Januar

O Isus hrabro phenđa so o religiozna vođe tane licemerna, sose na sikavena e manušen so ćaće o Jehova rodela olendar. Na primer, ov phenđa so on više brininđe pe ando odova sar ka thoven pe vasta, nego ando odova sar ka brininen pe ando pe roditeljija (Mat. 15:1-11). O Isus na mukhlja i negativno reakcija ando religiozna vođe te ćhinavi le te vaćeri o ćaćipe. O Isus mothovđa so odova so o religiozna vođe sikavđe tano hovajbe. Ov na phenđa so o Devel prihvatini sa o religiozna sikljoviba. Umesto odova, ov phenđa so but manuša ka đan ko buvlo drumo kova legari ko uništenje, a so but hari manuša ka đan ko tesno drumo kova legari ko životi (Mat. 7:13, 14). Ov phenđa so disave manuša ka phenen so služinena e Devlese, ama u stvari na ćerena odova. Odolese, ov upozorinđa pe učenikonen: „Arakhen tumen ando hovavne prorokija kola avena koro tumende hem ćerena pe soj tane sar bakre, ama u stvari andre tane sar ruva kola tane but bokhale. Ka penđaren len premalo lenge plodija“ (Mat. 7:15-20; w21.05 9 ¶7-8).

E Anako rom vićinđa pe Elkana. Ov hine Leviti hem but manglja la. Ama, ov hine le pana jekh romni, i Fenina. O Elkana pobuter manglja e Ana nego e Fenina. Ama „i Fenina hine la ćhave, a i Ana na hine la.“ Odolese, i Fenina „marđa muj e Anaće.“ Odova but dukhavđa e Ana. Oj „runđa hem ništa na halja“. Ama, e Devleso Lafi na vaćeri so i Ana irinđa e Feninaće aso sa odova so ćerđa laće. Umesto odova, oj phravđa po vilo e Jehovase hem verujinđa so ov ka pomožini laće (1. Sam. 1:2, 6, 7, 10). So šaj te sikljova andi Ana? Ako neko mangela te mothovi soj tano pošukar tutar, ma bistri so odova sar ka reagujine zavisini samo tutar. Ma mukh te pere ki zamka ađahar so ka mange te mothove so hijan pošukar andi odija osoba. Umesto te irine o lošnipe lošnipaja, de sa tutar te ove ko mir odola osobaja (Rimlj. 12:17-21). Ama, čak iako odija osoba na menjini pe, tu ka ovel tut mir ko vilo hem ka aćhove bahtalo (w21.07 17 ¶13-14).

Odolese so o Juda Iskariotski ulo pohlepno, ov izdajinđa e Isuse. Ama, o Juda na hine uvek asavko manuš (Luka 6:13, 16). Ov hine odgovorno manuš upro kaste avera šaj hine te osloninen pe hem odolese dobinđa odgovornost te brinini pe andi kutija aso prilogija. Ama palo disavo vreme, o Juda počminđa te ćorel odola pare, iako but putija šunđa e Isuse sar vaćeri e manušenđe so na valjani te oven pohlepna (Mar. 7:22, 23; Luka 11:39). Kobor o Juda ulo pohlepno dićhilo hari angleder te merel o Isus. O Isus hem olese apostolija, i Marija hem olaki phen i Marta, hine ko gostija ko gubavco kova vićinđa pe Simon. Đi halje maro, i Marija uštinđa hem ćhorđa ko e Isuseso šero o ulje kova hine but skupo. O Juda hem avera učenikija but holjanđe. Avera učenikija šaj holjanđe odolese so mislinđe so odola pare šaj hine te trošinen pe aso avera buća. Ama, o Juda hine le aver razlog sose holjanđa. Ov hine ćor hem manglja te ćorel odola pare (Jov. 12:2-6; Mat. 26:6-16; Luka 22:3-6; w21.06 18 ¶12-13).

Da li podijekh puti osetineja so isi tut but odgovornostija hem soj tano tuće but pharo te ćere sa so valjani? Ako tano ađahar, tegani ka haljove sar osetinđa pe o Pavle. Ov brininđa pe na samo asi jekh skupština, nego „aso sa o skupštine“ (2. Kor. 11:23-28). Da li hijan dugo nabormo hem sebepi odova na hijan radosno? O Pavle hine le jekh problemi sebepi kova patinđa. Šaj hine le problemi pe sastipaja hem odolese manglja te saćol (2. Kor. 12:7-10). Da li hijan obeshrabrimo sebepi ti nesavršenost? Podijekh puti hem o Pavle osetinđa pe ađahar. Ov kokri pese phenđa soj tano „jadno manuš“, odolese so but putija valjanđa te borini pe te ćerel odova soj tano ispravno (Rimlj. 7:21-24). O Pavle doživinđa but kušnje hem hine obeshrabrimo, ama ov na ćhinavđa te služini e Jehovase. So pomožinđa lese ko odova? Iako hine svesno soj tano nesavršeno manuš, i zorali vera ki otkupnina pomožinđa lese (w21.04 22 ¶7-8).

Ked o Adam grešinđa, ov našalđa i prilika te živini zauvek. Ama, na samo ov nego hem olese ćhave. Na hine nisavo opravdanje aso odova so o Adam ćerđa. Ov namerno grešinđa. Ama, soj tano olese ćhavencar? On nane kriva sebepi so o Adam grešinđa (Rimlj. 5:12, 14). O Adam zaslužinđa te merel sebepi odova so ćerđa. Ama, da li o Jehova šajinđa diso te ćerel te šaj e Adamese ćhave te živinen večno? Ja! Hari palo odova so o Adam grešinđa, o Jehova počminđa te mothovi sar ka spasini e Adamese ćhaven ando greh hem ando meribe (Post. 3:15). Sebepi i otkupnina, amen šaj te ova paše amala e Jehovaja, čak iako hijam nesavršena. Isto ađahar, sa e Bengese delija ka oven uništime (1. Jov. 3:8). Uzo odova, ka ispunini pe e Jehovasi namera e phuvjaja, celo phuv ka ovel raj (w21.04 14 ¶1; 19 ¶17).

But murša hem đuvlja alje ko Jerusalim. On putujinđe ando različita phuvja hem vaćerđe različita ćhibja. Odova dive desinđa pe diso but zanimljivo. Ked reslje, disave Jevreja počminđe te vaćeren olencar ki olengi ćhib. Odova but iznenadinđa len. Ama, odova so phenđe lenđe odola Judejcija hem o apostol Petar hine pana pozanimljivo. On phenđe lenđe so šaj te spasinen pe ako mothovena vera ko Isus Hrist. Akava so phenđe lenđe but utičinđa upro lende, odolese on pućlje le: „So valjani te ćera?“ O Petar odgovorinđa lenđe: „Nek svako tumendar krstini pe“ (Dela 2:37, 38). Palo odova desinđa pe diso but šukar. Ko odova dive, oko 3 000 manuša krstinđe pe hem ađahar ulje e Hristese učenikija. Ađahar počminđa te ćeren pe učenikija, sar so o Isus zapovedinđa. Olese učenikija hem avdije propovedinena hem ćerena učenikonen (w21.06 2 ¶1-2).

Šaj ko to područje tano pharo te počmine te proučine nekasa. Disave manuša šaj na mangena te šunen i šukar vest, a disave avera čak protivinena pe amenđe. So šaj te pomožini amen te na vazda amare vasta e manušendar? Ma bistri so e manušenge okolnostija sigate šaj te menjinen pe. Sebepi odova, okola kola na manglje te šunen i šukar vest, kasnije šaj ka haljon so valjani lenđe o Devel (Mat. 5:3). Disave kola angleder na manglje te čitinen amare publikacije, kasnije manglje te proučinen i Biblija. Isto ađahar, amen đanaja so o Jehova tano Gospodar andi žetva (Mat. 9:38). Ov rodela amendar te sadina o seme hem te vadina le, ama na valjani te bistra so ov tano okova kova dela te barjol. Čak iako nane amen nijekh kurs, but ohrabrini amen ked đanaja so o Jehova blagoslovini odova so trudinaja amen te pomožina e manušenđe, a na odova kobor kursija isi amen (w21.07 6 ¶14).

O Jehova dinđa e manušenđe sposobnost te ovel len ćhave hem odgovornost te sikaven len te mangen e Jehova hem te služinen olese. Ako hijan roditelj, da li hijan zahvalno aso odova but šužo poklon? Iako o anđelija isi len razna sposobnostija, o Jehova na ćerđa len ađahar te šaj te ovel len ćhave. Ako isi tumen ćhave, oven zahvalna so isi tumen čast te barjaćeren tumare ćhaven. Tumen kola hijen roditeljija, isi tumen odgovornost „te vaspitinen hem te usmerinen [tumare ćhaven] premali e Jehovasi volja“ (Ef. 6:4; Pon. zak. 6:5-7). E Jehovasi organizacija mangela te pomožini tumenđe. Odolese isi amen but publikacije, video-materijalija, đilja hem člankija ko amaro sajt kola šaj te pomožinen tumenđe te vaspitinen tumare ćhaven. Akava mothovi so o Jehova hem oleso Ćhavo but mangena e ćhaven (Luka 18:15-17). O Jehova tano but bahtalo ked dikhela sar o roditeljija osloninena pe upro leste đi dena sa pestar te brininen pe ando pe ćhave. Asavke roditeljija pomožinena pe ćhavenđe hem on zauvek te oven deo andi e Jehovasi porodica (w21.08 5 ¶9).

Disave manuša mislinena so te ovel tut vera značini te verujine ko diso bizo dokazija. Ama, i Biblija mothovi so odova nane pravo vera. Oj vaćeri so i pravo vera temeljini pe ko dokazija. Iako našti te dikha e Jehova, e Isuse hem e Devleso Kraljevstvo, amen isi amen dokazija so on ćaće postojinena (Jevr. 11:3). Jekh naučnik kova kasnije ulo e Jehovaso svedoko, phenđa: „E Jehovase svedokija isi len dokazija aso sa o buća ko kola verujinena. Odova ko so on verujinena slažini pe e naukaja.“ Ama, šaj pućaja amen: „Ako isi odobor buća kola mothovena so postojini o Stvoritelj, tegani sose but manuša na verujinena so o Devel tano okova so sa ćerđa?“ Disave manuša niked na rodinđe dokazija aso odova ko so verujinena. O Robert kova tano akana amaro phral, phenela: „Ki škola niked na sikavđe amen so postojini o Stvoritelj. Odolese, mislinđum so o Stvoritelj na postojini. Ked hine man 22 berš, vaćerđum e Jehovase svedokonencar. On koristinđe i Biblija te mothoven maje sose tano logično te verujina so postojini o Stvoritelj“ (w21.08 15 ¶4-5).

Kobor tano o Jehova šukar amen dikhaja ked čitinaja i Biblija ja ked šunaja kola šukar buća ov ćerđa averenđe. Ama, te šaj ćaće te haljova kobor tano o Jehova šukar, amen kokri valjani te osetina odova. Sar šaj te ćera odova? Zamislin so mangeja te služine ki punovremeno služba. Te šaj te ispunine odova cilj, šaj ka valjani te ćere disave promene ko to životi. Šaj but putija šunđan so ako ćhivaja e Devleso Kraljevstvo ko prvo than, o Jehova ka del amen odova so ćaće valjani amenđe. Ama, šaj niked na osetinđan sar o Jehova ćerela odova lično tuće (Mat. 6:33). Amen isi amen vera ko e Isuseso obećanje. Odolese, pazinaja sar trošinaja o pare, na ćeraja odobor buti sar angleder hem daja sa amendar pobuter te đa ki služba. Ked ćeraja akala buća, kokri dikhaja sar o Jehova ćaće brinini pe amendar. Ađahar, „probinaja“ kobor tano o Jehova šukar (w21.08 26 ¶2).

Da li hem avdije dikhaja isto problemi? Ja. But religiozna vođe tane bahtale ked o ugledna manuša, o barvale hem okola kolen o sveto smatrini soj tane mudra, ovena članija ko olenge crkve. On prihvatinena asavke manušen, iako on ćerena o buća kola nane premalo e Devlese merilija. Ama, odola ista religiozna vođe mrzinena e Jehovase slugen kola tane moralno čista hem revna sose nane ugledna anglo akale svetose jaćha. Sar so o apostol Pavle phenđa, o Devel birini okolen kolen o sveto smatrini soj tane beznačajna (1. Kor. 1:26-29). Ama, anglo Jehova sa olese verna sluge tane but vredna. So šaj te ćere te na utičini akava sveto upro tute? (Mat. 11:25, 26). Ma dozvolin upro tute te utičini odova sar o sveto dikhela upro e Devleso narodo. Prihvatin odova so o Jehova koristini samo e ponizna manušen te ćeren olesi volja (Ps. 138:6). Isto ađahar, razmislin kobor buća o Devel ćerđa ađahar so koristinđa okolen kola anglo e manušenge jaćha nane mudra hem but školujime (w21.05 8 ¶1; 9 ¶5-6).

O apostol Pavle hine zahvalno asi pomoć koja dobinđa. Ov hine jekh ponizno manuš kova prihvatinđa pomoć kotar pe phralja hem phenja (Fil. 2:19-22). O phure phralja hem phenja ko but načinija šaj te mothoven soj tane zahvalna aso terne ki skupština. Ako o terne mangena te vozinen tumen, te ćinen odova so valjani tumenđe, ja te pomožinen tumen ko disavo aver način, prihvatinen olengi pomoć. Ma bistren so prekalo lende, o Jehova mothovi tumenđe kobor mangela tumen. Ađahar ka oven pana popaše e ternencar ki skupština. Ama, hem tumen šaj te pomožinen olenđe te oven pana popaše e Jehovaja. Vaćeren lenđe kobor hijen bahtale ked dikhena sar pomožinena ki skupština. Odvojinen vreme olenđe hem vaćeren lenđe so nakhljen ko tumaro đivdipe. Ked ađahar ćerena, ka mothoven so hijen zahvalna e Jehovase aso terne ki skupština (Kol. 3:15; Jov. 6:44; 1. Sol. 5:18; w21.09 11-12 ¶12-13).

O Jehova mangela amare phralen hem phenjen. Podijekh puti, šaj te ovel amenđe pharo te mothova so mangaja amare phralen hem phenjen. Odova tano ađahar, sose sare avaja ando različita kulture ili averćhane bariljam. Uzo odova, sare amen grešinaja hem šaj te povredina jekh jekhe. Ipak, svako amendar šaj te ćerel diso te šaj o mangipe maškaro amende te ovel pana pobaro. Odova šaj te ćera ako oponašinaja e Jehova (Ef. 5:1, 2; 1. Jov. 4:19). O saosećajno manuš mangela te pomožini hem te utešini averen. Odoleja sar ponašinđa pe premalo manuša, o Isus mothovđa kobor o Jehova brinini pe olendar (Jov. 5:19). Jekhvar, „ked dikhlja bute manušen“, o Isus „sažalinđa pe upro lende sose hine mučime hem našalde sar o bakre bizo pastiri“ (Mat. 9:36). O Isus na samo so sažalinđa pe upro lende, već hem ćerđa diso te bi pomožini lenđe. Ov saćarđa e nabormen hem olese lafija dinđe snaga okolenđe kola hine „umorna hem opteretime“ (Mat. 11:28-30; 14:14; w21.09 22 ¶10-11).

O Jehova tano milosrdno sose mangela amen. O apostol Pavle phenđa so o Devel tano „but milosrdno.“ Ov objasninđa so o Jehova tano milosrdno premalo pomazanikija, sose iako tane nesavršena, ov ipak dinđa len prilika te živinen ko nebo (Ef. 2:4-7). Ama, o Jehova nane milosrdno samo premalo olende. O psalmista David pisinđa: „O Jehova tano šukar premalo sare, oleso milosrđe dićhola ko sa olese delija“ (Ps. 145:9). Odolese so mangela e manušen, ov mothovi milosrđe ked god šaj. O Isus but šukar penđari pe Dade hem đanela kobor tano milosrdno. Angleder o Isus te avel ki phuv, on duj beršencar hine zajedno ko nebo (Posl. 8:30, 31). Odolese, o Isus but putija dikhlja kobor tano o Devel milosrdno premalo nesavršena manuša (Ps. 78:37-42). Ked hine ki phuv, o Isus sikavđa e manušen ando odova kobor tano oleso Dad milosrdno (w21.10 8-9 ¶4-5).

Jekhvar, o Isus molinđa pe: „Mo Dad, proslavin to anav.“ O Jehova odgovorinđa ki odija molitva hem tegani kotar nebo šundilo baro glaso kova phenđa so ka ćerel odova. Đi hine ki phuv, o Isus vaćerđa e manušenđe kotar pe Dadeso anav (Jov. 17:26). Odolese hem o prava hrišćanija koristinena e Devleso anav hem vaćerena averenđe kotar odova anav. Sigate palo odova so i skupština hine osnujimi, o Jehova „obratinđa pažnja ko manuša ando avera narodija te šaj olendar te stvorini e narodo kova ka akhari oleso anav“ (Dela 15:14). O hrišćanija ko prvo veko koristinđe e Devleso anav hem pomožinđe averenđe te đanen pobuter kotar odova anav. On koristinđe e Devleso anav ked propovedinđe hem ked pisinđe i Biblija. Ađahar mothovđe so on tane jedino narodo kova vaćeri ando e Devleso anav (Dela 2:14, 21). Avdije, jedino e Jehovase svedokija vaćerena ando Devleso anav (w21.10 20-21 ¶8-10).

E Jehovaso verno mangipe večno trajini. Ko 136. Psalam, akala lafija pominena pe 26 putija. Ko prvo stiho pisini: „Zahvalinen tumen e Jehovase, sose tano šukar, oleso verno mangipe trajini večno“ (Ps. 136:1). Kotar 2. đi o 26. stiho, o lafija „oleso verno mangipe trajini večno“ ponovinena pe. Đi čitinaja akava psalam, amen dikhaja so o Jehova uvek mothovi po verno mangipe hem odova ćerela ko razna načinija. O lafija „oleso verno mangipe trajini večno“ uverinena amen so oleso mangipe niked na ka ćhinavđol. But ohrabrini amen odova so đanaja so o Jehova niked na ka aćhavi amen. Umesto odova, ov tano paše amencar hem uvek tano uzo amende posebno ked tano amenđe pharo. Sose tano šukar odova te đana? Ked đanaja so o Jehova tano amencar, odova dela amen radost hem snaga koja valjani amenđe te šaj te ikljova ko krajo amare problemencar hem te nastavina te služina olese (Ps. 31:7; w21.11 4 ¶9-10).

Sare amen đanaja so pana hari sa o religije kola lađaćerena e Devle ka oven uništime, so o Gog ando Magog ka napadini amen hem so o Armagedon ka avel. Ked razmislineja ando akala buća, da li podijekh puti brinineja tut ja daraja? Da li nekad pućljan tut: „Ked sa akava ka ovel, da li ka aćhovav verno đi o krajo?“ Ako razmislinđan akalestar, tegani e Isusese lafija, ando avdisutno citati, but ka pomožinen tut. O Isus phenđa pe učenikonenđe: „Ma brininen tumen. Mothoven vera.“ I zorali vera ka pomožini amen te istrajina. Amen šaj te zorjaćera amari vera ađahar so ka razmislina ando odova so akana ćeraja ked isi amen kušnje. Tegani, ka dikha kuri amari vera valjani te ovel pana pobari. Svako puti ked nakhaja disavi kušnja, amari vera ovela pana pozorali. Odova ka pomožini amen te istrajina ko kušnje kola ka oven amen (w21.11 20 ¶1-2).

O apostol Pavle podstakninđa e Timoteje te del poklo najšukar ki služba (2. Tim. 4:5). Na primer, razmislin ando phralja kola živinena ko phuvja kaj tane amare aktivnostija ograničime ja amaro delo tano zabranimo. E Jehovase sluge isi len razna problemija hem odova šaj te lel olengi snaga. Na primer, but phralja hem phenja valjani te ćeren but buti te šaj te obezbedinen o osnovna buća pe porodicaće. On bi mangena te đan pobuter ki služba, ama ko krajo ando kurko nane len snaga. Avera tane but naborme, phure ja čak našti te ikljon ando ćher hem odolese šaj te ćeren but hari ki služba. A disave uvek mislinena so nane vredna anglo e Jehovase jaćha. Bizo obzir save problemija isi amen, o Jehova šaj te del amen snaga te borina amen hem te nastavina te služina lese najšukar so šaj (w21.05 20 ¶1-3).

Disavo puti o manuša šaj te pheren amari godi te ćera diso so na sviđini pe e Jehovase. Tegani, svako amendar valjani te odlučini so ka ćerel. Te dikha jekh zanimljivo načelo kova pisini ki Levitska 19:19. Odothe pisini: „Ma akhar o šeja kola tane ćerde ando duj različita materijalija.“ Odova zakon hine dindo sose o Izraelcija valjanđe te oven averćhane ando avera narodija. Amen avdije na ićeraja amen ko Mojsijeso zakon hem šaj te akhara različita šeja kola tane ćerde ando različita materijalija, sar soj tane pamuk, poliester, vuna hem viskoza. Ama, amen na mangaja te ova sar o manuša kola vaćerena hem ćerena o buća kola nane premalo Devleso Lafi. Amen mangaja amare rođakonen hem avere manušen, ama ked valjani te ana disave važna odluke, mangaja te šuna e Jehova, iako sebepi odova ka ova averćhane averendar. Odova tano but važno ako mangaja te ova sveta (2. Kor. 6:14-16; 1. Petr. 4:3, 4; w21.12 5 ¶14; 6 ¶16).

O drumo kova legari ko životi šaj te arakhi pe. O Isus phenđa: „Ako ka ićeren tumen ko me sikljoviba, ćaće hijen me učenikija, hem ka penđaren o ćaćipe hem o ćaćipe ka oslobodini tumen“ (Jov. 8:31, 32). Šukar tano so više na ćereja odova so avera ćerena hem so mangeja te đane o ćaćipe. Tu proučinđan e Devleso Lafi te šaj te sikljove so o Devel rodela tutar hem ićereja tut ko odova so o Isus sikavđa. Isto ađahar, sikljiljan so o Jehova rodela amendar te odbacina o hovavne sikljoviba hem te ćhinava o praznikija. Ked mangljan te ćere odova so o Jehova rodela tutar dikhljan so odova nane lokho (Mat. 10:34-36). Isto ađahar, šaj na hine tuće lokho te ćere disave promene ko to životi. Ama, ćerđan odova sebepi so mangeja te Dade. Šaj samo te zamisline kobor tano bahtalo sebepi so ćerđan sa odova (Posl. 27:11; w21.12 22 ¶3; 23 ¶5).

O Mojsije tano šukar primer sose prihvatinđa o savet palo odova so ćerđa jekh bari greška. Jekhvar, ov hine but holjamo hem na dinđa slava e Jehovase. Sebepi odova, ov naštine te khuvel ki Obećimi phuv (Br. 20:1-13). Ked o Mojsije pućlja e Jehova palem te razmislini andi pi odluka, o Jehova phenđa lese: „Ma vaćer maje više odolestar“ (Pon. zak. 3:23-27). Ama, o Mojsije na holjanđa. Umesto odova, ov prihvatinđa e Jehovasi odluka hem o Jehova pana mukhlja le te ovel vođa ko Izrael (Pon. zak. 4:1). O Mojsije tano šukar primer amenđe sose prihvatinđa o savet kova dobinđa. Odova mothovđa ađahar so aćhilo lese verno iako naštine te khuvel ki Obećimi phuv. Amare šukaripase tano te ova sar o Mojsije hem sar avera verna manuša (Posl. 4:11-13). But amare phralja hem phenja oponašinđe olengo primer hem prihvatinđe o savet (w22.02 11 ¶9-10).

Ko jevend, ko 32. berš ki nevi era, e Isuseso amal o Lazar naborsalo hem mulo (Jov. 11:3, 14). O Lazar hine le duj phenja, i Marija hem i Marta. O Isus but manglja odole porodica. Ked i Marta šunđa so o Isus avela, oj prastandoj ikljilji anglo leste. Šaj samo te zamislina kobor hine laće pharo ked phenđa e Isusese akala lafija: „Gospode, te ove hine akate, mo phral na bi merela“ (Jov. 11:21, 32, 33). O Isus runđa sose dikhlja kobor bari dukh isi len i Marija hem i Marta. Ako našalđan nekas kas mangljan, o Jehova haljola tut. O Isus tano isto sar po Dad (Jevr. 1:3). Ked o Isus runđa, ov ađahar mothovđa amenđe sar o Jehova osetini pe ked neko merela (Jov. 14:9). Ako našalđan nekas kas mangljan, ov sigurno so o Jehova na samo so dikhela ti dukh, već olese tano pharo sebepi toklo. Ov mangela te saćari to phago vilo (Ps. 34:18; 147:3; w22.01 15 ¶5-7).

Ako odvojineja vreme te vaćere e Jehovaja, te šune le hem te razmisline olestar, odova šaj but te pomožini tuće. Sar prvo, ka ane šukar odluke. Ki Biblija pisini: „Ko družini pe e mudro manušencar, ka ovel mudro“ (Posl. 13:20). Sar dujto, ka ove pana pošukar učitelj. Ked proučinaja nekasa, amaro najvažno cilj tano te pomožina odole manušese te ovel paše e Jehovaja. So pobuter molinaja amen e Jehovase hem sikljovaja olestar, pana pobuter ka manga le hem pana pošukar ka đana sar te pomožina e manušese kasa proučinaja hem ov te mangel e Devle. Ađahar hine hem e Isuseja. O Isus pherde vileja vaćerđa ando po Dad. Odolese, ked o učenikija dikhlje odova hem on počminđe te mangen e Jehova (Jov. 17:25, 26). Sar trito, ti vera ka ovel pana pozorali. Svako puti ked molineja tut e Devlese te del tut godi, te utešini tut hem te pomožini tut hem ked dikheja sar o Jehova odgovorini ko te molitve, ti vera ovela pana pozorali (1. Jov. 5:15; w22.01 30 ¶15-17).

O Jehova podstaknini amen te cida amendar o pogrešno razmislibe hem o lošna navike sose but mangela amen hem mangela te uživina ko životi (Is. 48:17, 18). Ov đanela so okola kola mukhena te legaren len o želje povredinena kokri pes hem averen. Odova but dukhala le. Amari porodica ja disave ando amare amala šaj ka maren amenđe muj sose mangaja te menjina amen (1. Petr. 4:3, 4). On šaj te phenen amenđe so isi amen pravo te ćera odova so mangaja hem so na valjani te mukha averen te phenen amenđe so valjani te ćera. Ama, odova so neko na šunela e Jehova na značini so ov ćaće ćerela sa so mangela. U stvari, ov mukhela o Beng hem oleso sveto te utičinen upro leste (Rimlj. 12:1, 2). Sare amen valjani te odlučina: da li hem ponodri i purani ličnost ka ovel deo amendar ja ka mukha e Jehovase te pomožini amen te ova pošukar manuša (Is. 64:8; w22.03 3 ¶6-7).

Ked hor razmislinaja ando e Devleso Lafi odova pomožini amen te ovel amen ispravno stav premalo amare problemija. Te dikha sar i Biblija pomožinđa jekha phenjaće koja hine la bari dukh sebepi so našalđa pe rome. Jekh starešina phenđa laće so ki Knjiga ando Jov ka arakhi but šukar buća kola ka pomožinen laće. Đi čitinđa la, ki početka oj kritikujinđa e Jove sebepi so hine le pogrešno razmišljanje. Ki pi godi, oj phenđa: „Jov! Ma ov odobor negativno!“ Ama, palo odova haljilji so hem oj razmislinđa sar o Jov. Odova pomožinđa laće te menjini po način sar dikhela ki pi situacija hem dinđa la snaga te borini pe odoleja so našalđa pe rome. Pana jekh način sar o Jehova pomožini amenđe tano prekalo amare phralja hem phenja. O apostol Pavle jedva ađićerđa te ohrabrini pe pekle phraljencar hem phenjencar (Rimlj. 1:11, 12; w21.05 22 ¶10-11; 24 ¶12).

E Izraelcenđe hine phendo: „Trin putija ko berš sa o murša ando to narodo nek aven anglo Jehova, to Devel, ko than kova ov ka birini“ (Pon. zak. 16:16). On morandilje te mukhen pe ćhera hem pe njive hem na hine niko ko šaj hine te arakhi olenge buća. Ama, o Jehova dinđa len po lafi: „Niko na ka mangel te lel ti phuv ked trin putija ko berš ka đa anglo Jehova, to Devel“ (Izl. 34:24). Sebepi so verujinđe e Jehovase, o Izraelcija đelje te slavinen odola praznikija. Odolese hine len but blagoslovija: pana pošukar haljilje e Devleso Zakon, razmislinđe ando Jehovaso šukaripe hem hine okolencar kola služinđe e Jehovase. Ked daja sa amendar te ova ko sastankija hem amen isi amen slična blagoslovija. Zamislin samo kobor tano o Jehova bahtalo ked daja kratko hem pripremimo komentari (w22.03 22 ¶9).

O Jehova sikavđa e Isuse sar te ispunini pi budućo uloga ked ka služini sar Prvosvešteniko. O Isus osetinđa kobor šaj te ovel pharo te šune e Devle ked isi tut but phare kušnje. Olese hine odobor pharo so molinđa pe „bare dukhaja hem asvencar.“ Odolese so o Isus osetinđa but bari dukh andral, ov šaj te haljol so valjani amenđe hem „šaj te pomožini amen“ ked „isi amen kušnje.“ Amen hijam but zahvalna e Jehovase so ćhivđa jekhe milosrdno Prvosvešteniko kova „šaj te haljol amare slabostija“ (Jevr. 2:17; 4:14-16; 5:7-10). O Jehova dozvolinđa o Isus odobor te patini te bi odgovorini ko jekh važno pućibe: Da li šaj o manuša te aćhon verna e Devlese čak ked tane ko bare kušnje? O Beng phenela so našti! Ov phenela so o manuša služinena e Devlese samo andi korist hem so na ka oven verna olese (Jov 1:9-11; 2:4, 5). O Isus aćhilo verno hem mothovđa so o Beng tano hovavno (w21.04 16-17 ¶7-8).

Angleder te krstini pe, jekh studenti mora te primenini odova so sikljola andi Biblija. Ked amaro studenti primenini odova so sikljola, tegani ov tano sar o razborito manuš ando e Isuseso poređenje. Odova manuš hor hanđa te šaj te ćerel po ćher ki stena (Mat. 7:24, 25; Luka 6:47, 48). Pomožin te studentese te menjini koro peste diso soj tano olese but pharo (Mar. 10:17-22). O Isus đanđa so e barvale manušese ka ovel but pharo te biknel sa pe buća (Mar. 10:23). Ama, o Isus ipak phenđa lese so valjani te ćerel odola promene ko poklo đivdipe. Sose? Odolese so manglja le. Disavo puti, šaj te bezdina amen te podstaknina amare studente te primenini odova so sikljola, odolese so mislinaja so pana nane spremno te ćerel disave promene (Kol. 3:9, 10). Ama, so posig ka vaćera olencar andi akija tema, odobor posigate o studenti ka ćerel promene. Ked vaćereja oleja odolestar, tu mothoveja lese so brinineja tut olestar (Ps. 141:5; Posl. 27:17; w21.06 3 ¶3, 5).

O apostol Petar phenđa so o Isus aćhavđa amenđe šukar primer sose istrajinđa iako hine le pharipa. Ama, isi but avera buća ko kola amen šaj te oponašina e Isuseso primer (1. Petr. 2:18-25). Ćaće, sa so o Isus vaćerđa hem ćerđa đi hine ki phuv tano šukar primer amenđe. Sar nesavršena manuša, da li amen ćaće šaj te oponašina e Isuseso primer? Ja, šaj. O Petar phenđa te đa palo e Isusese korakija ko sa. Ama, ov na phenđa so odova valjani savršeno te ćera. Ako daja sa amendar sar nesavršena manuša te sledina e Isusese korakija, tegani mothovaja so šunaja o savet kova dinđa o apostol Jovan: „Živinen sar so o Isus živinđa“ (1. Jov. 2:6). Ako đaja palo e Isusese korakija, amen ka ova pana popaše e Jehovaja. Sose šaj te phena odova? O Isus mukhlja amenđe but šukar primer sar šaj amare životoja te ugodina e Jehovase (Jov. 8:29). Odolese, ked đaja palo e Isusese korakija amen ugodinaja e Jehovase. Hem šaj te ova sigurna so amaro nebesko Dad ka ovel paše okolencar kola trudinena pe te oven oleja paše amala (Jak. 4:8; w21.04 3 ¶4-6).

O Jehova dikhela kobor šukar osobine isi amen hem kobor šukar manuša šaj te ova hem pomožini amen te ova oleja amala. Ako aćhovaja verna olese, ov ka aćhol paše amencar zauvek! (Jov. 6:44). Ako hijam uverime ko odova so o Jehova mangela amen, odova ka podstaknini amen te služina lese celone vileja čak ked tano amenđe pharo. Ki aver strana, ako sumnjinaja ko odova so o Jehova brinini pe amendar, ka našala amari snaga (Posl. 24:10). Ked hijam obeshrabrime hem ked počminaja te mislina so o Devel na mangela amen, tegani našti te borina amen protiv e Bengese napadija (Ef. 6:16). Disave phralengi hem phenjengi vera oslabinđa ked počminđe te sumnjinen ko odova da li o Jehova mangela len hem da li brinini pe olendar. So šaj te ćera ako počminaja te razmislina so o Devel na mangela amen? Amen valjani odmah te cida akala mislija andi amari godi. Molin tut e Jehovase te cidel tutar o mislija kola uznemirinena tut, hem te del tut „e Devleso mir“ kova ka arakhi to vilo hem ti godi (Ps. 139:23; Fil 4:6, 7). Setin tut so na hijan kokri (w21.04 20 ¶1; 21 ¶4-6).

Sar tu uljan e Jehovaso svedoko? Šaj šunđan i šukar vest ando te roditeljija, ando te kolege ja školska amala, ja šaj e Jehovase svedokija alje ko te udara (Mar. 13:10). Palo odova, neko odvojinđa po vreme hem but trudinđa pe te sikavi tut andi Biblija. Đi proučinđan, tu zamangljan e Jehova hem haljiljan so o Jehova mangela tut. O Jehova anđa tut ko ćaćipe hem akana, sar e Hristeso učenik, isi tut nada so ka živine večno (Jov. 6:44). Sigurno hijan but zahvalno e Jehovase sose podstakninđa nekas te sikavi tut ando ćaćipe hem sose prihvatinđa tut te ove oleso sluga. Akana ked penđarđam o ćaćipe, isi amen čast te pomožina averenđe hem on te oven amencar ko drumo kova legari ko večno đivdipe. Šaj tano lokho te propovedina kotar ćher ko ćher, ama šaj te ovel amenđe pharo te puća nekas te proučini i Biblija (w21.07 2 ¶1-2).