ka ovel mudardo, ov na bisterđa soj tano najvažno te anel slava e Jehovase. Ov hem ponodri razmislinđa sar šaj te ohrabrini averen hem osloninđa pe upro Jehova ađahar so redovno molinđa pe. Umesto te razmislini samo ando okola kola mukhlje le, ov mothovđa soj tano zahvalno pe amalenđe sebepi so pomožinđe lese ko razna načinija (2. Tim. 3:16, 17; 4:13). Uzo odova, o Pavle hem ponodri proučinđa e Devleso Lafi. Soj tano najvažno, ov hine sigurno so o Jehova hem o Isus mangena le (w21.03 18 ¶17-18).

Disavo vreme palo šelto berš andi nevi era, o hovavne hrišćanija, kola sikavđe o paganska sikljoviba hem kola garavđe o ćaćipe ando e Devleso Lafi, pherđe i hrišćansko skupština. Kotar odova vreme pa đi o 1870. berš, o Devel na hine le pi organizacija ki phuv. Odolese so o hovavno hrišćanstvo barilo sar korov ki phuv, hine but pharo te penđari pe koj tane o prava hrišćanija (Mat. 13:36-43). Sose tano važno te đana akava? Akava mothovi so odova so vaćeri pe ko Danilo ko 11. poglavlje, kotar o kralj ando sever hem o kralj ando jug, na odnosini pe ko vladarija ni ko vladavine kola vladinđe maškaro šelto berš ki nevi era hem 1870. berš. Ko odova period na hine nijekh organizujimi grupa ando e Devleso narodo koja on šajinđe te napadinen. Ama, sigate palo 1870. berš, o kralj ando sever hem o kralj ando jug, palem pojavinđe pe (w20.05 3 ¶5).

O Joilo prorekninđa so o skakavcija ka opustošinen i izraelsko phuv hem so ka han sa anglo peste (Joilo 1:4). But berša verujinđam so akava proročanstvo odnosini pe ko e Jehovaso narodo kova neprestano propovedini sar o skakavcija kolen niko naštinđa te zaustavini. Sar so o skakavcija opustošinena i phuv, isto ađahar, amen haljiljam so amaro propovedibe razorno utičini upro manuša kolen kontrolišinena o religiozna vođe. Ama, ako osmotrinaja celo proročanstvo haljovaja so nane le odova značenje. Hajde te dikha so o Jehova phenđa kotar akala skakavcija: „Okole kova avela ando sever [o skakavcija] ka uspudinav dur tumendar“ (Joilo 2:20). Ako o skakavcija predstavinena e Jehovase svedokon kola šunena e Isusesi zapovest ađahar so propovedinena hem ćerena učenikonen, sose tegani o Jehova phenela so ka uspudini len? (Jezek. 33:7-9; Mat. 28:19, 20). Jasno tano, so o Jehova na ka uspudini pe verna slugen. Umesto odova, ov ka uspudini diso ja okolen kola protivinena pe lese narodose (w20.04 3 ¶3-5).

So valjani te ćera ako o Jehova na odgovorini odmah ko amare molitve? O Jakov phenđa so valjani te molina amen e Devlese. Na hijam lese dosadna ked rodaja olestar mudrost hem ov na ka holjani upro amende. Amaro nebesko Dad „dela velikodušno“ ked molinaja le te del amen mudrost te bi istrajinaja ko kušnje (Ps. 25:12, 13). Ov dikhela sova borinaja amen hem olese tano pharo ked dikhela so amen patinaja. Odolese, ov tano spremno te pomožini amen. Odova ćerela amen bahtale. Ama, sar o Jehova dela amen mudrost? Prekalo po Lafi (Posl. 2:6). Te šaj te ova mudra, amen mora te proučina e Devleso Lafi hem amare publikacije. Ama, mora te ćera diso pobuter nego li samo te proučina. Amen mora te ćera odova so o Jehova phenela amenđe. O Jakov pisinđa: „Ama ma samo šunen o lafi, već hem ćeren premalo leste“ (Jak. 1:22). Ked ka primenina e Devleso savet, šukar ka slažina amen averencar, ka ova razumna hem milosrdna (Jak. 3:17). Akala osobine ka pomožinen amen te istrajina ki svako kušnja hem te na našala amari radost (w21.02 29 ¶10-11).

O studentija ka napredujinen đi o krštenje ako avera ki skupština pomožinena len. Svako objavitelj ki skupština šaj te pomožini jekhe manušese kova proučini te ovel deo andi skupština. Jekh pionirka phenela: „Jekh poslovica phenela: ’Valjani tuće celo gav te šaj te barjaćere jekhe ćhave.‘ Ađahar tano hem ked ćeraja učenikonen. Valjani tuće celo skupština te šaj te pomožine jekhe manušese te napredujini đi o krštenje.“ Sare – hem o roditeljija, hem avera rođakija, hem o amala hem o učiteljija ki škola – isi len važno uloga te pomožinen e ćhavese te ovel zrelo manuš. On odova ćerena ađahar so pohvalinena le hem ađahar so sikavena le ando razna važna buća. Isto ađahar, o phralja hem o phenja ki skupština šaj te den savet, šaj te ohrabrinen hem šaj te den šukar primer okolenđe kola proučinena. Ađahar on pomožinena lenđe te napredujinen đi o krštenje (Posl. 15:22). Sose okova kova vodini o kurs valjani te ovel bahtalo ked avera ki skupština pomožinena e studentese? Odolese so but đene šaj te pomožinen e studentese te napredujini (w21.03 8 ¶1-3).

Sare amen, bilo te ova terne ja phure, mora te ova oprezna te na ova dujemujengo. O apostol Jovan vaćerđa so našti te živina premalo ćaćipe hem ko isto vreme nemoralno te živina (1. Jov. 1:6). Ako mangaja o Jehova te ovel zadovoljno amencar, na valjani te bistra so o Jehova dikhela sa so ćeraja. Čak, iako o manuša na dikhena so ćeraja ked hijam kokri, o Jehova sa dikhela (Jevr. 4:13). Amen mora te odbacina o gledište kova akava sveto isi le ando greh. Ko e Jovaneso vreme, o otpadnikija vaćerđe so neko šaj te ćerel greh hem ko isto vreme te aćhol amal e Devleja. Avdije, živinaja maškaro manuša kola razmislinena ko slično način. But olendar phenena so verujinena ko Devel, ama na prihvatinena e Jehovaso gledište ando greh, posebno oleso gledište ando seks. Odova soj tano greh ko e Jehovase jaćha, olenđe tano lično izbor ja averćhane način ando đivdipe (w20.07 22 ¶7-8).

Da li hem tu branineja te phenjen ked valjani? Na primer, zamislin jekh situacija. Disave objaviteljija dikhena jekha phenja, kaso rom nane e Jehovaso svedoko, sar često harini ko sastankija hem uvek đala ćhere čim on završinena pe. On primetinena hem so oj na anela pe ćhaven redovno ko sastankija. Odolese on kritikujinena la sose mislinena so valjani te ovel odlučno hem te rodel ando po rom te mukhel e ćhaven te đan olaja. Ama, odova so on na đanena tano so oj dela sa pestar te ćerel odova so šaj. Isto ađahar, oj nane la potpuno kontrola sar ka koristini po vreme hem na pućela pe samo oj so ka ćerel pe ćhavencar. Pohvalin la anglo avera hem vaćer ando šukar buća kola oj ćerela. Odoleja ka ćhinave averen te kritikujinen la. O starešine đanena so e Jehovase tano važno sar on ponašinena pe premalo phenja (Jak. 1:27). On trudinena pe te oven razumna sar o Isus hem na ćerena pravilija ando odova ked bi ovela šukar te mothoven razumevanje (Mat. 15:22-28). Ked o starešine trudinena pe te pomožinen e phenjenđe, o phenja osetinena pe so o Jehova hem olesi organizacija mangena len (w20.09 24-25 ¶17-19).

O prorok Danilo uvek ponizno rodinđa e Jehovaso vođstvo. Jekhvar, o Navuhodonosor dikhlja jekh suno. O Jehova koristinđa e Danilo te phenel lese so značini odova suno. O Danilo na phenđa so kokri pestar objasninđa lese o suno. Umesto odova, ov hine skromno hem sa i čast dinđa e Jehovase (Dan. 2:26-28). So šaj te sikljova? Ako e phralenđe sviđinena pe amare govorija ja ako isi amen šuže iskustvija ki služba, amen valjani sa i čast te da e Jehovase. Valjani te ova skromna hem te priznajina so sa odova na bi šaj te ćera bizi e Jehovasi pomoć (Fil. 4:13). Ked isi amen asavko stav, amen oponašinaja e Isuse. O Isus osloninđa pe upro Jehova (Jov. 5:19, 30). Ov niked na manglja te lel pe Dadeso autoritet. Ko Filipljanima 2:6 phenela pe so o Isus „ni na pomislinđa te lel oleso than, te ovel sar o Devel“. Sar podložno Ćhavo, o Isus haljilo kaj tane olese granice hem poštujinđa pe Dadeso autoritet (w20.08 11 ¶12-13).

Disave kola prastana ki e đivdipasi trka isi len problemija kola avera našti te dikhen hem našti te haljon. Ako našti te ćere sa so šajinđan angleder hem ako dićhola tuće so niko na haljola tut, but šaj te ohrabrini tut e Mefivostejeso primer (2. Sam. 4:4). Ov hine hromo. Isto ađahar, o kralj David hine le lošno mišljenje olestar hem postupinđa nepravedno premalo leste. Ama, ov na dozvolinđa te ovel negativno. Ov hine zahvalno aso sa o šukar buća kola desinđe pe ko oleso đivdipe. Na bisterđa o šukaripe kova o David mothovđa lese angleder (2. Sam. 9:6-10). Ked o David nepravedno postupinđa premalo leste, o Mefivostej na usredsredinđa pe samo ko odova. Ov na dozvolinđa sebepi e Davidesi greška te ovel jekh nezadovoljno hem holjamo manuš. Ov na mislinđa so o Jehova tano krivo aso odova so o David ćerđa. O Mefivostej usredsredinđa pe ko odova so ov šaj te ćerel te bi mothovi so podržini e kralje kole o Jehova birinđa (2. Sam. 16:1-4; 19:24-30). O Jehova dinđa ko oleso Lafi te ovel pisimo e Mefivostejeso šukar primer, te bi šaj amen te sikljova olestar (Rimlj. 15:4; w20.04 26 ¶3; 30 ¶18-19).

Šaj disave ki skupština tane naimenujime te služinen sar misionarija, sar specijalna ja stalna pionirija. Sare on i služba te ćhivena ko prvo than ko po đivdipe. Sebepi odova, on pomožinđe bute manušenđe te oven e Isusese učenikija. Iako akala punovremena sluge obično nane len but materijalna buća, o Jehova but blagoslovinđa len (Mar. 10:29, 30). Amen ćaće but mangaja akale phralen hem e phenjen hem zahvalna hijam soj tane deo andi amari skupština! Da li jedino o naimenujime phralja hem okola kola tane ki punovremeno služba isi len po than ki skupština? Naravno so na! Svako objavitelj tano važno e Devlese hem e skupštinaće (Rimlj. 10:15; 1. Kor. 3:6-8). U stvari, jekh ando najvažno razlog sose postojini i skupština tano te ćeren pe o učenikija (Mat. 28:19, 20; 1. Tim. 2:4). Sare kola tane deo andi skupština, o krstime objaviteljija hem o nekrštena objaviteljija, dena sa pestar te ispuninen akava važno zadatko (Mat. 24:14; w20.08 21 ¶7-8).

Sar so dikhaja ko lafija ando avdisutno citati, ked isi amen pharipa, o Isus ka pomožini amenđe. U stvari, e Isusese lafija dena amen snaga. Sose? Sose ko amaro đivdipe isi dive ked amenđe tano posebno pharo. Na primer, ked merela neko kas mangaja, i dukh koja osetinaja na nakhela palo nekobor dive, već trajini beršencar. Avera borinena pe e problemencar kola anena o phure berša. A disave avera isi len pharipa sebepi i depresija. Ama, i snaga dela amen odova so đanaja so o Isus tano amencar „ko sa o dive“, čak hem ko najphare dive ko amaro životi (Mat. 11:28-30). E Devleso Lafi uverini amen so o Jehova ka pomožini amen prekalo pe anđelija (Jevr. 1:7, 14). Na primer, o anđelija podržinena amen hem vodinena amen đi propovedinaja „i šukar vest ando Kraljevstvo“ e manušenđe kola avena ando sa o nacije, plemenija hem ćhibja (Mat. 24:13, 14; Otkr.14:6; w20.11 13-14 ¶6-7).

Amen mangaja amaro studenti te haljol so odova so sikljola avela ando e Devleso Lafi (1. Sol. 2:13). Sar šaj te ćera odova? Podstaknin e studente te vaćeri so mislini ando odova so sikljola. Umesto uvek tu te objasnine lese o stihija andi Biblija, puć le ov tuće te objasnini len. Pomožin lese te haljol sar odova so sikljola kotar e Devleso Lafi šaj te primenini ko po životi. Postavin lese pućiba kola ka mothoven so mislini ando stihija kola čitinđa hem sar on utičinena upro leste (Luka 10:25-28). Na primer, puć le: „Kola e Jehovase osobine šaj te dikhe ko akava stih?; Sar šaj te pomožini tuće odova so akana sikljiljan andi Biblija?; So mislineja ando akava so akana sikljiljan?“ Nane najvažno kobor o studenti đanela, već kobor mangela hem primenini odova so đanela. Koristin i Biblija đi sikaveja e studente. Ako mangeja te ove pana pošukar učitelj, valjani te ove ponizno (w20.10 15 ¶5-6).

Šaj te ova sigurna so o delo ando propovedibe ka završini pe ko pravo vreme. Akana ka dikha so hine ko e Nojese dive. O Jehova mothovđa so uvek ćerela o buća ko pravo vreme. Oko 120 berš angleder, o Jehova tačno odredinđa o vreme ked ka počmini o Potop. Beršencar palo odova, o Jehova phenđa e Nojese te ćerel i arka. Verovatno oko 40 ja 50 berš angleder o Potop, o Noje gradinđa i arka hem propovedinđa. Iako o manuša na šunđe le, ov hem ponodri propovedinđa sa đi o Jehova na phenđa soj tano vreme te ćhivel e životinjen ki arka. Palo odova, ko pravo vreme o Jehova „phanlja o udara andi arka“ (Post. 6:3; 7:1, 2, 16). Pana hari, o Jehova ka phenel so više na valjani te propovedina i šukar vest. Palo odova, ov ka uništini e Bengeso sveto hem ka anel o nevo sveto kuri ka oven o manuša kola šunena e Devle. Đi na ovela odova, amen šaj te oponašina e Noje, e Avakume hem averen kola revno propovedinđe. Hajde te ova usredsredime ko propovedibe, te ova strpljiva hem te zorjaćera amari vera ko Jehova hem ko olese obećanja (w20.09 13 ¶18-19).

Ked na bi đanela pe koj tano poglavari, e Jehovasi porodica na bi ovela organizujimi hem bahtali. Na primer, niko na bi đanela ko valjani te anel o konačna odluke hem ko valjani te pobrinini pe te ćerel pe odova soj tano odlučimo. Ako o poglavarstvo tano diso šukar, tegani sose disave romnja osetinena pe so olenge roma okrutno ponašinena pe premalo lende hem so kontrolišinena len? Odova ovela sebepi so but roma na ićerena pe ko e Jehovase načelija asi porodica već ićerena pe ko običaija kola avena andi olengi kultura. Isto ađahar, šaj zlostavinena pe romnjen te bi zadovoljinena pe sebična želje. Na primer, o rom šaj te kontrolišini pe romnja sose mangela te ovel považno olatar ja te mothovi averenđe so ov tano gazda ko ćher. Ov šaj te mislini so našti te ćhivel la zorjeja te mangel le, ama šaj te ćhivel la te daral olestar. Hem odija dar šaj te koristini te bi kontrolišini la. Odoleja sar razmislini hem sar ponašini pe, o rom na mothovi pe romnjaće i čast hem o poštovanje kova oj zaslužini, a odova tano suprotno ando odova so o Jehova rodela ando roma (Ef. 5:25, 28; w21.02 3 ¶6-7).

Ked brinineja tut sebepi o problemija, šaj te moline tut e Jehovase asi pomoć. Sar odgovor ki ti molitva, ov šaj te del tut „e Devleso mir, kova tano upreder odova so o manuš šaj te haljol“ (Fil. 4:6, 7). O Jehova ka del tut odova mir prekalo po moćno sveti duh (Gal. 5:22). Ked molineja tut e Jehovase, vaćer lese sa so isi tut ko vilo. Ov konkretno. Vaćer lese soj tano o problemi hem phen lese sar osetineja tut sebepi odova. Ako šaj te rešini pe o problemi, molin le te del tut mudrost te đane sar te rešine le hem te del tut snaga te ćere odova. Ako našti nisar te rešine o problemi, tegani molin le te pomožini tut te na brinine tut odobor but hem o brige te na peraven tut. Ked hijan konkretno ko te molitve, sar đala o vreme, sa pojasno ka dikhe sar o Jehova odgovorini ko te molitve. Ako o odgovor na dobineja odmah, ma odustajin. O Jehova na mangela samo te ove konkretno, nego hem te istrajine ko te molitve (Luka 11:8-10; w21.01 3 ¶6-7).

Avdije, ko amare skupštine isi amen porodice hem bračna parija. Isto ađahar, isi amen but phralja hem phenja kola nane ko brako. Sar valjani te dikha upro okola kola nane ko brako? Akana ka dikha sar o Isus dikhlja ko samaštvo. Đi hine ki phuv, o Isus na ženinđa pe. Ov aćhilo kokri hem koristinđa po vreme hem pi snaga te ćerel po zadatko. O Isus niked na phenđa so jekh hrišćanin mora te ovel ko brako ja so mora te ovel kokri. Ama, ov phenđa so disave hrišćanija na ka ženinen pe. O Isus poštujinđa okolen kola na hine ko brako. Ov na mislinđa so okola soj tane ko brako tane pošukar ando okola so nane ko brako, niti so diso falini olenđe. Sar o Isus, hem o apostol Pavle na ženinđa pe. Ama, ov niked na phenđa so bi ovela pogrešno jekh hrišćanin te ženini pe. Ov đanđa so odija tani lično odluka (w20.08 28 ¶7-8).

O apostol Jovan hine le dugo hem bahtalo životi. Ov nakhlja but bare kušnje kola šajinđe te oslabinen olesi vera. Ama, ov uvek dinđa sa pestar te ićeri pe ko e Isusese zapovestija, a jekh olendar hine te mangel pe phralen hem pe phenjen. Sebepi odova, ov hine uverimo so o Jehova hem o Isus mangena le hem so ka den le snaga te nakhel sa odola kušnje (Jov. 14:15-17; 15:10). O Satana hem oleso sveto naštinđe te ćhinaven e Jovane te mangel pe phralen hem pe phenjen, hem te mothovi lenđe mangipe pe lafencar hem pe delijencar. Sar o Jovan, hem amen živinaja ko sveto kuri vladini o Beng, kova nikas na mangela (1. Jov. 3:1, 10). Iako isi le bari želja te ćhinavi amen te manga amare phralen hem phenjen, o Beng našti te ćerel odova, osim ako amen na dozvolinaja lese. Odolese, hajde te ova odlučna te manga amare phralen hem phenjen, hem amare lafencar hem amare delijencar. Tegani ka uživina ki e Jehovasi porodica hem ka ova but bahtale (1. Jov.4:7; w21.01 13 ¶18-19).

O životi ko akava sveto kuri vladini o Satana šaj te ovel but pharo hem disavo puti na đanaja so te ćera (2. Tim. 3:1). Ama, na valjani te brinina amen ja te dara. O Jehova đanela kola problemija isi amen. Ked peraja, o Jehova obećini so ka ićeri amen pe zorale desno vasteja (Is. 41:10, 13). Amen hijam sigurna so o Jehova ka pomožini amen hem so i Biblija ka del amen snaga te istrajina ko amare problemija. Amare video-izdanja, o dramsko čitibe andi Biblija hem i serija ando člankija „Primeri vere“, šaj te pomožinen tut ko e biblijake izveštaija te dikhe sar diso so ćaće ulo. Angleder te dikhe, te šune ja te čitine akala izveštaija, molin tut e Jehovase te pomožini tut te arakhe disave mislija kola šaj te primenine. Zamislin so tu hijan odija osoba kolatar čitineja. Hor razmislin ando odova so e Jehovase verna sluge ćerđe hem sar ov pomožinđa len te istrajinen ko pe problemija. Palo odova, primenin odova so sikljiljan ko to životi. Zahvalin e Jehovase asi pomoć koja već dobineja. Mothov so hijan zahvalno asi pomoć ađahar so ohrabrineja averen hem pomožineja lenđe (w21.03 19 ¶22-23).

Ako hijen ko brako hem mangena te ovel tumen ćhave, pućen tumen: „Da li hijam ponizna, duhovna manuša kas bi o Jehova birini te brininen pe aso odova tikoro?“ (Ps. 127:4). Ako već hijan roditelj, puć tut: „Da li sikavava me ćhaven kobor tano važno te ćeren buti?“ (Prop. 3:12, 13). „Da li dava sa mandar te zaštitinav me ćhaven ando lošna buća kola isi ko e Bengeso sveto?“ (Posl. 22:3). Tu našti te zaštitine te ćhaven kotar sa opasnostija. Ama, hari po hari, tu šaj mangipaja te pripremine len ko sa so ađićeri len ko đivdipe, ađahar so ka sikave len te roden savet ko e Devleso Lafi (Posl. 2:1-6). Na primer, ako neko kotar ti porodica odlučini više te na služini e Jehovase, koristin e Devleso Lafi te pomožine te ćhavenđe te haljon sose tano važno te aćhon verna e Jehovase (Ps. 31:23). Ja ked merela neko kas mangena, mothov te ćhavenđe disave stihija kotar i Biblija kola ka pomožinen lenđe te savladinen odija dukh hem te ovel len mir ko vilo (2. Kor. 1:3, 4; 2. Tim. 3:16; w20.10 27 ¶7).